Стихи́:

Ра́достно преста́влься, Васи́лие треблаже́нне,

Та́мо бо и́де иде́же су́щим ра́достем мно́жество:

В дванадеся́тый Васи́лия ме́ртва гроб прия́т.

Сей святы́й Васи́лий, премно́гия его́ ра́ди доброде́тели, и к Бо́гу боже́ственаго жития́, архиепи́скоп Пари́и поста́влен быв по Па́вле, в ле́та злочести́вых иконобо́рец. И бе́ ревну́я боже́ственому Па́влу, е́же не совни́ти ко иконобо́рцем, ниже́ подписа́ти свое́ именова́ние на разруше́ние святы́х ико́н. Тем житие́ свое́ в гоне́ниих и в ско́рбех и в теснота́х препроводи́в, преселе́ния и бе́гания вы́ну творя́. Оте́ческим повеле́нием и уче́нием после́дствуя. Злочести́вых же собо́ры возненави́де, и Бо́гу о всем уго́дник я́влься, с ми́ром почи́ о Го́споде.

Стихи́:

Ко́рене благочести́ваго плод благоуха́нен па́че,

Анфѵ́са честна́я, от земли́ отцвете́ и от жития́.

Сия отце́м мно́го пону́ждена бя́ше сопрящи́ся му́жеви, и не поко́ршися. Тем по сме́рти его́ свобо́дна бы́вши, все бога́тство свое́ раздаде́ убо́гим, и по цер́квах и по благочести́вых до́мех. Мно́гим си́рым ма́ти бысть, и вдови́цам засту́пница. Мно́жицею мно́гими мольба́ми ну́дима бя́ше Ири́ною правосла́вною цари́цею, е́же с нею бы́ти и сца́рствовати: Она́ же ника́коже восхоте́. Ели́ко же дний в пола́те пребы́вши, сверху́ ца́рскими оде́ждами оде́яна бя́ше: по пло́ти же ру́бы власяны́ми. И питие́ вода́, и пи́ща по́стническая. Сле́зы всегда́ во о́чию, и пе́ние боже́ственное во усте́х. Тем и́ноческое восприе́мши житие́, рука́ма и́же во святы́х Тара́сия постригися во оби́тели омони́йстей, и́же и оттогда́ от таковы́я обители не изы́де. Це́рковь не оставля́я, не почива́ющи. Не малоду́шествова моля́щися, ни ослабе́ стоя́нием. И николи́же от о́чию ея́ сле́зы преста́ша. Смире́ние ея́ безчи́слено бя́ше, всем бо сестра́м слугова́ше. Це́рковь крася́ше. Во́ду нося́ше. На трапе́зе предстоя́ше, и служа́ше. И та́ко вся ле́та живота́ своего́ творя́щи, с доброде́тельным бре́менем к Бо́гу преста́вися, су́щи лет, пяти́десяти и двою́.

Стихи́:

Пе́рвее глава́ Протио́ну отсече́ся,

И́же по нем главу́ истя́г слузе́ Ди́мос

Стихи́:

Рабы́ Бо́жия ста́рцы страстопобие́ных

Состреля́нием поби́ша человекоуби́йцы.

Госпо́дь Бог наш Иису́с Христо́с, просвети́вый зе́млю гре́ческую святы́м креще́нием, и от и́дольския льсти обрати́вый, ве́ры ра́ди Константи́на царя́. Даде́ ма́тери его́ Еле́не цари́це обрести́ дре́во креста́ своего́, на утвержде́ние ве́рным, и на прогна́ние вся́кия льсти. Предве́дяше бо Госпо́дь Бог наш, я́ко воста́нут духобо́рцы мно́зи, противля́ющиися пра́вой ве́ре, сего́ ра́ди даде́ благочести́вым царе́м преноси́ти мо́щи святых в Константи́нь град. И мно́га чудеса́ яви́, да бы́ша еретики́ посра́млени бы́ли, и жи́дове обличе́ни не е́мшии ве́ры Сы́ну Бо́жию, де́мони же прогна́ни были. Вдохну́в же си́ма благочести́выма царема Констани́ну и Рома́ну, да принесу́та честны́й по́яс Святыя Богоро́дицы в Царь град: да не то́кмо ри́за еди́на будет, но и поя́с Святы́я Богоро́дицы, его́же даде́ Святая Богоро́дицы Фоме́ апо́столу в тре́тий по успе́нии, егда́ усре́те ю́ носи́му в рай, да бы́ша не ропта́ли нань апо́столи. И се слы́шавше бо́льшим разгоре́нием от Ду́ха вжела́ста, да бы и́ма освяти́тися и гра́ду ею́. Посла́ста сия царя́, епа́рха и епи́скопы и попы́ во град Зи́лу, и принесо́ша от епи́скопии Зи́лы честны́й пояс Святы́я Богоро́дицы. Изыдо́ста же царя́ с патриа́рхом проти́ву со епи́скопы и попы́, и с че́стию внесо́ша во град, в ле́то шесть ты́сящь четы́реста пятьдеся́тое: Ме́сяца апри́лия, в двана́десятый день. И положе́н бысть в ра́це в Халкопра́тии. Пра́зднует же Бо́жия Це́рковь ме́сяца а́вгуста, в тридеся́тый день, да по всей вселе́нней возвели́чится и прославля́ется и́мя Святыя Богородицы. Еяже молитвами, да сподобит нас Господь Бог Царству небесному во вся веки.

Афана́сия преблаже́нная, бе от о́строва нарица́емаго Евге́ния. От христия́ну роди́телю роди́ся, отца́ Ники́ты, и ма́тере Ири́ны. От нею́же святы́м кни́гам научена́ бысть. И от ю́ности бысть сосу́д избра́н Свято́му Ду́ху на прия́тие, тку́щи же ей поста́в не́когда, и ви́де све́тлу звезду́ до пе́рсей ея́ сше́дшу, и просвети́ ей о́чи серде́чнии, и жела́ше Бо́гу рабо́тати в чистоте́. Роди́теля же ея́ непреста́нно ну́дяста ю́ оста́вити спасе́ный путь. И ну́жею вда́ста ю́ за́мужь. И по бра́це ми́ну, шесть на́десять дней, ру́си ра́тию прише́дшим в страну́ ту, и му́жу ея́ убие́ну бы́вшу. Афана́сия же ра́довашеся, зане́ хотя́ше восприя́ти и́ноческое житие́, и царе́во напра́сное прии́де повеле́ние, вда́ти веля́ше ю́ныя вдови́цы за ору́жники своя́. Афана́сия же и второ́му бра́ку не во́лею сочта́ся. По не́коем же ле́те увеща́ му́жа своего́ бы́ти мни́хом. Сама́ же вше́дши в монасты́рь деви́чь, и разда́вши име́ние, и прия́ а́нгельский о́браз. И по четы́рех ле́тех игу́мению наречена́ бысть. Име́яше же на те́ле свое́м ри́зу власяну́. А посте́ля ея́ бе от ка́мения дро́бнаго скла́дена, и не прия́ слуги́ смире́ния ра́ди. И никто ́же во всем житии́ ея́ воды́ на ру́це ея́ возлия́. Ядь же ея́ бе хлеб я́чен, и того́ по захоже́нии со́лнца вкуша́ше. Ма́сла же и вина́ николи́ же вкуси́. Ры́бы же то́чию на Рождество́ Христо́во и на Па́сху вкуша́ше. Во весь же пост то́кмо два́жды вкуша́ше. И ни еди́наго часа́ от славосло́вия Бо́жия погуби́, и всено́щное име́я стоя́ние. Во всем же о́строве том пронесе́ся сла́ва о ней, и по вся дни да́ры приноша́ху ей. Того́ ради вельми́ стужа́ше себе́ Афана́сия, и иска́ше уклони́тися от то́ле. Бо́жиим же наставле́нием прии́де не́кий мних, возвести́ ей це́рковь в пусты́ни свята́го Стефа́на. Она́ же увеща́вши сестры́ своя́, отъи́де та́мо с ни́ми, и мно́га чудеса́ сотвори́ па́мяти досто́йна. И вельми́ о сем стужа́ше, я́ко от челове́к сла́вима бе. И утаи́вшися бежа́ в Константи́нь град. И в не́который вшед монасты́рь, пове́дашеся от своея́ страны́ изгна́на, и ту хотя́щи пребыва́ти, прия́та бысть. По ма́лех же днех не можа́шеся утаи́ти, Бо́гу прославля́ющу ю́, и нача́ бе́сы изгоня́ти, слепы́я просвеща́ти. И слы́шавше сестры́ приидо́ша к ней, и моли́ша ю́ ити́ с ни́ми в свой монасты́рь. И прии́де с ни́ми в пре́же рече́нный монасты́рь. И по два́десяти днех ко Гос́поду отъи́де. Запове́давши до четы́редесяти дней трапе́зу ни́щим поставля́ти. Оне́м же то́чию до девяти́н, и по девяти́нах не творя́щим того́, и яви́ся им свята́я со двема́ а́нгелома, и рече́, почто́ преступи́сте за́поведь мою́. Изве́стно бу́ди вам и́же за ду́шу твори́мое до 40 дний, или́ ми́лостыня, или́ а́лчных насыще́ние, или́ иере́йския моли́твы в це́ркви твори́ти, а́ще и гре́шны суть усо́пших ду́ши, то отпу́ст от Бо́га прии́мут грехо́в. А́ще ли суть пра́ведных, то исполне́нием вся́кого добра́ творя́щими обогатя́тся. И се ре́кши, жезл свой потче́ и неви́дима бысть. У́тре же воста́вше. Ви́деша жезл ея́ процве́тш, и просла́виша Бо́га, Творца́ и Соде́теля всех.

Щит приими́ О челове́че, ре́кше святы́я моли́твы, и огради́ся и́ми. Воста́ни от сна, и извлецы́ си мечь, и ста́ни кре́пце по си́ле свое́й, и помоли́ся от всея́ души́ жела́нием свои́м, и Бог помо́жет ти ско́ро, и пода́ст ти кре́пость и си́лу, побежда́ти врага́ неви́димаго на тя дерза́юща. Не того́ бо де́ля есть бра́тие нощь сотворена́, да при́сно спим и пра́зднуем, но раздели́ти подоба́ет, о́во у́бо на де́ло о́во же на поко́й. Смотри́те, ка́ко у́бо востаю́т в полу́нощи рукоде́льницы, ра́таи же и купцы́. Тем же и вы вси воста́ните ко́ждо вас в нощь, и пе́рвее всех дел моли́тву к Бо́гу сотвори́те, да ми́лость Свою́ пода́ст вам. А егда́ ложа́ся спа́ти, то не погреши́ ни еди́ноя но́щи е́же не кла́нятися. Но ели́ко у́бо моги́й по си́ле поклоне́ние сотвори́. Тем бо покланя́нием побежда́ет челове́к дия́волю си́лу. И тем избыва́ет грехо́в, и́же согреши́л того́ дне. Тогда́ бо но́щию, и ум ти есть легча́е к Бо́гу, и мо́гут тя у́бо на покая́ние обрати́ти нощны́я моли́твы, па́че твои́х дневны́х моле́б, нощны́х послу́шает Бог. А́ще же и из хра́ма изни́кнеши, то слы́шиши изря́дное молча́ние. Тогда́ же ти и ду́ша честне́йши есть, и ум твой легча́е на молбы́. Те́мже возлю́бленне воста́ни в нощь, и преклони́ коле́ни, и припади́ к Бо́гу моля́ся. И па́че ти дневны́х моле́б, приклони́т у́хо Свое́ Госпо́дь в нощны́я мольбы́. Воспомяни́ Дави́да царя́ ка́ко глаго́лаше, седми́жды днем хвали́х Тя. И па́ки полу́нощи воста́х, испове́датися на судьбы́ пра́вды Твоея́. И утруди́хся воздыха́нием мои́м на вся́ку нощь, слеза́ми мои́ми посте́лю мою́ омоча́х. Помы́слите бра́тие, а́ще царь сый толи́ко имы́й печа́ли, та́ко творя́ше по вся но́щи. А мы ка́ко отве́т да́мы Бо́гу, в ле́ности пребыва́юще. Глаго́лю вам бра́тие и сестры́, воста́нем но́щию моли́тися Бо́гу о гресе́х на́ших, и испове́датися Ему́. Тогда́ бо в нощь ни тща́я словеса́ му́тят ум. Ка́ко бо мути́ти хотя́т, а всем спя́щим, и не зазря́щу никому́. Не зия́ет бо ни кто, ни па́костит. Ка́ко мо́жет бы́ти такова́ мольба́ в день, а уму́ ви́дящу мног мяте́жь, и по́мыслы име́ющу мно́ги. А́ще бо и вельми́ ся крепи́ши в день, но не мо́жеши таки́х моли́тв принести́ к Бо́гу, и бу́ди храм нашь а́ки це́ркви об нощь. Му́жи и жена́ми соста́влен. Рече́ бо Госпо́дь, иде́же е́ста два или́ трие́, о и́мени Мое́м со́брани, ту есмь посреде́ их. До́брее Бо́гу еди́н творя́й во́лю Его́, не́же тма беззако́нных. А́ще у кого́ у вас де́ти суть, возбуди́ я́ в нощи́ моли́тися к Бо́гу. И научи́ я́, да та́ко всегда ́творя́т. Несть бо ничто́ же такова́ хра́ма добре́е, иде́же в нощь молбы́ твори́мы суть. Слы́шите что проро́к глаго́лет, а́ще помина́х Тя на посте́ли мое́й, на у́трених поуча́хся в Тя. Потщи́мся моли́тися бра́тие по вся но́щи, да разреши́м у́зы грехо́вныя. Глаго́лю у́бо вам, воста́нем но́щию, а́ще не полу́нощи, поне́ к све́ту. Нощь бо на́ двое разлучена́ есть, те́лу у́бо на поко́й, а души́ на спасе́ние. Воста́ни у́бо в нощь, и моли́ся Бо́гу. Припади́ воздыха́я о гресе́х. А́ще бо и ми́лостыню твори́м, а са́ми лени́мся на моли́тву, то не мо́жем спасти́ся. Сего́ ра́ди не лени́мся и мо́лимся Ему́ Зижди́телю своему́, да спасе́т ду́шя на́шя я́ко Благ и Человеколю́бец. Ему́же сла́ва, ны́не и при́сно и во ве́ки веко́в.