Стихи́:

От волну́емаго жития́ ма́ло не́како воздохну́в,

Те́шит Михаи́ла я́коже не́кий о́блак ле́гок:

В два́десять тре́тий Михаи́л востече́ от земли́.

Сей ангелоимени́тый Михаи́л, житие́м соверше́ным себе́ очи́стив. От ма́терних объя́тий бысть возложе́ние Бо́гу, и показа́ся свяще́нник Бо́га Вы́шняго, и от Него́ возмога́емь, богопроти́вных погаси́в языкобо́лий, и ерети́ческая уста́ загради́в, разверза́ющаяся на боже́ственая воображе́ния. Не терпя́ у́бо язы́ка его́ зверь злоимени́тый, я́ко боже́ственаго пото́ка, я́ко предстоя́щу ему́ пред суди́щем его́, не усумне́ся преще́ния ни о сла́ве умо́м, но свобо́дным гла́сом возопи́: «Пречи́стыя ико́ны чту и почита́ю Спа́са моего́ Иису́са Христа́, и Богоро́дицы Мари́и Ма́тере Его́ и покланя́юся тем. Твое́же повеле́ние не брегу́, и нивочто́же вменя́ю». Он же сра́ма испо́лнься, и я́ростию распа́лься. Свято́му же соблю́дшу е́же по о́бразу нескве́рнено и небла́знено. Показа́бося язы́к его́ трость духо́вная, по усмотре́нию зде́шнему поучи́в вся, и гони́мь от ме́ста до ме́ста. И претерпе́в изгна́ния и ско́рби мно́ги и го́рки, и в просте́ршую широту́ дости́же. И та́ко до́брое ше́ствие соверши́в, и сугу́бными венцы́ укра́шен, приложи́ся ко архиере́ом, я́ко и архиере́й: и к му́чеником я́ко му́ченик.

Стихи́:

Прии́м содруже́бника Ла́заря Крупи́чника,

Я́ко дре́вле прия́т трапе́зы крупи́цы.

Стихи́:

Ду́шу ны́не прино́сит, а не арома́ты Мария,

Твои́х пищь Спа́се благоуха́ние.

Стихи́:

Же́ртвы неповинова́ся и́долом принести́,

Помина́й Сало́на и же́ртва бу́ди Бо́гу.

Во́ин не́кий в сем гра́де на́шем от беды́ мо́ра одоле́н быв, и у́мре. Те́ло же его́ у́бо безду́шно лежа́ше. Вско́ре же па́ки душа́ возврати́ся в те́ло, и в себе́ прише́д я́же ви́де пове́даше, я́ко мно́зем се я́ве бы́ти. Глаго́лаше же си́це, я́ко мост бя́ше, под ним же те́мно зре́ние. Смрад же нестерпи́мь, и мгла исходя́щи о нем ви́дяшеся. Река́ же под ним теча́ше. Пред мосто́м же травницы́ зелену́ющеся бя́ху изря́днии, бы́лии благово́нными и цве́ты разли́чными украша́еми. Белооде́жных же муже́й со́нмища в них бы́ти ви́дяхуся. Толи́ко же уха́ние благово́ния в том ме́сте бе, я́ко и́же та́мо преходя́щым и живу́щым, от обоня́ния того́ благоух́ания насыща́тися. Та́мо оби́тели разли́чны вели́ка све́та испо́лнены. Дом же чу́дна благоле́пия та́мо созида́емь бе, и́же златы́ми у́тварьми ви́дяшеся зи́ждемь, чий же бе, уве́дети не возмо́же. И над бре́гом предрече́нныя ре́ки мно́ги оби́тели бя́ху. Но не́киим от них восходи́ злово́ние и мгла приближа́шеся. Не́киим же ника́коже. На предрече́ннем же мосте́ иску́с, и́же бо от непра́ведных по нему́ преити́ хотя́ше, в те́мную и злово́нную ре́ку низревае́мь впа́даше. Пра́ведницы же в ни́хже согреше́ния не бе, безпеча́льною и свобо́дною ного́ю по нему́ ми́мо хожда́ху. Та́мо у́бо Петра́ и́же церко́внаго при́чта бо́льшаго и́же пре́жде четы́рех лет уме́ршаго, стремгла́в ви́сяща в стра́шных ме́стех о́нех ви́дети глаго́лаше, ве́лиею тя́жестию желе́зною свя́зана. Вопроси́вшу же ему́: «Чесо́ ра́ди сей стра́ждет?». И сия́ слы́шати его́ глаго́лаше: «Я́же и мы све́мы и́же его́ в сем церко́внем до́му позна́хом, и того́ поми́наем дея́ния». Рече́ бо ся ему́ я́ко сего́ ра́ди сия́ стра́жет, поне́же а́ще ему́ согреше́ние да́ти кому́ я́звы повеля́шеся, мно́жае па́че от сурове́йшаго жела́ния, не́жели за послуша́ние дая́ше. Сия́же та́ко бы́ти вси позна́вшии его́ све́дят.

Рече́ а́вва Ду́ла, ученика́ а́ввы Висарио́на, я́ко вни́де к нему́ а́вва Ми́ло, и глаго́ла ему́ о́нсица и́же нам служа́ше у́мре. И мно́го до́бре и еще́ живу́щу устро́ив име́ние свое́, и се́ла своя́ в монастыри́ же́ньском оста́ви, име́ющем три́ста по́стниц. Сия́ слы́шав ста́рец, уда́ри в лице́ свое́ глаго́лаше, увы́ мне гре́шному, погуби́л есть мзду свою́. На́мже прекосло́вящим и глаго́лющим, я́ко мно́гу мзду па́че сотвори́л есть, помо́г по́стницам. И глаго́ла нам ста́рец, ве́руйте ми ча́да, я́ко аз се пострада́х. Ви́дех у́бо а́вву Гера́сима шед во Иерусали́м, и егда́ уви́дех о сме́рти его́, и ка́ко лев рыка́ше на гро́бе его́, я́коже умре́ти зве́рю верху́ гро́ба его́, уязви́хся се́рдцем, и воста́в расточи́х вся име́ния своя́. Оста́вив село́ еди́но по́стницам вели́каго хра́ма и́же во Александри́и, и шед пове́дах а́вве Иси́дору пилусио́тьскому, я́ко хощу́ рек Бо́жиим повеле́нием ми́ра отрещи́ся, и вся своя́ расточи́в, оста́вих село́ еди́но по́стниц ра́ди. И дае́т ми на нем августа́лий зла́та литр се́дьмдесят, дам ли е, или́ ни. И рече́ ми ста́рец, а́ще есть досто́йно седми́десяти, отда́й е за пятьдеся́т, и даждь зла́то по́стницам, и бу́дет мзда твоя́ соверше́на от Бо́га. А́ще ли село́ да́си им, во мно́га разслабле́ния и молвы́ внесе́ши их. Аз же преслу́шав ста́рца, и шед сотвори́х свиде́тельство, и дах им, и идо́х в скит. И по вре́мени ви́дех во сне, я́ко васнь в Вифлее́ме бех моля́ся, и яви́ся олта́рь. Све́та испо́лнь, и священнообра́зны му́жи пою́щя, и жену́ оболче́ну порфироно́сною оде́ждею, е́йже добро́ту невозмо́жно сказа́ти. Мне же убоя́вшуся, и хотя́щу от ме́ста отъити́, и изше́д еди́н, преще́нием гла́са и стра́шным возре́нием рече́ ми, рцы нам Евста́фие, ка́ко хо́щеши отвеща́й о по́стницах, поне́же сотвори́л еси́ их села́ ра́ди о́ного прогне́вати Го́спода Бо́га; И ны́не погублю́ тя а́ще не испра́виши е́же зле сотвори́л еси́. Глаго́ла же ми и порфироно́сная жена́, прия́хом у́бо изволе́ние твое́ ча́до, но обре́те от сего́ вину́ враг, и наве́тник душя́м дия́вол уязви́ их с душе́ю и телеса́. Еда́ ли не возмо́жно бя́ше промы́сленику душя́ми их Бо́гу, мно́жество зла́та да́ти им, но неполе́зно есть. И́бо отре́кшиися ми́ра Ца́рства ра́ди небе́снаго, трудо́м и по́двигом, и смиреному́дрством мно́гим до́лжни суть безмо́лвно рабо́тати Бо́гу. И руко́ю свое́ю показа́ ми, пре́же претя́щаго ми глаго́лющи, сей есть Иоа́нн Предте́ча, наста́вник и игу́мен и́нокиням. И хотя́щии с ним бы́ти, до́лжни суть житию́ его́ подо́битися. И глаго́ла ей Предте́ча, Влады́чице Ма́ти Госпо́дня, отсе́ле ни еди́ну потре́бу и́мам в монастыри́ о́ном, несть бо стра́ха Бо́жия в нем. Глаго́ла ему́ Пресвята́я Богоро́дица, зна́менай в се́рдце его́, да ве́рует я́ко и́стинна суть ви́денная им; И шед испра́вит о́нех, име́ет и Мене́ помога́ющу ему́. И зна́менавшу се́рдце мое́, а́бие приидо́х в себе́. И втой час поидо́х со тща́нием ко а́вве Иси́дору, и пове́дах ему́ о виде́нии. И пое́м его́ идо́хома к по́стницам. И призва́вше ста́рыя рехо́м им, что сотвори́м я́ко царе́в челове́к взя́ти село́ гряде́т, и сотвори́ти патриа́ршеско. Мы же царе́ву челове́ку не мо́жем проти́витися. И а́ще хо́щете пре́жде да́же не прии́дет он, продади́м е кня́зю и возми́те вы зла́то. И я́ко хо́щет он сотвори́т с царе́вым челове́ком. И глаго́лашя ему́ и́нокини, я́коже велите́ сотвори́м. И в той час шед прода́х е августа́лию за шестьдеся́т литр, свободи́в и четвероно́гая. И взем зла́то положи́х е пред же́ртвеником це́ркве по́стниц о́нех. И исше́дшым нам, рех ко а́вве Иси́дору, ви́де ли о́тче, ка́ко вма́ле поги́бнути име́х. Про́чее неподо́бно есть мзду твори́ти в жена́х. И отвеща́в ста́рец рече́ ми, не глаго́ли ча́до си́це, поне́же грех и́маши. И́стину у́бо реку́ ти, и́же име́ти твори́т в сих ми́лостыню, па́че хромы́х и слепы́х, мно́жайшу мзду и́мать. Поне́же сия́ немощны́я стра́нны суть, и Бо́га ра́ди ми́ра отреко́шяся. Изы́ти же я́коже и мы, проси́ти или́ прода́ти рукоде́лие свое́ не мо́гут, зане́ и себе́ погубля́ют и ине́х. Еди́но бо от обои́х случа́ется им, или́ уязви́ти, или́ уязви́тися. Сего́ ра́ди моги́й дая́ти Бо́га ра́ди сицевы́м, пшени́цу и со́чива и злати́ц, и оде́жду и во́лну, или́ лен, и не исходи́мы творя́ их, ве́лию мзду твори́т, и мно́го дерзнове́ние и́мать обрести́ пред Бо́гом. Монастырю́ же му́жеску или́ же́ньску, се́ла и скоты́ и волы́ дая́й, ничто́же и́но твори́т, ра́звее возвраща́ет их в мирско́е многоплете́нное мре́жие, и не оставля́ет их безмо́лвно рабо́тати Бо́гу.

Сей бе от еде́сскаго гра́да, благове́рну роди́телю сын. Роди́телема же его́ уме́ршима. Миха́ил же раздая́ име́ние свое́ ни́щим, и отъи́де во Иеросали́м поклони́тися святы́м ме́стом. И отъи́де в монасты́рь свята́го Са́вы, и бысть чернори́зец. По вре́мени же по́слан бысть учи́телем свои́м во Иеросали́м продая́ти рукоде́лие свое́, и сре́те и́ скопе́ц Сеи́ды цари́цы, и пое́м приведе́ его́ пред ню, зане́ иму́щу ему́ сосу́ды зело́ хи́тры рукоде́лием. И ви́де его́ цари́ца кра́сна лице́м, су́ха же от поста́, и нача́ льсти́ти его́ к беззако́нию глаго́ля, бу́ди ми угожда́я. А́ще бо́лен еси́, то изврачу́ю тя. Рече́ Михаи́л, болю́ о гресе́х, нищь же бых Бо́га ра́ди. Раб есмь Иису́са Христа́. Тебе́ же не повину́ся. Она́ же у́бо ну́дяше его́ на де́ло беззако́ния. Он же рече́, несть ми лзе сотвори́ти сего́, зане́же черне́ц есмь. И я́ко не увеща́ его́, повеле́ па́лицами би́ти его́. Посе́м посла́ и́ свя́зана к царе́ви, недале́че ему́ су́щу от Иеросали́ма. Царь же испыта́в о нем и разреши́ и́, и моля́ше и́ ве́ре причасти́тися бахме́товы. Глаго́ла Миха́ил, не бу́ди ми оста́вити Бо́га жива́го, и после́довати бе́су. И рече́ царь, изво́ли ца́рьствовати со мно́ю, и проси́ у мене́ е́же хо́щеши. Миха́ил же рече́, в трое́м еди́наго прошу́ у тебя́; Ли к ста́рцу моему́ пусти́ мя; Или́ во и́мя Бо́га моего́ крести́ся; Или́ мече́м твои́м к Христу́ посли́ мя. Разгне́вавжеся царь, повеле́ смертоно́снаго я́да напои́ти, и неврежен. И посрамися царь, и повеле его усекнути мечем посреде́ Иеросали́ма. Чернори́зцы же свята́го Савы́ взе́мше те́ло его́ несо́ша в ла́вру, и положи́ша е че́стно со святы́ми отцы́.

Сей бе блаже́нный Константи́ня гра́да. Роже́н и воспита́н от благове́рну роди́телю. В науче́нии и наказа́нии Госпо́дни. Ру́сский и гре́ческий язы́к до́бре разуме́яше. Кни́гам же ру́сским и гре́ческим вельми́ хитрослове́сен, и сказа́тель от ю́ности бысть. Мних чу́ден показа́ся, оста́вив мир. И за мно́гую его́ доброде́тель по Бо́жию открове́нию от Фо́тия патриа́рха Царя́ гра́да, епи́скопом поста́влен бысть гра́ду Росто́ву. Пре́жде бо его́ бы́вшии ту епи́скопи Фео́дор и Иларио́н избежа́ста, не терпя́ста досажде́ния лю́дскаго. Сей же блаже́нный укре́пився си́лою Святы́я Тро́ицы, и по́мощию Святы́я Богоро́дицы, и чудесы́ лю́ди в ве́ре укрепи́, от ни́хже еди́но ска́жем. Свято́му у́бо прилежа́щу уче́нию, и наказу́ющу в це́ркви и ласка́ющу млады́я де́ти отступи́ти от льсти и́дольския. И поклоня́тися и ве́ровати в Святу́ю Тро́ицу Отца́ и Сы́на и Свята́го Ду́ха. Ста́рии же неве́рьствием свои́м не внима́ху уче́нию его́, из гра́да изгна́ша и́. И па́ки хотя́ше ити́ к Царю́ гра́ду, ми́лостивый же Бог не хотя́ де́ла руку́ Свое́ю поги́бнути, но в ра́зум па́че и́стинный приити́, вложи́ ему́ мысль бла́гу в се́рдце, и глаго́ла, лу́чши у́бо мне умре́ти, не́жели ослу́шатися повеле́ния Бо́жия, и моего́ патриа́рха. И ма́ло отше́д поставля́ет себе́ це́рковь ма́лу близ пото́ка во и́мя арха́нгела Миха́йла. И нача́т вари́ти кутию́, и оби́лно подая́ше приходя́щим младе́нцем, и поуча́ше их с любо́вию. И мно́зи от него́ крести́шася. И сбы́сться рече́нное, я́коже рече́ Госпо́дь, я́ко вино́ но́во в мехи́ но́вы влива́ти, и о́бое соблюде́тся. А́щели вино́ но́во в мехи́ ве́тхи влива́ти, то ме́си прося́дут, и вино́ пролие́тся, и о́бое поги́бнет. Та́ко и сей блаже́нный уча́ше младе́нцы. Оста́вив ста́рыя. И а́бие устреми́шася неве́рнии на святопома́занную главу́, хотя́ще его́ изна́ти и уби́ти. О́нже ни ма́ло убоя́ся, но крепля́ше су́щыя с ним презви́теры и дия́коны глаго́ля, ча́да не бо́йтеся, не мо́гут бо си́и нам без Бо́жия веле́ния ничто́же сотвори́ти ли́ха. И се рек, облече́ся в свяще́нныя ри́зы и с су́щими с ним попы́ и дия́коны, и изы́де со кресты́ проти́ву их; И ви́девше его́ падо́ша вси я́ко ме́ртви. Святы́й же моли́твою вся здра́вы сотвори́, и научи́ ве́ровати Христо́ви. И крести́ их во и́мя Отца́ и Сы́на и Свята́го Ду́ха. И и́на мно́га чудеса́ па́мяти досто́йна сотвори́. И с ми́ром отъи́де к Бо́гу Его́же и́з млада возлюби́. И положено́ бысть честно́е те́ло его́ в це́ркви Святы́я Богоро́дицы, ю́же бе созда́ пре́дний епи́скоп бы́вый ту. И по сих мно́гим ле́том мину́вшим, по Бо́жию благоволе́нию загоре́ся град Росто́в, и це́рковь Святы́я Богоро́дицы сгоре́. И повеле́ благове́рный князь Андре́й сын Гео́ргиев, вну́ка Влади́миря, созда́ти це́рковь ка́менну на ме́сте погоре́вшия це́ркве. И нача́ша копа́ти рвы, и обрето́ша мно́жество ме́ртвых, иде́же обрето́ша те́ло блаже́ннаго и Иса́ии. Бе же це́рковь ма́ла основана́. И нача́ша моли́ти кня́зя, да повеле́л бы бо́ле це́рковь заложи́ти. Князь же повеле́ по во́ли их бы́ти, я́ко да сбу́дется рече́нное Го́сподем во Ева́нгелии, не мо́жет град укры́тися верху́ горы́ стоя́, ни свети́лник под спу́дом утаи́тися. Та́ко и сему́ свети́лнику на́шему не́ мощно толи́ко лет покрове́ну бы́ти под земле́ю. И се бысть все Бо́жиим про́мыслом. Копа́юще же ров пре́дния стены́, и обрето́ша гроб двема́ дска́ма покрове́н. И лю́дем недоуме́ющимся. И я́ко уразуме́ша, я́ко мо́щи свята́го архиепи́скопа Лео́нтия. И откры́ша гроб, и ви́деша лице́ его́ я́ко свет, и ри́зы его́ яко вчера́ оболчены́; О превели́кое чу́до бра́тие, толи́ко лет ми́ну, не измени́ся свято́е те́ло его́, ни ри́зы его́ истле́ша. Тогда́ же ви́девше вси лю́дие возра́довашася. И посла́ша весть ко кня́зю, су́щу у́бо ему́ во Влади́мире. Слы́шав же князь и просла́ви вели́кую ми́лость Бо́жию, моля́шеся глаго́ля. Влады́ко Го́споди Иису́се Христе́, что Ти принесу́ за се, е́же ми еси́ показа́л во о́бласти держа́вы моея́, сицево́ сокро́вище откры́. И посла́ вско́ре гроб ка́мен, и положи́ в нем те́ло свята́го, иде́же и ны́не лежи́т в це́ркви Святы́я Богоро́дицы, содева́я пресла́вная чудеса́, подая́ исцеле́ния с ве́рою приходя́щим ко Святе́й Бо́жии Ма́тери, и ко гро́бу свята́го, на утеше́ние душя́м и те́лом на́шим, и в держа́ву и побе́ду христолюби́вому царю́ на́шему. Аз же раб твой по достоя́нию чим похвали́ти тя возмогу́; Но ма́лое сие́ приими́ славосло́вие, е́же реку́. Ра́дуйся наста́вниче наш и учи́телю, ты исхити́л еси́ душя́ на́шя от ти́ны дна а́дова, и омы́л еси́ святы́м креще́нием, и накорми́л ны еси́ бра́шном нетле́ннаго живота́. И ны́не блаже́нниче помоли́ся за мя всеми́лостивому Царю́ Христу́ Спа́су, да без напа́сти жите́йскую пучи́ну прейду́, и спаси́ ми́лостию Свое́ю.