Стихи́:

Сообе́щно имя́ху землена́го ца́рствия вене́ц,

Име́ют и о́бщий вене́ц небе́сный.

Соу́мре ма́тери Константи́н в два́десять пе́рвый.

Вели́кий сей блаже́нный, и пресла́вный в царе́х Константи́н, сын бя́ше Ко́нсты Зеле́наго, и Еле́ны честны́я. Ко́нста бо внук бя́ше от дще́ре Клавди́я пре́жде ца́рствовавшаго в Ри́ме, преди́ Диоклитиа́нова и Кари́нова ца́рства. Сей Ко́нста от Диоклитиа́на Вале́рия прия́т о́бщник бы́ти ца́рствия его́. С Максимиа́ном Гале́рием ины́м всем е́же на Христа́ гоне́ние зе́льно подви́жущим: Еди́н сей кро́тостию и ми́лованием употребля́яся, Христа́ у́бо отрица́ющихся, сих отрева́ше я́ко недосто́йных. Наипа́че тех и́же о Христо́ве ве́ре подвиза́ющихся стяжава́ше, и сове́тники и о́бщники ца́рских повеле́ний творя́ше. Сей Константи́на возлю́бленаго сы́на, по сих пе́рваго христиа́ном хотя́ща царя́ бы́ти, благоче́стию поучи́в. Прее́мника своего́ ца́рствия оста́вив в Ретани́йских острове́х. И́же уви́дев я́же на Рим бы́вшая от Максе́нтия сы́на Ерку́лиева, бе́дная и отврати́тельная и скве́рная и ме́рзская, ре́вностию боже́ственою подвиза́емь, устреми́ся нань, Христа́ призыва́я сопосо́бника. Его́же уви́дев Бог чи́стое души́, пе́рвее у́бо ему́ во сне яви́ себе́. Посе́м же в полу́дне звезда́ми зна́мение кре́стное начерта́в, напи́сано, «сим побежда́й». Па́ки сему́ и досто́йным, человеколю́бец Бог изъяви́ти сподо́би. Тем же упова́в о́бразу честна́го Креста́. Сотвори́в же того́ зла́том, и вшед в Рим, самого́ у́бо губи́теля Максе́нтия низложи́ на реце́ Ти́вере уто́пша с Вульви́ева моста́. Ри́мския гра́жданы сего́ мучи́тельства свободи́. Тогда́ воста́в от Ри́мскаго гра́да, путе́м иды́й, хотя́ше созда́ти град в свое́ и́мя в Или́и, иде́же брань троя́ном со е́ллины реко́ша бы́ти. Извеще́нием же боже́ственым возбраня́ется, па́че в Византи́и от Бо́га повеле́н свой град созида́ти. Те́мже боже́ственому после́довав хоте́нию, зи́ждет богохрани́мый сей град во и́мя свое́. Его́же и своея́ ве́ры нача́ток возлага́ет Бо́гу. Изыска́в же я́же в нас ве́ры изве́ства, отвсю́ду первосвяти́тели, в Нике́ю со́брал есть, и́миже правосла́вная ве́ра пропове́дася, и Отцу́ Единосу́щен Сын по́знан бысть. А́рию же и и́же с ним с богоме́рзским хуле́нием пре́даным бы́вшим ана́феме. Не то́кмо же, но и ма́терь свою́ Еле́ну на взыска́ние честна́го Дре́ва, на нем же Христо́с Бог наш вознесе́ся пло́тию, посла́в во Иеросали́м, и та́ко восприя́т е́. О́ва у́бо в саме́х Иеросали́мех возложи́вши. О́важе к ца́рствующему гра́ду прене́сши, и́же и Константи́нь град нарече́ся. Вонь же доспе́вши, житие́ разреши́. Вели́кий же Константи́н обновле́ньми и торжествы́ град просвети́в. И ма́ло что преше́д, четы́ридесяте втора́го ле́та , в не́же ца́рствовати нача́т, проти́ву пе́рсом ополче́ния косну́вся, и в не́коем и́же в Никомиди́и сел быв, ко Го́споду отъи́де. И к своему́ провожда́ется гра́ду по́честьми и стрета́ньми великоле́пне венчава́емь, и в свяще́ннем хра́ме святы́х апо́стол полага́ется. От нача́ла же ми́ра в ца́рство его́ бысть пе́рвый вселе́нский собо́р, в ле́то пять ты́сящь осмь сот пятьдеся́т пе́рвое. Четы́редесять и вторы́й царь, от А́вгуста быв. Соверша́ет же ся его́ собо́р во святе́йшей Вели́цей це́ркви, и во святы́х апо́столех, и в боже́ственем его́ хра́ме, оби́тели Кисте́рнския. Патриа́рху ку́пно с царе́м и сигкли́том, с литие́ю та́мо приходя́щу, и боже́ственую Литурги́ю соверша́ющу.

Константи́н вели́кий пе́рвый царь христиа́нский бысть, сын у́бо Ко́нсты ри́мскаго царя́. Еди́н же сый Ко́нста па́че ине́х царе́й, призыва́ше промышле́ние от Вы́шняго, и́долом же не внима́ше. Сего́ ра́ди и христия́ны ви́дя му́чимы ми́ловаше. И сы́на своего́ уча́ше го́рняго же промышле́ния проси́ти по́мощи, а не и́дольския. Е́же по сме́рти отца́ своего́ боря́ся с Максе́нтием стры́ем свои́м. Призва́в бо Вы́шняго про́мысл, и ви́де честны́й Крест на небеси́ и глас слы́ша, Константи́не, сим побежда́й враги́ своя́. И соде́ла о́браз дре́вом, я́вльшагося ему́ Креста́. И вопроси́ е́ллин, и ине́х идолослужи́тель, глаго́ля, ко́его бо́га се есть зна́мение; Они́ же реко́шя, се несть от на́шых бого́в, но си́ла небе́снаго Царя́. Посе́м уве́дев от христия́н и призва́ Селиве́стра ри́мскаго епи́скопа, и той научи́ его́ ве́ре Христо́ве, и крести́вся от него́ Константи́н. И сокруши́ и́долы, и куми́рницы разори́, и идолослужи́тели погуби́, и созда́ це́ркви со всем до́мом и по градо́м всех святы́х. Посе́м пусти́ ма́терь свою́ во Иеросали́м на взыска́ние честна́го Креста́, и та обрете Крест Христов и святыя гвоздия. И ино много испра́виста, с ми́ром ко Го́споду отъидо́ста. Мно́жество люде́й от язы́к Бо́гови приведо́ста, и весь мир освяти́ста, и Христа́ просла́виста, и сама́ от него́ просла́влена бы́ста, и прия́ста ве́чный живо́т.

Стихи́:

Вмести́тися и́маши, иде́же есть Еде́мское село́,

И Феодори́та внутрь Вели́каго.

Стихи́:

Максимиа́н не всея́дец сый волк,

Но пита́тель церко́вный, у́мре.

Рече́ не́кто и́же во святы́х оте́ц наш во ските́, я́ко сказа́ ми а́вва Иоа́нн Ко́лов глаго́ля, я́ко восхоте́х не́когда ити́ посети́ти Паи́сия отхо́дника. И изше́д рече́ от своея́ ке́лии, идо́х до ме́ста иде́же живя́ше ста́рец по́стныя стра́сти терпя́ со мно́гим трудо́м. И я́ко прибли́жихся к две́рем верте́па его́, и слы́шах не́коего бесе́дующа со ста́рцем, и стах помно́гу, ожида́я конца́ по́вести. И я́ко не оста́вяше глаго́ля, уда́рих в две́ри. Прише́д ста́рец отвори́. И внидо́х, и бя́ше ста́рец еди́н, а и́же с ним бесе́дуяй не бе. И усумне́хся аз о том, и по моли́тве ядо́хом. И вопроша́х ста́рца глаго́ля: «Кто бе у тебе́ о́тче, и́же с ким глаго́лаше? Вне у́бо стоя́щу ми, слы́шах его́ глас». Он же отвеща́ рече́ ми: «Аз мнех я́ко ничто́же слы́шал еси́. А и́же слы́ша, се глаго́лю. Он вели́кий и ве́рный Константи́н и́же в царе́х святы́й пе́рвый христиа́ном царь, и́же с небеси́ прии́де ко мне печа́луя и рыда́я то́кмо и пла́ча глаго́лаше, я́ко не ве́дех ни разуме́х, я́ко толи́ка сла́ва, и толи́ко вели́чие и честь подава́ется мни́хом в Ца́рствии небе́снем, и́же в сем ми́ре убо́жество и озлобле́ние, и теле́сная ну́жда, и е́же друг ко дру́гу страннолю́бие, и и́на вся и́же терпя́т Го́спода ра́ди и Бо́га на́шего Иису́са Христа́. А́ще бо бых ве́дел, я́ко толи́ку прие́млют сла́ву, оста́вил бых вене́ц аз и порфи́ру и ски́петр, и маловре́менное ца́рство су́етное, и восле́довал бых житию́ мни́шескому. И отвеща́х ему́ глаго́ля, то не подарова́ ли тебе́ небе́сный Царь, е́же святы́м угото́ва сла́ву и честь, ве́рнаго ра́ди и боголюбе́знаго твоего́ ца́рства? Ей рече́, по́дал ми есть сла́ву и честь, но не толи́ку я́коже мни́хом. Ви́жу бо ны́не от них кри́ла о́гненая прие́млюща от Бо́га. Егда́ же отхо́дят от тя́гости теле́сныя, в те́хже кри́лех взима́ются и возвыша́ются и лета́ют, до́ндеже до́йдут са́мыя стены́ Иеросали́ма небе́снаго. И ту вше́дше вхо́дят ники́имиже стражьми́ возбраня́еми в боже́ственый Иеросали́м. Отвеща́х реко́х ему́, досто́йно и пра́ведно е́же о́нем честь и сла́ва, по достоя́нию дарова́на, я́ко ты все житие́ жит с жено́ю ку́пно веселя́ся и с детьми́ и боля́ры в са́нех, и в во́инстве ца́рстем, они́же и́хже не бе досто́ин мир, я́коже боже́ственый апо́стол рече́, оста́вльше оте́чество и род, и вся по́хоти теле́сныя, и все свое́ име́ние, лиша́еми скорбя́ще, озло́блени гла́дом и жа́ждею, и наготу́ терпя́ще душе́вныя ко́рмли не име́юще. Се же на́ма бесе́дующема к себе́, и се ты уда́ри в две́ри, тогда́ он взы́де отку́ду сни́де».

Брат и́де почерпсти́ воды́ от реки́, и обре́те жену́ перу́щу ри́зы, и прилучи́ся ему́ па́сти с не́ю. По сотворе́нии же греха́ взем во́ду идя́ше в ке́лию. Вскочи́ша же бе́си с по́мыслы оскорбля́ху его́ глаго́люще: Ка́мо про́чее и́деши? Несть ти спасе́ния, вску́ю ми́ра отщетева́ешися? Позна́в же брат я́ко хотя́т соверше́не его́ погуби́ти, глаго́ла к помышле́нием: Отку́ду мне приидо́сте, и оскорбля́ете мя я́ко да отча́ю себе́? Не согреши́х, и па́ки глаго́ла: Не согреши́х. Шед же в ке́лию свою́ безмо́лствоваше я́коже и пре́жде. Откры́же Бог еди́ному ста́рцу сосе́ду его́, я́ко о́нсица брат пад победи́. Прише́д у́бо к нему́ ста́рец, и глаго́ла ему́: Ка́ко еси́? Он же глаго́ла: До́бре о́тче. И па́ки глаго́ла ему́ ста́рец: Не оскорби́ ли ся ничто́же во днех сих? Глаго́ла ему́: Ничто́ же. И глаго́ла ему́ ста́рец: Откры́л ми есть Бог, я́ко пад победи́л еси́. Тогда́ брат пове́да ему́ слу́чшаяся ему́. Ста́рец же рече́ ему́: Вои́стину бра́те разсужде́ние твое́ сокруши́ло есть всю си́лу вра́жию. Бо́гу на́шему сла́ва, ны́не и при́сно и во ве́ки веко́в.