Стихи́:

Евти́хия уме́ршаго чту словесы́,

От себе́ того́ благоче́стнейшаго меню́:

Душа́ Евти́хиева ко врато́м небе́сным ведена́ в шесты́й день.́

Сей и́же во святы́х оте́ц наш, и вели́кий архиере́й Евти́хий, бя́ше во времена́ Иустиниа́на царя́ вели́каго. От Фриги́йския страны́ мним. Воспита́н же Иси́хием презви́тером де́ду ему́ су́щу. И боголю́бия ра́ди сподо́блен быв чудеса́ твори́ти. От него́же и креще́ние прии́мшу свято́му Евти́хию в це́ркви Августопо́льстей. Иде́же и боже́ственую слу́жбу дед его Исихи́й творя́ше. И свяще́нным сосу́дом храни́теля того́ поста́ви. Та́же святы́м бесе́дам наказа́. И за е́же во глубину́ ра́зума доше́д, призва́н быв Амаси́йским первопресто́льником. И от того́ вла́сы постри́г, в це́ркви святы́я Богоро́дицы Урвики́йския. Та́же дия́кон и презви́тер поста́влен во Амаси́йстем монастыри́ быв, и́же Мелети́ем и Селевки́ем архиере́ома созда́н: и та́мо и́ноческое восприя́т житие́. Та́же и архимандри́т поста́влен бысть. Пя́тому же собо́ру Иустиния́ном царе́м со́брану, и всем архиере́ом со́браным. Не́коего же ра́ди пригоди́вшася неду́га, Амаси́йскому первопресто́льнику, невозмо́жно бысть поити́ на той собо́р, и по́слан бысть от него́ блаже́нный Евти́хий во исполне́ние ме́ста его́. Бы́вшу же тому́ в Константи́не гра́де, свое́й доброде́тели и ра́зуму иску́с пода́в, е́же к сло́гу ерети́ческому. И во отве́тех све́тел показа́ся, и еретики́ обличи́ и посрами́. И пи́сменым явле́нием извеща́в, я́ко подоба́ет еретики́ до конца́ проклина́ти. И всех к любви́ подви́же, па́че же и царя́ самого́. Блаже́нному же Ми́не патриа́рху проре́кшу о нем, боже́ственым открове́нием: Я́ко тому́ быти моему́ снасто́льнику. И́же и не по мно́зе Ми́не патриа́рху ко Го́споду отше́дшу, призва́в царь от Амаси́и преподо́бнаго, и жре́бием и судо́м архиере́йским, и вся́ким церко́вным исполне́нием, и все́ми гра́жданы, поста́влен бысть архиере́й таково́му вели́кому гра́ду. Пото́м же плевело́м все́ятель, благостоя́ния и уста́ва церко́внаго не моги́й зре́ти, уче́нии ме́рзскими, я́ко не́кими мечта́ньми поколеба́ти це́рковь покуша́яся. И злоху́льники не́кия подви́г, е́же на воображе́ние благоче́стию, я́ко и́же святы́я Деви́цы Христа́ Бо́га, заче́ншаяся плоть Христа́ Бо́га, пре́жде стра́сти нетле́нна бя́ше. И царю́ нечести́вому уче́нию повину́вшуся, изгна́н бысть со стола́ вели́кий Евти́хий, и прогна́н бысть злоче́стие гана́нием облича́ющу. Бы́вшу же ему́ во Амаси́йстем монастыре́, превзы́тием по́стническое житие́ держа́ бя́ше, и мно́га чудесе́м соде́лования соде́лав. Па́ки на свой престо́л возведе́н бысть, два́десять лет во изгна́нии сотво́рь. Иустиния́ну же в безчелове́чии сконча́ну бы́вшу. Посе́м Иусти́ну и Тиве́рию, к ца́рским ски́петром возведе́нома. При сею́ же у́бо святы́й е́же на престо́л свой па́ки возведе́ние, све́тле е́же к кончи́не свое́й получи́в от нею́ пода́ние. И належа́щаго па́губу, и челове́ки напра́сно побива́ющаго и погубля́ющаго, моли́твами потреби́в. И за два́десять и четы́ри ле́та и шесть ме́сяц по изгна́ннем вше́ствии, це́рковь у́пас ко Го́споду отъи́де. Прорече́ же пре́жде изгна́ния своего́ царю́ Тиве́рю о ца́рстве его́. Пото́м же царю́ на посеще́ние свята́го прише́дшу, прорече́ и о кончи́не его́, е́же и сбы́сться. По преставле́нии бо свята́го е́же ко Госпо́ду, то́чию четы́ри ме́сяцы Тиве́рий поживе́, и изы́де из телесе́. Положе́н же быв святы́й Евти́хий во олтаре́, на степе́ни святы́я Трапе́зы, иде́же мо́щи лежа́т святы́х апо́стол: Андре́я, и Тимофе́я и Луки́. Соверша́ет же ся собо́р его́ во святе́й Вели́цей це́ркви.

Стихи́:

А́ще изочте́ши, и́же огнь в Пе́рсех пожже́,

Обрести́ и́маши четы́рещи по три́десяте.

Стихи́:

По небе́сней широте́ Платони́да несо́ма бысть,

Доброде́тельми просия́вши по широте́ земне́й.

Стихи́:

Неора́нная земля́ тебе́ плод прозяба́ет, Сло́ве:

О́ба му́жа да́же и до чресл.

Бы́ше и́нок не́кий оше́лник зело́ разсу́длив. И прии́де пребы́ти в ски́те, и не обрета́ше пребы́ти ке́лии в ма́ло дней. Бе же ту други́й ста́рец име́я ту ке́лию безмо́лвну. И умоли́ его́ ста́рец глаго́ля, прииди́ и пребу́ди во о́ной ке́лии и́мя рек до́ндеже обря́щеши си и́ну ке́лию. Послу́шав же его́ ста́рец, и прии́де. Не́цыи же у́бо нача́шя приходи́ти к нему́ яко к стра́нну, и приноша́ху к нему́, и́же кто что име́яше. Мно́зи же ини́и по́льзы ра́ди прихожда́ху, и той с ра́достию прие́мляше их. Нача́т же ста́рец да́вый ему́ ке́лию ропта́ти, и злосло́вити его́ глаго́ля, коли́ко лет сотвори́х аз зде в посте́ мно́зе, и никто́же прихо́дит ко мне. Сей же прелага́тай ма́ло дней сотвори́, и вси прихо́дят к нему́. И рече́ ученику́ своему́, шед рцы ему́ изы́ди от ке́лии на́шея, я́ко потре́бна нам есть. И прише́д учени́к сотвори́ поклоне́ние ста́рцу рек, глаго́лет оте́ц мой, ка́ко пребыва́еши, до́бре ли еси́. Он же отвеща́, рцы отцу́ своему́, да помо́лит о мне Бо́га, поне́же болю́ ма́ло. И прише́д ю́ный рече́ ста́рцу своему́, реко́х ста́рцу, и отвеща́ ми си́це, обрето́х ке́лию, и иду́ отсю́ду. Па́ки же по не́ких днех глаго́ла ученику́ своему́, шед и рцы ему́, я́ко а́ще не изы́деши ско́ро, аз прише́д, и не хотя́щу ти изжену́ тя жезло́м. И шед брат и глаго́ла ему́, слы́ша оте́ц мой я́ко боли́ши зело́, и посла́ мя посети́ти тя. Отвеща́ ему́ ста́рец, рцы отцу́ своему́, я́ко за моли́тв ти до́бре есмь. И прише́д у́бо и глаго́ла ста́рцу, я́ко до неде́ли рече́ ста́рец изы́ду, Бо́гу хотя́щу. Я́ко у́бо прии́де неде́ля, и не изы́де, взем жезл по́йде би́ти его́, и изгна́ти. Рече́ же ему́ учени́к его́, пожди́ у́бо о́тче, предварю́ ма́ло, еда́ ка́ко бу́дут та́мо не́цыи и соблазня́тся. И предвари́в пове́да ста́рцу, оте́ц мой гряде́т умоли́ти тя, и поя́ти тебе́ в ке́лию на́шю и учреди́ти. И я́ко услы́ша я́ко ста́рец гряде́т, вско́ре изы́де во стре́тение ему́, и издале́ча сотвори́ поклоне́ние глаго́ля, аз прииду́ к тебе́ и не труди́ся о́тче. Ви́дев же Бог де́лание ю́наго, умили́ отца́ его́, и пове́рг жезл и́же ноша́ше, теча́ше на целова́ние ста́рца. И по целова́нии пое́м его́, и введе́ в ке́лию я́ко ничто́же слы́шавша. Глаго́лаже ста́рец ученику́ своему́, ничто́же ли рече́ ему́ от их же реко́х ти. И рече́, ни. Порадо́вавжеся ста́рец, и разуме́ я́ко за́висть вра́жия есть. Тогда́ пад ста́рец пред нога́ма ученика́ своего́ глаго́ля, я́ко оте́ц мой отны́не, аз же тебе́ учени́к. Поне́же ра́ди твоего́ де́лания обою́ душя́ спасе́не бы́сте.

Святы́й Григо́рий па́па ри́мский от свята́го Ева́нгелия о сею́ свято́ю показа́я к бога́тым глаго́лет. Я́ко сия́ свята́я лати́ньскаго ро́да су́ща, но ве́рою к Бо́гу я́ко апо́стола, и уче́нием я́ко отца́, терпе́нием я́ко хра́бра во́ина Христо́ва, и́же за Христа́ кре́пко пострада́ста. И предста́ста мучи́телю не боя́щася испове́дастася христия́на. И мно́го терпе́ста мук. И по сих преда́ста блаже́ннеи свои́ ду́ше в руце́ Госпо́дни, не изволи́ста ми́ра сего́, бога́тьства су́етнаго. Мы же у́бо не велича́емся, а́ще что и добро́ сотвори́м, и ни ка́ко е́же на́ше да возвели́чим, ни бога́тьства мно́га ни сла́вы, но снабди́м ве́ру Христо́ву, я́ко же и свята́я сия́, к нею́ же це́ркви сошли́ся есмы́. Се же бра́тия драга́я смотри́те, и ви́дите любо́вь ве́чныя жи́зни, и се́рдце пригвозди́те. Да егда́ же земны́я че́сти держа́ти не брежете́, прии́дете в сла́ву ю́же держите́ ве́рою. И со Христо́м и Бо́гом на́шим живу́щимь со Отце́м во еди́ньстве свята́го Ду́ха.

Царь ли еси́, или́ князь, или́ воево́да, и судия́, то помы́сли от кого́ еси́ власть прия́л. Или́ кто дал вам есть власть и сан, ум и му́дрость. Да нака́жете лю́ди; Си́це у́бо глаго́лет Госпо́дь, слы́шите кня́зи и судии́ челове́честии, да не опра́вдите винова́таго мзды ра́ди, и не устыди́теся си́лнаго лица́. Изба́вите оби́димаго, да са́ми у́бо бу́дете изба́влени в суд стра́шнаго дне. Вся́кия же вдовы́ и сироты́ не озло́бите, да не разгне́вается Госпо́дь я́ростию на вы. Глаго́лет бо проро́ком Иса́иемь, а́ще не пра́вдою озло́биши сироту́, или вдови́цу, и в горе́сти душя́ их воздыха́юще возопию́т ко Мне, ско́ро услы́шю вопль их. И пущу́ на вы гнев Свой, и погублю́ вы напра́сно. И бу́дут жены́ ва́ши вдовы́, и ча́да ва́ша сироты́, и никто́ их поми́лует. А о име́нии сиро́тне и вдови́че помышля́яй, и хотя́й е́ взя́ти, месть от Бо́га прии́мет; Си́лен бо есть Госпо́дь, мща́ет я́ реки́й. Аз есмь оте́ц сирота́м, и отмьсти́тель вдови́цам, и из руки́ си́лных изба́влю я́. Го́ре оби́дящему вдови́цу. Лу́чьши бы ему́ огнь в дом свой вве́ргши и запали́вши избе́гнути, не́же ли за сих воздыха́ние вве́ржену бы́ти в гео́ну о́гнену. Тем же без испыта́ния не прие́млите клеветы́ на сироты́ и вдови́цы. И не вско́ре ве́ру ими́те ва́дящим, но блюди́теся се́ти дия́воли. Послу́шайте же па́че писа́ния глаго́люща. Сироте́ бу́ди помо́щник, и благословя́т тя уста́ вдови́ча. Бу́ди си́рым я́ко оте́ц. И в му́жа ме́сто вдови́цами попецы́ся. И моле́ния оби́димаго ско́ро послу́шай. Се бо вели́ка есть доброде́тель пред Бо́гом, е́же наделя́ти вдови́цы и сироты́, и ми́ловати и утеша́ти в печа́лех су́щыя. Лу́че у́бо приобрести́ и́мя до́бро со благослове́нием, не́же бога́тьство мно́го со кля́твою. Поста́вил ли тя царь в вели́кий сан, и к тебе́ и́дут ма́лии и вели́цыи, сла́внии и не сла́внии, и да́ры и че́сти принося́ще ти, то бла́го есть, и от Бо́га ти дарова́но; Но блюди́ся со грехо́м взя́ти я́. Се бо не пра́вда есть, егда́ кто мзду даст, хотя́ сопе́рника препре́ти. И бу́деши не пра́ведно осужа́я челове́ка во о́браз Бо́жий сотворе́наго, его́же ра́ди Христо́с кровь Свою́ пролия́. Про́клят рече́ всяк судя́й не пра́ведно, и я́рость Госпо́дня не исце́лна на них до ве́ка. И огнь снесть до́мы взе́млющых мзду. И ча́да их не поживу́т нече́стия ра́ди мзды оте́ц их, ю́же непра́вдою взима́ху. О вла́стели неправди́вии, и мздои́мцы, я́же собра́сте от вдов и сиро́т, то в негаси́мем огне́ под гне́та бу́дет ду́шям ва́шим. Того́ ра́ди попецы́теся душа́ми ва́шими, и ми́лостиви бу́дите к маломо́щным, да Бог ми́лостив бу́дем вам. Ему́же сла́ва ны́не и при́сно и во ве́ки веко́в.