Стихи́:

Глас вопия́ внутрь в земли́ сокрове́н,

Земли́ разсе́дшися, всем прослу́ся стра́нно:

В два́десять пя́тый Предте́чева глава́ обре́теся.

Си́це бысть обре́тение тре́тие Предоте́чевы главы́: Пе́рвое у́бо взят ю́ жена́ Хуза́ня от дворца́ Иродиа́дина. Ироди́я бо по усече́нии ея́ не даде́ главы́ святы́я к те́лу приложи́ти, но тай погребе́ ю́ в дому́ свое́м. И взе́мши ю́ жена́ Хуза́ня, погребе́ ю́ в горе́ Елео́нстей. Мно́гу же вре́мени мину́вшу, не́кто Иноке́нтий мних и́же бе купи́л село́ то, и хотя́ созда́ти це́рковь, обре́те во основа́нии сосу́д здан, в ней же Предте́чева глава́. И име́яше ю́ в че́сти вели́це, ви́дя от нея́ быва́ющая чудеса́. По уме́ртвии же его́ яви́ сам Иоа́нн двема́ мни́хома прише́дшима от Константи́ня гра́да поклони́тися гро́бу Госпо́дню во Иеросали́ме, рек и́ма: «Возми́та скуде́льник со главо́ю мое́ю и отъиди́та в путь свой». И сия́ взе́мша главу́, в путь свой идо́ста, нетве́рдо же ве́рующа. Посе́м яви́ся святы́й не́коему ко́рмчию иду́щу со мни́хома те́ма рече́: «Возьми от нею́ сосу́д со главо́ю мое́ю и утаи́ся». И си́й взем и утаи́вся, к до́му па́ки возврати́ся, и име́яше ю́ в че́сти. И по уме́ртвии его́ род его́ предаю́ще друг дру́гу, честь творя́ху ей. Последи́ же до́йде не́коего е́тера мни́ха презви́тера еретика́ же су́ща, и той не хотя́ше яви́ти сла́вы Бо́жия, и раскопа́в зе́млю загребе́ ю́ глубоко́. И обличи́вше е́ресь его́ изгна́ша. И посе́м не́кто христолюби́в ин мних, ви́дя по вся но́щи столп о́гнен, иде́же бе святы́й верх Предте́чев, и раскопа́в зе́млю, обре́те святу́ю главу́ Крести́телеву. И возвести́ царю́ Миха́йлу, и патриа́рху Игна́тию. И взе́мше ю́ положи́ша в це́ркви в Константи́не гра́де че́стно.

Стихи́:

В пя́тах желе́зы пронзе́н Келести́не,

Пя́ты зря́щего стерл еси́, наступи́вый зми́я.

Стихи́:

И Олвиа́ну его́же всебога́тное житие́,

Се сла́вне прие́мшему, и зва́ние, и пи́щу.

Стихи́:

Бо́жияго Сло́ва боже́ственаго Алфе́я уста́

Ров покры́й, того́ го́рькая уста́ отве́рзый.

Ферапо́нт священному́ченик, отку́ду бе и ко́ею роди́телю, или́ в ко́е ле́то рещи́ не и́мам, не су́щим ту памяту́хом и вре́мени мину́вшу. Но сей у́бо то́чию, я́ко мних бе пре́же. Та́же епи́скоп в Ки́пре, и я́ко страда́лческий по́двиг соверши́в, и Христо́ви приведе́н бысть кро́вию. И навы́кл бе преда́нием от роди́телю вся́кой хи́трости. И си бы́ша пе́рвое. Последи́ же срацы́ни восхоте́ша наити́ на Кипр. Яви́жеся святы́й понамарю́ своему́ глаго́ля, воста́ни вско́ре и взе́мши мо́щи моя́ неси́ в Константи́нь град, хотя́т бо врази́ Креста́ Христо́ва наити́ на о́стров сей, и ме́сто сие́ опусти́ти. И та́ко по повеле́нию свята́го и по извеще́нию пономаря́ пренесены́ бы́ша мо́щи его́, и положены́ в Коньстанти́не гра́де че́стно.

Пове́даше Пала́дий мних, прише́дшим нам к нему́: я́ко бе рече́ не́кто муж христолюби́в во Александри́и зело́: благогове́ин и ми́лостив, стра́нныя до́бре прие́мля. Име́яше же и жену́ смире́ну зело́ и постя́щуся по вся дни: име́яше же и дщерь шести́ лет. В еди́н же от дней христолю́бец он в Костанти́нь град отъи́де, бе бо купе́ц. Оста́вив же то́чию жену́ и де́тище, и еди́наго раба́ в дому́. Иду́щу же ему́ в кора́бль, глаго́ла ему́ жена́: «Кому́ поруча́еши ны, господи́не?». Глаго́ла ей муж: «Влады́чице на́шей Богоро́дице». Во еди́н же день я́ко седя́ше жена́ де́лающи свой поста́в, име́ющи де́тище свое́ у себе́. Раб же науче́н дия́волом, восхоте́ уби́ти жену́ и де́тище, взя́ти я́же име́яху, и бежа́ти. И взем нож в пова́рнице, и идя́ше в хра́мину иде́же бя́ше госпожа его. И пришедши же в двери тоя храмины идеже бяше госпожа́ его́, ят бысть неви́димо, и не можа́ше к хра́мине ни к пова́рнице ити́. И я́коже не еди́н час творя́ порева́я себе́, и нудя́ся да вни́дет, и не возмо́же. И нача́ зва́ти госпожу́ свою́ глаго́ля: «Прииди́ до мене́». Она́ же чудя́шеся я́ко посреде́ двере́й стои́т и зове́т ю́, глаго́ла ему́: «Ты прииди́ се́мо па́че», не ве́дущи госпожа́ я́ко неви́димо держи́мь есть. О́трок жа нача́ зва́ти и заклина́ти ю́, дабы́ пришла́ близ его́. Она́ же кля́тся не ити́ к нему́. Он же глаго́лаше к ней: «Пусти́ ми поне́ де́тище». Она́же и сего́ не сотвори́, ре́кши ему́: «А́ще хо́щеши, ты прииди́». Тогда́ о́трок ви́дев я́ко не мо́же ничто́же сотвори́ти, и уда́ри сам себе́ ноже́м, и заре́зася. Госпожа́ же его́ ви́девши е́же сотвори́ о́трок, и созва́ сосе́ды, и́же приидо́ша, и обрето́ша о́трока е́ле жи́ва су́ща. И уве́даша от него́ вся, и просла́виша Бо́га таково́е показа́вша чу́до, я́ко спасе́ ма́терь и ча́до ея́.