Стихи́:

И́же Твое́ те́ло ве́село, Спа́се, яды́й,

Сей и телесе́ ве́село совле́кся, Марти́н Твой:

В четыренадеся́тый у́мре Марти́н во изгна́нии.

Сей собо́р сотвори́ в Ри́ме, соше́дшымся к нему́ и про́чим свяще́нником, и правосла́вным муже́м, и прокля́ша е́ресь Ко́нсты царя́, вну́ка Иракли́ева. Се же он уве́дев, Макси́ма со ученико́м его́ Анаста́сием, пе́рвие в темни́це затвори́, та́же прогна́ того́ во Фрак. Ине́х же пред ся предпоста́вив, и сих суди́в: о́нем же обличи́вшым в лице́ злочести́вую его́ е́ресь. Царь же ру́це их и язы́ки отре́зати повеле́, и в Лаодики́ю тех прогна́ти посла́в. Посла́ же и в Рим, приве́д свята́го отца́ Марти́на в Константи́нь град, и в темни́це затвори́в, и мно́гая зла возложи́в нань: на три ле́та в Корсу́нь того́ прогна́. Анаста́сий же и ини́и пребы́ша во изгна́нии дово́льна ле́та, и сконча́шася. А и́же во святы́х оте́ц наш Марти́н, мно́га зла претерпе́в, и ко Го́споду отъи́де. Свято́е же те́ло его́ положено́ бысть вне гра́да Корсу́ня, в це́ркви Пресвяты́я Богоро́дицы Влахе́рнския.

Стихи́:

Ны́не по и́стине Ми́мский Ардалио́н,

Не́жели дре́вле подо́бяся бо ся му́чеником, огнь претерпе́.

Сей бя́ше во времена́ Максимиа́на царя́, в позо́рищех подо́бен сый, и про́чым разсужда́я стра́сти и дея́ния. Не́когда же прилучи́ся ему́, е́же по му́ченичному настоя́нию христия́нскому повину́ти себе́. Пове́шен быв и стро́ган, зане́же бого́м же́ртву не прине́сшу. Да я́ко о том молва́ от позо́рующыхся бя́ше, хва́ляще обы́чай его́. Он же велми́ возопи́в ку́пно лю́дем премо́лкнути, и пожда́ти повеле́в, и христия́на себе́ испове́дав по и́стине. Тем кня́зю мно́го те́шащу его́, и хотя́щу преложи́ти со́весть его́. Свято́му же того́ сотвори́ти не восхоте́вшу, но пребыва́ти во и́стинней ве́ре изво́лившу. Сковраду́ огне́м разже́гше, и посреде́ вве́ржен в ню и сконча́ся.

Стихи́:

Прия́л еси́ от ве́ка Фомаи́ду,

По Писа́нию бу́дущаго ве́ка, О́тче.

Спаси́тельному пра́зднику приспе́вшу, свята́го и вели́каго Пятка́, во́ньже пра́здноваху христиа́не, и сла́вляху благодаря́ще Христа́, нас ра́ди претерпе́вшаго спаси́тельныя стра́сти. Я́ту же бы́вшу Симео́ну епи́скопу, и убие́ну бы́вшу, и мно́гим во́ином с ним убие́ным. И́бо от вели́каго Пятка́ до деся́таго дне, всяк христиани́н ят и убива́емь быва́ше. Я́ти же бы́вше тогда́ и ти́и святи́и му́ченицы число́м ты́сяща, с ни́миже и Аза́т скопе́ц, бога́т у́бо сый, в пола́те царе́ве: люби́мь зело́, и чтимь Саво́рием царе́м. И вопроше́ни бы́ша, испове́даша Христа́ со дерзнове́нием, и а́бие избие́ни бы́ша вси. Опеча́лися же Саво́рий зело́ о сме́рти свята́го Аза́та. И положи́ зако́н отто́ле не убива́ти христиа́н: и сохране́н бысть до вре́мене.

Оте́ц Силуа́н, бе седя́ше иногда́ с бра́тиею: И бысть в виде́нии ужа́сне, и паде́ ниц. И по мно́зе часе́ воста́ и пла́кашеся. И моли́ша его́ бра́тия глаго́люще: Что и́маши, о́тче?, - вопраша́юще его́. Он же молча́ше и пла́кашеся. И ну́дящым его́ пове́дати. Он же рече́: Аз бра́тие на суд восхище́н бых, и ви́дех мно́го наро́да на́шего иду́ща в му́ку, и мно́го иду́ща от про́стых люде́й в Ца́рство. И пла́кашеся ста́рец, и не хотя́ше изы́ти из ке́ллии своея́, а́ще и ну́дяху его́ изы́ти. И покрыва́ше лице́ свое́ ку́кулем глаго́ля: Что хощу́ ви́дети вре́менный сей свет, ничто́же бо в нем поле́зно и помо́щно.

Я́коже младе́нец новорожде́н, о́браз соверше́на и́мать му́жа. Си́це у́бо и ду́ша, о́браз есть не́кий сотво́ршему ю́ Бо́гу. Я́коже у́бо отроча́ по ча́сти расты́й, по ча́сти познава́ет отца́. Внегда́ же во́зраста дости́гнет, тогда́ усвоя́ется сы́нови оте́ц изве́стно, и сын отцу́. Открыва́етжеся тому́ и о́тчее сокро́вище. Си́це у́бо и ду́ша, пре́же преслуша́ния преспе́яти хотя́щи, и в му́жа соверше́на дости́гнути бу́дет, преслуша́ния же ра́ди в пучи́ну забы́тия и во глубину́ пре́лести низведена́ бы́ти и́мать, и во две́рех а́да всели́тися, от мно́гаго у́бо я́ко же бы разстоя́ния уда́льшися Бо́га души́, не́мощно той бе приступи́ти и позна́ти Cозда́вшаго. Но Бог пе́рвее у́бо проро́ки обраща́ше ю́ к себе́, и призыва́ше, и к позна́нию влеча́ше Своему́. Последи́ же и Сам прише́д, отъя́т у́бо за́быть, отъя́т же и пре́лесть. Та́же и а́довы разве́рз две́ри, к прелще́ной вни́де души́. Себе́ о́браз сей положи́в, им же мо́щно ей бу́дет к ме́ре во́зраста к соверше́нию ду́ха достигну́ти. И скуша́етжеся Бо́жие сло́во от лука́ваго по смотре́нию. Та́же поноше́ния и уничиже́ния, досажде́ния же и зауше́ния от рук о́нех де́рзостивых. И са́мую после́днюю кресто́м смерть претерпева́ет. О́браз указа́я, я́коже ре́хом, да научи́мся си́це твори́ти к понося́щым и уничижа́ющым, или́ смерть нам наводя́щым, да́же и мы по писа́ниих. Я́ко глу́си и не́ми бу́дем, не отверза́юще уст свои́х, и де́йства то́нкость позна́ется лука́вьства их. И я́коже на кресте́ гвоздьми́ пригвожде́н, с во́плем кре́пким возопие́м, к могу́щему его́ изба́вити от сме́рти, от та́йных мои́х рече́ очи́сти мя. И а́ще ми не удоле́ют, тогда́ непоро́чен бу́ду. Тогда́ у́бо непоро́чен быв, обрета́ет повину́вшаго ему́ вся́ческая, и соца́рствует и почива́ет со Христо́м. И́бо преслуша́ния ра́ди, от ве́щных же и скве́рных поже́рту бы́вшу по́мыслу, и безслове́сна бысть ду́ша. Тем же нема́ла труда́ потре́ба, от таковы́х возни́кнути веще́й. И то́нкость смотри́ти лука́вьствия и проити́, да безнача́лному уму́ сораствори́тся. Оба́че разуме́й я́ко во мно́зе тру́де и по́те рече́ лица́ твоего́, восприи́меши бога́тьство свое́. Нибо́ ти есть поле́зно бла́го безтру́дно стяжа́ние. Поне́же без труда́, погуби́л еси́ е́же прия́т, и врагу́ пре́дал еси́ насле́дие. Позна́ем у́бо ко́ждо что погуби́хом, и рыда́ние восприи́мем проро́чо, во и́стину бо насле́дие на́ше обрати́ся чужи́м, и дом наш стра́нным, е́же преслу́шати за́поведи, и свои́ми во́лями ходи́ти, и скве́рными и земны́ми слади́тися по́мыслы.

Подоба́ет мни́ху я́ко сы́ну бы́ти, от всего́ помышле́ния люби́ти Бо́га всегда́, и я́ко рабу́ боя́тися и гове́ти при́сно, и слу́шати его́, и осужа́ти себе́ на всяк день, о по́мыслех злых и о дея́ниих. Не доста́точная соверша́ти, и о исправле́ниих не велича́тися, но раба́ неключи́ма себе́ нарица́ти, лиша́ющагося ко исправле́нию до́лжных. Хвали́ти же Бо́га, и Тому́ написа́ти благода́ти исправле́ных. Не по тщесла́вию, ни по человекоуго́дию твори́ти что, но в та́йне твори́ти вся, и то́кмо хвалы́ от еди́наго Бо́га иска́ти. Преди́ же всех и на́до все́ми, пра́вою ве́рою огради́ти ду́шу, по боже́ственому повеле́нию собо́рныя Це́ркве пропове́данию, от святы́х и богопропове́даных апо́стол и преподо́бных оте́ц. Живу́щим бо та́ко воздая́ние мно́го, жизнь безконе́чная и оби́тель неразори́ма, Отца́ и Сы́на и Свята́го Ду́ха, Единосу́щнаго и Трисоста́внаго Божества́, Ему́же сла́ва, ны́не и при́сно и во ве́ки веко́в.