Стихи́:

Изба́вися от жития́ Ники́та, я́ко и пти́ца от се́тий,

Кри́лы у́мными взы́де к небе́сным:

В тре́тий Ники́та призва́н бысть ко оби́телем Бо́жиим.

Сей приснопа́мятный оте́ц наш Ники́та, из младе́нства возлюби́в воздержа́ние и де́вство, и водвори́ся в го́ры вся́ких доброде́телей: и воспита́вся во гра́де безмо́лвия: и возвы́сися обоя́мо. Словесы́ же Бо́жиими окормля́емь, боже́ственый разсмотри́тель показа́ся и ве́рный святи́тель. Изгна́н же быв от па́ствы от иконобо́рец, я́ко боже́ственым ико́нам покло́нник. Изгна́ниям бо лю́тым подлага́ется, и вся́ким благода́рствен я́влься, и иску́сен подви́жник. И вседушегуби́телную пре́лесть богобо́рных заплева́. И мно́гих бесе́дами свои́ми, и утеше́ньми свиде́тели соде́лав. Тем и сугу́бныя свещи́ вжег испове́дания и поще́ния, сугу́бы и венцы́ от руки́ Госпо́дни восприя́т, к Нему́же и пре́йде.

Си́и святи́и бя́ху от гра́да селу́ньскаго, при Максимия́не царе́. Гоне́ния же ра́ди оста́виша вся, и взыдо́ша на́ гору высоку́, и пребыва́ху в посте́ моля́щеся Бо́гу. Оклевета́ни же бы́ша и я́ти, предста́ша кня́зю Диоклития́ну, и мно́го му́чи я́ и ну́ди их пожре́ти и́долом, и не увеща́в. И того́ ра́ди Ага́фия, Ихиони́я огне́м сожже́не бы́сте. Святу́ю же Ири́ну обрето́ша иму́щу святы́я кни́ги в ня́же уча́шеся, и осуди́ и ту вести́ в блуди́лище. И та́мо соблюдена́ бысть Бо́жиею благода́тию не осквернена́. И не восхоте́ отврещи́ся Христа́, и сего́ ра́ди и та огню́ предана́ бысть. И та́ко сконча́шася святи́и за Христа́.

Стихи́:

Мече́м и́стинным, Еплидифо́ре му́чениче,

Бо́гу прине́сл еси́ нело́жное благове́рие.

Стихи́:

Уда́рив злочести́вый скуде́лом во главу́ Диоми́да,

«Да сотре́т того́, я́ко сосу́д скуде́льничь».

Стихи́:

Вифо́ние, во глубину́ вве́ржен,

Зва́ние обре́те в соверше́ние проро́ческое.

Стихи́:

От Мирсио́на Ила́рие на воздух,

Не я́ко Христо́с иды́й [с Елео́на].

Пове́даше оте́ц наш Дании́л глаго́ля, я́ко рече́ ста́рец наш Арсе́ний о еди́ном ски́тянине бя́ше де́лом вели́к и сла́вен в ве́ре, и блазня́шеся за гру́бость. Глаго́лаше бо, я́ко несть во и́стину хлеб его́же мы прие́млем Те́ло Христо́во, но о́браз в него́ ме́сто. И слы́шаста два ста́рца, я́ко глаго́ла сло́во сие́, ве́дуща же и вели́ка житие́м су́ща, помы́слиста, и глаго́люща, я́ко кро́тостию и просты́нею се глаго́лет а не зло́бою. И прише́дше глаго́ласта ему́, о́тче слы́шахом о еди́ном бра́те не ве́рно, я́ко хлеб его́же прие́млем, несть Те́ло Христо́во, но о́браз в не́го ме́сто. Рече́ же ста́рец, аз есмь глаго́лавый се. О́на же моля́ста и, глаго́люща, не держи́ та́ко о́тче, но я́коже предаде́ нам свята́я соборна́я Це́ркви. Мы бо ве́руем, я́ко хлеб есть Те́ло Христо́во и Ча́ша, не во о́браза ме́сто, но я́коже в нача́тце, персть взем Бог от земли́, и созда́ челове́ка по о́бразу Своему́, и никто́же мо́жет рещи́ я́ко не бе о́браз Бо́жий. А́ще и не пости́жен есть о́браз сей его́же рече́ я́ко Те́ло есть, но ве́руем я́ко во и́стинну Те́ло есть Христо́во. Рече́ же ста́рец, а́ще не извещу́ ве́щи, не изве́сто ми бу́дет. О́на же ре́ста, да помо́лимася о́тче к Бо́гу всю неде́лю о Та́йне сей. Ше́дша же помоли́стася Бо́гу, всю неде́лю о Та́йне сей. И ве́руем я́ко Бог яви́ти нам се и́мать. То́йже ста́рец прие́м сло́во се, с ра́достию моля́шеся Бо́гу, глаго́ля, Го́споди Ты ве́си я́ко не по зло́бе не ве́рую, но я́ко в неве́рьствии, да не заблужу́ся, яви́ ми Го́споди Иису́се Христе́. Ше́дша же ста́рца в хи́жу свою́, моля́стася Бо́га и глаго́ласта, Го́споди Иису́се Христе́, яви́ ста́рцу Та́йну сию́, я́ко да не неве́рует и не погуби́т труда́ своего́. И послу́шав ею́ Бог обою́. И сконча́вшися неде́ли, приидо́ша в це́рковь, и седо́ша три еди́ны на рогози́ницы еди́ной. Отверзо́стажеся им о́чи. Егда́ бо положе́н бысть хлеб на святе́й Трапе́зе, яви́ся им трем еди́нем я́ко отроча́ мла́до. И я́ко просте́р поп ру́ку преломи́ти хлеб на святе́й Трапе́зе, и се а́нгел Госпо́день сни́де с небесе́ держа́ нож в руце́, и закла́ Отроча́, и излия́ кровь Его́ в ча́шу. И егда́ преломля́ше поп хлеб, а́нгел Госпо́день ре́заше на ма́лыя чя́сти. И я́ко приидо́ша взя́ти святы́х Та́ин, и дано́ бысть о́ному ста́рцу сы́ро мя́со и крова́во. И ви́де и убоя́ся, и возопи́ глаго́ля, ве́рую Го́споди, я́ко хлеб Те́ло Твое́ есть. И а́бие бысть мя́со на руце́ его́ хле́бом. По Та́йне, и взят обще́ние хваля́ Бо́га. И реко́ста ему́ ста́рца, Бог весть челове́ческий род, я́ко не мо́жет сы́ра мя́са я́сти, ни кро́ви пи́ти. И сего́ ра́ди преложи́ Те́ло Свое́ в хлеб, а Кровь Свою́ в вино́, ве́рою прие́млющим. И возда́ша хвалу́ Бо́гови о ста́рце, я́ко не оста́ви Бог де́ла ста́рцева. И изыдо́ша ко́ждо вси с ра́достию в свою́ хи́жу.

Ка́ко у́бо бра́тие убежи́м мук зла́я творя́ще. Или́ ка́ко глаго́лете я́ко мило́стив есть Бог, и не му́чит гре́шных христия́ньскаго ро́да. Рцы ми бра́те, а́ще кра́деши, или́ оби́диши, или́ гра́биши, и блуд твори́ши, гне́ваешижеся, и зави́диши, и клевету́еши, и лже́ши, и упива́ешися, и ина́я твори́ши зла́я, и о том покая́ния не прие́млеши, ка́ко глаго́леши не бы́ти му́чиму ти; А́ще сия́ твори́ши, пове́ждь ми, по что святи́и труди́лися в миру́ сем; О́ви бо му́чими и убива́еми бя́ху, и разли́чно томи́ми. А ини́и поще́нием и бде́нием, и жесто́ким житие́м удручи́ша телеса́ своя́. Ини́и же в пусты́нях и в гора́х, беда́ми и ча́стыми напа́стьми, и слеза́ми мно́гими. И си́и вси Ца́рствия ра́ди небе́снаго труди́шася. А́ще рече́ши зли́и не му́чатся, то и до́брии Ца́рства не прии́мут. О бра́тие, не льсти́теся дия́вола слу́шающе, того́ бо се прельще́ние. Слы́шах бо не́кия грехолю́бцы глаго́люща, я́ко на страх то́чию му́кою прети́т Бог, и такови́и с еретики́ осужде́ни бу́дут. Рцы́те ми и́же ле́стьцем Бо́га творите́, Ада́ма пра́отца кто повеле́ из рая́ изгна́ти; И при Но́и кто вселе́нную всю потопи́; Кто ли на Содо́ма и Гомо́ра ка́мение о́но горя́щее и пла́мень посла́; Кто еги́птяны в мо́ри погрузи́; Кто шестьдеся́т тем в пусты́ни прекорми́; Кто сонм авиро́нь пожже́; Кто при Корре́и и Дафа́не земли́ зи́нути повеле́, и жи́вы пожре́ти я сотвори́ две тме и три ты́сящи; Кто се́дмьдесят ты́сящ отъя́т при ца́рстве дави́дове; Кто во еди́ну нощь при Сау́ле умори́ осмь на́десять тем, и пять ты́сящ. И ны́не у́бо беды́ прие́млем грех ради на́шых, овогда́ ра́тию, иногда́ пожа́ром. Овогда́ гла́дом, и на скот уме́ртвие посыла́ет Бог нас казня́, и на рабы́ и на рабы́ни. Овогда́ же боле́зни тя́жки на ны быва́ют, и чад на́ших уме́ртвие. И за на́шя грехи́ все нам беду́ твори́т. Огнь пожига́ет, вода́ потопля́ет, гром заража́ет, мо́лния опаля́ет. И сме́рти у́бо разли́чны быва́ют нам за непра́вды на́шя. Скот бо в на́шых рука́х вско́рмлен есть, и той ны разтерза́ет, и сме́рти предае́т. И хлеб в ядь да́нный нам, и той умаря́ет в го́рле став. А ини́и от пия́ньства зде му́чит Бог, а́ще злоб ся не оста́нут, и не ка́ются и́стиною, та́мо ве́чному муче́нию преда́ст я́. А́ще не бы Христо́с прети́л му́кою, то име́ли бы глаго́лати не бы́ти му́це гре́шным. Ве́руйте бра́тие и́стинно, я́ко есть гре́шным му́ка. Вопроси́ и жидо́в и еретико́в, еще́ же и саме́х бесо́в. И вси отвеща́ют ти единогла́сно, я́ко есть суд и му́ка, и отда́ние по дело́м кому́ждо. Я́ко Бог согреша́ющыя му́чит, а с пра́вдою пожи́вшыя венча́ет. То уве́ри у́же ду́шю свою́ и научи́ ю́, не мясти́ся без ума́. Ада́м бо согреши́л пра́отец наш, и не бе ви́дел ни слы́шал му́чима кого́ греха́ ра́ди. А мы же вся изве́стно слы́шаще, почто́ не и́мем ве́ры. Слы́шасте бо Ка́ина убие́ния ра́ди му́чима, и за́висти и зло́бы ра́ди. И пото́пом поги́бший род челове́чь любоде́йства ра́ди. И бо́льши того́ казнь содо́млян изгоре́ние. Того́ же ра́ди любодея́ния и ины́я мно́ги, Ной бо от пото́па изба́влен бысть, а Лот от огня́. Ви́десте ли ка́ко правди́в есть Бог, я́ко не погубля́ет пра́ведника с нечести́выми. А и в земны́х вла́стелех ви́дите, ка́ко ка́знят, а́ще кто зло сотвори́т. О бра́тие ве́руйте и́стинно, я́ко есть гре́шным му́ка. Четы́ре ты́сящи лет мину́шя содо́млян изгоре́ние, а и до сего́ дне ку́рится на страх гре́шным. Бо́гу на́шему сла́ва, ны́не и при́сно и во ве́ки веко́в.