Стихи́:

Похи́ти дух те́ло, и па́ки пове́рже

Врата́ землена́я скры́ша ме́ртву Мари́ю:

В пе́рвый апри́ля Мари́ю обре́те смерть в пусты́ни.

Преподо́бная Мари́я бе от Еги́пта, от ю́ности пре́жде пожи́вши в блуде́ за седмьна́десять лет невстягнове́нно. И сицево́ю вино́ю прии́де в покая́ние: ви́де не́кия ю́ношы ле́зуща в кора́бль, и вопроси́ их: ка́мо и́дут. И ре́ша ей: «На поклоне́ние честна́го Креста́ во Иерусали́м», и умоли́ их с собо́ю поя́ти себе́, не я́ко жела́ющи честно́му Дре́ву поклони́тися, но несы́тством грехо́вным пали́ма. Вше́дши бо в кора́бль, мно́ги оскверни́. И во Иерусали́ме бы́вши, возбране́но ей бысть вни́ти в церко́вная врата́ а́нгелом, иде́же спасе́ное дре́во честна́го Креста́ бя́ше, и три́жды пону́дившися вни́ти, и не возмо́же вни́ти. И помы́сливши вся своя́ согреше́ния, и уклони́вшися во у́гол па́перти церко́вныя, и ту ви́де ико́ну святы́я Богоро́дицы, и о свои́х гресе́х пред Не́ю ка́ющися, глаго́лаше: «О́ Пресвята́я Богоро́дице Де́во, Ро́ждьшая Спа́са всего́ ми́ра, ве́де у́бо я́ко несть благоле́пно мне скве́рной блудни́це на святу́ю Твою́ ико́ну воззре́ти. Пра́ведно же у́бо мне и ненави́диме бы́ти Твое́ю чистото́ю, и мерзе́ти ми пред Тобо́ю. Но оба́че бу́ди мне Помо́щница, и Пору́чница о мое́м покая́нии к Сы́ну Своему́ и Бо́гу моему́». И се ре́кши, и помоли́вшися, и в це́ркви бы́вши, и честно́е Дре́во кре́стное целова́вши, и́де на Иорда́н. И в це́ркви Предте́чеве причасти́вшися Пречи́стых Та́ин, и предаде́ся вели́кому воздержа́нию и доброде́телем. И тольми́ вознесе́ся беззстра́стием, я́ко и реку́ ей преходи́ти по верху́ вод нога́ма, моля́щися Бо́гу. И преше́дши же Иорда́н, пребы́сть в пусты́ни, четы́редесять седмь лет, подвиза́ся без покро́ва нага́, ни еди́наго челове́ка ви́дев, но Бо́га еди́наго имя́ше Ви́дца, и челове́ческаго естества́ не отступа́юща. Последи́ же по Бо́жию про́мыслу яви́ся Зоси́ме свято́му ста́рцу, во вну́тренюю пусты́ню вше́дшу ему́: и бесе́довавши с ним, и я́же о себе́ пове́давши. И ви́дена бысть Зоси́мою на возду́се стоя́ща. И па́ки в прииду́щее ле́то Иорда́н преше́дши, причасти́вшися от свята́го Зоси́мы, и посе́м в свое́ ме́сто возврати́вшися, и при пото́це иде́же с Зоси́мою бесе́довавшу у́спе. В прииду́щее же ле́то шед Зоси́ма, обре́те ю́ ме́ртву. И не могу́щу ему́ погребсти́ ея́ от ста́рости, прише́д лев, и пре́днима нога́ма ископа́в я́му блаже́нней: и промышле́нием Бо́жиим погре́б ю́ ста́рец, и возврати́ся.

Сей преподо́бный оте́ц Мака́рий роди́ся в Константи́не гра́де. И млад обсире́в прия́т быв свои́м стры́ем. И пре́дан свяще́нным кни́гам к наказа́нию. Десна́го естества́ сый. И мно́го прилежа́ние показа́в, на́скоре вся́ко писа́ние проходя́. Проуве́дев же свою́ вре́менную кончи́ну, и ско́рое отхожде́ние, и небе́сное присносу́щие, и того́ ра́ди из гра́да изше́д, всели́ся в монасты́рь Палеки́т нарица́емый, и примеси́в себе́ с та́мошними мни́хи. Христофо́рское и́мя отложи́в, и Мака́рий о́неми именова́шеся. И ту ма́ло пребы́в, во вся́ких слу́жбах монасты́рских послужи́в, и доброде́тели испра́вив. И ра́ди мно́гаго его́ смире́ния, бысть нача́лник, ку́пно и чудотво́рец изя́щен. И́бо неисцели́мыя боле́зни и стра́сти врачева́ше Бог его́ ра́ди. И дождь с небесе́ моли́твою на зе́млю сведе́. Того́ ра́ди вели́ку и сла́вну ему́ бы́вшу. Во дни бо о́ны мно́гое мно́жество притека́ху к нему́. О́ви душе́вная бремена́ его́ ра́ди очища́юще. А ини́и теле́сная врачева́ния взе́млюще. Друзи́и же душе́вно и теле́сно оздравля́ющеся, в своя́ отхожа́ху. Таково́е же прослу́тие слы́шав, Тара́сий святе́йший патриа́рх Константи́на гра́да. Посла́ к нему́ патри́кия Па́вла, ему́ же от свята́го уврачева́ну бы́вшу, им же доведе́н и к патриа́рху Тара́сию. Тогда́ и жене́ патри́киве от враче́в оста́влене бы́вши, и сим святы́м оздра́вевши. Его́же патриа́рх ви́дев и благослови́в, и святи́теля Госпо́дня того́ сотвори́. Не преслуша́нием бо неду́гуя святы́й я́коже ини́и мно́зи, но послуша́ние учинева́ше е́же к жи́зни водя́щее. Доше́д же к оби́тели свое́й, па́ки смире́ние имя́ше бо́лее, не́же ли и́же име́яше пе́рвее. Тогда́ у́бо соблазноде́лец дия́вол, царя́ мучи́теля в Византи́и посади́в, и́же всечестны́я ико́ны огню́ и воде вдая́ше. Ему́ же пронарекова́ние Лев Армени́н. И́же и святе́йшаго патриа́рха Ники́фора во изгна́ние посла́. Архиере́и же и архимари́ты, изгна́нием и темни́цами, и лю́тыми му́ками удруча́ше. Тогда́ и ди́вный сей мужь, еди́н сый от воспомянове́нных, святы́х муже́й, разли́чно му́чен быв, и в темни́цах пребыва́я да́же до конца́, повеле́нием преокая́ннаго о́ного царя́. По нем же ца́рьствова Михаи́л Тра́влый, и той ме́рзностней слу́жбе его́ после́дуя. Той у́бо изведе́ свята́го из темни́цы, и мно́го ласка́в, и претя́, и ничто́ же успе́. Тем же в Енафу́сий о́стров того́ изгна́в, и в темни́це тве́рде затвори́в. Святы́й же вся до́блествене стерпе́в, благода́рьствуя Бо́га. Закосне́в же в такове́м изгна́нии, и мно́жае подви́гся. И знамени́т и дово́лен чудотво́рец быв, и отъи́де ко Госпо́ду.

Стихи́:

С Васили́дом Геро́нтий мече́м

Ста́рому приобщи́шася всеца́рствующему Сло́ву

Стихи́:

Аха́з бли́же Бо́га стоя́,

Аха́з, и́же рече́: Бо́га моего́ не искушу́.

Блаже́нный оте́ц наш Па́вел Просты́й учени́к свята́го отца́ Анто́ния, пове́даше вещь сию́. Я́ко не́когда и́де в монасты́рь посеще́ния ра́ди бра́тии, и ти́и вхожда́ху в це́рковь по обы́чаю соверша́ти пе́ние. Блаже́нный же Па́вел ви́дяше коего́ждо входя́ща в це́рковь како́ю душе́ю. Име́яше бо сию́ благода́ть да́нную ему́ от Бо́га. И я́ко вси вла́зяху све́тлым лице́м, и просвеще́нною душе́ю, а́нгел же Госпо́день с ко́имждо идя́ше ра́дуяся. Еди́наго же рече́, ви́дех бра́та входя́ща че́рна душе́ю. Де́моны же о́ба по́лы иду́щя его́, имя́ лице́ю за нос его́ е́мшя и ме́жи собо́ю влеча́щя. Святы́й же а́нгел издале́ча за ним после́доваше. И се ви́дев Па́вел печа́лен быв вельми́. И рука́ма бя́ше в пе́рси своя́, седя́ше пред це́рковию пла́чася. Они́ же ви́девше такова́го му́жа ско́рбна, вопроша́ху и моля́щеся, пове́дати виде́ние. Боя́щеся, еда́ приче́м за́зрит всех. И моля́ху его́ на пе́ние вни́ти. И отре́кся им Па́вел, седя́ше вне и пла́кася. И отпе́вше в це́ркви, и всем исходя́щим. И ви́де Па́вел всех ка́цы внидо́ша, хотя́шеже па́ки разуме́ти, ка́цы и изы́дут. И ви́дев того́ бра́та исходя́ща из це́ркве всего́ бе́ла душе́ю, и све́тла лице́м. Де́моны же дале́че по нем после́дующя. И свята́го а́нгела близ его́ иду́ща, ти́ха и ве́села ра́дующася о нем вельми́. Воскочи́в же Па́вел, благословя́ше Бо́га глаго́ля. О сла́ва безчи́сленому человеколю́бию Твоему́, и благосты́ни Твое́й неизрече́нней. И возше́д на высо́кий степе́нь, ве́лиим гла́сом вопия́ше, прииди́те и ви́дите де́ла Бо́жия я́ко ди́вна, и вся́кого у́жаса досто́йна. Прииди́те и ви́дите хотя́щаго вся́кому челове́ку спасти́ся, и в ра́зум и́стинный приити́. Прииди́те поклони́мся и припаде́м Ему́, и рцем я́ко Ты мо́жеши Еди́н отпуща́ти грехи́. Вси же притеко́ша к нему́, хотя́ще послу́шати глаго́лемых от него́. И собра́вшимся всем, пове́даше Па́вел явле́нное ему́ пре́жде вхожде́ния в це́рковь. И моля́ше му́жа того́ пове́дати ему́ вину́, ея́же ра́ди даде́ ему́ Бог толи́ко прело́жение. Обличе́н же быв челове́к той от Па́вла пред все́ми, и не сумня́ся я́же глаго́лаше о себе́. Аз у́бо есмь гре́шен челове́к, и вся ле́та живота́ моего́ в любодея́нии изжи́х и досе́ле. И вшед ны́не в це́рковь святу́ю, слы́шах что́ма вели́каго проро́ка Иса́ию, па́че же Бо́га в нем глаго́люща, измы́йтеся и чи́сти бу́дете, отъими́те лука́вство от душ ва́ших пред очи́ма Мои́ма. Научи́теся добро́ твори́ти. А́ще бу́дут греси́ ва́ши оброще́ни, я́ко снег убелю́ я́, и а́ще послу́шаете Мене́, блага́я земна́я сне́сте. А́з же гре́шный умили́хся душе́ю, вельми́ воздохну́в, и рех к Бо́гу в помышле́нии, я́ко Ты Еди́н еси́ Бо́же, прише́дый на зе́млю гре́шных спасти́, я́коже бо пре́же проро́ком глаго́ля, се ны́не де́лом сконча́ по мне гре́шнем и недосто́йнем. Се бо отсе́ле даю́ Ти сло́во, обеща́яся, усты́, и се́рдцем испове́даяся, я́ко не и́мам ктому́ того́ сотвори́ти зла, но отмета́юся вся́кого беззако́ния. И порабо́таю Ти с чи́стою со́вестию. Днесь у́бо Влады́ко приими́ мя ка́ющагося и отгреба́ющася от вся́каго зла. И с си́ми рече́ мы́сльми, изыдо́х из це́ркве, осуди́в ду́шю мою́ ктому́ не сотвори́ти греха́ пред очи́ма Бо́жиима. Се же слы́шавше, вси единогла́сно возопи́шя, я́ко возвели́чишася де́ла Твоя́ Го́споди, вся прему́дростию сотвори́л еси. Да се разуме́юще бра́тие от святы́х книг Бо́жияго открове́ния, коли́ку и́мать Бог благосты́ню, на прибега́ющих к Нему́ все́ю мы́слию с покая́нием, и очища́ющым грехи́ своя́. И воздае́т обеща́нная блага́я, не истяза́я о пе́рвых гресе́х. Того́ ра́ди не отча́емся своего́ спасе́ния; и́бо Иса́ием проро́ком обеща́, очерни́вшимся грехи́ измыва́ти и блага́я иеросали́мова сне́сти; и па́ки Иезекии́лем с кля́твою глаго́лет, живу́ Аз, я́ко не хощу́ сме́рти гре́шнику, но обраще́ния животу́.

Фарао́н царь, коли́ка прия́т долготерпе́ния Бо́жия? Терпя́ше бо ему́ Бог, творя́щу мно́га зла́я. Ви́дите у́бо, я́ко последи́ за вся зла́я прия́т отме́стие, и лю́тую ка́знь. Не то́кмо е́же жития́ сего́ зле отлуче́н есть, но и она́мо лю́те и неми́лостивно му́чимь бу́дет. Того́ де́ля нам бра́тие, больми́ досто́ит тужи́ти, скорбе́ти же и боле́зновати па́че о тех, и́же благодея́ния зде, и здра́вия прие́млют, во зло́бе живу́ще, и ничто́ же творя́ще добра́, ско́рби же и боле́зни и никако́го Бо́жия присеще́ния к себе́ не ви́дящи.

Егда́ же ли за зла́я на́ша де́ла, наво́дит на ны ка́зни Бог, и томле́ния немощьми́, легча́е нам твори́т о таковы́х суд. А́щели по коему́ждо согреше́нию терпи́т, вели́ко нас ожида́ет зло осужде́ние. А́ще бы никто́ зде приима́л зла, никто́ бы мнел Бо́га над на́ми су́ща. А́ще ли бы па́ки зде ко́ждо по де́лом приима́л, никто́же бы мнел, я́ко бы́ти воскресе́нию ме́ртвым, я́ко всем по де́лом прие́млющим. Того́ ра́ди ины́я зде томи́т, а ины́я оставля́ет. Мно́зи же пра́веднии, за ма́лая согреше́ния зде восприе́млют ка́зни. Мно́ги же ви́дим злы́я здра́вы телесы́, и благоде́нствующа, но она́мо бу́дет таковы́м вельми́ лю́то.

Афана́сий Вели́кий рече́: «Мно́зи правди́вии ду́шу влеку́т на мно́ги дни боле́зньми зле: не́цыи же гре́шнии ми́рно и вско́ре и́здшут». Григо́рий рече́: «Мно́гажды благочести́вии мно́ги ско́рби и туги́ пре́жде, и во вре́мя сме́рти прие́млют: зане́ ма́лы и́мут не́каки грехи́, да тех изба́вятся. Несть бо пра́ведна, и́же что не иму́ща греха́. И несть гре́шника, и́же не и́мать что добра́». Анаста́сий Сина́йский рече́: «По трех ли́цех пра́веднии напра́сною сме́ртию, восхи́тими быва́ют: или́ от зве́ря и от воды́, или́ от гро́ма и от огня́: да и про́чии ви́девше умудря́ются на до́брая де́ла, а ини́и за худы́я грехи́, зде томле́ния прие́млют».

Сия́ у́бо ве́дуще, да не смуща́емся. Проро́к Иса́ия претре́н бе. Стефа́н ка́мением побие́н. Петр апо́стол распя́т. Иоа́нн Предте́ча мече́м посе́чен. И ини́и мно́зи святи́и, лю́тыя беды́, и разли́чныя сме́рти приима́ху. А и́же гре́шнии, ну́жною и лю́тою умира́ют сме́ртию, да про́чии убоя́тся тех в ка́зни ви́девше. А ти́и и́же умира́ют лю́те, часть оставле́ния от мук прии́мут. Ты же не чуди́ся, егда́ кого́ ви́диши утону́вша, или́ земле́ю пода́влена, или́ со хра́мины па́дша, я́коже и о де́тех И́ововых: или́ я́ко о Маврики́и царе́, и́же Фо́це мучи́телю пре́дан, и лю́тою сме́ртию коне́ц прия́т. Зане́же Бо́жия судьбы́ неве́домы суть. И его́же лю́бит Госпо́дь, того́ и ка́жет . А и́же су́ще зли, и во оби́лии живу́т, и не прие́млют бед, такови́и лю́те бу́дут осужде́ни.

Мно́зи непочита́нием боже́ственых писа́ний, с пра́ваго пути́ соврати́шася, и заблуди́вше погибо́шя. Ини́и же и кни́ги почита́юще, не соверше́н име́яху ра́зум, та́коже и ти́и с пра́ваго пути́ соврати́шася, Бо́гу попусти́вшу им велича́ния ра́ди их. Зане́ ра́зум прии́мше, а пра́вды не творя́т по самохо́тию. Мужь бо кни́жен, а пия́ница, не мо́жет упра́витися на и́стину спасе́ния. И а́ще кто не уме́я книг му́друет, таковы́й подо́бен столпу́ или́ опло́ту без подпо́р стоя́щу. А́ще бу́дет ветр, то паде́тся. Та́ко и умудря́яйся, а не кни́жник, а́ще нань грехо́вный па́хнет ветр, то паде́т, не име́я подпо́р слове́с кни́жных. Му́дрость же и кни́ги, а́ще обоя́ вместя́тся в челове́це, то а́ки о́бе о́це в те́ле соверше́но иму́ще зре́ние. Пти́цам бо того́ ра́ди криле́ даны́, да сете́й челове́ческих избежа́т. А челове́ком кни́ги, я́же всю неприя́знену лесть обнажа́ют. Мно́зи бо суть ко́зни лука́ваго дия́вола, и́ми же уловля́ет челове́ки. О́вого бо гне́вом надыма́ет, а ино́го за́вистию устреля́ет. И́ного же на татбу́, и оби́дети учи́т. А ине́х на позо́ры, и на и́гры, и на пляса́ния поты́чит. А ино́го на пия́ньство, и на блуд ласка́ют. А ины́х на го́рдость остря́т, и ску́пости у́чат. А ино́го на кощу́ны, и на плеска́ние, и на пе́сни и на гу́сли поуча́ют. А ины́х ле́ностию окра́дуют, да бы́шя к Це́ркви не приходи́ли. Мно́гих бо соблажня́ют, хотя́ще от Бо́га отлучи́ти, и Ца́рства чу́жа сотвори́ти. Бог же челове́ком откры́ святы́ми кни́гами вся соблажне́ния лука́ваго дия́вола, да не прельсти́т боя́щыхся Его́. И дарова́ на дия́вола Крест честны́й, а на се́ти его́ святы́я кни́ги. Их же послу́шающе и сотворя́юще рече́нная, получи́м жизнь ве́чную, и со святы́ми вселе́ние, о Христе́ Иису́се Го́споде на́шем. Ему́же сла́ва ны́не и при́сно и во ве́ки веко́в.