Стихи́:

Кресту́ водру́жшуся, освяти́ся земля́ дре́вле:

И ны́не я́вльшуся, освяти́ся не́бо.

При Константи́и царе́, сы́не вели́каго Константи́на царя́, и при Кири́лле патриа́рсе Иеросали́мском, в день свята́го Пентико́стия, в тре́тий час дне, яви́ся честна́го и животворя́щаго Креста́ о́браз стоя́щь све́том на небеси́, ви́дящим всем лю́дем. Превы́ше у́бо святы́я Голго́фы распростре́ся, иде́же Госпо́дь наш Иису́с Христо́с распя́тся, и достая́ше до святы́я горы́ Елео́нския, иде́же све́тлость лучь со́лнечных скры. Тогда́ всяк во́зраст христиа́нский, ю́нии же и ста́рии со младе́нцы и ссу́щими в Бо́жию святу́ю це́рковь приидо́ша с вели́кою ра́достию, и сла́ву и благодаре́ние с те́плым умиле́нием возсла́ша Бо́гу о пресла́внем чудеси́. О нем же святы́й Кири́лл Константи́ю и написа́, утвержа́я его́ в правове́рней ве́ре су́ща.

Стихи́:

Кто па́че сего́ ин в ра́дости му́ченицы?

Добре́йшему Ака́кию отсеко́ша главу́.

Сей бя́ше при Максимиа́не царе́, каппадоки́анин ро́дом, числа́ мартиси́йскаго. Приведе́н же Фи́рму кня́зю, испове́да и́мя Христо́во и мно́го от него́ му́чен быв. И по́слан быв Велиа́ну ино́му кня́зю. И́же и той приведе́ его́ со ине́ми свя́заными в Виза́нтию, и лю́тыми бие́нии и у́зами сокруши́в его всади́ и́ в темни́цу, иде́же предста́вше а́нгели поста́вишя его́ здра́ва. Посе́м по́слан быв к Фалкиа́ну ино́му кня́зю, ему́же повеле́вшу мече́м главу́ его́ отсеко́ша. Соверша́етжеся собо́р его́, во святе́м его́ муче́нии, су́щем в Ептаска́лех, иде́же быва́ет и обновле́ние це́ркве его́.

Стихи́:

Аз свя́зан сый и посеце́ мене́ мечу,́

Я́ко и ко страда́льцем Га́ие му́ченик рече́.

Стихи́:

Собо́ра хвалю́ спасе́ных уче́ний,

Спа́сших ве́рныя я́ко во гра́де Тро́ичне.

И́же ели́цы от высоты́ своея́ преска́чут на по́двиг боле́знен, и хотя́ще влещи́ себе́ в напа́сть прихва́тящих, па́че же и бра́ни разжига́юще у́глии гре́шных, и тех прио́бщне. Та́че же и о и́мени Христо́ве прише́дших, не и еще́ вне́млют сло́ву Его́ уча́щу, блюди́теся, да не вни́дете в напа́сть. И па́ки моли́тва глаго́лати ко отцу́, не введи́ нас в напа́сть но изба́ви нас от неприя́зни. Егда́ и апо́столов мно́гажды во вре́мя отше́ствия домо́внаго влады́ки и учи́теля их Христа́, от хотя́щых я́ти и́, уча́щу их неде́рзо ходи́ти ко враго́м. И я́ко вре́мя прибли́жися стра́сти его́ не предаде́ себе́, но ожида́ше до́ндеже приидо́ша Нань со ору́жием и дреко́льми. И глаго́лет я́ко на разбо́йника ли приидо́сте со ору́жием и дреко́льми я́ти мене́. И́же преда́ша Его́ рече́ Пила́ту. Тем не по ра́зуму творя́т Его́ словеса́ вмета́ющии себе́ в напа́сть. Я́коже утвержа́я нас о гоне́ниих глаго́лет. Внемли́те себе́, предадя́т бо вы на со́нмища, и в со́нмех убию́т вы. Предадя́т же вы рече́, а не са́ми преда́стеся. И к судия́м рече́ и к царе́м ведо́ми бу́дете и́мене Моего́ ра́ди, а не себе́ приведе́те. Поне́же отбега́ти вам вели́т, и от ме́ста на ме́сто гони́мом и́мене Его́ ра́ди. И па́ки а́ще изжену́т вы от гра́да сего́, бежи́те в други́й. Ни бо́ хо́щет самово́льством нам к дия́волим поспе́шником, и оружено́сцем я́ко да не мно́жайшим смерте́м неви́нни бу́дем, па́ки понужа́юще их. Па́че же раздража́юще я́ и устрая́ти смертоно́сная де́ла, но ожида́ти к себе́ и внима́ти. Бди́те и моли́теся, да невни́дете в напа́сть. Та́ко Стефа́н пе́рвый в след сего́ муче́ния прии́м во Иеросали́ме, восхище́н от законопресту́пник, и приведе́н в со́нмище, и побива́емь во и́мя Христо́во, просла́вися, моля́ и глаго́ля Го́споди не поста́ви греха́ сего́ им. Та́ко и Иа́ков второ́е ят от И́рода, и мече́м главу́ его́ усеко́ша. Та́ко и пе́рвый апо́столом, мно́гажды ят, и в темни́це сохране́н. Последи́ в Ри́ме распя́т бысть. Та́коже и провозвы́сивыйся Па́вел мно́жицею пре́дан быв и до сме́рти беды́ приимова́в, мно́го страда́в, и хвали́вся о мно́зех гоне́ниих и ско́рбех, в то́мже гра́де ят, и мече́м главу́ его́ отъя́ша. И́миже хваля́шеся испове́дая, я́ко в Дама́сце коше́м со стены́ све́шен бысть но́щию, и убежа́ от руку́ иму́щых я́ти его́. И́бо предлежа́щее бе́ испе́рва благовести́ти и учи́ти сло́ву Бо́жию. В них же утвержа́юще бра́тию пребыва́ти в ве́ре. И се глаго́лати, мно́гими скорбьми́ подоба́ет нам вни́ти в Ца́рство небе́сное. Не иска́ху бо своея́ во́ли, но мно́гих, да спасу́тся. И суть мно́га тех сия́, по словесе́х соде́янных. Но я́коже апо́стол глаго́лет, прииме́те у́бо наказу́ющых, я́коже ле́по.

Во гра́де Неро́не бысть епи́скоп и́менем Касиа́н. Обы́чай име́яше тако́в, по вся дни служи́ти Бо́гови да́же и во вся дни жития́ своего́. И зело́ бе ми́лостив. Во еди́н же день жития́ своего́ не служи́вшу ему́, бысть явле́ние не́коему е́теру попо́ви в виде́нии нощне́м, иди́ глаго́ли епи́скопу, не преста́й Ми творя́ святу́ю слу́жбу. Егда́ бо прии́деши на па́мять святу́ю апо́столу Петра́ и Па́вла в Рим, тогда́ возда́м мзду твою́. Воспряну́в же поп от виде́ния, и не дерзну́ пове́дати епи́скопу. Бысть же явле́ние попо́ви и во втору́ю нощь то́же; Та́коже и того́ не пове́да епи́скопу. В тре́тию же нощь рече́ ему́ прише́д, иди́ и глаго́ли епи́скопу Касиа́ну, я́коже ти есть повеле́но. За ослуша́ние же попо́ви мно́ги ра́ны возда́шася ему́. У́тру же бы́вшу, вско́ре тече́ поп, и ви́де епи́скопа служа́ща, и весь слеза́ми облия́вся, паде́ на ногу́ епи́скопу, показа́я ра́ны ему́, и пове́дая ему́ вся и от того́ часа́ епи́скоп ни еди́ного дне не преступи́. По виде́нии же том на тре́тие ле́то, прии́де на па́мять святу́ю апо́столу Петра́ и Па́вла в Рим, уве́дав свое́ отше́ствие к Бо́гу. И я́коже бе обы́чай приходя́щим, повеле́нием всех епи́скоп, да́ша ему́ ме́сто служи́ти в старе́йшиньстве. И та́ко служа́щу ему́ Литорги́ю в це́ркви святу́ю апо́столу Петра́ и Па́вла, и Бог просла́ви его́, просвети́ся лице́ его́. И еще́ слу́жбе не соверше́не, и дав мир, и ся́де, и мно́го поучи́в о любви́, предаде́ ду́шу свою́ Го́сподеви. И вси просла́виша Бо́га, прославля́ющаго уго́дники Своя́.

Аз Иоа́нн ви́дех стра́шну вещь, прише́д во Александри́ю, ви́дех не́коего от разбо́йническаго чи́на ко мни́шескому чи́ну прише́дша: его́же изря́дный Иоа́нн па́стырь и врачь повеле́ за седмь дний пока́явшася приима́ти, на виде́ние то́кмо ме́ста покая́ннаго. По седми́х же днех призва́в того́ вопроша́ше его́: а́ще с ни́ми хо́щет жи́ти со всем изве́стием. И вопроси́ и́: «Что не подо́бно соде́я в свое́м житии́?». Он же с прилежа́нием вся своя́ испове́да грехи́. И рече́ ему́ искуша́я его́ игу́мен: «Хощу́ у́бо да пред все́ю бра́тиею сия́ глаго́леши». Он же своя́ грехи́ возненави́дев, не отсту́пно обещава́яся: «А́ще хоще́ши, рече́, то посреде́ Александри́и испове́м».

И собра́ игу́мен вся мни́хи число́м две́сте и три́десять. И в неде́лю по боже́ственому собо́ру сотворя́еме Литурги́и. По сконча́нии же Ева́нгелия, повеле́ вести́ и́ я́ко осу́жденика о́ного не́коею бра́тиею влеко́ма, и во власяно́е вре́тище оболче́на, и по ру́це свя́зана, на главе́ его́ плати́ще иму́щи, и ху́де бие́ма. И удиви́вшеся ви́девшии, вси с пла́чем воздохну́вше, не ве́дяху бо что есть твори́мое. Та́же я́ко близ церко́вных двере́й приспе́, возгласи́ ему́ честна́я она́ человеколюби́вая глава́ ве́лиим гла́сом: «Ста́ни, не досто́ин бо еси́ и́же зде вхо́да». Он же ужа́сся, паде́, от святи́лища исше́дша гла́са, я́коже сам по́слежде с кля́твою нам пове́даше, не от челове́ка гла́су исше́дшу, но а́ки гро́му стра́шну свы́ше прише́дшу. И весь стра́хом одержи́мь паде́ на ли́цы трепе́ща, и до́ле лежа́, помо́ст слеза́ми моча́ше. И рече́ ему́ врачь: «Рцы вся соде́янная нам пред все́ми». Он же с тре́петом испове́да вся по еди́ному. И такова́я всяк слух удивля́юща, о́во плотска́я по естеству́ и чрез естество́; слове́сная же и живо́тная отравле́ния и уби́йства, и и́на их же несть ле́по слы́шати, или́ писа́нию преда́ти. И испове́давшуся ему́, а́бие повеле́ его́ пострищи́, и к бра́тии причести́.

Аз же преподо́бнаго почуди́вся му́дрости, и вопроша́х его́ осо́бь глаго́ля: «Что ра́ди тако́в стра́шен о́браз сотвори́?». Он же рече́: «Вои́стину двоего́ ра́ди се сотвори́х. Пе́рвое у́бо, да испове́дает с ним прише́дшим, и сим студо́м бу́дущаго суда́ избу́дет, е́же и бысть: и́бо не воста́ от земли́ бра́те Иоа́нне, до́ндеже от всех отпуще́ние получи́ - и не не ве́руй се́му. Не́кто ми от лу́чших брат глаго́ля: я́ко ви́дех рече́ не́коего стра́шна, иму́ща хартию́ напи́сану и трость. Егда́ рече́, испове́м на ся вся беззако́ния моя́ Го́сподеви, и ты оста́вил еси́ нече́стие се́рдца моего́. Второ́е же, поне́же друзи́и неиспове́дана согреше́ния и́мут, сего́ ра́ди и о́нех на испове́дание устрая́ю. Без него́ же ни еди́н же оставле́ния грехо́в прии́мет».