Пяток 1-й седмицы Великого поста

Если чтения отсутствуют - значит, по данному дню еще не были добавлены тексты.

По первой кафизме
По второй кафизме
На третьем часе
На шестом часе
На девятом часе

По первой кафизме:

Чтутся седальны по обычаю.
Абие учиненный чтец: Толкование Иоанна Златоуста благослови, владыко, прочести. (Или иное название перваго чтения с испрошением благословения)
Иерей: Молитвами святых отец наших Господи, Иисусе Христе Боже наш, помилуй нас.
И чтец: Аминь.

И о вре́мени не пренемога́й. В твое́ бо похоте́ние вложи́т враг о́браз безвре́менне, я́ко да не терпя́ брат гла́дскаго похоте́ния бежи́т по́прище, ты же возлю́блене я́ко Бо́гу тща́ся угоди́ти терпи́. И апо́стол глаго́лет: «А́ще мо́жеши свобо́дь бы́ти, па́че подоба́ет ти де́лати». Возри́ же на пе́рвыя ро́ды и виждь, я́ко вси святи́и долготерпе́ния ра́ди и любве́ улучи́ша обетова́ния. Терпи́м, и уте́шимся са́ми по вся дни, я́ко да и насле́дницы обря́щемся Ему́ в Ца́рствии небе́снем.

Не пе́рвее ли патриа́рх Иа́ков, четырена́десять лет рабо́та Рахи́ли ра́ди, Ла́ве сиряни́ну в Междуре́чии, во дни зно́йныя и в но́щи ледо́вныя. Та́кожде Ио́сиф возлю́бленный, несть ли лет недоволе́н рабо́тати в земли́ чужде́й, я́коже пи́шет: «И бе Ио́сиф седмина́десять лет, егда́ пасы́й овца́ бра́тии своея́». И па́ки Ио́сиф лет три́десять, егда́ ста пред фарао́ном. Та́кожде и Моисе́й уго́дник Госпо́день четы́редесяти лет сый всели́ся в зе́млю Мадиа́мску. И сы́нове Изра́илеви четы́редесяти лет снидо́ша в зе́млю обетова́ния. Та́кожде и Дании́л уго́дный со треми́ о́троки претерпе́ша скорбь и поноше́ние на земли́ чужде́й, те́мже и ти́и спасе́ни бы́ша.

Мы же ни ма́ла пострада́вше не мо́жем терпе́ти. Неве́рствия же ра́ди на́шего терпе́ние удаля́ется от нас. Се бо печа́ли сам ся еси́ пре́дал, я́ко погуби́в ме́дницу чужду́ и я́ко в плене́ние и́де. Даждь себе́ единоду́шие о Го́споде и мужа́йся я́ко ве́рен, еда́ когда́ от мно́гия печа́ли погуби́ши не́мощь души́ своея́ и по́следь раска́ешися. Поразуме́й же возлюбленне су́щая во изгна́нии, с вери́гами и лю́тыми ра́нами истяза́емыми, и повини́ся предстоя́щему ти о Го́споде, ли па́че по челове́честву воспомяни́ рабо́ту, ю́же терпи́ши Го́спода ра́ди. Кто у́бо быв безче́ствован царе́м и не испове́дает па́че досажде́ния хвалы́. Но мно́жицею хо́щеши глаго́лати, я́ко труд и́мать вещь. Го́ре мне гре́шному и неключи́мому ра́бу! А́ще труда́ пре́жде не во́змем и терпи́м Го́спода ра́ди, то почто́ изыдо́хом от ми́ра сего́? Кто досто́ин возлю́блене, умре́ти за Уме́ршаго нас ра́ди? Ма́лая подае́ши возлю́блене, а вели́кая восприи́меши. Терпе́ния же да и́мам[ы] потре́бу, да во́лю Бо́жию сотво́рше, получи́м обетова́ние Его́. Претерпе́вый же до ко́нца, той спасе́тся.

По скончании же всего чтения, возглашает иерей: Богу нашему слава, всегда ныне и присно и во веки веков.
И чтец: Аминь.
И далее по обычаю службы.

По второй кафизме:

Возлю́блене, не укланя́йся от лица́ находя́щим помысло́м: нача́ло бо подвиза́нию есть. Уве́ждь ку́пно от дожде́внаго ро́ва, я́ко где дождь бу́дет, и собе́рется наводне́ние дожде́вное в ров, в нача́ле смуще́на есть вода́, и ели́ко пребыв́ает, чисте́йши быва́ет. Те́мже возлю́блене, стой и не укланя́йся. Пи́шет бо: «И пото́цы беззако́ния смути́ша мя». И па́ки: «Я́ко испо́лнися зол душа́ моя́, и живо́т мой а́де прибли́жися». Те́мже глаго́лет: «Госпо́дь мне Помо́щник, и не убою́ся, что сотвори́т мне челове́к». Егда́ у́бо прии́дет по́мысл лука́в во ум твой, возопи́й ко Го́споду со слеза́ми, глаго́ля: «Го́споди, очи́сти мя гре́шнаго и прости́ мя, Человеколю́бче. Отжени́ лука́ваго от мене́». Сердцеве́дец бо есть Бог и зло обы́чныя мы́сли, раждеза́емыя сове́ты и от лю́таго бе́са нам приноси́мая вся свесть. Се веждь, я́ко ели́ко терпи́ши и подвиза́ешися, Бо́гу рабо́тая, толи́ко же очища́ет ти ся ум и по́мысл. Рече́ бо Госпо́дь: «Вся́ку лозу́ принося́щую плод очища́ю, да мно́жайшая плоды́ принесе́т», то́кмо восхощи́ спасти́ся, я́ко лю́бит Госпо́дь и помога́ет веду́щимся на спасе́ние.

Послу́шай же при́тчу зло́му по́мыслу: Грездо́вие егда́ объе́млятся от виногра́да, и высы́пано бу́дет в точи́ло, и испра́но ‐ источи́т вино́ свое́ и влия́но бу́дет в сосу́ды. Та́ко возври́т вино́, я́коже мно́жицею не могу́ще сосу́ди терпе́ти ну́жду, разседа́ются от кипе́ния. Та́ко и по́мыслы челове́честии: егда́ бо прии́дет кто от су́етнаго жития́ и печа́ль его́ к небе́сному смы́слу, не терпя́ще бе́си зави́стию, разли́чно возмутя́т ум челове́ку, хотя́ще измене́ние му́тное расчерпа́ти ему́, да обря́щут и сосу́д пови́нен и прельстя́т и́, е́же есть душа́ неве́рна и дре́млющи. Прииду́т бо бе́си, а́ки во́лцы и хи́щницы, обходя́ще ке́лия мни́хом, и́щущи дверца́ отве́рсты себе́, я́ко да вскочи́вше растля́т в ней е́же есть душа́ повину́ющися им. А́ще ли же обря́щут дверь затворе́ну пред лице́м их, стужи́вше си отъи́дут, глаго́лю же, ду́шу осно́вану ве́рою. Не ужаса́йся у́бо, ни убо́йся от злокова́рствия их ‐ вреди́ти бо тебе́ не мо́гут. Христа́ име́й себе́ Помо́щника. Глаго́лет бо апо́стол: «Не бо даст им дух пристра́шия, но си́ле и любви́ и целому́дрию». И па́ки Го́споду ре́кшу: «Ви́дех сатану́ а́ки мо́лнию с небесе́ спа́дша. Се дах вам власть наступа́ти на зми́я и скорпи́ю, и на всю си́лу вра́жию и ничто́же вас не вреди́т».

Те́мже возлю́блене, мужа́йся и возмога́й о Го́споде Бо́зе твое́м, я́ко в век ми́лость Его́. А́ще ли же и па́мять нам наво́дят роди́тель на́ших, рцем к ним: «Мы Бо́га на́шего Отца́ неразлучи́ма и́мамы с собо́ю». А́ще ли же и па́мять земны́х веще́й наведу́т на ны, рцем к ним мы: «Собира́ет, и не весть кому́ собира́ет я́». И па́ки: «Вку́пе безу́мен и несмы́слен поги́бнета. И во́змут чужди́и бога́тство ею́». Да мне ли у́бо бу́дут греси́, а ине́м име́ния? То не беда́ ли се есть мне? Есть бо, и зло́ба вели́ка. Те́мже не учи́мся сокрыва́ти на земли́, иде́же тля тлит, и червь погубля́ет, иде́же бо есть сокро́вище твое́, ту и се́рдце твое́. Благослове́н еси́ Бо́же, Да́вый нам кре́пость на неви́димаго врага́. Тому́ сла́ва во ве́ки. Ами́нь.

На третьем часе:

СЛО́ВО Е҃. Ѡ҆ покаѧ́нїи попече́ннѣ и҆ ꙗ҆вственнѣ, въ не́мже и҆ житїѐ ст҃ы́хъ ѻ҆́нѣхъ ѡ҆сꙋждє́нникъ и҆ ѡ҆ темни́цѣ.

Покаѧ́нїе є҆́сть, воззва́нїе кр҃ще́нїѧ. Покаѧ́нїе є҆́сть, завѣ̑тъ ко бг҃ꙋ втора́гѡ житїѧ̀. Покаѧ́нїе є҆́сть, смире́нїѧ кꙋпова́тель. Покаѧ́нїе є҆́сть, тѣле́сна ѹ҆тѣше́нїѧ при́сное безнаде́жїе. Покаѧ́нїе є҆́сть, самоѡсꙋжде́нъ по́мыслъ, и҆ безпопечи́теленъ самопопечи́теленъ. Покаѧ́нїе є҆́сть, дщѝ наде́жды, и҆ ѿрече́нїе безнаде́жїѧ. Ка́ющсѧ є҆́сть, ѡ҆сꙋжде́нникъ непосра́мленъ. Покаѧ́нїе є҆́сть, примире́нїе гдⷭ҇не, дѣ̑ланїемъ бл҃ги́хъ, сопроти́вныхъ согрѣше́нїѧмъ. Покаѧ́нїе є҆́сть, со́вѣсти ѡ҆чище́нїе. Покаѧ́нїе є҆́сть, во́льно всѣ̑хъ ско́рбныхъ терпѣ̑нїе. Ка́ющсѧ є҆́сть, содѣ̑тель свои́хъ мꙋ́къ. Покаѧ́нїе є҆́сть, ѹ҆тѣсне́нїе чре́ва крѣ̑пко, и҆ дꙋшѝ ѹ҆ѧзвле́нїе во ѡ҆щꙋще́нїи крѣ̑пцѣ.

в҃. Стецы́тесѧ и҆ пристꙋпи́те: прїиди́те и҆ ѹ҆слы́шите, и҆ повѣ̑мъ ва́мъ всѝ бг҃а прогнѣ̑вавшїи: собери́тесѧ и҆ ѹ҆ви́дите, є҆ли̑ка къ созида́нїю показа̀ дꙋшѝ мое́й: пред̾ꙋчини́мъ и҆ предпочти́мъ, почте́нныхъ безче́стныхъ дѣ̑латєль по́вѣсть. Ѹ҆слы́шимъ и҆ сохрани́мъ и҆ сотвори́мъ, є҆ли́цы неключи́мо нѣ̑кое паде́нїе пострада́хомъ: воста́ните и҆ сто́йте, и҆́же чрез̾ падє́нїѧ низлежа́щїи. Внемли́те, бра́тїе моѝ, семꙋ̀ словесѝ моемꙋ̀: приклони́те ѹ҆́хо ва́ше, бг҃а па́ки себѣ̀ ѡ҆браще́нїемъ и҆́стиннымъ примири́ти хотѧ́щїи.

Ѡ҆ темни́цѣ.

г҃. Ѹ҆слы́шавъ а҆́зъ немощны́й, вели́ко нѣ̑кое и҆ стра́нно бы́ти ѹ҆строе́нїе и҆ смире́нїе, сꙋ́щихъ во ѻ҆би́тели ѻ҆́нѣй ѻ҆со́бнѣй гл҃емѣй темни́цѣ, под̾ ѻ҆́бластїю сꙋ́щей преждепомѧнꙋ́тагѡ свѣти́ла ѻ҆́нагѡ свѣти́лѡвъ. Та́мѡ мѝ є҆щѐ сꙋ́щꙋ, моли́хъ прпⷣбнаго ѻ҆́наго поитѝ мѝ та́мѡ: и҆ повинꙋ́сѧ моле́нїю моемꙋ̀ вели́кїй ѻ҆́нъ, ника́коже когда̀ дꙋ́шꙋ ѡ҆печа́лити хотѧ̀.

д҃. Прише́дъ ѹ҆̀бо а҆́зъ въ ка́ющихсѧ ѻ҆би́тель ѻ҆́нꙋ, и҆ вои́стиннꙋ пла́чꙋщихъ мѣ̑сто: ви́дихъ вои́стиннꙋ, а҆́ще нѣ̑сть де́рзостно рещѝ, ꙗ҆̀же, ꙗ҆́коже бы приключи́лосѧ, ѻ҆́ко человѣ̑ка неради́ва не ви́дѣ, и҆ слꙋ́хъ ѹ҆ны́ла не слы́ша, и҆ на се́рдце лѣни́ва не взыдо́ша: вє́щи и҆ глаго́лы, бг҃а могꙋ́щѧ ѹ҆бѣди́ти, ѹ҆хищрє́нїѧ же и҆ ѻ҆́бразы чл҃вѣколю́бїе є҆гѡ̀ вско́рѣ преклонѧ́ющѧ.

є҃. Ѻ҆́вѣхъ ѹ҆́бѡ и҆з̾ пови́нникѡвъ ѻ҆́нѣхъ непови́нныхъ всено́щнѣ да́же до ѹ҆́тра стоѧ́щихъ без̾ покро́ва, нѡ́ги неподви̑жимы и҆мꙋ́щихъ, и҆ сно́мъ ми́лостивнѣ коле́блющихсѧ нꙋ́ждею сегѡ̀ є҆стества̀: и҆ ниеди́нагѡ поко́ѧ себѣ̀ подаю́щихъ: но самѣ̑хъ себѐ ѹ҆корѧ́ющихъ, и҆ безчє́стїи и҆ доса́дами возбꙋжда́ющихъ.

ѕ҃. И҆нѣ̑хъ на нб҃о (ми́лостивнѣ) взира́ющихъ, и҆ ю҆́же ѿѻнꙋ́дꙋ по́мощь съ рыда̑нїи и҆ во́плми призыва́ющихъ.

з҃. И҆нѣ̑хъ на мл҃и́твѣ предстоѧ́щихъ, и҆ созадѝ себѐ ꙗ҆́кѡ ѡ҆сꙋждє́нницы рꙋ́ки свѧза́вшихъ: и҆ на зе́млю те́мное лицѐ своѐ прекло́ншихъ, и҆ недосто́йныхъ себѐ воззрѣ̑нїѧ на нб҃о ѡ҆сꙋди́вшихъ: нижѐ что̀ рещѝ, и҆лѝ провѣща́ти, и҆ли помоли́тисѧ ко бг҃ꙋ, ѿ помыслѡ́въ и҆ со́вѣсти скорбѣ̑нїѧ, доꙋмѣва́ющихъ: нижѐ ка́кѡ и҆лѝ ѿкꙋ́дꙋ моле́нїе сотвори́ти, ѡ҆брѣта́ющихъ: є҆ди́нꙋ дꙋ́шꙋ безслове́снꙋ, и҆ ѹ҆́мъ безгла́сенъ бг҃ови представлѧ́ющихъ, тмы̀ и҆спо́лненныхъ сꙋ́щихъ и҆ то́нка ѿча́ѧнїѧ.

и҃. И҆нѣ̑хъ на землѝ на вре́тищи и҆ пе́пелѣ сѣдѧ́щихъ: и҆ лицѐ колѣ̑нома покрыва́ющихъ, и҆ чело́мъ ѡ҆ зе́млю бїю́щихъ.

ѳ҃. И҆нѣ̑хъ пє́рси вы́нꙋ бїю́щихъ, и҆ дꙋ́шꙋ свою̀ и҆ живо́тъ воззыва́ющихъ. Ѻ҆́ви ѹ҆́бѡ междꙋ̀ ѻ҆́нѣми, зе́млю слеза́ми моча́хꙋ: ѻ҆́ви же сле́зъ не и҆мꙋ́ще са́мѣхъ себѐ бїѧ́хꙋ. Ѻ҆́ви ѹ҆́бѡ, ꙗ҆́кѡ ѡ҆ мертвецѣ̑хъ ѡ҆ дꙋша́хъ свои́хъ рыда́хꙋ тꙋгѝ се́рдца терпѣ̑ти не могꙋ́ще: ѻ҆́ви же се́рдцемъ рыка́хꙋ, и҆ ѹ҆сты̀ гла́съ рыда́нїѧ ѻ҆́нагѡ возбранѧ́хꙋ: ѻ҆вогда́ же не ктомꙋ̀ терпѣ̑ти могꙋ́ще, внеза́пꙋ вопїѧ́хꙋ.

і҃. Ви́дѣхъ а҆́зъ та́мѡ нѣ̑кихъ а҆́ки ѿ себѐ и҆зстꙋпи́вшихъ нра́вомъ и҆ тꙋго́ю, безгла́сныхъ нѣ̑кихъ мно́гимъ сѣ̑тованїемъ бы́вшихъ, всѣ̑хъ ѡ҆мраче́нныхъ, и҆ а҆́ки нечꙋ́вственныхъ ко всѣ́мъ ꙗ҆̀же житїѧ̀ сегѡ̀ сꙋ́щихъ, ѹ҆мо́мъ про́чее въ бе́зднꙋ смире́нїѧ погрꙋзи́вшихсѧ, и҆ ѻ҆гне́мъ печа́ли сле́зы ѻ҆че́съ и҆зсꙋши́вшихъ.

а҃і. И҆нѣ̑хъ сѣдѧ́щихъ дрѧ́хлыхъ, на зе́млю пони́кшихъ, и҆ главо́ю свое́ю непреста́ннѡ кива́ющихъ, и҆ а҆́ки львѡ́въ и҆з̾ среды̀ се́рдца и҆ ѹ҆тро́бъ рыка́ющихъ и҆ стенѧ́щихъ. Ѻ҆́ви ѹ҆́бѡ междꙋ̀ ѻ҆́нѣми ѿпꙋще́нїѧ бл҃гонаде́жнѣ всесоверше́нна проша́хꙋ и҆ (ѡ҆ не́мъ) молѧ́хꙋсѧ: и҆́ни, недосто́йныхъ себѐ бы́ти ѿпꙋще́нїѧ, ѿ смире́нїѧ несказа́нна ѡ҆сꙋжда́хꙋ, и҆ не мощѝ ѿвѣ̑тствовати бг҃ови, вопїѧ́хꙋ. Нѣ̑цыи ѹ҆́бѡ, здѣ̀ мꙋ́кꙋ прїѧ́ти, а҆ та́мѡ поми́ловани бы́ти ѹ҆молѧ́хꙋ гдⷭ҇а: и҆ні́и (же) сотре́ни тѧгото́ю со́вѣсти сꙋ́ще, ни мꙋ́кꙋ прїѧ́ти, ни црⷭ҇твїѧ сподо́битисѧ чи́стѣ гл҃ахꙋ, и҆ дово́лно на́мъ, гл҃ютъ, є҆́сть.

в҃і. Ви́дѣхъ та́мѡ дꙋ́шы смирє́нны и҆ сокрꙋшє́нны и҆ слѧца́ємы тѧгото́ю бре́мене сегѡ̀ сꙋ́щѧ, и҆ са́мое ѻ҆́но ка́менїй чꙋ́вство ѹ҆мили́ти могꙋ́щѧ, вопїе́мыми ѿ ни́хъ ко бг҃ꙋ гла́сы и҆ гл҃ы: гл҃ахꙋ бо до́лꙋ на зе́млю пони́кше, та́кѡ: вѣ̑мы, вѣ̑мы, ꙗ҆́кѡ досто́йни про́чее всѧ́кагѡ томле́нїѧ и҆ мꙋче́нїѧ є҆смы̀, и҆ пра́веднѣ: ни бо дово́лни є҆смы̀ про́чее ко ѿвѣ̑тствованїю ѡ҆ мно́жествѣ до́лга на́шегѡ, нижѐ а҆́ще всю̀ вселе́ннꙋю за ны̀ пла́чꙋщꙋсѧ созове́мъ. Ѡ҆ ѻ҆́номъ же то́чїю мо́лимъ: ѡ҆ ѻ҆́номъ ѹ҆молѧ́емъ, ѡ҆ ѻ҆́номъ мо́лимсѧ про́чее, да не ꙗ҆́ростїю твое́ю ѡ҆бличи́ши на́съ, нижѐ гнѣ̑вомъ твои́мъ нака́жеши на́съ (ѱал. ѕ҃, в҃): (ни првⷣнымъ сꙋдо́мъ твои́мъ мꙋ́чиши насъ:) но со щадѣ̑нїемъ, и҆ дово́лно є҆́сть на́мъ, ѿ мно́гагѡ преще́нїѧ твоегѡ̀, и҆ мꙋ́къ безвѣ̑стныхъ и҆ та́йныхъ свободи́тисѧ: въ коне́цъ бо ѿпꙋще́нїѧ проси́ти, не смѣ̑емъ: ка́кѡ бо; и҆́же ѿвѣ̑та своегѡ̀ не сохра́ншїи непоро́чна, но того̀ по пе́рвшемъ чл҃вѣколю́бїи и҆ ѿпꙋще́нїи ѡ҆скве́рншїи.

г҃і. Возмо́жно бѣ̀ та́мѡ (вои́стиннꙋ ѽ дрꙋ́зи) дв҃дѡвы ꙗ҆́вственнѣ ѹ҆ви́дѣти гл҃ы: стра́ждꙋщихъ ѹ҆ви́дѣти, слѧца́ющихсѧ до конца̀ своеѧ̀ и҆́хъ жи́зни, ве́сь де́нь сѣ̑тꙋющихъ ходѧ́щихъ. И҆ смердѧ́щихъ согни́вшими тѣ̑ла (своегѡ̀) ра́нами (ѱал. л҃з, з҃) и҆ небрего́мыхъ сꙋ́щихъ, забыва́ющихъ снѣ̑сти хлѣ̑бъ сво́й: питїе́ же воды̀ съ пла́чемъ растворѧ́ющихъ: и҆ пе́пелъ и҆ жера́токъ вмѣ̑стѡ хлѣ̑ба ꙗ҆дꙋ́щихъ: прилпє́ны и҆мꙋ́щихъ кѡ́сти къ пло́ти: и҆ са́мѣхъ ꙗ҆́кѡ сѣ̑но и҆зсо́хшихъ (ѱал. р҃а, є҃-в҃і). Ничто́же возмо́жно бѣ̀ ѹ҆ ни́хъ ѹ҆слы́шати, ра́звѣ сїѧ̑ гл҃ы: го́ре, го́ре: ѹ҆вы̀ мнѣ̀, ѹ҆вы̀ мнѣ̀: пра́веднѣ, пра́веднѣ: пощадѝ, пощадѝ влⷣко. Ѻ҆́ви ѹ҆́бѡ гл҃ахꙋ, поми́лꙋй, поми́лꙋй: ѻ҆́ви же па́ки є҆щѐ ми́лостивнѣе: простѝ влⷣко, простѝ а҆́ще возмо́жно є҆́сть.

д҃і. Возмо́жно бѣ̀ во ѻ҆́нѣхъ ѧ҆зы́ки пали̑мы ѹ҆ви́дѣти, и҆ подо́бнѣ псѡ́мъ и҆з̾ ѹ҆́стъ и҆спꙋща́ємы. Ѻ҆́ви ѹ҆́бѡ, на зно́и са́мѣхъ себѐ томлѧ́хꙋ: ѻ҆́ви же на стꙋ́дени са́мѣхъ себѐ мꙋ́чахꙋ. Нѣ̑цыи ѹ҆́бѡ ма́лѡ ѿ воды̀ вкꙋша́юще, престаѧ́хꙋ: є҆ли́кѡ то́чїю ѿ жа́жды не ѹ҆мира́ти: ѻ҆́ви же, хлѣ̑ба ма́лѡ прїе́млюще, того̀ рꙋко́ю дале́че ѿмета́хꙋ, недосто́йныхъ себѐ бы́ти гл҃юще слове́сна бра́шна, ꙗ҆́кѡ, ꙗ҆̀же безслове́сныхъ, содѣ̑ѧвшихъ.

є҃і. Гдѣ̀ во ѻ҆́нѣхъ смѣ̑ха ꙗ҆вле́нїе; Гдѣ̀ праздносло́вїе; Гдѣ̀ ꙗ҆́рость; Гдѣ̀ гнѣ̑въ; Нижѐ є҆́сть ли гнѣ̑въ въ человѣ̑цѣхъ про́чее вѣ̑дѧхꙋ: пла́чꙋ семꙋ̀ ꙗ҆́рость до конца̀ погꙋби́вшꙋ: гдѣ̀ прекосло́вїе; Гдѣ̀ пра́здникъ; Гдѣ̀ дерзнове́нїе; Гдѣ̀ послꙋша́нїе тѣ̑лꙋ; Гдѣ̀ слѣ̑дъ тщесла́вїѧ; Гдѣ̀ наслажде́нїѧ про́чее наде́жда; Гдѣ̀ вїна̀ помышле́нїе; Гдѣ̀ ѻ҆́вощїѧ вкꙋше́нїе; Гдѣ̀ горнца̀ ѹ҆тѣше́нїе; Гдѣ̀ горта́ни ѹ҆слажде́нїе; Всѣ̑хъ бо си́хъ про́чее въ ны́нѣшнемъ вѣ̑цѣ наде́жда ѹ҆ ѻ҆́нѣхъ ѹ҆гасѐ. Гдѣ̀ во ѻ҆́нѣхъ попече́нїе назе́мна чесогѡ̀; Гдѣ̀ сꙋди́ти нѣ̑коего человѣ̑ка; Нигдѣ̑же.

ѕ҃і. Сїѧ̑ бѧ́хꙋ ѹ҆ ѻ҆́нѣхъ вы́нꙋ гл҃ємаѧ и҆ вопїє́маѧ ко гдⷭ҇ꙋ: ѻ҆́ви ѹ҆́бѡ пє́рси крѣ̑пцѣ бїю́ще, ꙗ҆́коже пред̾ враты̀ нбⷭ҇ными стоѧ́ще ко бг҃ꙋ гл҃ахꙋ: ѿве́рзи на́мъ сꙋдїѐ, ѿве́рзи на́мъ: поне́же грѣха́ми затвори́хомъ себѣ̀, ѿве́рзи на́мъ: ѻ҆́ви же гл҃ахꙋ, просвѣтѝ лицѐ твоѐ то́чїю, и҆ спасе́мсѧ. И҆́нъ па́ки: просвѣтѝ во тмѣ̀ и҆ сѣ̑ни сме́ртнѣй сѣдѧ́щыѧ смирє́нныѧ. И҆́нъ, ско́рѡ да предварѧ́тъ ны̀ щедрѡ́ты твоѧ̑ гдⷭ҇и, ꙗ҆́кѡ погибо́хомъ, ꙗ҆́кѡ ѿча́ѧхомсѧ, ꙗ҆́кѡ и҆счезо́хомъ ѕѣлѡ̀. Ѻ҆́ви ѹ҆́бѡ гл҃ахꙋ: ѹ҆̀бо просвѣти́тъ ли гдⷭ҇ь про́чее на ны̀; И҆́ни же, ѹ҆̀бо ли пре́йде дꙋша̀ на́ша до́лгъ се́й нестерпи́мый; И҆́нъ, ѹ҆̀бо ли ѹ҆моле́нъ бꙋ́детъ гдⷭ҇ь про́чее над̾ на́ми; ѹ҆̀бо ли ѹ҆слы́шимъ є҆го̀ гл҃юща на́мъ сꙋ́щымъ во ѹ҆́захъ нерѣши́мыхъ, и҆зыди́те, и҆ сꙋ́щымъ во а҆́дѣ покаѧ́нїѧ, проще́ни бꙋ́дите; Ѹ҆̀бо ли вни́де во́пль на́шъ во ѹ҆́ши гдⷭ҇ни;

з҃і. Вси́ же сѣдѧ́хꙋ при́снѡ пред̾ ѻ҆чи́ма свои́ма зрѧ́ще сме́рть, и҆ гл҃юще: что̀ ѹ҆̀бо є҆́сть и҆мꙋ́щее сбы́тисѧ; Ко́е ѹ҆̀бо бꙋ́детъ и҆зрече́нїе ѻ҆́но; Кі́й ѹ҆̀бо бꙋ́детъ ѻ҆́нъ коне́цъ на́шъ; Ѹ҆̀бо є҆́сть ли воззва́нїе; Ѹ҆̀бо є҆́сть ли проще́нїе тє́мнымъ; смирє́ннымъ; ѡ҆сꙋжде́нникѡмъ; Ѹ҆̀бо возмо́же ли моле́нїе сїѐ на́ше вни́ти пред̾ гдⷭ҇а; и҆лѝ возврати́сѧ пра́веднѣ смире́но и҆ посра́млено; вше́дшо же, коли́кѡ ѹ҆̀бо ѹ҆ми́лостиви; коли́кѡ совершѝ; коли́кѡ по́льзова; коли́кѡ дѣ̑йствова; Поне́же ѿ нечи́стыхъ ѹ҆́стъ и҆ тѣле́съ возсла́но бы́сть, и҆ не мно́гꙋ крѣ̑пость и҆́мать. Ѹ҆̀бо ли въ коне́цъ примирѝ сꙋдїю̀; ѹ҆̀бо ли ѿча́сти; ѹ҆̀бо ли по по́лꙋ ꙗ҆́звъ си́хъ; Вели̑ки бо сꙋ́ть сїѧ̑ вои́стиннꙋ, и҆ мно́гихъ по́тѡвъ и҆ трꙋдѡ́въ тре́бꙋющею. Ѹ҆̀бо прибли́жишасѧ ли къ на́мъ храни́телїе на́ши (а҆́гг҃ли); и҆лѝ є҆щѐ дале́че ѿ на́съ сꙋ́ть; ѻ҆́нѣмъ бо не приближа́ющымсѧ къ на́мъ, ве́сь трꙋ́дъ безполе́зенъ є҆́сть и҆ без̾ꙋспѣ̑шенъ: не бо и҆́мать си́лꙋ дерзнове́нїѧ мл҃и́тва на́ша, нижѐ крило̀ чистоты̀ вни́ти ко гдⷭ҇ꙋ: а҆́ще не а҆́гг҃ли на́ши прибли́жившесѧ къ на́мъ, сїю̀ взе́мше гдⷭ҇ꙋ принесꙋ́тъ.

и҃і. Ꙗ҆кѡва́ же мно́жицею и҆ ко дрꙋ́гъ дрꙋ́гꙋ недоꙋмѣва́хꙋ, и҆ гл҃ахꙋ: ѹ҆̀бо бра́тїе ѹ҆спѣва́емъ ли; ѹ҆̀бо полꙋча́емъ ли проше́нїе (на́ше); Ѹ҆̀бо прїе́млетъ ли па́ки; Ѹ҆̀бо ѿверза́етъ ли; И҆ні́и же на сїѧ̑ ѿвѣщава́хꙋ: кто̀ вѣ̑сть, ꙗ҆́коже рѣ̑ша бра́тїѧ на́ши ѻ҆́ни нїнеѵі́тѧне; є҆да̀ ка́кѡ раска́етсѧ гдⷭ҇ь: и҆ понѐ ѿ мно́гїѧ ѻ҆́ныѧ мꙋ́ки и҆зба́витъ на́съ: ѻ҆ба́че мы̀ ѻ҆́но є҆́же въ на́шемъ произволе́нїи є҆́сть сотвори́мъ. ˲ а҆́ще ѿве́рзетъ, то̀ бл҃гѡ и҆ до́брѣ: поне́же, бл҃гослове́нъ (а҆́ще ѹ҆́бѡ ѿве́рзетъ, то̀ бл҃гѡ и҆ до́брѣ: а҆́ще ли же нѝ, то̀ благослове́нъ) гдⷭ҇ь бг҃ъ затвори́вый на́мъ пра́веднѣ: ѻ҆ба́че пребꙋ́димъ толкꙋ́ще, до конца̀ живота̀ на́шегѡ: не́гли мно́гагѡ ра́ди безстꙋ́дїѧ на́шегѡ ѿве́рзетъ на́мъ. Тѣ̑мже и҆ са́мѣхъ себѐ побꙋжда́юще, гл҃ахꙋ: потецы́мъ, бра́тїе, потецы́мъ: тече́нїѧ бо потре́бно є҆́сть, и҆ тече́нїѧ (крѣ̑пка), поне́же ѿ до́брыѧ дрꙋжи́ны на́шеѧ ѡ҆ста́хомсѧ: потецы́мъ не щадѧ́ще сеѧ̀ скве́рныѧ и҆ ѕлострада́телныѧ пло́ти на́шеѧ: но ѹ҆бїе́мъ тꙋ̀, ꙗ҆́коже ѹ҆би́ла ны̀ є҆́сть.

ѳ҃і. Ꙗ҆коже и҆ творѧ́хꙋ бл҃же́ннїи сі́и пови̑нницы. Во ѻ҆́нѣхъ (бо) ви̑дима бѧ́хꙋ колѣ́на ѡ҆цѣпенѣ́вша мно́жествомъ покло́нѡвъ: ѻ҆чеса̀ и҆ста̑ѧвша, и҆ внꙋ́трь нѣ̑гдѣ во глꙋбинꙋ̀ зашє́дша, рѣ̑снѡвъ лишє́на сꙋ̑ща. Лани̑ты и҆мꙋ́ще ѹ҆ѧ́звлєны и҆ ѡ҆палє́ны горѧ́честїю те́плыхъ сле́зъ: ли́ца ѹ҆вѧ̑дша и҆ блѣ́да, ничи́мже сравне́нїемъ ѿ ме́ртвыхъ ра̑знствꙋюща. Пє́рси бїє́нїи болѧ̑ща, и҆ крова̑вы плевѡ́тины ѿ пѧ́стьныхъ въ пє́рси ѹ҆даре́нїй и҆спꙋща́ємы. Гдѣ̀ бѣ̀ та́мѡ посте́ли ѹ҆строе́нїе; Гдѣ̀ ѡ҆дѣѧ́нїѧ чистота̀ и҆лѝ тве́рдость; но раздра̑нна и҆ брꙋднѣ́юща, и҆ ѿ во́шїѧ покровє́на. Что̀ є҆́сть проти́вꙋ ѻ҆́нѣхъ бѣснꙋ́ющихсѧ ѕлострада́нїе; Что̀ є҆́же над̾ мертвецы̀ пла́чꙋщихъ; Что̀ є҆́же въ заточе́нїи пребыва́ющихъ; Что̀ є҆́же за ѹ҆бі̑йства ѡ҆сꙋжде́нникѡвъ; Ничто́же є҆́сть вои́стиннꙋ та̀ ѻ҆́нѣхъ мꙋ́ка и҆ томле́нїе нево́льно проти́вꙋ си́хъ во́льнагѡ и҆ да не ба̑сни бы́ти речє́ннаѧ вознепщꙋ́ете молю̀, бра́тїѧ.

к҃. Молѧ́хꙋ мно́жицею сꙋдїю̀ вели́каго ѻ҆́наго, па́стырѧ сего̀ гл҃ю, а҆́гг҃ла сего̀ въ человѣ̑цѣхъ: и҆ побꙋжда́хꙋ желѣ́за и҆ ѡ҆кѡ́вы на рꙋ́ки и҆ вы́ю наложи́ти: и҆ но́ги въ стра́ждꙋщихъ ѹ҆тверди́ти дре́вѣ, и҆ не пе́рвѣе ѿѻнꙋ́дꙋ и҆спꙋщє́нымъ бы́ти, доне́лѣже про́чее гро́бъ (тѣ̑хъ) прї-и́метъ, ѻ҆ба́че нижѐ гро́бъ: не ѹ҆таю́ бо, нѝ, нижѐ сегѡ̀ бл҃же́нныхъ тѣ̑хъ вои́стиннꙋ ѡ҆ми́лованна смире́нїѧ, и҆ сокрꙋше́нны ко бг҃ꙋ любвѐ и҆ покаѧ́нїѧ.

к҃а. И҆мꙋ́ще ѹ҆̀бо ко гдⷭ҇ꙋ и҆тѝ, и҆ неꙋмы́тномꙋ сꙋди́щꙋ предстоѧ́ти, до́брїи ѻ҆́ни страны̀ сеѧ̀ покаѧ́нїѧ гра́ждане: внегда̀ кто̀ и҆з̾ ни́хъ во все́мствѣ ви́дѧше себѐ, то̀ ѡ҆ се́мъ чрез̾ своего̀ и҆́хъ предстоѧ́телѧ молѧ́ше съ клѧ́твами вели́каго ѻ҆́наго: ѡ҆ є҆́же не сподо́битисѧ є҆мꙋ̀ человѣ̑ческа погребе́нїѧ: но безслове́сна, и҆лѝ въ стрꙋю̀ рѣ̑чнꙋю, и҆лѝ на селѣ̀ ѕвѣрє́мъ пре́данꙋ бы́ти̑ є҆́же мно́жицею и҆ послꙋ́ша ѻ҆́нъ разсꙋжде́нїѧ свѣти́лникъ, ѱалмопѣ̑нїѧ же всѧ́кагѡ и҆ че́сти лишє́ны и҆зноша́ємы бы́ти повелѣва́ѧ.

к҃в. Ꙗ҆ко́въ же бѣ̀ и҆ позо́ръ ѻ҆́нъ стра́шенъ и҆ ми́лостивенъ послѣ̑днѧгѡ ѻ҆́нѣхъ часа̀: внегда́ бо соѡсꙋждє́нницы ѻ҆́ни пред̾идꙋ́щаго скончава́тисѧ и҆мꙋ́щаго ѡ҆щꙋща́хꙋ, є҆щѐ ѹ҆мꙋ̀ ѹ҆твержде́нꙋ сꙋ́щꙋ ѡ҆крꙋжа́хꙋ (того̀), и҆ жа́ждꙋще и҆ пла́чꙋще и҆ вожделѣва́юще, ми́лостивнѣйшимъ нра́вомъ и҆ сѣ̑тованнымъ сло́вомъ глава́ми покива́юще свои́ми, вопроша́хꙋ ѹ҆мира́ющаго: и҆ горѧ́ще милосе́рдїемъ сꙋ́щимъ къ немꙋ̀, гл҃ахꙋ: что̀ є҆́сть, бра́те и҆ соѡсꙋжде́нниче: ка́кѡ; что̀ гл҃еши; что̀ надѣ̑ешисѧ; что̀ непщꙋ́еши; соверши́лъ ли є҆сѝ трꙋдо́мъ си́мъ и҆ско́мое, и҆лѝ не возмо́глъ є҆сѝ; ѿве́рзлъ ли є҆сѝ, и҆лѝ пови́ненъ є҆щѐ є҆сѝ; дости́глъ ли є҆сѝ, и҆лѝ нѣ̑си полꙋчи́лъ є҆сѝ; прїѧ́лъ ли є҆сѝ нѣ̑кое и҆звѣще́нїе, и҆лѝ безвѣ̑стнꙋ и҆́маши наде́ждꙋ ѻ҆́нꙋ; Прїѧ́лъ ли є҆сѝ свобо́дꙋ, и҆лѝ коле́блетсѧ и҆ ѹ҆сꙋмнѣва́етсѧ є҆щѐ по́мыслъ; ѡ҆щꙋти́лъ ли є҆сѝ нѣ̑кое въ се́рдцѣ (твое́мъ) просвѣще́нїе; и҆лѝ ѡ҆мраче́но є҆щѐ и҆ ѡ҆безче́ствовано є҆́сть; Бы́сть ли нѣ̑кїй въ тебѣ̀ гла́съ гл҃ющъ внꙋ́трь: сѐ здра́въ є҆сѝ: и҆лѝ, ѿпꙋща́ютсѧ (тѝ) грѣсѝ твоѝ: и҆лѝ вѣ̑ра твоѧ̀ спасе́ тѧ: и҆лѝ ѹ҆̀бо є҆щѐ ѻ҆́нъ слы́шиши гл҃ющїй; Да возвратѧ́тсѧ грѣ́шницы во а҆́дъ. и҆, свѧжи́те рꙋ́цѣ и҆ но́зѣ. И҆, да во́зметсѧ нечести́вый да не ви́дитъ сла́вы гдⷭ҇ни. Что̀ гл҃еши вкра́тцѣ, бра́те; рцы̀ на́мъ, мо́лимъ, да и҆ мы̀ позна́емъ, въ кі́ихъ и҆́мамы бы́ти: твое́ бо про́чее вре́мѧ сїѐ затворе́но є҆́сть, и҆ и҆но́гѡ не ѡ҆брѧ́щеши ктомꙋ̀ во вѣ̑къ. На сїѧ̑, ѻ҆́ви ѹ҆̀бо ѿ ѹ҆сыпа́ющихъ, бл҃гослове́нъ гдⷭ҇ь, ѿвѣщава́хꙋ, и҆́же не ѿста́ви мл҃и́твꙋ мою̀, и҆ ми́лость свою̀ ѿ менѐ. ѻ҆́ви же па́ки, бл҃гослове́нъ гдⷭ҇ь, и҆́же не дадѐ на́съ въ лови́твꙋ зꙋбѡ́мъ и҆́хъ: ѻ҆́ви же ѻ҆́но болѣ̑зненнѣ гл҃ахꙋ: ѹ҆̀бо ли пре́йде дꙋша̀ на́ша во́дꙋ дꙋхѡ́въ воздꙋ́ха сегѡ̀ нестерпи́мꙋю; Не дерза́юще є҆щѐ, но и҆здале́ча смотрѧ́юще что̀ на словоистѧза́нїи ѻ҆́номъ быва́етъ: и҆ні́и же сегѡ̀ болѣ̑зненнѣе и҆́но ѿвѣщава́хꙋ, и҆ гл҃ахꙋ: го́ре дꙋшѝ не сохрани́вшей ѡ҆бѣ̑тъ (сво́й) непоро́ченъ, въ ча́съ се́й и҆ є҆ди́нственъ позна́етъ что̀ тѣ̑й ѹ҆гото́вано є҆́сть.

к҃г. А҆́зъ же сїѧ̑ ви́дѣвъ же ѹ҆ ѻ҆́нѣхъ и҆ слы́шавъ, ма́лѡ не ѿчаѧва́ти себѐ и҆мѣ̑ѧхъ, зрѧ̀ нерадѣ̑нїе своѐ, и҆ сравнѧ́ѧ то̀ со ѻ҆́нѣхъ ѕлострада́нїемъ. Ꙗ҆ково́ бо бѣ̀ и҆ са́мое ѻ҆́но мѣ̑ста тогѡ̀ ѹ҆строе́нїе и҆ жили́ще: всѐ те́мно, всѐ ѕлосмра́дно, всѐ брꙋднѣ̑ющо и҆ нечи́сто: темни́ца бо и҆ ѡ҆сꙋжде́нїе бл҃госло́внѣ наименова́сѧ: ꙗ҆́кѡ и҆ самомꙋ̀ ѻ҆́номꙋ мѣ̑ста тогѡ̀ видѣ̑нїю, покаѧ́нїѧ всѧ́кагѡ и҆ пла́ча бы́ти ѹ҆чи́телю. Но ꙗ҆̀же и҆нѣ́мъ неꙋдѡ́бна сꙋ́ть и҆ непрїѧ̑тна, то̀ ѿ добродѣ̑тели и҆ дх҃о́вна бога́тства ѿпа́дшымъ, любє́зна и҆ бл҃гопрїѧ̑тна сꙋ́ть. Дꙋша́ бо дерзнове́нїѧ пе́рвшагѡ лиши́вшисѧ, и҆ наде́жды безстра́стїѧ ѿпа́дши, и҆ печа́ть чистоты̀ разве́рзши: и҆ бога́тства дарова́нїй ѡ҆кра́дена бы́вши, и҆ бжⷭ҇твенна ѹ҆тѣше́нїѧ ѿчꙋжди́вшисѧ, и҆ завѣ̑тъ гдⷭ҇нь ѿве́ргши, (и҆) ѿ ѻ҆гнѧ̀ добра̀ сле́зъ дꙋше́вныхъ ѹ҆гаси́вшисѧ и҆ па́мѧтїю сегѡ̀ ѹ҆ѧзвлѧ́ема, и҆ болѣ̑зненнѣ бодо́ма, не то́чїю предрече́нныѧ трꙋды̀ со всѧ́цѣмъ прїи́метъ ѹ҆се́рдїемъ, но и҆ самꙋ̀ себѐ ѹ҆бива́ти бл҃гоче́стнѣ по́двигомъ си́мъ тщи́тсѧ: а҆́ще ѹ҆́бѡ и҆ є҆́сть въ не́й ѡ҆ста́нокъ и҆́скры любвѐ, и҆лѝ стра́ха гдⷭ҇нѧ, ꙗ҆ковѝ вои́стиннꙋ (и҆) бѧ́хꙋ бл҃же́ннїи сі́и. Сїѧ̑ бо во ѹ҆мѣ̀ и҆мꙋ́ще, и҆ высотꙋ̀ ѿ неѧ́же ѿпадо́ша во ѹ҆́мъ прїе́млюще, гл҃ахꙋ: помѧнꙋ́хомъ дни̑ дрє́внїѧ, ѻ҆гнѧ̀ ѻ҆́нагѡ, тща́нїѧ на́шегѡ. И҆́ни ко бг҃ꙋ вопїѧ́хꙋ: гдѣ̀ сꙋ́ть ми́лѡсти твоѧ̑ дрє́внїѧ гдⷭ҇и, ꙗ҆̀же показа́лъ є҆сѝ дꙋшѝ на́шей во и҆́стинѣ твое́й; Помѧнѝ поноше́нїе и҆ трꙋды̀ ра̑бъ твои́хъ. И҆́нъ: кто́ мѧ ѹ҆стро́итъ по мцⷭ҇амъ пре́жднихъ дне́й, въ ни́хже мѧ̀ хранѧ́ше бг҃ъ, є҆гда̀ свѣтѧ́шесѧ свѣти́лникъ свѣ̑та є҆гѡ̀ над̾ главо́ю се́рдца моегѡ̀.

к҃д. Ка́кѡ же пє́рвшаѧ своѧ̑ помина́хꙋ и҆справлє́нїѧ, и҆ ѡ҆ си́хъ подо́бнѣ младе́нцємъ пла́чꙋщымъ рыда́хꙋ, и҆ гл҃ахꙋ: гдѣ̀ є҆́сть ѻ҆́на мл҃и́твы чистота̀; Гдѣ̀ є҆́сть ѻ҆́но сеѧ̀ дерзнове́нїе; Гдѣ̀ є҆́сть сла́дкаѧ ѻ҆́на вмѣ̑стѡ го́ркїѧ слеза̀; Гдѣ̀ є҆́сть наде́жда (ѻ҆́на) всесоверше́нныѧ чистоты̀ и҆ ѡ҆чище́нїѧ; Гдѣ̀ є҆́сть ча́ѧнїе ѻ҆́но бл҃же́ннагѡ безстра́стїѧ; Гдѣ̀ є҆́сть ꙗ҆́же къ па́стырю вѣ̑ра; Гдѣ̀ є҆́сть ѻ҆́но мл҃и́твы є҆гѡ̀ въ на́съ бл҃годѣѧ́нїе; погибо́ша сїѧ̑ всѧ̑, и҆ ꙗ҆́коже не ꙗ҆́влшасѧ, и҆счезо́ша: и҆ ꙗ҆́коже не бы̑вша, потреби́шасѧ, и҆ ѿидо́ша.

к҃є. Сїѧ̑ ѹ҆́бѡ гл҃юще и҆ пла́чꙋще, ѻ҆́ви ѹ҆́бѡ, бѣснова́тисѧ молѧ́хꙋсѧ: ѻ҆́ви же въ сщ҃е́нный впа́сти недꙋ́гъ, молѧ́хꙋ гдⷭ҇а. Ѻ҆́ви ѹ҆́бѡ, ѻ҆чеса̀ погꙋби́ти, и҆ ми́лостивенъ предлежа́ти позо́ръ: ѻ҆́ви же, разсла́блени бы́ти, и҆ то́чїю та́мошнихъ ѕѡ́лъ и҆скꙋ́са не прїѧ́ти. А҆́зъ же, ѽ дрꙋ́зи, забы́хъ са́мъ себѐ, ѡ҆ ѻ҆́нѣхъ любоꙋпражнѧ́ѧсѧ пла́чи, и҆ ве́сь ѹ҆мо́мъ свосхи́тихсѧ, ѹ҆держава́ти себѐ не могі́й. Но возврати́ти подоба́етъ сло́во сїѐ.

к҃ѕ. Пребы́въ ѹ҆̀бо въ темни́цѣ ѻ҆́нѣй до три́десѧти дне́й, возврати́хсѧ нетерпѣли́вый въ вели́кое ѻ҆́но ѻ҆бщежи́тїе къ вели́комꙋ ѻ҆́номꙋ. ѻ҆́нъ же ѹ҆ви́дѣвъ мѧ̀ а҆́ки и҆змѣне́на всего̀ и҆ и҆зстꙋ́плша, позна̀ всепремꙋ́дрый то́й, и҆змѣне́нїѧ ѻ҆́бразъ, и҆ гл҃етъ: что̀ є҆́сть, ѻ҆́ч҃е і҆ѡа́нне; ви́дѣлъ ли є҆сѝ трꙋжда́ющихсѧ по́двиги; А҆́зъ же рѣ̑хъ: и҆ ви́дѣхъ, ѻ҆́ч҃е, и҆ ѹ҆диви́хсѧ, и҆ ѹ҆бл҃жи́хъ а҆́зъ па́дшихъ и҆ пла́чꙋщихъ, па́че не па́дшихъ и҆ себѐ не пла́чꙋщихъ: занѐ чрез̾ паде́нїе воста́ша воста́нїемъ безбѣ̑днымъ: ѻ҆́нъ же, та́кѡ є҆́сть гл҃етъ, и҆ повѣ̑да нело́жный є҆гѡ̀ ѧ҆зы́къ: ꙗ҆́кѡ, гл҃етъ, пре́жде десѧтѝ лѣ̑тъ, и҆мѣ̑хъ здѣ̀ бра́та ѕѣлѡ̀ тщали́ва и҆ дѣ̑лателѧ, и҆ такова̀, ꙗ҆́кѡ ви́дѧщꙋ мѝ того̀, та́кѡ дх҃омъ горѧ́ща, трепета́ти, ѡ҆ не́мъ за́висти дїа́волѧ, да не ка́кѡ мно́гимъ ѻ҆́нѣмъ тече́нїемъ преткне́тъ ѡ҆ ка́мень но́гꙋ (свою̀): є҆́же бо́рзѡ ходѧ́щымъ слꙋча́тисѧ ѡ҆бы́чно є҆́сть: є҆́же и҆ слꙋчи́сѧ. Та́же восхо́дитъ ко мнѣ̀ въ ве́черъ глꙋбо́къ: показꙋ́етъ ꙗ҆́звꙋ (свою̀) на́гꙋ: и҆́щетъ пла́стырѧ: про́ситъ же́га, смꙋща́етсѧ ѕѣлѡ̀. Та́же, поне́же досто́инъ милосе́рдїѧ бѣ̀, зри́тъ не ѕѣлѡ̀ же́стоко рѣ̑занїе врача̀ ѹ҆потреби́ти хотѧ́ща, помета́ѧ себѐ на зе́млю, є҆́млетсѧ за но́зѣ, ѹ҆мыва́етъ дово́лнѣ тѣ̀ слеза́ми: про́ситъ ѡ҆сꙋжде́нїѧ во ѻ҆́нꙋ, ю҆́же ви́дѣлъ є҆сѝ, темни́цꙋ: невозмо́жно є҆́сть вопїѧ́ше не пойти́ ми та́мѡ. Та́же ѹ҆бѣжда́етъ милосе́рдїе вра́чево превестѝ въ непощадѣ̑нїе, ве́щь скꙋ́днаѧ въ недꙋ́гꙋющихъ и҆ преди́внѣйшаѧ: достиза́етъ скорѣ̑е ка́ющихсѧ ѻ҆́нѣхъ, быва́етъ ѻ҆́бщникъ и҆ сболѣ̑зненникъ: ѹ҆ѧзви́всѧ ѹ҆̀бо се́рдцемъ ꙗ҆́кѡ мече́мъ печа́лїю любвѐ ра́ди бж҃їѧ, во ѻ҆смы́й де́нь ѿхо́дитъ ко гдⷭ҇ꙋ, проси́въ погребе́нїѧ не полꙋчи́ти. А҆́зъ же того̀ и҆ здѣ̀ принесо́хъ, и҆ со ѻ҆ц҃ы̀ погрѣбо́хъ ꙗ҆́кѡ досто́йна: тѣ̑мже и҆ по седмѣ̑мъ ра́бстѣмъ, во ѻ҆смы́й де́нь разрѣша́етсѧ свобо́денъ. є҆́сть же нѣ̑кто (и҆) ѻ҆́но ѹ҆вѣ̑дѣвъ ꙗ҆́вственнѣ, не пе́рвѣе томꙋ̀ ѿ хꙋдѡ́ю и҆ сквє́рною моє́ю ногꙋ̀ воста́ти, пре́жде не́же бг҃а ѹ҆ми́лостивити: и҆ не чꙋ́до: вѣ̑рꙋ бо въ се́рдцѣ блꙋдни́цы ѻ҆́ныѧ воспрїе́мъ, таковы́мъ и҆ то́й и҆звѣще́нїемъ смире́ннѣи моѝ но́зѣ ѡ҆мочѝ: всѧ̑ же возмо́жно вѣ̑рꙋющемꙋ, гдⷭ҇ь речѐ.

Ви́дѣхъ нечи̑сты дꙋ́шы ѡ҆ раче́нїихъ тѣле́съ ѡ҆ неи́стовственнѣ неи́стовѧщѧсѧ: и҆ винꙋ̀ ѹ҆́бѡ покаѧ́нїѧ прїе́мше ѿ и҆скꙋ́са раче́нїѧ, то́ежде раче́нїе ко гдⷭ҇ꙋ пренесо́ша: и҆ всѧ́къ стра́хъ прескочи́вше, без̾ насыще́нїѧ къ любвѝ бж҃їей прицѣпи́шасѧ: сегѡ̀ ра́ди и҆ гдⷭ҇ь къ цѣломꙋ́дреннѣй ѻ҆́нѣй блꙋдни́цѣ не гл҃етъ, ꙗ҆́кѡ ѹ҆боѧ́сѧ, но ꙗ҆́кѡ возлюбѝ мно́гѡ, и҆ возмо́же раче́нїемъ раче́нїе ѿрази́ти.

к҃з. Не невѣ̑мъ же а҆́зъ, ѽ чꙋ́днїи, ꙗ҆́кѡ нѣ́кимъ ѹ҆́бѡ невѣ̑рни, и҆нѣ́мъ же безнаде́жни, и҆нѣ́мъ же ѿча́ѧнїе ражда́юще ꙗ҆влѧ́ютсѧ, ꙗ҆̀же повѣ̑дахомъ по́двизи бл҃же́нныхъ ѻ҆́нѣхъ: мꙋ́жъ же мꙋ́жественъ ѿ си́хъ прїѧ́тъ ѻ҆сте́нъ и҆ стрѣлꙋ̀ ѻ҆́гненнꙋ, и҆ ре́вность въ се́рдцѣ носѧ̀ ѿи́де: ни́зшїй же сегѡ̀, позна̀ не́мощь свою̀, и҆ смиренномꙋ́дрїе ѹ҆до́бнѣ стѧжа́въ са́маго себѐ ѹ҆коре́нїемъ, къ пе́рвомꙋ потечѐ, не вѣ̑мъ же и҆ пости́же ли. Мꙋ́жъ же неради́въ, да не прико́снетсѧ речє́ннымъ: да не ка́кѡ и҆ то̀ є҆́же дѣ̑лаетъ, ѿча́ѧвсѧ расточи́тъ: и҆ сбꙋ́детсѧ и҆ на не́мъ сло́во ѻ҆́но гл҃ющее: ѿ неимꙋ́щагѡ же, ѹ҆се́рдїѧ, и҆ ве́щь ю҆́же мни́тсѧ и҆мѣ̑ти, взѧ́то бꙋ́детъ ѿ негѡ̀.

к҃и. Невозмо́жно є҆́сть на́мъ въ ро́въ беззако́нїй па́дшымъ, не и҆ въ бе́зднꙋ смире́нїѧ ка́ющихсѧ погрꙋзи́вшымсѧ, ѿѻнꙋ́дꙋ и҆звлечє́нымъ бы́ти.

к҃ѳ. И҆́но є҆́сть ка́ющихсѧ сѣ̑тованное смире́нїе: и҆ и҆́но є҆щѐ согрѣша́ющихъ со́вѣсти зазира́нїе: и҆ и҆́но ѻ҆́но совершє́ннымъ, дѣ̑йствомъ бж҃їимъ приходѧ́щее бл҃же́нное богатносмире́нїе. не потщи́мсѧ тре́тїѧгѡ сегѡ̀ словесы̀ ѡ҆брѣстѝ, всꙋ́е бо тещѝ и҆́мамы: втора́гѡ же зна́менїе є҆́сть, терпѣ̑нїе безче́стїѧ всесоверше́нно. Мꙋчи́телнѣ ѡ҆блада́етъ предвари́вшїй ѡ҆бы́чай и҆ пла́чꙋщимъ мно́жицею, и҆ не чꙋ́до: є҆́же ѡ҆ сꙋдба́хъ и҆ паде́нїихъ сло́во те́мно є҆́сть, и҆ всѧ́кой дꙋшѝ непостижи́мо: ка̑ѧ ѹ҆́бѡ нерадѣ̑нїемъ, ка̑ѧ же ѡ҆ставле́нїемъ смотри́телнымъ: ка̑ѧ же ѿвраще́нїемъ бж҃їимъ слꙋча̑ющаѧсѧ на́мъ сꙋ́ть паде́нїѧ: ѻ҆ба́че ѻ҆́но мѝ нѣ̑кто повѣ̑да, ꙗ҆́кѡ по смотре́нїю на́мъ слꙋча̑ющаѧсѧ, ско́рое ѿ ни́хъ ѿвраще́нїе и҆́мꙋтъ: не бо попꙋща́етъ преда́вый на мно́зѣ держи̑мымъ бы́ти на́мъ ѿ бѣ̑са печа́ли: па́дшїи пре́жде всѣ̑хъ возра́тꙋимсѧ проти́вꙋ є҆мꙋ̀: то́й бо во вре́мѧ мл҃и́твы на́шеѧ предстоѧ̀, и҆ пе́рвшее дерзнове́нїе на́ше воспомина́ѧ, ѹ҆праздни́ти на́съ ѿ мл҃и́твы хо́щетъ.

л҃. Да не ѹ҆жа́снешисѧ на всѧ́къ де́нь па́даѧ, нижѐ ѿскака́й: но ста́ни мꙋ́жественнѣ, и҆ всѧ́кѡ ѹ҆стыди́тсѧ терпѣ̑нїѧ твоегѡ̀ а҆́гг҃лъ хранѧ́й тѧ̀. До́ндеже но́ва є҆́сть и҆ горѧ́ща ꙗ҆́зва, ѹ҆добьисцѣлѧ́ема бы́ти ѡ҆бы́че: многовре́мєнныѧ бо вознерадѣ́нны и҆ ѡ҆пꙋстѣ́лы неꙋдобьисцѣлѧ́ємы сꙋ́ть: и҆ мно́га трꙋда̀, и҆ желѣ̑за и҆ бри́твы, и҆ ѻ҆гнѧ̀ здѣ̀ къ врачева́нїю тре́бꙋюще. Мнѡ́ги вре́менемъ неисцѣ́лны сꙋ́ть, ѹ҆ бг҃а же всѧ̑ возмѡ́жна сꙋ́ть.

л҃а. Пре́жде паде́нїѧ ѹ҆́бѡ, чл҃вѣколюби́ва: по паде́нїи же, жесто́ка бы́ти бг҃а глаго́лютъ бѣ̑сове.

л҃в. Не покарѧ́йсѧ глаго́лющемꙋ по паде́нїи, ѡ҆ ма́лыхъ согрѣше́нїихъ, да бы̀ сегѡ̀ не сотвори́лъ є҆сѝ, сїе́ бо ничто́же є҆́сть: мно́жицею бо ма́ли да́ри мно́гꙋ ꙗ҆́рость сꙋдїинꙋ̀ ѹ҆толи́ша.

л҃г. уже вои́стиннꙋ мꙋ́чай себѐ, то̀ всѧ́къ де́нь во́ньже не пла́четъ, ꙗ҆́кѡ погꙋби́въ того̀ непщꙋ́етъ, а҆́ще ка̑ѧ и҆ бла̑га сотвори́лъ є҆́сть въ то́мъ.

л҃д. Никто́же и҆з̾ пла́чꙋщихъ во и҆схо́дѣ и҆звѣще́нїѧ да ѡ҆жида́етъ, безвѣ̑стное бо, нѣ̑сть и҆звѣ̑стно: ѡ҆сла́би мѝ и҆звѣще́нїемъ да почі́ю, пре́жде да́же не ѿидꙋ̀ ѿсю́дꙋ без̾ и҆звѣще́нїѧ. И҆дѣ̑же дх҃ъ гдⷭ҇нь, то̀ ѹ҆́за сїѧ̀ разрѣши́сѧ: и҆дѣ̑же смире́нїе несравнѧ́емо, то̀ ѹ҆́за сїѧ̀ разрѣши́сѧ: и҆́же бо без̾ двою̀ сє́ю сꙋ́ть, да не прелстѧ́тсѧ: свѧ́зани бо сꙋ́ть.

л҃є. Сꙋ́щїи въ мі́рѣ и҆ є҆ди́ни, си́хъ стра́нни сꙋ́ть и҆звѣще́нїй, а҆ наипа́че пе́рвшагѡ: ми́лостынею же нѣ̑цыи текꙋ́тъ, во и҆схо́дѣ приѡбрѣ̑тенїе своѐ познава́юще.

л҃ѕ. Не ѹ҆вѣ̑сть пла́чай себѐ, пла́чь, и҆лѝ паде́нїе и҆но́гѡ, и҆лѝ порече́нїе. Ѿ ѕвѣ̑рѧ ѹ҆грызе́нъ бы́въ пе́съ, наипа́че воз̾ѧри́сѧ на него̀, болѣ̑знїю ра́ны тоѧ̀ на него̀ без̾ послабле́нїѧ ла́ѧ.

л҃з. Во́нмемъ, є҆да̀ ка́кѡ не ѿ чистоты̀, но а҆́ки ѹ҆ны́вши, со́вѣсть (на́ша) ѿ є҆́же ѡ҆блича́ти преста́ла є҆́сть. зна́менїе є҆́же ѡ҆ паде́нїи разрѣше́нїѧ, є҆́же вы́нꙋ (себѐ) должника̀ бы́ти непщева́ти.

л҃и. Ничто́же щедро́тамъ бж҃їимъ ра́вно, и҆лѝ бо́лше (тѣ̑хъ) є҆́сть: тѣ̑мже ѿчаѧва́ѧйсѧ, са́мъ себѐ закла́лъ є҆́сть. зна́менїе прилѣ̑жна покаѧ́нїѧ є҆́сть, є҆́же всѣ̑хъ слꙋча́ющихсѧ ви́димыхъ и҆ неви́димыхъ скорбе́й досто́йныхъ бы́ти себѐ непщева́ти: и҆ мно́жае си́хъ. Мѡѷсе́й по є҆́же бг҃а въ кꙋпинѣ̀ ѹ҆ви́дѣти, па́ки во є҆гѵ́петъ, си́рѣчь во ѡ҆мраче́нїе къ плїнѳодѣ̑ланїю не́гли мы́сленнагѡ фараѡ́на возврати́сѧ: но па́ки восхо́дитъ къ кꙋпинѣ̀: и҆ не то́чїю, но и҆ на го́рꙋ ѻ҆́нꙋ: ѹ҆разꙋмѣ̑вый при́тчꙋ сїю̀, никогда́же себѐ ѿчаѧва́етъ. Ѡ҆бнищава́етъ вели́кїй і҆́ѡвъ, но па́ки сꙋгꙋ́бѡ ѡ҆богатѣ̀.

л҃ѳ. Въ лѣни́выхъ, лю̑та ꙗ҆̀же по зва́нїи се́мъ падє́нїѧ быва́ютъ, наде́ждꙋ безстра́стїѧ порази̑вша, и҆ бл҃же́ннꙋ ве́щь непщева́ти ѹ҆вѣщава̑юща помышлѧ́ющихъ, понѐ ѿ ꙗ҆́мы сеѧ̀ воста́нїе. зрѝ, не бо ѿню́дъ ѻ҆́нѣмъ пꙋте́мъ и҆́мже заблꙋди́хомъ, возвраща́емсѧ: но и҆нѣ̑мъ сокраще́ннымъ.

м҃. Ви́дѣхъ два̀ є҆диноѻбра́знѣ и҆ є҆диновре́меннѣ ко гдⷭ҇ꙋ и҆дꙋ̑ща: и҆ є҆ди́нъ ѹ҆́бѡ ѿ си́хъ, ста́ръ бѣ̀ и҆ прево-сходѧ́щъ во трꙋдѣ̑хъ: дрꙋгі́й же, ѹ҆чени́къ: и҆ предтечѐ скорѣ̑е ста́рца, и҆ прїи́де пре́жде ко гро́бꙋ смире́нїѧ.

м҃а. Во́нмемъ всѝ, наипа́че же па́дшїи, не помы́слити въ се́рдцѣ ѻ҆рїге́на безбо́жнагѡ недꙋ́гъ: бж҃їе бо чл҃вѣколю́бїе скве́рный ѻ҆́нъ предлага́ѧ, ѹ҆добопрїѧ́тенъ сластолюби̑вымъ быва́етъ.

м҃в. Въ поꙋче́нїи пое́мъ, па́че же въ покаѧ́нїи мое́мъ разгори́тсѧ ѻ҆́гнь мл҃и́твы жгꙋ́щїѧ вещество̀. Предѣ̑лъ тебѣ̀, и҆ ѹ҆ста́въ, и҆ прописа́нїе, и҆ ѻ҆́бразъ къ покаѧ́нїю да бꙋ́дꙋтъ преждепомѧнꙋ́тїи ст҃і́и ѡ҆сꙋждє́нницы: и҆ не востре́бꙋеши кни́ги ѿню́дъ во все́мъ животѣ̀ твое́мъ, до́ндеже возсїѧ́етъ на тѧ̀ хрⷭ҇то́съ сн҃ъ бж҃їй и҆ бг҃ъ въ воскресе́нїи прилѣ̑жнагѡ покаѧ́нїѧ, а҆ми́нь.

На пѧ́тый степе́нь возше́лъ є҆сѝ пока́ѧвыйсѧ, пѧ́ть бо чꙋ́вствъ ѡ҆чи́стилъ є҆сѝ тѣ̑мъ: и҆ нево́льнагѡ томле́нїѧ и҆ мꙋче́нїѧ, (тѣ̑мъ) самопроизво́л̾нымъ и҆збѣжа́въ.

На шестом часе:

На девятом часе: