Стихи́:

Епи́скопа тя, Симео́не, аз вели́ка,

Мече́м вели́каго тя стра́нника уве́дех:

Медве́дя лю́таго Авдела́я завяза́ уста́,

Ме́рзости несы́таго сатаны́ уст уго́нзь:

Повеле́вшему или́ пожре́ти, или́ умре́ти,

У́мреши Хуздаза́т, ведо́мь посе́чен бы́ти мече́м:

Ко́жа моя́, Фу́ник рече́, да одра́на бу́дет,

От истка́нныя ри́зы сатанины́ желца́ :

Посе́чени бы́ша му́жие трисугу́бая пятдеся́тница,

И́же Трили́чному кла́няющихся Существу́:

Падо́ша в Перси́дох ты́сяща мече́м,

И́хже а́ще познава́еши «му́ченический о́блак»:

В седмьнадеся́тый Симео́н посе́чен.

Ктисифо́н и Сали́к облада́юща по граде́х Перси́дских, Саво́рию пе́рское ца́рство держа́щу, посла́ста к царю́, я́ко христиа́нский архиере́й Симео́н, и про́чие не ма́ли непослу́шателие суть ему́ и непови́нницы, ника́коже нас тре́бующе. Но па́че совеща́шася по Христе́ умре́ти благосла́вне, не́жели беззако́нно рабо́тати безче́стно и безсла́вно. Сжа́лившуся же у́бо о сем царю́. И приведе́н бысть к нему́ святы́й двои́ми вери́гами свя́зан, и в темни́цу отсла́н быв. Обрати́вся к Хуздаза́ту и́же пе́рвее христиани́ну бы́вшу, и ца́рския ра́ди вла́сти, и належа́щаго стра́ха, зако́ну повину́вшуся пе́рскому, и со́лнцу поклони́вшуся: и́бо той бя́ше я́ко в ца́рских от ю́ности воспита́н: бы́вшу же и Препоси́ту, и́бо и той о христиа́нех добросло́вив. И царю́ ре́кшу я́ве: я́ко не ра́ди языконевоздержа́ния, ни за ино́го никоего́же отве́та подаю́ тебе́ таково́е осужде́ние, е́же главу́ твою́ отсещи́, но ве́ры ра́ди Христо́вы. И́же и святы́й Симео́н в темни́це слы́шав, пора́довася, и помоли́ся с про́чими, е́же и тем на́скоре сконча́тися. Изведе́ным бо им из темни́цы, и главы́ им отсеко́ша, число́м, к ты́сящи пяти́десятим. И́же и пе́рвее святы́й Симео́н посече́н быв. Глаго́летжеся, я́ко еди́ному от уби́йц устраши́вшуся, лице́ свое́ отврати́вшу, я́ко и обуя́вшу, и́же оклевета́н, и во Христа́ ве́ровати со дерзнове́нием исповед́авшу: язы́к ему́ отре́заша, и теле́сную ко́жу одра́ша. И та́ко Бо́гу дух предаде́.

Стихи́:

Ака́кию, уме́ршу землено́му а́нгелу,

Ему́же селе́ние угото́ваша а́нгели на небесе́х:

В седмь на́десятый Ака́кию коне́ц от жития́.

Сей у́бо преподо́бный оте́ц наш Ака́кий ро́ждься от христиа́ну роди́телю, во гра́де Мелети́йстем его́же и вскорми́ град Мелети́йский. Сего́ бо Ака́кия роди́тели его́ моли́твою и посто́м породи́ста, и бысть из чре́ва ма́терня освяще́н Бо́гови. И научи́ста его́ писа́нию, и принесо́ста и в це́рковь Мелети́йскую. И егда́ доше́дшу ему́ во́зрастом вре́мене, в не́же бысть муж Мелети́йстей це́ркви, и́менем Остре́й, и той святи́ его́ епи́скопским са́ном на степе́нь епи́скопства, и бысть па́стырь и учи́тель вели́к Мелети́йстей Це́ркви. И слы́ша собо́р в Константи́не гра́де, и шед та́мо с вели́ким Григо́рием, и све́рже зла́го Несто́рия, и при Феодо́сии царе́ благове́рном: И мно́га чудеса́ сотвори́в. И́бо не бе дождя́ на зе́млю, и плода́ не бысть на земли́: Сего́ ра́ди мно́зи не еди́ною напа́стию беду́ приима́ху, но и глад бе ве́лий. Ака́кий же моли́твою о́блаки разве́рзе, и дождь испусти́. И и́на мно́га чудеса́ сотвори́. И до́бре поруче́ное ему́ ста́до упасе́, ко Го́споду отъи́де.

Стихи́:

Возлю́блен бысть, Ага́пите, бо́льше,

Помяни́, что зове́ши: «Спа́се, возлюби́х Тебе́»?

Сей и́же во святы́х оте́ц наш, бя́ше во времена́ Иустиниа́на царя́, по́стничеством и доброде́телию воспита́н. Возведе́н быв в свяще́ннический сан. Иды́й же к Константи́ню гра́ду, е́же моли́твовати и благослови́ти царя́ Иустиниа́на, а́бие по доброде́тельному своему́ ше́ствию, и е́же к Бо́гу дерзнове́нию чудо показа́. И́бо бы́вшу ему́ во Елла́де, обре́те человека двои́ма страстьма́ стра́ждуща, и не могу́ща весма́ глаго́лати, ни ходи́ти, но от самого́ рожде́ния его́ не́ма бы́вша и по́лзающа. Он же того́ за ру́ку ем, ходи́ти и показа́: и от Те́ла Влады́чня вложи́ во уста́ его́, благоглагол́ива сотвори́. Бы́вшу же свято́му у златы́х врат, слепцу́ та́мо приседя́щу, и́же и ру́ку на о́чи его́ приложи́, прозре́ния си́лу дарова́. Пои́стинне досто́ин че́сти по свое́й доброде́тели от всего́ сигкли́та, и от самого́ царя́ прия́т быв, и от всего́ града́. И Анфи́ма епи́скопа Трапезо́нскаго, зле возсту́пльша на престо́л Константи́ня гра́да, низве́рже со престо́ла, зане́же му́дрствующу ему́ Евти́хиева и Севи́рова, и ана́феме сего́ предаде́. И благочести́ваго презви́тера Ми́ну святе́й Вели́цей це́ркви, житие́м и сло́вом подобна су́ща, и му́дростию пра́ва, е́же по ве́ре, того́ святи́в, и на престо́ле посади́в. По вре́мени же не́коем ко Го́споду отъи́де. Соверша́ется же собо́р его́ во святы́х вели́ких апо́стол.

Стихи́:

Его́же не у́ позна́ кто посреде́ пла́мене,

Ра́зумом глаго́лющаго: «Андриа́не, пожди́».

Му́ченик Христо́в Андриа́н, еди́н бя́ше не́когда от я́тых, и в разли́чныя темни́цы всажде́ных. Изведе́н же из темни́цы, же́ртве соверша́еме лжеимени́тым бого́м, и всем прельще́ным е́ллином жру́щым. Ну́дим бе и той к тре́бищу приступи́ти, и лива́н возложи́ти. Той же не то́чию того́ не повину́ся сотвори́ти, но кре́пко и му́жески прите́к раскопа́ тре́бище, и лежа́щыя на нем же́ртвы пролия́, и огнь размета́. Тем и на гнев подви́же кня́зя, и предстоя́щым идолослужи́телем гнев распали́, ят бысть, и бие́н без ми́лости. Ови убо па́лицами его́ бия́ху, о́вии же же́злием, друзи́и же ка́мением уста́ ему́ сокруши́ша. И на коне́ц возгнети́ша пещь вели́ку, и вверго́ша его́ в ню, и ту сожго́ша те́ло его́, и ду́хом взы́де к Бо́гу на не́бо.

Два мни́ха бе́ста в любви́ бра́та при́сная. И восхоте́ ею́ дия́вол разлучи́ти я́ от себе́. Еди́н же у́бо мний брат, возжже́ свети́лник, и не све́щнице положи́. Неприя́знивый же дия́вол сотвори́ ему́ па́кость, изрюти́ свети́лник. И би его́ брат со гне́вом. Он же поклони́ся ему́ до зе́мли, глаго́ля, пожди́ бра́те ма́ло, па́ки возжгу́ и́. И се си́ла Госпо́дня прии́де, му́чаше де́мона до у́тра. И прише́д де́мон, возвести́ кня́зю своему́ бы́вшее. Слы́шав же е́ллинеск иере́й си́це глаго́люща де́мона, шед и бысть мних. И держа́ше смире́ние от нача́тка глаго́ля, смире́ный разруша́ет всю си́лу вра́жию, я́ко сам слы́ша глаго́лавша и́. Егда́ смуща́ем бу́дет мних, и а́ще обрати́тся и смири́тся, и поклони́тся до земли́, упраздни́ти и́мать вся́ку си́лу вра́жию.