По шестой песни:
И поется кондак и икос (или мученичен, аще несть).Стихи́:
Бие́нием у́мер Влады́ки своего́ де́ля,
Благоу́мен врачь яви́ся Ферапо́нт:
В два́десять седмы́й бие́н быв вельми́ Ферапо́нт.
Ферапо́нт Христо́в му́ченик, святи́тель бе Сарди́йския святы́я це́ркве. Уче́нием свои́м мно́ги обрати́в и крести́. Ят же бысть Иулиа́ном кня́зем, и свя́зана затвори́ша и́ в темни́це. Посе́м из темни́цы изведе́н бысть. И прише́дше в Сунао́н, и близ реки́ пове́ргше его́ во́и в знак и развяза́ша и́ к четыре́м коло́м по земли́, и бие́н бысть кре́пко, до́ньдеже обие́на бысть ко́жя его́ жезлы́. От кро́ве же его́ напи́вшися земли́, и прозябо́шя ко́лие в дре́во ве́лие зело́, е́же и до ны́нешняго дне явля́ется ли́ствено, и всяк неду́г исцеля́я, и вся́ку я́зю. И посе́м приведе́н бысть во Фраки́ю близ реки́ Е́рма под епи́скопиею Сатали́йскою, и во мно́ги вложе́н бысть муки. И за озлобле́ние муче́ния вене́ц прия́т, от страстополо́жника Христа́.
В то́йже день святы́й Али́пие ка́менем во главу́ усе́чен сконча́ся
Стихи́:
И́же во главу́ у́гольнаго ка́мене чтый,
Ка́менем глава́ Али́пию сокрушена́.
В то́йже день святы́й Евсе́вие огне́м сконча́ся
Стихи́:
Евсе́вий о́ту венца́ жа́ждущему,
Огня́ паля́щаго вмени́, я́ко и ро́су Аермо́нскую.
В то́йже день па́мять преподо́бного отца́ на́шего Кли́мента испове́дника и творца́ кано́ном. В то́йже день святу́ю му́ченику Серги́я и Ва́кха и́же в Руфи́нех, и па́мять святаго отца́ на́шего Стефа́на, патриа́рха Царя́ гра́да. И страсть святы́х Оли́мпия, и Неуви́та и Фоти́ма, и па́мять свята́го Евти́хия иже в Меле́тии, и свята́го му́ченика Филаре́та,
В то́йже день святу́ю му́ченику Феодо́ры и Диди́ма
Свята́я му́ченица Феодо́ра, бе в ле́та Диоклития́на царя́. Я́та же бы́вши и приведена́ ко Алекса́ндру иге́мону, и Христа́ испове́давши. И в блуди́лище ведена́ бысть, и не оскверне́на. Диди́м же христия́н сый вни́де к ней. Она́ же убоя́вшися во у́гол хра́мины бежа́. Он же дерза́ти ей повеле́, и ничто́же помышля́ти и́хже бои́тся. И возложи́ на ню во и́ньскую оде́жу, и повеле́ ей изле́сти из хра́мины. Сам же в той оде́жи же́ньстей ся́де в нея́ ме́сто гла́вным вя́слом уви́вся. Вше́дшу же не́коему блуднику́, в же́ньсте о́бразе му́жа разуме́, и шед иге́мону испове́да, и а́бие приведе́н бысть святы́й, и усе́кнуша главу́ его́. Посе́м я́та бысть свята́я Феодо́ра, и мече́м в главу́ усече́на бысть, и вверго́ша те́ло ея́ во огнь.
В то́йже день сло́во Иоа́нна Златоу́стаго о е́млющих ри́зы на сирота́х
Доко́ле не насы́тистеся собира́юще огнь на своя́ главы́ лихои́мцы. Я́же бо святи́и апо́столи кни́гами отверго́ша, то́же лихои́мцы с похвало́ю творя́т. Преде́л непови́нных преступи́ша, и волы́ вдови́ц в зало́г поя́ша. Немощны́я соврати́ша с пути́ пра́ваго. Лю́те вам собира́ющии зла́я, боле́знь пожнете́. От ду́ха гне́ва Госпо́дня без ве́сти бу́дете, и несть ме́ста где скры́тися творя́щим беззако́ние. Вотще́ и всу́е трудя́тся беру́щии бога́тьство, от него́же не бу́дет по́мощи им не уме́ющим жи́ти в нем. Мно́ги бо немощны́х до́мы разруши́ша, тем и несть им спасе́ния име́нием. И егда́ наде́ются жи́ти, внеза́пу кончи́ною уга́снут, и вся беда́ на́йдет на ня. И восприи́мут по дело́м свои́м, зане́ оде́жи со убо́гих совлеко́ша, ни воды́ жа́ждущих напои́ша, ни а́лчущему да́ша укру́ха хле́ба. Вдо́вы отпусти́шя тщя, и сироты́ озло́биша. Те́мже обы́дут я се́ти, рать и нестрое́ние, да сокруши́тся всяк непра́ведный. И го́ре непра́ведному и па́губа, я́ко лице́ Госпо́дне на творя́щыя беззако́ние. И потреби́т Госпо́дь от земли́ па́мять их.
В то́йже день сло́во о свяще́нницех
До́лжно у́бо есть иере́ю си́це о лю́дех промышля́ти: пе́рвое моли́тву твори́ти все́ю душе́ю за лю́ди, та́же от сме́рти заступа́ти, и в напа́стех ду́шу свою́ полага́ти за ста́до Христо́во. И па́ки до́лжно иере́ю бе́дным помога́ти, скорбя́щыя утеша́ти от печа́ли, и гне́ва не держа́ти. А́щеже иере́й гнев держи́т, то по вся дни согреша́ет. Гневодержа́тельнаго бо душа́ николи́же чи́ста приноше́ния Бо́гови прино́сит, зло́бе су́щи в се́рдце его́. Да а́ще не смири́тся с бли́жним, ни отжене́т зло́бу свою́, да не приступи́т к олтарю́. Помяни́, что ти повеле́ Госпо́дь глаго́ля: «А́ще принесе́ши дар свой к олтарю́, и ту помяне́ши я́ко и́мать брат твой не́что на тя, иди́ пе́рвое смири́ся с бра́том свои́м, и тогда́ принеси́ дар твой». И не ослу́шайся повеле́ния Госпо́дня, да не осужде́н бу́деши. Не поучи́ся льстем. Ни еди́наго возвы́си, ни друга́го низложи́. Ни почти́ бога́таго за вы́ше седе́ние, ни пре́зри убо́гаго не иму́щаго ти даро́в, но ра́вно я́ име́й. Клеветы́ же не ско́ро прие́мли, и люде́й не суди́ слы́шанием. Мно́зи бо за́вистию непра́вдою клеве́щут. А́ще ли уве́си со мно́гим испыта́нием согреши́вшаго, не обличи́ его́ пре́до все́ми, доне́леже вре́мя ему́ пода́си. Ни срамля́йся никого́же. Дво́е есть зло: е́же пре́д все́ми облича́ти. Облича́еми бо греси́, на безсту́дие веду́т и на дру́га влага́ются. Ини́и же без ума́ ху́лими быва́ют, и на удивле́ние устремля́ются. Тако́в бо нрав сатани́н, поуща́ет челове́ки твори́ти зло. И егда́ сотвори́т еди́но зло, поуща́ет его́ и друго́е зло сотвори́ти. И егда́ сотвори́т смех, притворя́ет обличе́нию и хуле́нию. И мно́гия науча́ет клевета́ти, и быва́ет сам поусти́тель и клеветни́к, и облича́емаго неи́стовящася твори́т, и друга́го вельми́ срамля́ющася, и удавле́ние и утопле́ние приготовля́ет. И сих ра́ди ка́зней, до́лжно есть попу́ зело́ кро́тку бы́ти и о ста́де внима́ти, и со мно́гим испыта́нием спасе́ния их иска́ти. И егда́ обря́щет гре́шнаго, не а́бие изго́нит его́ из це́ркве, да не похи́тив его́ сатана́, своего́ сотвори́т челове́ка того́. Егда́ бо отлуче́н бу́дет иере́ом без разсмотре́ния, похи́тив его́ сатана́ и не отсту́пит от него́, до́ндеже им прия́т бу́дет. Не досто́ит бо иере́ови ча́сто отлуча́ти, или́ кля́ти кого́. Бо́гу на́шему сла́ва ны́не и при́сно и во ве́ки веко́в. Ами́нь.
В то́йже день пренесе́ние честны́х моще́й и́же во святы́х оте́ц н́аших трие́х святи́телей Киприа́на, Фо́тия, и Ио́ны Ки́евских, и всея́ Росси́и чудотво́рцев