Стихи́:

Живу́т в невеще́ственых чино́в девяти́х,

И́же глава́ми посе́чении му́жие де́вять.

Христо́вы му́ченицы боже́ственнии, Феогни́д, Руф, Антипа́тр, Неости́х, Арте́ма, Магн, Феодо́т, Фавмаси́й, Филимо́н, бя́ху от разли́чных мест и стран собра́вшеся. И в Ки́зице я́ти бы́ша, и вопроше́ни быша, христиа́ни испове́дашася. Му́жеским же нра́вом кня́зя посрами́ша, и и́дольскую пре́лесть поплева́ша, и в разли́чныя му́ки и ка́зни вложе́ни бы́ша. И не пожро́ша куми́ром, но па́че жи́ву же́ртву себе́ Го́сподеви приведо́ша. И мече́м главы́ их усе́чени бы́ша. Тем и врачество́ безо́мздное от Го́спода прия́ша. И стра́сти неисце́льныя и неду́ги исцели́ша. И сла́вна му́жа от боле́зни изба́виша, и ны́не Бо́гови мо́лятся за ны.

Стихи́:

Усну́ вма́ле не́что восхище́нием после́дним,

В Бо́жие устре́тение, Ме́мноне пребыва́еши:

В два́десять девя́тый смерть похи́ти Ме́мнона

Святы́й преподо́бный оте́ц наш Ме́мнон чудотво́рец, от ю́ны версты́ Бо́гови себе́ предста́ви, и чи́сто прия́телище Ду́ха Свята́го бысть. Покори́в у́бо плоть ду́хови, и облада́в страстьми́ плотьски́ми, и жесто́ким пребыва́нием ну́жным, и трудо́м себе́ истощи́в. И бысть мни́хом нача́лник. Житие́ бо а́нгельское пожи́в, и чудесы́ разбогате́в и благода́тию, и исцеля́ше неисце́лныя неду́ги. Те́мже и тече́нием слез ду́шу омы́в, и во́ду на су́се ме́сте устро́ив тещи́. И на морсте́й глубине́ явле́нием свои́м корабли́ утопа́ющыя мно́гажды изба́ви. Но и пру́зи призыва́нием его́ прогоня́ются. И в тех богоуго́дно поживе́ доброде́телех, ра́дуяся ко Го́споду отъи́де Его́же возлюби́.

Стихи́:

Родопиа́ну и Диодо́ру да́ры,

И́мже па́че даро́в бя́ше ка́менное побие́ние.

Диодо́р и Родио́н Христо́ва му́ченика бы́ста в ца́рьство безбо́жнаго и законопресту́пнаго Диоклития́на. Пропове́дающа же Христо́ву ве́ру, и мно́го неве́рных ко и́стинному благоче́стию приводя́ща. И тоя́ ра́ди вины́ я́та бы́ста от свои́х у́жик и от гра́жан, и ну́дима бы́ста отврещи́ся Христа́, и не учи́ти о и́мени Госпо́дни. И не послу́шаста их, но па́че обличи́ста а́ки прельще́ных диа́волом. Пе́рвее у́бо поруга́ния и мно́ги ра́ны претерпе́ста. Посе́м же томле́ния мно́га и му́ки разли́чны подъя́ста, благодаря́ще всех Бо́га, и свято́е Его́ велича́юще и́мя. Последи́ же всех во Афродиси́и на то́ржищи ка́мением побие́на бы́ста. И с боле́знию му́ку подъя́ста терпя́щя, и в ру́це Бо́гови ду́ша своя́ преда́ста.

Стихи́:

О́ле, сли́на но́вая от ти́хих усте́н

Объя́вльшияся ле́гка сомра́жену о́чию.

Седя́ в ке́лии свое́й, собери́ си ум. Помяни́ день сме́рти твоея́. Усмотри́ тогда́ телесе́ умерщве́ние. Помы́сли ну́жду, приими́ боле́знь, зазри́ и́же в ми́ре сем су́етству. Помяни́ и́же во а́де ны́не устрое́ние. Смы́сли ка́ко у́бо суть та́мо души́, в какове́ го́рце молча́нии, в какове́м го́рьком воздыха́нии, в коли́це стра́се и по́двизе, или́ в ко́ем ча́янии, непреста́нную боле́знь душе́вную, и безконе́чную сле́зу. Но и день воскресе́ния помяни́, и предстоя́ния е́же о Бо́зе. Мечта́й вы́ну на уме́, и стра́шный ужа́сный он Суд и суди́ще. Принеси́ в среду́ предлежа́щая гре́шником, студ и́же пред Бо́гом, и а́нгелы, властьми́, и нача́лы и все́ми святы́ми. И мучи́лища вся, огнь ве́чный, червь неусыпа́емый, та́ртар, тму. На́до все́ми же си́ми гро́зу несогре́ему. Скре́жет зу́бный, страши́лища и муче́ния. Принеси́ же и́же святы́м угото́ванная блага́я, дерзнове́ние с Бо́гом, а́нгелы же и арха́нгелы, и властьми́, и всего́ наро́да. Ца́рство, и я́же сего́ дарова́ния. Ра́дость и наслажде́ние, о обои́х сих па́мять принеси́ себе́. И о гре́шных у́бо суде́ воздохни́, прослези́, в плаче́вный облецы́ся о́браз, боя́ся да не и ты и сам в сих бу́деши. О предлежа́щых же пра́ведником благи́х, ра́дуйся и весели́ся и благоду́шствуй. И сих у́бо наслади́тися, о́нех же отчужи́тися. Зри, да не забу́деши сих когда́, лю́бо внутрь ке́лии еси́, лю́бо вне не́где. И от сих па́мяти да не смяте́ши свою́ мысль, я́ко да поне́ си́ми вре́дныя и скве́рныя избе́гнеши мы́сли.

А́ще что обеща́еши Го́сподеви Бо́гу, приноси́ ско́ро, и не заме́дли да́ти, и́мже бо моли́лся еси́ в день печа́ли твоея́, моли́тву твою́ во бла́го вре́мя. Не благоволи́т бо Бог в прино́сех нечи́стых, ни мно́жеством жертв очи́стит грехи́ их. Но я́коже кто зака́лает сы́на пред отце́м, про́клят есть, та́коже и принося́й же́ртву Бо́гови от грабле́ния убо́гих име́ния. Пи́шетбося, чти Го́спода Бо́га твоего́ от свои́х пра́ведных трудо́в.

Пове́даше не́кто, я́ко брат живы́й в монастыре́. Отпуще́н же бе в весь на слу́жбу о́бщаго жития́. Бе же не́кто гове́ин беле́ц в друзе́й ве́си, и приима́ше его́ ве́рою, ели́жды хожа́ше в весь. Име́яше же беле́ц еди́ну дщерь но*о овдове́вшу, с му́жем свои́м, ле́то или два жи́вшу, вла́зя же и изла́зя брат к ним, побежде́н бысть к ней. Она же смы́слена су́щи и разу́мна покуша́шеся приити́ на лице́ его́. Во еди́н же от дний, оте́ц ея́ вни́де в ни́жний град, потре́бы де́ля, оста́вив ю в дому́. И прише́д брат по обы́чаю, обре́те ю еди́ну, и глаго́ла ей, оте́ц твой где есть. И рече́ ему́, во град отъи́де. Нача́же смуща́тися к ней по́хотию, и подвиза́тися. И глаго́ла ему́ она́ с ра́зумом, не смуща́йся о́тче, отец мой ника́коже до у́тра прии́дет, зде есма́ о́ба. Но сего́ ника́коже сотвори́ без сове́та, но воста́ни и помоли́ся, не вложи́ вра́жия зла́го сове́та в се́рдцы свое́м. О́нже не хотя́ше и мятя́шеся от бра́ни. Она́ же рече́, вои́стинну ли еси́ ты николи́же име́л жены́. Глаго́ла ей, ни. И сего́ де́ля хощу́, да ви́жу что есть. И глаго́ла ему́ сего́ ли ра́ди смуща́ешися, не ве́дый смра́да сме́ртных жен, и хо́щеши оскверни́тися, реку́щи ему́ я́ко ме́сячины ми суть, и никто́же ся мо́жет мне прикосну́ти ни обоня́ти, похуля́ющи те́ло свое́. Слы́шав же от нея́ брат такова́я, возгнуша́ся, и воспряну́в прослези́ся. Егда́ же ви́дев его́ в себе́ прише́дша, глаго́ла ему́, се а́ще бых послу́шала тебе́, и уве́рила тя бых, была́ бы́хове премени́вшася и сконча́вша грех, ким лице́м бы возре́л на отца́ твоего́, и шел бы в монасты́рь твой, и слы́шал лик святы́х пою́щь. Молю́жеся ти, возбни́ у́бо, и не мози́ ма́лаго ра́ди жела́ния, погуби́ти таковы́х дел, ели́ка я́же имя́ше, и лише́н бы́ти ве́чных благ. Послу́шав же ея́ брат, пострада́в такова́я словеса́ от жены́, пове́даше по́весть благохва́льствуя Бо́га, я́ко ра́зумом и смы́слом ея́, не оста́ви его в блуд до конца́ впа́сти. Бо́гу на́шему сла́ва, ны́не и при́сно и во ве́ки веко́в.