Стихи́:

И Фео́дора, и ме́ртваго Фео́дора

Чудодей́ствовати дар от Бо́га ве́лий:

В два́десять вторы́й Сикео́ту о́чи смежи́шася.

Той нарица́шеся от ве́си Гала́тския, села́ нарица́емаго Сике́я, роди́вся во времена́ Иустиниа́на вели́каго. Мни́тся я́ко не име́ти похвалы́ сро́дствию нра́ва. Непло́дней бо су́щи ма́тери его́, лична́ бо бя́ше я́коже глаго́лют: Мари́я же и́мя ей, взо́ром и красото́ю мно́гою сия́ющи: я́ко привлещи́ не́коего Косму́ и́менем, ца́рскаго скороше́ственика, от него́же глаго́лют бы́ти свята́го. И́же и породи́ти его́ скры́вши ей, зане́же бя́ше сра́мотно и уко́рно. А́бие бо внегда́ сни́деся роди́вшая его́ му́жеви, в той нощи́ прилучи́ся ей сон ви́дети: звезде́ сше́дши и па́сти во утро́бу ея́, и́же и проявля́ше све́тлость отроча́те. Но тому́ не па́че вменя́ти такова́го, или́ ве́ровати не́когда сотво́ршемуся, в не́мже от пе́рваго во́зраста Бо́га возлюби́. И я́ко мне́тися ему́, е́же свято́му му́ченику Гео́ргию с ним сопребыва́ти и нака́зовати, и к лу́чшим приводи́тися жела́нием, и весьма́ приноси́ти ему́ боже́ственое и чу́дное не́которое раче́ние. Сей у́бо по ча́сти восхо́ду иды́й. Пе́рвее у́бо мни́шескому совменя́ется чи́ну, и архимандри́т поста́влен бысть. Та́же о и́хже подоба́ше е́же к соверше́ней доброде́тели ше́ствовати начина́ющим, и явле́ньми соверше́ныя доброде́тели к Бо́гу обетова́нию, чуде́сными обогати́вся соде́ловании, к вели́цей высоте́ архиере́йства возведе́н быв, Анаста́сию гра́ду вруче́н, иде́же мно́гих богоразу́мию наказа́в, и повсю́ду чудесы́ единому́дреники учреди́в: и я́коже подоба́ет твори́ти поучи́в, сви́точным и́менем преда́, всех уди́вль. Царе́м же и архиере́ом чу́ден я́влься и люби́м. И мно́гим проро́чествовав о сбы́вшихся. И отъи́де жития́ че́стне: ко а́нгелом пои́мшим ду́шу его́ ускла́бився. Глаго́лет же ся: я́ко пре́жде сконча́ния его́ вма́ле во сне ему́ предста́вшу сла́вному му́ченику Гео́ргию, подаю́щу ему́ тоя́г е́здя на коне́, и други́й водя́, нань же повеле́ ему́ все́сти, и ко она́мошнему ше́ствию, чуде́с ра́ди проявля́ющу. Соверша́етжеся собо́р его́ в муче́нии свята́го му́ченика Гео́ргия, су́щем в Девте́рии.

Стихи́:

И́же к Тебе́, Спа́се мой, ражже́н боже́ственою любо́вию,

Неа́рх рече́, ни огнь мене́ осуди́.

Стихи́:

Назаряни́на вели́каго позна́в, Нафана́иле,

Назаре́фу непотре́бному «мо́лкни» рече́.

Сей бя́ше от Ка́ны, гра́да Галиле́йскаго, иде́же Христо́с, Бог наш, на брак призва́н бя́ше с Пречи́стою Свое́ю Ма́терию и пе́рвое чу́до сотвори́, во́ду в вино́ претворив. Ча́яше же и той прише́ствия Христо́ва… и с ра́достию рече́ ему́: «Его́же писа́ в Зако́не Моисе́й и проро́цы, обрето́хом Иису́са, сы́на Ио́сифова, И́же от Назаре́т». Прише́дшу бо и ви́дев Христа́ и ве́ровав, после́дова Ему́. По стра́сти же и по Вознесе́нии, пропове́дая Его́ я́ко Бо́га, с ми́ром сконча́ся.

Стихи́:

Во́ду почре́ти тле́емую, же́но, живу́ю поче́рпши:

О́ле скве́рны душе́вныя омыва́еши!

Преподо́бный оте́ц наш Вита́лий, бе от Ки́прскаго о́строва, в Тримуфи́и гра́де роди́ся. И доше́д в соверше́ный во́зраст, и бысть мних. И сотвори́ шестьдеся́т лет тружда́яся в ке́лии свята́го Спиридо́на. И посе́м и́де во Александри́ю, и нача́ та́ко жи́ти челове́ком на собла́зн. Не хотя́ше бо сла́вы име́ти себе́ на земли́, но наима́шеся на дневну́ю стра́ду, и по сре́бренику на день взима́ше, и изъяда́ше на еди́ну ме́дницу бо́бу. И заходя́щу со́лнцу, отхожда́ше в до́мы блудни́ц. И к еди́ней вла́зяше от них, дав ей сре́бреник из него́ же страда́ше день, и глаго́ла ей снабди́ся в сию́ нощь, и никого́ же от ю́ных не прие́мли. И вле́зши в храм, стоя́ше всю нощь близ ея́, в еди́ном угле́, поя́ Бо́гу и моля́ся за ню и до у́тра. И отходя́ше ста́рец заклина́я жену́, я́ко никому́же яви́ти дела́ его́. И та́ко по вся но́щи творя́ше. Еди́на же от них обличи́вши житие́ его́, я́ко не блуда́ ра́ди к нам вхо́дит мних сей, но спасе́ния ради. И се слы́шав Вита́лий помоли́ся Бо́гу, и возбеси́ся жена́, да и про́чии не сме́яху обличи́ти дел его́. Ини́и же глаго́лаху возбеси́вшейся, виждь я́ко не отда́ст ти Бог, поне́же солга́, я́ко не блуда́ ра́ди вхо́дит мних сей. И по вся дни укоря́юще глаго́лаху ему́, пойди́ у́же окая́нне, ждут тебе́ блудни́цы. И отвещава́я им, аз несмь ли пло́тен, я́коже и вси челове́цы. Или́ чернори́зцы еди́ны лиши́л Бог. Пои́стине и чернори́зцы челове́цы суть. Друзи́и же глаго́лаху ему́, у́же поими́ си еди́ну от них, и измени́ си мни́шеский о́браз, да не ху́лится тобо́ю. Он же я́ко се гне́ваяся глаго́лаш: "Не слу́шаю вас, что ми за добро́ жену́ поя́ти, да пеку́ся до́мом и сотворю́ злы дни. Почто́ мя су́дите, еда́ вам за мя отвеща́ти пред Бо́гом? Собо́ю пеци́теся, а мене́ оста́вите". И та́ко пожи́в, утаи́в, доброде́тель, и мно́ги блудни́цы спасе́. Егда́ же преста́вися, а́нгел рече́ возбеси́вшейся блудни́це, иди́ и прикосни́ся моще́м свята́го Вита́лия, да исцеле́еши. И ше́дши прикосну́ся ему́, и отбежа́ от нея́ бес. И мно́зи хроми́и и слепи́и исцеле́шя. И прише́д епи́скоп взя те́ло свята́го, и погребо́ша е че́стно со псалмы́ и пе́сньми. И просла́виша Бо́га да́вшаго ему́ такову́ю благода́ть и терпе́ние. Се же бра́тие и нам на поуче́ние, да не осужа́ем чернори́зцев о вся́ком гресе́.

Бою́ся сме́рти и ужаса́юся. Бою́жеся родства́ о́гненаго, я́ко ве́чен есть и не угаса́яй. Бою́жеся грозы́ и тмы я́ко не прелага́ется в свет. Бою́жеся че́рви, я́ко безсме́ртен есть. Бою́жеся а́нгел, и́же на суде́, я́ко без ми́лости суть. Го́ре мне, я́ко вопия́ху ми не послу́шах. Глаго́лаху ми оста́нися от всего́ скверне́ния, и вся́ческих веще́й, я́же суть мне ме́рзски. Го́ре мне, я́ко Твой храм Го́споди оскверни́х, и Святы́й Дух оскорби́х. Бо́же пра́ведна де́ла Твоя́, и суды́. За мал грех, пи́щи не конча́ющияся и жи́зни Ца́рства небе́снаго лиша́юся. И не умира́я му́читися. За плотски́я сла́сти огне́ви предаю́ся. Пра́веден суд Госпо́день. Уча́ху мя и не послу́шах, послу́шествоваху ми, аз же руга́хся. Та́ко глаго́лати на́чнеши челове́че, а́ще ключи́ттися пре́же покая́ния отъити́ све́та сего́. Те́мже или́ гее́ны убо́йся, или́ к Ца́рствию потщи́ся.