Стихи́:

Жи́зни тле́емыя Иа́сон коне́ц прия́т,

Но обре́те другу́ю, безконе́чнаго стяжа́ния:

Уме́ршу, лице́ Свое́ сла́вы показу́еши

Сосипа́тру, Сло́во Бо́жие:

В два́десять осмы́й си́и в зе́млю внидо́ша.

В сих у́бо Иа́сон, та́рсянин бя́ше, и́же и пе́рвый уловле́н быв к благоче́стию. Сосипа́тр же от Аха́ии бя́ше нарица́емь. Я́же ве́ру Христо́ву восприе́мша, и о́ба ку́пно ученика́ бы́ста Па́вла апо́стола. И́же Иа́сон своему́ гра́ду учи́тель поста́влен быв. Сосипа́тр же Икони́йския це́ркве корми́ла восприе́м. И своя́ це́ркви до́бре упасо́ста и умно́жиста, к вече́рней стране́ достиго́ста. И в Керкире́йстем о́строве бы́ста, це́рковь прекра́сно созда́ста Стефа́ну первомуче́нику, иде́же Бо́гу служа́ста, и мно́гих ко Христо́ве ве́ре привлеко́ста. Оклевета́на же бы́ста Керкили́ну царю́, и затворе́на бы́ста в темни́це, иде́же бя́ше седмь разбо́йник затворены́: и́мже имена́ сия́, Саторни́й, Иакихо́л, Фавстиа́н, Иануа́рий, Марса́лий, Евфраси́й и Мамми́й, и́хже и к Христо́ве ве́ре приведо́ста, и в ме́сто волк овца́ сих соде́ласта. И́мже по сих наложи́вше коно́б смолы́ и се́ры и во́ска, и развари́вше, вверго́ша му́ченики и́же от Христа́ и венцы́ восприя́ша. И стреги́й тех стра́ж, ве́рова и той во Христа́, и отсеко́ша ему́ ру́ку ле́вую, и о́бе но́зе. Та́же призва́в и́мя Христо́во, и отсеко́ша ему́ главу́. Святу́ю же Иа́сона и Сосипа́тра изве́дше из темни́цы, и преда́ста Карпиа́ну кня́зю на муче́ние. И́же сею́ воспроси́в, и связа́в, в темни́цу отсла́. Ви́девши же их та́ко свя́зана Керки́ра дщи царе́ва, и уве́де я́ко Христа́ ра́ди такова́я стра́ждут, и та христиа́ну себе́ испове́да, и кузнь ю́же ноша́ше сня́вши с себе́, раздаде́ ни́щым. Се же уве́дев оте́ц ея́, и зане́же не возмо́же преложи́ти ю́ от ве́ры, затвори́ ю́ в темни́це, и не́коему му́рину блуднику́ в растле́ние предаде́ ю́. О́ному же прибли́жившуся ко врато́м темни́цы, и се зверь не́кий похи́ти его́. Она́ же таково́е ощути́вши, о́ного от зве́ря изба́ви, и того́ Христо́ви вво́инивши христиани́на соде́ла. И́же и му́рину вельми́ возопи́вшу: «Вели́к Бог христиа́нский!». И а́бие мучи́телем вельми́ му́чен быв, от жития́ пре́йде. О́крест же темни́цы дрова́ во́ини обложи́вше, запали́ша е́же сгоре́ти му́ченице. Сему́ же бы́вшу, неопали́ма пребы́сть свята́я, и мно́гия к Христо́ве ве́ре привлече́. Сего́ ра́ди на дре́ве пове́шена бы́вши, и ды́мом тя́жким подкажена́, и стрела́ми состреля́ема толи́ко, доне́леже дух предаде́ Бо́гу. Посе́м же гоне́ние царь подви́г на ве́рующих во Христа́, и о́нем побе́гшым к прилежа́щым острово́м, сам на муче́ние о́нех поплове́. Да внегда́ бысть посреде́ пучи́ны, погрязе́ я́коже дре́вний фарао́н. Лю́дие же благода́рственыя пе́сни Бо́гу изба́вльшему их принесо́ша. Иа́сон же и Сосипа́тр из темни́цы испуще́на бы́ста, и уча́ста лю́ди невозбра́нно сло́ву Бо́жию. Елма́ же воста́ други́й царь, и уве́дев о святы́х, повеле́ принести́ кадь желе́зну, и вложи́ти смолу́ в ню и се́ру и воск, и вельми́ разжещи́ и воврещи́ та́мо святы́я. Сему́ же бы́вшу и святы́м неопа́льным сохра́ньшимся, мно́зи от неве́рных попале́ни бы́ша. Ини́и же во Христа́ ве́роваша, царь же ка́мень на свою́ вы́ю наве́рг, рыда́ше глаго́ля: «Бо́же Иа́сонов и Сосипа́тров, поми́луй мя». Тогда́ Иа́сон собра́ всех ве́ровавшых, и научи́в их сло́ву и́стинному. Прише́дшу же и царю́. И́же и того́ поучи́в, и крести́ во и́мя Отца́ и Сы́на и Свята́го Ду́ха, и именова́в и́ Севастиа́на. Не по мно́зех же днех сын царе́в в неду́г впад и у́мре. Апо́стол же помоли́вся, воздви́же его́ от ме́ртвых. Мно́гая у́бо от тогда́ словеси́ па́мяти досто́йная соде́ловав чудеса́, и це́ркви ку́пно с царе́м созда́в прекра́сны: и вся́кая до́бре и свя́те соверши́в, и Христо́во ста́до возрасти́в, в ста́рости масти́те сконча́ житие́, и к Жела́емому взы́де.

Стихи́:

Разбо́йницы уве́девши Еде́мскаго разбо́йничия,

Смоло́ю потща́шася получи́ти, мы́слено восприя́ти.

Стихи́:

Стре́лами цари́ца состреля́ема ра́нами,

И от ран просия́, я́ко от би́сера.

Стихи́:

Чи́я главы́ ви́жу лежа́щая от телесе́ ра́зно?

Киндилиа́на, Макси́ма же и Да́ды.

Во дни Диоклитиа́на и Максимиа́на злочести́вых, я́ти бы́вше святи́и Макси́м и Да́да и Кинтилиа́н, в стране́ аксиви́йстей. И пре́дани бы́вше Тарки́ю и Сави́ю, и испыта́ни бы́вше испове́давше Христа́, вве́ржени бы́вше в темни́цу. Усну́вшым же им, прише́д дия́вол предлага́я им пря́мо оста́вленая и́ми. И воста́вше помоли́шяся друг дру́га подтвержа́юще. И прише́д а́нгел Госпо́день дерза́ти им повеле́. На у́трия же предста́вше, и мно́го вельми́ от нечести́вых пону́жени бы́вше, не отверго́шася Христа́, но я́сно и дерзнове́нно Бо́га и́стиннаго и творца́ вся́ческим Того́ испове́давше. И бие́ни бы́вше кре́пко и вса́жени в темни́цу. И с про́чими истя́зани бы́вше, отсеко́шя главы́ их.

Стихи́:

Да не устраши́ся, Вита́лие, к пла́меню.

Спове́м у́бо, и пре́жде взы́де Зино́н.

Стихи́:

Бого́м е́ллинским не восхоте́ пожре́ти,

Разруши́, сгоре́в е́ллинскую ве́ру.

Сий бе блаже́нный Кири́лл, рожде́н и воспита́н во гра́де Ту́рове, бога́ту роди́телю сын, и не любя́ше бога́тьства и сла́вы тле́нныя ми́ра сего́, но па́че все прилежа́ше Бо́жиих книг уче́нию, и до́бре извы́че боже́ственая писа́ния. По вре́мени же прише́д в монасты́рь, и бысть мних, и па́че всех Бо́гу рабо́таше, посто́м же и бде́нием удруча́я те́ло свое́. И сотвори́ себе́ чи́сто прия́телище Свято́му Ду́ху. И мно́гим на по́льзу бысть, уча́ и поуща́я мни́хи в покоре́нии и послуша́нии бы́ти ко игу́мену, и того́ име́ти я́ко Бо́га, и во всем его́ послу́шати. Черне́ц бо и́же не име́ет послуша́ния ко игу́мену, я́коже обеща́ся, не мо́жет бы́ти спасе́н. Посе́м блаже́нный на бо́лшия по́двиги жела́я, в столп вшед затвори́ся, и ту пребы́сть не́колико вре́мя, посто́м и моли́твами, па́че тружа́яся. И мно́га боже́ственая писа́ния изложи́в. И сла́вен бысть по всей стране́ той. И умоле́нием кня́зя и люде́й того́ гра́да, возведе́н бысть на стол епи́скопьский от митрополи́та, поста́влен бысть епи́скопомь гра́ду Ту́рову та́ко нарица́ему, от стоя́щу близ Ки́ева. И до́бре подвиза́вся по це́ркви Бо́жии. Федо́рца же за укори́зну та́ко нарица́ема, сего́ блаже́нный Кири́л от боже́ственых писа́ний е́ресь обличи́ и прокля́ его́. И Андре́ю боголюби́вому кня́зю мно́га посла́ния написа́ от ева́нгельских и проро́ческих указа́ний, и я́же суть на пра́здники госпо́дьския слова́, и и́на мно́га душеполе́зная в них словеса́. И си вся и и́на мно́жайшая написа́ и це́ркви предаде́, и до ны́не держа́т ру́сстии ве́рнии лю́дие вся просвеща́юще и веселя́ще. И та́ко доброче́стне и благоче́стне пожи́в, и до́бре поруче́нное ему́ ста́до упа́с, преста́вися в ве́чный поко́й и в бесконе́чный живо́т. Прииде́те же днесь бра́тие, похва́лим сего́ святи́теля глаго́лющее, ра́дуйся святи́телю честны́й и учи́телю, други́й златослове́сный учи́тель нам в Руси́ восия́ па́че всех. Ра́дуйся и́же святы́м и пресве́тлым уче́нием свои́м концы́ ру́сския просвети́ богоразу́мием. Мо́лимжетися ма́лая сия́ словеса́ принося́ще ти, моли́ о нас Вседержи́теля, Ему́же ны́не предстои́ши со дерзнове́нием от настоя́щия нам беды́ изба́витися, и от безбо́жных ага́рян при́сно му́чащих нас, да получи́м ми́лость моли́твами твои́ми, и грехо́в отда́ние, и при́сно су́щных благ наслажде́ние, во о́ном ве́це.

Во Александри́и еги́петстей в дому́ святы́я Мари́и, боголюби́вии му́жи сходя́щеся, ви́деша ста́рца пред две́рми седя́ща, и продаю́ща вре́тища и клобучцы́. И ре́ша друг ко дру́гу, поне́же ви́дим ста́рца сего́ продаю́ща вре́тища и клобучцы́, несмь слы́шали его́ пря́щася ни о чем же, и разуме́хом я́ко челове́к Бо́жий есть. Иску́сим его́ глаго́люща. И прише́дше ре́ша ему́, пове́ждь нам ста́рче, продае́шили сия́. Он же рече́, ей. Они́ же ре́шя, на коли́це сия́ продае́ши. Отвеща́, на де́сят ме́дниц. Ре́шаже ему́, мно́го то, но возми́ четы́ре ме́дницы. И рече́ ста́рец, я́коже хо́щете возми́те. И па́ки ре́ша ему́, мно́го и то, но возми́ по ме́днице на них. И рече́ им, я́коже хо́щете возми́те. И да́вше ему́ ме́дницы, и взя́ша у него́ клобучцы́. Ста́рец же взем жезл свой и и́де в хи́жу свою́. И та́че я́ко разуме́ши до́брая де́ла его́, постиго́ша и ре́ша ему́, о́тче что сотвори́. И рече́, что сотвори́х. Ре́ша же ему́, пре́жде рече́ нам, я́ко по десяти́ ме́дниц на клобучце́х. И ре́хом ти, дражи́ши ны, но возми́ по четы́ри ме́дницы. И ты рекл, я́коже хо́щете возми́те. И па́ки ре́хом ти, возми́ по ме́дницы а́ще хо́щеши, да и то ты стерпе́ нам. И падо́шя пред ним ниц, и ре́ша ему́, Го́спода ра́ди пове́ждь нам, что се твори́ши. Той же рече́ к ним, тако́в ми есть обы́чай, пре́же пове́дати и́стовую це́ну. Да е́же ми даду́т, то возму́. Моли́ша же и глаго́люще, да и́дем с тобо́ю в хи́жу твою́. И ше́дше с ним, обрето́ша ту ты́ков воды́ и ла́дку и коре́ц. И ре́ша ему́, вели́ши ли да ти сотвори́м ка́шицы ма́ло, и вку́сим с тобо́ю, и благослови́ши ны. Он же рече́, сотвори́те. Бя́ше же хи́жина ему четверовра́тна. И я́коже сотвори́ша, и рече́ им до́брый той ста́рец, иди́те к феодо́сиевым, и обря́щете ту ста́рца, та́коже продаю́ща клобучцы́, и рцы́те ему́, глаго́лет ти по́друг твой, гряди́ да я́си зелияни́цу с бра́тиею. Они́же ше́дше, обрето́ша та́ко, я́коже глаго́ла им до́брый той ста́рец. И ре́ша ему́, глаго́лет ти по́друг твой, прииди́ да я́си зелияни́цу. Он же рече́ к ним, ка́ко рече́ оте́ц прииди́ да я́си с бра́тиею. И па́ки рече́ им, мне ли рекл да ям, то́йже уме́рл есть. Они́же возмято́шася о словеси́ том. Поя́шя же и того́ ста́рца с собо́ю и клобучцы́, и прише́дше обрето́ша ста́рца уме́рша, и устро́иша и́ и пла́кавше мно́го, и погребо́ша и́. Моли́ша же и того́ ста́рца реку́ще. Седи́ господи́не в сей хи́жине ты, а мы ти прино́сим потре́бу теле́сную, и моли́ за ны Бо́га. Он же рече́ им, прииди́те в седмы́й день. И а́ще обря́щете мя жи́ва, сотворите́ я́коже глаго́лете. Сове́т бо и́мама с блаже́нным сим ста́рцем и́же у́мре, и́же от на́ю ко́йждо пре́жде у́мрет, сей Бо́га мо́лит, да и други́й в седмы́й день плод сотвори́т. И та́ко ти́и боголюби́вейшии му́жие приидо́ша в седмы́й день, и обрето́ша и почи́вша. И погребо́́ша и в скрай друга́го ста́рца. И сотвори́ша плачь вели́к, и отъидо́ша сла́вяще Бо́га, и́же им толи́ка бла́га сокрове́на дарова́ Бог ви́дети.

Человеколю́бец и правди́вый Судия́ Бог, мно́гажды предае́т проти́вным нас не на па́губу, но на казнь. Я́коже и Ереми́ем ко Изра́илю рек: «Дерза́йте лю́дие Мои, не поги́бнет па́мять Изра́илева. Пре́дани бо бы́сте язы́ком не на па́губу, но поне́же у́бо разгне́васте Бо́га и предаде́ проти́вным. Раздражи́сте бо раздража́ющаго вас, и после́днюю му́ку восприи́мете». Нам же подоба́ет ве́дати, я́ко беззако́ний ра́ди на́ших предае́мся в ру́це враг на́ших, по пра́вому суду́ Бо́жию. Я́коже рече́ Иса́ия: «Кто даде́ на расхище́ние Изра́иля? Не Бог ли, Ему́же согреши́ша, ни восхоте́ша ходи́ти в путе́х Его́? И наведе́ наны́ гнев я́рости Своея́, и укрепи́ наны́ гнев и рать». Ничто́же бо без пра́вды прихо́дит на ны. Тя́жко бо есть нам согреша́ющим, но вся пра́вым судо́м Бо́жиим наво́дит на нас. Греси́ бо на́ши исхода́тайствуют нам зла́я. Самовла́стни бо есмы́ своему́ спасе́нию и па́губе, я́коже пи́шется: «Я́ко Бог искони́ челове́ку положи́ пред лице́м живо́т и смерть». Свиде́тель же сему́ Ада́м и Е́ва, и́же вра́жиею ле́стию восхи́щшася, и ра́вна Бо́гу бы́ти восхоте́ста, и Бо́жию за́поведь преступи́ста, от рая́ изгна́на бы́ста, и сме́рти насле́дницы бы́вша. Те́мже и ны́не ели́ко их согреша́ют и прогне́вают Бо́га, возненави́дени бу́дут беззако́ний свои́х ра́ди, и потребле́ни судо́м Бо́жиим пра́ведным, воздаю́щи кому́ждо по дело́м я́. Тем и узаконя́я рече́: «О́ко за о́ко, и зуб за зуб». И еще́: «А́ще сотвори́т челове́к, возда́стся ему́». И́мже бо кто согреши́т, тем и му́чен бу́дет, а́ще не пока́ется. А́щелиже обрати́тся и пока́ется до́бре, ду́шу свою́ упасе́т. Бо́гу на́шему сла́ва, ны́́не и присно и во ве́ки веко́в. Ами́нь.