Стихи́:

Я́влься Епифа́ние в Ки́пре ве́лий,

Сла́ву в нем и по сме́рти ве́лию и́мать:

В дванадеся́тый Епифа́ния смерть умори́.

Сей вели́кий чудотво́рец Епифа́ний, бя́ше от страны́ Финики́йския, гра́да Евферапо́ля. Житие́ име́я от гра́да за три по́прища. Смире́ну роди́телю сын. Воспита́н в хра́мине ма́ле, я́коже быва́ет у убо́га и земледе́лца. То́йже просия́ в боже́ственей доброде́тели, и на верхо́вную высоту́ благочести́ваго жития́ произше́д. И́бо роди́телем его́ из оста́вшым от беззако́нныя слу́жбы, обсене́нием же ви́дети благода́рьственаго све́та невозмо́гшым. Сей сам ко Христо́ве ве́ре притече́. Ма́лую же восприи́м при́тчу, сла́ве житию́ не́коему оздра́вившему со тре́ния ме́ньшаго, и́же подъя́т безчи́нно от подъяре́мства, на нем же седя́ше я́здя. Самому́ скочи́вшу подъяре́мнику и себе́ умори́вшу. Тому́ бо бы́вшу, тогда́ мно́гая недоуме́ния и по́мыслы объя́ша его́. И про́чее не зело́ зако́нному внима́ше служе́нию. Пото́м же Лукия́на не́коего получи́в и́нока. Его́же ви́де ни́щему попроси́вшу у него́, и тому́ ри́зу свою́ пода́вшу. Того́же свы́ше облече́на бе́лою оде́жею. А́бие ко христиа́нстей прише́д ве́ре, и свято́е креще́ние восприя́т. И отзде́ же в кра́тце вся́кая обше́дши, и изоста́вити мы́слю долготу́ сло́ву, и широту́ е́же о нем списа́нию. Ра́вно бо есть ма́лым черпа́лом мо́ре изчерпьсти́, и окуша́тися ме́рити. Толи́коже па́ки рещи́ ну́жно, я́ко в прилежа́нии ю́наго во́зраста, от иуде́йския слу́жбы ко Христо́ве ве́ре у́же прибли́жився вре́менем та́ко восприе́мшу ему́. А́бие на страну́ тверде́йший бя́ше, и и́ночествовав преподо́бне, всех и́же с ним су́щих пре́йде, воздержа́нием и по́двиги и труды́ по́стническими. И того́ ра́ди на архиере́йский сан вше́дши, по прилу́чаю имя́ше пре́же жи́тельствовавших де́йствия, размы́слено коего́ждо житие́. К су́щым прилага́я удо́бьство, и уго́днейшее ко сти́гшим по́стническаго жития́. И мно́жесто чуде́с и́же к нему́ приходя́щым подава́ше. Не теле́сных враче́ств, но душе́вных исцеле́ний. К пред ним же и ина́я сия́, приложи́ учи́тельство пра́во, и исписа́нии мно́жества. И́миже вся́кий язы́к на Бо́га глаго́лавшых хулу́, отре́зася. И вся́кая це́рковь правосла́вную по Бо́зе пропове́дует ве́ру, и́стиною крепи́тся. Тем от злосла́вных мно́гия прия́т напа́сти, и рве́нием и боже́ственым дерзнове́нием, я́ко пе́пел пе́щный разгна́ я, и посрами́. Пожи́в же лет сто и пятьна́десять, и три ме́сяцы. И и́де в Царь град я́ко самому́ Арка́дию царю́ призва́вшу его́. От Царя́ же гра́да иды́й в корабли́, Го́сподеви дух предаде́, я́коже Иоа́нн Златоу́стый к нему́ написа́, ктому́ не ви́дети ему́ престо́ла своего́. Зане́же осу́ждьшых его́ соосу́женик быв. О́ному же рече́ проти́в отписа́вшу, ниже́ тому́ ме́ста дости́гнути, иде́же изгна́н по́слан бя́ше. Соверша́етжеся собо́р его́ во святе́м до́ме, су́щем свята́го Филимо́на.

Стихи́:

Ра́достию оста́вль Ге́рман зе́млю и пре́лесть,

Землена́го Соде́теля престо́л ра́достию ви́дит.

И́же во святы́х оте́ц нашь Ге́рман, бя́ше в ца́рство Иракли́ево, сын Иустиа́на патрики́я. Его́же за́висти ра́ди Иракли́ев сын уби́, и сего́ ка́женика сотвори́, и в при́чет Вели́кия це́ркве учини́. Се́йже пе́рвее вдав себе́ уче́нию боже́ственых писа́ний, и посту́ и про́чей доброде́тели. Посе́м поста́влен бысть ки́зическия Це́ркве епи́скоп. От Ки́зика же преведе́н, на стол Константи́ня гра́да возведе́н быв, и бысть патриа́рх. И уче́нием свои́м лю́ди просвети́в, и глубину́ боже́ственых писа́ний испове́дая. Пребы́сть же до ца́рства Льва Исавряни́на: и ви́дев его́ отвраща́ющася поклоне́ния святы́х ико́н, и не возмо́г преложи́ти его́ от е́реси, ниже́ словесы́, ниже́ теше́ньми. Положи́в омофо́р свой на святе́й трапе́зе, и и́де в дом свой безмо́лствуя, иде́же Бо́гу моля́ся к Нему́ отше́д, ле́том сый седми́десятим.

Стихи́:

Ду́шу Гео́ргие радостию отдаде́

Душе́вному де́ланию и насади́телю теле́сному.

Стихи́:

Уме́рших живы́й, о́ Бо́жий Сло́ве,

Твоему́ лицу́ молящи́хся приими́.

Сей бе от земли́ Фини́ческия, от гра́да Ликло́на, иде́же бе Епифа́ний креще́н и прия́ мни́шеское житие́. Егда́ же Бог просла́ви Епифа́ния, и посла́шя му́жа ликаони́ти сла́вна по Епифа́ния, да поста́вят его́ епи́скопом. Тогда́ и Сави́н прии́де с ни́ми к Епифа́нию, и отве́ржеся ми́ра. И бысть чернори́зец со Епифа́нием. И идо́ста в пусты́ню, и та́мо пребы́ста пять лет. Сави́н же написа́ житие́ Епифа́ниево, и всено́щное стоя́ние и на земли́ лега́ние, и чудеса́ я́же им Бог творя́ше. Бы́вшу же Епифа́нию в Ки́пре епи́скопом, восхоте́ Сави́на поста́вити попо́м. Сему́же не хотя́щу. И ины́я ра́ди потре́бы, введе́ его́ в це́рковь, и рече́ ему́, ста́ни ту недви́жимо. И бы́ша но́зе его́ а́ки пригвожде́ни к земли́, и та́ко бысть поп. По сме́рти же Епифа́ниеве бысть насто́лник его́, епи́скопом в Ки́пре, того́же гра́да Константи́я. И мно́га чудеса́ сотвори́ па́мяти досто́йна. И еретики́ от це́ркви отгна́. И до́бре пожи́в, к Бо́гу отъи́де.

Полуви́й оте́ц нашь преподо́бный, учени́к бя́ше свята́го Епифа́ния. Иды́й же с ним от Константи́ня гра́да в корабли́. Рече́ же ему́ Епифа́ний, ча́до Полуви́е, се у́же преставля́юся от жития́ сего́. Ты же сохрани́ мою́ за́поведь, иди́ во Еги́пет, я́ко аз бу́ду пекийся тобо́ю. И я́ко преста́вися святы́й Епифа́ний. Полуви́й же не дожда́в погребе́ния его́, и́де во Еги́пет, я́коже ему́ святы́й завеща́. Бе бо де́сять дней непогребе́но те́ло его́. И та́мо стре́те его́ князь иноку́рский, и вопроси́ и́, отку́ду гряде́ши. Сей же рече́ от Ки́пра, я́ко учени́к бых Епифа́ния архиепи́скопа ки́прскаго. И у́же преста́вился к Бо́гу. Мно́го же пожа́ли си князь его́ ра́ди. И пое́м Полуви́я, сотвори́ его́ епи́скопа в Иноку́ре. Доброде́телнаго же его́ ра́ди и чи́стаго жития́, сподо́бися чудотворе́ния, я́ко и дождь с небесе́ моли́твою свое́ю сведе́, и плоды́ нив угобзи́. И в ста́рости до́бре ко Го́споду отъи́де.

Не́когда гла́ду су́щу в стране́ той, иде́же Епифа́ний епи́скоп бе, и туга́ бе вели́ка во гра́де том лю́дем. И бе ту не́кий боля́рин Фаусти́н и́менем, ве́рою пога́н, сей мно́ги хра́мины жи́та имы́й. И рече́ ему́ Епифа́ний, дру́же даждь ми пшени́цу на прекормле́ние челове́ком сим, на мне ти бу́ди долг. Неми́лостивый же Фаустиа́н рече́ Епифа́нию, иди́ моли́ся Бо́гу своему́, да ти даст пшени́цу прекорми́ти дру́ги своя́. Епифа́ний же во еди́ну нощь и́де в це́рковь святы́х му́ченик, и со мно́гими слеза́ми моля́шеся к Бо́гу, дабы́ дал ко́рмлю тре́бующым. Бе же ту куми́рница Ди́ева твердь, к ней же никто́же сме́яше приступи́ти. А́ще ли дерзне́т, то сме́ртию у́мрет той, кто прии́дет к ней. И бысть глас с небесе́ Епифа́нови глаго́ля, иди́ в ди́еву твердь, и и́де святы́й, и отверзо́шася ему́ две́ри. И вшед, и обре́те мно́го зла́та. И е́мля отто́ле зла́то, и дая́ше Фаустиа́ну. И и́маше у него́ пшени́цу, и дая́ше ю тре́бующым. И искупи́ все жи́то и пшени́цу у Фаустиа́на. И напо́лниша хра́мины своя́ гра́жане пшени́цы и жи́та. И сконча́ся бра́шно в дому́ фаустиа́нове. Бог же кормя́ше челове́ки рука́ма епифа́ниевыма. Туга́ же бысть в дому́ Фаустиа́не. И пусти́ де́сять и един кора́бль в Калаври́ю, и накупи́ша та́мо вси корабли́ пшени́цы и жи́та. И иду́щим им во своя́, и за́ сто верст не доше́дшим им гра́да, бу́ря вели́ка воста́ в мо́ри, и истопи́шася корабли́ со пшени́цею. Фаустиа́н же сие́ ви́дев, и начя́ ху́лити Бо́га вы́шняго. И хуле́ние нанося́ на свята́го Епифа́ния, глаго́ля, не то́чию льстец сей на́ сусе не дае́т до́му моему́ носи́ти потре́бных, но и в мо́ри поги́бель твори́т. И слет бе́сы, браня́ до́му моему́ носи́ти потре́бная. Сия́ рек, и и́на мно́га претя́ Епифа́нию. Вси же му́жие и жены́ гра́да того́ собира́юще пшени́цу, напо́лниша хра́мины своя́ на все ле́то пшени́цы. И сбы́сться псало́мское сло́во: "Бога́тии обнища́ша и взалка́ша, а взыска́ющии же Го́спода не лиша́тся от вся́кого добра́. Госпо́дь бо не оставля́ет никогда́ же упова́ющых на Него́".

Попече́мся бра́тие пока́ятися пре́жде сме́рти грехо́в свои́х, и на душе́вный пригото́вимся исхо́д. Мир бо сей ми́мо и́дет, и сла́ва его́ поги́бнет. Прии́дет бо Госпо́дь с небе́сными во́и на Суд, вся́кому челове́ку возда́ти кому́ждо по дело́м его́: Пра́ведником жизнь ве́чную нестаре́ющуюся и неконча́емую, а гре́шником му́ку ве́чную, и огнь неугаса́ющий, и тму несвети́мую: Ея́же бра́тие потщи́мся убежа́ти, и с пра́ведными венча́ни бы́ти, Бо́га сла́вити в ра́дости и в весе́лии, во све́те немерца́ющем. Ему́же сла́ва, ны́не и при́сно и во ве́ки веко́в. Ами́нь.