Стихи́:

Ка́я возда́ния сече́нию Тере́нтиеву?

Е́же содержи́ма лице́, у́ши же и се́рдце,

Ви́дим, коли́ко секо́ша страстоте́рпец?

Десятори́ца четверосугу́бная, вси единоду́шни:

В деся́тый Тере́нтию горта́нь отсече́ся.

Си́и бя́ху во времена́ Де́кия царя́, и Фартуниа́на иге́мона, от Африки́и су́ще. Прише́дшу же повеле́нию, е́же не именова́ти ве́ру Христо́ву, супроти́вящих же ся повсю́ду му́чити. Ви́дяще же си́и четы́редесять мно́гих отступа́ющих, и к пре́лести прекланя́ющихся, и совеща́шася друг по дру́зе ста́ти, и душе́вное и теле́сное до́блестие Христа́ ра́ди до́бре небрещи́. Воспомяну́вше са́ми Госпо́дни глаго́лы, и́же к муче́нию всех подви́же: «Не боя́тися, рече́, от убива́ющих те́ло, ду́шу же взя́ти не могу́щих». И зане́же приведе́ни бы́вше к иге́мону Фартуниа́ну, ве́ры ра́ди Христо́вы, и и́же от е́ллин к что́мым истука́нным пожре́ти, и непоко́ршеся, сих иге́мон в темни́цу воврещи́ повеле́. А е́же о блаже́ннем Зино́не, и Алекса́ндре, и Фео́доре, посла́в уже́ зау́тра, и на испыта́ние их предста́ви, и пону́ди их отступи́ти от Христо́вы ве́ры, и приступи́ти ко и́долом. Предста́вшым же им и непоткове́ние ве́ре показа́вшым, о ней же вседу́шно пострада́ша. Же́злием бо сукова́тым, и волу́ями жи́лами сухи́ми бие́ни бы́ша, толи́ко я́коже яви́тися всем вну́трешним их. Та́же рожны́ разже́ными по плеща́ми сбоде́ни бы́ша, возлива́юще по ра́нах их о́цет сме́шен с со́лию, и власяны́ми о́стрыми клепа́ми потира́ху. Уве́дев у́бо я́же о них иге́мон, па́че же боля́ истука́нных ра́ди, их же моли́твами святи́и низве́ргли бя́ху, и повеле́ па́ки их в темни́цу воврещи́. Ведо́ми же святи́и и Тере́нтием те́шими, и а́бие вса́ждени бы́ша в темни́цу: привя́зани желе́зы о ши́ях, и око́вы ско́ваны по рука́х же и по нога́х, престрада́ша и таково́е лю́тое муче́ние, и́же и мно́гия дни а́лчни пребы́вше. Повеле́но же бысть никогда́ стра́жнику прине́сти о́нем хлеб. Но в таковы́х напа́стех лю́тых заступле́ние получи́вше от Бо́га, настоя́нием а́нгельским у́зам отпа́дшим, и пи́щею с небесе́ насыти́вшеся, а́бие здра́ви иге́мону предста́ша. Стро́гани же бы́вше, и звере́м пове́ржени, от них же ни еди́н святы́х косну́ся. Посе́м мече́м главы́ им отсеко́ша.

Стихи́:

Испусти́ Олда́ дух, бу́дущая прозира́яй,

Ду́ха по́лна су́щаго боже́ственаго све́та.

Стихи́:

Иа́кова и посе́чена пишу́, и посече́ния нося́й вене́ц мзде:

[С посе́ченою главо́й Христо́в леви́т А́за] Христо́ва врага́ Левиафа́на посрами́в.

Си́и бя́ху во времена́ Саво́рия, царя́ пе́рскаго. Иа́ков у́бо нарица́шеся от ве́си, глаго́лемая Фарга́фа, А́за же – от ве́си Винти́ри. Я́ти бы́вше и предста́ша старе́йшине волхво́м кня́зю харга́нскому и Христа́ со дерзнове́нием испове́давше, си́напь (горчи́цу) со о́цтом в но́здри прие́мше. Та́же бие́ми и поста́влени на́зи в сту́день нощну́ю мра́зом томи́ми. Пото́м приведе́ни и пону́ждени пожре́ти со́лнцу и огню́ и не повину́вшеся, повеле́нием кня́жиим главы́ им отсеко́ша, и та́ко венцено́сцы на небеса́ взыдо́ша.

Пове́даша бра́тия о отце́ Илии́, я́ко изде́тска трудо́м прилежа́ше. Мно́гажды бо огнь в ло́не ноша́ше, и поуча́я бра́тию подвиза́тися, показу́я знамение им глаго́ля: А́ще бо вои́стину тружда́етеся, зна́мение труда́ покажи́те. Иногда́ же ему́ бы́вшу в пусты́ни, восхоте́ ме́да, и а́бие обре́те под ка́мыком мед, и рече́: Отступи́ от мене́ зло́е похоте́ние: Пи́шет бо ся: А́ще ду́хом живете́, по́хоти плотски́я не и́мате сотвори́ти. И оста́вив мед отъи́де. И па́ки ему́ три неде́ли пости́вшуся в пусты́ни, и обре́те о́вощь в пусты́ни пове́ржен, и рече́: Не и́мам я́сти, ни прикосну́тися к нему́, да не бра́та своего́ соблажню́: Пи́шет бо ся: Не пи́щею еди́ною жив бу́дет челове́к. Моля́ше же его́ не́кто от бра́тии жи́ти с ним в пусты́ни. Сему́ же глаго́лющу: Не мо́жеши терпе́ти в пусты́ни напа́стей сатанины́х. Па́че же он прилежа́ше глаго́ля: Я́ко все терплю́. Та́же прии́м его́, и в друзе́й пеще́ре жи́ти ему́ повеле́. Прише́дше же но́щию бе́си, нача́ша его́ дави́ти, скве́рными по́мыслы мяту́ще его́. Тек же он пове́да сбы́вшееся ему́, чернори́зцу Илии́. Он же шед очерти́ ме́сто то, и повеле́ ему́ отто́ле без стра́ха жити́ ту. Отше́льник же не́кий бли́жния пусты́ни пове́даше [о сем] прише́дшым бра́тиям к нему́.

Рече́ ста́рец: я́ко седя́й в послуша́нии отца́ духо́внаго, бо́льшую мзду и́мать па́че седя́щаго в пусты́ни, и о себе́ живу́щаго. И глаго́лаше се: я́ко пове́д от ста́рец еди́н глаголя: Я́ко ви́дех четы́ре чи́ны на небесе́х. Пе́рвый чин, боля́й человек, и хваля́й Бо́га. Вторы́й чин, име́яй страннолю́бство, и на сем стоя́ и служа́. Тре́тий чин, живы́й в пусты́ни, и не ви́дяй челове́ка. Четве́ртый чин, седя́й в послуша́нии отца́ духо́внаго, и повину́яся Бо́га ра́ди. Ноша́ше же име́яй послуша́ние гри́вну злату́, и бо́льшу сла́ву име́яше па́че о́нех. Аз же рех водя́щему мя: Ка́ко сей монах и́мать па́че о́нех бо́льшую сла́ву? Он же отвеща́ рече́ ми: Поне́же творя́й страннолю́бство, свое́ю во́лею твори́т. Та́ко же и в пусты́ни свое́ю во́лею отхо́дит: име́яй же послуша́ние, всю во́лю свою́ оста́вль, и держи́тся Бо́га, и отца́ своего́ духо́внаго. Сего́ ра́ди бо́льшую славу и́мать па́че ине́х. Сего́ ра́ди слы́шаще о́ ча́да, добро́ есть послуша́ние Бо́га ра́ди твори́ти, слы́шавше от ча́сти исправле́ния честь и сла́ву: Ему́же и похва́льная воспою́ словеса́, а́ще что почту́: О́ послуша́ние, роди́телю всем до́брым де́телем! О́ послуша́ние, всем ве́рным спасе́ние! О́ послуша́ние, ца́рству обрета́тель! О́ послуша́ние, небе́с отверзе́ние, челове́ка от земли́ вознося́! О́ послуша́ние, сожи́телю а́нгелом! О́ послуша́ние, всем святы́м пита́телю: о тебе́ бо насади́шася, и тобо́ю соверши́шася.

Поне́же Бог благ есть и пра́веден, нарече́ день воскресе́ния и испыта́ния, да восприи́мет душа́ свое́ те́ло. И злый у́бо зле прии́мет она́мо, о них же согреши́, му́чен бу́дет. Благи́й же зде быв, она́мо благи́х насле́дник бу́дет. Услы́шат бо рече́ Госпо́дь су́щии во гробе́х глас Сы́на Бо́жия, и изы́дут сотво́ршии блага́я в воскресе́ние живота́, сотво́ршии же зла́я в воскресе́ние суда́, егда́ престо́ли поста́вятся и ве́тхий де́ньми всех Соде́тель предся́дет, и кни́ги отве́рзутся, и всех делеса́ и помышле́ния напи́сана иму́ще, и река́ о́гненая потече́т, и вся та́йная откры́ются. Никто́ же та́мо собесе́дник, или́ ухищре́нием глаго́л, или́ ло́жным отве́том, или́ бога́тьством си́лы, или́ с горды́нею, или́ дарми́ оби́льная дая́ния укра́сти пра́ваго суда́ возмо́гут. Но не обыме́нный Он и и́стинный Судия́ ме́рилы пра́ведными вся разсу́дит. В свет несказа́нный со а́нгелы веселя́щеся, и неизрече́нных благ наслажа́ющеся, Святе́й Тро́ице чи́сто предстоя́ще. Зла́я же сотво́ршии, и вси нечести́вии и гре́шницы в му́ку ве́чную. Я́же гее́на глаго́лется, е́же есть родство́ о́гненое, и червь неусыпа́ющий, и скре́жет зубо́м. И и́на тма́ми муче́ния. Па́че же всех зле́е, е́же чу́жу бы́ти от Бо́га, и отве́ржену пресла́дкаго лица́ Его́, и сла́вы о́ноя лиши́тися несказа́нныя, и обличе́ну бы́ти пред все́ю тва́рию, и посрами́тися студо́м конца́ не иму́щым. По дни же стра́шнаго о́ного отве́та вся непрело́жна бу́дут и непреме́нна. Ни пра́ведных у́бо све́тлому ра́дованию не иму́щу конца́, ни гре́шных страсте́х муче́нию прие́млющу поко́я. Ни суд бу́дет по о́ном бы́вшем, ниже́ отве́т о де́лех сотворя́я, ниже́ ослабле́ния преложе́ния, ниже́ ина́я казнь му́чащимся пребыва́ющым в ве́чней му́це, но во́веки су́щу с ни́ми муче́нию. Сим у́бо та́ко су́щем, каковы́м подоба́ет нам бы́ти во святы́х пребыва́ниих, и во святы́х благоче́стных житии́х, да сподоби́мся избе́гнути хотя́щаго бы́ти преще́ния и гне́ва и бу́дущия му́ки, и ста́ти одесну́ю Сы́на Бо́жия. То бо есть стоя́ние пра́ведником. Гре́шником же шу́яя дана́ есть преокая́нная часть. Отту́ду же пра́ведныя у́бо благослове́ныя овца́ нарица́я Влады́ка, в безконе́чное Ца́рство вво́дит. Гре́шники же со гне́вом и кля́твою изгна́в от кро́ткаго и ти́хаго лица́ Своего́, и во всегорча́йшу ку́пно и в люте́йшу му́ку ве́чную о́тслет. Ему́же сла́ва ны́не и при́сно и во ве́ки веко́в.