Стихи́:

Та́мо пре́йде Евпси́хие мече́м:

Иде́же Христос до́йде, и спасе́ние в Кесари́и подаде́.

Святы́й му́ченик Евпсихи́й, бе от Каппадоки́йския страны́, непоро́чно житие́ и ра́зум стяжа́в. Име́яше же любо́вь вели́ку о Христо́ве ве́ре. И име́я жену́ зако́ном бра́чным. Ре́вностию же Боже́ственою разгоре́вся, и от христия́н не́кия пои́м, и разруши́ из основа́ния це́рковь и́дольскую нарица́ющуюся полу́чай , в ню же ве́роваше Иулия́н законопресту́пник, же́ртву приноша́ше ту. И поне́же уве́дено бысть бы́вшее, и в бо́рзе посла́в, всех повеле́ христиа́н свои́х це́рквей лиши́ти и заточи́ти их. Му́ченика же Евпсихи́я я́ко пови́нна бы́вша такова́го де́ла, осуди́ умре́ти мече́м.

Стихи́:

Седмь учени́к с Вади́мом посе́чени бы́ша,

И́бо не отбего́ша, я́ко ученицы́ Го́спода своего́.

Той святы́й му́ченик Вади́м, бе от пе́рсскаго гра́да Вифлапа́та, ро́да бога́та и сла́вна. Изво́ли же бы́ти мона́х, и бысть архимандри́т, и мно́га от е́ллин обраща́я к Бо́гу и креща́ше. И ят бысть с седмию́ учени́к его́, и в темни́цу вве́ржен бысть, царю́ Саво́рию пе́рсскому повеле́вшу. И пребы́сть в темни́це четы́ре дни. Посе́м изведо́ша его́ пе́рсяне из темни́цы и со ученики́ его́, и повеле́но бысть Ни́рсе не́коему слузе́ пе́рвое христиа́ну бы́вшу, и убоя́вшуся мук и отве́ргшуся Христа́, свята́го усе́кнути. И ви́дев святы́й Ни́рсу укори́ его́, я́ко не помяну́ воздая́ния бу́дущаго Суда́ и дне, во́ньже возда́ст ему́ Госпо́дь, Его́же отве́ржеся. Сей же трепе́ща, даде́ четы́ре ра́ны мечем свято́му. И та́ко с трудо́м мно́гим предаде́ святу́ю ду́шу свою́ Го́сподеви. Уби́йца же Ни́рса объя́т бысть мно́гими злы́ми, и мече́м сам себе́ погуби́, я́ко во отверже́нии пребы́сть.

Стихи́:

Во огнеслуже́бней земли́ стражде́, Перси́да,

Христослуже́бный же та́мо [в] главопосече́нии пострада́.

Саво́рию царю́ пе́рсскому в пятьдеся́ть и тре́тие ле́то ца́рства своего́, на гре́ческия страны́ прише́дшу, прия́т град нарица́емый Визади́н, и поби́в я́же в нем во́ины, и могу́щыя ору́жия держа́ти. Наро́да же безору́жнаго с жена́ми же и ста́рцы и с детьми́, и епи́скопа Илиодо́ра, и Диса́на презви́тера, и Мариа́ва ста́рца, и свяще́нники, и вся́кого при́чта свя́заны заведе́. Да внегда́ у́бо хотя́ше преста́витися епи́скоп Илиодор, Диса́на презви́тера в ме́сто себе́ поста́ви. У́треннему же славосло́вию в це́ркви приноси́му Бо́гу. Старе́й волхво́м звезда́рь, Саво́рию царю́ оклевета́, я́ко и́же тобо́ю приведе́ни христиане, Диса́на не́коего послу́шают, и твою́ службу ху́лят. Повеле́вшу же ему́, собра́вшеся му́жие, триста, и не покори́шася, со́лнцу и огню́ покланя́тися, главы́ им отсеко́ша. От них же два́десять и пять, устраши́шася своея́ поги́бели, к царю́ притеко́ша и в покоре́ние тому́ бы́ша. Еди́н же не́кто и́менем Авдиису́с, неболе́знену ра́ну прие́м, и не убие́н бысть с му́ченики, и́же и на после́док сло́во Бо́жие пропове́дая. И не́кто нечести́в приступи́в, ри́ну его́ велено́жием, и неснаходи́в закла́ние. Пото́м востужи́ и возстена́, ра́ди и́же изооста́ от полка́ му́ченическаго.

Жена́ не́кая имя́ше на сосце́ струп зол, реко́мый карки́н. Сия́ же слы́шавши о отце́ Лунги́не, и иска́ше глаго́лати с ним. И изше́дши жена́ от гра́да о девя́том часе́, и прилучи́ся блаже́нному тому́ ста́рцу собира́ти дрова́ при мо́ри, и обре́т его́ жена́ глаго́ля, о́тче где живе́т раб Бо́жий Лунги́н, неве́дущи я́ко той есть. Он же рече́ ей, что и́щеши лжи́ваго того́. Не иди́ у́бо к нему́, лжив есть, что есть е́же и́маши. Она́ же проуве́дев того́ бы́ти, показа́ ему́ струп свой. Ста́рец же пе́рстом свои́м зна́менав отпусти́ ю́ рек, Госпо́дь тя уврачу́ет. Лунги́н же никоея́ же по́льзы не мо́жет сотвори́ти. Жена́ же отъи́де ве́рующи словеси́ его́, и а́бие исцеле́. По сих же пове́да вещь зна́мения, и реко́ша ста́рцы, ве́си у́бо я́ко той есть а́вва Лунги́н.

Рече́ святы́й Иса́к Си́рин, я́ко а́ще и́маши изли́ше дневны́я потре́бы, отда́ждь убо́гим, и иди́ со дерзнове́нием и принеси́ моли́тву свою́, е́же есть глаго́лати с Бо́гом, я́ко сын со Отце́м. Ничто́ же та́ко прибли́жит к Бо́гу, я́коже ми́лостыня. И ничто́же та́ко сотвори́т ти́хости уму́, я́коже нищета́ во́лная. У́не ти есть от мног про́звану бы́ти неве́жею простоты́ ра́ди, а не му́дру соверше́ну сла́вы ра́ди. А́ще кто и на коне́ е́здя простре́т ру́ку к тебе́ прия́ти ми́лостыню, не возбрани́ ему́, я́ко и той тре́буя есть прия́ти ми́лостыню я́ко еди́н от убо́гих. Егда́ же дае́ши, даждь все́ю душе́ю и ти́хим лице́м. И бо́ле ели́ка про́сит даждь ему́. Посли́ бо рече́ свой хлеб пред лице́м свои́м, и не по мно́зе вре́мени обря́щеши возда́ние. Не разлучи́ бога́та от убо́га, и не восхощи́ уве́дети досто́йна от недосто́йнаго. Но да бу́дут ти челове́цы вси на благонра́вие. Се́ю бо ве́щию и недосто́йных мо́жеши привести́ на благо́е. Поне́же ско́ро привлачи́тся душа́ от пло́тных в страх Бо́жий. И́бо и Госпо́дь мытаре́м причаща́яся трапе́зы, и не разлуча́ше досто́йных ра́ди, е́же приближа́ются духо́вных. Сего́ ра́ди добро́м и че́стию вся челове́ки уравня́й. А́ще и не ве́рен есть и уби́йца, но брат ти есть по естеству́, и па́че я́ко брат ти есть, и от естества́ твоего́, и кроме́ зна́ния заблуди́л есть от и́стины. И егда́ кому́ сотвори́ши бла́го, не ожида́й воздая́ния от него́. Но в ко́ейждо ве́щи возда́ст ти ся от Бо́га. А́ще же ти есть мо́щно е́же вложи́ти в ду́шу си уста́в нищеты́ благода́ти ра́ди Бо́жия, свободи́шися от печа́ли, и вы́ше ми́ра бу́деши свое́ю нището́ю. Блюди́ у́бо, да не нищелю́бием возлю́биши стяжа́ние, да от того́ сотвори́ши ми́лостыню, и вложи́ши ду́шу свою́ в смяте́ние, е́же восприя́ти от кого́, и да́ти ино́му, погуби́ши мзду свою́. И вино́ю проше́ния от челове́к, отпаде́ши своего́ смы́сла свобоже́ннаго печа́лей жите́йских. Поне́же стопы́ твоя́ вы́ше степе́ней ми́лостивых суть. Молю́тися не повини́ся. Ми́лостыня у́бо подо́бная детокормле́нию, безмо́лвие же коне́ц соверше́нию есть. А́ще и́маши стяжа́ния, сие́ еди́ною расточи́. А́ще ли не и́маши, не восхощи́ име́ти. Очи́сти свою́ ке́лию, и скудота́ веще́й твои́х научи́т тя воздержа́нию. Поне́же егда́ мно́жество веще́й прии́мем и изоби́луем, не мо́жем себе́ воздержа́ти. Се слы́шаще бра́тие попече́мся о свое́м спасе́нии.

А́ще пости́шися, покажи́ ми от дел свои́х. Кото́рых рече́; Ви́дев ни́щаго, поми́луй. Со враго́м смири́ся. Дру́гу благоде́ньствующу, не зави́ди. Жену́ красото́ю сия́ющу ви́дя, премини́ ю́. Не лицеме́рно же пости́ся, но и очи́ма и се́рдцем, и уши́ма и рука́ма и нога́ма и все́ми у́ды. Мнят бо пост бра́шну удале́ние, той бо пост да укаря́ется но воздержи́ ру́це от грабле́ния, но́ги от рыска́ния е́же на позо́ры, о́чи от взо́ра кра́сна, пи́ща бо о́ку виде́ние. Слу́ха стяжи́ не приима́ти осуже́ния и лжи, слы́шания су́етна не прие́мли. Да постя́тся уста́ твоя́ от осуже́ния. Ничто́же бо есть е́же не я́сти мя́са или́ рыб, снеда́ти же пло́ти бра́тня оклевета́нием. Се бо апо́стол Па́вел глаго́лет, а́ще друг дру́га снеда́ете и грыза́ете, блюди́теся са́ми да не друг от дру́га снеде́ни бу́дете. А́ще ли кто кого́ и по вине́ осужа́ет, и то вельми́ зло. Фарисе́й бо он и в пра́вду осуди́ мытаря́, поги́бе. Тебе́ же да сохрани́т Госпо́дь от таковы́х паде́ний. Ему́же сла́ва ны́не и при́сно и во ве́ки веко́в.