Стихи́:

У́мер уязви́вый власяно́ю оде́ждею, о́тче,

Обле́кшаго ро́ду нача́льники ли́ствием:

В двадеся́тый Фео́дор на земли́ ко́сти своя́ оста́ви.

Фео́дор преподо́бный оте́ц наш нарече́нный Трихи́на, бе в Константи́не гра́де рожде́н и воспита́н, бога́ту роди́телю сын. Оста́ви же роди́теля и бога́тство и сла́ву, и шед в монасты́рь нарица́емый его́ ра́ди Трихи́на, и бысть мних. И тольми́ жестоко́ пребыва́ние сотвори́, я́ко мертв ви́димь все́ми, всю нощь с зимо́ю и с ле́дом боря́шеся стоя́ и моля́ся, еди́ну ри́зу нося́ то́нку и власяну́, и того́ ра́ди Власяни́н нарече́н бысть. Бе же у́бо сей главу́ не покрове́ну име́я. Тем и над бе́сы власть прия́т. И мно́га чудеса́ сотвори́в, ко Го́споду отъи́де. И до сего́ дне чудеса́ сотворя́ет пресла́вная.

Стихи́:

Пафну́тия в землене́м гро́бе сокрове́на,

Пресе́льник быв и молча́нием сокры́т во гро́бе.

Стихи́:

Анаста́сие, тебе́ какову́ напишу́ благода́ть,

Христа́ ра́ди тща́щутися умре́ти мече́м?

Стихи́:

Анаста́сие на Сина́и Моисе́й но́вый,

И пре́жде кончи́ны Бо́га зре́ти име́я.

Анаста́сий богоно́сец преподо́бный оте́ц наш, оста́вив мир и я́же в ми́ре, и крест свой на ра́мо взем, по за́поведи свята́го Ева́нгелия восле́дова ра́достно Христо́ви. И отше́д в монасты́рь и бысть мона́х, и жела́ше бо́льших по́двиг поуче́ния. И мно́гия доброде́тели сотвори́. Посе́м прии́де во Иеросали́м поклони́тися святы́м и честны́м ме́стом. Посе́м и́де на Сина́йскую го́ру, и обре́те святы́я мона́хи. И пребы́сть у них повину́яся им, и рабо́тая усе́рдно. Смире́нная же му́дрости его́ ра́ди прия́т от Бо́га дар исцеле́ния, и ра́зума и му́дрости мно́ги научи́. Отню́дуже и жития́ святы́х оте́ц списа́в. И бысть игу́мен горы́ Сина́йския. И душеполе́зная словеса́ мно́га списа́. И па́че всех Бо́гови угоди́в, и в глубо́це ста́рости ко Го́споду отъи́де.

И́же в ве́ре суть христиа́нстей, вся́кому челове́ку дае́тся от Бо́га а́нгел на сохране́ние, во весь живо́т его́, а́ще кто де́лы злы́ми не прожене́т еѓо. Я́ко бо пче́лы дым прого́нит, а го́луби злый смрад, та́коже у́бо и храни́теля живота́ на́шего а́нгела, зли́и на́шы греси́, пия́нство же и блуже́ние, и гневодержа́ние, и про́чая зла́я дела́, ти́и свята́го а́нгела отдаля́ют от нас. О том у́бо и проро́к рече́: Не даждь на подвиже́ние ноги́ твоея́, да не воздре́млет храня́й тя: си́речь, на подвиже́ние ноги́, на и́гры, па́че це́ркве: и кощу́ны, и ба́сни люби́ти, па́че книг. А е́же у́бо воздре́млет, ре́кше отбе́гнет злоб ра́ди на́ших. Егда́ бо челове́ческий род сотвори́ Бог, а́нгелом повеле́ соблюда́ти их. И вся́кого у́бо ве́рна челове́ка, ангел ду́шу его направля́ет на вся блага́я. А бе́сове мно́го ве́рным блазня́т, благоуго́дно живу́щым, да бы их Ца́рства небе́снаго лиши́ли: Но а́нгел Бо́жий не оста́нет соблюда́яй я́. А неве́рным не блазня́т ни стужа́ют бе́си, но льстят ве́рныя, да с ни́ми бы осуди́лися в му́ку. Егда́ же челове́к ве́рный в пра́вде живе́т, а́нгел Бо́жий ра́дуется о нем. А егда́ не на́чнет и́стины твори́ти, но лга́ти и кра́сти, упива́тися и зави́дети, к це́ркви не ходи́ти, гне́ватися, ва́дити, скуп бы́ти, тогда́ у́бо а́нгел Бо́жий скорби́т о нем, а бе́сове лику́ют, вся́чески люте́йшыя зло́бы наводя́ще нань. О том вели́кий Васи́лий рече́: Я́ко а́нгели напису́ют имена́ всех приходя́щих к це́ркви, без гне́ва и без зло́бы, и вся моля́щыяся и постя́щыяся. Блюди́ о́ человеч́е, да не ле́ности ра́ди лиши́шися а́нгелова написа́ния. Вся́кому бо ве́рному, от Бога кому́ждо а́нгел дан бысть, и той вся дела́ его́ до́брая напису́ет. А неве́рным ко́ейждо стране́ еди́н а́нгел Бо́жий есть: я́коже Писа́ние рече́: Поста́ви преде́лы язы́ков по числу́ а́нгел Бо́жиих. Антио́х рече́: Подо́бно нам внима́ти себе́ поле́зная: я́ко два а́нгела с челове́ком еста, еди́н пра́ведный, а други́й сатани́н. И а́нгел у́бо Бо́жий кро́ток и молчали́в, ми́лостив и срамяжли́в: Егда у́бо сей на се́рдце человеку взы́дет, сове́тует о пра́вде, и о чистоте́, и о смире́нии, и о покоре́нии, и и любви́, и о ми́лостыни. Лука́вый же серди́т, горд есть и зави́длив: гневли́в же и скуп, и братоненави́длив, и непокори́в, и вся его́ суть зла́я дела́. От дел у́бо коего́ждо да позна́ем. Лука́вому же не дади́м мы в себе́ ме́ста, но стра́хом Бо́жиим отжене́м его́. А пра́ведному отве́рзем се́рдце прия́ти и́, да на и́стину наста́вит ны: и от проны́рства диа́воля изба́вит нас, и собла́зн его́.

Добро́ есть отню́д и поле́зно испове́дати грехи́, ко иску́сным духо́вным отце́м, а не к неве́жам и не иску́сным, и ни е́же о сих неразсматря́ющым. Да неполе́зною их любо́вию и строе́нием неисце́лным, и нехи́трым повеле́нием, епитемия́ преоби́дится, и неполе́зна соде́лает и лени́ва ка́ющагося. А́ще у́бо обря́щеши му́жа духо́вна могу́щаго тя уврачева́ти, не стыди́ся, испове́ждься ему́ а́ки к Бо́гу, а не к челове́ку. Рече́ бо не́кто от святы́х, му́дрый о души́ свое́й не стыди́тся паде́нием свои́м, и не срамля́ется испове́дати грехо́в свои́х и не зазо́рится. Глаго́лет бо Иоа́нн Богосло́в. А́ще бо испове́мы грехи́ своя́, ве́рен есть Госпо́дь и пра́веден, отпу́стит нам грехи́, и очи́стит ны от вся́кия непра́вды. Но мно́зи от гру́бости лицеме́рнии попо́ве, сту́дная де́юще де́ла, не то́кмо са́ми ходя́ще в тиме́нии злых дел, но и учи́тели быва́ют на зло. Да ни са́ми прихо́дят к све́ту, ни хотя́щим приити́ попуща́ют. Тем у́бо Госпо́дь о таковы́х глаго́ла, го́ре вам кни́жницы и фарисе́е лицеме́ри, я́ко затворя́ете Ца́рство небе́сное от челове́к, са́ми бо вы не вхо́дите, и хотя́щим вни́ти не дадите́. И па́ки, вы есте́ свет ми́ру и соль земли́. И ели́ка а́ще свя́жете на земли́, бу́дут свя́зани на небеси́. Да то́го ра́ди несть льзе без епитемии́ отпуща́ти по мзде согреше́ния. Те́мже я́ко челове́к есть и к челове́ку испове́дайся, а Бог темь обраща́я и наказу́я, прости́т, я́коже и Нафа́ном Дави́да. Тем и глаго́лаше обрати́ша мя боя́щиися Тебе́ Го́споди, и ве́дущеи свиде́ния Твоя́. Пока́жет мя пра́ведник ми́лостию, и обличи́т мя. И́бо иере́и слуги́ Бо́жии, и сожи́тели а́нгелом, и строи́тели су́ще спасе́ния. Се бо и апо́стол глаго́лаше, та́ко да мнят нас я́ко слуги́ Христо́вы и строи́теля та́йнам Бо́жиим. И челове́к бо челове́ку помага́ет, покая́нием облича́я запреще́ния. Бог же очища́ет грехи́ ка́ющимся и не помяне́т ктому́. Рече́ бо, глаго́ли ты пе́рвое грехи́ своя́, да оправди́шися. Бо́гу на́шему сла́ва, ны́не и при́сно и во ве́ки веко́в.