Понедельник 1-й седмицы Великого поста

Аз Ефре́м гре́шный и неразу́мный, присносла́бый и уны́лый на подвиза́ние духо́вное, глаго́лю вам: Подвиза́йтеся, христолю́бная бра́тие. И́мже побежде́н быва́х по вся часы́, сла́боством своего́ по́мысла, хощу́ вам сказа́ти, возлю́бленнии, страх вели́к и тре́пет души́ моея́, е́же ми бысть в день еди́н мне нечести́вому, несмире́нному и неприле́жному.

Седя́х еди́н на ме́сте безмо́лвне, и ти́се, и высо́це, и помышля́х в себе́ о житии́ су́етныя печа́ли: молву́, смуще́ние, сле́зы. И поуча́хся в себе́, ка́ко житие́ се я́ко сень прехо́дит, и я́ко конь скор мимотече́т, и я́ко цвет у́трений увяда́ет. И глаго́лах, печа́луя и рыда́я: Ка́ко тече́т век сей, не свем, и́мже есмы́ привя́зани сла́бостию ве́щьми. И помы́слы неподо́бными си вся в себе́ помышля́ющу ми, внеза́пу воздви́г о́чи на не́бо, и бых а́бие а́ки во у́жасе и нападе́ на мя [страх] вели́к, и ви́дех очи́ма се́рдца моего́ Бо́га со сла́вою седя́ща и глаго́люща к души́ мое́й та́ко:

Почто́, душе́, презре́ла еси́ сла́ву Мою́? Почто́, душе́, Мене́, небе́снаго испо́лнь све́та и живота́, возненави́дела еси́, Жениха́ безсме́ртнаго и чи́стаго? Почто́, душе́, возненави́дела еси́ блага́я, я́же Аз угото́вах ти? Почто́, душе́, бысть Ми чужда́, по́мыслы и делесы́ неподо́бными? Почто́, душе́, не потщи́шися обрести́ся ра́дующися, в прише́ствие Мое́? Почто́, душе́, не и́маши свещи́, в вопль хотя́щий бы́ти: «Се прии́де Жени́х, изыди́те в сре́тение Ему́ с ра́достию»? Почто́, душе́, не восхоте́ угото́вати одея́ния досто́йна на бра́ки? Почто́, душе́, не вни́деши в черто́г небе́сный святы́й? Почто, душе, возненави́дела Мя еси́ блага́го, Изба́вльшаго живо́т твой от сме́рти? Аз, душе́, сме́рти вкуси́х тебе́ ра́ди, да неве́сту тя нареку́ Себе́. Аз, душе́, и Ца́рство небе́сное незави́димое дах ти. Аз, душе́, Себе́ неве́сту соде́лах тя я́ко Царь. Аз, душе́, тебе́ ра́ди Челове́к бых, хотя́ изба́вити тя от тли. Аз, душе́, па́че всех дел Мои́х почто́х живо́т твой и вознесо́х тя. Аз черто́г небе́сный угото́вах ти, и а́нгелы служи́ти пред тобо́ю в черто́зе Си Аз угото́вах на воше́ствие твое́ с ра́достию. Ты же, душе́, возненави́дела еси́ Жениха́, соше́дшаго во ад тебе́ ра́ди, возненави́дела еси́ Жениха́ небе́снаго и блага́я Его́ неизрече́нная. И кто у́бо любя́й па́че Мене́, даю́щему живо́т всем милосе́рдием? Или́ кто есть у́бо ми́лостив па́че Мене́, спаса́ющему всю тварь щедро́тами? Кото́рый оте́ц лю́бит сы́на пач́е Мене́? Кото́рый оте́ц дае́т живо́т, я́коже Аз? Я́ко оста́вила Мя еси́, душе́, тща и возлюби́ла еси́ ту́ждая и ме́рзская.

И убоя́хся, бра́тие, боя́знию вели́кою, поразуме́в очи́ма Госпо́дни глаго́лы стра́шныя, и душе́вною не́мощию вельми́ убоя́хся и ужасо́хся, и исчезо́х от стра́ха и от сту́да вели́каго. И помышля́я студ поноше́ния, и глаго́лах: «Прииди́те, го́ры, и покры́йте мя окая́ннаго, и гре́шнаго, и нечести́ваго». И вознесо́х глас мой, и пла́кахся, и прекло́нь главу́ до́лу, стыдя́хся. И пла́кався, сам себе́ рех та́ко:

Почто́ аз из чре́ва ма́тере моея́ роди́хся, да разгне́ваю Го́спода Свята́го, и Блага́го, и Милосе́рдаго? Изве́ржен бых из чре́ва зача́тием, и вне воспита́ние теле́сное сотвори́х, и отве́ржен бых небе́сныя благода́ти.

Оба́че пла́чася припадо́х и моли́хся с рыда́нием и не́мощию се́рдца, и возопи́х с пла́чем, глаго́ля та́ко:

Услы́ши, Влады́ко, плачь мой и прии́ми глаго́лы моле́бныя, я́же прино́сит гре́шный, стыдя́ся. Долготерпя́й, Милостивый и Щедрый, не сотвори́ по всем дело́м мои́м, ни помяни́ прогне́вания моего́, е́же, нече́ствовав, прогне́вах ру́ку Твою́. Но а́бие да́руй ми вре́мя ма́ло, да обря́щу покая́ние, Влады́ко. Стерпе́ла есть благода́ть Твоя́ мно́жицею ю́ности мое́й, мно́гая беззако́ния моя́, и на ста́рость да стерпи́т ны́не милосе́рдие Твое́ отмета́ние, прогне́вание, безоте́чествие. Аз сам све́де, Долготерпели́ве, кля́тву Твою́, е́юже кля глаго́ля: «Жив Аз, я́ко не хощу́ сме́рти гре́шником и нечести́вым, но па́че спасти́ся им от вся́цех грех, я́же соде́лал есть». О́, Пречи́сте, кля́лся еси́ щедро́тами, не хотя́й сме́рти гре́шнику. Уще́дри гре́шника, молю́ Тя, Влады́ко, кля́лся еси́ щедро́тами, поми́луй, очи́сти, уще́дри, прости́, не помяни́ безоте́чествия кля́твы моея́. Све́дый сердца́ челове́ча, Сам ве́си, от кото́рыя боле́зни души дерзну́х пред Тобо́ю си рещи́. Виждь, Христе́, исто́чники слез и сокруше́ние се́рдца и рыда́ния. Да не прии́дет ны́не повелен́ие Твое стра́шное и во́змет мя, не гото́ва су́ща и стыдя́щася, но па́че да благода́ть Твоя́ да́рует ми вре́мя ма́ло ка́ятися со тща́нием, не мо́жет бо благода́ть Твоя́, Многоми́лостиве, презре́ти гре́шника пла́чущася, вся́кой души́, приходя́щи в покая́ние от вся́каго беззако́ния е́же соде́я. Услы́ши, Благи́й, Святы́й, глас и вопль рыда́ния се́рдца моего́. И се ны́не долготерпи́, я́ко Благ, да сотворю́ плод добр покая́нием, по́мня всегда́, я́ко влече́т мя на жизнь, да спасе́н бу́ду.

Егда́ же помяну́ день той и час, во́ньже бе был страх той внеза́пу, бою́ся и пла́чуся с воздыха́нием. И пома́ле па́ки забу́ду вся вку́пе: моле́ние, и сле́зы, и страх, и вре́мя, да́нное ми щедро́тами. Что ра́ди у́бо прихо́дят ми си: тя́гость и небреже́ние? И забу́ду, и бу́ду внеза́пу безде́лен, и безстра́шен, и несмире́н, и гневли́в, не име́я пред очи́ма стра́ха, ни суда́ хотя́щаго бы́ти. Еда́ непра́веден Госпо́дь да не бу́дет, а́ще хо́щет отда́ти ми по дело́м мои́м?

Вся вы молю́, боголю́бцы, моли́теся за мя ко Го́споду Бо́гу моему́. Сего́ ра́ди пове́дах бы́вшая ми, я́ко да возмогу́ получи́ти ми́лость Бо́жию. Вем, а́ще хо́щет, мо́жет помощи́ гре́шнику моли́твами. Ве́дех аз мно́жицею, моли́тва мо́щна, изба́ви апо́столы от темни́цы и уз. Апо́стольская бо моли́тва мно́ги очи́сти, и боле́зни изцели́, и бесы изгна́. То кольми́ па́че гре́шника нечести́ва мо́жет изба́вити от сме́рти? Сни́детеся, боя́щиися Го́спода, и проле́йте моли́твы ва́ша за мя: да бу́ду моли́твами ва́шими внутрь, и да возсия́ет благода́ть Христо́ва в души́ моей́, и да просвети́т омраче́нную мысль, и бу́ду я́ко приле́жен и досто́ин покая́ния, моли́твам ва́шим помога́ющым ми. И́бо моя́ вся го́рькая осладя́тся, благода́тию бы́вшею о нечести́вем.

Благода́ти бо прише́ствие та́ко есть: сла́дость, ти́хость, покая́ние, и́мже возмо́жет се́рдце сла́достию, и ти́хостию, и ра́достию просвеще́ния. И забу́ду внеза́пу душе́ю землена́я и стра́сти плотски́я и скве́рныя. И благода́ть всели́т по́мысл в души́, рая́ ца́рского испо́лнь су́ща, сады́ добропло́дны иму́ща, и вкус его́ разли́чнии во́ни сла́дкия име́я, красны́ очи́ма, и усто́м, и но́здрем. Та́цы суть во́лны благода́тныя: просвеща́ют, и сладя́т, и веселя́т. Блаже́на душа́, име́ющи в себе́ во́лны благода́тныя: просвеща́ется, слади́тся, весели́тся виде́нием благоуха́нным. Па́ки реку́, блаже́на душа́, име́ющи сия́ вся дарова́ния. Ничто́же ви́дит, ни бреже́т на земли́, но есть пленни́ца к Бо́гу. Не бо оста́вит ея́ свет сла́достный, ника́мо же зре́ти рая́ плод благоле́пен есть, души́ просвеще́нне благода́тию.

Се па́ки облачуся в безсту́дие, и припа́даю к двере́м Влады́ки моего́, мил ся де́ю, припа́даю, моля́ся, глаго́ля: При́сно отпусти́, Терпели́ве. У́нее бо есть рабу́ не отступи́ти Влады́ки, егда́ же согреши́т, но па́че пребыва́ет у Него́ и мо́лится со всем смире́нием се́рдца. Та́ко навы́кли суть челове́цы, отпуща́ти челове́ком согреше́ния. То кольми́ па́че Бог, Соде́тель всех, Многоми́лостив, и Долготерпели́в, и Щедр, Человецолю́бец, и Милосе́рд, и Благ, отпу́стиши беззако́ния и вся согреше́ния к Тебе́ прибега́ющым, и́бо Сам еси́ Сокро́вище ми́лостынь Твои́х, моему́ ма́лому житию́ изве́т да́рствовати и обогати́ти и́щущым покая́ния со всем смире́нием се́рдца. Те́мже, Влады́ко Святы́й, мо́лим Ти ся безчи́сленому Твоему́ человеколю́бию, вси челове́цы, пода́й же нам покая́нию вре́мя и отпуще́ние грехо́в, я́ко да порабо́таем Ти вся дни живота́ на́шего чи́стым се́рдцем, да сподо́бимся, угоди́вше Тебе́ де́лы благи́ми, доити́ в ве́чный поко́й, иде́же угото́вал еси́ святы́м, по вся ро́ды уго́ждьшым Ти, моли́твами Влады́чицы на́шея Богоро́дицы и при́сно Девы Мари́и, и всех святы́х Твои́х, я́ко да подоба́ет Ти вся́ка сла́ва, честь и поклоне́ние, Отцу́ и Сы́ну и Свято́му Ду́ху. Ами́нь.

Сла́ва Тебе́, Бо́же, сла́ва Тебе́, и па́ки реку́: Сла́ва Тебе́, Бо́же наш, Хва́лимый и Превозноси́мый во ве́ки. Хвали́ти до́лжни есмы́, возлю́бленнии, Бо́га вы́ну, Сподо́бившаго нас Христо́вым ярмо́м, изба́вльшихся вре́меннаго и тли́маго жития́. Хощу́ же послужи́ти словеси́, и́мже благода́ть просвети́ мой по́мысл. Глаго́лати же хощу́ не му́дрыми словесы́, аз бо челове́к есмь груб и гре́шен, земля́ и пе́пел и ху́ждьший всех. Но оба́че не му́дростию глаго́лем, не всем бо есть удо́бно, па́че же не иму́щым ми́ра сего́ филосо́фии. Те́мже подоба́ет наро́чито сло́во дая́ти, я́ко да мо́гут чту́щии разумева́ти по блаже́нному апо́столу: «А́ще не рече́не све́де гла́су си́лы, бу́дут глаго́лющему ва́рвар, и глаго́ляй ко мне а́ки ва́рвар». Мо́жет же духо́вно сло́во до́бре живу́щых ве́рою без грамотики́и и риторики́и препре́ти.

Благослове́н Бог, подава́яй всем и просвеща́яй кого́ждо на поле́зное, я́коже па́че моея́ ме́ры и вы́ше есть и недоуме́ю. Но пи́шет: «Вре́мя молча́ти и вре́мя глаго́лати». Кий у́бо отве́т принесе́м в день Су́дный, не помо́гше ели́ко мо́щно бе́яше му́чимым от искуше́ний? Па́че же во вре́мя се, та́кожде же и стра́ждушым злым уче́нием и беззако́нным сове́том, не бо кровопи́йца лев, и́стинне враг не престае́т прельща́я, не блюду́щихся зело́, не пло́ти челове́чески сне́сти хотя́, но душа́ в гее́нну воврещи́ хотя́. Коли́ко све́сте возлю́бленнии по оше́ствии земны́х ве́щей, па́ки безче́стными страстьми́ попра́н? Коли́ко по обеща́нии бра́тству отсту́пник соде́ла и того́ о́браза стра́нны сотвори́. Те́мже подоба́ет не укланят́ися, но да брат бра́ту помага́ет и тщи сотвори́т диа́воля се́ти. Мы же по апо́столу реко́хом, «не я́ко дово́льни есмы́ о себе́ помы́слити что я́ко от себе́, но дово́льство Бо́жие» , я́коже удовли́ рабо́тати Ему́ недосто́йным су́щым. Вам же даст Госпо́дь, прии́мшим сло́во я́ко блазе́й земли́, соверше́н и многоплодови́т возда́ти пра́ведный плод Христу́ Спа́су на́шему, я́ко Тому́ сла́ва во ве́ки веко́в. Ами́нь.

Кни́га глаго́лемая Лавса́ик, в не́йже напи́сана жития́ преподо́бных оте́ц пустынножи́телей.

Сказа́ние душеполе́зно и по́вести всем подвиза́ющимся и труды́ полага́ющим, где кото́рый поживе́, и ки́им о́бразом спасе́ние получи́. Спи́сано не́кими богодухнове́ными отцы́, где кто слы́ша или́ ви́де.

По́весть отца́ Дании́ла, о Евло́гии каменосе́чце

Пове́да нам не́кий от оте́ц глаго́ля: Ше́дшу рече́ не́когда отцу́ Дании́лу презви́теру ски́тскому в Вифаи́ду, име́я с собо́ю еди́наго от учени́к свои́х. И снидо́ша плову́ще по реце́, и приплы́вшим им к н́екоей ве́си. Повеле́ старец кораблеником приста́ти ко кра́ю. И [рече́] ста́рец ко ученику́ своему́: «Зде хо́щем пребы́ти днесь ». И нача́т учени́к его́ ропта́ти, глаго́ля: «Доко́ле скита́емся зде? И́дем про́чее во скит». Ста́рец же рече́: «Ни, но зде пребу́дем днесь». И седо́ста посреди́ села́ я́ко стра́нницы. И глаго́ла ста́рцу учени́к: «У́бо го́де ли есть Бо́гу се, да я́коже мирсти́и седи́м зде?». И глаго́ла ста́рцу: «И́дем поне́ в це́рковь». И глаго́ла ста́рец: «Ни, но зде пребу́дем». И ту пребы́ша седя́ще до ве́чера глубо́ка. И нача́ ста́рец сва́ры твори́ти со учи́телем, досажда́я ему́, и глаго́ля: «Увы́ мне от тебе́, ста́рче, поне́же тебе́ ра́ди хощу́ умре́ти».

Сим же глаго́лемым, прии́де не́кий ста́рец миряни́н, зело́ престаре́в и весь сед и зело́ погорбле́н. И ви́дев отца́ Дании́ла, паде́ на ногу́ его́, и облобыза́ и́ со слеза́ми. Целова́ же и ученика́ ста́рча. Пото́м же глаго́ла им: «А́ще хо́щете, иди́те в дом мой». Ноша́ше же и свети́льник ходя́ по у́лицам ища́ стра́нных. Пое́м же ста́рца и ученика́ его́, и други́я ели́ки обре́те стра́нныя, введе́ их в дом свой. И влия́ во́ду во умыва́льницу, и умы́ но́зе ста́рцу, и про́чим бра́тиям. Не имя́ше же никого́же ино́го в дому́ свое́м, то́кмо еди́ного Бо́га.

И предложи́ им трапе́зу. И повнегда́ вечеря́ти им, взем оста́вшая избы́тки, а пове́рже я́ псом села́ того́. Си́цев име́яше обы́чай, и не оставля́ше до зау́тра ни еди́ну крупи́цу от вече́рних хлеб. И пое́м его́ осо́бь ста́рец бесе́доваста да́же до зау́тра о по́льзе душе́вней со слеза́ми. И зау́тра целова́вше друг дру́га отъидо́ша.

Иду́щим же им в путь, сотвори́ учени́к поклоне́ние ста́рцу, глаго́ля: «Сотвори́ любо́вь, о́тче, пове́ждь ми, кто есть ста́рец сей, и ка́ко его́ све́си?». И не восхоте́ ста́рец пове́дати ему́. И па́ки сотвори́ учени́к поклоне́ние глаго́ля: «И́на мно́га сказа́еши ми, а о ста́рце сем не хо́щеши ли пове́дати?».

Бе бо ста́рец пове́да ему́ мно́ги от святы́х доброде́тели. Ста́рец же па́ки не восхоте́ пове́дати о ста́рце. Он же мно́жае оскорбе́ся, и ктому́ не вопроси́ его́ ничто́же. Прише́дшим же им во свою́ ке́лию, и не восхоте́ брат принести́ ста́рцу по обы́чаю вкуси́ти хле́ба: в девя́тый бо час вкуша́ше ста́рец по вся дни. Ве́черу же бы́вшу, прии́де ста́рец в ке́лию бра́та. И глаго́ла ему: «Что есть ча́до, я́ко оста́вил еси́ отца́ своего́ гла́дом тлю́ща?». Он же отвеща́: «Аз отца́ не и́мам. А́ще бы аз отца́ име́л, люби́л бы свое́ ча́до».

Обра́щьжеся ста́рец хотя́ изы́ти из ке́лии. Пости́гже его́ брат и удержа́ и́. И нача́т целова́ти но́зе его́, глаго́ля: «Жив Госпо́дь, я́ко не оста́влю тя до́ндеже пове́даеши ми, кто есть ста́рец о́ный». Не хотя́ше бо брат ника́коже оста́вити ста́рца оскорбле́на, понеже зело́ любля́ше ста́рца.

Тогда́ глаго́ла ему́ ста́рец: «Сотвори́ ми вкуше́ние мал́о, и скажу́ ти». И повнегда́ вкуси́ти им, глаго́ла бра́ту ста́рец: Не бу́ди ча́до же́стоку име́я вы́ю двух ра́ди прекосло́вий твои́х, е́же на селе́ испове́дах ти. Блюди́ же да не пове́си никому́же, я́же слы́шиши. Внима́й. Ста́рец сей Евло́гий нари́чется. Худо́жеством каменносе́чец. Рабо́тает же весь день, ничесо́же вку́шая до ве́чера. Ве́черу же бы́вшу прихо́дит в дом свой, и ели́ки обря́щет странныя приво́дит в дом свой и питает их якоже ви́дел еси́, оста́вшыя же укру́хи помета́я псом. И́мать же де́ло каменносе́чия от ю́ности своея́ да́же до ны́не. Есть же ны́не стом ле́том и мно́жае. И пода́ст ему Бог си́лу на де́ло се, я́коже в ю́ности его́. И взима́ет всегда́ по еди́ной злати́це на день.

Ю́ну же ми су́щу пре́жде четы́редесяти лет, продая́ти взыдо́х рукоде́лие мое́ в весь о́ну. Ве́черу же бы́вшу, прише́д и поя́т мя в дом свой по обы́чаю, и про́чию бра́тию ели́ко обре́те, и учреди́ нас я́коже и ны́не ви́дел еси́. Ви́дев же аз доброде́тель его́ и почуди́хся, и нача́х пости́тися по неде́ли, и моли́ти Бо́га о нем. Я́ко да мно́жае пода́ст ему́ име́ние, да пита́ет мно́гия стр́анники. И поста́вися три неде́ли и мно́жае, и изнемо́г от поста́, я́ко едва не умрети.

И се узре́х не́коего святоле́пна прише́дша ко мне и глаго́люща: «Что есть, о Дании́ле?». И рече́ к нему́: «Сло́во положи́х к Богу, не вкуси́ти хле́ба, до́ндеже услы́шит мя за Евло́гия каменносе́чца, и пода́ст ему́ Бог благослове́ние, я́ко да мно́жайшия стра́нники упоко́ит». И глаго́ла ми: «Ни, но до́бре есть я́коже ны́не». И рех ему́: «Ни Го́споди, но даждь ему, яко да вси просла́вят и́мя Твое́ Свято́е». И отвеща́ ми: «Аз глаголю, добре есть. А́ще ли хо́щеши да пода́м ему́, хо́щеши ли бы́ти испору́чник о душе́ его́, я́ко да спасе́тся мно́жайшим име́нием, и Аз пода́м ему́?». Рех же к нему́ аз: «От руцы́ моея́ взыщи́ ду́шу его́».

И се глаго́лющи ми обрето́хся, яко во святом воскресе́нии стоя́щу ми, и ви́дех Отроча́ святоле́пно, на святе́м ка́мени седя́ща. Узре́ же и Евло́гия одесну́ю его́ стоя́ща. И посла́ к нему́ Отроча́ оно еди́наго от предстоя́щих ему́, и глаго́ла ми: «Ты ли еси́ поручи́выйся за Евло́гия?» И ре́ша предстоя́щии: «Ей, хода́тай есть». И глаго́ла ми па́ки: «Испоруче́ние взыска́ти хощу́ от тебе́». И рех: «Ей Влады́ко, от мене́, то́чию умно́жи име́ние его́». И посе́м ви́дех я́ко два не́кая влага́юща в не́дра Евло́гию зла́та мно́го зело. И ели́ко они́ влага́ху, толи́ко не́дра Евло́гию вмеща́ху. И возбну́ от сна, разуме́х я́ко услы́шан бых, и просла́вих Бо́га.

Евло́гий же по обы́чаю своему́ изше́д на де́ло свое́, и уда́рив ка́мень. И слы́шит я́ко у́тел есть. И па́ки уда́рив, и обре́те я́ко о конце́ ма́ло. И трети́цею уда́рив, и обре́те пеще́ру испо́лнь су́щу зла́та. Ужа́сен же бе глаго́ля: «Что сотворю́ не свем? А́ще возму́ сия́ в дом свой, услы́шит князь и во́змет сия́, аз же в напа́сть впаду́. Но оба́че возму́ сия и поста́влю иде́же никто́же весь. И ку́плю скот, я́ко да ка́мением но́сят ми». И но́щию принесе́ зла́то к реце́, и оста́ви до́брое о́но де́ло е́же творя́ше по вся дни прие́мля странныя. И взем кора́бль, доплы́ в Констани́нь град. Ца́рствова же тогда́ Иустиниа́н стрый Иустиниа́нов. И вдасть зла́то мно́го царе́ви, и вельмо́жам его́. И поста́виша его́ епа́рхом. И купи́ себе́ хра́мы вели́ки, и́же глаго́лются еги́петския да́же и до днесь. И по двою́ ле́ту зрях во сне Отроча́ о́но святоле́пно па́ки во свято́м воскресе́нии, и помышля́х в себе́: «У́бо где есть Евло́гий?». И пома́ле часе́ зрях Евло́гия изгони́ма от лица́ Отроча́те, и влачи́ма от не́коего му́рина. И возбну́в от сна, рех в себе́: «Увы́ мне гре́шному! Что сотвори́х? Погуби́х ду́шу свою́».

И взем милота́рь свой, и идо́х в весь о́ну иде́же пре́жде бе Евло́гие. Сотвори́вся продая́ти рукоде́лие мое́. И ожидах Евло́гия приити́, и поя́ти мя по обы́чаю в дом свой. И се не бысть ника́коже по обы́чаю поя́ти мя. Воста́в у́бо, и вопроси́х еди́ну ста́рицу, глаго́ля: «Молю́тися ма́ти моя́, принеси́ ми ма́ло хле́ба да вкушу́». Она́ же ско́ро шед принесе́ ми хлеб и варе́ние, и се́де близ мене́, нача́т глаго́лати ко мне духо́вная и поле́зная словеса́: «Я́ко не поле́зно ти есть в мир ходи́ти. Не све́си ли я́ко и́ноческое житие́ безмо́лвия тре́бует?». И и́на мно́жайшая поле́зная изглаго́ла ми. И рех ей: «У́бо что ми повелева́еши, я́ко рукоде́лие мое приидо́х продая́ти?». Она́ же отвеща́ ми: «А́ще и рукоде́лие продае́ши, но оба́че не косни́ но́щию в ве́си». Аз же к ней рех: «Та́ко есть». И па́ки вопроси́ ю́: «Рцы ми ма́ти, несть ли в ве́си сей не́кий боя́йся Бо́га, и прие́мля стра́нныя?». И воздохну́в, глаго́ла ми: «О́тче и господи́не, име́хом зде каменносе́чца не́коего, мно́гу ми́лостыню творя́ща стра́нным. И ви́дев Бог де́ло его́, вдаде́ ему́ благода́ть: и слы́шим о нем, я́ко патрики́й есть ны́не в Константи́не гра́де».

Слы́шав же аз сия́, рех в себе́: «Аз уби́йство сие́ сотвори́х». И влез в кора́бль приидо́х в Византи́ю. И вопроси́х не́кия хра́мы еги́петския, где обря́щу скажи́те ми. И пове́даша ми. Шед у́бо и седо́х пред две́рьми хра́ма его́, до́ндеже изы́дет Евло́гие. И се зря его́ изше́дша с го́рдостию мно́гою. И аз воззва́х к нему́: «Поми́луй мя, не́что рещи́ хощу́ к тебе́». Он же поне́ ни возре́ти на мя восхоте́, но и рабо́м свои́м пове́ле би́ти мя. Аз же на и́но ме́сто предвари́в, па́ки возва́х. Он же па́ки повеле́ би́ти мя мно́жае. И та́ко пребы́х четы́ре неде́ли пред две́рьми до́му его́, обурева́емь сне́гом и дожде́м: и не возмого́х бесе́довати ему́. Тогда́ стужи́в си отъидо́х и пове́рг себе́ пред о́бразом Го́спода на́шего Иису́са Христа́ со слеза́ми моля́ся, глаго́ля: «Го́споди, про́сти мя, от испоруче́ния челове́ка сего́. А́ще ли, то и аз иду в мир».

Сия́ в по́мысле мое́м глаго́лющу ми, а́бие воздрема́хся. И се мяте́ж вели́к нача́ бы́ти и глаго́лаху, цари́ца гряде́т. И предъидя́ху пря́мо ей тмы тма́ми, ты́сяща ты́сящами наро́да. И возвах глаголя: «Поми́луй мя, Влады́чице». Она́ же став, глаго́ла ми: «Что хо́щеши?». И рех ей: «За Евло́гия епа́рха испоручи́хся. И повели́ разреши́ти ся от испоруче́ния того́». Она́ же отвеща́ ми: «О том аз ве́щи не и́мам. Я́коже хо́щеши, испо́лни испоруче́ние сие́». И возбну́ от сна, рех в себе: «А́ще ми есть и умре́ти, не отступлю́ врат Евло́гиевых, до́ндеже бесе́дую с ним». И идо́х на преддве́рие. И егда́ хотя́щу ему́ изы́ти, па́ки возва́х к нему́. И прите́к еди́н от раб, и толи́ки ра́ны даде́ ми, я́ко сокруши́ти все те́ло мое́.

Тогда́ малоду́шствовав рех к себе́: «Иду́ во скит. И а́ще хо́щет Бог спасе́т Евло́гия, и́миже судьба́ми Сам весть». Ше́дшу ми на взыска́ние корабля́ и обре́те внидо́х в него́, идо́х во Александри́ю и внидо́х вонь е́же поплы́ти нам. И влез падо́х от малоду́шия я́ко мертв, и воздрема́хся. И зрях себе́ я́ко во святе́м воскресе́нии. И Отроча́ о́но седя́ на святе́м ка́мени честна́го ка́мени гро́ба. И возре́в на мя со гне́вом, я́коже от стра́ха трепета́ти ми, я́коже лист. И не мощи́ отверсти ми уст мои́х: окамени́бося се́рдце мое́. И глаго́ла ми: «Не и́деши ли испо́лнити испоруче́ние?». И повеле́ двема́ от предстоя́щих ему связа́вше пове́сити мя и би́ша мя дово́льно. И глаго́лаху ми: «Не начина́й де́ла вы́ше ме́ры своея́, и не спира́йся с Бо́гом». Аз же от стра́ха не можа́х отве́рсти уст мои́х. И а́ще ви́сящу ми, и се глас бысть, яко царица гряде́т. И ви́дех сию и прия́х дерзновение и рех к ней ти́хим гла́сом: «Поми́луй мя, Влады́чице миру». И глаго́ла ми па́ки: «Что хо́щеши?». И рех ей: «За испоруче́ние Евло́гиево, пове́шен есмь аз зде». И глаго́ла ми: «Аз помолю́ся о тебе́». И ви́дех я́ко вид, и нача́ облобыза́ти нозе Отроча́ти о́ного. И глаго́ла ми Отроча́: «Ктому́ да не сотвори́ши ли вещь сию́?». И рех: «Ни, Влады́ко. Аз моли́хся о нем я́ко да бо́лий будет ми́лостив. Согреши́х, Влады́ко, прости́ мя». И повеле́ разреши́ти мя и глаго́ла ми: «Иди́ в ке́лию свою́. Аз же приведу́ Евло́гия в пе́рвый его́ чин: о сем ты не пецы́ся». И а́бие возбуди́хся, и ра́достен бых зело́, изба́влься такова́го испоруче́ния. Благодари́х Бо́га, и Всенепоро́чную Влады́чицу Богоро́дицу.

По трие́х же ме́сяцех слы́шах, я́ко у́мре Иусти́н царь. И нача́т гони́ти вельмо́жи ипа́та, и ексикра́та, и моего́ Евло́гия епа́рха. Два у́бо убие́на бы́ста, и разгра́биша име́ния их, и бога́тство Евло́гиево. Сам же но́щию бе́гу я́тся от Константи́на гра́да. Бе бо повеле́л царь, иде́же а́ще обря́щеся да убие́н бу́дет. Бежа́щу же ему́ прии́де в пе́рвое ме́сто свое́, и измени́ ри́зы своя́, я́коже и пре́жде егда́ бе убо́г. Истеко́шася вси жи́телие ве́си тоя́ ви́дети его́. И глаго́лаху ему́: «Слы́шахом о тебе́ я́ко патрики́я сотвори́ша тя». Он же отвеща́: «А́ще бы аз патрики́е поста́влен бысть, ктому́ мне не хоте́сте ви́дети. Но ин есть о не́мже слы́шите. Аз же ко святы́м ме́стом идо́х поклони́тися». И в себе́ прише́д, глаго́лаше смире́ный Евло́гие: «Воста́в приими́ ору́дия своя́, и шед де́лай, поне́же зде несть Констани́нь град, да не ка́ко и главу́ свою́ погуби́ти. И взем ору́дия своя́, изы́де к ка́меню иде́же пре́жде име́ние обре́те, мне́ся ему яко друга́я обря́щет. И ударя́я в ка́мень да́же до шеста́го часа, и ничто́же обре́те. И нача́т воспомина́ти пи́щу, и сла́дость сне́дем и́хже имеяше в пола́те, льще́ния и го́рдости ми́ра сего́. И па́ки глаго́лаше к себе́: Воста́в де́лай зде во Еги́пте. И пома́лу устро́и его́ свято́е Отроча́ о́но и свята́я на́ша Влады́чица в пе́рвый еѓо чин. Несть бо непра́веден Бог, забы́ти пре́днии его́ труды́.

По не́коем же ле́те идо́х па́ки в весь о́ну. И се в ве́чер прии́де и поя́т мя по пе́рвому обы́чаю. И я́ко узре́х его́, воздохну́ прослези́ся рече: «Я́ко возвеличишася дела Твоя́ Го́споди, вся прему́дростию сотвори́л есть. Кто Бог ве́лий, я́ко Бог наш? Воздвиза́яй от земли́ ни́ща и от гно́ища вознося́й убо́га. Чудеса́ Твоя́ и судьбы́ Твоя́ кто испове́сть, Влады́ко Го́споди? Аз же гре́шный нача́х, и вма́ле не всели́лася во ад душа́ моя́». И взем во́ду и умы́ но́зе мо́и по обы́чаю, и предложи́ трапе́зу. И повнегда́ вкуси́ти нам, и глаго́лах ему́: «Ка́ко я́же о тебе́ бра́те?». Он же глаго́ла ми: «Моли́ за мя о́тче, я́ко челове́к есмь гре́шен. И не и́мам в руку́ мое́ю ничто́же». Аз же рех ему́: «Хоте́х бых да и́же и́маши не и́маши». И глаго́ла ми: «Почто́ господи́не о́тче? Не́что ли тя соблазни́х?». Аз же рех ему́ все подро́бну. И пла́кахом ся вку́пе. Та́же глаго́ла ми: «Моли́ о мне, да поне́ ны́не испра́влюся». И глаго́лах ему́: «Вои́стину бра́те, да не ожида́еши ктому́ стяжа́ти мно́жайше име́ние, до́ндеже еси́ в животе́ сем, точию един злати́к».

Се же сказа́х ти ча́до, ка́ко зна́ю его. Ты же да не ска́жеши сия́ кому. И сохрани́ учени́к не пове́дати никому́же да́же до сме́рти свята́го ста́рца. Чуди́тижеся есть Бо́жию человеколю́бию, ка́ко вма́ле вознесе́ толи́ко, и па́ки смири́в к поле́зным. Помо́лимжеся и мы смири́тися во стра́се Го́спода на́шего Иису́са Христа́, я́ко да обря́щем ми́лость пред Стра́шным Его Суди́щем, моли́твами Богоро́дицы и при́сно Де́вы Мари́и, и всех святы́х. Ами́нь.

СЛО́ВО А҃. Ѡ҆ ѿрече́нїи житїѧ̀ (мі́ра).

Бл҃га́гѡ и҆ пребл҃га́гѡ и҆ всебл҃га́гѡ бг҃а на́шегѡ и҆ цр҃ѧ̀, (добро́ бо є҆́сть ѿ бг҃а къ бж҃їимъ рабѡ́мъ нача́ти) и҆з̾ всѣ̑хъ ѿ негѡ̀ созда́нныхъ слове́сныхъ самовла́стїѧ досто́инствомъ почте́нныхъ, ѻ҆́ви ѹ҆́бѡ сꙋ́ть є҆гѡ̀ дрꙋ́зи, ѻ҆́ви же и҆́стинни рабѝ, ѻ҆́ви же неключи́ми, ѻ҆́ви же ѿню́дъ ѹ҆стране́ни, ѻ҆́ви же, а҆́ще и҆ не́мощни, ѻ҆ба́че сопроти́вни. И҆ дрꙋ́ги ѹ҆̀бо сво́йственнѣ мы̀ простцы̀, ѽ сщ҃е́ннаѧ главо̀, ѡ҆ бз҃ѣ вознепщева́хомъ бы́ти, ꙗ҆̀же ѡ҆́крестъ є҆гѡ̀ ѹ҆́мнаѧ же и҆ безтѣлє́снаѧ сꙋщества̀. ­стинны же рабы̑, всѧ̑ во́лю є҆гѡ̀ без̾ лѣ̑ности, и҆ без̾ѡста́внѡ творѧ́щыѧ и҆ сотво́ршыѧ. Неключи̑мы же рабы̑, є҆ли́цы кр҃ще́нїѧ ѹ҆́бѡ сподо́битисѧ непщꙋ́ютъ, ѡ҆бѣ̑ты же ꙗ҆̀же къ немꙋ̀, и҆́стиннѡ не сохрани́ша. Стра̑нны же ѿ бг҃а, и҆ врагѝ разꙋмѣ̑ти и҆́мамы, є҆ли́цы и҆лѝ невѣ̑рни, и҆лѝ ѕловѣ̑рни сꙋ́ть. Сꙋпоста́ти же сꙋ́ть, не то́чїю повелѣ̑нїе гдⷭ҇не ѿрази́вшїи и҆ ѿ себѐ ѿве́ргшїи, но и҆ содѣ̑ловающыѧ сїѐ крѣ̑пцѣ ра́тꙋющїи.

в҃. Поне́же ѹ҆́бѡ и҆з̾ всѣ̑хъ предрече́нныхъ кі́йждо своѐ нѣ̑кое и҆ подоба́ющо сло́во и҆́мать: на́мъ же неꙋчє́нымъ нѣ̑сть поле́зно въ настоѧ́щемъ такѡва́ѧ ска́зовати: грѧдѝ ѹ҆́бѡ грѧдѝ (и҆) мы̀ ны́нѣ къ бл҃гоче́стнѡ на́съ наси́ловавшымъ, и҆ вѣ̑рнѡ понꙋ́дившымъ повелѣ́нїи свои́ми, бж҃їимъ и҆́стиннымъ рабѡ́мъ, недосто́йнꙋю рꙋ́кꙋ свою̀ послꙋша́нїемъ протѧ́гше, и҆ ѿ ра́зꙋма и҆́хъ тро́сть сло́ва прїе́мше, въ дрѧ́хлое и҆ свѣтѧ́щеесѧ смиренномꙋ́дрїе ѡ҆мочи́вше, на гла́дкихъ и҆ бѣ̑лыхъ и҆́хъ срⷣ҇ца́хъ, ꙗ҆́коже на нѣ̑кїихъ хартїа́хъ, па́че же скрижа́лехъ дх҃о́вныхъ сїю̀ ѹ҆поко́ивше, бж҃е́ствєннаѧ словеса̀, па́че же сѣ̑мена разживописꙋ́юще, гл҃емъ та́кѡ.

г҃. Всѣ̑хъ произволѧ́ющихъ є҆́сть бг҃ъ, всѣ̑хъ живо́тъ: всѣ̑хъ спасе́нїе, вѣ̑рныхъ, невѣ̑рныхъ: првⷣныхъ, непра́ведныхъ: бл҃гочести́выхъ, нечести́выхъ: безстра́стныхъ, встра́ственныхъ: мона́хѡвъ, мїрски́хъ: премꙋ́дрыхъ, про́стыхъ: здра́выхъ, немощны́хъ: ю҆́ныхъ, престарѣ̑вшихсѧ: ꙗ҆́коже свѣ̑та лїѧ́нїе, и҆ со́лнца зрѣ̑нїе, и҆ воздꙋ́хѡвъ премѣне́нїе, и҆ и҆змѣне́нїѧ нѣ̑сть: нѣ̑сть бо лицепрїѧ́тїѧ ѹ҆ бг҃а.

д҃. Нечести́въ є҆́сть, є҆стество̀ слове́сно, ме́ртвенно, во́лею ѿ живота̀ ѻ҆́нагѡ ѿверга́ющо, и҆ творца̀ своего̀ при́снѡ сꙋ́щаго, не сꙋ́ща бы́ти непщꙋ́ющо. законопрестꙋ́пникъ є҆́сть, и҆́же зако́нъ сꙋ́щїй ѿ бг҃а со свои́мъ ѕлоꙋ́мїемъ держа́й, и҆ съ є҆́ресїю проти́вною вѣ̑ровати бг҃ꙋ непщꙋ́ѧй. őрⷭ҇тїа́нинъ є҆́сть, подража́нїе хрⷭ҇тꙋ̀ ꙗ҆́коже мо́щно є҆́сть чл҃вѣ̑кꙋ, словесы̀, и҆ дѣ̑лы, и҆ помышле́нїемъ, во ст҃ꙋ́ю трⷪ҇цꙋ пра́вѡ и҆ непоро́чнѡ вѣ̑рꙋѧ. Бг҃олюбе́зенъ є҆́сть, и҆́же всѣ̑хъ є҆сте́ственныхъ и҆ безгрѣ̑шныхъ въ прича́стїи сы́й: и҆ ѡ҆ бл҃ги́хъ ꙗ҆̀же по си́лѣ не нерадѧ́й. Возде́ржникъ є҆́сть, и҆́же, посредѣ̀ и҆скꙋше́нїй, и҆ сѣ̑тей, и҆ мо́лвъ свобо́дна сꙋ́щагѡ, нра̑вы все́ю си́лою подражава́ти любопрѧ́йсѧ. Мона́хъ є҆́сть, чи́нъ и҆ ѹ҆строе́нїе безтѣле́сныхъ, въ тѣ̑лѣ веще́ственнѣ и҆ брꙋ́днѣ сотворѧ́емо. Мона́хъ є҆́сть, и҆́же є҆ди́нѣхъ бж҃їихъ держа́йсѧ ѹ҆ста̑въ, и҆ слове́съ, во всѧ́комъ вре́мени и҆ мѣ̑стѣ и҆ ве́щи. Мона́хъ є҆́сть, наси́лїе є҆стества̀ всегда́шнѧѧ, и҆ хране́нїе чꙋ́вствъ неѡскꙋ́дно. Мона́хъ є҆́сть, ѡ҆чище́но тѣ̑ло, и҆ ѡ҆чищє́на ѹ҆ста̀, и҆ просвѣще́нъ ѹ҆́мъ. Мона́хъ є҆́сть, болѣ̑зненна дꙋша̀ во всегда́шней па́мѧти сме́ртнѣй поꙋча́ющисѧ, и҆ спѧ́щи и҆ бдѧ́щи. Ѿше́ствїе ѿ мі́ра є҆́сть, во́льна не́нависть похвалѧ́ема вещества̀, и҆ ѿверже́нїе є҆стества̀ полꙋче́нїѧ ра́ди тѣ̑хъ ꙗ҆̀же превыше є҆стества̀.

є҃. Всѝ житє́йскаѧ ѹ҆се́рднѡ ѡ҆ста́влшїи, всѧ́кѡ, и҆лѝ бꙋ́дꙋщагѡ ра́ди црⷭ҇твїѧ: и҆лѝ мно́жества ра́ди грѣ́хъ: и҆лѝ любвѐ ра́ди ꙗ҆́же ко бг҃ꙋ, сїѐ сотвори́ша. А҆́ще ли же ниеди́нъ и҆з̾ предрече́нныхъ ра́зꙋмѡвъ въ ни́хъ предвари́лъ є҆́сть, то̀ безслове́сно си́хъ ѿше́ствїе ѻ҆́но бы́сть: ѻ҆ба́че конца̀ тече́нїѧ сегѡ̀ како́въ бꙋ́детъ, до́брый на́шъ подвигополо́жникъ ѡ҆жида́етъ.

ѕ҃. Да подража́етъ, бре́мѧ грѣхѡ́въ свои́хъ расточи́ти и҆з̾ мі́ра и҆зше́дый, сѣдѧ́щихъ пред̾ гро́бами внѣ̀ гра́да: и҆ да не преста́нетъ ѿ те́плыхъ и҆ горѧ́щихъ ка́плей, и҆ безгла́сныхъ рыда́нїй се́рдца, до́ндеже ѹ҆ви́дитъ и҆ то́й і҆и҃са прише́дша, и҆ ка́мень ѡ҆жесточе́нїѧ ѿ срⷣ҇ца ѿвали́вша: и҆ ѹ҆ма̀ на́шего ла́зарѧ ѿ плени́цъ грѣхѡ́въ разрѣши́вша, и҆ слꙋга́мъ а҆́гг҃лѡмъ: разрѣши́те є҆го̀ ѿ страсте́й, и҆ ѡ҆ста́вите и҆тѝ къ бл҃же́нномꙋ безстра́стїю, повелѣ̑вша. А҆́ще ли же не та́кѡ, то̀ ниеди́на по́льза.

з҃. Є҆ли́цы и҆з̾ є҆гѵ́пта и҆ фараѡ́на и҆зы́ти и҆ бѣжа́ти хо́щемъ, то̀ всѧ́кѡ мѡѷсе́а нѣ̑коего и҆ мы̀ хода́таѧ ко бг҃ꙋ и҆ по бз҃ѣ тре́бꙋемъ, ꙗ҆́кѡ да бы̀ за ны̀ посредѣ̀ дѣѧ́нїѧ и҆ видѣ̑нїѧ стоѧ̀ рꙋ́цѣ ко бг҃ꙋ воздѣва́лъ, да наставлѧ́емїи и҆ мо́ре грѣхѡ́въ пре́йдꙋтъ, и҆ а҆мали́ка страсте́й побѣдѧ́тъ. Прелсти́шасѧ ѹ҆́бѡ са́мѣхъ себѐ преда́телствꙋющїи, и҆ ниеди́нагѡ предводи́телѧ тре́бовати вознепщева́вшїи. И҆з̾ є҆гѵ́пта ѹ҆́бѡ и҆зше́дшїи, мѡѷсе́а: и҆з̾ содо́ма же и҆збѣ̑гшїи, а҆́гг҃ла наставлѧ́ющаго и҆мѣ̑ша. И҆ ѻ҆́ви ѹ҆́бѡ, дꙋшє́вныѧ стра̑сти прилѣжа́нїемъ враче́й и҆сцѣлѧ́ющымъ подо́бни сꙋ́ть, и҆́же сꙋ́ть и҆з̾ є҆гѵ́пта и҆сходѧ́щїи. Ѻ҆́ви же, ѻ҆каѧ́ннагѡ тѣ̑ла сегѡ̀ нечистоты̀ жела́ющымъ совлещи́сѧ: тѣ̑мже и҆ а҆́гг҃ла, си́рѣчь равноа́гг҃лна, да та́кѡ рекꙋ̀, спомога́ющагѡ тре́бꙋютъ: проти́вꙋ бо согни́тїѧ ꙗ҆́звъ, хꙋдо́жна ѕѣлѡ̀ и҆ врача̀ тре́бꙋемъ.

и҃. Нꙋ́жды вои́стиннꙋ, и҆ непреста́нныхъ болѣ̑зней на нб҃о съ тѣ̑ломъ взы́ти покꙋси́вшїисѧ трѣ̑бꙋютъ: и҆ па́че же въ са́мѣхъ нача́лѣхъ ѿрече́нїѧ сегѡ̀: доне́лѣже сластолюби́вый на́шъ нра́въ, и҆ непоболѣ̑нное се́рдце, въ бг҃олю́бїе и҆ ѡ҆чище́нїе пла́чемъ ꙗ҆́вственнымъ воз̾ꙋстро́ѧтсѧ. Трꙋ́дъ бо є҆́сть вои́стиннꙋ трꙋ́дъ, и҆ мно́га и҆ неви́дима го́ресть сїѧ̀, доне́лѣже рѣзницелюби́ваго пса̀ ѹ҆ма̀, и҆ пищелюби́ваго, чистолюби́ва нѣ̑коего и҆ любоназира́телна, простото́ю, и҆ безгнѣ̑вїемъ глꙋбо́кимъ и҆ прилѣжа́нїемъ, сотвори́мъ. Ѻ҆ба́че дерза́емъ встра́ственнїи, и҆ и҆знемога́ющїи, вѣ̑рою несꙋмнѣ̑нною не́мощь на́шꙋ и҆ дꙋше́вное безси́лїе рꙋко́ю на́шею десно́ю хрⷭ҇тꙋ̀ приносѧ́ще и҆ и҆сповѣ̑дающе: и҆ всѧ́кѡ по́мощь є҆гѡ̀, и҆ па́че досто́инства своегѡ̀ прїи́мемъ: ѻ҆ба́че во глꙋбинꙋ̀ смиренномꙋ́дрїѧ себѐ вы́нꙋ низводѧ́ще.

ѳ҃. Да разꙋмѣва́ютъ всѝ къ до́бромꙋ по́двигꙋ семꙋ̀ жесто́комꙋ и҆ тѣ̑сномꙋ и҆ ле́гкомꙋ приходѧ́щїи, ꙗ҆́кѡ во ѻ҆́гнь прїидо́ша вскочи́ти: а҆́ще ѻ҆́гнь невеще́ственъ въ себѐ всели́ти ѡ҆жида́ютъ. Да и҆скꙋша́етъ же кі́йждо себѐ, и҆ пото́мъ ѿ хлѣ̑ба є҆гѡ̀ и҆́же съ го́ркимъ ѕе́лїемъ, да ꙗ҆́стъ и҆ ѿ ча́ши є҆гѡ̀ ꙗ҆́же со слеза́ми, да ꙗ҆́стъ и҆ да пїе́тъ, да не въ сꙋ́дъ себѣ̀ во́инствꙋетъ. А҆́ще не всѧ́къ крⷭ҇тѧ́йсѧ спасе́нъ є҆́сть, то̀ про́чее ѹ҆молчꙋ̀.

і҃. Всѣ̑хъ ѿве́ргꙋтсѧ: всѧ̑ презрѧ́тъ: всѣ́мъ посмѣю́тсѧ: всѧ̑ ѿтрѧсꙋ́тъ приходѧ́щїи, да добро̀ ѡ҆снова́нїе положа́тъ. Добро̀ тризда́нно и҆ тристо́лпно ѡ҆снова́нїе: неѕло́бїе, по́стъ, цѣломꙋ́дрїе. Всѝ и҆́же ѡ҆ хрⷭ҇тѣ̀ младе́нцы, си́ми да начина́ютъ, и҆́стинное зна́менїе прїе́млюще чꙋ́вствєнныѧ младе́нцы: ничто́же бо ѹ҆ ѻ҆́нѣхъ лꙋка́во, нижѐ льсти́вно ѡ҆брѧ́щестсѧ когда̀: ни сы́тость ненасы́тна: ни чре́во ненасыща́емо: ни тѣ̑ло разжиза́емо: не́гли бо по ѹ҆множе́нїю пи́щи про́чее пред̾ꙋспѣва́ютъ, и҆ раждеже́нїе прїе́млютъ.

а҃і. Ненави́стно вои́стиннꙋ и҆ прибѣ̑дственно є҆́сть є҆́же ѿ вхо́да борьбы̀ сеѧ̀ ѡ҆слабѣ̑ти борю́щемꙋсѧ, всѣ́мъ даю́щꙋ и҆́стинное зна́менїе своегѡ́ си заколе́нїѧ. Да бꙋ́детъ на́мъ всѧ́кѡ ѿ тве́рдагѡ нача́ла, и҆ во є҆́же пото́мъ ѡ҆слабле́нїи по́льза. Дꙋша́ бо мꙋ́жественна бы́вши, и҆ ѡ҆слабѣ̑вши, па́мѧтїю пе́рвагѡ тща́нїѧ, ꙗ҆́кѡ ѻ҆стно́мъ бодо́ма быва́етъ: тѣ̑мже ѿ сегѡ̀ мно́жицею нѣ̑цыи себѐ и҆ воздвиго́ша.

в҃і. Внегда̀ дꙋша̀ са́мꙋ себѐ преда́телствовавши, теплотꙋ̀ погꙋби́тъ бл҃же́ннꙋю и҆ вожделѣ̑ннꙋю, то̀ да взы́щетъ прилѣ̑жнѡ ко́ею вино́ю лиши́ласѧ є҆́сть тоѧ̀, и҆ на ѻ҆́нꙋ ве́сь трꙋ́дъ и҆ тща́нїе да воспрїи́метъ: нѣ̑сть бо мо́щно и҆нѣ̑ми враты̀ тꙋ̀ возврати́ти, ра́звѣ и҆́миже и҆зы́де.

г҃і. ­же ѹ҆́бѡ стра́ха ра́ди ѿрече́нїе сїѐ сотвори́вый, не́гли горѧ́щемꙋ ѳѷмїа́мꙋ ѹ҆подо́бисѧ, въ нача́лѣхъ ѹ҆́бѡ ѿ бл҃гоꙋха́нїѧ наче́ншемꙋсѧ, по́слѣжде же въ ды́мъ ѡ҆ко́-нчившемꙋсѧ. А҆ и҆́же мзды̀ ра́ди, то̀ ѻ҆се́лскъ же́рновъ быва́етъ, вы́нꙋ та́кожде двиза́ѧсѧ. А҆ и҆́же любвѐ ра́ди бжⷭ҇твенныѧ ѿше́ствїе сїѐ сотвори́вый, то̀ а҆́бїе ѻ҆́гнь въ нача́лѣхъ стѧжа́лъ є҆́сть: и҆ не́гли въ вещество̀ вве́рженъ бы́въ, пред̾ лице́мъ крѣ̑плшъ пожа́ръ возже́глъ бы.

д҃і. Сꙋ́ть нѣ̑цыи верхꙋ̀ ка́менїѧ плі̑нѳы зи́ждꙋщїи: и҆ сꙋ́ть и҆́ни, и҆́же на землѝ столпы̀ ѹ҆тверди́ша: и҆ сꙋ́ть и҆́ни ма́лѡ пѣшеходи́вше, и҆ жи́лами и҆ чле́нами разгрѣ̑ѧвшесѧ, бы́стрѣе ходи́ша: разꙋмѣва́ѧй да разꙋмѣва́етъ сло́во гада́телно.

є҃і. Ꙗ҆кѡ бг҃омъ и҆ цр҃е́мъ по́звани бы́вше, ѹ҆се́рднѡ потеце́мъ, да не ка́кѡ маловре́менни сꙋ́ще, въ де́нь сме́рти безпло́дни ѡ҆брѧ́щемсѧ, и҆ гла́домъ сконча́емсѧ. Бл҃гоꙋгоди́мъ гдⷭ҇ꙋ, ꙗ҆́коже во́ини цр҃ю̀: по ѹ҆воине́нїи бо, тогда̀ ѻ҆па́сныѧ рабо́ты и҆стѧзꙋ́еми быва́емъ. Ѹ҆бои́мсѧ гдⷭ҇а, ꙗ҆́коже ѕвѣре́й. Ви́дѣхъ бо мꙋже́й ѹ҆кра́сти ше́дшихъ, и҆ бг҃а ѹ҆́бѡ не ѹ҆боѧ́шасѧ, псѡ́въ же гла́съ на мѣ̑стѣ то́мъ ѹ҆слы́шавше, а҆́бїе возврати́шасѧ: и҆ є҆́же стра́хъ бж҃їй не сотворѝ, сїѐ стра́хъ ѕвѣре́й возмо́же. Возлю́бимъ гдⷭ҇а, ꙗ҆́коже дрꙋгѡ́въ почита́емъ: ви́дѣхъ бо мно́жицею нѣ̑кихъ бг҃а ѡ҆печа́лившихъ, и҆ ниеди́но попече́нїе ѡ҆ се́мъ воз̾имѣ̑вшихъ: и҆ ви́дѣхъ тѣ̑хжде, свои́хъ возлю́бленникѡвъ въ хꙋ́дѣ нѣ̑чесомъ прогнѣ̑вавшихъ и҆ всѧ́ко ѹ҆хищре́нїе, всѧ́ко ѹ҆мышле́нїе, всѧ́кꙋ ско́рбь, всѧ́ко и҆сповѣ̑данїе, самѣ̑ми собо́ю, чрез̾ дрꙋ́ги, чрез̾ да́ры сотвори́вшихъ, да въ пре́жднюю любо́вь возвратѧ́тсѧ.

ѕ҃і. Въ са́мѣхъ нача́лѣхъ ѿрече́нїѧ сегѡ̀ всѧ́кѡ съ трꙋдо́мъ и҆ го́рестїю добродѣ̑тели содѣ̑ловаемъ: пред̾ꙋспѣ̑вше же про́чее, безпеча́лно въ тѣ̑хъ, (и҆лѝ) ма́лѡ и҆ печа́лꙋюще, пребыва́емъ: є҆гда́ же ме́ртвенное на́ше мꙋдрова́нїе поже́рто и҆ поѡблада́но бꙋ́детъ ѿ ѹ҆се́рдїѧ, тогда̀ про́чее со всѧ́кою ра́достїю, и҆ тща́нїемъ и҆ вожделѣ̑нїемъ, и҆ пла́менемъ бжⷭ҇твеннымъ ты́ѧ содѣ̑ловаемъ.

з҃і. Поели́кꙋ похва́лни сꙋ́ть, и҆́же а҆́бїе ѿ нача̑лъ со всѧ́кою ра́достїю и҆ ѹ҆се́рдїемъ за́пѡвѣди соверша́ющїи: потоли́кꙋ ѻ҆каѧ́нни, и҆́же въ по́стничествѣ ѹ҆коснѣ̑вшїи, и҆ є҆щѐ съ трꙋдо́мъ ты́ѧ дѣ̑лающїи, а҆́ще и҆ дѣ̑лаютъ.

и҃і. Нижѐ ѡ҆бстоѧ́телныхъ ѿрече́нїй гнꙋша́имсѧ, и҆лѝ (та̑) ѡ҆сꙋжда́имъ. Ви́дѣхъ бо нѣ̑кихъ бѣжа́щихъ, и҆ нево́лею къ цр҃ю̀ приходѧ́щихъ, и҆ срѣта́ющихъ приходѧ́ща, и҆ томꙋ̀ про́чее нево́лею послѣ̑довавшихъ, и҆ въ пала́тꙋ съ ни́мъ совше́дшихъ, и҆ съ ни́мъ споѡбѣ̑давшихъ. Ви́дѣхъ сѣ̑мѧ на зе́млю нево́лею и҆спа́дшо, и҆ пло́дъ мно́гъ и҆ бл҃гоцвѣ̑тенъ сотво́ршо: ꙗ҆́коже и҆ напроти́въ. Ви́дѣхъ во враче́бницꙋ нѣ̑коего по нѣ̑коей и҆но́й потре́бѣ прише́дша, и҆ ѿ врача̀ красносло́вїемъ ѹ҆держа́на бы́вша, и҆ те́рпкости свобо́ждшасѧ и҆ належа́щїй на свѣ̑тѣ свое́мъ мра́къ ѿве́ргша: и҆ бы́ша невѡ́льнаѧ ѿ въ нѣ̑кихъ, во́льныхъ, и҆звѣ́стнша и҆ твє́рдша.

ѳ҃і. Никто́же тѧготꙋ̀ и҆ мно́жество грѣхѡ́въ и҆звѣ̑тъ творѧ̀, недосто́йна себѐ мона́шескагѡ ѡ҆бѣ̑та да нарица́етъ: и҆ сладостра́стїѧ ра́ди себѐ ѡ҆хꙋжда́ти да непщꙋ́етъ, непщꙋ́ѧ вины̑ ѡ҆ грѣсѣ̑хъ. И҆дѣ̑же бо мно́го є҆́сть согни́тїе, та́мѡ вели́ка и҆ врачева́нїѧ потре́бно є҆́сть, да скве́рнꙋ ѻ҆́нꙋ ѿри́нетъ: здра́ви бо сꙋ́щїи, во враче́бницꙋ не прихо́дѧтъ.

к҃. А҆́ще цр҃ю̀ назе́мнꙋ позна́вшꙋ, и҆ въ рабо́тꙋ ꙗ҆́же пред̾ лице́мъ є҆гѡ̀ ѹ҆воини́ти восхотѣ̑вшꙋ, не ѿлага́емъ, не и҆звинѧ́емсѧ: но всѧ̑ ѡ҆ста́влше, ѹ҆се́рднѣ тогѡ̀ достиза́емъ: во́нмемъ себѣ̀, да не ка́кѡ цр҃ю̀ ѻ҆́номꙋ цр҃е́й, и҆ гдⷭ҇ви господе́й, и҆ бг҃ꙋ богѡ́въ зовꙋ́щꙋ на́съ къ нбⷭ҇номꙋ семꙋ̀ чи́нꙋ, ѿ лѣ̑ности и҆ ѹ҆ны́нїѧ ѿрече́мсѧ, и҆ на вели́цѣмъ ѻ҆́нѣмъ сꙋди́щи ѡ҆брѧ́щемсѧ безѿвѣ̑тни: занѐ мо́щно ѹ҆́бѡ є҆́сть и҆ свѧза́нꙋ житїѧ̀ сегѡ̀ вещмѝ, и҆ желѣ̑зными попече́нми, ходи́ти, но неꙋдо́бнѣ. Поне́же и҆ желѣ́за носѧ́-щїи на нога́хъ, мно́жицею хо́дѧтъ, но ча́стѡ претыка́ютсѧ, и҆ ꙗ҆́звы ѿ сегѡ̀ прїе́млютъ. Не ѡ҆жени́выйсѧ бо въ мі́рѣ є҆ди́нѣми вещмѝ свѧ́занъ сы́й, на рꙋкꙋ̀ желѣ́за носѧ́щемꙋ подо́бенъ є҆́сть: тѣ̑мже и҆ є҆гда̀ хо́щетъ потещѝ ко и҆́ноческомꙋ житїю̀, то̀ не возбранѧ́етсѧ: ѡ҆жени́выйсѧ же, на рꙋкꙋ̀ и҆ ногꙋ̀ ѹ҆́зы носѧ́щемꙋ.

к҃а. Слы́шахъ нѣ̑кихъ въ мі́рѣ неради́вѡ пребыва́ющихъ, ре́кшихъ ко мнѣ̀: ка́кѡ мо́жемъ съ сꙋпрꙋ́жницею вкꙋ́пѣ живꙋ́ще, и҆ мїрски́ми попече́нми ѡ҆плета́ющесѧ, мона́шеское житїѐ проитѝ; Къ ни́мъ же ѿвѣща́хъ: всѧ̑ є҆ли̑ка мо́жете твори́ти бла̑га, сотвори́те: никого́же ѹ҆кори́те: никого́же ѡ҆кради́те: никомꙋ́же солжи́те: ни на кого́же возноси́тесѧ: никого́же возненави́дите: собра́нїй не ѿлꙋча́йтесѧ: къ тре́бꙋющымъ милосе́рди бꙋ́дите: никого́же соблазни́те: къ чꙋждѣ̑й ча́сти не прибли́житесѧ: и҆ дово́лни быва́йте ѡ҆бро́ки же́нъ ва́шихъ. А҆́ще та́кѡ сотворитѐ, не дале́че бꙋ́дете црⷭ҇твїѧ нбⷭ҇нагѡ.

к҃в. Притецы́мъ съ ра́достїю и҆ стра́хомъ къ до́бромꙋ семꙋ̀ по́двигꙋ, не боѧ́щесѧ врагѡ́въ на́шихъ, поне́же на лицѐ дꙋшѝ на́шеѧ взира́ютъ, а҆́ще и҆ не зрѧ́тсѧ. И҆ а҆́ще ѹ҆ви́дѧтъ то̀ ѿ боѧ́зни и҆змѣне́но, тогда̀ на ны̀ горча́е воѡрꙋжа́ютсѧ, разꙋмѣ̑вше льсти́вїи ѻ҆́ни ꙗ҆́кѡ ѹ҆страши́хомсѧ. Бл҃годꙋ́шнѣ ѹ҆́бѡ проти́вꙋ тѣ́мъ воѡрꙋжи́сѧ: со ра́тꙋющимсѧ бо ѹ҆се́рднѡ, никто́же ра́тꙋетсѧ.

к҃г. Смотри́телнѣ гдⷭ҇ь ѿ новонача́лныхъ бра̑ни ѡ҆блегчи́лъ є҆́сть, да не ѿ нача̑лъ а҆́бїе въ мі́ръ возвратѧ́тсѧ. Тѣ̑мже ра́дꙋйтесѧ ѡ҆ гдⷭ҇ѣ всегда̀ всѝ рабѝ бж҃їи: сїѐ пе́рвое зна́менїе въ себѣ̀ влⷣчнїѧ любвѐ къ на́мъ позна́вше, и҆ ꙗ҆́кѡ са́мъ на́съ позва́лъ є҆́сть. Но и҆ сїѐ творѧ̀ бг҃ъ мно́жицею познава́етсѧ: ѹ҆ви́дѣвъ бо мꙋ́жествєнны дꙋ́шы, а҆́бїе ѿ нача̑лъ на ты́ѧ бра̑ни попꙋсти́лъ є҆́сть, ѹ҆вѣнча́ти ты́ѧ ско́рѡ хотѧ̀. Ѹ҆таи́лъ є҆́сть гдⷭ҇ь ѿ сꙋ́щихъ въ мі́рѣ по́прища сегѡ̀ неꙋдо́бство, па́че же ѹ҆до́бство: занѐ а҆́ще бы́ша то̀ ѹ҆вѣ̑дѣли, то̀ не бы ѿрица́ласѧ всѧ́ка пло́ть.

к҃д. Дава́й трꙋды̀ ю҆́ности твоеѧ̀ ѹ҆се́рднѡ хрⷭ҇тꙋ̀, и҆ возра́дꙋешисѧ въ ста́рости ѡ҆ бога́тствѣ безстра́стїѧ: въ ю҆́ности собира́ємаѧ, въ ста́рости и҆знемо́гшыѧ пита́ютъ и҆ ѹ҆тѣша́ютъ. Трꙋди́мсѧ ю҆́нїи съ горѣ̑нїемъ, потецы́мъ тре́звеннѣ, сме́рть бо безвѣ̑стна є҆́сть. Лꙋка̑вы вои́стиннꙋ и҆ лю̑ты, лсти̑вы, проны̑рливы, въ рꙋка́хъ ѻ҆́гнь держа́щѧ, и҆ хра́мъ бж҃їй пожещѝ жела́ющѧ пла́менемъ сꙋ́щимъ въ не́мъ, си̑лны и҆ безсѡ́нны, невеще́ственны, (и҆) неви̑димы врагѝ и҆́мамы. Никто́же ю҆́нъ сы́й врагѝ своѧ̑ бѣ̑сы да прїи́метъ глаго́лющѧ: да не и҆знꙋри́ши пло́ти твоеѧ̀, да не въ недꙋ́ги и҆ не́мѡщи впаде́ши: є҆два́ бо въ настоѧ́щемъ наипа́че ро́дѣ ѡ҆брѧ́щетсѧ ѹ҆мертви́ти тꙋ̀ произво́ливый: а҆́ще бы и҆ мно́гихъ и҆ ѹ҆слажда́ющихъ бра́шенъ себѐ лиши́лъ: ра́зꙋмъ же сїѐ бѣ̑сови є҆́сть, (и҆) са́мый на́шъ ѻ҆́нъ въ по́прище сїѐ вхо́дъ, сла́бъ и҆ ѹ҆ны́лъ сотвори́ти: и҆ коне́цъ про́чее нача́лꙋ прили́ченъ.

к҃є. Пре́жде всѣ̑хъ сїѐ и҆ взы́щꙋтъ и҆ сотворѧ́тъ, и҆́же хрⷭ҇тꙋ̀ вои́стиннꙋ порабо́тати хотѧ́щїи, да и҆ мѣста̀, и҆ ѡ҆́бразы, и҆ сѣда̑лища и҆ ѡ҆бꙋчє́нїѧ, дх҃о́вными ѻ҆ц҃ы̀, и҆ свои́мъ ѹ҆разꙋмѣ̑нїемъ, прили́чєствꙋющаѧ себѣ̀ и҆зберꙋ́тъ: не бо всѣ̑хъ ѻ҆бщежи̑тїѧ за сластолюби́вость: нижѐ всѣ̑хъ безмѡ́лвища, за ꙗ҆́ростивость: кі́йждо же разсмотри́тъ въ ко́емъ ѹ҆ка́чествовасѧ.

к҃ѕ. Въ трїе́хъ собо́рнѣйшихъ ѹ҆строе́нїихъ сѣда́лищъ всѐ мона́шеское жи́телство ѡ҆бдержи́тсѧ: и҆лѝ въ подви́жничестѣ ѿше́лствѣ и҆ ѹ҆едине́нїи: и҆лѝ со є҆ди́нѣмъ, и҆лѝ мно́гѡ двѣма̀ безмо́лвствовати: и҆лѝ во ѻ҆бщежи́тїи терпѣли́вѡ сѣдѣ̑ти. Да не ѹ҆клонѧ́ешисѧ, гл҃етъ є҆кклисїа́стъ, на де́сно, и҆лѝ на шꙋ́е (приⷮ. д҃, к҃з): но пꙋте́мъ црⷭ҇кимъ да по́йдеши (чи́сл. к҃, з҃і): сре́днїй бо и҆з̾ пред-рече́нныхъ мнѡ́зѣмъ прили́ченъ бы́сть. занѐ є҆ди́номꙋ ѹ҆̀бо го́ре, гл҃етъ, ꙗ҆́кѡ а҆́ще паде́тъ во ѹ҆ны́нїе, и҆лѝ со́нъ, и҆лѝ лѣ̑ность, и҆лѝ ѿча́ѧнїе, то̀ нѣ̑сть воздвиза́ѧй є҆го̀ въ чл҃вѣ̑цѣхъ (є҆ккл. д҃, і҃). А҆ и҆дѣ̑же сꙋ́ть со́брани два̀ и҆лѝ трїѐ во и҆́мѧ моѐ, тꙋ̀ є҆́смь посредѣ̀ и҆́хъ (маⷮ. и҃і, к҃), гдⷭ҇ь речѐ.

к҃з. Кі́й ѹ҆́бѡ є҆́сть вѣ̑рный ѻ҆́нъ и҆ мꙋ́дрый мона́хъ и҆́же горѧ́честь свою̀ сохрани́лъ є҆́сть неꙋгаша́емꙋ: и҆ да́же до и҆схо́да своегѡ̀ на всѧ́къ де́нь прилага́ѧ ѻ҆́гнь ко ѻ҆гню̀, и҆ горѧ́честь къ горѧ́чести, и҆ тща́нїе ко тща́нїю, и҆ жела́нїе къ жела́нїю, не преста̀.

Пе́рвое восхожде́нїе є҆́сть. Возстꙋпи́вый да не ѡ҆брати́шисѧ вспѧ́ть.