Стихи́:

Человекоя́дца слуг, глаго́лю во́лки,

Феодо́тово те́ло строга́нием снедо́ша:

Во езе́ро седми́м жена́м,

Ра́дуются жития́ мимотеку́щаго изше́дше.

Сия́ святы́я де́вы, и се́дмеро му́чениц, и́хже имена́ сия́ суть Теку́са, Алекса́ндра, Клавди́я, Фаи́на, Евфраси́я, Матро́на, Иу́лия, бя́ху от Анки́ры Гала́тския. Святы́й же Феодо́т жене́ приобщи́вся, и́же о тоя́ прихо́де благоче́стию прилежа́. О́бразом купе́ческим жи́то купу́я, и хле́бы меся́ Бо́гу приноша́ше, и тре́бующым подава́ше, повеле́ния ра́ди кня́зя Феоте́кна ме́рзскаго, от идоложе́ртвеных покропля́ти, и́же на пи́щу христиа́ном угото́ванная. Но и в темни́цах входя́ и держи́мых ве́рных потвержа́ше, и тем подава́ше пи́щу. Прилучи́ся не́когда улучи́ти, у нарече́ния седмию́ деви́ц, я́же еди́на нарица́шеся Теку́са. Я́же приведены́ бы́ша ко кня́зю, и не хотя́щим им пожре́ти, вда́ни бы́ша в под смех. И Христо́вою благода́тию сохране́ни бы́ша без тли. Та́же ка́мение на них навяза́вше, и в глубину́ е́зера вве́ржени бы́шя. И́хже святы́я мо́щи христиа́не взе́мше че́стне погребо́ша. Пото́м же оклевета́н бысть и Феодо́т, и явле́на себе́ и́щущым показа́. Предста́ Феоте́кну кня́зю, испове́дав Бо́га бы́ти рек. Тем пове́шен быв и стро́ган, и соль со о́цтом раство́рше по стро́ганым удесе́м его́ возлия́ша. И та́ко ме́чное прии́м посече́ние. Мо́щи же святы́х дев беззако́нный князь изъе́м, огню́ предаде́.

Стихи́:

Ко огню́ ды́шущи, триединому́дрено:

Исаа́кие, Симео́н, Вахфосо́й.

Симео́н и Иса́кий и Ва́хфий Христо́вы му́ченицы бы́ша от страны́ Пе́рския, при Саво́рии беззако́нном царе́. И я́ко христия́не, того́ ра́ди я́ти бы́ша от идолослужи́тель, и ну́дими бы́ша отврещи́ся Христа́, и поклони́тися со́лнцу и огню́. Они́ же отвеща́вше, ре́ша, не отве́ржемся Творца́ тва́ри, и со́лнцу и огню́ не поклони́мся. И связа́вше им ру́це и но́зе, и бие́ни бы́ша кре́пко. И посе́м вве́ржени в темни́цу, и седмь дний не прия́ша пи́щи. Посе́м изведе́ни бы́ша из темни́цы, и разли́чны му́ки претерпе́ша. И наконе́ц честны́я их главы́ отсеко́ша мечи́, и та́ко сконча́шася.

Сия́ свята́я Феодо́сия де́ва, бе от Константи́ня гра́да, благове́рну роди́телю дщи. Роди́тели же ея́ роди́ста по благове́щению. Ма́ти бо ея́ непло́ды бе, и и́де в монасты́рь святы́я Анастаси́и, моли́твы ра́ди, и яви́ся в полу́нощи свята́я Анастаси́я, и рече́ ей, не скорби́, за́чнеши бо и роди́ши. Убуди́вжеся жена́ от сна, и сказа́ сия́ му́жу своему́. Рече́ же мужь ея́, жив Госпо́дь, а́ще роди́тся му́жеск пол, дам е Бо́гови. А́ще ли же́неск, то святе́й Анастаси́и. По вре́мени же роди́ жена́ же́неск пол, и нарече́ и́мя ей Феодо́сия. По седьми́ же на́десяти ле́тех у́мре оте́ц и ма́ти ея́. Феодо́сия же шед в монасты́рь святы́я Анастаси́и, и бысть чернори́зица. Моля́щижеся ей в полу́нощи ста пред не́ю дия́вол, и рече́ ей, Феодо́сие супротиви́шимися. Аз взыщу́ на тя му́жа и́же тя сотвори́т отврещи́ся Христа́ и поклоня́ния святы́х ико́н. И по ма́ле Лео́ну ца́рьство прии́мшу, и воздви́же гоне́ние на христия́ны. И Ге́рмана патриа́рха изгна́ из Це́ркве. И святы́я ико́ны изве́рг и сокруши́. И покланя́ющыяся им убива́ше. Бе же на врате́х гра́да о́браз Христо́в муси́ею утворе́н, и того́ тесла́ми стеса́ти повеле́. Возле́зшу же по ле́ствице во́ину, и прите́кши свята́я Феодо́сия со ине́ми чернори́зицами, сопхну́ его́ до́лу и бысть мертв. И прише́дши Феодо́сия к патриа́рху Анаста́сию поноша́ше и врага́ Христо́вы Це́ркве нарица́ше и. Тогда́ у́бо посла́ царь мно́ги во́ины, и вся чернори́зицы повеле́ изби́ти мече́м. Святу́ю же Феодо́сию су́рово и неми́лостиво в темни́цу воврещи́. И повеле́ по сту ран на день возлага́ти на ню. Во осмы́й же день повеле́ води́ти ю по всему́ гра́ду, и водя́щи би́ти. Приведена́ же бысть посреди́ волу́яго торга́, и вступи́ на ко́зий рог водя́й ю, и того́ взем уда́ри ю в горта́нь, и та́ко предаде́ ду́шу свою́ Го́сподеви.

Стихи́:

Я́ко благоукрасова́нна не́како мече́м Христиа́на,

Ко страда́льчестей отсла́на бы́вши кле́ти.

Стихи́:

Евфроси́я впаде́ во глубине́ пучи́ны.

Возвесели́ же ся Спа́се, предста́вши Твоему́ престо́лу

В осминадеся́тый метну́ша Евфроси́ю во глубину́ морску́ю.

Стихи́:

Одесну́ю Отца́ Тебе́ зрит Сло́ве,

Епафроди́т десны́м дело́м друг.

Сей еди́н от седми́десяти быв епи́скоп сый в Ки́пре, во гра́де нарица́емем Андриа́ки. И мно́гия к Бо́гу присво́ив, и взы́де ра́дуяся ко Христу́ Его́же возлюби́.

Стихи́:

Иулиа́н, купи́нною страждбу́ изобре́те,

Святы́й Бо́жие воплоще́ние, Ему́же воображе́ние купина́.

Стихи́:

Анаста́сон живе́т бо́лий, у́мер в кинови́и,

Воскресе́ния жда о́бщаго наро́да.

Бра́те, егда́ на́йдет на тя лука́вый по́мысл, извлецы́ си мечь, е́же есть помяни́ страх Бо́жий, и посече́ши всю си́лу вра́жию. И в трубы́ ме́сто, име́й боже́ственыя кни́ги. Яце́м же о́бразом труба́ вопию́щи созыва́ет во́ины, та́ко и святы́я кни́ги вопию́ща на́ми, собира́ют по́мыслы на страх Бо́жий. И па́ки, яце́м же о́бразом труба́ вопию́щи во вре́мя ра́ти, воста́вит но́ваго неве́гласа прилежа́ти на супроти́внаго, та́ко и боже́ственыя кни́ги воста́вят прилежа́ти на благо́е, и укрепя́т тя на стра́сти. Те́мже бра́те мой понужда́й себе́ ча́сто почита́ти я́, я́ко да соберу́т ти по́мыслы, я́же расточа́ет враг свои́м злоко́знием. Воспряни́ возлю́блениче, воспряни́ изве́стно, потщи́ся при́сно чте́ниих прилежа́ти, да тя науча́т ка́ко подоба́ет избежа́ти се́ти вра́жия, и пости́гнути ве́чную жизнь. Воставля́ет бо и вразумля́ет ума́ прельще́на почита́ние боже́ственых книг, и да́рует ему́ ра́зум к Бо́гу. Пи́шет бо: «Упраздни́теся и разуме́йте, я́ко Аз есмь Бог». Слы́ши бра́те мой, я́ко ра́зум Бо́жий прие́млет, пра́зднуяй в Бо́жиих кни́гах и́стинным се́рдцем. Те́мже бра́те не лени́ся о души́ свое́й, но пра́зднуй чте́нием и моли́твами, я́ко просвети́т ти по́мысл и бу́деши соверше́н, и весь цел. Дух бо Святы́й есть глаго́ляй ти. Бу́ди я́коже еле́нь жада́я и жела́я приити́ на исто́чники водны́я, е́же есть на боже́ственыя кни́ги. Я́ко да испие́ши от них, и угаси́т ти жа́жду распала́ющую тя страстьми́. Не ве́сте ли люби́мицы мои́, я́ко на брак Сы́на Своего́ возва́л ны есть Царь ца́рствующым и Госпо́дь госпо́дствующым. Что у́бо лени́мся и не потщи́мся оде́жды чи́сты стяжа́ти, и свещи́ све́тлы, и ма́сло в сосу́дех на́шых? Я́ко наг никто́же не вхо́дит та́мо. А́ще же безо́чьствует кто, и вни́дет не имы́й оде́жди бра́чныя, ве́сте что постра́ждет таковы́й. Повеле́вшу у́бо Царю́, свя́жут ему́ ру́це и но́зе, и во тму кроме́шнюю вве́ргут, иде́же есть плачь и скре́жет зубо́м.

Подоба́ет у́бо моля́щемуся, ни до́лгих слове́с простира́ти, но ча́сто моли́тися. Ма́лы у́бо и ча́сто твори́ти моли́твы, Христо́с и Па́влу повеле́, и от ма́лых сложе́ний. А́ще бо на мно́жество простре́шися слове́с, и вма́ле облени́вся, вели́ко ме́сто да́си дия́волу. Присту́пит бо запя́ти тя, и от ума́ извести́ глаго́лемая. А́ще ли и кра́тки твори́ши моли́твы, на вся́ко вре́мя ча́сто восприе́мля, мо́жеши удо́бь целому́др бы́ти. Твори́ти же моли́твы со мно́гою бо́дростию. Да никто́же изве́та име́й глаго́ля, несть удо́бно моли́тися кому́ жите́йскими пеку́щуся вещьми́, и не близ обрета́ющуся до́му моли́твеннаго. Иде́же бо а́ще еси́ мо́жеши поста́вити же́ртвеник. Ника́коже бо брани́т ме́сто, ни возбраня́ет ме́сту вре́мя, а́ще ни коле́ну покло́ниши, а́ще ни в пе́рси толче́ши, ни ру́ку на не́бо возде́жеши, но то́кмо ум пока́жеши тепл, и всю испо́лнил еси́ моли́тву. Леть есть и на торг изле́зши, и осо́бь ше́ствующи моли́твы приле́жно твори́ти. Леть есть и за ку́плями стоя́щи моли́тися приле́жно, и ко́жи шию́щи, простре́ти ду́шу ко Влады́це, егда́ несть мо́щно в це́рковь вни́ти, ни есть где твори́ти приле́жны моли́твы; Нибо́ постыди́тся ме́стом Бог, но еди́ного и́щет то́кмо ума́ тепла́, и ду́шу целому́дрену. Что же глаго́лати моля́щемуся; Я́коже ханане́я она́ глаго́лаше, поми́луй мя Го́споди, я́ко дщи ми зле бе́сится. Та́ко и ты глаго́ли, Го́споди поми́луй мя, я́ко душа́ моя́ зле бе́сится. Вели́к бо есть бес грех.

Рече́ ста́рец, егда́ ви́диши Бо́га ми́лующа тя, и даю́ща души́ твое́й умиле́ние, тогда́ сатана́ воспомина́ет ти де́ла не́кая в ке́лии твое́й глаго́ля, сие́ де́ло ну́жно есть сотвори́ти е днесь, или́ иди́ ко о́нсицы, поне́же боли́т, и и́на друга́я. Сия́ же вся твори́т, да не оста́вит упраздни́тися и насы́титися сла́дости пла́ча. А́щели разуме́ет челове́к лесть сатанину́, и сохрани́т себе́ и упраздни́тся о свое́й души́ и моли́тве со усе́рдием, а́бие мо́жет таковы́и упраздни́ти искуше́ние, или́ от челове́к, или́ от бесо́в. И́бо сатана́ тогда́ бо́рет челове́ка зле, егда́ они́ бо́рют его́ до́бре. Гнев же и я́рость па́че всех погубля́ет умиле́ние и смире́ние от души́ и плачь. Есть же иногда́ седя́щу ти, обступа́ют тебе́ помышле́ния, и я́ко пче́лы бе́сове. А́бие же воста́ни и помоли́ся, и проходи́ся ма́ло, и они́ разы́дутся от тебе́. Рече́ па́ки, а́ще хо́щеши име́ти плачь, возлюби́ нищету́ и нестяжа́ние и смире́ние, и не восхощи́ име́ти до́брыя ве́щи в ке́лии свое́й. Егда́ у́бо взы́щет душа́ твоя́ не́что. И не обря́щет, воздыха́ет и смиря́ется, и тогда́ Бог утеша́ет ю, и да́рует ей мно́го умиле́ние. И егда́ вку́сит душа́ сла́дость Бо́жию, ненави́дит я́ко рещи́, и ри́зу ю́же но́сит, и са́мое те́ло свое́. Сия́ у́бо глаго́лю ти ча́до, я́ко а́ще не омрази́т челове́к те́ло свое́, я́ко врага́ и супоста́та своего́, ни в чем же творя́ угожде́ние его́, не возмо́жет свободи́тися от се́тей вра́жиих. Сеть у́бо дия́воля на и́нока, па́чеже на ю́наго, те́ло на́ше есть. Я́коже а́вва Иса́ия поуча́ет глаго́ля, не ухвати́ ру́ку не́чию, ниже́ почеши́ те́ло чуже́е кроме́ вели́кия боле́зни, но и се со стра́хом. Ниже́ кто да поче́шет тебе́, ниже́ косни́ся те́лу чуже́му. Ниже́ рцы кому́, возми́ вошь от главы́ моея́ или́ брады́, ниже́ от ожере́лия риз твои́х. Ниже́ спиш с ким до ма́ла в животе́ свое́м. Ниже́ даждь целова́ние безбра́дну, ни в само́й це́ркви, ниже́ приходя́щу от страны́, ниже́ близ его́ ся́деши, да не каса́ется тебе́. Мно́зи у́бо презре́вше ве́щи сия́, я́ко ма́лы и ничто́же су́ща, падо́ша от сих в про́пасть ве́лию, и погибо́ша. Вся́ко у́бо ве́лие зло от ма́лыя ве́щи начина́ется, и тогда́ быва́ет ве́лие. Храня́яй сия́ ча́сто соблюда́ет плачь и умиле́ние. Презира́яй же сих, вне пла́чя есть и слез. Сия́ же име́яй, ве́де, Бо́га с собо́ю и́мать. Бо́гу на́шему сла́ва, ны́не и при́сно и во ве́ки веко́в.