Стихи́:

Враги́ поража́я Гео́ргия во бране́х,

Во́лею от враг посека́ется мече́м:

Отня́т Гео́ргию главу́ мече́м в два́десять тре́тий.

Сла́вный и чу́дный, и вели́кий му́ченик Гео́ргий, во времена́ бя́ше Диоклитиа́на царя́. От страны́ Каппадоки́йския, ро́да сла́вна, в бра́нех тысященача́лием преспе́в. Внегда́же бра́тися хотя́ху, воево́да бя́ше са́ном. Царю́ у́бо е́же на христиа́ны боле́знующу ра́тию, и повеле́нию изше́дшу, о́вем у́бо отрица́ющимся с кля́твою и отмета́ющимся Христа́, честе́й ца́рских и даро́в сподобля́тися. О́вем же не покаря́ющимся, сме́ртную приима́ти тщету́. Сей святы́й сам прише́д, христиани́на себе́ воспропове́да: и́дольское су́етие облича́я и не́мощь, и уничижа́я ве́рующыя в ня. По внегда́ же ниже́ ласка́ньми, ниже́ обе́ты мучи́телевым, я́же и мно́ги творя́ше увеща́ся, ниже́ преще́нии, но явле́н бя́ше вся презира́яй. Пе́рвее у́бо копие́м во утро́бу пробода́ется; копию́ же пло́ти прикосну́вшися, я́коже и мно́зе кро́ви истещи́. Изъя́ту же острию́, пребы́сть святы́й неврежде́н. Посе́м на колеси́, острие́м желе́зным устро́еным привя́зан ниц, низпуща́ется с холма́. И телесе́м на мно́га раздробле́н, па́ки здрав поставля́ется, боже́ственаго а́нгела настоя́нием. Я́вльжеся царю́, и Магне́нтию сприсе́днику его́ жру́щим и́долом. Зане́же здрав показа́ся, мно́ги к Христо́ве прито́рже ве́ре: и́же царе́вем повеле́нием вне гра́да в главы́ усе́чени бы́ша. Приступи́ же ко Христу́ и цари́ца Алекса́ндра, и пред мучи́телем Христа́ Бо́га испове́да. Ве́роваша же и ини́и мно́зи Христо́ви, невреди́ма свята́го от ро́ва негаси́маго [во́ньже вве́ржен бе] ви́девше изше́дша. По сих в сапоги́ желе́зныя гво́здия иму́ща, но́зе его́ обу́ша, и бе́гати понужда́ху. И к тому́ сухи́ми жи́лами волу́ями бие́н бысть неща́дно. Поиска́вшу же Магне́нтию зна́мения, а́ще бы воскре́с кто от лежа́щих в явля́емом гро́бе от и́же пред мно́гим вре́менем житие́ оста́вльших, помо́лшуся свято́му над покро́вом гро́бным, воскре́се ме́ртвый, и свято́му поклони́ся, и просла́ви Божество́ Христо́во. Вопроси́вшу же царю́: «Кто бя́ше, и когда́ житие́ оста́вил есть?». «От пре́жде Христо́ва прише́ствия пожи́вших бы́ти, рече́, и ра́ди и́дольския пре́лести, толи́кими ле́ты у́же огне́м жего́му». О нем же мно́гим Христу́ ве́ровавшим, и при́сно прилага́емым к ве́ре, Бо́га еди́нем гла́сом сла́вляху. В них же бе и Глике́рий: его́же вола́ уме́рша святы́й воздви́же. Такове́м же чудесе́м к Христо́ве ве́ре извеще́н, муче́нием вене́ц восприя́т: мечи́ от неве́рных на у́ды ссече́н. И мно́гим у́бо о сих ко Христу́ приходя́щим, и еще́ ра́ди свята́го му́ченика Гео́ргия вше́дша в храм и́дольский, и́же в еди́н от истука́нных прини́к рече́: «Ты ли еси́ Бог? И тебе́ ли подоба́ет покланя́тися?» Бе́су же и́же в нем рыда́ющу отвеща́вшу: «Я́ко еди́н Бог есть Христо́с». И о сем смято́шася и́доли вси, и падо́ша и сокруши́шася. И не могу́ще терпе́ти служи́тели бесо́встии, но е́мше свята́го приведо́ша к царю́, и ско́рое нань осужде́ние испроси́вше. Царю́ же повеле́вшу и́, та́коже и цари́цу Алекса́ндру мече́м посещи́. Святы́й у́бо в главу́ усе́чен бысть. Она́ же помо́льшися в темни́це, Бо́гу дух предаде́. Сверша́етжеся собо́р его́ во святе́йшем его́ муче́нии, су́щем в Девте́рии. Его́же моли́твами Христе́ Бо́же поми́луй нас. Ами́нь.

Ну́жно есть от мно́гих свята́го изря́дных чуде́с, два или́ три воспомяну́ти, и та́ко изоста́вити сло́во. Во страна́х Си́рских, бя́ше град нарица́емый Ора́влие: в не́мже зида́шеся це́рковь во и́мя вели́каго му́ченика Гео́ргия. Зане́же име́ти ширину́ ме́сту сече́ния сто́лпнаго на потверже́ние, собра́шася от мно́гих разстоя́ний, и́же к це́ркви стоя́щии столпи́; и о поспеше́нии собра́ние бя́ше не ма́ло е́же о обре́тении столпо́м и принесе́нии. Жена́ же не́кая благочести́ва, и ве́ру к великому́ченику изве́стну и непоколеби́му иму́щи, купи́ та еди́н столп подо́бен угото́ванным: приве́зши его́ к морско́му песку́, моля́шеся купи́вшему про́чее сто́лпие, и тою́ ку́пленаго взя́ти столпа́ со о́неми про́чими. О́ному же не хотя́щу, но свое́ то́чию ври́нув в кора́бль отплы́. Тогда́ от жа́лости жена́ к земли́ себе́ пове́ргши пла́кашеся, и моля́ше свята́го поспеши́тися, и от нея́ ку́пленому столпу́ принесе́ну бы́ти. И та́ко у́бо ей скорбя́щи, прилучи́ся свято́му во сне доити́ во о́бразе воево́дстем, и воста́вити о́ну и рещи́ ей: «Что есть скорбь твоя́ о́ же́но скажи́ ми?». О́ной же пове́давши жа́лости вину́. И свято́му сше́дшу с коня́, и рещи́ к жене́: «Где хо́щеши поста́вити столп?». Она́ же рече́: «Одесну́ю страну́ це́ркви». Свято́му же а́бие пе́рстом свои́м назна́менавшу на столпе́, да ста́нет одесну́ю страну́ при вторе́м столпе́. И рече́ жене́: «Помози́ ми ты сама́». И облегча́вшу столпу́, и обои́ма вве́ржен бысть в мо́ре. И окормле́нием свята́го дости́гшу столпу́, и на у́трия обре́теся лежа́ на бре́зе лиме́на. Его́же ви́дев васили́ск (приста́вник) и ужасе́ся. Оба́че же я́коже и пи́смя ви́де, повелева́ющее во урече́ннем ме́сте поста́вити его́. Благода́рствив у́бо Бо́га, проша́ше же и от свята́го непоко́рствию греха́ просты́ню обрести́, и́же и той прие́м явле́нием свята́го просты́ню. И та́ко поста́ви вдови́чий столп с про́чими, на не́мже бя́ше напи́сано пе́рстом свята́го, на ме́сте иде́же святы́й повеле́л бя́ше. И́же и стои́т да́же и досе́ле, в па́мять жене́ безконе́чную, и во ужа́стие чудоде́лию.

Бы́вшее же в Милити́не, всяк слух и по́мысл удивля́ет. В том бо о́строве есть це́рковь великому́ченика свята́го Гео́ргия, сла́вна и превели́ка. Обы́чай же имя́ху мно́жество люде́й, по вся ле́та сбира́тися и торжествова́ти в день па́мяти свята́го. Таково́е кри́тстии ага́ряне уве́девше не́когда, обседо́шя к ве́черу, во вре́мя всено́щнаго пе́ния. И ели́цы вне це́ркве бя́ху, приста́ша бе́гству и угоньзну́ша. А ели́цех обрето́ша в це́ркви, связа́вше поведо́ша в Крит. В них же бя́ше и не́кий ю́ноша и́же и даро́ван бысть Ами́ре, от и́мже ят бя́ше ага́рянином. Го́ду же ми́мо теку́щу, и пра́зднику свята́го наста́вшу, ю́ноша бя́ше слугу́я Ами́ре. И роди́теля же его́ ника́коже отпа́дша, ниже́ обы́чая измени́ста сы́на ра́ди своего́ поги́бели. Но на Бо́га наде́жду возло́жше, и свята́го благода́рствующе, сотвори́шя свято́му пра́зднику и изыдо́ша. Да внегда́ же зва́ныя на обе́д посажа́ти наче́нше, ма́ти ю́ноши вма́ле изоста́вши, и в це́рковь обрати́вшися пове́рже себе́ на зе́млю. Пла́чущися и моля́щися свято́му, е́же изба́вити сы́на ея́ от плене́ния, я́коже весть всеси́льною и боже́ственою благода́тию. И ско́рый в заступле́ниих не презре́ жены́ слез, но на́скоре в Крит шед. О́ной бо моли́тву до конца́ сверши́вши, и трапе́зе предло́жене, мужь ея́ пе́рвее по́мощь и заступле́ние свята́го вмени́в, и че́рпчии гото́ви предстоя́ху. Тогда́ манове́нием Бо́жиим, бысть чудоде́лие стра́нно, вку́пе и пресла́вно. О неизрече́нных Бо́жиих пресла́вных деле́с, реку́ же и по ве́ре или по при́тчи. А́ще о Авваку́ме кто позна́ет, ка́ко и́нем часо́м а́нгелом восхи́щен, и от Иерусали́ма в Вавило́не обре́теся. Но и сие́ мню не неве́рно яви́тися и́мать. В той бо час ю́ноша влия́ вино́ в сткля́ницу, и гото́вяше пода́ти Ами́ре в Кри́те. О́ле чудесе́, и в Милити́не обре́теся, подая́ ма́тери сткля́ницу с вино́м. Его́же вси седя́щии на трапе́зе ви́девше ужасо́шася, и вопроси́ша его́, где бя́ше и отку́ду прии́де, и ка́ко обре́теся посреди́ нас. Он же отвеща́, сию́ сткля́ницу налия́х с вино́м е́же пода́ти Ами́ре, и восхи́щен бых му́жем пресла́вным, и всади́ мя на конь, еди́ною руко́ю держа́х сткля́ницу, а друго́ю держа́хся за по́яс его́, и обрето́хся зде посреде́ вас, ка́ко то са́ми ви́дите. Сия́ слы́шавше ужасо́шася, дивя́щеся о пресла́вном виде́нии. И возста́вше с трапе́зы, всено́щныя возда́ша пе́сни, и благодаре́ния Бо́гу.

В ве́си Пафлаго́ньстей, це́рковь бысть пресла́вна свята́го великому́ченика Гео́ргия, его́же и селя́не о́ни фа́трино нари́чут. Изнача́ла у́бо ей ма́ле су́щи и распада́вшися, и невда́ле лежи́ме. И́же и собра́вшеся на позида́ние, и на́праве бысть та́мо си́цево. Де́тем та́мо сти́чущимся, и и́гры творя́щим. Бя́ше еди́но от них всегда́ соодолева́емо, и поноша́емо от про́чих. Отроча́ти же стужи́вшу си от мно́гих хул, и обрати́вшу лице́ к це́ркви свята́го Гео́ргия, и рече́, святы́й Гео́ргие помози́ ми, да и аз соодоле́ю, да принесу́ в це́рковь ти сфунга́то до́бро. И а́бие наче́ншим де́тем твори́ти и́гры, содоле́ и сей де́тищь, не еди́ницею ни втори́цею, но мно́гащы. Тогда́ де́тищь доше́д к ма́тери свое́й, испроси́ е́же да́ти свято́му дар, е́же обеща́лся бя́ше. Жена́ же чадолюби́ва су́щи, па́чеже и мучениколю́бица, сотвори́ на́скоре обеща́ние, и даде́ де́тищу. Де́тищь же прие́м несе́ в це́рковь, и положи́ пред олтаре́м, и покло́нься отъи́де. Во́время же то ми́мо ходя́ще четы́ре купцы́, внидо́ша в це́рковь поклони́тися свято́му, и обрето́ша сфунга́то, па́ры пуща́я благоуха́нныя. Реко́ша са́ми к себе́, сие́ святы́й не тре́бует, изъеди́м е. И вме́сто сего́ да поло́жим фимиа́н. И изъе́дше не получа́ху врата́ исхо́ду, и не можа́ху изы́ти. Положи́шя же по еди́ной сре́бренице, и не изыдо́шя. И положи́шя еди́ну зла́тницу, и помоли́шася свято́му е́же пода́ти им изы́ти, и не возмого́ша слепото́ю одержи́ми. Тогда́ положи́шя вси четы́ре по зла́тице, и те́пле помо́льшеся, изыдо́шя не возбра́нно. И изше́дше же реко́шя обрати́вшеся к це́рькви, святы́й Гео́ргие вку́пе продава́еши сфунга́то. И мы же у́бо отсе́ле не и́мамы от тебе́ купи́ти. Но и о сем прости́ ны. В такове́й же це́ркви мно́гая чудеса́ сотворя́ются, и да́же и досе́ле быва́ют. И не то́чию сие́ зде, но и во ины́х про́чых це́рквах. Бо́гу на́шему сла́ва ны́не и при́сно и во ве́ки веко́в.