По шестой песни:
И поется кондак и икос (или мученичен, аще несть).Стихи́:
И́мать Митили́н тебе́ и уме́рша я́ко, жи́ва,
Гео́ргия засту́пника вели́ка:
Жизнь по сме́рти Гео́ргие обре́те в седмы́й.
Сей из млады́х ногте́й Христа́ возлюби́в, и́ноческое восприя́т житие́, и вся́кую доброде́тель навы́к. Смиреному́дрие я́коже ин никто́же стяжа́в. Ми́лостив же зело́ быв, и на престо́л Митили́нский возведе́н быв, его́же и добре́ пра́вя. И иконобо́рца изоби́льною му́дростию посрами́в, и свою́ пре́лесть позна́ти его́ сотвори́. И премно́гаго ра́ди воздержа́ния, а́нгелом содруже́бник быв. И от жития́ преста́вися, боже́ственою звездо́ю исхо́ду его́ пове́дану бы́вшу. И не то́чию тому́ еди́ному, но и всей па́стве его́, исто́чники чудесе́м от моще́й свои́х дарова́в. И всем бысть досточу́ден.
В то́йже день страсть свята́го му́ченика Калио́пия
Стихи́:
Калопи́е стремгла́в на дре́ве распя́т,
И́же и пра́во распе́ншагося Сло́ва сла́вит.
Той бе во времена́ Максимия́на царя́, сын не́коего Феокли́а христия́на от Перги́и Памфли́йския. Воспита́н же бысть от ма́тере благочести́вы. И боже́ственым научи́ся писа́нием. Гоне́нию же належа́щу, осо́бь прии́де Иису́сово и́мя испове́дая. И связа́ша ру́це его́ на́опак, и бие́н бысть шелы́гами оловяны́ми. И на колесе́ протя́гше и́, огне́м подпали́ша и́. А́нгеловым же прише́ствием от тех мук изба́влен бысть. И вве́ржен бысть в темни́цу Максимия́ном иге́моном. И посе́м веде́н бысть в день Вели́каго четвертка́, и осуже́н быв, да распя́т бу́дет. Распя́ша же его́ стрем глав, та́ко бо испроси́ ма́ти свята́го. Да не та́ко же распя́т бу́дет я́коже Христо́с Бог наш, пять бо златни́к слуга́м даде́ зато́. И в пято́к в тре́тий час Бо́гови дух предаде́. Сня́ту же ему́ бы́вшу, ма́ти его́ изнемо́гши, испусти́ ду́шю свою́. И положена́ бысть с сы́ном свои́м со святы́м му́чеником во еди́ном гро́бе от христия́н благочести́вых.
В то́йже день святы́й му́ченик Руфи́н диа́кон ноже́м прободе́н сконча́ся
Стихи́:
Закла́ние вмени́ себе́, я́ко и овца́,
Руфи́н закла́в диа́вола, ве́тхаго во́лка
В то́йже день свята́я му́ченица Акили́на Но́вая
Стихи́:
Ру́це нао́пако свя́заны,
И чре́ва ея́ опале́но, сконча́ся.
Напо́паки рука́ма свя́зана у́жем, спреди́ попалена́ бы́вши Акили́на.
В то́йже день святы́х две́сте му́ченик, и́же в Синопи́и мече́м сконча́шася.
Стихи́:
Посече́ мечь му́жий две десяти́ десяти́ц,
И́мже ум му́жеский, му́жеско же и се́рдце.
В то́йже день сло́во от патерика́
Пове́даху нам ученицы́ отца́ Евло́гия: я́ко егда́ посыла́ше нас ста́рец во Александри́ю е́же прода́ти рукоде́лие на́ше, дая́ше нам за́поведи, да не мно́жае трие́х дней сотвори́м. А́ще ли мно́жае трие́х сотвори́те, рече́, не пови́нен есмь греху́ ва́шему. Мы же вопроси́хом его́: «И ка́ко мни́си во граде́х и се́лех с мирски́ми пребыва́юще, не врежда́ются?» Отве́рз же ста́рец нело́жная своя́ уста́, рече́ к нам: «Ве́руйте ми ча́да, я́ко отне́леже бых мних, сотвори́х три́десять осмь лет не изше́дши от ски́та. И по сконча́нии три́десять осма́го ле́та, изыдо́х со отце́м Дании́лом к па́пе Евсе́вию во Александри́ю потре́бы ра́ди не́кия. И вше́дшым нам во град, и ви́дехом мно́ги мни́хи. И зрех не́кия от них, о́ви у́бо от вра́нов зауша́емы: О́ви же наги́ми жена́ми объе́млемы и ко уши́ма ше́пчуще им: Со о́веми же от о́трочищ му́жеска по́лу нагим играющым с ними, и смра́дом челове́ческим ма́жуще их: О́вым же мя́са и вино́ обью́хати принося́ще: Други́я же зрях иму́ща ножи́, и ре́жуща мя́са челове́ческа и даю́ща мни́хом о́нем я́сти. И от сего́ уве́дех, я́ко ки́йждо мних ко́ею стра́стию бори́мь есть, сицевы́ бе́сове во уме́ и ра́ти прилага́ют ему́. Сего́ ра́ди бра́тие, не хощу́ вас косне́ти во гра́де, я́ко да не от таковы́х по́мысл па́че же бесо́в бори́ми бу́дете».
В то́йже день поуче́ние к царе́м и к князе́м, к епи́скопом, и попо́м, и ко всем христия́ном, е́же не упива́тися.
Благослове́ние отца́ духо́внаго о Го́споде к де́тем. О ча́да, ве́дите и́же ми дал есть Бог тала́нт, его́же хо́щет от мене́ и истяза́ти на Cтра́шнем суди́щи. Что же есть тала́нт; Е́же есть пещи́ся ва́шими душя́ми, и се́яти в ва́ша душя́ се́мя Боже́ственое. Егда́ бо хо́дите в зако́не Госпо́дни, тогда́ ми ра́дуется се́рдце. А егда́ ви́жу вы преступа́ющя за́поведь Госпо́дню, тогда́ печа́ль снеда́ет мя. Того́ ра́ди и написа́х си ча́да моя́ в показа́ние вам к ва́шему послуша́нию, да не злым пия́ньством побежда́ется. Рече́ бо вели́кий апо́стол Па́вел, я́ко пия́ницы не насле́дят Ца́рства Небе́снаго, но угото́вана им му́ка ве́чная с разбо́йники и с татьми́ и с прелюбоде́и. В пе́рвых ро́дех проявле́но от Бо́га, я́ко ве́лицыи му́жие и уго́дницы Бо́жии пия́ньством погибо́ша. Цари́ от ца́рьства изри́нушася. Святи́тели святи́тельство погуби́ша; Си́льнии си́лу свою́ испроверго́ша. Хра́брии мечу́ преда́шася, а бога́тии обнища́ша. Многоле́тнии жи́вше, ско́ро изомро́ша. Без Бо́жия бо суда́ вско́ре пия́ницы умира́ют, я́ко и уда́вленицы. А́ще кто в пия́ньстве у́мрет, то сам себе́ враг и уби́йца, и приноше́ние по нем не́нависть Бо́гу. Сы́не, в ны́нешнем ро́де не возревну́й злым челове́ком ни князе́м живу́щим в грехолю́бии и в скве́рности, вся бо сия́ ме́рзостна Бо́гу. Но внима́ти нам ле́по, что нам содева́ет беззако́нное пия́ньство. Ум у́бо погубля́ет, ору́дие же по́ртит, прибы́тки теря́ет, пия́ньство князе́м по усту́ зе́млю сотворя́ет, и люде́й рабо́ты дово́дит. А просты́м лю́дем долги́ содева́ет. Хи́трым мастеро́м питие́, хи́трость по́ртит, ка́зит ему́ ум, не до́йдет смы́слити де́ла своего́. А просты́м лю́дем сотворя́ет, боле́зни и срамоту́ и бесче́стие, и убо́жество зло наво́дит. Бра́тию сва́живает зло́е питие́ в сва́ры и тя́жбы, жены́ от муже́й свои́х отлуча́ет, дете́й рабо́ты дово́дит. Нога́м боле́зни твори́т, рука́м дрожа́ние, зрак от о́чию погубля́ет. Пия́ньство в Це́рковь ити́ возбраня́ет, и не пу́стит моли́тися Бо́гу. Книг че́сти не даст, страх Бо́жий от се́рдца отго́нит. Сме́рти предае́т, во огнь ве́чный посыла́ет. Пия́ньство красоту́ погубля́ет, смех тре́звым сотворя́ет. Кому́ молва́; Пия́ницы. Кому́ смех; Пия́ницы. Кому́ си́ни о́чи; Пия́ницы. Кому́ ра́но я́сти; Пия́ницы. Кому́ за у́треня проспа́ти; Пия́ницы. Всяк бо пия́ница отлучи́тся от Бо́га и от люде́й, и облече́тся в раздра́нная ру́бищя. Да се ве́дуще бра́тие, оста́немся пия́ньства зла́го и запо́йства. Еще́ же слы́шите Госпо́дня апо́стола Па́вла самого́ сосу́да избра́ннаго глаго́люща к Тимофе́ю, ма́ло вкуша́й пития́, да бу́дет ти души́ спасе́ние. Бра́тие бу́дите тре́зви, я́ко у́бо супоста́т наш дия́вол трезв есть, а непия́н, и́же и́щет всех поглоти́ти пия́ных; О го́ре, ка́ко утаи́тися пия́ным, а лежа́щим а́ки ме́ртвым, и от Бо́га отбе́гшим пия́ньства ра́ди, и от свята́го Ду́ха удали́вшимся смра́да ра́ди пия́ньственаго, сло́ва Бо́жия не иму́ще во усте́х свои́х гни́лости ра́ди пия́ньственыя. А́нгелу Храни́телю пла́чущу пия́ньства ра́ди, бесо́м же веселя́щимся и ра́дующимся о пия́ницах, и прино́сят к дия́волу же́ртву пия́ньственую. И дия́вол ра́дуяся глаго́лет, я́ко николи́же та́ко веселю́ся и ра́дуюся о же́ртве пога́ных челове́к, я́ко же у́бо о пия́ных христия́нех. В пия́ницах бо вся во́ля моя́. Лу́чше пога́ний пия́ницы. Я́ко и пога́ных Бог снабди́т, а пия́ниц ненави́дит и гнуша́ется. Я́ко пия́нии мои́ суть, а тре́звии Бо́жии. И сия́ изглаго́лав дия́вол, рече́ бесо́м, иди́те и поуча́йте христия́н на пия́ньство, и на всю во́лю моего́ хоте́ния. Святи́и же а́нгели приходя́ще к святы́м отце́м, сия́ вся пове́даху с вели́кою печа́лию о всем том, да бы́ отлучи́ли христия́н от зла́го пия́ньства и запо́йства, а не от пития́ и́же в сла́ву Бо́жию, и в подо́бно вре́мя и в зако́н. Святи́и же отцы́ написа́вше сие́ честно́е и свято́е писа́ние, и правове́рное уче́ние, преда́ша святы́м це́рквам на слы́шание христия́ном, на угожде́ние жи́зни ве́чныя, и прича́стие Ца́рства Небе́снаго. Да а́ще кто послу́шает пра́вила сего́ святы́х и богоно́сных оте́ц. И поживе́т в тре́зве уме́, де́ла творя́ уго́дная Бо́гу, жи́тель бу́дет ве́чныя жи́зни и наслажде́ния неизрече́ных благ. А и́же не послу́шает сего́ пра́ваго уче́ния, то осуже́н бу́дет со дия́волом в ве́чную му́ку. От нея́ же да изба́вит ны Христо́с Бог наш. Ему́ же сла́ва, ны́не и при́сно и во ве́ки веко́в.