По шестой песни:
И поется кондак и икос (или мученичен, аще несть).Стихи́:
Врачу́ посе́чену бы́вшу Фалале́ю,
Бысть бы́лие ко отреше́нию вся́кой стра́сти.
Сей бя́ше при Нумериа́не царе́, нарица́емь от Лива́на. Отца́ Верики́я, и Ромили́и ма́тери сын, во уче́нии быв враче́встей хи́трости. И ят бысть в Наза́рве вторы́я Килики́йския епа́рхии, в Елеони́и кры́яся. И приведе́н к Фео́дору кня́зю. И я́ко не поко́ршуся ему́ е́же пожре́ти и́долом, повеле́ проверте́ти но́зе его́, и у́жи стремгла́в того́ пове́сити. Слуга́м же удержа́стася о́чи боже́ственою си́лою, и вме́сто свята́го дре́во проверте́вше пове́сиша. И сего́ ра́ди бие́ни бы́шя кня́зем, мня́щу я́ко руга́ются ему́. И́же и два от них Алекса́ндр и Асте́рий, пресла́вное чу́до ви́девша ве́роваста во Христа́, и́же мече́м главы́ и́ма отсеко́ша. В недоуме́нии же быв иге́мон, и восхоте́ сам проверте́ти гле́зна свято́му. Да внегда́ хотя́ше воста́ти со стола́, приле́пнуша за́дняя его́ ко столу́, и не возмо́же воста́ти. Его́же ви́дев святы́й и поми́ловав, помоли́ся, и сотвори́ его́ со стола́ воста́ти. О такове́м же чудеси́ мно́гим ве́ровавшым во Христа́. Мучи́тель же пребы́сть жестоку́я неве́рием, и нача́т верте́ти гле́зна его́, и а́бие усхо́ста ру́це ему́. И па́ки получи́ цельбу́ от свята́го. Посе́м повеле́ша воврещи́ его́ в мо́ре, и изы́де неврежде́н, нося́ белу́ оде́жду. Пото́м звере́м на суди́щи вдан бысть, и па́ки невреди́м быв. И во Еде́се Егеа́дстем гра́де мече́м главу́ его́ отсеко́ша. Соверша́ет же ся собо́р его́ в муче́нии его́, су́щем внутрь свята́го му́ченика Агафони́ка.
В то́йже день святи́и му́ченицы ве́ровавше Фалале́ом, мече́м сконча́шася
Стихи́:
Внят Асте́рие посе́чен главо́ю,
Звезда́, наставля́ющия Алекса́ндра к мечу́.
В то́йже день свята́го му́ченика Асколо́на
Стихи́:
Еги́птянин язы́ком Аскала́ огнь терпи́т,
Боже́ственыя про́поведи ра́ди, о́гненый язы́к.
Той бе от страны́ еги́петския от Вифаи́ды ят быв Ариа́ном кня́зем, и свя́зан и вопроше́н, и Христа́ испове́да со дерзнове́нием. Того́ ра́ди пове́шен быв, и ногты́ желе́зными стро́ган бысть по ре́бром. И по сих вве́ржен бысть в темни́цу я́ко мертв. И иду́щу кня́зю по реце́, и помоли́ся святы́й не приити́ ему́ на су́хо а́ще не испове́дает Христа́. И держа́ его́ река́, и не мо́же изы́ти. И возвести́ ему́ святы́й: Напиши́ на ся писа́нием, и пропове́ждь, я́ко несть ино́го бо́га, ра́зве Христа́ Бо́га на́шего. И а́бие посла́в приведе́ свята́го пред ся, и пове́си и́, и поджже́ ре́бра его свеща́ми. И ка́мень навяза́ нань, и вве́рже и́ в ре́ку. И ту коне́ц муче́нию прия́т, и жизнь ве́чную.
В то́йже день страсть свята́го му́ченика Филите́ра и и́же с ним
Той святы́й му́ченик Филите́р, бе от никомиди́йскаго гра́да, мужь добр и кра́сен, вла́сы главны́я име́я и браду́ белу́. Христия́н же сый. Того́ ра́ди ят бысть от неве́рных. И предста́ Диоклитиа́ну царю́, и Христа́ со дерзнове́нием пропове́да, бие́н бысть кре́пко, и вве́ржен бысть в пещь о́гнену, и изы́де без вреда́. И удиви́ся Диоклитиа́н, и отпусти́ его́. По сме́рти же Диоклития́не прии́м ца́рьство зять его́ Максимия́н, и па́ки ят свята́го, и мно́го му́чив и́. И мно́га сотвори́в чудеса́, и мно́ги обрати́ ко Христу́. И посе́м мече́м усекну́шя его́. И ины́х пятьдеся́т огне́м сконча́шася. А 60 их мечи́ сконча́шася. И ту же с ни́ми му́ченица Икириаки́я последи́ всех мече́м сконча́ся.
В то́йже день преподо́бный Фала́сие ми́ром сконча́ся
Стихи́:
Фала́сие во гро́бе обита́в,
То́чит благода́тная ми́ра от гро́ба
В то́йже день святы́й Ма́рко, пусты́нный ми́ром сконча́ся
Стихи́:
Продаде́ Ма́рку Еде́м, вели́кую огра́ду,
И́же огра́ду обреты́й на погребе́ние Христо́с дре́вле.
В то́йже день е́же о Госпо́дней Па́сце неде́ля всех святы́х
Стихи́:
Христа́ моего́ воспева́ю вся дру́ги,
И́же что бу́дет во всех е́же бы́ти.
В то́йже день преподо́бнаго отца́ на́шего Ла́сия, свята́го му́ченика Костра́та и свята́го Проко́пия и Антио́хия
В то́йже день пе́рвое пренесе́ние моще́м святу́ю новоявле́нную му́ченику Бори́са и Гле́ба
Кня́зи ру́сстии Изясла́в и Все́волод, сове́т сотвори́вше с митрополи́том Гео́ргием, и с про́чими епи́скопы и с преподо́бным игу́меном Феодо́сием пече́рским да пренесу́т мо́щи святу́ю му́ченику, Бори́са и Гле́ба. И взе́мше мо́щи ею́ на ра́му свою́, и пренесо́шя в це́рковь. И отверзо́шя ра́ку, и любо́вию целова́вше мо́щи ею́. И испо́лнися це́рковь благоуха́ния. И та́ко сотвори́ша с пе́сньми и хвала́ми пра́здник све́тел святы́ма му́ченикома.
В то́йже день сло́во от патерика́
Мних Моисе́й, и́же бе на ка́мени, велми́ томи́мь от бесо́в на похо́ть любодея́ния. И отню́д не моги́й седе́ти в ке́лии свое́й, шед возвести́ отцу́ Иси́дору. И умоли́ его́ ста́рец, па́ки возврати́тися в хи́жу свою́, и не послу́шаше его́ Моисе́й, глаго́ля: «Не могу́ о́тче». Пое́м же его́ Иси́дор возведе́ и́ на го́рницу, и рече́: «Зри к за́паду». И воззре́в, ви́де мно́жество де́мон, и бе́ша стра́шни и мо́лвяще к бра́ни. Глаго́лаже ему́ па́ки а́вва Иси́дор: «Воззри́ к восто́ку и согля́дай». И воззре́в ви́де безчи́сленыя наро́ды а́нгельски просла́влены. И рече́ а́вва Иси́дор: «Си́и суть посыла́еми ко мни́хом от Го́спода на по́мощь, и за́паднии суть борю́щеся с ни́ми. Бо́ле же у́бо есть су́щых с на́ми». И та́ко похвали́ Бо́га Моисе́й, прия́т дерзнове́ние, и возврати́ся в хи́жу свою́.
Рече́ ста́рец : «Бог терпи́т грехи́ мирски́я. Пусты́нныя же грехи́ не терпи́т. Ви́диши ли бра́те, я́ко не по мирско́му числу́, и и́же от ми́ра изше́л есть, ра́вно истя́зан бу́дет. И́мать у́бо он отве́ты мно́ги принести́. Мы же кото́рый отве́т и́мамы принести́. Вои́стину лют огнь, и мно́гия му́ки уве́девшым во́лю Госпо́дню, и сию́ презре́вшим, и свое́й во́ли после́довавшим. Ласкосе́рдствующе у́бо и со слажда́ющеся су́етными и маловре́менными. Глаго́лет: я́ко потре́бы ра́ди теле́сныя и́мам зла́то или́ ве́щи, да устрая́ю те́ло. До́бре глаго́леши, а́ще потре́бы те́лу прибира́еши, да устрая́еши е́. Не подо́бно есть про́чее, а́ще принесе́на бу́дут име́ния, или́ разли́чная бра́шна, к сим устремля́тися. Но потре́ба те́лу то́чию промышля́ти безмо́лвно. Где уже́ суть и́же толи́ка иму́ще, и па́ки друга́я и́щуще. И толи́ка яду́ще, и па́ки бо́льшая бра́шна жела́юще. А́ще де́лаеши, не прие́мли потре́бы. А́щели прие́млеши, не де́лай. Да не мо́лвиши: но и сия́ и о́на хо́щем. Се у́бо приведо́х ти вины́, и́миже ра́ди мню. Я́ко и́нок есть го́рше мирски́х осужде́н бу́дет. Мно́зи бо и миря́не чи́сто живу́ще, и ми́лостыни творя́ще. Сему́же ни бра́та своего́ ми́лующу, и творя́щу дом Бо́жий дом ку́пли, па́чеже де́лательство ко́рчемства, ка́ко ра́вно о́неми не осужде́н бу́дет.
Сего́ ра́ди по́дробну ре́хом приводя́щая на су́етие, да уве́девше бежи́м, и спасе́мся. Мним бо ся мно́зи вели́цы бы́ти оболче́нием о́браза, и глаго́ланием «Го́споди, Го́споди», и е́же слы́шати и́ноцы есте́ обеща́нием. Но во и́стину бра́тие, а́ще себе́ не соблюда́ем, го́рше мирски́х прихо́дит нам впа́сти в про́пасть, да ктому́ ни возопи́ти возмо́жем: стра́ха у́бо потре́ба, и смире́ния во и́стину. Мно́жайшии бо от бра́тии на́шых во смире́нии мня́щеся бы́ти, и и́ночески жи́ти, своя́ же хоте́ния и́щут испо́лнити. Бо́жии у́бо во́ли не повину́ются, но свои́ми во́лями содержи́ми суть, и су́етными печа́льми и молва́ми, е́же вма́ле иска́вше мно́го, и не обря́щут. Нас же да сподо́бит Госпо́дь во вся́ко бла́го. Ему́же сла́ва, ны́не и при́сно и во ве́ки веко́в. Ами́нь.
В то́йже день сказа́ние о обре́тении, и о пренесе́нии честны́х моще́й вели́каго архиере́я Алекси́я митрополи́та Ки́евскаго, и всея Росси́и чудотво́рца.