Стихи́:

Иоа́нне, взыгра́й, я́коже Иоа́нн,

Не внутрь во чре́ве, но посреди́ Еде́ма.

Иоа́нн и́же во святы́х оте́ц наш, от млады́х ногте́й ми́ра возненави́дев, и Христа́ возлюби́в. И и́де к вели́кому Григо́рию Декаполи́ту, и от него́ мних быв, и про́чее бя́ше с ним подвиза́яся, и о вся́ких Бо́гу угожда́я. В толи́ко же бя́ше покоре́ние дости́же, и в послуша́нии гото́в и пречу́ден, я́ко и вели́кому Григо́рию о нем ра́доватися и сла́вити Бо́га. По сконча́нии же свята́го Григо́рия, и́де в весь стра́нну и незна́ему, стра́нствовавшаго ра́ди Го́спода, и в стра́нных роди́вшемуся, и та́мо подвиза́яся. Та́же в свята́я ме́ста шед, и́де в ла́вру свята́го Харито́на, и себе́ в бо́льшыя по́двиги вдав доброде́тельныя. И та́ко с ми́ром почи́ о Го́споде.

Стихи́:

Издручи́в своя́ удеса́, пре́йде от жития́,

Све́не (Осве́н) уде́с пребы́сть Косма́, я́ко сло́во.

Косма́ святый святи́тель и испове́дник Христо́в, бысть у́бо от Константи́ня гра́да. Измла́да же Христа́ Бо́га возлюби́в, и оста́вив су́етный сей мир, и бысть мона́х. Поще́нием же и про́чими доброде́тельми себе́ очи́стив, и Бо́жие быть жили́ще. Поста́влен же бысть епи́скопом в Халкидо́не, во вре́мя злочести́вых иконобо́рец. Тем мно́ги по́двиги показа́в по пра́вой ве́ре. И ну́димь бысть от одержа́щих о́бласть отврещи́ся святы́х ико́н поклоне́ния. И не увеща́н быв от них, того́ ра́ди заточе́н бысть, и мно́жайшыя напа́сти прия́т. И па́ки призва́н бысть и ну́димь сочта́тися е́реси их. И не восхоте́ их послу́шати, в безчи́сленыя ско́рби вложе́н бысть, ку́пно с преподо́бным Авксе́нтием подвиза́шеся. И та́ко искуша́емь и томи́мь от неве́рных и окая́нных иконобо́рец сконча́ся, и ко Го́споду отъи́де.

Стихи́:

С Акинди́ном четы́ри мечь посече́,

И́же от преле́стныя беды́ избегших.

Во вре́мя егда́ Диоклитиа́н злочести́вый царь, вели́кое и стра́шное гоне́ние и томле́ние и му́ки на христиа́ны подви́же: Тогда́ ят бысть и святы́й и многострада́льный Гео́ргий, и бе му́чен кре́пко. И чудеса́ творя́ше пресла́вная па́че челове́ческа чудоде́йства. И мно́зи ве́роваху Христо́ви, ви́дяще чудеса́ от свята́го быва́емая. И о́ви у́бо ту усека́еми быва́ху, ини́и же в темни́цу посыла́еми, ини́и же огне́м сожига́еми бы́ша. От них же бы́ша и си́и святи́и му́ченицы Ви́ктор, и Акинди́н, Зо́тик, и Севериа́н, и́же ви́девше свята́го Гео́ргия привя́зана к колеси́, и ника́коже озло́блена, ве́роваша Христо́ви. И а́бие мече́м главы́ их отсеко́ша.

Стихи́:

Стои́т, уча́ в пра́здник Преполове́нию, Христо́с

Меси́я - среде́ учи́телей.

Возлю́бленная бра́тия, сотвори́м си́лу свою́ в слеза́х, да в ра́дости по́жнем. Пла́чемся у́бо пред Бо́гом, еда́ да умно́жится благода́ть Его́ на нас, и по́слет нам си́лу, я́ко да соблюде́т ны до́ндеже бо́ремся со ду́хи злы́ми я́же сотвори́хом в нача́тце. Воспла́чемся у́бо со смире́нием, да стя́жем себе́ всем жела́нием к Бо́гу и́же спасти́ ны мо́жет от любодея́ния до́ндеже изы́дем от те́ла. Возлю́бим у́бо ми́лостыню и нищелю́бие, да сохрани́мся от сребролю́бия, да сря́щет ны исходя́щых от те́ла. Возлю́бим мир ко всем к ма́лым и к вели́ким, да сохрани́т ны от за́висти во зло водя́щыя ны. Стя́жем же и долготерпе́ние вся́кой ве́щи, да соблюде́т ны от малоду́шия. Возлю́бим всех я́ко и свою́ бра́тию, ни еди́наго не нави́дяще в се́рдцы на́шем, ни воздаю́щи зла за зло, да соблюде́т ны от рече́ния предъиду́ща на лица́ на́ша. Возлю́бим у́бо смире́ние е́же понести́ друг дру́гу тя́готу, или́ досаже́ние или́ поноше́ние еди́наго ре́кшаго нам, да сохрани́т ны от го́рдости и велича́ния предъиду́щаго в стре́тение на́ше. Взы́щем друг дру́гу че́сти, да не соблазни́м ни еди́наго, да сохрани́т ны от оклевета́ния, а́ще прии́дет к лицу́ на́шему. Отве́ржем тре́бование изли́шнее све́та сего́ и сла́ву его́, да изба́вимся от наваже́ния предъиду́щаго на лица́ на́шя. Научи́м язы́к наш в поуче́ние Бо́жие, и в пра́вду и в моли́тву, да сохрани́т ны от лжи предъиду́щия на лице́ на́ше. Соблюде́м сердца́ на́ша и те́ло от жела́ния, да изба́вимся ве́чнаго о́гненаго муче́ния. До́брыя же де́тели да помога́ют нам, а́ще я бу́дем приобрели́. Кто у́бо есть прему́др не хотя́й вда́ти души́ своея́ на смерть, да изба́вится от всех сих злых. Сотвори́м у́бо бра́тие вся сия́ до́брая де́ла все́ю си́лою на́шею, и си́ла у́бо Го́спода Бо́га и Спа́са на́шего Иису́са Христа́ вели́ка есть помога́ти нам окая́нным челове́ком. Весть бо я́ко челове́к окая́нен есть, и ожида́ет его́ покая́ния до после́дняго издыха́ния. Тем же да бу́дет еди́на мысль на́шя к Бо́гу, да сохрани́т ны от вся́каго зла.

И́бо Па́вел не в хра́ме святе́м помоли́ся, но затворе́н в темни́це и в кла́де забие́н, ни прост седя́, ни коле́ну преклоня́я. Не бо лзе с дре́вом стоя́ти в нем же но́зе заключе́не. Но поне́же с ве́рою моля́шеся лежа́ в темни́це, темни́цу потрясе́, и у́жником вери́ги спадо́ша, и стра́жа темни́чнаго ко креще́нию приведе́. Иезеки́я же ни в це́ркви стоя́, ни коле́ну преклоня́я, но в знак на одре́ лежа́ в боле́зни, и к стене́ обрати́вся, но поне́же Бо́га те́пле призва́ душе́ю умиле́нною, и отве́т о сме́рти рече́нный нань, отврати́, пе́рвое здра́вие прия́т животу́, и приложе́ние ле́том, и всему́ гра́ду спасе́ние от ра́тных. Разбо́йник же на кресте́ распя́тый, от ма́лых слове́с Ца́рство небе́сное получи́. Иереми́я в я́ме ти́ине помоли́ся, и Бог услы́ша его́. Дании́л в ров ко львом вве́ржен, призва́ Бо́га, и спасе́ся. Ио́на во чре́ве ки́тове в са́мом желу́дце Бо́га умоли́. И ини́и мно́зи моли́твою одержа́щая их зла́я разруши́ша вся, и Бо́жию по́мощь восприя́ша. Та́ко же и ны́не мно́зи моли́твою от мно́гих бед и злых свободи́шася, Бо́жиею по́мощию. Те́мже и мы бра́тие, не и́щем ме́ста моли́твенаго, ни изви́тием глаго́лати, до́лгих слове́с. Но я́коже ханане́я глаго́лаше, поми́луй мя, я́ко дщи моя́ зле бесну́ется. Вели́к бо есть бес и в нас грех. Беся́й бо ся ми́луемь есть, а согреша́ющаго вси ненави́дят. Та́ко и ты глаго́ли, Го́споди поми́луй мя. А́ще и ма́ло се сло́во, но пучи́на человеколю́бия Бо́жия. Иде́же у́бо есть ми́лость Бо́жия, ту все бла́го. Где лю́бо еси́, си́це глаго́ли, Го́споди Иису́се Христе́ Сы́не Бо́жий поми́луй мя гре́шнаго. А́ще и недви́жеши усты́, но умо́м в се́рдцы си́це вопи́й, и молча́щых бо слы́шит Бог. Сам бо ты це́рковь еси́, да и́щеши ме́ста моли́тве. Мно́га писа́ния глаго́лют о ско́рости моли́твеней. Моисе́й бо бежа́ше из Еги́пта пред фарао́ном, мо́ре бя́ше спреди́, и фарао́н созади́, а посреди́ Моисе́й. Вели́ка теснота́ ему́ бе, и не бо́ льзе моли́ти ему́ Бо́га. И рече́ ему́ Бог, что вопие́ши ко мне. Та́ко же и трие́ о́троцы у́же вме́щеми в пещь моли́шася, и моли́тва их угаси́ пла́мень, и у́зы их разреши́ и жи́вы я́ изведе́, и пресла́вны показа́. Та́ко же и И́ов на гно́ищи помоли́ся, и Бо́га ми́лостива сотвори́. А́ще у́бо на тя и напа́сть прии́дет, то к Бо́гу прибе́гни, и моли́ся Ему́, да изба́вит тя. Бог бо есть везде́ и близ тебе́. Еще́ бо ти и не глаго́лющу, рече́т се Аз есмь. И не сконча́еши моли́твы, и Той исцеле́ние ти пода́ст, а́ще ум свой очи́стиши от скве́рных страсте́й.

Мно́зи у́бо неве́гласи маха́юще по лицу́ своему́ руко́ю, творя́ще крестя́тся, всу́е тружа́ются, зане́же не исправля́ют и́стово креста́ на лицы́ свое́м, тому́ бо маха́нию бе́си ра́дуются. А е́же кто крести́тся и́стово, покла́дая ру́ку свою́ на челе́ и на животе́ и на пра́вом ра́ме, и пото́м на ле́вом, то а́нгели зря́ще веселя́тся и́стиннаго Креста́ вообража́ема на лица́х их. И а́нгел Госпо́день напису́ет тогда́ входя́щыя в це́рковь Госпо́дню со стра́хом и с ве́рою. Да а́ще кто прише́д в це́рковь стои́т со стра́хом, со умиле́нием поклоне́ние творя́ ко о́бразу Бо́жию, той восприи́мет отпуще́ние грехо́в и ми́лость Бо́жию. А́ще ли без стра́ха, то таковы́й бо́льший грех получи́в отхо́дит. Те́мже и мы вше́дше в це́рковь, стои́м со стра́хом, ча́юще от Бо́га вели́кия ми́лости в сий век и в бу́дущий. Ему́же сла́ва, ны́не и при́сно и во ве́ки веко́в.