Если чтения отсутствуют - значит, по данному дню еще не были добавлены тексты.
По полиелее:
Чтутся седальны по обычаю.Све́тло ми сие́ церко́вное позо́рище, не смех бо челове́ком твори́ти су́етен, но ве́лии неприя́зни плачь. Зрит бо выспрь иду́щи ни́жним ме́ртвым воскре́снаго ко́рения. Ви́дит пре́данаго ни́зу Кресто́м, от небе́с Нань зря́ща. Ви́дит зе́млю испо́лнь а́нгел. Ви́дит кроме́ обы́чая на не́бо челове́ческую плоть восходя́щу. Ви́дит небе́сныя си́лы срета́юща И́. О́ви убо глаго́люща: возми́те врата́ кня́зи ва́ши, и да вни́дет Царь сла́вы. О́ви же па́ки срета́юще, и отпева́юще глаго́лаху: Госпо́дь кре́пок и си́лен, Госпо́дь си́лен во брани́. В кое́й брани́; не ю́же ли по нас на о́бщаго врага́ воздви́же. Ни от проро́к ни от пра́ведник воздви́гну кто, наси́льствовани бо вси бя́ху от ца́рствия сме́ртнаго. До́ндеже прии́де Царь веко́в. И связа́в кре́пкаго, плени́ сосу́ды его́. Распя́ту быва́ющу Го́споду, небе́сныя си́лы диви́шася, а тварь вся кла́няшеся, ви́дящи но́вую та́йну, и стра́шное чу́до быва́ющее на земли́. Трепета́ше земля́, подви́жеся мо́ре, волня́шеся бе́здна, вся тварь смяте́ся. Убоя́шася свети́ла небе́сная, побеже́ со́лнце и луна́, и зве́зды исче́знуша. День той не стерпе́ а́нгел, изы́де смуще́н от це́ркве, раздра́вшися опо́не церко́вней. Тма испо́лни зе́млю, а день измени́ся, не терпя́ху бо ви́дяще своего́ Го́спода и Творца́ ви́сяща на дре́ве. Тогда́ ад разори́ся, и врата́ его́ сокруши́шася, и вереи́ его́ сломи́шася. О ни́хже Дави́д проро́чествуя глаго́лаше: я́ко сокруши́л еси́ врата́ ме́дная, и вереи́ желе́зныя сломи́. Тогда́ паде́ ца́рьствующая смерть под нога́ма Христо́выма, и влеко́ма я́ко пле́нница облича́шеся. Непобеди́мый бо телесе́м победи́в си́лу вра́жию, и лесть его́ сокруши́. Вскочи́ в ца́рьствия а́дская, и престо́л его разруши́; Вене́ц же све́рже, хоруго́вь разори́, держи́маго пусти́, мучи́теля попра́́, глас пусти глаго́ля: прииди́те оте́чествия язы́к ко Отцу́ и Бо́гу. Прииди́те и приими́те свобо́ду от рабо́ты, извожду́ бо вы от рабо́ты в свобо́ду, от тмы в свет, от му́ки в Ца́рьство при́сно живо́тное. Вам благовеща́ю Аз Иису́с Христо́с, у́же бо ктому́ не бо́йтеся мучи́теля, но не ради́те о стра́се, ни о сме́рти, ни о алкоте́, ни о ско́рби, ни о у́зах, ни о темни́це, ни о вся́цей тузе́, сих бо да боя́тся мучи́телевы во́ини, и́же разори́шася. Аз от всех Еди́н есмь победи́тель Царь, пострада́вый по вас пло́тию. Сей у́бо есть вои́стину кре́пок и си́лен Госпо́дь. Сей есть си́лен во бране́х. Сей есть Царь Сла́вы, изводя́ окова́нныя му́жеством, живу́щыя во гробе́х. К Нему́же глаго́лаше па́ки Дави́д: вшел еси́ на высоту́, плени́л еси́ плен. Те́мже всяк у́бо пра́здник христиа́неск, неприя́зни есть осужде́ние па́че. О всех бо сей ине́х свою́ явль зло́бу, и ничто́же не возмо́г, себе́ обличи́л есть. Я́коже се в при́тчу глаго́лю: Де́ве ди́вное и стра́нно рождество́, в любодея́ние хуло́ю прославля́ше, неизрече́нно прижи́вшую, и о де́встве ропта́ше. Оклеветова́ше же млеко́ Ссу́щаго, Пита́ющаго вся́ку вещь; Младе́нцы же изби́ти И́рода научи́, непщу́я в тех уби́ти Необдержи́маго. На креще́ние же тща́щуся Ему́, на иску́шение возво́дит Его́. Стяза́ющуся у́бо со иуде́и, хуле́нию словеса́ Нань глаго́лати сотвори́. Чудеса́ же творя́щу Ему́, ка́мение мета́ти Нань сотвори́л есть. Уби́йцу и разбо́йника пра́веднейша сотвори́. Распя́ту бы́вшу, разбо́йника с ним распя́т. Погребе́ну бы́вшу, гроб запечатле́, воскре́сшу животу́, оклеветова́ет Воскресе́ние. Восходя́щу Ему́ на не́бо, не и́мать что глаго́лати, но главо́ю уязви́ся. Те́мже вся́каго пра́здника сей есть горе́е ему́ бысть, ви́дящу вся а́нгельския во́я ликоству́юща, и о́вы во след иду́ща, о́вы же предтеку́ща. А други́я па́ки ли́ку апо́льстольску глаго́люща: Му́жие галиле́йстии, что стоите́, зря́ще на не́бо; се Иису́с, вознесы́йся на не́бо от вас, та́кожде прии́дет па́ки, я́коже ви́десте Его́ иду́ща на не́бо. Сей Иису́с, сотвори́вый мно́жество чуде́с. Сей у́бо день Госпо́дьскаго восхо́да, неприя́зни пла́катися сотвори́л есть, я́коже и пре́жде ре́хом, а ве́рным освяти́тися. Ны́не бо кра́сная весна́ возсия́ла есть, и цветны́я израсли́ суть ле́тныя ви́нныя кра́сныя ле́торасли. Плод дре́ва ма́слична процвете́ смоко́вница, и оре́си ли́ствие и ря́су яви́ша. Изни́кну вся́ка вещь, ю́гу ча́сто ве́ющу, красоте́ волна́м подо́бящися морски́м. Вся́ческая восхо́дом Госпо́дьским с на́ми све́тлятся. Прииди́те у́бо, да и аз о вас дави́дския воспою́ глаго́лы, я́же ны́не нам за возноше́ние Госпо́дне вопия́ше: вси язы́цы восплещи́те рука́ми, и воскли́кните Бо́гу гла́сом ра́дости, я́ко взы́де Бог в воскликнове́нии, и Госпо́дь во гла́се тру́бне. Взы́де иде́же бе, вознесе́ся отню́дуже не разлучи́ся. Сше́дый у́бо, той есть и возше́дый превы́ше всех небе́с. Не ин ете́р я́влься проро́ком, и ин со апо́столы пожи́в. Не ин в не́дрех О́тчих, и ин при понти́йстем Пила́те суди́м. Не ин на Кресте́ гвоздьми́ пригвожде́н, а ин на херуви́ме седя́. Не ин от Ио́сифа плащани́цею обви́т быв, и ин дла́нию, тварь обдержа́. Не ин во гро́бе положе́н, а ин от серафи́м пе́ние прие́мля. Но той Сам со Отце́м седя́й, вопло́щься без се́мене от ложе́сн Деви́ческих. Взы́де Бог в воскликнове́нии, и Госпо́дь во гла́се тру́бнем. Творе́ц веко́в, сотвори́вый от небыти́я в бытие́ вся́ческая. И Зижди́тель ада́мов, челове́ческаго ро́да соста́вил. Преста́вль и уго́дника Своего́ Ено́ха на ме́сто живо́тное, сохра́нь и Но́я от пото́па всего́ ми́ра. Призва́вый патриа́рха Авраа́ма от земли́ халде́йския, и образова́вый пре́жде о Исаа́це кре́стную та́йну. Да́вый Иа́кову плод двоенадеся́тный, да́вый терпе́ние И́овови. Поставле́й воево́ду Моисе́я лю́дем, испо́лнивый Саму́ила от ложе́сн проро́чества. Поимы́й Дави́да от ове́ц на ца́рьство, да́вый соломо́ну прему́дрость. Восхи́щь Илию́ ви́хром на колесни́це о́гненней, вдохну́вый прозре́ние проро́ком. Да́вый апо́столом дар исцеле́ния, реки́й тем: Аз победи́х мир. Сей есть Госпо́дь Сла́вы, вше́дый на не́бо в восклица́нии. И се́де оде́сную Отца́, повину́вшымся Ему́ а́нгелом, влады́чествиям и си́лам. Той духо́вныя ва́ша моли́твы да прии́мет, и побе́дники вы да яви́т напа́стем ми́ра. Да покори́т же вам весь полк нечи́стых духо́в, сокруши́в неприя́знь под нога́ми ва́шими. Глаго́ля ко всем: се дах вам власть наступа́ти на змии́ и на скорпи́и без па́кости, и неврежде́ны, це́лы, и непоро́чны, и здра́вы, и соверше́ны. Да сохрани́т вы ду́хом, и душе́ю и те́лом, к исполне́нию плоды́ все́ми пра́ведными, Бог сподобле́й ны собра́тися, и спаси́тельный сей пра́здник сконча́ти. Я́ко То́му есть сла́ва во ве́ки веко́в. Ами́нь.
По третьей песни:
Чтутся седальны по обычаю.Весели́теся небеса́, и ра́дуйся земле́, поне́же посре́днюю сте́ну прегра́да разгради́в Иису́с, я́коже Па́вел глаго́лет. Вражду́ я́же бе ме́жду Бо́гом и челове́ком. Естество́м и мир сотвори́в, совокупи́ вы́спренняя с до́льними. Да сего́ ра́ди и мы убо́зии глаго́лем: днесь бо верх и нача́ток на́шея пло́ти, на не́бо Христо́с вознесе́. Зане́же апо́стол глаго́лет: возста́ви с собо́ю, и посади́ ны с небе́сными о Христе́ Иису́се, отню́дуже испе́рва злы́и греху́ обре́тельник дия́вол, дме́ния де́льма оби́диваго, и презо́риваго велича́ния, спаде́. Те́мже вели́ким свои́м человеколю́бием, и́же бе того́ пре́лестию из рая́ изгна́н челове́к, того́ же Христо́с во о́ного ме́сто введе́. Да сего́ ра́ди вся́кия че́сти досто́ин есть пра́здник сей вели́кий, и вся́коя ра́дости духо́вныя. Есть у́бо дру́зи, о дне́шнем дни́, реку́ же о возше́ствии Христо́ве на не́бо, по́весть си́цева. Дави́д о нем глаго́лет, пе́рвое о схо́де реки́й: и прекло́нь небеса́ и сни́де, и примра́к под нога́ма его. А о дне́шнем восхо́де рече́: взы́де на херуви́м, и воспре́ти крилы́ ве́треными. На херуви́м же рече́, и́мже сам сей на небесе́х со Отце́м сый, херуви́м престо́л име́яше. И с челове́ки же по земли́ ходя́, херуви́мскаго и небе́снаго престо́ла ника́коже себе́ не отлуча́ше. Крила́ же ве́треняя о́блаки мени́т, и́миже восхи́тися. Я́коже и в дея́ниих апо́стольских пи́шется: и о́блак подъя́т И́ от о́чию их. Та́че содержа́ глаго́лет: и я́ко зря́ще бя́ху на не́бо иду́щу Ему́, чу́до и у́жас апо́столом прибы́сть. Сме́ртни бо естество́м су́ще, и не обы́кше та́цех ви́дов, ужасо́шася умо́м. Но а́ще и рече́т не́кто, я́ко и пре́жде ви́дели бе́ша преображе́ние, Петр и Иа́ков и Иоа́нн. Ви́деша пра́во ти́и преобрази́вшагося Го́спода, и о́блака осени́вшаго И́. Но не ви́деша о́блака, на возду́х восхи́тивша И́, ни на небеса́ подъи́мшаго Влады́ку. Чу́до и то, ди́во же и се, но чу́до чу́да горде́е. Сие́ о́ного вы́ше есть, а́ще и того́ же Бо́га си́ла и та́йна бе́яше. Тогда́ Моисе́й и Илия́ яви́стася Петро́ви ча́ди, с Бо́гом бесе́дующая. А ны́не престо́л херуви́меск, ре́кше неви́димая си́ла, о́блак покрыва́ющи, внеза́пу приста́вши, Влады́ку с рабы́ бесе́дующа восхити́. Тогда́ Петр дерза́я, глаго́лаше: Го́споди, добро́ есть нам зде бы́ти. Сотвори́м зде три жили́ща: Тебе́ еди́но, и Моисе́ю еди́но, и Илии́ еди́но. А ны́не ли словеса́ рещи́ ученицы́ мого́ша, ни уст отве́рсти свои́х, но стра́хом вели́ким ужасо́шася и убоя́шася. Глаго́лет писа́ние о том, реки́й: се му́жа два ста́ста во оде́жди бе́ле, я́же и ре́ста: му́жие галиле́йстии, что стоите́, зря́ще на не́бо; вели́кое ли вы чу́до преужаси́ло есть. Забы́ли ли есте́ ре́кшаго: иду́ ко Отцу́ Моему́, и Отцу́ ва́шему. И того́ ли ра́ди глаго́лаше к вам: не оста́влю вас си́ры. И па́ки: мир мой даю́ вам, мир свой оставля́ю вам. Не обеща́ ли вам Ду́ха Свята́го посла́ти. Сей Иису́с, возше́дый от вас на небо́, та́ко прии́дет о́блаки небе́сными со сла́вою и си́лою мно́гою. Сей прии́дет в год, егда́ бу́дет суди́ти ми́ру пра́вдою. Сему́ даст Оте́ц суд весь. Не по́мните ли, я́ко Сый с вами глаго́лаше: дана́ ми есть вся́ка власть на небеси́ и на земли́. Тогда́ апо́столи в себе́ бы́вше, обрати́шася пою́ще и благословя́ще Бо́га, жду́ще боже́ственных даро́в, и́же есть Пресвята́го Ду́ха прихо́д. И сконча́ся Дави́дом глаго́лемое: взы́де Бог воскликнове́нием, Госпо́дь гла́сом тру́бным. Воскликнове́ние же мени́т, и́мже безпреме́нным гла́сом Тресвяту́ю хвалу́ воспущаю́т херуви́ми Бо́гу. А глас тру́бный, арха́нгельский мени́т, пре́жде назнамену́я Его́ восхо́д на не́бо. Но и Святы́й Дух го́рним си́лам повеле́нием глаго́лаше: возме́те врата́ кня́зи ва́ши, и отъи́метеся врата́ ве́чная, и вни́дет Царь Сла́ве. А си́лы глаго́лаху, та́че дух суть: Госпо́дь кре́пок и си́лен, Госпо́дь си́лен на́ брани. Победи́ бо ра́тника, вооружи́вся челове́ческою пло́тию на сатану́ и мучи́теля, угаси́ бо ему́ ражже́ное ору́жие. И на Кресте́ распя́т, и сме́рти вкуси́в, победи́ а́да и одоле́. Возста́в из ме́ртвых, и заблу́ждьшая овча́та обрати́в. Се у́бо восхо́дит, на плещу́ несы́й к девяти́десяти и девяти́м, я́же не бе́ша заблуди́ли, но горе́ живу́т на небеси́. Госпо́дь кре́пок и си́лен, Госпо́дь си́лен во́ брани. И па́ки глаго́лет си́лам, Сей есть Царь Сла́ве. И си́лы я́ко слы́шаша, Госпо́дь си́лам, единогла́сие и обы́чное славосло́вие вопию́ще, прие́мляху Го́спода, и провожда́ху до Вы́шняго Превысо́каго Престо́ла. И сконча́ся Дави́дом глаго́ланное: рече́ Госпо́дь Го́сподеви Моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма. О супоста́те, к ко́ему естеству́ рече́: седи́ одесну́ю Мене́; не ему́же ли, от нас прия́ти плоть одушевле́нную, реку́ же, от Пречи́стыя Мари́и. Да поне́же на́ша плоть на Престо́ле высо́цем днесь се́де, того́ ра́ди ра́дуемся бра́тие. Днесь бо Единоро́дный Сын Бо́жий, нача́ло пло́ти на́шея, ю́же прия́т от нас, ко Отцу́ вознесе́. Днесь змий разсе́чен бысть. Днесь грех челове́ческ не помина́ется. Днесь Ада́м преслуша́нием из поро́ды изгна́ный, вторы́м Ада́мом не в земны́й рай, но в Ца́рство Небе́сное восхо́дит. И кто суть свиде́тельствующии Христо́ву Вознесе́нию; двана́десяте ученицы́. Или́ не ве́руеши жидови́не, не ве́руеши апо́столом Христо́вым, очесы́ свои́ми ви́девшым восходя́ща на небеса́ Го́спода. Не ве́руеши ли толи́цем свиде́телем, то и Моисе́ови не ве́руеши. Рече́ бо Моисе́й: пред усты́ двою́ или́ трех свиде́телей, да ста́нет всяк глагол. Ха́бленый жидови́не, Моисе́й три по́слухи досто́йны сотвори́ вся́цей ре́чи, а Лука́ четы́режды три свиде́теле досто́йно ве́рны пове́дает, тем ли не ве́руеши па́губниче и поги́бле. Да глаго́лет проро́к Иса́ия о тебе́, па́че же Бог Иса́иею: уве́дех, я́ко же́сток еси́ и ослушли́в, и жи́ла желе́зна вы́я твоя́, и чело́ ме́дяно. Не ве́руеши ли на́шым двана́десятим по́слухом, самови́дцем су́щым восхо́ду Госпо́дню. И́мже уста́ ти загради́т еди́н то́чию Дании́л проро́к. Ему́же а́ще и мно́гажды ся хо́щещи проти́вити, то не мо́жеши. То, что Дании́л глаго́лет, о возше́ствии Госпо́дни прорица́я, послу́шай ми: ви́дех, рече́, и се со о́блаки небе́сными, я́коже Сын Челове́чь восходя́, ре́кше гряды́й. Подо́бен бо есть и вторы́й Ему́ прихо́д к пе́рвому восхо́ду. Я́ко и дея́ния апо́стольская назнамену́ют, реку́ще: и я́ко зря́ще бе́ша апо́столи, гряду́щу Го́споду на не́бо, се му́жа два ста́ста пред ни́ми во оде́жди бе́ле, я́коже и реко́ста: му́жие галиле́йстии, что стоите́, зря́ще на не́бо; се Иису́с, возше́дый от вас на не́бо, та́кожде прии́дет, я́коже ви́десте Его́ иду́ща на не́бо. Смотри́ зело́ бра́те, ка́ко ти поставля́ет проро́к я́ве ипоста́сь. Се же рече́: на о́блацех небе́сных, я́ко Сын Челове́чь гряды́й, и до ве́тхаго дне дости́же, и та́ко бысть коне́ц проро́честву. Разуме́й ми, тому́, рече́, да́стся власть и честь. Не бо, но я́ко присносу́щному со Отце́м. Бог сло́во у́бо, честь ту и держа́ву и́мать при́сно со Отце́м. Но и́же от Мари́и Де́вы соеди́нься одушевле́нною пло́тию, ре́кше те́ло видо́му, восходя́щему днесь о́блаком на не́бо. Чу́ден, Бог бо есть, и Челове́к соверше́н. Сему́ ся даст власть и честь и Ца́рство, по пло́тному смотре́нию. И вси лю́дие, племена́ и язы́цы рабо́тати Ему́ и́мут. И́мже и власть Его́, власть честна́, я́же не пре́йдет, ни поги́бнет, и Ца́рство Его́ ине́м лю́дем не оста́вится. Срамля́йтеся жи́дове, проро́ки почита́юще, о Не́мже суть прорица́ли, глаго́люще. Христа́ Того́ не хотя́ще уве́дети, Его́же мы убо́зии уве́девше, кла́няемся. О чудеса́ пристра́нная, и́мже и рай ся заключи́, то тем не́бо ся днесь отве́рзе. Ему́же Пила́т суди́, Той днесь на небеси́ Судие́ю седа́ет. Ему́же ся жи́дове руга́ша, Того́ а́нгельския си́лы сла́вят. О пречи́стый у́ме Дави́дов, и́мже сего́ до зря глаго́лаше, реки́й: рече́ Госпо́дь Го́сподеви Моему́, седи́ одесну́ю Мене́. И́маже сла́ва, честь и держа́ва, с Пресвяты́м и Животворя́щим Ду́хом, ны́не и при́сно и во ве́ки веко́в. Ами́нь.
По шестой песни:
И поется кондак и икос (или мученичен, аще несть).Стихи́:
Одесну́ю се́л еси́ Отца́ Сло́ве:
Ве́ру ученико́м изве́стншую показа́вый.
В то́йже де́нь, в четверто́к шесты́я неде́ли по Па́сце, Вознесе́ние пра́зднуем Го́спода Бо́га и Спа́са на́шего Иису́са Христа́. Поне́же бо со ученики́ пре́жде стра́сти пребыва́я, Всесвята́го Ду́ха обеща́ прише́ствие, ре́к: поле́зно е́сть, да Аз иду́: а́ще бо Аз не иду́, Уте́шитель не прии́дет. И па́ки: егда́ же прии́дет Он, научи́т ва́с на всю́ и́стину. По воскресе́нии же из ме́ртвых, во дне́х четы́редесятих явля́яся и́м, не вку́пе, но особопребыва́нием яды́й с ни́ми и пия́, изве́стнейшее воскресе́ние представля́я. Коне́чнее мно́га о Ца́рствии Бо́жии обетова́в, запове́даше си́м от Иерусали́ма не отлуча́тися, но та́мо пребыва́ти, Пресвята́го Ду́ха прише́ствия жда́ти, и Те́м креща́емым: водо́ю бо бя́ше и еди́ною пре́жде креще́ние от Иоа́нна, а́ще и по́слежде Епифа́ний Ки́прский повествова́: я́ко Богосло́в у́бо Иоа́нн Богоро́дицу крести́, Пе́тр же и то́й и про́чыя апо́столы. Запове́да же и́м пребыва́ти во Иерусали́ме, да та́мо пре́жде про́поведь Ева́нглиа извести́тся, да не ка́ко в чужда́я отше́дше места́, удо́бно обо́лгани бу́дут, и я́ко до́лжно бя́ше, я́ко во́ином не́ким отсю́ду угото́витися ору́жием Ду́ха, и та́ко на бра́нь поити́ вра́г Христо́вых. Но поне́же вре́мя наста́ Вознесе́ния, возво́дит у́бо и́х на го́ру Елео́нскую: нарица́ется же си́це, зане́ мно́жайшими ма́слинами насажде́на бе́. И глаго́лав и́м о е́же в конце́ сего́ пропове́дания: еще́ же и о непостижи́мом Свое́м Ца́рствии в бу́дущем, поне́же и о́нех не искуша́ти Его́ хотя́щих зря́ще, су́щей та́мо и Пречи́стей Его́ Ма́тери, приставля́ет а́нгелы и́м, на небеса́ восхожде́ние показу́ющыя. И зря́щым у́бо взя́тся от среды́ и́х, о́блаку О́наго подъи́мшу, и та́ко от а́нгел предсыла́емь, повелева́ющих дру́г дру́гу небе́сных двере́й взя́тие, и дивя́щихся е́же от крове́й пло́ти Его́ червле́нному, взы́де и се́де одесну́ю Отца́, обожи́в пло́ть и дерзну́ глаго́лати, сотвори́в сию́ ку́пно боже́ственную, е́юже мы́ примири́хомся, дре́вней вражде́ разруши́вшейся. Апо́столом у́бо а́нгели в ви́де муже́й предста́ша глаго́люще: му́жие галиле́йстии, что́ стоите́ дивя́щеся, и на не́бо взира́юще? Се́й Его́же ви́дите с пло́тию Бо́га Иису́са, Се́й прии́дет па́ки с пло́тию я́ве: оба́че не я́коже пе́рвее, убо́зе же и молчали́вне, но со сла́вою вели́кою, я́коже ны́не зрите́ от а́нгел провожда́ема. Тогда́ апо́столи е́же взира́ти оста́вльше, возврати́шася от горы́ Елео́н: бли́з же сия́ е́сть от Иерусали́ма две́ ты́сящи и четы́редесять ножны́х сто́п, разстоя́щи е́й: се́ бо е́сть суббо́те пу́ть. Си́це же узако́нено бы́сть Моисе́ем на толи́ко сто́п в суббо́ту ходи́ти, зане́же и се́нь свиде́ния, толи́цеми стопа́ми но́гу бя́ше отстоя́щи от иуде́йскаго полка́. Возмо́жно бо бе́ не́ким та́мо в суббо́ту ходи́ти поклони́тися, и не вя́щшее ше́ствие протяза́ти, сего́ ра́ди нарече́ся и суббо́ты пу́ть. Мни́тся же не́ким отсю́ду, я́ко и Христо́во Вознесе́ние в суббо́ту бы́сть, оба́че погреши́ша. Возвра́щшеся же апо́столи внидо́ша в го́рницу, в не́йже бе́ша соше́дшеся с мироно́сицами жена́ми, и Ма́терию Сло́ва, посто́м и моли́твами, и моле́нием упражня́ющеся, и наше́ствия Всесвята́го Ду́ха ожида́юще, я́коже бе́ обеща́ние. Вознесы́йся во сла́ве Христе́ Бо́же, поми́луй на́с. Ами́нь.