По шестой песни:
И поется кондак и икос (или мученичен, аще несть).Стихи́:
Чту Ариста́рха, я́ко и рачи́теля,
До́бре му́жествоваша да́же и до меча́:
Ка́мо уже́ пре́йде, егда́ посе́чен быв, Пу́дие?
Пре́йде уже́ к неистле́нней сла́ве:
Посе́чен быв Ариста́рх в пятнадеся́тый.
Си́и бя́ху от седми́десяти апо́стол, и́же после́доваша вели́кому апо́столу Па́влу, пропове́дающе и состра́ждуще учи́телю во всех беда́х его́. И по сконча́нии его́ и сим коне́чнее главы́ Неро́ном отсе́чени бы́ша.
О сих же треблаже́нный и всесла́вный Дорофе́й, и́же в Ри́ме быв, гре́ческими бесе́дами воспомина́ние им изоста́ви. Не то́чию же о сих, но и о про́чих апо́столех, и мно́гих святы́х, еще́ же и о свяще́нных проро́цех написа́. Бя́ше же святы́й благоуго́ден и многоуве́тлив, и добропи́сец, я́ко ин никто́же.
В то́йже день страсть свята́го му́ченика Са́ввы Го́тфскаго
Стихи́:
Пре́йде, Са́вво, тленнови́дную во́ду,
Я́ко да пие́ши неле́нную и сла́дкую во́ду:
В [осемна́десятый] речна́я вода́ Са́вву сконча́.
Му́ченик Христо́в Са́вва, бя́ше в ца́рство Уалентиа́на царя́, от страны́ Го́тфския, изде́тска христиа́н сый. Не то́чию у́бо отвраща́шеся идоложе́ртвеных мяс, но и хотя́щым вкуша́ти возбраня́ше: и в тех ме́сто Христо́ву ве́ру предлага́ше. Мно́гих же и креща́ше обраща́я. Прише́дше же идолослужи́тели, из гра́да изгна́ша и ну́ждею. По не́коем же ле́те Афанари́ху кня́зю го́тфскому, гоне́ние подви́гшу на христиа́ны. Ят бысть и святы́й Са́вва, и бие́н бысть кре́пко. Посе́м к колеси́ привя́зан бысть, и на бревне́ хра́миннем пове́шен бысть. Вкуси́ти же идоложе́ртвеных не восхоте́. И приведе́н бысть к реце́ Муси́йстей, и привя́зан к дре́ву вели́ку по вы́и, и вве́ржен бысть в реку́, и ту утопе́. Поживе́ лет три́десять и еди́но. Та́ко у́бо бо́дрене взы́де к Бо́гу.
В то́йже день страсть святы́х му́чениц жен Васили́сы и Анастаси́и, му́ченою в Ри́ме
Стихи́:
За Бо́жия А́гнца о́бе а́гницы закла́ни бы́ша,
Анастаси́я и Васили́са ку́пно.
Васили́са и Анастаси́я Христо́ве му́ченице, бе́сте от великаго гра́да Ри́мскаго, благове́рне и бога́те. Учени́це святы́х апо́стол. По уме́ртвии тех честныя их мо́щи погреба́сте. Уве́дани же бе́сте и оклевета́не, к нечести́вому и несмысленому Неро́ну, я́ко христиа́не суть. Он же а́бие посла́ и ят я́, и приведо́ша я свя́зане вери́гами, и ну́дяше я́ отврещи́ся Христа́. И не увеща́в же ею́, тогда́ у́бо затвори́ я́ в темни́це. Последи́ же из темни́цы изве́д, му́чи я́ разли́чно: и сосца́ има отре́заша и языка. И пове́сивше я́, и строга́ша я́ вельми́ желе́зом, и свеща́ми поджго́ша я́ по ра́нам. И на коне́ц отре́заша честны́я главы́ ею́.
В то́йже день святы́й Леони́д епи́скоп Афини́йский ми́ром сконча́ся
Стихи́:
Тма объя́т Афи́ны внеза́пу,
В них заше́дшу со́лнцу, Леони́ду.
В то́йже день святи́и му́ченицы Фео́дор презви́тер и Павсоли́пие мечем сконча́стася
Стихи́:
Павсоли́пия и Фео́дора, жерца́,
Дар не́кий непреста́нен меч принесе́.
В то́йже день е́же о Госпо́дстей Па́сце неде́ля о разсла́бленем
Стихи́:
Глаго́л Христо́в стягну́ разсла́бленаго,
То и цельба́ его́ глаго́лом еди́нем.
В то́йже день сло́во от патерика́ о двою́ мни́ху, и́же прия́ста себе́ жене́
Два не́кая мни́ха любодея́ния брань прия́ста от дия́вола, идо́ста и поя́ста себе́ жене́. По вре́мени же не́колице ре́ста в себе́, что приобрето́хома, я́ко оста́вихома а́нгельский чин и приидо́хома в скве́рну сию́, и по сих в му́ку о́гненую и́маема вни́ти. Но по́йдема па́ки в пусты́ню и пока́емася, и Бог прии́мет на́ю. И ше́дша в монасты́рь, умоли́ста отца́ да́ти и́ма покая́ние, и пове́даста, я́же соде́яста. И затвори́ я на ле́то. И обе́ма ра́вно дая́ше хлеб и во́ду, бе́ста бо о́бразом ра́вна себе́. И егда́ сконча́ста вре́мя покая́ния, откры́ся отце́м, я́ко прости́ ею́ Бог греха́ то́го. Отве́рзшеже, изведо́ша я. И ви́деша отцы́ еди́наго их бле́да и уми́лна лице́м велми́, а друга́го ве́села и све́тла и сла́вна, и диви́шася вси, я́ко бра́шна ра́вно восприима́ста. Вопроси́ша же уны́вшаго глаго́люще, ка́ко стяза́шеся с мы́слию в ке́лии свое́й. Он же рече́, зла́я и́же соде́ях и му́ку помышля́х, и в ню́же ми поити́, и от него́ стра́ха прилпе́ кость моя́ пло́ти мое́й. Вопроси́ша же и друга́го, а ты что помышля́ше в ке́лии свое́й. Он же рече́, хвали́х Бо́га, я́ко исто́рже мя от жития́ сего́ су́етнаго и печа́лныя му́ки, и приве́де мя во а́нгельское достоя́ние и житие́, и хваля́ Бо́га, весели́хся. И реко́ша ста́рцы, я́ко ра́вно есть обе́ма покая́ние к Бо́гу. И того́ ра́ди отдаде́ обе́ма греха́ ею́.
В то́йже день сло́во свята́го Ева́грия о тщесла́вии
Тщесла́вие есть страсть безслове́сна и вся́кому де́лу бла́гу соплета́ется и огнуша́ет е. Я́коже бо из ко́рене грезн полежа́ на земли́, то согни́ет вско́ре. Та́ко и доброде́тель погиба́ет тщесла́вия ра́ди. Мних тщесла́вен, де́латель безме́зден, труд приима́я, мзды же не прие́млет. Сосу́д у́бо у́тел не храни́т влия́ннаго вонь, та́ко и тщесла́вие изгуби́т мзду доброде́тели. Воздержа́ние со тщесла́вием, я́ко дым пе́щный на возду́се разы́дется, обою́ ветр погубля́ет след, та́ко и му́жу ми́лостыню и воздержа́ние, тще́славие. Верже́ние ка́мене не до́йдет небесе́, та́ко и моли́тва человекоуго́дна не взы́дет к Бо́гу, храни́т сокро́вище мужь у́мен, и доброде́телныя труды́ мних разу́мен, На простра́нне ме́сте моли́тися повелева́ет тщесла́вие, соблюда́яй же себе́ в хра́мине свое́й мо́лится Бо́гу. Показу́ет бога́тьство свое́ мужь безу́мен, и двиза́ет мно́ги мы́слити на не. Ты же храни́ свое́, на пути́ бо еси́ разбо́йник, до́ндеже прии́деши во град, и соблюде́нием храни́ши е́ в те́мнем сем житии́, ве́дый коне́ц его́, и град до́бре устро́еный бу́дущий век. И не весели́ся на пути́, неве́глас бо весе́лие твое́ воздви́гнет мы́слящих на тя. И блюды́йся, без па́кости во град вни́деши, всех восприи́меши невозбра́нно к тому́, и ни еди́н же похи́тит твои́х трудо́в. Доброде́тель тщесла́вная, сокруше́ный прино́с, и не прии́мется на же́ртвеник Госпо́день. Во дни же поста́, да не явля́еши та́йнаго воздержа́ния, ни покажи́ себе́ я́ко по́слухом на све́те мно́гим. Да и́же ви́дев тя в та́йне Оте́ц, возда́ст тебе́ мзду я́ве. Ему́же сла́ва, ны́не и при́сно и во ве́ки веко́в.