Стихи́:

Подо́бне Христе́ сия́ Тебе́ Си́мон глаго́лет,

Ревну́я стра́сти Твоея́ терпя́ кре́стную страсть:

На дре́ве ра́спят в деся́тый день Си́мон ве́лия ра́достный.

Сей есть Си́мон, и́же и Нафана́ил нарица́емый, и́же жени́х бы́вый в Ка́не бы́вшем бра́це, и́мже зван бысть Христо́с, ку́пно со Свои́ми ученики́, внегда́ во́ду в вино́ преложи́. Тем жени́х и брак оста́вль и дом, Любо́внику, и Чудотво́рцу, и уневе́стному Жениху́ чи́стых душ, Христу́ после́дствова. Еди́н от двана́десяти сый, и со апо́столы в го́рнице быв, внегда́ в виде́нии о́гненых язы́к, Дух Святы́й сни́де. И от Того́ испо́лнься, я́ко рещи́ повсю́де проше́д, всю попали́ многобо́жную пре́лесть. Маврита́нию бо всю, и Афрони́йскую страну́ проше́д, пропове́да Христа́. Пото́м же во Брита́нии быв, мно́гих сло́вом ева́нгельским просвети́в. И от неве́рных распя́т быв, и сконча́вся, я́ко ре́вностию о́гненою ревну́я Бо́гу Вседержи́телю, зва́нием о́браз стяжа́вый.

Стихи́:

Челове́к и сух и кро́ток естество́м,

К злочести́вым же да́же и до сме́рти.

Сей святы́й Иси́хие нарица́шеся от стран́ы Днави́йския. Бя́ше же муж благ и кро́ток и тезоимени́тен име́я нрав и зва́ние. Помоли́вжеся Го́споду показа́ти ему́ ме́сто, иде́же тому на еди́не б́ывши, е́же порабо́тати угоди́ти Ему. Сше́дше же к морсте́й стране́, в го́ру глаго́лемую Маио́на. И та́мо пребы́в и на мно́зе препроводи́в, та́же отту́де к воде́ сшед и та́мо близ це́рковь свята́го Андре́я создав. И про́чее живота́ в посте́ и терпе́нии до́бре преше́д. И мно́гих чуде́с соде́лования сотвори́в ко Го́споду отъи́де.

Стихи́:

В ре́чную во́ду Иси́хие вни́де,

Я́ко да реки́ о́гненыя уго́нзнет.

Исихи́й му́ченик, бе при Максимиа́не царе́ пе́рвый от пола́ты его́. Магистриа́н сло́вом, во Антиохи́и живы́й. Максимиа́н же не повеле́ вои́нствовати христиа́ном, но хотя́щим ве́ровати во Христа́ отреши́ти по́ясы и пребыва́ти с работя́ги. И мно́зи изво́лиша несла́вное се житие́, не́жели па́губную честь. И еди́н от тех бысть и вели́кий Исихи́й. Се уве́да царь, совлече́ и́ из многоце́нных риз, и оде́я его́ во вре́тище вла́сяно, и с жена́ми осуди́ его́ пребыва́ти. По не́колицех же днех призва́в его́ царь и рече́: Рцы ми Исихи́е, а́ще не стыди́шися в безче́стии пребыва́ти? Он же рече́: От тебе́ честь вре́менна есть. И повеле́ царь ка́мень жерно́вный навяза́ти на вы́ю его́, и ври́нути в ре́ку. И та́ко сконча́ся.

Стихи́:

Алфи́ю язы́к уре́зан сконча́ся:

А́ще язы́к Алфи́ю отре́зан,

Но душе́вным язы́ком Тебе́ сла́вит, Сло́ве.

Филаде́лфь на сковраде́ ражже́не просте́рт сконча́ся:

Филаде́лфь христолю́бый рече́:

Бо́га любя́й за ны постражду́ на о́гнене сковраде́.

Киприа́н в тига́не ражже́не сконча́ся, с пече́ныя сне́ди дре́вле.

Испе́ часть прии́м от рыбы,

И тига́неву опряже́ную сла́дость приими́.

Алфи́й и Филаде́лф, и Кири́л и и́же с ни́ми Христо́вы му́ченицы бы́ша от страны́ иттали́йския, сы́нове иттали́йскаго кня́зя, благоче́стию навы́кше от Ани́сима не́коего крести́вшаго их. В то же вре́мя посла́ние бысть из Ри́ма на взыска́ние христия́н во Итта́лию. И уве́дани бы́ша, посла́ша я в Рим ку́пно со Ани́симом и Ера́змом, и со ине́ми число́м, четы́рми на́десять, к Ликини́ю царю́. Ани́сим у́бо прии́м ка́мень вели́к на пе́рсех, и испусти́ дух. Ера́зм же с про́чими, с четы́рми на́десять мече́м усе́чени бы́ша. А трие́ по́слани бы́ша в Селевки́ю, и та́мо Христа́ ра́ди убие́ни бы́ша.

Стихи́:

Соприобщи́ся Бо́гу Лавре́нтие,

Труды ́Еде́мския восприе́мый в дово́льныя труды́.

В земли́ ру́сстей во гра́де Ки́еве в монастыре́ отца́ Феодо́сия, ту бе черне́ц сла́бо живы́й при святе́м Феодо́сии, и ча́сто отбега́ше от монастыря́, и па́ки прихожда́ше ко блаже́нному. Он же с ра́достию сего́ приима́ше, глаго́лаше, не оста́вит его́ Бог умре́ти кроме́ сего́ монастыря́. А́ще бо и мно́жицею отхо́дит, а коне́ц жития́ в монастыре́ сем и́мать прия́ти. И моля́ше Бо́га святы́й о нем да́ти ему́ терпе́ние. Та́же по мно́зем его́ исхоже́нии, прии́де еди́ною к вели́кому Феодо́сию, моля́шеся ему́ прия́ти его́ в монасты́рь, я́ко от заблу́ждьших прише́дша. Святы́й же того́ с ра́достию прия́т, и ко ста́ду си причте́. Чернори́зец же он нача́ дая́ти наста́внику не́что от име́ния своего́, бе бо де́лая ри́зы. Святы́й же рече́ ему́, а́ще хо́щеши бы́ти соверше́н и́нок, не́сши вве́рзи в пещь горя́щу, я́ко ослуша́ния есть де́ло. Он же по повеле́нию Феодо́сия нес вве́рже во огнь, от се́рдца послуша́ние сотвори́ своего́ учи́теля. И про́чия дни с ми́ром сконча́. И у́спе в монастыри́ вели́каго Феодо́сия.

Челове́че, вся восприя́л еси́ от Бо́га, ра́зум и смысл, хи́трость и ум, и вся ти покоре́на суть я́же на земли́, в гора́х, и в вода́х, и по возду́ху, и на пи́щу тебе́ дана́ суть. Но взаи́м ти дано́, да возда́си проти́ву сему́ пра́вду, любо́вь, кро́тость, смире́ние, ми́лостыню. И Той возда́ст ти дар и́хже о́ко не ви́де, и у́хо не слы́ша, ни на се́рдце челове́ку не взы́де, я́же угото́ва лю́бящым Его́. Челове́че, до́ндеже на торгу́ еси́ жите́йстем, да́же торг не разы́дется, купи́ си ми́лостию ни́щых поми́лование от Бо́га. Смире́нием ве́чную сла́ву. Пра́вдою, житие́ неконча́емо. Чистото́ю, вене́ц. Кро́тостию, в рай вхожде́ние. Моли́твою, со а́нгелы житие́. Купи́ си трудо́м поко́й. Бде́нием, лице́ неви́димаго Бо́га. Посто́м же и жа́ждею, ве́чных благ наслажде́ние. Челове́че, да бу́дет ти во главе́ ум и смысл. Очи́ма зре́ние к Бо́гу. А и́же до́лу, в зе́млю, в ню́же пома́лу по́йдем. Во у́шию, слы́шание кни́жное. В не́дрех, воздыха́ние о гресе́х. В язы́це и́стина. Во устну́ моли́тва. В руку́ дая́ние убо́гим. В се́рдцы безгне́вие, в телеси́ чистота́. Во утро́бе алкота́. В коле́нех поклоне́ние к Бо́гу. И а́ще сия́ сохрани́ши, бу́деши ча́до све́та, и сын Ца́рства небе́снаго, и насле́дник ве́чныя ра́дости. И бу́деши граждани́н вы́шняго Иеросали́ма. Бо́гу на́шему сла́ва, ны́не и при́сно и во ве́ки веко́в. Ами́нь.