Если чтения отсутствуют - значит, по данному дню еще не были добавлены тексты.
По первой кафизме:
Чтутся седальны по обычаю.Возлю́блене, христиани́н ли еси́ Бо́жиею благода́тию, то соблюди́ за́поведи Го́спода на́шего Иису́са Христа́, и спасе́н бу́деши. Пи́шет бо, я́ко по и́стине разумева́ю: «я́ко несть лицеме́р Бог, но во всех язы́цех боя́йся Бо́га и де́лаяй пра́вду прия́тен Ему́ есть». А́ще ли хо́щеши на испыта́ние мни́шеское прия́ти житие́, я́ко да и лу́чшее получи́ти, а́ще не положи́ши на уме́ си я́ко уже́ преста́вился еси́ от жи́зни сея́ и не оста́виши ми́ра сего́, ни сла́вы его́ я́ко се́ни разоря́емы, не мо́жеши победи́ти страсте́й земны́х, ни ми́ра сего́ жела́ний, я́же погружа́ют челове́ки пло́тию во отпаде́ние и поги́бель. Нелжив бо есть, реки́й: «И́же хо́щет во след Мене́ ити́, да отве́ржется себе́ и во след Мене́ да и́дет. Хотя́й бо ду́шу свою́ спасти́, погуби́т ю́, а погуби́вый ду́шу свою́ Мене́ ра́ди, обря́щет ю́. Что у́бо успе́ет челове́к, а́ще весь мир приобря́щет, ду́шу же свою́ отщети́т? Или́ что даст челове́к изме́ну за ду́шу свою́?».
Не бо есть нача́ло труду́, е́же положи́ти основа́ние. Ели́ко бо возно́сится зда́ние, толи́ко же и труда́ зи́ждущему до сконча́ния де́лу. Послу́шаим Спасе́наго гла́са глаго́лющаго: «Кто у́бо от вас хотя́й созда́ти столп, то не пе́рвее ли сед сочте́т жи́то (име́ние), а́ще и́мать до сконча́ния, да не когда́ положи́вшу ему́ основа́ние и не возмо́гшу соверши́ти, вси же ви́дящии начну́тся ему́ руга́ти глаго́люще: я́ко сей челове́к нача́т зда́ние и не возмо́же его́ соверши́ти». Брань бо вы́ну мала́ есть, а мни́ху до оше́ствия своего́ е́же ко Го́споду. Сего́ ра́ди подоба́ет нача́ти делеса́ со вся́цем тща́нием, и бде́нием, и терпе́нием. А́ще у́бо возлю́блене, на́чнеши закала́ти льва, кре́пко приими́ его́, да не ка́ко сокруши́т ко́сти твоя́, я́ко сосу́д здан. А́ще ли же вве́ржешися в мо́ре, не круподу́шен бу́ди, до́ндеже изы́деши на су́хо, да не сни́деши в глубину́ я́ко и ка́мень.
Бра́те, а́ще вни́деши подвиза́тися, трезви́тель буд́и, да не ка́ко супроти́вный победи́в тя поруга́ется, и в венца́ ме́сто прии́меши супроти́вная. Всяк у́бо хотя́й бы́ти черне́ц, се да и́мать гото́во е́же терпе́ти до́бле. Еда́ когда́ вше́дшу ему́ рече́т: «Не ве́дех, я́ко си́це ва́ми хотя́т бы́ти». И се провозвести́ло ти ся есть бра́те, да и ты по́мысл свой утверди́ши, вед́ый, я́ко от сего́ ти ся яви́т искуше́ние. Разуме́ ли глаго́лемое, возлю́блене, да не днесь пред дверьми́ сый вопраша́емь, рече́ши: «У́тро вся терплю́», и утро отве́ржешися делесы́. А́нгели Бо́жии предстоя́т и слы́шат вся исходи́мая устна́ма твои́ма. Блюди́ ся возлю́блене, ты сам прихо́диши к Бо́гу Жи́ву И́стинну, и обещева́ешися. Блюди́ся, да не солже́ши, я́ко погуби́т Госпо́дь вся глаго́лющая лжу.
Си у́бо быва́ют приходя́щему к Бо́гу: пе́рвое у́бо искуше́нием, посе́м же скорбь. Что же у́бо пото́м? Труд, уны́ние, нагота́, страсть, печа́ль, уничиже́ние. Си́ми бо ся яви́т терпе́ние и искуше́ния ве́рных, и си́ми все́ми победи́т, да́вый себе́ всем се́рдцем Бо́жию наставле́нию и стерпе́вый во́лю Его́, поне́же бо соверше́наго предложе́ния от нас и́щет Бог и Сам ны подае́т кре́пость и побе́ду да́рует. Я́коже пи́шет: «И Защи́титель есть всем упова́ющым Нань». И па́ки глаго́лет: «Близ Госпо́дь всем призыва́ющым И́ во и́стинну, во́лю боя́щихся Его́ сотвори́т и моли́тву их услы́шит и спасе́т я́».
Моли́те же ся за мя, молю́ вы, да не лени́мся. Даждь вам Госпо́дь непоро́чно сохрани́ти сия́. Не бо у́бо я́коже дости́гше в сия́ чи́сла сове́тую вам, но Го́спода Иису́са Христа́ призва́вше, Да́вца и Мести́теля словеси́, начина́ем у́бо обнажи́ти словеса́, да по́льзуем по́льзующе. Не бо, но глаго́лемии пимента́рии приле́жно испыта́ша ко́рения и о́бразы бы́лием, и вписа́ния преда́ша. И се смотре́ние Бо́жие непщу́ю на утеше́ние боля́щых по пло́ти, то кольми́ па́че поле́зное есть нам открыва́ти сокро́вище благода́тное по да́ру Его́. Не бо убежа́ му́ки раб проны́рством, скрыв тала́нт господи́на своего́. Кто же ли не воздохне́т то по́мня, всу́е иму́ща и́мя черне́ческое? Кто ли не воспла́чется мене́, погу́бльшаго гове́ние и терпе́ние? И что сотворю́ егда́ посети́т Влады́ка Христо́с? Те́мже молю́ вы возлю́блении, моли́те за мя недосто́йнаго раба́, я́ко да изба́влюся от настоя́щаго ве́чнаго огня́, и благода́ть да отве́рзет ми устне́, на славосло́вие Святы́я Единосу́щныя Тро́ицы, Отца́ и Сы́на и Свята́го Ду́ха, я́ко в руку́ Его́ мы и словеса́ на́ша. Той бо есть уча́ челове́ка ра́зуму, Тому́ сла́ва во веќи ве́ков. Ами́нь.
По второй кафизме:
Чтутся седальны по обычаю.Возлю́блене, а́ще отве́рглся еси́ жития́ сего́, и вни́деши во о́бщее житие́, мно́жайшую бра́тию, и хо́щеши с ни́ми жи́ти, и Бо́гу на́шему Иису́с Христу́ рабо́тати, и ви́деши не́кия бесе́дующа е́же неуго́дно есть Христу́, и ты не внима́й слове́с их, но оста́ви я́ глаго́лати к себе́. Глаго́лющеи бо неуго́дная Бо́гу, ти́и в ле́ности живу́т и уста́ их глаго́лют вы́ше вре́мене. Се́рдце бо развраще́но роди́т зла́я во вся́ко вре́мя. Ты же Бога имей пред очима. Пи́шет бо: «Предзре́х Го́спода пре́до мно́ю вы́ну, я́ко оде́сную мене́ есть, да ся не подви́жу», и да не научи́т тебе́ лю́тый змий глаго́лати: «Ста́рцы бо си́и зле живу́т, и что сотворю́, юн сый?». Но послу́шай Го́спода глаго́люща: «Мно́зи зва́ни, ма́ло же избра́нных». Люби́ у́бо спасе́н бы́ти, да бу́деши во избра́нных. Творя́щеи бо лука́вая, лю́бо во о́бщем житии́, лю́бо яко́м же то́кмо ме́сте – ти́и суть сы́нове лука́ваго, уподо́бишася пле́велом посреде́ пшени́цы. Бу́ди у́бо ты пшени́ца, да со́брана бу́деши в жи́тницу Госпо́дню. Да не я́ко пле́вел сгори́ши огне́м неугаса́емым. И ниже́ су́дим никому́же, не бо ве́мы ка́ко пребыва́ет кто в ке́лии свое́й или́ кото́рую боле́знь и́мать к Бо́гу, и ниже́ ви́дим смею́щаяся, или́ глаго́люща что. Те́мже подоба́ет кому́ждо вас себе́ внима́ти, ки́йждо бо вас за ся сло́во возда́ст Бо́гови. Вонми́ всем се́рдцем твои́м, пе́нием и чте́нием божес́твеных писа́ний: и испи́й от нея́ масть душе́ю си, я́ко младе́нец ссый сосца́. От того́ бо навы́кнеши стра́сти де́тельныя, и бу́дет ра́дость и весе́лие се́рдцу твоему́. Кро́ток бу́ди, и смы́слен, и послушли́в. Кро́ток же, да егда́ по́ймет тя отроча́, после́дствуеши ему́, и соверши́в дело молча́, возврати́вся в ке́лию свою́, молча́ же устна́ма, се́рдцем же моля́ся. Послушли́в же, да чистоту́ сохрани́ши телесе́ своего́ о Го́споде я́ко чи́стый би́сер. Ри́зами же не украша́йся, и роди́тели бога́тыми не возноси́ себе́. Хваля́йся о Го́споде да хва́лится. Вся́ка бо сла́ва челове́ча, я́ко цвет травны́й. И́зсше трава́, и цвет ея́ отпаде́т. Глаго́л же Госпо́день пребыва́ет во ве́ки. До́лу о́чи име́ти, а ду́шу горе́. Со блудни́цею не твори́ти бесе́ды. С жено́ю не ли́хо что глаго́лати. Со де́тищем не умно́жити слове́с. С пия́ницею же и с кото́рником, или́ с безчи́нником и со сме́шником не смеша́тися, но в стра́се Бо́жии стоя́ти весь день. Глаго́лет бо апо́стол: «В прему́дрости ходи́те искупу́юще вре́мя, я́ко дни́е лука́ви суть. Сего́ ра́ди не быва́йте несмы́слени, но разумева́юще, что есть во́ля Бо́жия, блага́я и уго́дная и соверше́ная. И не упива́йтеся вино́м, в не́мже есть блуд». Да постыдя́тся супроти́внии, никако́я же злы́я вещи имы́й глаго́лати о нас. Ами́нь.
На третьем часе:
СЛО́ВО В҃. Ѡ҆ безпристра́стїи си́рѣчь печа́ли.
И҆́же вои́стиннꙋ гдⷭ҇а возлюби́вый: и҆́же вои́стиннꙋ црⷭ҇твїе бꙋ́дꙋщее полꙋчи́ти взыска́вый: и҆́же вои́стиннꙋ болѣ̑знь ѡ҆ свои́хъ согрѣше́нїихъ воз̾имѣ̑вый: и҆́же вои́стиннꙋ па́мѧть мꙋ́ки стѧжа́вый и҆ сꙋда̀ вѣ̑чна: и҆́же вои́стиннꙋ стра́хъ ѡ҆ свое́мъ и҆схо́дѣ воспрїе́мый: не ктомꙋ̀ возлю́битъ: не ктомꙋ̀ восприлѣжи́тъ, и҆лѝ попече́тсѧ, ни ѡ҆ и҆мѣ̑нїихъ, ни ѡ҆ стѧжа́нїихъ, ни ѡ҆ роди́телехъ, ни ѡ҆ сла́вѣ житїѧ̀ сегѡ̀, ни ѡ҆ дрꙋ́зѣхъ, ни ѡ҆ бра́тїи, ни ѡ҆ чесо́мъ назе́мномъ ѿню́дъ: но всѐ своѐ ѹ҆свое́нїе, всѐ є҆́же ѡ҆ се́мъ попече́нїе ѿтрѧ́съ и҆ возненави́дѣвъ: є҆ще́ же и҆ пло́ть свою̀ пре́жде си́хъ, на́гъ и҆ без̾ попече́нїѧ и҆ без̾ лѣ̑ности хрⷭ҇тꙋ̀ послѣ̑дꙋетъ, на нб҃о при́снѡ зрѧ̀, и҆ по́мощи ꙗ҆́же ѿтꙋ́дꙋ ѡ҆жида́ѧ, по ст҃о́мꙋ ре́кшемꙋ: прилпѐ дш҃а̀ моѧ̀ по тебѣ̀ (ѱа. ѯ҃в, ѳ҃): и҆ и҆но́мꙋ приснопа́мѧтномꙋ ре́кше-мꙋ: а҆́зъ же не ѹ҆трꙋди́хсѧ послѣ̑дꙋѧ тебѣ̀, и҆ днѐ и҆лѝ поко́ѧ чл҃вѣ̑ча не пожела́хъ гдⷭ҇и (і҆ер. з҃і, ѕ҃і).
в҃. Сра́мъ велича́йшъ є҆́сть є҆́же всѧ̑ предречє́ннаѧ ѡ҆ста́влшымъ по зва́нїи на́шемъ, и҆́мже гдⷭ҇ь позва̀ на́съ, а҆ не чл҃вѣ̑къ, ѡ҆ нѣ̑чесомъ попещи́сѧ не могꙋ́щемъ на́съ ѹ҆бл҃годѣ̑телствовати во ча́съ ѻ҆́нъ нꙋ́жды на́шеѧ, си́рѣчь и҆схо́да. Сїе́ бо є҆́сть є҆́же речѐ гдⷭ҇ь ѡ҆брати́тисѧ вспѧ́ть, и҆ не ѡ҆брѣсти́сѧ ѹ҆пра́вленꙋ въ црⷭ҇твїе нбⷭ҇ное (лꙋкѝ ѳ҃, ѯ҃в). Гдⷭ҇ь на́шъ ѹ҆добопополза́емость на́шꙋ вводи́мыхъ вѣ̑дый, и҆ ꙗ҆́кѡ ѹ҆до́бь междꙋ̀ мїрски́ми спребыва́юще, и҆лѝ собесѣ̑дꙋюще, па́ки въ мі́ръ возвраща́емсѧ, гл҃етъ къ ре́кшемꙋ є҆мꙋ̀: повели́ ми пойтѝ погребстѝ ѻ҆тца̀ моего̀: ѡ҆ста́ви мє́ртвыѧ погребстѝ своѧ̑ мертвецы̀ (лꙋкѝ ѳ҃, н҃ѳ. ѯ҃).
г҃. Бѣ̑сове по ѿрече́нїи се́мъ про́чее, ми́лѡстивыѧ и҆ милосє́рдыѧ и҆з̾ мїрски́хъ бл҃жи́ти совѣ̑тꙋютъ на́мъ: а҆ себѐ ѡ҆каѧва́ти, ꙗ҆́кѡ всѧ́кїѧ ѻ҆́нѣхъ добродѣ̑тели себѐ лиши́вшихъ. Ра́зꙋмъ же врагѡ́мъ на́шымъ є҆́сть ло́жнымъ смире́нїемъ, и҆лѝ въ мі́ръ на́съ возврати́ти, и҆лѝ пребыва́ющымъ мона́хѡмъ во ѿча́ѧнїе низри́нꙋти. Є҆́сть ѡ҆хꙋжда́ти сꙋ́щихъ въ мі́рѣ, свои́мъ возноше́нїемъ, и҆ мо́щно є҆́сть тѣ̑хъ ѿсꙋ́тствꙋющихъ ѹ҆ничижа́ти, за є҆́же бѣжа́ти ѿча́ѧнїѧ, и҆ наде́ждꙋ пристѧжа́ти.
д҃. Ѹ҆слы́шимъ ѹ҆̀бо гдⷭ҇а ко ѻ҆́номꙋ ю҆́ноши всѧ̑ ꙗ҆́вѣ за́пѡвѣди содѣ̑лавшемꙋ ре́кша, ꙗ҆́кѡ є҆ди́но тѝ ѡ҆скꙋдѣва́етъ, є҆́же прода́ти и҆мѣ̑нїе, и҆ да́ти ни́щымъ (лꙋкѝ и҃і, к҃в), и҆ са́маго себѐ ни́ща сотвори́ти, млⷭ҇тыню прїе́млюща.
є҃. И҆́же ѹ҆се́рднѡ и҆ съ горѣ̑нїемъ бы́стрѡ претещѝ хотѧ́щїи, смы́сленнѡ разсмотри́мъ ка́кѡ гдⷭ҇ь всѣ̑хъ въ мі́рѣ пребыва́ющихъ и҆ живꙋ́щихъ, ме́ртвыхъ бы́ти ѡ҆сꙋди́лъ є҆́сть, ре́къ къ нѣ̑коемꙋ: ѡ҆ста́ви мє́ртвыѧ мїрѧ́ны тѣ̑ломъ ме́ртвыхъ погребстѝ. Ничи́мже возбрани́ло є҆́сть ю҆́ношꙋ ѻ҆́наго бога́тство прїитѝ ко кр҃ще́нїю: ѡ҆сꙋети́-шасѧ ѹ҆̀бо гл҃юще нѣ̑цыи ꙗ҆́кѡ кр҃ще́нїѧ ра́ди гдⷭ҇ь прода́ти бога́тство велѧ́ше є҆мꙋ̀. Да довлѣ̑етъ на́мъ къ велича́йшꙋ и҆звѣще́нїю велича́йшїѧ сла́вы ѡ҆бѣ̑та на́шегѡ, таково́е свид£телство.
ѕ҃. И҆спыта́ти подоба́етъ, ка́кѡ въ мі́рѣ живꙋ́щїи, и҆ во бдѣ̑нїихъ, и҆ постѣ̑хъ, и҆ ѕлострада́нїи пребыва́ющїи, къ мона́шескомꙋ житїю̀ ꙗ҆́кѡ ко и҆скꙋси́лищꙋ и҆ по́прищꙋ ѿ чл҃вѣ́къ ѿходѧ́ще, пе́рвшее ѡ҆бꙋче́нїе своѐ растлѣ̑нное и҆ притво́рное не ктомꙋ̀ прохо́дѧтъ. Ви́дѣхъ мно́жайшы и҆ разли̑чны сады̀ добродѣ̑телей ѿ сꙋ́щихъ въ мі́рѣ насажда́ємы: и҆ а҆́ки ѿ пото́чна ка́ла ѿ тщесла́вїѧ напаѧ́ємы, и҆ ѿ ꙗ҆влѧ́телства ѡ҆копова́ємы, и҆ ѿ похва́лъ нагноѧва́ємы: и҆ пресажде́ни ѹ҆́бѡ бы́вше на зе́млю пꙋ́стꙋ и҆ непроходи́мꙋ мїрски́ми, и҆ безво́днꙋ тщесла́вныѧ и҆ смра́дныѧ воды̀, а҆́бїе и҆зсхо́ша: не бо ѡ҆быко́ша во́дѧнїи са́дове въ жесто́кихъ и҆ безво́дныхъ ѡ҆бꙋчи́лищахъ плодороди́ти.
з҃. А҆́ще кто̀ мі́ръ возненави́дѣ, се́й печа́ли и҆збѣжа̀: а҆́ще ли же кто̀ къ нѣ̑чесомꙋ ѿ ви́димыхъ пристра́стїе и҆́мать, то̀ не ѹ҆̀ печа́ли и҆зба́вилсѧ є҆́сть: ка́кѡ бо и҆ не ѡ҆печа́литсѧ ѡ҆ лише́нїи люби́мыѧ ве́щи; Во всѣ̑хъ ѹ҆́бѡ мно́га и҆ на́мъ потре́бно є҆́сть трезвѣ̑нїѧ, наипа́че же ѡ҆ се́мъ внима́ти подоба́етъ разꙋ́мнѡ пре́жде про́чїихъ. Мно́гихъ ви́дѣхъ въ мі́рѣ ѿ попече́нїй, и҆ прилѣжа́нїй, и҆ глꙋмле́нїй, и҆ бдѣ̑нїй тѣле́сныхъ, неи́стовства тѣ̑ла своегѡ̀ и҆збѣ̑гшихъ: со всѧ́цѣмъ же безпопече́нїемъ къ мона́шескомꙋ житїю̀ прише́дше такові́и, ѡ҆каѧ́ннѣ ѿ тѣле́снагѡ движе́нїѧ ѡ҆скверни́шасѧ.
и҃. Во́нмемъ себѣ̀, є҆да̀ ка́кѡ ѹ҆́зкимъ и҆ тѣ̑снымъ пꙋте́мъ гл҃юще ходи́ти, простра́нный и҆ широ́кїй держа́ще заблꙋди́хомъ. Ѹ҆́зокъ пꙋ́ть ꙗ҆ви́тъ тебѣ̀ ѹ҆тѣсне́нїе чре́ва, стоѧ́нїе всено́щно, мѣ̑ра воды̀, хлѣ̑ба скꙋ́дость, без-че́стїѧ питїѐ чисти́телно: порꙋга̑нїѧ, посмѣ́хи, рꙋга̑нїѧ, ѿсѣче́нїе во́лей свои́хъ, прираже́нїй терпѣ̑нїе, презрѣ̑нїй неропта́нїе, доса́дъ нꙋ́жда, ѡ҆би́димꙋ терпѣ̑ти крѣ̑пцѣ, ѡ҆клевета́емꙋ не негодова́ти, ѹ҆ничижава́емꙋ не гнѣ̑ватисѧ, ѡ҆сꙋжда́емꙋ смирѧ́тисѧ. Бл҃же́ни сꙋ́ть пꙋте́мъ предрече́нныхъ пꙋте́й ходѧ́щїи, ꙗ҆́кѡ тѣ̑хъ є҆́сть црⷭ҇твїе нбⷭ҇ное (матѳ. є҃, г҃).
ѳ҃. Никто́же въ нбⷭ҇ный невѣ̑стникъ вѣнценосѧ̀ вни́детъ, не пе́рвымъ, и҆ вторы́мъ, и҆ тре́тїимъ ѿрече́нїемъ ѿре́ксѧ: гл҃ю же ѻ҆́нѣмъ всѣ̑хъ веще́й, и҆ чл҃вѣ́къ, и҆ роди́телей: и҆ ѿрече́нїемъ во́ли своеѧ̀: и҆ тре́тїимъ ѿрече́нїемъ тщесла́вїѧ, припослѣ̑дствꙋющагѡ послꙋша́нїю. И҆зыди́те ѿ среды̀ и҆́хъ и҆ ѿлꙋчи́тесѧ: и҆ нечистотѣ̀ мі́ра не прикаса́йтесѧ (в҃ кор. ѕ҃, з҃і), гл҃етъ гдⷭ҇ь: кто́ бо ѹ҆ ѻ҆́нѣхъ чꙋдеса̀ сотворѝ когда̀; Кто̀ ме́ртвыхъ воскресѝ; Кто̀ бѣ̑сы и҆згна̀; Никто́же: сїѧ̑ бо всѧ̑ мона́хѡвъ сꙋ́ть по́чєсти, ꙗ҆̀же мі́ръ вмѣсти́ти не мо́жетъ: занѐ а҆́ще бы мо́глъ, то̀ къ чесомꙋ̀ бы бы́ло мона́шествованїе сїѐ, си́рѣчь ѿше́ствїе;
і҃. Внегда̀ бѣ̑сове по ѿрече́нїи се́мъ па́мѧтїю къ роди́телємъ на́шымъ и҆ бра́тїи, се́рдце на́ше согрѣва́ютъ, тогда̀ мы̀ мл҃твою на тѣ̑хъ воѡрꙋжи́мсѧ, и҆ па́мѧтїю вѣ̑чнагѡ ѻ҆́нагѡ ѻ҆гнѧ̀ себѐ разжжи́мъ, да тогѡ̀ воспомина́нїемъ безвре́менный се́й се́рдца ѻ҆́гнь ѹ҆гаси́мъ.
а҃і. А҆́ще кто̀ безпристра́стнѣ къ ꙗ҆ково́й ли́бо ве́щи зало́гъ и҆мѣ̑ти непщꙋ́етъ, ѡ҆ лише́нїи же тоѧ̀ се́рдцемъ ѡ҆печа́лилсѧ є҆́сть, то̀ таковы́й соверше́ннѣ са́мъ себѐ прелсти́лъ є҆́сть.
в҃і. Є҆ли́цы ю҆́ни къ раче́нїємъ тѣлє́снымъ и҆ пи́щи неи́стовнѣ завѣща́нїе и҆́мꙋтъ, и҆ къ мона́шескомꙋ жи́телствꙋ прїитѝ хотѧ́тъ, всѧ́цѣмъ трезвѣ̑нїемъ и҆ внима́нїемъ себѐ да ѡ҆бꙋча́тъ, и҆ повинꙋ́тъ всѧ́кагѡ наслажде́нїѧ и҆ лꙋка́вства ѹ҆далѧ́тисѧ: да не ка́кѡ бꙋ́дꙋтъ тѣ́мъ послѣ́днѧѧ гѡ́рша пе́рвыхъ. Приста́нище сїѐ, и҆ сп҃се́нїѧ и҆ бѣ̑дъ вино́вно быва́етъ, и҆ сїѐ вѣ̑дѧтъ мы́сленное сїѐ мо́ре пла́вающїи. Ми́лостивенъ же є҆́сть ѹ҆ви́дѣти позо́ръ, спа́сшыѧсѧ въ пꙋчи́нѣ ѻ҆́нѣй, во приста́нищи се́мъ и҆стопле́нїе пострада́вшыѧ.
Второ́е восхожде́нїе є҆́сть: текі́й не сꙋпрꙋ́жницꙋ но лѡ́та ѻ҆́наго подража́ѧ да бѣ̑гаетъ.
На шестом часе:
На девятом часе: