Стихи́:

Влачи́ша по земли́ Ма́рка уби́йцы,

К небеси́ того́ отсыла́ющи, неразу́мнии:

В два́десять пя́тый по земли́ несмы́слении Ма́рка влачи́ша.

Всехва́льный Госпо́день апо́стол Ма́рко, всему́ Еги́пту и Ли́вии, и ва́рвастей стране́, и Пентапо́лии Христа́ пропове́да, во времена́ Тиве́рия ке́саря. Списа́ же е́же по себе́ свято́е Ева́нгелие, Петру́ апо́столу сказу́ющу ему́. И в Кирини́и Пентапо́льстей быв, мно́га чудеса́ соде́ла. Посе́м во Еги́петскую Александри́ю прии́де, и отту́ду в Пентапо́ль. Везде́ чудоде́йствуя, и Христо́вы це́ркви украша́я, рукоположе́ньми епи́скоп и про́чих приче́тник. Последи́ же па́ки во Александри́ю прише́д, и не́ких от бра́тий в примо́риих скотопита́тельных обре́т, и пребы́сть с ни́ми сло́во Бо́жие благовеству́я и пропове́дуя. Иде́же наше́дше нань и́дольстии покло́нницы, не терпя́ще зре́ти я́же во Христа́ ве́ру поспешествуе́му, ужми́ того́ связа́вше и влача́ху, сража́ющижеся пло́ти его́ о ка́мения разбива́шеся, и кровь его́ зе́млю обагря́ше: вве́ржену же в темни́цу, яви́ся ему́ Госпо́дь предъизъявля́я хотя́щую ему́ сла́ву прия́ти. По днех же па́ки влачи́мь по сто́гнам: внегда́ сокруша́тися ему́ и разсыпа́тися на ка́мения, Бо́гу дух пре́дал есть. И е́же по прилу́чаю сло́га его́ бя́ше си́це: ниже́ к дебеле́й великотеле́сней те́лом воображе́н бя́ше: ниже́ па́ки вельми́ ни́зок, но в ме́ру подо́бен. Цветы́й седи́нами. Вла́сы гу́сты, но не до́лзи. И не вельми́ окруже́но лице́. Ве́жди помжа́рены, и брада́ черна́ густа́. Главо́ю препро́ст и румя́н. Бя́ше и вельми́ ми́лостив, к нему́ приходя́щим благопотре́бен, я́ко сия́ти ему́ теле́сною благосты́нею, и душе́вною доброде́телию. Соверша́ет же ся собо́р его в пречестне́м его́ апо́стольстве, су́щу близ Та́вра.

Стихи́:

Отступи́в Македо́ние с тленнаго стола́,

Воспева́еши боже́ственому серафи́мскому Престо́лу.

Стихи́:

Побе́дныя по́чести посече́ней Ни́це

Побе́дный Пода́тель подае́т тебе́, я́ко побе́де но́сице.

Стихи́:

Осми́м отсеко́ша муже́м вы́я,

Под Твои́м ярмо́м удручи́вшимся, Сло́ве.

Пове́даше а́вва Касия́н, о ста́рце седя́щем в пусты́ни, я́ко помоли́ся Бо́гу, да да́стся ему́ николи́же усну́ти, с су́щими в бесе́де духо́вней. А́щелиже кто праздносло́вна, и кле́ветна словеса́ поку́сится вноси́ти, а́бие усну́ти ему́, да не такова́го я́да вкуси́та слу́ха его́. И та́ко глаго́лаше, дия́вола бы́стра бы́ти праздносло́вию, и проти́вна вся́кому уче́нию духо́вному. Сицеву́ при́тчу рек. Глаго́лющу ми рече́ иногда́ о по́лзе с не́коим бра́том, та́ко тя́жко усну́вшим, я́ко ни бровма́ можа́х дви́гнути. А́зже хотя́ яви́ти па́кость де́мона пра́здно сло́во прине́с, ему́же возра́довавшуся, а́бие воспря́нув. Воздохну́в же рех, досе́ле о небе́сных веще́х глаго́лахом к себе́, и обе́ма на́ма о́чи сном удержа́стася. Внегда́ же сло́во пра́здно обре́теся, а́бие со дерзнове́нием воста́х. Те́мже возлю́блении разуме́вше вси сего́ бе́са де́тель, ко празносло́вию тща́ния, внима́йте себе́ храня́щеся от дрема́ния, внегда́ что сотворите́ духо́вно, или́ слы́шите. Рече́ па́ки, а́ще отяготи́шися не́когда от бра́шен, вдаждь себе́ на труды́ теле́сныя, да́же пре́же но́щи оле???еши, и не у́зриши мечта́ния зла, и бу́ди я́ко боре́ц добр на дия́вола. А́ще уда́рит тя он отону́ду, уда́ри и ты его́ отсю́ду. А́ще удержи́т тя бра́шны, отжени́ его бде́нием. А́ще отяготи́т тебе́ сном, сокруши́ себе́ трудо́м теле́сным. А́ще прельсти́т тебе́ тщесла́вием, сотвори́ де́ло, или́ о́браз пред людми́, да обезче́стят тебе́. Сия́ у́бо веждь я́ко ни о чем же ино́м та́ко скорби́т и упражня́ется сатана́, я́ко егда́ челове́к смире́ние и безче́стие лю́бит.

Бра́тие, при́сно жада́ет на́шего спасе́ния Госпо́дь Бог наш, и непреста́нно призыва́ет ны святы́м Ева́нгелием в ве́чную жизнь, веля́ нам при́сно вся́ку скве́рну и житие́ нечи́стое отврещи́ от себе́, и чи́стым се́рдцем приступи́ти к Нему́, и прия́ти о́но Ца́рство из Него́же испадо́хом преступи́вше за́поведь, я́же бе пре́жде дана́ Ада́му пра́деду на́шему в раи́ дре́вле, воздержа́ния ра́ди. А́ще бы ю́ сохрани́л, во ве́ки бы жив был без печа́ли и без сме́рти. Егда́ же за́вистию дия́волею сла́вы Бо́жия отлучи́ся невоздержа́ния ра́ди, отто́ле нападо́ша на челове́ческий род печа́ли и стра́сти, и смерть пременя́ющи живо́т челове́чь.

И того́ ме́ста жела́юще святи́и му́ченицы и пра́ведницы, кре́пко препоя́савше чре́сла своя́, и брань прии́мше на проти́внаго, и победи́вше его́, па́ки внидо́ша в пе́рвую поро́ду. И ны́не вхо́дят и́же де́лы до́брыми украси́вшеся, и власть и бога́тство поверго́ша, и́же ско́ро ми́мо хо́дит, изменя́емо времены́ и ле́ты.

Те́мже не льсти́мся бра́тие, ни я́ко безсме́ртни мня́щеся предади́мся похоте́м жития́ се́го. И́же бо житию́ сему́ порабо́тится, то враг Бо́жий быва́ет, и па́губник души́ свое́й. Но воспря́нем отны́не, да не лиши́мся сла́вы Бо́жия и ра́дости ве́чныя. Воздви́гнемся от пре́лести ми́ра сего́, и я́коже обеща́хомся Го́сподеви в порожде́нии свята́го креще́ния, пред мно́гими по́слухи си́це глаго́люще: «Отрица́юся сатаны́ и всех дел его́». Сия́ же суть сатанина́ де́ла: идолослуже́ние, братоненави́дение, клевета́ние, гневодержа́ние, лжа, за́висть, я́рость, не́нависть, разбо́й, татьба́, пия́нство, объяде́ние, оби́да, пе́сни бесо́вския, пляса́ние, хуле́ние, срамосло́вие, волхвова́ние, детопогубле́ние, го́рдость, преступле́ние кля́тве, е́же кля́тися и́менем Бо́жиим. А́ще сих дел оста́немся, то взы́щем вся́кия доброде́тели. Я́коже и пи́шется: «Уклони́ся от зла, и сотвори́ добро́». Да а́ще отсе́ле оста́немся от злых дел, то у́бо па́ки вни́дем в ту же поро́ду. Что же у́бо есть мерзча́е таковы́х злых дел? Тем бо гнев Бо́жий прихо́дит на ны.

Но да соверши́м обетова́ния на́ша я́же ко Го́споду на́шему, возлю́бим Его́ всем се́рдцем, и все́ю мы́слию свое́ю, и бли́жняго своего́ я́ко са́ми себе́. Братолю́бием цвету́ще, да вни́дем ра́дующеся в ве́чную жизнь, и в безсме́ртный жи́вот, и неизрече́нную красоту́. Ея́же жела́я блаже́нный апо́стол Христо́в Ма́рко, подви́гнуся жития́ сего́ сла́дости попра́ти, бога́тство раздая́ ни́щим, и подви́гнуся в ве́чная жили́ща всели́тися. И той Христо́ва гла́са послу́шав, я́коже рече́ взыва́я ны к Себе́: «Не убо́йтеся от убива́ющих те́ло, а души́ не могу́щих погуби́ти. Но па́че убо́йтеся власть иму́щаго по убие́нии воврещи́ в гее́нну о́гненую». Те́мже у́бо бра́тие ка́я по́льза есть, а́ще и весь мир приобря́щем, а ду́шу свою́ погуби́м или́ отщети́м, и чим иску́пим ду́шу свою́ от му́ки ве́чныя? То́чию а́ще оста́немся зла, и пока́емся, и ни́щим дади́м.

Но потщи́мся отсе́ле те́сным путе́м вни́ти в ве́чную жизнь: си́речь воздержа́нием, поще́нием, не то́кмо от бра́шен и от похоте́й воздержа́щися, но от вся́каго зла. Бе́гай греха́ губя́щаго ду́шу и те́ло. Томи́ плоть свою́ Христа́ ра́ди, я́коже пострада́ святы́й Ма́рко апо́стол, вся му́ки и поно́сную смерть Христа́ ра́ди Сы́на Бо́жия прия́т. Те́мже сия́ет ны́не во сла́ве Бо́жией, па́че со́лнечнаго сия́ния. И в па́мять его́ ди́вна чудеса́ и исцеле́ния сотворя́ет Госпо́дь Бог наш. И́же бо ве́рою чтет па́мять свята́го апо́стола, то от всех изба́вится бед и от грех, и вся́кия напа́сти избу́дет. Тому́ бра́тие поревну́ем, и та́ко же до́брая де́ла сотвори́м. И той челове́к же бе я́коже и мы: но вся́ку зло́бу возненави́де, а Бо́жию во́лю сотвори́. Ю́же потщи́мся и мы сотвори́ти, да бу́дем сы́нове Све́та и прича́стницы Ца́рствия Его́. Ему́же сла́ва, ны́не и при́сно и во ве́ки веко́в. Ами́нь.