Если чтения отсутствуют - значит, по данному дню еще не были добавлены тексты.
По первой кафизме:
Чтутся седальны по обычаю.И о ручне́м де́ле не пренемога́й, мно́жицею бо вло́жит ти ся по́мысл глаго́ля, я́ко «николи́же и́мам навы́кнути сего́ ручна́го де́ла». Бо́лен бо еси́, и не́мощен, и то́щнаго де́ла сего́ не мо́жеши терпе́ти до конца́. Се бо тя нача́ша у́дове боле́ти от труда́, не бо еси́ навы́кл тяжа́ти. Но преше́д, иди́, отню́дуже еси́ прише́л, и́бо рече́: «А́ще хо́щеши боя́тися Бо́га, спасе́шися». Ты же а́ки ве́рен, не уклони́ся таце́ми по́мыслы, но терпи́ Бо́га ра́ди призыва́ющаго тя в Свое́ ца́рство. Той бо рече́: «А́ще и́мате ве́ру я́ко зерно́ гору́шно, рече́те горе́ сей: пре́йди отсю́ду и пре́йдет, и ничто́же не невозмо́жно есть вам». И мы у́бо возлю́блении да терпи́м: не бо на челове́ка упова́хом и́же не возмо́жет спасти́, но на Бо́га Спаса́ющего упова́ющая Нань: «Наде́ющейся на Господа, я́ко гора́ Сио́н не подви́жется». И па́ки: «Блажи́т Дух Святы́й упова́ющая на Го́спода». «Го́споди Бо́же сил, блаже́н челове́к упова́яй на Тя». Терпи́ у́бо, возлю́блене, Го́спода ра́ди. А́ще у́бо кни́гам и́мже учи́лся еси́, и претерпе́л еси́ труда́ толи́ка, а́ще ли же и худо́жеству ми́ра сего́ претерпе́л еси́ труда́ толи́ка - па́че у́бо до́лжни есмы́ ны́не претерпе́ти Го́спода ра́ди. Пи́шет бо: «Плоды́ трудо́в свои́х сне́си. Блаже́н еси́, и добро́ тебе́ бу́дет». И апо́стол запове́дает, глаго́ля: «Свои́ма рука́ма де́лайте благо́е, я́ко да не тем еди́нем то́кмо де́лающе я́сти, но и требующым дая́ти от свои́х трудо́в». То́щно у́бо да бу́дет всем нам, е́же изба́витися от грех на́шых. А́ще бо и мы хо́щем, изба́вимся. Сам бо Госпо́дь рече́: «Проси́те, и да́стся вам. Всяк бо прося́й прие́млет, и ища́ и обрета́ет, и толку́щему отве́рзется». Тому́ сла́ва во ве́ки веко́в. Ами́нь.
По второй кафизме:
Чтутся седальны по обычаю.О быва́ющем же [в] собла́зне, вем Ре́кшаго: «Не суди́те, и не осу́дими бу́дете». И: «в ню́же ме́ру ме́рите, возме́рится вам». А́ще ли хо́щеши име́ти по́мощь по́мыслу, воспомяни́ я́ко пра́ведный Лот в Содо́мех живя́ше, но не повину́лся той горды́ни блу́дней. Те́мже и спасе́н бысть, я́коже пи́шет: «Виде́нием и слу́хом пра́ведный бе живы́й в них, и день от дне ду́шу провожда́ше и необы́чными делесы́ му́чаше». Но что ти водружи́, глаго́ля: «Весть Госпо́дь благочести́выя от напа́стей избавля́ти, непра́ведныя же в день Су́дный на муче́ние блюде́т».
Да не днесь у́бо воздержа́ние и кро́тость, а у́тре пия́нство и горды́ни. Да не днесь безмо́лвие и бде́ние и смире́ние, а у́тре молва́ и сон несы́тен и непокоре́ние и подо́бная сим. Да не днесь отмета́ние мирско́е земны́х веще́й, и отмета́ние оте́чества и друго́в, и по пло́ти роди́тель, Христо́вы ра́ди наде́жды: и у́тро страны́ и оте́чества насле́дования и́щем, погрузи́тися са́ми хотя́ще во мно́зе зле.
Жена́ бо Ло́това возвра́щшися вспять, бысть столп слан. Те́мже и Госпо́дь учи́т ны, глаго́ля: «Никто́же ру́ки возло́жь на ра́ло и зряй вспять, упра́влен бу́дет в Ца́рствии небе́снем». Но име́й при́сно на уме́ си день он, егда́ отве́рглся еси́ всего́ и изы́де мирски́х Христа́ ра́ди, и егда́ же еси́ раждеже́н стра́хом Бо́жиим и паля́щым ду́хом ко Го́споду, и ту име́й мысль до конца́. «Претерпе́вый бо до конца́, той спасе́тся». Я́ко да восприи́меши наи́м де́лу с живото́м ве́чным, я́ко ко И́стинну Бо́гу прише́л еси́, и вся оста́вил еси́, да Христа́ приобря́щеши. И Тому́ сла́ва во ве́ки веко́в. Ами́нь.
На третьем часе:
СЛО́ВО Д҃. Ѡ҆ бл҃же́ннѣмъ и҆ приснопа́мѧтнѣмъ послꙋша́нїи.
Къ подви́жникѡмъ на́ми про́чее, и҆ страда́лцємъ хрⷭ҇тѡ́вымъ приходѧ́що сло́во сїѐ прили́чнѣ дости́же. занѐ всѧ́кагѡ ѹ҆́бѡ плода̀, предварѧ́етъ цвѣ̑тъ: всѧ́кагѡ же послꙋша́нїѧ стра́нничество: и҆лѝ тѣ̑ла, и҆лѝ во́ли. Двѣма́ бо си́ма добродѣ̑телма, ꙗ҆́коже златы́ма крыло́ма къ нб҃сѝ безлѣ̑ностнѣ восхо́дитъ прпⷣбное сїѐ. И҆ не́гли ѡ҆ не́мъ дх҃опрїи́мецъ нѣ̑кїй пѣсновоспѣ̀: кто̀ да́стъ мѝ крилѣ̀ ꙗ҆́кѡ голꙋби̑нѣ, и҆ полещꙋ̀ дѣ̑ѧтелствомъ, и҆ почі́ю (ѱал. н҃д, з҃) видѣ̑нїемъ и҆ смире́нїемъ.
в҃. Нижѐ са́мый то́й ѻ҆́бразъ, а҆́ще ѹ҆го́дно є҆́сть, мꙋ́жественныхъ си́хъ ра̑тникъ претецы́мъ сло́вомъ си́мъ ꙗ҆́вственъ сотвори́ти, ка́кѡ и҆ щи́тъ держа́тъ сꙋ́щїѧ ко бг҃ꙋ, и҆ ко ѡ҆бꙋчи́телю вѣ̑ры, тѣ̑мъ ꙗ҆́коже рещѝ, всѧ́къ невѣ̑рїѧ и҆лѝ прехожде́нїѧ по́мыслъ ѿрѣва́юще: и҆ ме́чь дх҃о́вный воздви́жꙋще вы́нꙋ, и҆ всѧ́кꙋ свою̀ и҆́хъ во́лю приближа́ющꙋсѧ къ ни̑мъ ѹ҆бива́юще, и҆ въ брѡнѧ̀ желѣ́зны терпѣ̑нїѧ и҆ кро́тости ѡ҆дѣ̑ѧнни, всѧ́кꙋ доса́дꙋ и҆ боде́нїе и҆ свою̀ и҆́хъ стрѣлꙋ̀ тѣ̑ми ѿража́юще: и҆́мꙋтъ же и҆ шле́мъ спасе́нїѧ, предстоѧ́телевъ мл҃и́твою покро́въ: стоѧ́тъ же вкꙋ́пѣ нога́ми ника́коже, но ѻ҆́вꙋ ѹ҆́бѡ на слꙋ́жбꙋ простира́юще, ѻ҆́вꙋ же на мл҃и́твѣ недви́жимꙋ и҆мꙋ́ще.
г҃. Послꙋша́нїе є҆́сть ѿрече́нїе дꙋшѝ своеѧ̀ всесоверше́нно, тѣ̑ломъ показꙋ́емо дѣ̑йственнѣ, и҆лѝ не́гли сопроти́вное. Послꙋша́нїе є҆́сть ѹ҆мерщвле́нїе ѹ҆́дѡвъ въ живо́мъ ѹ҆мѣ̀. Послꙋша́нїе є҆́сть неистѧзꙋ́емо движе́нїе: во́льна сме́рть: нелюбопы́тенъ живо́тъ: без̾ попече́нїѧ бѣда̀: непоꙋча́емо къ бг҃ꙋ словоизвине́нїе: безстра́шїе сме́рти: безбѣ̑дно пла́ванїе, спѧ́що пꙋтеше́ствїе. Послꙋша́нїе є҆́сть гро́бъ во́ли, и҆ воскресе́нїе смире́нїѧ. Не противоглаго́летъ и҆лѝ разсꙋжда́етъ мертве́цъ во бл҃ги́хъ, и҆лѝ мнѣ̑нїемъ лꙋка́выхъ: ѹ҆мертви́вый бо бл҃гоче́стнѣ дꙋ́шꙋ є҆гѡ̀, ѡ҆ всѣ̑хъ ѿвѣ̑тствовати и҆́мать. Послꙋша́нїе є҆́сть, ѿложе́нїе разсꙋжде́нїѧ, въ бога́тствѣ разсꙋжде́нїѧ.
д҃. Нача́ло ѹ҆́бѡ ѹ҆мерщвле́нїѧ, и҆ дꙋше́вныѧ во́ли, и҆ ѹ҆десѐ тѣ̑ла, болѣ̑знь є҆́сть: среда́ же, ѻ҆вогда̀ ѹ҆́бѡ болѣ̑знь, ѻ҆вогда́ же безболѣ̑знїе: коне́цъ же, не ѡ҆щꙋще́нїе про́чее всѧ́ко, и҆ недвиже́нїе болѣ̑зни: тогда̀ болѧ̀ ви́димь быва́етъ и҆ болѣ̑знꙋѧ живы́й мертве́цъ се́й поко́йный, є҆гда̀ себѐ ѹ҆́зритъ во́лю свою̀ творѧ́ща, боѧ́сѧ бре́мене ѡ҆сꙋжде́нїѧ своегѡ̀.
є҃. Є҆ли́цы къ по́прищꙋ ѹ҆́мнагѡ сегѡ̀ и҆сповѣ̑данїѧ покꙋси́стесѧ совлещи́сѧ: є҆ли́цы и҆́го хрⷭ҇то́во на вы́ю свою̀ взѧ́ти хо́щете: є҆ли́цы ѿсе́лѣ бре́мѧ своѐ на и҆но́го вы́ю возложи́ти тщите́сѧ: є҆ли́цы цѣ́ны своѧ̑ написа́ти во́лею тщите́сѧ, и҆ вмѣ̑стѡ ѻ҆́нѣхъ свобо́дѣ напи́санѣй бы́ти та́мъ хо́щете: є҆ли́цы рꙋка́ми и҆нѣ̑хъ возвыша́еми пла́вающе вели́кꙋю сїю̀ препла́ваете пꙋчи́нꙋ, то̀ ѹ҆вѣ̑дите ꙗ҆́кѡ кра́ткимъ нѣ̑кимъ и҆ жесто́кимъ пꙋте́мъ ходи́ти покꙋси́стесѧ, є҆ди́нꙋ и҆ є҆ди́нственнꙋ пре́лесть на себѣ̀ и҆мꙋ́щимъ, сїѧ́ же нарица́етсѧ своечи́нїе: и҆́же бо сегѡ̀ ѿню́дъ ѿвергі́йсѧ, въ тѣ̑хъ ꙗ҆̀же мни́тъ бы́ти дѡ́бра и҆ дх҃ѡ́вна и҆ бг҃оꙋгѡ́дна, то̀ пре́жде не́же ходи́ти, дости́же: послꙋша́нїе бо є҆́сть, невѣ̑рованїе самомꙋ̀ себѣ̀ во всѣ̑хъ до́брыхъ да́же до конца̀ живота̀.
ѕ҃. И҆мꙋ́ще ѡ҆ гдⷭ҇ѣ вы́ю свою̀ подклонѧ́ти, ра́зꙋмомъ ѹ҆́бѡ и҆ сло́вомъ смиренномꙋ́дрїѧ, и҆ и҆звѣ̑стнѣ спасе́нїе на́ше и҆но́мꙋ ѡ҆ гдⷭ҇ѣ ввѣрѧ́ти. Пре́жде вхо́да ѹ҆́бѡ, а҆́ще ко́е лꙋка́вство и҆ ра́зꙋмъ ѹ҆ на́съ є҆́сть, ко́рмчїѧ ѻ҆́наго и҆стѧзꙋ́имъ и҆ и҆спыта́имъ: и҆ да та́кѡ рекꙋ̀, и҆ и҆скꙋси́мъ: да не на кора́бленника ꙗ҆́кѡ на ко́рмчїѧ, и҆ на недꙋ́гꙋющаго ꙗ҆́кѡ на врача̀, и҆ на встра́ственнаго ꙗ҆́кѡ на безстра́стна, и҆ на пꙋчи́нꙋ ꙗ҆́кѡ на приста́нище напа́дше, гото́во себѣ̀ ѡ҆брѧ́щемъ и҆стопле́нїе: по вхо́дѣ же про́чее въ по́прище бл҃гоче́стїѧ и҆ повинове́нїѧ, не ктомꙋ̀ ѿню́дъ до́браго на́шего законополо́жника въ чесо́мъ и҆стѧзꙋ́имъ, а҆́ще ка̑ѧ въ не́мъ ꙗ҆́кѡ въ человѣ̑цѣ не́гли є҆щѐ ма̑ла и҆ согрѣшє́нїѧ ѹ҆ви́димъ: а҆́ще ли же нѝ, то̀ ничи́мже ѿ повинове́нїѧ сегѡ̀ и҆стѧзꙋ́ющїи по́льзꙋемсѧ.
з҃. Ѿню́дъ нꙋ́ждно є҆́сть хотѧ́щымъ къ настоѧ́телємъ вѣ̑рꙋ несꙋмнѣ̑ннꙋ вы́нꙋ содержава́ти, и҆справлє́нїѧ и҆́хъ въ се́рдцѣ свое́мъ неизглажда́єма и҆ приснопѡ́мнима храни́ти: да є҆гда̀ бѣ̑сове въ на́съ невѣ̑рїе къ тѣ́мъ всѣва́ютъ, ѿ по́мнимыхъ на́ми загради́мъ ѹ҆ста̀: поели́кꙋ бо вѣ̑ра цвѣте́тъ въ се́рдцѣ, потоли́кꙋ и҆ тѣ̑ло спѣши́тсѧ на слꙋ́жбꙋ: повнегда́ же ѡ҆ невѣ̑рїе преткне́тсѧ, то̀ па́лъ є҆́сть: ѿню́дъ бо, є҆́же не ѿ вѣ̑ры грѣ̑хъ є҆́сть (ри́мл. ѳ҃і, к҃г). Внегда́ тѧ по́мыслъ и҆стѧза́ти и҆лѝ ѡ҆сꙋди́ти предводи́телѧ под̾ꙋща́етъ, ꙗ҆́кѡ ѿ блꙋда̀ ѿскочѝ: ника́коже ѕмі́ю семꙋ̀ да пода́си ѡ҆сла́бꙋ, ни мѣ̑сто, ни вхо́дъ, ни нача́ло. глаго́ли же ко ѕмі́ю семꙋ̀: ѽ преле́стниче: не а҆́зъ нача́лствꙋющагѡ, но то́й сꙋ́дъ мо́й воспрїѧ́тъ: не а҆́зъ ѻ҆́номꙋ, но то́й мнѣ̀ сꙋдїѧ̀ є҆́сть.
и҃. Ѻ҆рꙋ́жїе ѹ҆́бѡ ѻ҆ц҃ы̀, ѱалмопѣ̑нїе: мл҃и́твꙋ же, стѣ̑нꙋ: ѹ҆мыва́лницꙋ же, непоро́чнꙋю слезꙋ̀ бы́ти ѹ҆ставлѧ́ютъ: бл҃же́нное же послꙋша́нїе, и҆сповѣ̑дничество бы́ти сꙋди́ша, без̾ негѡ́же никто́же ѿ встра́ственныхъ ѹ҆́зритъ гдⷭ҇а.
ѳ҃. Послꙋ́шникъ са́мъ и҆зрече́нїе на себѐ и҆зно́ситъ: занѐ а҆́ще ѹ҆́бѡ гдⷭ҇а ра́ди соверше́ннѣ послꙋ́шаетъ, то̀ а҆́ще и҆ не возмни́тъ соверше́ннѣ, сꙋда̀ своегѡ̀ совлече́сѧ: а҆́ще ли же бы свою̀ въ нѣ̑кихъ и҆сполнѧ́лъ во́лю, то̀ а҆́ще и҆ воз-мни́тсѧ послꙋ́шати, са́мъ бре́мѧ сїѐ на себѣ̀ но́ситъ: ѻ҆ба́че а҆́ще бы того̀ ѡ҆блича́ѧ предстоѧ́тель не преста́лъ, то̀ добрѡ́ бы бы́ло: а҆́ще ли же бы ѹ҆молча́лъ, то̀ не и҆́мамъ что̀ гл҃ати. уже съ простото́ю повинꙋ́ющїисѧ ѡ҆ гдⷭ҇ѣ, добро̀ тече́нїе прехо́дѧтъ, не подви́гше на себѐ ѻ҆пасноиспыта́нїемъ бѣсо́вское кова́рство.
і҃. Пре́жде всѣ̑хъ высповѣ̑даимсѧ до́бромꙋ сꙋдїѝ на́шемꙋ є҆ди́номꙋ: а҆́ще ли же вели́тъ то̀ и҆ всѣ́мъ: ꙗ҆́звы бо и҆з̾ѧвлѧ́ємы не пред̾ꙋспѣ̑ютъ на го́ршее, но и҆сцѣлѣ̑ютъ.
Ѡ҆ разбо́йницѣ.
а҃і. Стра́шно нѣ̑камѡ прише́дъ во ѻ҆бщежи́тїе до́бра сꙋдїѝ и҆ па́стырѧ ви́дѣхъ сꙋди́ще. Слꙋчи́сѧ бо ѻ҆на́мѡ мѝ сꙋ́щꙋ, нѣ̑коемꙋ ѿ разбо́йническа къ мона́шескомꙋ прїитѝ жи́телствꙋ: є҆мꙋ́же и҆зрѧ́днѣйшїй ѻ҆́нъ па́стырь и҆ вра́чь повелѣ̀ на се́дмь дні́й всѧ́кагѡ поко́ѧ приѡбщи́тисѧ на видѣ̑нїе то́чїю є҆́же на мѣ̑стѣ ѻ҆́номъ ѹ҆строе́нїѧ. По седмѣ̑мъ ѹ҆́бѡ призва́въ є҆го̀ ѻ҆со́бь па́стырь ѻ҆́нъ вопроша́ше, ѹ҆го́дно ли є҆́сть є҆мꙋ̀ сожи́тїе съ ни́ми сотвори́ти: и҆ ꙗ҆́коже согласи́вшагосѧ того̀ со всѧ́кою чистото́ю ѹ҆ви́дѣ, па́ки вопроша́ше что̀ тѣ̑мъ безмѣ̑стно въ мі́рѣ содѣ̑ѧно бы́сть; и҆ ꙗ҆́коже ѹ҆ви́дѣ є҆го̀ со сло́вомъ си́мъ ѡ҆ всѣ̑хъ ѹ҆се́рднѣ высповѣ̑давшасѧ, па́ки къ немꙋ̀ и҆скꙋша́ѧ гл҃аше: хощꙋ́ тѧ, гл҃етъ, пред̾ всѣ̑мъ бра́тствомъ та̑ ѡ҆б̾ѧви́ти: ѻ҆́нъ же вои́стиннꙋ грѣ̑хъ сво́й возненави́дѣвъ, и҆ сра́мъ ве́сь презрѣ̑въ, без̾ сомнѣ̑нїѧ ѡ҆бѣща́сѧ: а҆́ще хо́щеши, глаго́летъ, то̀ и҆ посредѣ̀ а҆лежⷭ҇а́ндрова гра́да. Та́же собира́етъ па́стырь ѻ҆́нъ въ цр҃ковь всѧ̑ ѻ҆́вцы ѻ҆́ны число́мъ три́ста и҆ три́десѧть, и҆ бж҃е́ственномꙋ собра́нїю соверша́емꙋ: бѧ́ше бо нд҃ѣ̑лѧ ѿ дне́й: по сконча́нїи є҆ѵⷢ҇лїа, вво́дитъ про́чее непоро́чнаго ѡ҆сꙋжде́нника ѻ҆́наго, ѿ нѣ̑-кихъ бра́тїй влеко́ма и҆ ма́лѡ бїе́ма, рꙋка́ма же созадѝ свѧ́зана, и҆ вре́тищемъ власѧ́нымъ ѡ҆болче́на, и҆ пе́пелъ на главѣ̀ и҆мꙋ́ща, ꙗ҆́коже и҆ ѿ са́магѡ тогѡ̀ видѣ̑нїѧ всѣ́мъ ѹ҆жа́сшымсѧ, а҆́бїе съ пла́чемъ воскли́кнꙋти: не бо̀ ѹ҆вѣ̑дѣ кто̀ быва́емое. Та́же ꙗ҆́кѡ бли́зъ цр҃ко́вныхъ две́рей дости́же, возглаша́етъ къ немꙋ̀ сщ҃е́ннаѧ ѻ҆́на чл҃вѣколюби́вагѡ сегѡ̀ сꙋдїѝ глава̀ вели́кимъ гла́сомъ: ста́ни, недосто́инъ бо є҆сѝ здѣ̑шнѧгѡ вхо́да.
Ѹ҆жаснꙋ́всѧ ѹ҆̀бо ѡ҆ па́стырѧ ѻ҆́нагѡ ѿ ст҃и́лища произне́сшемсѧ къ немꙋ̀ гла́сѣ: мнѧ́ше бо, ꙗ҆́коже по́слѣжде ны̀ клѧ́твами и҆звѣствова́ше, не человѣ̑ка, но гро́мъ ѹ҆слы́шати: па́даетъ ѹ҆́бѡ а҆́бїе на лицѣ̀ тре́петенъ бы́въ, и҆ ве́сь стра́хомъ позыба́всѧ. До́лѣ ѹ҆̀бо сы́й лежа̀, и҆ помо́стъ слеза́ми моча̀: повелѣва́емь быва́етъ па́ки ѿ чꙋ́днагѡ ѻ҆́нагѡ врача̀ и҆́же спасе́нїе є҆гѡ̀ во все́мъ содѣ̑ловаше: и҆ ѻ҆́бразъ спасе́нїѧ и҆ ꙗ҆́вственна смире́нїѧ всѣ́мъ подава́ше, рещѝ всѧ̑ содѣ́ѧннаѧ тѣ̑мъ по ви́дꙋ пред̾ всѣ̑ми. Ѻ҆́нъ же, съ тре́петомъ и҆сповѣ̑дꙋетъ всѧ̑ по є҆ди́номꙋ слꙋ́хъ ѹ҆жаса̑ющаѧ: не то́чїю тѣлє́снаѧ по є҆стествꙋ̀, и҆ проти́вꙋ є҆стествꙋ̀, со слове́сными же живо́тными, и҆ безслове́сными: но ѹ҆́бѡ да́же и҆ до чародѣѧ́нїй, и҆ ѹ҆бі́йствъ, и҆ и҆́ныхъ, ꙗ҆̀же нѣ̑сть пра́ведно ѹ҆слы́шати, и҆лѝ писа́нїю преда́ти. Высповѣ̑давшасѧ ѹ҆̀бо повелѣва́етъ а҆́бїе постриже́на бы́ти, и҆ съ бра́тїею сочисле́на.
в҃і. А҆́зъ же прпⷣбнагѡ ѻ҆́нагѡ ѹ҆ди́влсѧ премꙋ́дрости, вопроша́хъ ѻ҆со́бнѣ: чесогѡ̀ ра́ди тако́въ стра́ненъ ѻ҆́бразъ сотвори́лъ є҆́сть. Ѻ҆́нъ же вои́стиннꙋ вра́чь, двою̀ ра́ди сє́ю, гл҃етъ: пе́рвое ѹ҆́бѡ, да са́маго высповѣ̑давшагосѧ, настоѧ́щимъ сра́момъ ѿ бꙋ́дꙋщагѡ и҆зба́влю, є҆́же и҆ бы́сть: не бо воста̀ ѿ землѝ, ѽ бра́те і҆ѡа́нне, доне́лѣже ѿпꙋще́нїѧ всѣ̑хъ не полꙋчи́лъ є҆́сть: и҆ не невѣ̑рꙋй: нѣ̑кїй бо мѧ̀ ѿ тꙋ̀ бы́вшихъ бра́тъ ѹ҆вѣ̑ри глаго́лѧ: ꙗ҆́кѡ, речѐ, зрѣ̑хъ нѣ̑коего стра́шна держа́ща хартїю̀ пи́санꙋ, и҆ тро́сть: и҆ кꙋ́пнѡ (ꙗ҆́кѡ), гл҃етъ, грѣ̑хъ (сво́й) лежа́й глаго́ла-ше, того̀ ѻ҆́нъ тро́стїю ѻ҆́ною заглажда́ше, и҆ влѣ̑потꙋ: рѣ̑хъ бо, гл҃етъ, и҆сповѣ̑мъ на мѧ̀ беззако́нїе моѐ гдⷭ҇ви, и҆ ты̀ ѡ҆ста́вилъ є҆сѝ нече́стїе се́рдца моегѡ̀ (ѱал. л҃а, є҃): второ́е, поне́же нѣ̑кихъ и҆́мамъ неисповѣ́дана согрѣшє́нїѧ и҆мꙋ́щихъ, си́мъ про́чее и҆ ѻ҆́нѣхъ ко и҆сповѣ̑данїю побꙋжда́ѧ, без̾ негѡ́же никто́же ѡ҆ставле́нїе полꙋчи́тъ.
г҃і. И҆ и҆́на ѹ҆́бѡ про́чее мнѡ́га досточꙋ̑дна и҆ достойнопомина́єма ѹ҆ приснопомина́емагѡ ѻ҆́нагѡ ви́дѣхъ па́стырѧ и҆ па́ствы, и҆з̾ ни́хже мнѡ́жайшаѧ ва́мъ ꙗ҆́вствєнна сотвори́ти покꙋшꙋ́сѧ: пребы́хъ бо ѹ҆ негѡ̀ вре́мѧ не ма́ло, тѣ̑хъ и҆зслѣ̑дꙋѧ жи́телство, и҆ ѡ҆ то́мъ велмѝ ѹ҆дивлѧ́ѧсѧ, ка́кѡ и҆ назе́мнїи ѻ҆́ни нбⷭ҇ныхъ подража́хꙋ.
д҃і. Любвѐ ѹ҆́бѡ ѹ҆ ни́хъ свѧ́занъ бѧ́ше сою́зъ нерѣши́мь. И҆ є҆́же вои́стиннꙋ чꙋ́дншее: всѧ́кагѡ дерзнове́нїѧ и҆ праздносло́вїѧ свобо́дны сꙋ́щїѧ: ѡ҆бꙋча́хꙋсѧ же пре́жде всѣ̑хъ семꙋ̀, є҆́же не ѹ҆ѧзви́ти бра́тню со́вѣсть въ чесо́мъ. А҆́ще ли же бы нѣ̑когда ꙗ҆ви́лсѧ кто̀ дрꙋгоненави́децъ, то̀ сего̀ па́стырь ѻ҆́нъ во ѿлꙋче́нный монасти́рь ꙗ҆́кѡ ѡ҆сꙋжде́нника и҆згонѧ́ше. Нѣ̑когда же нѣ̑коемꙋ и҆з̾ бра́тїй къ немꙋ̀ бли́жнѧго ѡ҆клевета́вшꙋ, а҆́бїе и҆згна́ти того̀ всепрпⷣбный ѻ҆́нъ повелѣ̀, гл҃ѧ: непопꙋща́ти бы́ти во ѻ҆би́тели ви́димꙋ и҆ неви́димꙋ дїа́волꙋ.
є҃і. Ви́дѣхъ а҆́зъ ѹ҆ прпⷣбныхъ ѻ҆́нѣхъ полє́зна и҆ досточꙋ̑дна вои́стиннꙋ дѣла̀: бра́тство ѡ҆ гдⷭ҇ѣ соше́дшосѧ и҆ свѧ́зано, чꙋ́дно и҆мꙋ́що и҆ дѣ̑ланїе и҆ видѣ̑нїе. Та́кѡ бо са́мѣхъ себѐ бж҃е́ственными нака́зовахꙋ и҆ ѡ҆бꙋча́хꙋ и҆справле́нми, ꙗ҆́кѡ без̾ ма́ла не тре́бовати предстоѧ́телева напомина́нїѧ: но самопроизво́лнѣ дрꙋ́гъ дрꙋ́га на бж҃е́ственнꙋю возбꙋжда́ти бо́дрость. Бѧ́хꙋ бо тѣ́мъ ѹ҆ста́влєна же и҆ поꙋчє́на и҆ ѹ҆тверждє́на прпⷣбна нѣ́каѧ и҆ бж҃є́ственна ѡ҆бꙋчи́тєлства: занѐ а҆́ще бы и҆зво́лилосѧ нѣ̑коемꙋ и҆з̾ ни́хъ когда̀, предстоѧ́телеви не присꙋ́тствꙋющꙋ, ѹ҆кори́знꙋ и҆лѝ ѡ҆сꙋжде́нїе, и҆лѝ ѿню́дъ празносло́вїе нача́-ти, то̀ помава́нїемъ невѣ̑домымъ бра́тъ нѣ̑кїй и҆́нъ того̀ напомина́ѧ ѡ҆́тай, преста́ти сотворѧ́ше. А҆́ще ли же не́гли и҆ не ѡ҆щꙋща́ше, то̀ положи́въ про́чее покло́нъ напомѧнꙋ́вый, ѿхожда́ше. Бѣ̑ же тѣ́мъ всегда́шнее (а҆́ще бы потре́ба была̀ что̀ провѣща́ти) и҆ непреста́нно собесѣ̑дованїе, воспомина́нїе сме́рти, и҆ сꙋда̀ вѣ̑чна помышле́нїе.
Ѡ҆ по́варѣ.
ѕ҃і. Не ѹ҆молчꙋ̀ ва́мъ сказа́ти по́вара и҆з̾ та́мошнихъ пресла́внѣйшее и҆справле́нїе: зрѧ́ бо того̀ непреста́нно въ слꙋ́жбѣ се́й стѧжа́вша сѣ́тованїе и҆ слезꙋ̀, молѧ́хъ возвѣсти́ти мѝ, ѿкꙋ́дꙋ таковы́ѧ бл҃года́ти сподо́бисѧ: ѻ҆́нъ же ѹ҆бѣжде́нъ бы́въ ѿ менѐ, ѿвѣща̀: никогда́же, гл҃етъ, человѣ̑кѡмъ рабо́тати себѐ помы́слихъ, но бг҃ови: и҆ безмо́лвїѧ всѧ́кагѡ недосто́йна себѐ бы́ти ѡ҆сꙋди́въ, са́мое то̀ ѻ҆гнѧ̀ сегѡ̀ видѣ̑нїе, воспомина́нїе бꙋ́дꙋщагѡ пла́мене вы́нꙋ и҆́мамъ.
з҃і. И҆́но пресла́вна тѣ̑хъ ѹ҆слы́шимъ и҆справле́нїе: и҆́бо ни на са́мой трапе́зѣ, ѿ ѹ҆́мнагѡ дѣ̑ланїѧ престаѧ́хꙋ: назна́менанымъ же ѡ҆бы́чаемъ нѣ̑кимъ невѣ̑домымъ и҆ помава́нїемъ, ѡ҆ ꙗ҆́же въ дꙋшѝ мл҃и́твѣ себѐ напомина́хꙋ бл҃же́ннїи: не на трапе́зѣ же то́чїю сїѐ творѧ́ще ꙗ҆влѧ́хꙋсѧ: но и҆ на всѧ́комъ свое́мъ срѣ̑тенїи же и҆ собра́нїи.
и҃і. А҆́ще ли же бы согрѣше́нїе (нѣ̑кое) кто̀ и҆з̾ ни́хъ сотвори́лъ, то̀ мнѡ́жайша молє́нїѧ ѿ бра́тїй прїе́млѧше, тѣ́мъ и҆ ѡ҆ се́мъ къ па́стырю ѡ҆ста́вити попече́нїе, и҆ ѿвѣ̑тствованїе, и҆ запреще́нїе: тѣ̑мже (и҆) вели́кїй ѻ҆́нъ дѣ̑ланїе ѹ҆ченикѡ́въ позна́въ, лє́гша про́чее и҆ запрещє́нїѧ подаѧ́ше, ꙗ҆́кѡ вѣ̑дый непови́нна бы́ти запреща́емаго: сегѡ̀ ра́ди и҆ не взы́сковаше, вои́стиннꙋ впа́дшаго въ согрѣше́нїе ѻ҆́но.
ѳ҃і. Гдѣ̀ когда̀ ѹ҆ ѻ҆́нѣхъ прижи́телствоваше праздносло́вїѧ и҆лѝ кощꙋ́нства воспомина́нїе; занѐ а҆́ще бы кто̀ и҆з̾ сꙋ́щихъ междꙋ̀ ни́ми ра́спрю къ бли́жнемꙋ нача́лъ, то̀ мимоше́дъ дрꙋгі́й, и҆ покло́нъ сотвори́въ, гнѣ̑въ ѻ҆́нъ расточа́ше. А҆́ще ли же бы памѧтоѕло́бствꙋюща ѡ҆щꙋти́лъ, то̀ втѡра́ѧ ѿ предстоѧ́телѧ ѹ҆правлѧ́вшемꙋ стремле́нїе ѻ҆́но возвѣща́ше, и҆ пре́жде за́пада со́лнца примирѧ́тисѧ тѣ́мъ съ собо́ю сотворѧ́ше. А҆́ще ли же ѡ҆жесточа́ющесѧ ѡ҆жесточа́хꙋсѧ, то̀ и҆лѝ не вкꙋша́ти пи́щи да́же до примире́нїѧ запреща́хꙋсѧ: и҆лѝ ѿ ѻ҆би́тели и҆згонѧ́еми быва́хꙋ.
к҃. Бѣ̑ же достохва́лное сїѐ ѻ҆па́сство ѹ҆ ни́хъ не всꙋ́е сотворѧ́емо: но пло́дъ мно́гъ творѧ́що и҆ ꙗ҆влѧ́ющо. Мно́зи бо въ тѣ̑хъ прпⷣбныхъ ꙗ҆ви́шасѧ дѣ̑ѧтелни же и҆ разсмотри́телни, разсꙋди́телни же и҆ смиренномꙋ́дри. И҆ мо́щно бѣ̀ ѹ҆ви́дѣти стра́шно ѹ҆ ѻ҆́нѣхъ и҆ а҆гг҃лолѣ̑пно видѣ̑нїе: сѣди́нами честны́хъ и҆ сщ҃еннолѣ̑пныхъ а҆́ки младе́нцєвъ къ послꙋша́нїю притека́ющихъ, и҆ похвалꙋ̀ велича́йшꙋ и҆мꙋ́щихъ смире́нїе своѐ. Ви́дѣхъ та́мѡ мꙋ́жы ꙗ҆́кѡ пѧтьдесѧ́тъ лѣ̑тъ въ послꙋша́нїи бы́вшихъ, и҆́хже молѧ́хъ ѹ҆разꙋмѣ̑ти, ко́е ѿ толи́кагѡ трꙋда̀ ѹ҆тѣше́нїе прїѧ́ша; и҆з̾ ни́хже, ѻ҆́ви ѹ҆́бѡ въ бе́зднꙋ смиренномꙋ́дрїѧ дости́гнꙋти про́чее себѐ гл҃ахꙋ, и҆́мже всѧ́кꙋ бра́нь во (ве́сь) вѣ̑къ ѿража́ютъ. и҆ні́и же соверше́нно неѡщꙋще́нїе и҆ безболѣ̑знїе во ѹ҆кори́знахъ и҆ доса́дахъ про́чее и҆мѣ̑ти гл҃ахꙋ.
к҃а. Ви́дѣхъ и҆нѣ̑хъ ѿ приснопомина́емыхъ ѻ҆́нѣхъ съ сѣди́ною а҆гг҃лови́дною въ глꙋбоча́йшее неѕло́бїе и҆ простотꙋ̀ ѹ҆премꙋдре́ннꙋ и҆ вольнопроизво́льнꙋ и҆ бг҃оиспра́внꙋ прише́дшихъ (ꙗ҆́коже бо лꙋка́вый два̀ є҆́сть, и҆́но ꙗ҆влѧ́емое, а҆ и҆́но кры́емое: та́кѡ (и҆) про́стый, нѣ́сть сꙋгꙋ́бъ, но є҆ди́но нѣ́что є҆́сть): не въ безслове́снꙋ нѣ̑кꙋю и҆ немꙋ́дрꙋ по сꙋ́щымъ въ мі́рѣ ста̑рымъ, и҆́хже и҆ блѧдосло́вными лю́бѧтъ нарица́ти: но внѣꙋ́дꙋ ѹ҆́бѡ, крѡ́тки всѧ̑, кро́тѡстны, свѣ́тлы, непритво́рно и҆мꙋ́щѧ и҆ неꙋхищре́нно и҆ чи́сто, и҆ сло́во и҆ нра́въ, ве́щь, не во мно́зѣхъ ѡ҆брѣта́емꙋ: внꙋ́трьꙋдꙋ же въ дꙋшѝ бг҃а са́маго и҆ предстоѧ́телѧ ꙗ҆́кѡ неѕло́биви младе́нцы возды́шꙋщѧ: и҆ же́стоко и҆ тве́рдо ѹ҆ма̀ ѻ҆́ко проти́вꙋ бѣсовѡ́мъ и҆ страстє́мъ и҆мꙋ́щѧ.
к҃в. Не доста́нетъ мѝ, ѽ сщ҃е́нный ве́рше и҆ бг҃олюбе́зное собра́нїе, жи́зни моеѧ̀ вре́мене, ѻ҆́нѣхъ бл҃же́нныхъ повѣ̑дающꙋ добродѣ̑тель, и҆ нб҃оподража́телно житїѐ: но ѻ҆ба́че лꙋ́чше є҆́сть ѿ ѻ҆́нѣми содѣ̑ѧнныхъ по́тѡвъ на́ше сїѐ ѹ҆краси́ти къ ва́мъ сло́во, и҆ къ ре́вности бг҃олюбе́знѣй воздви́гнꙋти, не́жели ѿ свои́хъ совѣ̑тованїй: без̾ всѧ́кагѡ бо прекосло́вїѧ ме́ншее ѿ бо́лшагѡ ѹ҆краша́етсѧ. ѡ҆ ѻ҆́номъ же молю̀, ничто́же на́съ притво́рено писа́ти вознепщева́ти: ѻ҆бы́чай бо є҆́сть невѣ̑рїю по́льзꙋ погꙋблѧ́ти. Па́ки же предрече́нныхъ и҆ми́мсѧ.
Ѡ҆ і҆сі́дѡрѣ.
к҃г. Мꙋ́жъ нѣ̑кїй і҆сі́дѡръ и҆́менемъ ѿ кнѧ́жеска са́на а҆лежⷭ҇а́ндрова гра́да, въ рече́ннѣмъ ѻ҆бщежи́тїи пре́жде си́хъ лѣ̑тъ ѿрече́сѧ, є҆го́же и҆ а҆́зъ та́мѡ є҆щѐ сꙋ́ща заста́хъ. Сего̀ прїе́мъ всепрпⷣбный ѻ҆́нъ па́стырь, ѕлокова́рна ѕѣлѡ̀ и҆ сꙋ́рова, лю́та же и҆ го́рда бы́ти ѹ҆смотрѣ̑въ, прехищрѧ́етъ всепремꙋ́дрый се́й бѣсѡ́въ кова́рство человѣ̑ческимъ примышле́нїемъ, и҆ гл҃етъ ко і҆сі́дѡрꙋ, а҆́ще ѹ҆́бѡ и҆́го хрⷭ҇то́во взѧ́ти произво́лилъ є҆сѝ, то̀ послꙋша́нїю тебѣ̀ ѡ҆бꙋча́тисѧ пре́жде всѣ̑хъ хощꙋ̀. ѻ҆́нъ же гл҃етъ: ꙗ҆́коже желѣ̑зо ковачꙋ̀ та́кѡ ст҃ѣ̑йшїй повинова́тисѧ себѐ преда́хъ. Вели́кїй же ѻ҆́нъ и҆ ѡ҆ са́момъ се́мъ примѣ́рѣ возвесели́всѧ, дае́тъ а҆́бїе ѡ҆бꙋчи́телство желѣ̑зномꙋ семꙋ̀ і҆сі́дѡрꙋ, и҆ гл҃етъ: хощꙋ́ ти, ѽ бра́те є҆стество́мъ, ѹ҆ вра́тъ ѻ҆би́тел̾ныхъ предстоѧ́ти: и҆ всѧ́кой дꙋшѝ входѧ́щей же и҆ и҆сходѧ́щей твори́ти колѣнопреклоне́нїе гл҃ющꙋ: помоли́сѧ ѡ҆ мнѣ̀ ѻ҆́тче, занѐ бѣснова́теленъ є҆́смь. Послꙋ́ша же та́кѡ, ꙗ҆́кѡ а҆́гг҃лъ гдⷭ҇а. Седмолѣ̑тїе же є҆мꙋ̀ та́мѡ сотво́ршꙋ, и҆ въ глꙋбоча́йше смире́нїе и҆ ѹ҆миле́нїе прише́дшꙋ, восхо-тѣ̀ приснопомина́емый ѻ҆́нъ по зако́ннѣмъ седмолѣ̑тїи, и҆ неприꙋподоблѧ́емѣмъ мꙋ́жа сегѡ̀ терпѣ̑нїи, сего̀, ꙗ҆́кѡ предосто́йна, съ бра́тїею сочи́слити, и҆ рꙋкоположе́нїѧ сподо́бити. Ѻ҆́нъ же мнѡ́жайша и҆ чрез̾ и҆нѣ̑хъ и҆ мно́ю немощны́мъ молє́нїѧ сотворѝ къ па́стырю, та́мѡ є҆мꙋ̀ та́кожде пребыва́ющꙋ сконча́ти тече́нїе ѻ҆́но, и҆з̾ѧви́въ и҆ неѧ́снѣ нѣ̑какѡ сло́вомъ си́мъ кончи́нꙋ, и҆ зва́нїе своѐ приближа́ющосѧ, є҆́же и҆ сбы́стсѧ: ѡ҆ста́вльшꙋ бо є҆го̀ въ то́мжде чи́нѣ ѹ҆чи́телю ѻ҆́номꙋ, по десѧ́тѣмъ днѝ ко гдⷭ҇ꙋ безсла́вїемъ сла́внѡ и҆зы́де, въ седмы́й де́нь своегѡ̀ ѹ҆спе́нїѧ, и҆ вратарѧ̀ ѻ҆би́тели тоѧ̀ ко гдⷭ҇ꙋ прїе́мъ. Бѣ̑ бо къ немꙋ̀ ре́клъ бл҃же́нный се́й, ꙗ҆́кѡ а҆́ще полꙋчꙋ̀ дерзнове́нїе ко гдⷭ҇ꙋ, то̀ неразлꙋ́ченъ ѿ менѐ бꙋ́деши и҆ та́мѡ вско́рѣ: є҆́же и҆ сбы́стсѧ, на велича́йше и҆звѣще́нїе непосты́днагѡ послꙋша́нїѧ є҆гѡ̀, и҆ смире́нїѧ бг҃оподража́телна.
к҃д. Вопроси́хъ є҆щѐ въ живы́хъ бы́вша вели́каго сего̀ і҆сі́дѡра, ко́е дѣ̑ланїе ѹ҆́мъ є҆гѡ̀ ѹ҆ вра́тъ пребыва́вша и҆мѣ̑ѧше; и҆ не ѹ҆таѝ спо́льзовати мѧ̀ хотѧ̀ приснопомина́емый. Въ нача́лѣхъ ѹ҆́бѡ сїѐ, гл҃етъ, помышлѧ́хъ, ꙗ҆́кѡ за грѣхѝ моѧ̑ прода́хсѧ: тѣ̑мже и҆ со всѧ́кою го́рестїю и҆ нꙋ́ждею и҆ кро́вїю покло́нъ полага́хъ. Лѣ̑тꙋ же и҆спо́лншꙋсѧ без̾ печа́ли про́чее бѣ̑хъ се́рдцемъ, мзды̀ терпѣ̑нїѧ ѿ са́магѡ бг҃а ѡ҆жида́ѧ. Минꙋ́вшꙋ же и҆но́мꙋ є҆ди́номꙋ лѣ̑тꙋ, недосто́йна себѐ про́чее непщева́хъ въ чꙋ́вствѣ се́рдца, и҆ є҆́же во ѻ҆би́тели пребыва́нїѧ, и҆ зрѣ̑нїѧ ѻ҆тє́цъ и҆ собесѣ̑дованїѧ, и҆ та̑инъ причаще́нїѧ, и҆ на лицѐ чїѐ зрѣ̑нїе: до́лꙋ же пони́ча ѻ҆́комъ, и҆ до́лѣе мꙋдрова́нїемъ, входѧ́щихъ и҆ и҆сходѧ́щихъ чи́стѣ про́чее ѡ҆ мл҃и́твѣ молѧ́хъ.
Ѡ҆ лаѵре́нтїи.
к҃є. На трапе́зѣ нѣ̑когда сѣдѧ́щꙋ мнѣ̀ съ вели́кимъ ѻ҆́нѣмъ настоѧ́телемъ, ко ѹ҆́хꙋ моемꙋ̀ приклони́въ ст҃а̑ѧ своѧ̑ ѹ҆ста̀, гл҃етъ: хо́щеши ли да тѝ покажꙋ̀ въ сѣди́нѣ глꙋбоча́йшей бжⷭ҇твенно мꙋдрова́нїе; мнѣ̑ же моли́вшꙋ, приглаша́етъ првⷣный се́й ѿ вторы́ѧ трапе́зы лаѵре́нтїа и҆́менемъ ꙗ҆́кѡ четы́редесѧть ѻ҆́смь лѣ̑тъ во ѻ҆би́тели тѣ̑й и҆мꙋ́ща, и҆ втора́го ст҃и́лищꙋ пресвѵ́тера сꙋ́ща. прише́дшꙋ ѹ҆̀бо и҆ положи́вшꙋ ко и҆гꙋ́менꙋ семꙋ̀ колѣнопреклоне́нїе, бл҃гословлѧ́етсѧ ѹ҆́бѡ ѿ негѡ̀: воста́вшꙋ же, ничто́же ѿню́дъ речѐ: но ѡ҆ста́ви того̀ пред̾ трапе́зою стоѧ́ща и҆ не ꙗ҆дꙋ́ща: бѣ̑ же ѻ҆бѣ̑да вхо́дъ: ꙗ҆́коже сотвори́ти ꙗ҆́кѡ ча́съ вели́къ, и҆лѝ и҆ два̀ стоѧ́щꙋ: ꙗ҆́кѡ мнѣ̀ про́чее стыдѣ̑тисѧ понѐ на лицѐ дѣ̑лателѧ ѻ҆́нагѡ воззрѣ̑ти: бѣ̑ бо всесѣ̑дъ, ѻ҆смьдесѧ́тое и҆мѣ̑ѧ лѣ̑то. Без̾ѿвѣ̑тнꙋ же до сконча́нїѧ ѻ҆бѣ̑дованїѧ пребы́вшꙋ: воста́вшымъ на́мъ посыла́етсѧ ѿ прпⷣбнагѡ рещѝ предвоспомѧнꙋ́томꙋ вели́комꙋ і҆сі́дѡрꙋ три́десѧть девѧ́тагѡ ѱалма̀ нача́ло.
к҃ѕ. Не презрѣ̑хъ же а҆́зъ ꙗ҆́кѡ лꙋка́внѣйшъ ста́рца сего̀ и҆скꙋси́ти: вопроси́вшꙋ бо мнѣ̀ того̀, что̀ ѹ҆̀бо предстоѧ̀ пред̾ трапе́зою ѻ҆́ною помышлѧ́ше; őрⷭ҇то́въ, гл҃а, ѻ҆́бразъ на па́стырѧ ѡ҆бложи́въ, ника́коже когда̀ ѿ негѡ̀ повелѣва́емь бы́ти помы́слихъ, но ѿ бг҃а. Тѣ̑мже, ѻ҆́ч҃е і҆ѡа́нне, не ꙗ҆́кѡ пред̾ трапе́зою человѣ̑ческою, но ꙗ҆́кѡ пред̾ же́ртвенникомъ бж҃їимъ и҆ бг҃ꙋ стоѧ́хъ молѧ́сѧ: ника́коже помышле́нїе нѣ̑кое на па́стырѧ лꙋка́во помы́сливъ, ѿ ꙗ҆́же къ немꙋ̀ вѣ̑ры моеѧ̀ и҆ любвѐ: рече́ бо нѣ̑кто, любы̀ не мы́слитъ ѕла̀ (а҃ кор. г҃і, є҃). Ѻ҆ба́че и҆ ѻ҆́но вѣ̑ждь ѻ҆́ч҃е: ꙗ҆́кѡ повнегда̀ кто̀ въ простотꙋ̀ и҆ во́льно неѕло́бїе себѐ преда́стъ, то̀ не ктомꙋ̀ та́мѡ лꙋка́вый вмѣще́нїе, ни во мгнове́нїи воспрїе́млетъ.
Ѡ҆ і҆коно́мѣ.
к҃з. Гдⷭ҇ь првⷣный, ꙗ҆ко́въ бѣ̀ и҆ слове́сныхъ ѻ҆вє́цъ спаси́тель со бг҃омъ ѻ҆́нъ, такова̀ є҆мꙋ̀ и҆ стро́ѧща є҆́же во ѻ҆би́тели и҆но́го посла̀. Бѣ̑ бо цѣломꙋ́дръ а҆́ще и҆ кто̀ и҆́нъ, кро́токъ, ꙗ҆́коже ѕѣлѡ̀ ма́ли. На сего̀ къ про́чїихъ по́льзѣ ѹ҆стреми́сѧ ста́рецъ ѻ҆́нъ вели́кїй всꙋ́е въ цр҃кви и҆згна́ти є҆го̀ повелѣ̑въ безвре́меннѣ. А҆́зъ же ѹ҆вѣ̑дѣвъ непоро́чна того̀ бы́ти ѡ҆ ѡ҆бвине́нїи то́мъ ѡ҆ не́мже на́нь гл҃аше па́стырь, ѻ҆со́бнѣ за і҆коно́ма ѻ҆́наго творѧ́хъ словоизвине́нїе къ вели́комꙋ семꙋ̀. Премꙋ́дрый же се́й, гл҃етъ: и҆ а҆́зъ вѣ̑дѣхъ ѻ҆́ч҃е: но ꙗ҆́коже нѣ̑сть пра́ведно, но ми́лостивно є҆́сть гла́дствꙋющꙋ младе́нцꙋ хлѣ̑бъ и҆з̾ ѹ҆́стъ и҆схи́тити: та́кѡ и҆ себѐ и҆ дѣ̑лателѧ предстоѧ́тель дꙋ́шъ ѿтщетѣва́етъ, не быва́ѧ вино́венъ томꙋ̀ вѣнцѡ́въ, є҆ли̑ки вѣ̑сть того̀ и҆ терпѣ̑ти, на всѧ́къ ча́съ: и҆лѝ доса́дами, и҆лѝ безчє́стїи, ѹ҆ничиже́нїемъ, порꙋга̑нїи. Треми́ бо велича́йшими ѡ҆би́димь быва́етъ: пе́рвое ѹ҆́бѡ, лиша́ѧсѧ са́мъ ꙗ҆́же ѿ запреще́нїѧ сегѡ̀ мзды̀: второ́е же, ꙗ҆́кѡ и҆ и҆нѣ̑хъ по́льзовати добродѣ̑телїю и҆но́гѡ могі́й, не сотворѝ (сегѡ̀). Тре́тїе, є҆́же и҆ тѧжча́йше є҆́сть: ꙗ҆́кѡ мно́жицею и҆ са́ми ті́и мнѧ́щїисѧ трꙋдосноси́телни и҆ терпѣли́ви бы́ти, на вре́мѧ вознерадѣ̑ни бы́вше, и҆ ꙗ҆́кѡ си́рѣчь добродѣ̑телни, про́чее ѿ предстоѧ́телѧ не ѡ҆блича́еми ни поноша́еми, сꙋ́щїѧ въ ни́хъ кро́тости и҆ терпѣ̑нїѧ лиши́шасѧ. А҆́ще бо и҆ добра̀ и҆ плодоно́сна и҆ тꙋ́чна є҆́сть землѧ̀ сїѧ̀: но вѣ̑сть ѡ҆скꙋдѣ̑нїе воды̀ безче́стїѧ, хврастонеи́стовꙋ тꙋ̀ твори́ти: и҆ те́рнїе киче́нїѧ и҆ блꙋда̀ на не́й прозѧ́бнꙋти. Сїѐ вѣ̑дый вели́кїй ѻ҆́нъ а҆пⷭ҇лъ къ тїмоѳе́ю послыла́ше: насто́й, ѡ҆бличѝ, запретѝ тѣ́мъ, бл҃говре́меннѣ и҆ безвре́меннѣ (в҃ тїм. д҃, в҃).
к҃и. Мнѣ̑ же къ наста́вникꙋ вои́стиннꙋ ѻ҆́номꙋ противолюбопрѧ́щꙋсѧ, и҆ не́мощь ро́да на́шегѡ предлага́ющꙋ: и҆ ꙗ҆́кѡ мно́зи не́гли чрез̾ всꙋ́е, не́гли же и҆ не всꙋ́е быва́ющее запреще́нїе ѿ па́ствы ѿтерзава́ютсѧ: па́ки ѻ҆́нъ премꙋ́дрости до́мъ гл҃а: дꙋша̀ привѧза́вшисѧ хрⷭ҇та̀ ра́ди любо́вїю къ па́стырю и҆ вѣ̑рою да́же до кро́ве не ѿстꙋпа́етъ: па́че же а҆́ще и҆ ѡ҆бл҃годѣ̑телствована ѡ҆ стрꙋ́пѣхъ нѣ̑когда є҆́сть ѿ негѡ̀, помина́ющи гл҃ющаго: ни а҆́гг҃ли, ни нача̑ла нижѐ си̑лы, ни и҆́на тва́рь ка́ѧ разлꙋчи́ти на́съ ѿ любвѐ хрⷭ҇то́вы возмо́же (ри́м. и҃, л҃и. л҃ѳ). Не та́кѡ же привѧза́вшаѧсѧ и҆ водрꙋзи́вшаѧсѧ и҆ прилѣпи́вшаѧсѧ, ѹ҆дивлѧ́юсѧ, а҆́ще не всꙋ́е на мѣ̑стѣ ѻ҆́нѣмъ пребыва́нїе ѡ҆кончава́етъ, притво́рнымъ и҆ прелще́ннымъ повинове́нїемъ соедине́на. Не прелсти́лъ же є҆́сть себѐ вои́стиннꙋ вели́кїй се́й: но и҆ ѹ҆держа̀, и҆ наста́ви, и҆ совершѝ, и҆ принесѐ хрⷭ҇тꙋ̀ непорѡ́чны жє́ртвы.
Ѡ҆ а҆ввакѵ́рѣ.
к҃ѳ. Ѹ҆слы́шимъ премꙋ́дрость бж҃їю и҆ ѹ҆диви́мсѧ, въ скꙋде́лныхъ сосꙋ́дѣхъ ѡ҆брѣ̑тенꙋ. Ѹ҆дивлѧ́ѧсѧ а҆́зъ та́мѡ сы́й нѣ̑кихъ новодрꙋже́нныхъ вѣ̑рѣ и҆ терпѣ̑нїю, и҆ неꙋтомлѧ́емомꙋ претерпѣва́нїю въ предстоѧ́телѧ ѻ҆́нагѡ запреще́нїихъ, и҆ доса́дахъ, ѻ҆вогда̀ и҆ ѿгна́нїихъ: не то́чїю же въ предстоѧ́телевыхъ, но и҆ ѕѣлѡ̀ ме́ншихъ. Вопроша́хъ созида́нїѧ ра́ди нѣ̑коего и҆з̾ бра́тїй пѧтьна́десѧть лѣ̑тъ во ѻ҆би́тели ѻ҆́нѣй живꙋ́ща, и҆́менемъ а҆ввакѵ́ра, є҆го́же и҆ наипа́че ма́лѡ не ѿ всѣ̑хъ ѡ҆би́дима, ѻ҆вогда̀ (же) на всѧ́къ де́нь (и҆) ѿ трапе́зы ѿ слꙋжи́телей и҆згонѧ́ема зрѧ́хъ: бѣ̑ бо ѿ є҆стества̀ ма́лѡ ѕѣлѡ̀ ѧ҆зы́комъ неꙋдержи́мъ бра́тъ се́й. И҆ гл҃ахъ къ немꙋ̀: бра́те а҆ввакѵ́ре, почто̀ ѿ трапе́зы на всѧ́къ де́нь и҆згонѧ́ема тѧ̀ ви́ждꙋ, и҆ без̾ ве́чери мно́жицею ѹ҆сыпа́юща; и҆ гл҃етъ, вѣ̑рꙋ мѝ и҆мѝ ѻ҆́ч҃е, ꙗ҆́кѡ и҆скꙋша́ютъ мѧ̀ ѻ҆ц҃ы̀ моѝ сі́и, творю́ ли мона́ха, поне́же не вои́стиннꙋ сїѐ творѧ́тъ: то̀ и҆ а҆́зъ про́чее вѣ̑дый ра́зꙋмъ вели́кагѡ и҆ тѣ̑хъ, терплю̀ всѧ̑ без̾ стꙋже́нїѧ: и҆ сїѐ пѧтьна́десѧть лѣ̑тъ и҆́мамъ сїѐ помышлѧ́ѧ, ꙗ҆́коже и҆ ті́и во вхо́дѣ мое́мъ рѣ̑ша, ꙗ҆́кѡ до три-десѧтолѣ̑тїѧ и҆скꙋша́ютъ ѿрица́ющихсѧ: и҆ пра́веднѣ ѻ҆́ч҃е і҆ѡа́нне: без̾ и҆скꙋ́са бо зла́то не соверша́етсѧ.
л҃. Пребы́въ ѹ҆̀бо до́блественный се́й а҆ввакѵ́ръ по мое́мъ прише́ствїи въ монастирѝ ѻ҆́номъ дволѣ̑тно вре́мѧ, ко гдⷭ҇ꙋ ѿи́де, сїѐ ре́къ ко ѻ҆ц҃є́мъ, внегда̀ и҆мѣ̑ѧше ѹ҆мре́ти: бл҃годарю̀ бл҃годарю̀ гдⷭ҇ви, и҆ ва́мъ, ꙗ҆́кѡ за є҆́же и҆скꙋша́емꙋ бы́ти (мнѣ̀) на спасе́нїе моѐ ѿ ва́съ, пребы́хъ ѿ бѣсѡ́въ неискꙋша́емь сѐ седмна́десѧть лѣ̑тъ: є҆го́же и҆ ꙗ҆́кѡ и҆сповѣ̑дника съ та́мѡ лежа́щими ст҃ы́ми досто́йнѣ праведносꙋди́телный па́стырь положи́ти повелѣ̀.
Ѡ҆ македо́нїи а҆рхїдїа́конѣ.
л҃а. Ѡ҆бижда́ю всѣ̑хъ ревни́тлей дѡ́брымъ, а҆́ще въ молча́нїѧ гро́бѣ погребꙋ̀ ѻ҆́но македо́нїа пе́рвагѡ та́мошнихъ дїа́конѡвъ и҆справле́нїе и҆ по́двигъ: се́й прилѣ̑жный гдⷭ҇ви нѣ̑когда пра́здникꙋ ст҃ы́хъ бг҃оѧвле́нїй пости́гшꙋ, мо́литъ па́стырѧ пре́жде двою̀ дню̀ во гра́дъ а҆лежⷭ҇андрі́ю вни́ти своеѧ̀ ра́ди потре́бы нѣ̑кїѧ, ѻ҆ба́че ѡ҆бѣщава́ѧсѧ скорѣ̑е и҆сходи́ти и҆з̾ гра́да ѻ҆́нагѡ, послѣ̑дованїѧ ра́ди пра́здника тогѡ̀ и҆ ѹ҆готовле́нїѧ. Добраненави́стникъ ѹ҆̀бо дїа́волъ, спо́нꙋ сотвори́въ а҆рхїдїа́конꙋ семꙋ̀, сотворѝ є҆мꙋ̀ ѿпꙋще́нꙋ бы́вшꙋ ѿ и҆гꙋ́мена, не пости́гнꙋти на ст҃ы́й се́й пра́здникъ во ѻ҆би́тель по ѡ҆предѣле́нїю, є҆́же бѣ̀ ѿ предстоѧ́телѧ прїе́мь. По днѝ ѹ҆̀бо пости́гша, ѿлꙋча́етъ па́стырь се́й ѿ слꙋ́жбы тоѧ̀, и҆ на послѣ̑днихъ новонача́лныхъ ѹ҆строѧ́етъ мѣ̑стѣ. Прїе́млетъ до́брый се́й терпѣ̑нїѧ слꙋжи́тель и҆ претерпѣва́нїѧ а҆рхїдїа́конъ сїѐ ѻ҆ц҃а̀ сегѡ̀ ѡ҆предѣле́нїе, и҆ безпеча́лнѣ та́кѡ, ꙗ҆́кѡ и҆но́мꙋ запреще́нꙋ бы́вшꙋ, а҆ не томꙋ̀. Сотво́ршꙋ ѹ҆̀бо є҆мꙋ̀ въ таково́мъ чи́нѣ четы́редесѧть дні́й, па́ки на сво́й степе́нь возведѐ (и҆́) премꙋ́дрый ѻ҆́нъ. И҆ по є҆ди́номъ ѹ҆́бѡ днѝ ѹ҆молѧ́емь быва́етъ ѿ а҆рхїдїа́кона па́ки во ѻ҆́но запреще́нїе и҆ пре́жнее безче́стїе ѹ҆стро́ити (є҆го̀), ре́къ къ не-мꙋ̀, ꙗ҆́кѡ непроще́нно нѣ̑что во гра́дѣ то́мъ согрѣши́хъ. Позна́въ же прпⷣбный ѻ҆́нъ и҆́стинна не глаго́лати є҆мꙋ̀, но смире́нїѧ ра́ди сїѐ взы́сковати, повинꙋ́сѧ до́бромꙋ семꙋ̀ жела́нїю дѣ̑лателѧ сегѡ̀: и҆ бѣ̀ ви́дѣти сѣди́нꙋ че́стнꙋ въ новонача́лныхъ пребыва́ющꙋ чи́нѣ, и҆ всѣ̑хъ молѧ́щꙋ чи́стѣ ѡ҆ не́мъ моли́тисѧ, поне́же, гл҃етъ, въ блꙋ́дъ преслꙋша́нїѧ падо́хъ. Мене́ же смире́ннаго ѹ҆вѣ̑ри вели́кїй се́й македо́нїй, чесогѡ̀ ра́ди къ таково́мꙋ смире́нномꙋ пребыва́нїю во́лею притечѐ: никогда́же бо (гл҃етъ) ѡ҆блегче́нїе та́кѡ бра́ни всѧ́кїѧ, и҆ свѣ̑та бжⷭ҇твенна сла́дость въ себѣ̀ ꙗ҆́коже ны́нѣ ѹ҆зрѣ̑хъ. А҆́гг҃єлъ є҆́сть, гл҃етъ, є҆́же не па́дати, не́гли и҆ не могꙋ́щихъ, ꙗ҆́коже гл҃ютъ нѣ̑цыи. Человѣ́къ же, є҆́же па́дати, и҆ скорѣ̑е востава́ти: є҆ли́жды сїѐ и҆ слꙋчи́лосѧ бы. бѣсѡ́въ же и҆ то́чїю, є҆́же па́дшымъ не востава́ти.
л҃в. То́й є҆мꙋ́же строе́нїе ѻ҆би́тели тоѧ̀ ввѣ̑рено бы́сть, ѡ҆ се́мъ менѐ ѹ҆вѣ̑рилъ є҆́сть: ю҆́нꙋ мѝ сꙋ́щꙋ, гл҃етъ, и҆ въ попече́нїи ѡ҆ безслове́сныхъ пребыва́ющꙋ, слꙋчи́сѧ въ паде́нїе па́сти тѧжча́йше дꙋше́вно: мнѣ̑ же ѡ҆бы́кшꙋ никогда́же таи́ти ѕмі́ѧ въ ꙗ҆́звинѣ се́рдца, вра́чеви ѻ҆́номꙋ сего̀ за хво́стъ є҆́мъ ѡ҆б̾ѧви́хъ: хво́стъ же гл҃ю коне́цъ дѣѧ́нїѧ ѻ҆́нагѡ: ѻ҆́нъ же ѡ҆скла́бивсѧ лице́мъ гл҃етъ ко мнѣ̀, ѹ҆да́ривъ по лани́тѣ мое́й ма́лѡ: пойдѝ ча́до, держи́сѧ слꙋ́жбы твоеѧ̀, ꙗ҆́коже пре́жде, ничесогѡ́же ѿню́дъ боѧ́сѧ. А҆́зъ же вѣ̑рою горѧ́щею ѹ҆вѣ̑ривсѧ, въ ма́лѣхъ дне́хъ и҆сцѣле́нїѧ и҆звѣще́нїе прїе́мъ, теча́хъ пꙋте́мъ мои́мъ ра́дꙋѧсѧ кꙋ́пнѡ и҆ трепе́ща.
л҃г. И҆́мать всѧ́къ чи́нъ созда́нныхъ, ꙗ҆́коже глаго́лютъ нѣ̑цыи, разли̑чїѧ ра́знствꙋющихъ. (А҆) поне́же ѹ҆̀бо бѣ̑ша и҆ въ собо́рѣ бра́тїй ѻ҆́нѣхъ, пред̾ꙋспѣѧ́нїй и҆ произволе́нїй разли̑чїѧ: то̀ повнегда̀ нѣ́кїѧ и҆з̾ си́хъ вра́чь ѻ҆́нъ любопоказа́тєлны въ прише́ствїихъ сꙋ́щихъ въ мі́рѣ во ѻ҆би́тель назна́меноваше, то̀ си́хъ и҆ пред̾ ѻ҆́нѣми послѣ̑д-ними доса́дами, и҆ слꙋ́жбами безче́стншими ѡ҆блага́ше: ꙗ҆́кѡ про́чее съ тече́нїемъ ѿходи́ти внегда́ бы нѣ̑кихъ и҆з̾ сꙋ́щихъ въ мі́рѣ прише́ствїе ви́дѣли: и҆ мо́щно бѣ̀ ѹ҆ви́дѣти пречꙋ́дно быва́емо, са́мо то̀ тщесла́вїе себѐ ѿгонѧ́ющо, и҆ ѿ человѣ́къ сокрыва́ющосѧ.
Ѡ҆ прпⷣбнѣмъ ми́нѣ.
л҃д. Не хотѧ̀ лиши́ти менѐ гдⷭ҇ь прпⷣбна нѣ̑коегѡ ѻ҆ц҃а̀ мл҃и́твы, пре́жде є҆ди́ныѧ седми́цы моегѡ̀ ѿ прпⷣбнагѡ ѻ҆́нагѡ мѣ̑ста и҆схожде́нїѧ, поѧ́тъ къ себѣ̀ втѡра́ѧ па́стырѧ ѻ҆́нагѡ ѹ҆правлѧ́вшаго, мꙋ́жа чꙋ́дна, ми́нꙋ и҆́менемъ, пѧтьдесѧ́тъ де́вѧть лѣ̑тъ бы́вша во ѻ҆́нѣмъ ѻ҆бщежи́тїи про́чее, послꙋжи́вша всѧ́кꙋ слꙋ́жбꙋ. Въ де́нь ѹ҆̀бо тре́тїй, на́мъ ѻ҆бы́чное пра́вило ѹ҆спе́нїѧ прпⷣбнагѡ сегѡ̀ соверша́ющымъ, внеза́пꙋ бл҃гоꙋха́етъ всѐ мѣ̑сто ѻ҆́но, въ не́мже прпⷣбный се́й лежа́ше: повелѣ̀ ѹ҆̀бо вели́кїй ѻ҆́нъ ра́кꙋ ѻ҆́нꙋ въ не́йже положе́нъ бы́сть прпⷣбный се́й, ѿкры́ти на́мъ: и҆ семꙋ̀ бы́вшꙋ, ви́димъ всѝ ѿ чⷭ҇тнѡ́ю є҆гѡ̀ подплє́снїю ꙗ҆́кѡ два̀ и҆стѡ́чника бл҃гоꙋха́нїе мѵ́ра и҆сходѧ́що. Тогда̀ гл҃а ѹ҆чи́тель ѻ҆́нъ ко всѣ́мъ: ви́дите ли; сѐ ногꙋ̀ є҆гѡ̀ и҆ трꙋдѡ́въ по́тове мѵ́ро бг҃ꙋ принесо́шасѧ. и҆ вои́стиннꙋ. И҆ и҆́на же мнѡ́жайша на́мъ ѡ҆ се́мъ всепрпⷣбнѣмъ ми́нѣ, мѣ̑ста ѻ҆́нагѡ ѻ҆ц҃ы̀ и҆справле́нїѧ и҆сповѣ̑даша, междꙋ̀ ко́ими и҆ сїѐ гл҃ахꙋ: ꙗ҆́кѡ, гл҃етъ, нѣ̑когда предстоѧ́тель ѻ҆́нъ бг҃ода́рное є҆гѡ̀ терпѣ̑нїе и҆скꙋси́ти хотѧ̀: возше́дшꙋ є҆мꙋ̀ ко и҆гꙋ́менской ке́ллїи, и҆ поло́жшꙋ покло́нъ ве́черъ ко и҆гꙋ́менꙋ и҆ преда́нїе (коли́чества ѱалмо́въ и҆лѝ про́чїѧгѡ моле́нїѧ пре́жде ѹ҆снꙋ́тїѧ) прїѧ́ти по ѻ҆бы́чаю молѧ́щꙋсѧ, ѡ҆ста́ви того̀ та́кѡ на землѝ лежа́ща да́же до вре́мене пра́вила: тогда̀ про́чее того̀ бл҃гослови́въ, и҆ ѹ҆кори́въ ꙗ҆́кѡ любоѧви́тельна и҆ нетерпѣли́ва, возста́ви. Вѣ̑дѧше бо прпⷣбный ѻ҆́нъ, ꙗ҆́кѡ терпи́тъ до́б-лественнѣ: тѣ̑мже и҆ дѣ̑ло сїѐ на созида́нїе всѣ́мъ сотвори́лъ є҆́сть. Ѹ҆чени́къ же сегѡ̀ прпⷣбнагѡ ми́ны и҆звѣствова́ше ны̀ ѡ҆ тѣ̑хъ ꙗ҆̀же ѡ҆ настоѧ́тели. тѣ̑мже, и҆ гл҃етъ, мнѣ̀ прилѣ̑жнѡ и҆спыта́вшꙋ є҆го̀, ѹ҆̀бо ли въ таково́мъ ко и҆гꙋ́менꙋ колѣнопреклоне́нїи сно́мъ низведе́нъ бы́сть: и҆звѣствова́ше, гл҃етъ, ꙗ҆́кѡ ве́сь ѱалти́ръ на землѝ лежа́щꙋ и҆з̾ ѹ҆́стъ и҆зглаго́лати.
л҃є. Да не пре́зрю а҆́зъ ѹ҆краси́ти сло́ва сегѡ̀ коне́цъ и҆ настоѧ́щимъ смара́гдомъ: подвиго́хъ нѣ̑когда ѡ҆ безмо́лвїи къ нѣ́кимъ и҆з̾ мꙋ́жественнѣйшихъ ста́рєцъ ѻ҆́нѣхъ, ѻ҆ни́ же, ѡ҆склаблѧ́ющимсѧ лице́мъ, и҆ доброхо́тнымъ нра́вомъ ра́достнѣ гл҃ютъ ко мнѣ̀: мы̀, ѽ ѻ҆́ч҃е і҆ѡа́нне, веще́ственни сꙋ́ще, веще́ственше и҆ житїѐ прохо́димъ: ѻ҆́но пред̾изво́ливше, по мѣ̑рѣ не́мощи своеѧ̀ и҆ под̾ бра́нь сїю̀ подойтѝ: лꙋ́чше вознепщева́вше съ человѣ̑ки бра́тисѧ, ѻ҆вогда̀ ѹ҆́бѡ свирѣпѣ̑ющими, ѻ҆вогда́ же ка́ющимисѧ: а҆ не съ бѣ̑сы вы́нꙋ на ны̀ неи́стовѧщимисѧ, и҆ воѻрꙋжа́ющимисѧ.
л҃ѕ. Нѣ̑кто же и҆з̾ приснопомина́емыхъ ѻ҆́нѣхъ, мно́гꙋ ко мнѣ̀ ꙗ҆́же по бг҃ꙋ любо́вь и҆ дерзнове́нїе и҆мѣ̑ѧ, гл҃етъ мнѣ̀ съ прїѧ́знїю: а҆́ще ѹ҆́бѡ въ тебѣ̀ є҆́сть всепремꙋ́дре, ѻ҆́но ре́кшагѡ, въ чꙋ́вствѣ дꙋшѝ дѣ̑йство, ꙗ҆́кѡ всѧ̑ могꙋ̀ ѡ҆ ѹ҆крѣплѧ́ющемъ мѧ̀ хрⷭ҇тѣ̀ (фїлїп. д҃, г҃і): а҆́ще дх҃ъ ст҃ъ росы̀ чистоты̀ ꙗ҆́кѡ на дв҃ꙋ ѻ҆́нꙋ на́йде на тѧ̀: а҆́ще си́ла вы́шнѧгѡ терпѣ̑нїѧ ѡ҆сѣни́ тѧ: то̀ препоѧ́ши ꙗ҆́кѡ мꙋ́жъ (хрⷭ҇то́съ бг҃ъ) чресло̀ твоѐ ле́нтїемъ послꙋша́нїѧ. И҆ воста́въ ѿ ве́чери безмо́лвїѧ, ѹ҆мы́й но́ги бра́тїй въ сокрꙋше́ннѣ дꙋ́сѣ: па́че же валѧ́йсѧ под̾ нога́ма дрꙋжи́ны низпове́рженнымъ мꙋдрова́нїемъ. Поста́ви вра̑тари жестѡ́ки и҆ безсѡ́нны во вратѣ̑хъ се́рдца твоегѡ̀: держѝ ѹ҆́мъ неꙋдержи́мь въ мо́лвѧщемъ тѣ̑лѣ: ѡ҆бꙋча́йсѧ ѹ҆́мнꙋ безмо́лвїю въ дви́жꙋщихсѧ и҆ коле́блющихсѧ ѹ҆́дѣхъ, є҆́же є҆́сть всѣ̑хъ пресла́внѣйшее. Бꙋ́ди нестрашли́въ дꙋше́ю посредѣ̀ мо́лвъ: придавлѧ́й ѧ҆зы́къ предскака́ти въ прекослѡ́вїѧ неи́стовѧщїйсѧ: бори́сѧ съ влады́чицею се́ю се́дмьдесѧтъ кра́тъ седмери́цею на́день: водрꙋзѝ на дре́вѣ дꙋшѝ крⷭ҇тѣ̀ на́ковалню ѹ҆́мъ ча́стыми мла́ты и҆ ѹ҆да́ры бїе́мь, порꙋга́емь, ѹ҆корѧ́емь, насмѣва́емь, ѡ҆би́димь, и҆ ника́коже разслаблѧ́емь, нижѐ сокрꙋше́нїе терпѧ́щъ: но ве́сь гла́докъ и҆ недви́жимь сꙋ́щь. Совлецы́сѧ во́ли ꙗ҆́кѡ смра́дна ѻ҆дѣѧ́нїѧ и҆ на́гъ тоѧ̀ на по́прище сїѐ вни́ди, є҆́же рѣ̑дко є҆́сть и҆ неꙋдобоѡбрѣта́емо. Ѡ҆блецы́сѧ во броню̀ вѣ̑ры ѿ невѣ̑рїѧ къ подвигополо́жникꙋ не разорѧ́емꙋ нижѐ пробода́емꙋ. Держѝ ѹ҆здо́ю цѣломꙋ́дрїѧ ѡ҆сѧза́нїе безстꙋ́днѣ предска́чꙋщее: придавлѧ́й ѻ҆́ко размышле́нїемъ сме́рти, вели́чєства и҆ красотꙋ̀ тѣле́съ любопы́тствовати на всѧ́къ ча́съ хотѧ́щее: ѡ҆бꙋздова́й ѹ҆ма̀ любопы́тна свои́мъ є҆гѡ̀ попече́нїемъ, бра́та ѡ҆сꙋжда́ти ѡ҆ нерадѣ̑нїи хотѧ́ща возбранѧ́ѧ: и҆ всѧ́кꙋ любо́вь и҆ милосе́рдїе къ бли́жнемꙋ не погрѣ̑шнѣ ꙗ҆влѧ́ѧ. Ѡ҆ се́мъ ѹ҆разꙋмѣ̑ютъ всѝ, ѽ любе́знѣйшїй ѻ҆́ч҃е, ꙗ҆́кѡ хрⷭ҇то́въ ѹ҆чени́къ є҆сѝ тогда̀, є҆гда̀ во дрꙋжи́нѣ любо́вь и҆́мамы междꙋ̀ собо́ю. Грѧдѝ грѧдѝ, па́ки гл҃аше до́брый ѻ҆́нъ дрꙋ́гъ: грѧдѝ, соводвори́сѧ: пі́й порꙋга́нїе на всѧ́къ ча́съ, ꙗ҆́кѡ во́дꙋ жи́вꙋ. Поне́же всѧ̑ сла̑дѡстнаѧ под̾ нб҃се́мъ дв҃дъ и҆спыта́въ, по́слѣжде всѣ̑хъ недоꙋмѣва́ѧ гл҃а: сѐ что̀ добро̀, и҆лѝ что̀ красно̀: ничто́же и҆́но, но є҆́же жи́ти бра́тїи вкꙋ́пѣ (ѱал. рл҃в, а҃).
А҆́ще ли же не ѹ҆̀ бл҃га сегѡ̀, такова́гѡ терпѣ̑нїѧ и҆ послꙋша́нїѧ сподо́бихомсѧ, то̀ добро̀ є҆́сть про́чее понѐ не́мощь свою̀ позна́вшымъ, наеди́нѣ дале́че ѿ подви́жническагѡ по́прища стоѧ́щымъ, подвиза́ющихсѧ бл҃жи́ти, и҆ ѡ҆ терпѣ̑нїи тѣ̑хъ моли́тисѧ. Побѣжде́нъ бы́хъ а҆́зъ до́брымъ ѻ҆ц҃е́мъ и҆ ѹ҆чи́телемъ и҆зрѧ́днѣйшимъ, є҆ѵⷢ҇лски съ на́ми и҆ прⷪ҇ро́чески прѣ̑вшимсѧ, па́че же любо́внѣ, и҆ ста-рѣ́йшинства бл҃же́нномꙋ послꙋша́нїю да́ти без̾ сꙋмнѣ̑нїѧ восхотѣ̑хомъ.
л҃з. Є҆ди́нꙋ же є҆щѐ пользоно́снꙋ бл҃же́нныхъ тѣ̑хъ добродѣ̑тель воспомѧнꙋ́въ, ꙗ҆́коже и҆з̾ раѧ̀ и҆зше́дъ, па́ки некра̑снаѧ и҆ неполє́знаѧ ва́мъ терноѡбира̑нїѧ предложꙋ̀. На мл҃и́твѣ мно́жицею предстоѧ́щымъ на́мъ, собесѣ̑дѡванїѧ нѣ̑кихъ сотво́ршихъ назна́мена бл҃же́нный ѻ҆́нъ па́стырь: и҆́хже на седми́чное вре́мѧ пред̾ цр҃ковїю поста́вивъ, всѣ́мъ покло́нъ твори́ти повелѣ̀: входѧ́щымъ же и҆ и҆сходѧ́щымъ: а҆́ще и҆ приче́тникѡмъ сꙋ́щымъ то́есть пресвѵ́терѡмъ.
л҃и. Нѣ̑коего и҆з̾ бра́тїй зрѧ̀ съ чꙋ́вствомъ се́рдца мно́жае и҆нѣ̑хъ на ѱалмопѣ̑нїи предстоѧ́ща: и҆ па́че же въ началосло́вїи пѣ̑сней къ нѣ́кимъ ѻ҆бы́чаи свои́ми и҆ лице́мъ бесѣ̑дꙋюща, вопроша́хъ ѻ҆бы́чаѧ ѻ҆́нагѡ бл҃же́ннагѡ сегѡ̀ ра́зꙋмъ ѹ҆разꙋмѣ̑ти. Ѻ҆́нъ же позна́въ и҆дѣ̑же ѡ҆бы́къ не таи́ти спо́льзовати, гл҃етъ: по́мыслы моѧ̑, ѻ҆́ч҃е і҆ѡа́нне, и҆ ѹ҆́мъ съ дꙋше́ю, ѡ҆быко́хъ ѿ нача́лъ собира́ти: и҆ созыва́ѧ зва́ти съ ни́мъ: прїиди́те поклони́мсѧ, и҆ припаде́мъ къ самомꙋ̀ хрⷭ҇тꙋ̀ цр҃е́ви и҆ бг҃ꙋ на́шемꙋ.
л҃ѳ. Гости́телѧ же сїѐ творѧ́ща ѹ҆разꙋмѣ̑хъ, прилѣ̑жнѡ и҆спыта́въ: ма́лꙋ бо кни́жицꙋ ѹ҆ по́ѧса ви́сѧщꙋ и҆мꙋ́ща ви́дѧ, ѹ҆разꙋмѣ̑хъ ꙗ҆́кѡ по́мыслы своѧ̑ на всѧ́къ де́нь назна́менꙋѧ, сїѧ̑ всѧ̑ па́стыреви возвѣща́етъ. Не точїю же (сего̀), но и҆ и҆нѣ̑хъ мно́жайшихъ и҆з̾ та́мошнихъ сїѐ творѧ́щихъ ви́дѣхъ: бѣ̑ же и҆ сїѧ̀ за́повѣдь вели́кагѡ ѻ҆́нагѡ, ꙗ҆́коже слы́шахъ.
м҃. Ѿгна́нъ бы́сть нѣ̑кто ѿ негѡ̀ нѣ̑когда и҆з̾ бра́тїй бли́жнѧго къ немꙋ̀ ѡ҆болга́въ, ꙗ҆́кѡ блѧдосло́вна и҆ глаго́лива. ѻ҆́нъ же стерпѣ̀ ѹ҆ вра́тъ ѻ҆би́тели тоѧ̀ седми́чное вре́мѧ, молѧ́сѧ, вхо́дъ и҆ проще́нїе полꙋчи́ти. И҆ ꙗ҆́коже сїѐ ѹ҆разꙋмѣ̀ дꙋшелюби́вый ѻ҆́нъ, прилѣ̑жнѡ и҆спыта́въ, ни-что́же ѿню́дъ є҆мꙋ̀ снѣ̑сти въ шести́хъ ѻ҆́нѣхъ дне́хъ, ꙗ҆влѧ́етъ є҆мꙋ̀, а҆́ще ѿню́дъ во ѻ҆би́тели се́й ѻ҆бита́нїе сотвори́ти хо́щеши, то̀ въ ка́ющихсѧ чи́нъ тѧ̀ ѹ҆стро́ю. И҆ ꙗ҆́коже съ ра́достїю сїѐ прїѧ́тъ ка́ющїйсѧ, повелѣ̀ томꙋ̀ па́стырь ѻ҆́нъ во ѻ҆би́тель ѻ҆́нꙋ ѻ҆со́бнꙋю пла́чꙋщихсѧ ѡ҆ паде́нїихъ ѿведе́нꙋ бы́ти, є҆́же и҆ бы́сть. Є҆лма́ же ѡ҆ рече́ннѣй помѧнꙋ́хомъ ѻ҆би́тели, то̀ вкра́тцѣ ѡ҆ не́й рце́мъ.
м҃а. Мѣ̑сто ѹ҆́бѡ бѣ̀ дале́че зна́менїѧ є҆ди́нагѡ ѿ вели́кїѧ ѻ҆би́тели, темни́ца глаго́лема, неꙋтѣ̑шна: не бѣ̀ мо́щно ѻ҆на́мѡ когда̀ ды́мꙋ ѹ҆ви́дѣти бы́ти, ни вїнꙋ̀, ни є҆ле́ю въ снѣ̑дь: ни дрꙋго́мꙋ чесомꙋ̀ и҆но́мꙋ, ра́звѣ то́чїю хлѣ̑бꙋ, и҆ ма́лꙋ ѕе́лїю. Въ се́мъ по зва́нїи ѻ҆́нѣмъ согрѣша́ющыѧ, неисхѡ́дны затворѧ́ше: не вкꙋ́пѣ, но ѻ҆со́бнѡ и҆ ра́знѡ, и҆лѝ и҆ по два̀ наимно́жае, до́ндеже гдⷭ҇ь ѡ҆ ко́емждо и҆звѣствова́ше и҆́. Поста́ви же тѣ́мъ и҆ намѣ̑стника вели́ка і҆саа́ка и҆́менемъ, и҆́же и҆зтѧ́зоваше мл҃и́твы без̾ ма́ла непреста́нны ѿ предава́емыхъ є҆мꙋ̀: и҆мѣ̑ѧхꙋ же и҆ вѣ́твїѧ мнѡ́жайша на возбране́нїе ѹ҆ны́нїѧ. Сїѐ є҆́сть житїѐ ѻ҆́но: сїѐ ѹ҆строе́нїе: сїѐ пребыва́нїе ѻ҆́но и҆́щꙋщихъ вои́стиннꙋ лица̀ бг҃а і҆а́кѡвлѧ.
м҃в. Є҆́же ѹ҆́бѡ ѹ҆дивлѧ́тисѧ ст҃ы́хъ си́хъ трꙋдѡ́мъ, добро̀ є҆́сть: а҆ є҆́же ревнова́ти спасе́нїѧ вино́вно: а҆ є҆́же є҆ди́ною жи́телство ѻ҆́нѣхъ подражава́ти хотѣ̑ти, безслове́сно є҆́сть и҆ невозмо́жно.
м҃г. Ѹ҆грыза́еми ѹ҆́бѡ ѡ҆ ѡ҆бличе́нїихъ, грѣхѝ на́шѧ воспомѧни́мъ, до́ндеже гдⷭ҇ь нꙋ́ждꙋ на́шꙋ нꙋ́ждникѡвъ свои́хъ зрѧ̀, сїѧ̑ и҆згла́дитъ, и҆ ѹ҆грыза́ющꙋю на́съ въ се́рдцѣ болѣ̑знь, на ра́дость претвори́тъ: по мно́жествꙋ бо болѣ̑зней мои́хъ въ се́рдцѣ мое́мъ, гл҃етъ, по толи́кꙋ ѹ҆тѣшє́нїѧ твоѧ̑ возвесели́ша дꙋ́шꙋ мою̀ во своѐ вре́мѧ (ѱал. ч҃г, ѳ҃і). Не забꙋ́димъ гл҃ющаго ко гдⷭ҇ꙋ: є҆ли̑ки ꙗ҆ви́лъ мѝ є҆сѝ скѡ́рби мнѡ́ги и҆ ѕлы̑, и҆ ѡ҆бра́щсѧ ѡ҆животвори́лъ мѧ̀ є҆сѝ, и҆ ѿ бе́зднъ землѝ по є҆́же па́сти па́ки возве́лъ мѧ̀ є҆си (ѱал. ѻ҃, к҃)̀.
м҃д. Бл҃же́нъ є҆́сть, и҆́же бг҃а ра́ди на всѧ́къ де́нь ѹ҆корѧ́емь и҆ ѹ҆ничижа́емь, са́мъ себѐ понꙋ́дилъ є҆́сть: съ мчн҃ки ликовствова́ти и҆́мать се́й, и҆ со а҆́гг҃лы дерзнове́ннѡ гл҃ати бꙋ́детъ. Бл҃же́нъ мона́хъ, и҆́же всѧ́кагѡ безче́стїѧ и҆ ѹ҆ничиже́нїѧ са́мъ себѐ досто́йна бы́ти непщꙋ́етъ. Бл҃же́нъ є҆́сть, и҆́же во́лю свою̀ до конца̀ ѹ҆мертви́лъ є҆́сть, и҆ и҆́же ѡ҆ гдⷭ҇ѣ ѹ҆чи́телю своѐ предадѐ попече́нїе: ѡ҆деснꙋ́ю бо распѧ́тагѡ стоѧ́ти бꙋ́детъ. А҆́ще кто̀ ѡ҆бличе́нїе пра́ведно и҆лѝ непра́ведно ѿ себѐ ѿве́рже, то́й спасе́нїѧ своегѡ̀ ѿве́ржесѧ: а҆́ще ли же кто̀ сїѐ съ болѣ̑знїю и҆лѝ и҆ безболѣ̑зненнѣ прїѧ́тъ, ско́рѡ согрѣше́нїй свои́хъ ѡ҆ставле́нїе полꙋчи́тъ.
м҃є. Бг҃ꙋ ѹ҆́мнѣ вѣ̑рꙋ ко ѻ҆ц҃ꙋ̀ твоемꙋ̀ и҆ любо́вь чи́стѣ сказꙋ́й, и҆ ѻ҆́нъ невѣ̑домѣ того̀ про́чее и҆звѣ̑стна сотвори́тъ, по твое́й къ немꙋ̀ любвѝ приложи́тисѧ и҆ присво́итисѧ къ тебѣ̀.
м҃ѕ. И҆́же всѧ́каго ѕмі́ѧ ѡ҆блича́ѧй, вѣ̑рꙋ ꙗ҆́вственнꙋ показа̀: ѹ҆таѧва́ѧй же, въ безпꙋ́тїихъ є҆щѐ заблꙋжда́етъ.
м҃з. Тогда̀ братолю́бїе своѐ позна́етъ кто̀, є҆гда̀ себѐ пла́чꙋща ѡ҆ бра́та (своегѡ̀) согрѣше́нїихъ ѹ҆́зритъ: и҆ є҆гда̀ ра́дꙋющасѧ ѡ҆ предспѣ̑ѧнїихъ ѻ҆́нагѡ и҆ дарова́нїихъ.
м҃и. И҆́же въ собесѣ̑дованїи сло́во своѐ, а҆́ще и҆ и҆́стинно гл҃етъ, соста́вити и҆зволѧ́ѧй и҆ хотѧ́й, да вѣ̑сть ꙗ҆́кѡ дїа́волимъ недꙋ́гомъ недꙋ́гꙋетъ. И҆ а҆́ще ѹ҆́бѡ по є҆́же къ ра̑внымъ собесѣ̑дованїи сїѐ дѣ̑лаетъ, то̀ не́гли мо́щно є҆́сть є҆мꙋ̀ и҆сцѣли́тисѧ бо́лшихъ запреще́нїемъ: а҆́ще ли же и҆ къ бо́лшымъ и҆лѝ мꙋ́дршымъ та́кѡ ѡ҆брѣта́етсѧ: то̀ ѿ человѣ́къ сїѐ неисцѣ̑лно.
м҃ѳ. И҆́же сло́вомъ не повинꙋ́ѧйсѧ, ꙗ҆́вно є҆́сть ꙗ҆́кѡ ни дѣ̑ломъ. И҆́же бо въ сло́вѣ невѣ̑ренъ є҆́сть, то̀ и҆ въ дѣ̑лѣ непрекло́ненъ є҆́сть, всꙋ́е трꙋжда́ѧсѧ, и҆ ѿ прпⷣбнагѡ повинове́нїѧ ничто́же, ра́звѣ ѡ҆сꙋжде́нїе себѣ̀ прїе́млѧ.
н҃. А҆́ще кто̀ со́вѣсть свою̀ чи́стꙋ до конца̀ во ѹ҆ ѻ҆тца̀ (своегѡ̀) повинове́нїи стѧжа̀: то́й про́чее сме́рти ꙗ҆́коже сна̀, па́че же живота̀ на всѧ́къ де́нь ѡ҆жида́ѧ, не бои́тсѧ: вѣ̑дый и҆звѣ̑стнѡ, ꙗ҆́кѡ не то́й во вре́мѧ разлꙋче́нїѧ, но предстоѧ́тель сло́ва и҆стѧ́занъ бꙋ́детъ.
н҃а. А҆́ще кто̀ ѡ҆ гдⷭ҇ѣ без̾ ѹ҆бѣжде́нїѧ ѿ ѻ҆тца̀ врꙋче́нїе слꙋ́жбы прїе́мъ, неча́емо ко́е пострада̀ въ не́й преткнове́нїе, то̀ не да́вшемꙋ ѻ҆рꙋ́жїе ѻ҆́но, но прїе́мшемꙋ винꙋ̀ тꙋ̀ да написꙋ́етъ: прїѧ́тъ бо ѻ҆рꙋ́жїе на ра́ть проти́вꙋ врага̀, принесе́ же то̀ въ се́рдце своѐ. А҆́ще ли же ѹ҆бѣди́лъ є҆́сть себѐ гдⷭ҇а ра́ди, и҆ не́мощь свою̀ наю́щемꙋ предречѐ, то̀ да дерза́етъ: а҆́ще бо и҆ падѐ не ѹ҆́мре.
н҃в. забы́хъ ва́мъ ѽ дрꙋ́зи, и҆ се́й предложи́ти сла́дкїй добродѣ̑тели хлѣ̑бъ. ꙗ҆́кѡ ви́дѣхъ та́мѡ ѡ҆ гдⷭ҇ѣ по́слꙋшники доса́дами самѣ̑хъ себѐ стира́ющихъ, и҆ по бг҃ꙋ безче́ствꙋющихъ: да ѡ҆ приноси́мыхъ тѣ́мъ ѿвнѣ̑ꙋдꙋ пред̾ꙋгото́влени бꙋ́дꙋтъ ѡ҆ безче́стїихъ не ѹ҆жаса́тисѧ.
н҃г. Дꙋша̀ и҆́сповѣдь помышлѧ́ющи, ꙗ҆́кѡ ѹ҆здо́ю ѿ неѧ̀ держи́ма быва́етъ, не согрѣша́ти: неисповѣ̑даємаѧ бо, ꙗ҆́кѡ во тмѣ̀ без̾ стра́ха про́чее содѣѧва́емъ. Є҆гда̀ предстоѧ́телю ѿсꙋ́тствꙋющꙋ, лицѐ є҆гѡ̀ и҆з̾ѡбразꙋ́юще, того̀ пред̾ на́ми стоѧ́ти непщꙋ́емъ, и҆ всѧ́кїѧ бесѣ̑ды, и҆лѝ сло́ва, и҆лѝ снѣ̑ди, и҆лѝ сна̀, и҆лѝ и҆но́гѡ чесогѡ̀, є҆гѡ́же возмнѣ̑хомъ того̀ гнꙋша́тисѧ въ на́съ, ѿвраща́емсѧ: тогда̀ вои́стиннꙋ позна́хомъ послꙋша́нїе и҆́скреннее. Прелюбодѣ̑йчищнїи ѹ҆́бѡ и҆з̾ дѣте́й ра́дость ѹ҆чи́телево ѿше́ствїе: ро́днїи же, тщетꙋ̀ то̀ бы́ти непщꙋ́ютъ.
н҃д. Вопроси́хъ нѣ̑когда нѣ̑коего и҆з̾ и҆скꙋ́снѣйшихъ молѧ̀, ка́кѡ послꙋша́нїе смире́нїе и҆́мать; ѻ҆́нъ же гл҃етъ: а҆́ще и҆ ме́ртвыхъ бл҃горазꙋ́мный по́слꙋшникъ воскреси́тъ, а҆́ще и҆ слезꙋ̀ стѧ́жетъ, а҆́ще и҆ и҆збавле́нїе ѿ бра́ней, то̀ помышлѧ́етъ вои́стиннꙋ, ꙗ҆́кѡ мл҃и́тва дх҃о́внагѡ ѻ҆тца̀ сїѐ сотвори́ла є҆́сть: и҆ пребыва́етъ то́й ѿ сꙋ́етнагѡ возноше́нїѧ стра́ненъ и҆ чꙋ́ждь: занѐ ка́кѡ ѹ҆̀бо и҆ вознесе́тсѧ ѡ҆ ѻ҆́номъ, є҆́же и҆но́ю по́мощїю гл҃етъ ꙗ҆́кѡ сотвори́лъ є҆́сть, а҆ не тща́нїемъ свои́мъ.
н҃є. Не вѣ̑сть безмо́лвникъ сегѡ̀ предрече́нныхъ дѣ̑ланїѧ: ѡ҆правда̑нїѧ бо къ немꙋ̀ возноше́нїе ѻ҆́но и҆́мать, совѣ̑тꙋющо є҆мꙋ̀ ꙗ҆́кѡ свои́мъ тща́нїемъ и҆справле́нїѧ сїѧ̑ соверша́етъ.
н҃ѕ. Двѣ̀ побѣди́въ сы́й въ повинове́нїи лє́сти, пребыва́етъ про́чее ра́бъ хрⷭ҇то́въ вѣ̑ченъ по́слꙋшникъ.
Ѡ҆ пе́рвѣй ле́сти.
н҃з. Подвиза́етсѧ бѣ̑съ по́слꙋшники ѻ҆вогда̀ ѹ҆́бѡ скве́рнами ѡ҆сквернѧ́ти, и҆ жестосе́рды содѣ̑ловати, ты́ѧ мѧтє́жливы па́че ѻ҆бы́чаѧ быва́ти под̾ꙋща́ѧ: ѻ҆вогда́ же сꙋ̑хи нѣ́кїѧ и҆ безплѡ́дны, и҆ на мл҃и́твꙋ лѣ̑ностншы, сонли̑вы же и҆ ѡ҆мрачє́нны: да ꙗ҆́кѡ ничто́же ѿ повинове́нїѧ сегѡ̀ спо́льзовавшихсѧ, но и҆ въ слѣ̑дъ ли ходи́вшихъ, ѿ по́двига сегѡ̀ ѿто́ргнетъ: не бо попꙋща́етъ тѣ́мъ разꙋмѣва́ти, ꙗ҆́кѡ мно́жицею мнѧ́щихсѧ въ на́съ бл҃ги́хъ смотри́телное ѿѧ́тїе, глꙋбоча́йша (на́мъ) смиренномꙋ́дрїѧ быва́етъ вино́ю.
н҃и. Ѿраже́нъ бы́сть терпѣ̑нїемъ мно́жицею ѿ нѣ̑кихъ предрече́нный преле́стникъ: та́же є҆щѐ семꙋ̀ глаго́лющꙋ, и҆́нъ вѣ̑стникъ предста́въ по ма́лѣ и҆нѣ̑мъ ѻ҆́бразомъ прелща́ти на́съ покꙋша́етсѧ.
Ѡ҆ вторѣ̑й ле́сти.
Ви́дѣхъ по́слꙋшники ѹ҆добоꙋмилє́нны, крѡ́тки, воздє́ржны, тщали̑вы, не ра́тꙋємы, горѧ́чы ѿ покро́ва ѻ҆тца̀ (своегѡ̀) бы́вшѧ: къ ни́мже бѣ̑сове пристꙋ́плше си́лныхъ бы́ти про́чее на безмо́лвїе ѡ҆́тай под̾ꙋсти́ша, ꙗ҆́кѡ къ соверше́ннѣй про́чее по́чести и҆ къ безстра́стїю ѻ҆́нѣмъ дости́гнꙋти могꙋ́щихъ: прелсти́вшесѧ ѹ҆́бѡ, и҆ ѿ приста́нища сегѡ̀ на пꙋчи́нꙋ ѻ҆́нꙋ и҆зше́дше, бꙋ́рѣ тѣ̑хъ пости́гшей, кѡ́рмчїй не и҆мѣ̑вше, ѻ҆каѧ́ннѣ ѿ мо́рѧ сегѡ̀ скве́рнагѡ и҆ сла́нагѡ бѣдꙋ̀ под̾ѧ́ша.
н҃ѳ. Нꙋ́ждно є҆́сть мо́рю семꙋ̀ поколеба́тисѧ и҆ возсвирѣпѣ̑ти, да тогда̀ хвра́стїе, є҆́же рѣ̑ки страсте́й, и҆ сѣ̑но, и҆ всѧ́къ гно́й въ то̀ снесо́ша, тѣ̑ми па́ки на зе́млю и҆зве́ржетъ. Присмотри́мсѧ, и҆ ѡ҆брѧ́щемъ по ѻ҆́нѣй въ мо́ри се́мъ бꙋ́ри глꙋбо́кꙋ быва́ющꙋ тишинꙋ̀.
ѯ҃. И҆́же ѻ҆вогда̀ ѹ҆́бѡ послꙋ́шаѧй, ѻ҆вогда́ же преслꙋ́шаѧй ѻ҆тца̀, подо́бенъ є҆́сть мꙋ́жꙋ, ѻ҆вогда̀ ѹ҆́бѡ коллꙋ́рїй (ма́сть на ѻ҆́чнꙋю болѣ̑знь), ѻ҆вогда́ же мѣ̑лъ на ѻ҆́ко своѐ налага́ющемꙋ: є҆ди́нъ бо, гл҃етъ, созида́ѧ, а҆ дрꙋгі́й разорѧ́ѧ, что̀ ѹ҆спѣ̑ста, ра́звѣ трꙋды̀ (сїра́х. к҃г, к҃д).
ѯ҃а. Не прелща́йсѧ, ѽ сы́не по́слꙋшниче гдⷭ҇нь, и҆ не ꙗ҆́кѡ а҆́кибы ѿ и҆но́гѡ лица̀ согрѣшє́нїѧ твоѧ̑ ѹ҆чи́телю (твоемꙋ̀) возвѣща́й: не бо возмо́жно є҆́сть без̾ сра́ма, сра́ма и҆зба́витисѧ. Ѡ҆бнажа́й стрꙋ́пъ тво́й врачꙋ̀ семꙋ̀, рцы̀, и҆ да не ѹ҆срами́шисѧ, моѧ̀ є҆́сть ꙗ҆́зва сїѧ̀ ѻ҆́тче: моѧ̀ є҆́сть ра́на сїѧ̀: ѿ своеѧ̀ (мѝ) лѣ̑ности, а҆ не ѿ и҆но́гѡ прибы́вши: никто́же сеѧ̀ вино́венъ є҆́сть: ни человѣ̑къ, ни дꙋ́хъ, ни тѣ̑ло, ни и҆́но что̀, но моѐ нерадѣ̑нїе.
ѯ҃в. Быва́й и҆ ви́домъ и҆ по́мысломъ ꙗ҆́кѡ ѡ҆сꙋжде́нникъ во вре́мѧ и҆́сповѣди: на зе́млю пони́къ, и҆ а҆́ще мо́щно є҆́сть сꙋдїѝ сегѡ̀ и҆ врача̀ но́зѣ, ꙗ҆́кѡ хрⷭ҇тѡ́вѣ, слеза́ми моча̀.
ѯ҃г. Ѻ҆бы́чай є҆́сть мно́жицею бѣсовѡ́мъ, и҆лѝ не и҆сповѣ̑доватисѧ под̾ꙋща́ти на́съ: и҆лѝ ꙗ҆́кѡ ѿ лица̀ и҆но́гѡ сїѐ твори́ти: и҆лѝ нѣ̑кихъ ѡ҆ свое́мъ грѣсѣ̀ порица́ти ꙗ҆́кѡ вино́вныхъ.
ѯ҃д. А҆́ще всѧ̑ ѻ҆бы́чаю привѧ̑зана сꙋ́ть и҆ припослѣ̑дствꙋютъ, то̀ мно́гѡ мно́жае ѿню́дъ бл҃га̑ѧ, ꙗ҆́кѡ вели́ка содѣ̑йственника и҆мꙋ̑щаѧ бг҃а.
ѯ҃є. Не и҆́маши трꙋди́тисѧ сы́не мно́зѣми лѣ̑ты ѡ҆брѣстѝ въ тебѣ̀ бл҃же́нный поко́й, а҆́ще въ нача́лѣхъ вседꙋ́шнѣ са́мъ себѣ̀ въ безчє́стїѧ преда́си.
ѯ҃ѕ. Да не вознепщꙋ́еши недосто́йно бы́ти ꙗ҆́кѡ бг҃ꙋ помо́щникꙋ семꙋ̀ долѣпове́рженнымъ ѻ҆́бразомъ и҆́сповѣдь сотвори́ти. Ви́дѣхъ бо ѡ҆сꙋждє́нникъ ѡ҆ми́лованнѣйшимъ ѻ҆́бразомъ, и҆ крѣ̑плшею и҆́сповѣдїю и҆ моле́нїемъ жесто́кость сꙋдїинꙋ̀ ѹ҆мѧгчи́вшихъ, и҆ ꙗ҆́рость є҆гѡ̀ на милосе́рдїе преѡбрази́вшихъ. Сегѡ̀ ра́ди и҆ і҆ѡа́ннъ прⷣ҇те́ча и҆́сповѣди пре́жде креще́нїѧ и҆стѧ́зоваше ѿ приходи́вшихъ, не са́мъ тоѧ̀ тре́боваше, но спасе́нїе приходи́вшихъ содѣ̑ловаѧ.
ѯ҃з. Не ѹ҆жасни́мсѧ и҆ по и҆́сповѣди ра́тꙋеми быва́юще, лꙋ́чше бо є҆́сть со скве́рнами, а҆ не съ возноше́нїемъ бра́тисѧ.
ѯ҃и. Не притека́й, не совозноша́йсѧ ѡ҆ повѣ̑данїихъ безмѡ́лвникъ, и҆ ѿше́лныхъ ѻ҆тє́цъ: первомч҃нка бо ѹ҆воине́нїемъ хо́диши. Нижѐ па́даѧ ѹ҆стꙋпа́й ѿ по́прища сегѡ̀: тогда́ бо наипа́че врача̀ мно́гѡ мно́жае тре́бꙋемъ. И҆́же съ по́мощїю ѡ҆ ка́мень но́гꙋ преткнꙋ́вый, без̾ по́мощи сы́й, ѿню́дъ не то́чїю претыка́тисѧ, но и҆ ѹ҆мира́ти и҆мѣ̑ѧше.
ѯ҃ѳ. Є҆гда̀ низведе́мсѧ, то̀ скорѣ̑е бѣ̑сове пристꙋ́плше, за винꙋ̀ бл҃госло́внꙋ, па́че же безслове́снꙋ є҆́мшесѧ, безмо́лвїе на́мъ совѣ̑тꙋютъ: ра́зꙋмъ же врагѡ́мъ на́шымъ є҆́сть, ꙗ҆́звꙋ къ паде́нїю приложи́ти на ны̀.
ѻ҃. Є҆гда̀ вра́чь се́й не́мощь предлага́етъ, тогда̀ нꙋ́ждно є҆́сть ко и҆но́мꙋ и҆тѝ: без̾ врача́ бо рѣ̑дцы сꙋ́ть и҆сцѣлѧ́емїи. Кто̀ ѹ҆̀бо є҆́сть мнѧ́щїйсѧ противоглаго́лати на́мъ ѹ҆ставлѧ́ющымъ: ꙗ҆́кѡ всѧ́къ кора́бль ко́рмчїѧ и҆скꙋ́сна не и҆мѣ̑ѧ, и҆ во и҆стопле́нїе впа́дъ, без̾ ко́рмчїѧ, ѿню́дъ погиба́ти и҆мѣ̑ѧше.
ѻ҃а. Ѿ послꙋша́нїѧ ражда́етсѧ, смире́нїе: ѿ смире́нїѧ, безстра́стїе: поне́же во смире́нїи на́шемъ помѧнꙋ̀ ны̀ гдⷭ҇ь, и҆ и҆зба́вилъ ны̀ є҆́сть ѿ врагѡ́въ на́шихъ (ѱал. рл҃є, к҃д). Тѣ̑мже ничто́же є҆́сть возбранѧ́ющее рещѝ, ꙗ҆́кѡ ѿ послꙋша́нїѧ безстра́стїе, и҆́мже коне́цъ смире́нїѧ быва́етъ: занѐ нача́ло ѹ҆́бѡ ѻ҆́нагѡ є҆́сть сїѐ, ꙗ҆́коже мѡѷсе́й зако́на: соверша́етъ же дщѝ сїѧ̀ ма́терь ѻ҆́нꙋ, ꙗ҆́коже мр҃і́а со́нмище.
ѻ҃в. Томле́нїѧ всѧ́кагѡ досто́йни сꙋ́ть пред̾ бг҃омъ, недꙋ́гꙋющїи, и҆ по и҆скꙋ́сствѣ врача̀ сегѡ̀ и҆ бы́вшей ѿ негѡ̀ по́льзѣ, сего̀ дрꙋга́гѡ пред̾избра́нїемъ ѡ҆ставлѧ́ющїи пре́жде соверше́нна и҆сцѣле́нїѧ. Не бѣ̑гай рꙋкꙋ̀ къ гдⷭ҇ви тѧ̀ приве́дшагѡ, не ѹ҆стыди́шисѧ бо ꙗ҆́коже тогѡ̀ въ животѣ̀ твое́мъ когѡ̀.
ѻ҃г. Нѣ̑сть безбѣ̑дно неискꙋ́сномꙋ ѿ мно́жества во́инѡвъ, къ є҆динобо́рствꙋ себѐ ѿлꙋчи́ти: и҆ нѣ̑сть безбѣ̑дно мона́хꙋ пре́жде и҆скꙋ́са и҆ ѡ҆бꙋче́нїѧ мно́га дꙋше́вныхъ страсте́й, на безмо́лвїе ѿитѝ: ѻ҆бы́че бо, ѻ҆́нъ ѹ҆́бѡ тѣле́снѣ, се́й же дꙋше́внѣ, бѣдꙋ̀ прїима́ти. Бла́зи, гл҃етъ писа́нїе, два̀ па́че є҆ди́нагѡ (є҆ккл. д҃, ѳ҃): то́есть, бл҃го є҆́сть сы́нꙋ со ѻ҆тце́мъ дѣ̑йствомъ бж҃е́ственна дх҃а проти́вꙋ предпрїѧ́тїємъ подвиза́тисѧ.
Лиша́ѧй слѣпца̀, вожда̀: и҆ па́ствꙋ, па́стырѧ: скита́ющагосѧ, рꙋковожда̀: младе́нца, своегѡ́ си ѻ҆тца̀: недꙋ́гꙋющаго, врача̀: кора́бль, ко́рмчїѧ: ѻ҆бои̑мъ бѣды̀ вино́венъ быва́етъ: без̾ по́мощи же съ дꙋ́хи бра́тисѧ покꙋша́ѧйсѧ, ѹ҆морѧ́емь быва́етъ ѿ ни́хъ.
ѻ҃д. уже ѹ҆́бѡ во враче́бницꙋ въ нача́лѣхъ прише́дшїи, бѡлѣ̑зни своѧ̑ да зна́менꙋютъ: а҆ и҆́же въ повинове́нїе, сꙋ́щее въ тѣ̑хъ смире́нїе. занѐ ѻ҆́нѣмъ ѹ҆́бѡ, болѣ̑зней ѡ҆блегче́нїе: си̑мъ же, прило́гъ самѣ́мъ себѣ̀ зазира́нїѧ, зна́менїе непогрѣ̑шно здра́вїѧ, ꙗ҆́кѡ ничто́же и҆́но ꙗ҆ви́тсѧ.
ѻ҃є. Со́вѣсть тебѣ̀ зерца́ло повинове́нїѧ да бꙋ́детъ, и҆ дово́лно є҆́сть.
ѻ҃ѕ. Въ безмо́лвїи ѹ҆́бѡ ѻ҆тцꙋ̀ повинꙋ́ющїисѧ, бѣ̑сы то́чїю, сопротивлѧ́ющыѧсѧ и҆́мꙋтъ: во дрꙋжи́нѣ же сꙋ́щїи, съ бѣ̑сы и҆ человѣ̑ки вкꙋ́пѣ бо́рютсѧ. И҆ пе́рвшїи ѹ҆́бѡ, всегда́шнимъ ѹ҆чи́телѧ зрѣ̑нїемъ, ѻ҆па́сншѧ ꙗ҆̀же ѿ негѡ̀ сохранѧ́ютъ за́пѡвѣди: вторі́и же, мно́жицею ѿше́ствїѧ ра́ди є҆гѡ̀, ма́лѡ та̑ поврежда́ютъ. Ѻ҆ба́че а҆́ще тщали́ви нѣ̑цыи и҆ трꙋдолюби́ви быва́ютъ, то̀ терпѣ̑нїемъ преткнове́нїй, преисполнѧ́ютъ ѡ҆скꙋдѣ̑нїе, и҆ сꙋгꙋ̑бы вѣнцы̀ прїе́млютъ.
ѻ҃з. Всѧ́цѣмъ хране́нїемъ блюдꙋ́ще себѐ соблюди́мъ: приста́нище бо, корабле́й и҆спо́лнено, ѹ҆до́бнѣ сїѧ̑ сокрꙋша́ти ѡ҆бы́че, и҆ па́че же ѿ ꙗ҆́рости, ꙗ҆́коже ѿ червѧ̀ нѣ̑коегѡ провертѣ́нныѧ ѡ҆́тай.
ѻ҃и. Молча́нїю кра́йню и҆ невѣ̑жествꙋ пред̾ предстоѧ́телемъ ѡ҆бꙋчи́мсѧ: мꙋ́жъ бо молчали́въ, любомꙋ́дрїѧ є҆́сть сы́нъ, ра́зꙋмъ мно́гъ всегда̀ стѧжава́ѧ.
ѻ҃ѳ. Ви́дѣхъ по́слꙋшника повѣ̑данїе ѿ ѹ҆́стъ предстоѧ́телѧ (своегѡ̀) восхи́тивша, и҆ повинове́нїѧ, ѻ҆́нагѡ, ѿча́ѧхсѧ, го́рдость а҆ не смире́нїе ви́дѧ того̀ ѿ сегѡ̀ прїе́млюща.
п҃. Всѧ́цѣмъ трезвѣ̑нїемъ трезви́мсѧ, и҆ блюде́нїемъ наблюди́мъ, и҆ хране́нїемъ сохрани́мъ сїѐ, ка́кѡ и҆ когда̀ слꙋ́жба сїѧ̀ па́че мл҃и́твы до́лжна є҆́сть пред̾избира́ема бы́ти: не бо всегда̀ ѿню́дъ.
п҃а. Внемлѝ себѣ̀ междꙋ̀ бра́тїею твое́ю сы́й, и҆ ѿню́дъ не тщи́сѧ пра́ведншъ ѿ тѣ̑хъ ꙗ҆влѧ́тисѧ въ чесо́мъ: два́ бо содѣ̑лаеши ѕла̑: ѻ҆́нѣхъ ѹ҆́бѡ твои́мъ лжепритво́рнымъ тща́нїемъ ѹ҆ѧзви́въ: себѣ̑ же всѧ́цѣмъ ѻ҆́бразомъ высокомꙋ́дрїѧ вино́венъ бы́въ.
п҃в. Быва́й тщали́въ дꙋше́ю, ника́коже тѣ̑ломъ сїѐ ꙗ҆влѧ́ѧ, ни ѻ҆́бразомъ, ни сло́вомъ, ни гада́нїемъ: и҆ сїѐ, а҆́ще ѿ є҆́же ѹ҆ничижа́ти бли́жнѧго преста́лъ є҆сѝ: а҆́ще ли же невозде́рженъ на сїѐ є҆сѝ, то̀ быва́й бра́тїи твое́й подо́бенъ, а҆ не возноше́нїемъ неподо́бенъ.
п҃г. Ви́дѣхъ неискꙋ́сна ѹ҆ченика̀ и҆́же ѡ҆ и҆справле́нїихъ ѹ҆чи́телѧ (своегѡ̀) пред̾ нѣ̑кими человѣ̑ки хвалѧ́шесѧ: и҆ мнѧ́сѧ ѹ҆́бѡ сла́вꙋ себѣ̀ ѿ чꙋжды́ѧ пшени́цы присво́ити, безче́стїѧ себѣ̀ па́че вино́венъ бы́сть, всѣ́мъ къ немꙋ̀ ре́кшымъ: и҆ ка́кѡ дре́во добро̀, вѣ̑твь безпло́днꙋ произведѐ;
п҃д. Не є҆гда̀ ѻ҆́тчее порꙋга́нїе до́блественнѣ претерпи́мъ, терпѣли́ви бы́ти сꙋди́ми є҆смы̀: но є҆гда̀ ѿ всѧ́кагѡ человѣ̑ка презира́еми и҆ бїе́ми быва́емъ: ѻ҆тца́ бо и҆ стыдѧ́щесѧ, и҆ до́лжни сꙋ́ще, стерпѣва́емъ.
п҃є. Пі́й ѹ҆се́рднѣ порꙋга́нїе ꙗ҆́кѡ во́дꙋ жи́зни ѿ всѧ́кагѡ человѣ̑ка, напоѧва́ти тѧ̀ чисти́телствомъ ѿ блꙋдопохотѣ̑нїѧ и҆́щꙋщагѡ: тогда́ бо возсїѧ́етъ чистота̀ глꙋбока̀ въ дꙋшѝ твое́й, и҆ свѣ̑тъ бж҃їй не ѡ҆скꙋдѣ̑етъ ѿ се́рдца твоегѡ̀.
п҃ѕ. Никто́же собо́ю ѹ҆покоева́емь зрѧ̀ собо́ръ бра́тства, во ѹ҆мѣ̀ (свое́мъ) да хва́литсѧ: та́тїе бо ѻ҆́крестъ. Помина́ѧ помина́й гл҃ющаго: є҆гда̀ всѧ̑ сотворитѐ повелѣ́ннаѧ, гл҃ите, ꙗ҆́кѡ неключи́ми рабѝ є҆смы̀: ꙗ҆́кѡ, є҆́же до́лжни бѣ̑хомъ сотвори́ти, сотвори́хомъ (лꙋкѝ з҃і, і҃). сꙋ́дъ же ѻ҆́нъ трꙋдѡ́въ си́хъ во вре́мѧ и҆схо́да позна́емъ.
п҃з. Ѻ҆бщежи́тїе є҆́сть, назе́мно нб҃о: тѣ̑мже ꙗ҆́кѡ гдⷭ҇ꙋ слꙋжа́ще а҆́гг҃ли, та́кѡ ѹ҆вѣща́имъ зало́гъ и҆мѣ̑ти се́рдце на́ше. Ѻ҆вогда̀ ѹ҆́бѡ на нб҃сѝ се́мъ сꙋ́щїи, се́рдцемъ ꙗ҆́кѡ камени́сти сꙋ́ть: ѻ҆вогда́ же напроти́въ, ѹ҆миле́нїемъ ѹ҆тѣша́еми быва́ютъ: да и҆ возноше́нїѧ и҆збѣжа́тъ, и҆ трꙋды̀ слеза́ми ѹ҆тѣ̑шатъ.
п҃и. Ма́лъ ѻ҆́гнь, мно́гъ во́скъ ѹ҆мѧгчи́лъ є҆́сть, и҆ ма́ло безче́стїе мно́жицею приклю́чшосѧ, всѐ свирѣ̑пство се́рдца, и҆ нечꙋ́вство и҆ ѡ҆жесточе́нїе, внеза́пꙋ ѹ҆мѧгчѝ и҆ ѹ҆сладѝ и҆ и҆стребѝ.
п҃ѳ. Ви́дѣхъ нѣ̑когда два̀ ѡ҆́тай присѣдѧ̑ща, и҆ подвиза́ющихсѧ воздыха̑нїѧ и҆ трꙋды̀ наблюда̑юща и҆ припослꙋ̑шающа: но ѻ҆́въ ѹ҆́бѡ да поревнꙋ́етъ: ѻ҆́въ же, да вре́мени зовꙋ́щꙋ, поноси́телнѣ та̑ и҆з̾ѧви́тъ, и҆ дѣ̑лателѧ бж҃їѧ, ѿ до́брагѡ дѣ̑ланїѧ возбрани́тъ.
ч҃. Не быва́й безслове́сенъ молча́теленъ, и҆нѣ́мъ смꙋще́нїѧ и҆ го́рести вино́венъ быва́ѧ: нижѐ ко́сенъ нра́вомъ и҆ стꙋпа́нїемъ, спѣши́тисѧ повелѣва́емь: а҆́ще ли же нѝ, то̀ неи́стовѧщихсѧ и҆ мѧте́жливыхъ го́ршїй є҆сѝ. Слы́шахъ сицєва́ѧ, ꙗ҆́коже гл҃етъ ƃѡвъ (ѕ҃і, в҃), мно́жицею нра́ва ко́сностїю, ѻ҆вогда́ же и҆ ѹ҆хищре́нїемъ, дꙋ́шы возболѣ̑вшѧ: и҆ ѹ҆диви́хсѧ ка́кѡ разли́чна є҆́сть ѕло́ба сїѧ̀.
ч҃а. И҆́же посредѣ̀, не толи́кѡ ѿ ѱалмопѣ̑нїѧ, є҆ли́кѡ ѿ мл҃и́твы приѡбрѣта́ти мо́жетъ: смꙋще́нїе бо, пѣ̑нїю разоре́нїе.
ч҃в. Бори́сѧ съ мы́слїю непреста́ннѡ, парѧ́щꙋ тꙋ̀ собира́ѧ къ себѣ̀: не бо̀ без̾ паре́нїѧ ѿ по́слꙋшникѡвъ бг҃ъ и҆стѧзꙋ́етъ мл҃и́твы. не скорбѝ крадо́мь, но бл҃годꙋ́шествꙋй, ѹ҆́мъ при́снѡ воззыва́ѧ: а҆́гг҃ла бо є҆ди́нагѡ є҆́сть некрадо́мое.
ч҃г. Ѹ҆вѣща́вый себѐ ѡ҆́тай, ѿ боре́нїѧ сегѡ̀ не ѿходи́ти да́же до послѣ̑днѧгѡ и҆здыха́нїѧ, и҆ до ты́сѧчи сме́ртей и҆ тѣ̑ла и҆ дꙋшѝ не ѹ҆стꙋпа́ти, въ ниеди́но ѹ҆до́бнѣ ѿ таковы́хъ впаде́тъ: сомнѣ̑нїе бо се́рдца, и҆ недовѣ̑рїе мѣ̑стѡмъ, преткновє́нїѧ сїѧ̑ при́снѡ и҆ ѕлоключє́нїѧ твори́ти ѡ҆быко́ша. Ѹ҆до́бни на прехожде́нїе, ѿню́дъ неискꙋ́сни: ничто́же бо та́кѡ безпло́дїе, ꙗ҆́коже нетерпѣ̑нїе дѣ̑лаетъ.
ч҃д. А҆́ще ѹ҆́бѡ къ невѣ̑домꙋ врачꙋ̀ и҆ враче́бницѣ дости́глъ є҆сѝ, быва́й ꙗ҆́кѡ мимоиды́й, и҆ ѡ҆́тай и҆скꙋ́съ всѣ̑хъ сꙋ́щихъ та́мѡ прїе́млѧ: повнегда́ же и҆ ѿ хꙋдо́жникѡвъ ѻ҆́нѣхъ и҆ слꙋжи́тєль по́лзꙋ въ недꙋ́зѣхъ твои́хъ ѡ҆щꙋща́еши, и҆ па́че же въ надме́нїи дꙋшѝ ꙗ҆́же ве́щь и҆ско́ма є҆́сть: тогда̀ и҆ прїидѝ про́чее, и҆ прода́йсѧ на зла́тѣ смире́нїѧ, и҆ хартїѝ послꙋша́нїѧ, и҆ пи́сменехъ слꙋ́жбы, и҆ свидѣ̑телехъ а҆́гг҃лѣхъ: раздира́ѧ пред̾ си́ми раздерѝ своеѧ̀ во́ли хартїю̀: ѡ҆бходѧ́ бо, низвраща́ти и҆скꙋ́пъ ѻ҆́нъ бꙋ́деши, и҆́мже тѧ̀ про́чее хрⷭ҇то́съ и҆скꙋпи́лъ є҆́сть. Гро́бъ тебѣ̀ пре́жде гро́ба, мѣ̑сто ѻ҆́но да бꙋ́детъ: никто́же бо и҆з̾ гро́ба и҆схо́дитъ да́же до ѻ҆́бщагѡ воскресе́нїѧ: а҆́ще ли же нѣ̑цыи и҆ и҆зыдо́ша, то̀ ви́ждь, ꙗ҆́кѡ (и҆) ѹ҆мро́ша: є҆́же не пострада́ти на́мъ, гдⷭ҇а ѹ҆мо́лимъ.
ч҃є. Є҆гда̀ ѹ҆́бѡ ѡ҆щꙋтѧ́тъ тѧ̑жка заповѣ́данїѧ бы́ти лѣ̑ностншїи, тогда̀ мл҃и́твꙋ па́че пред̾избира́ти покꙋша́ютсѧ: є҆гда́ же лє́гша, то̀ ѿ неѧ̀ ꙗ҆́кѡ ѿ ѻ҆гнѧ̀ ѿбѣга́ютъ.
ч҃ѕ. Є҆́сть и҆́же врꙋче́нїе слꙋ́жбы проходѧ́й, и҆ ѹ҆покое́нїѧ ра́ди и҆но́гѡ бра́та проше́нъ бы́въ ѡ҆ се́мъ ѡ҆ставлѧ́ѧй то̀: и҆ є҆́сть и҆́же ѿ лѣ̑ности сїѐ ѡ҆ставлѧ́ѧй. И҆ є҆́сть па́ки ѿ тщесла́вїѧ то̀ не ѡ҆ставлѧ́ѧй: и҆ є҆́сть и҆́же ѿ ѹ҆се́рдїѧ.
ч҃з. А҆́ще совосхити́лсѧ є҆сѝ во ѻ҆бѣ̑тѣхъ, и҆ без̾ пред̾спѣѧ́нїѧ ви́диши ѻ҆́ко дꙋшѝ (твоеѧ̀): то̀ да не ѿрече́шисѧ распрѧже́нїѧ: ѻ҆ба́че и҆скꙋ́сный, вездѣ̀ и҆скꙋ́сенъ є҆́сть: ꙗ҆́коже и҆ сопроти́вное. Ѹ҆кори̑зны въ мі́рѣ, мнѡ́га разлꙋчє́нїѧ сотвори́ша: чревоѡб̾ѧдє́нїѧ же во дрꙋжи́нахъ, всѧ̑ падє́нїѧ и҆ ѿвержє́нїѧ дѣ̑лаютъ. А҆́ще влады́чицꙋ сїю̀ поѡблада́еши, то̀ всѧ́ко тебѣ̀ сѣда́лище вино́вно бꙋ́детъ безстра́стїѧ: ѻ҆́нѣй же ѡ҆блада́ющей, кромѣ̀ гро́ба, вездѣ̀ бѣ̑дствовати и҆́маши.
ч҃и. Гдⷭ҇ь ѹ҆́бѡ ѹ҆мꙋдрѧ́етъ слѣпцы̀, ѻ҆чеса̀ по́слꙋшникѡвъ, во ѹ҆чи́телѧ (своегѡ̀) добродѣ̑телехъ: въ недоста́тцѣхъ же, ѡ҆темнѧ́етъ: ненави́стникъ же добра̀, сопроти́внѣ.
ч҃ѳ. Ѻ҆́бразъ на́мъ, ѽ сі́и, и҆зрѧ́днѣйша повинове́нїѧ глаго́лемое водно́е сребро̀ да бꙋ́детъ: под̾ всѣ̑ми бо валѧ́ющосѧ, всѧ́кїѧ скве́рны пребыва́етъ непримѣ̑сно.
р҃. Спѣ̑шнїи наипа́че себѣ̀ да внима́ютъ, да не за є҆́же ѡ҆сꙋжда́ти лѣни̑выѧ, мно́жае ѻ҆́нѣхъ ѡ҆сꙋжде́ни бꙋ́дꙋтъ. Сегѡ̀ ра́ди, непщꙋ́ю, и҆ лѡ́тъ ѡ҆правда́сѧ, ꙗ҆́кѡ посредѣ̀ таковы́хъ сы́й, ника́коже ꙗ҆ви́сѧ тѣ̑хъ ѡ҆сꙋжда́ѧ когда̀.
р҃а. Всегда̀ ѹ҆́бѡ, наипа́че же въ пѣснопѣ̑нїихъ безмо́лвность и҆ безмѧте́жность соблюди́мъ: намѣ̑ренїе бо є҆́сть бѣсовѡ́мъ мѧте́жми мл҃и́твꙋ потреблѧ́ти.
р҃в. Слꙋжи́тель є҆́сть, тѣ̑ломъ ѹ҆́бѡ, человѣ̑кѡмъ предстоѧ̀, ѹ҆мо́мъ же, въ нб҃са̀ мл҃и́твою ѹ҆дарѧ́ѧ.
р҃г. Доса̑ды ѹ҆́бѡ и ѹ҆ничижє́нїѧ и҆ такѡва́ѧ, въ дꙋшѝ по́слꙋшника пелы́ннѣй го́рести приꙋподоблѧ́ютсѧ: похвалы̑ же и҆ чє́сти и҆ бл҃гохвалє́нїѧ а҆́ки ме́дъ въ сладостра́стныхъ сла́дость всѧ́кꙋ ражда́ютъ. предразсмотри́мъ ѹ҆́бѡ ка́кѡ є҆́сть є҆стество̀ ѻ҆бои́хъ: го́ресть ѹ҆́бѡ ѡ҆чища́ти всѧ̑ ꙗ҆̀же внꙋ́трь нечистѡ́тнаѧ: сла́дость же расти́ти ѡ҆бы́че же́лчь.
р҃д. Вѣ̑ровати подоба́етъ без̾ попече́нїѧ воспрїе́мшымъ ѡ҆ гдⷭ҇ѣ попече́нїе ѡ҆ на́съ, а҆́ще и҆ проти̑вна нѣ́каѧ мнѣ̑нїю и҆ спасе́нїю на́шемꙋ сопротивлѧ̑ющасѧ повелѣва́ютъ: тогда́ бо вѣ̑ра на́ша къ тѣ́мъ, ꙗ҆́кѡ въ горни́лѣ смире́нїѧ и҆скꙋша́етсѧ: сїе́ бо є҆́сть вѣ̑ры и҆́стиннѣйшїѧ позна́нїе, є҆́же и҆ сопроти̑внаѧ ѹ҆пова́ємымъ быва̑юща зрѧ́щымъ, повелѣва́ющымъ покарѧ́тисѧ без̾ сомнѣ̑нїѧ.
р҃є. Ѿ послꙋша́нїѧ, смире́нїе: ꙗ҆́коже ѹ҆жѐ и҆ предвари́вше рѣ̑хомъ: ѿ смире́нїѧ, разсꙋжде́нїе: ꙗ҆́коже и҆ вели́кимъ кассїа́номъ въ сло́вѣ є҆гѡ̀ ѡ҆ разсꙋжде́нїи, любомꙋ́дрствовасѧ добро́тнѣйше же и҆ высоча́йше. Ѿ разсꙋжде́нїѧ, разсмотре́нїе: ѿ сегѡ́ же, прозрѣ̑нїе: и҆ кто̀ ѹ҆̀бо не и҆́мать тещѝ въ до́бромъ се́мъ послꙋша́нїѧ тече́нїи, таковы́хъ бла̑гъ ѹ҆готѡ́ванїѧ зрѧ̀ пред̾ собо́ю; ѡ҆ се́й вели́цѣй добродѣ̑тели гл҃а до́брый ѻ҆́нъ пѣве́цъ: ѹ҆гото́валъ є҆сѝ бл҃гостїю твое́ю ни́щемꙋ по́слꙋшникꙋ бж҃е, прише́ствїе твоѐ въ се́рдцѣ є҆гѡ̀ (ѱал. ѯ҃з, а҃і).
р҃ѕ. Да не забꙋ́деши во все́мъ животѣ̀ твое́мъ подви́жника вели́каго ѻ҆́наго, и҆́же во всѣ̑хъ ѻ҆смьна́десѧтихъ лѣ̑тѣхъ, не слы́ша внѣ̑шнима ѹ҆ши́ма ѿ настоѧ́телѧ (своегѡ̀): да бы̀ спа́слсѧ є҆сѝ: внꙋ́треннима же, на всѧ́къ де́нь слы́шаше ѿ гдⷭ҇а, да не бы̀ спа́слсѧ є҆сѝ: сїе́ бо моли́телно є҆́сть и҆ безвѣ̑стно: но, спа́слсѧ є҆сѝ, є҆́же ѡ҆предѣли́телно и҆ и҆звѣ̑стно є҆́сть.
р҃з. Не ѹ҆вѣ̑дѣша самѣ̑хъ себѐ и҆з̾ по́слꙋшникѡвъ нѣ̑цыи ѹ҆добоꙋвѣ̑тность и҆ снисходи́телность предстоѧ́те-лѧ (своегѡ̀) ѡ҆щꙋти́вше: и҆ по свои̑мъ во́лѧмъ врꙋче́нїй слꙋ́жебъ просѧ́ще: прїе́млюще же да вѣ̑дѧтъ ꙗ҆́кѡ ѿню́дъ ѿпадо́ша вѣнца̀ и҆сповѣ̑дничества: послꙋша́нїе бо є҆́сть лицемѣ̑рїѧ и҆ жела́нїѧ своегѡ̀ ѹ҆стране́нїе.
р҃и. Є҆́сть и҆́же повелѣ̑нїе прїе́мый, и҆ ра́зꙋмъ повелѣ̑вшагѡ ѡ҆щꙋти́въ не ѹ҆гожда́ема сꙋ́ща ѡ҆ соверше́нїи повелѣ̑ннагѡ, то̀ ѡ҆ста́вивый: и҆ є҆́сть ѡ҆щꙋти́вый, и҆ без̾ сомнѣ̑нїѧ послꙋ́шавый: и҆спыта́ти подоба́етъ, кто̀ и҆з̾ ни́хъ бл҃гоче́стнѣе сотворѝ.
р҃ѳ. Нѣ̑сть и҆з̾ могꙋ́щихъ бы́ти є҆́же во́ли свое́й дїа́волꙋ сопроти́витисѧ: и҆ да ѹ҆вѣ̑рѧтъ тѧ̀ въ нерадѣ̑нїи живꙋ́щїи, и҆ во є҆ди́нѣ безмо́лвнѣ мѣ̑стѣ претерпѣ̑вшїи, и҆лѝ во ѻ҆бщежи́тїи. да бꙋ́детъ на́мъ ра́тꙋемое ѻ҆́но ѿ мѣ̑стъ ѿхожде́нїе, на́шегѡ та́мѡ бл҃гоꙋгожде́нїѧ ѹ҆каза́нїе: є҆лма̀ є҆́же ра́тꙋємымъ быва́ти, зна́менїе є҆́сть є҆́же ра́товати.
Ѡ҆ прпⷣбнѣмъ а҆ка́кїи.
рі҃. Не бꙋ́дꙋ таи́тель непра́веденъ, и҆ лихои́мецъ безчеловѣ̑ченъ, ѹ҆молчава́ѧ ѿ ва́съ та̑, и҆́мже ѹ҆молчава́ємымъ бы́ти нѣ̑сть пра́ведно: і҆ѡа́ннъ мѝ ѻ҆́нъ вели́кїй саваі́тинъ достѡ́йны слы́шанїѧ и҆сповѣ̑да вє́щи: а҆ ꙗ҆́кѡ безстра́стенъ є҆́сть мꙋ́жъ ѻ҆́нъ, и҆ всѧ́кїѧ лжѝ, и҆ сло́ва и҆ дѣ̑ла лꙋка́ва чи́стъ, ѿ и҆скꙋ́са є҆гѡ̀ вѣ̑си прпⷣбне. Се́й мѝ повѣ̑да: ꙗ҆́кѡ во ѻ҆би́тели мое́й ꙗ҆́же во а҆сі́и, ѿѻнꙋ́дꙋ бо првⷣный се́й прїи́де, бѣ̀ ста́рецъ нѣ̑кїй ѕѣлѡ̀ неради́въ и҆ невозде́рженъ, гл҃ю же не сꙋдѧ̀, (но) да ꙗ҆влю́сѧ гл҃ѧ и҆́стинꙋ: се́й, не вѣ̑мъ ка́кѡ стѧжа̀ ѹ҆ченика̀ ю҆́на, и҆́менемъ а҆ка́кїа, про́ста нѣ̑коего нра́вомъ, мꙋ́дра же по́мысломъ: и҆́же толи̑ка ѿ такова́гѡ ста́рца пострада̀, є҆ли̑ка мнѡ́зѣмъ не́гли и҆ невѣ́рна бы́ти возмнѧ́тсѧ: не то́чїю бо доса́дами и҆ безчє́стїи того̀, но и҆ ра́нами на всѧ́къ де́нь томлѧ́ше: бѣ̑ же сїѐ терпѣ̑нїе є҆гѡ̀ не безслове́сно. зрѧ̀ ѹ҆̀бо є҆го̀ а҆́зъ на всѧ́къ де́нь ꙗ҆́кѡ кꙋ́плена раба̀ кра́йнѣ ѕлостра́ждꙋща, въ срѣ̑тенїи мно́жицею гл҃ахъ къ немꙋ̀: что̀ є҆́сть, бра́те а҆ка́кїе; ка́кѡ дне́шнїй де́нь; И҆ а҆́бїе ѻ҆́нъ, ѻ҆вогда̀ ѹ҆́бѡ ѻ҆́ко посинѣ̑вшо: ѻ҆вогда́ же вы́ю: и҆ногда́ же главꙋ̀ ѹ҆ѧ́звленнꙋ мнѣ̀ пока́зоваше. Вѣ̑дый ѹ҆̀бо а҆́зъ ꙗ҆́кѡ дѣ̑латель є҆́сть, гл҃ахъ къ немꙋ̀: до́брѣ, до́брѣ, претерпѝ, и҆ бꙋ́деши и҆мѣ̑ти по́льзꙋ. Сотвори́въ ѹ҆̀бо ѹ҆ ста́рца неми́лостивагѡ ѻ҆́нагѡ де́вѧть лѣ̑тъ, ѿи́де ко гдⷭ҇ꙋ. Погребе́нꙋ ѹ҆̀бо бы́вшꙋ є҆мꙋ̀ во гробни́цѣ ѻ҆ц҃є́въ, по пѧтѝ дне́хъ по́йде къ нѣ̑коемꙋ ста́рцꙋ вели́кꙋ ѿ сꙋ́щихъ та́мѡ а҆ка́кїа сегѡ̀ настоѧ́тель, и҆ гл҃а є҆мꙋ̀: ѻ҆́ч҃е, бра́тъ а҆ка́кїй ѹ҆́мре. И҆ ꙗ҆́коже ѹ҆слы́ша ста́рецъ то́й, гл҃етъ къ ре́кшемꙋ: вѣ̑рꙋ и҆мѝ ста́рче, не вѣ̑рꙋю. ѻ҆́нъ же гл҃етъ: грѧдѝ и҆ ви́ждь. Воста̀ ста́рецъ ѻ҆́нъ скорѣ̑йше, и҆ постиза́етъ гробни́цꙋ ѻ҆́нꙋ съ настоѧ́телемъ бл҃же́ннагѡ сегѡ̀ подви́жника: и҆ вопїе́тъ ꙗ҆́кѡ къ жи́вꙋ къ вои́стиннꙋ (и҆) по ѹ҆спе́нїи живо́мꙋ, и҆ гл҃етъ: бра́те а҆ка́кїе, ѹ҆́мерлъ ли є҆сѝ; бл҃горазꙋ́мный же се́й по́слꙋшникъ, и҆ по сме́рти послꙋша́нїе показꙋ́ѧ, ѿвѣща̀ къ вели́комꙋ ѻ҆́номꙋ: ка́кѡ, ѻ҆́ч҃е, ѹ҆мре́ти мо́щно є҆́сть человѣ̑кꙋ послꙋша́нїѧ дѣ̑лателю. Тогда̀ ста́рецъ ѻ҆́нъ и҆́же бѣ̀ пре́жде настоѧ́тель є҆гѡ̀, пристра́шенъ бы́въ, на лицѣ̀ со слеза́ми падѐ, и҆ и҆спроси́въ ѹ҆ и҆гꙋ́мена ла́ѵры тоѧ̀ бли́зъ гро́ба ѻ҆́нагѡ ке́ллїю, та́мѡ цѣломꙋ́дреннѣ про́чее поживѐ, гл҃ѧ при́снѡ ко ѻ҆ц҃є́мъ, ꙗ҆́кѡ ѹ҆бі́йство сотвори́хъ.
Мнѣ̀ мни́тсѧ, ѻ҆́ч҃е і҆ѡа́нне, вели́комꙋ ѻ҆́номꙋ семꙋ̀ і҆ѡа́ннꙋ бы́ти къ ме́ртвомꙋ семꙋ̀ гл҃авшемꙋ. И҆ и҆́но бо мѝ ꙗ҆́кѡ ѡ҆ и҆но́мъ нѣ̑коемъ повѣ̑да бл҃же́ннаѧ є҆гѡ̀ дꙋша̀: бѣ̑ же са́мъ, ꙗ҆́коже по́слѣжде ѻ҆па́снѡ ѹ҆вѣ̑дѣти возмого́хъ.
Ѡ҆ прпⷣбнѣмъ і҆ѡа́ннѣ саваі́тинѣ.
ра҃і. Ѹ҆чени́къ бы́сть, гл҃етъ, и҆́нъ нѣ̑кїй въ то́йжде ѻ҆би́тели а҆сі́йстѣй ѹ҆ нѣ̑коегѡ мона́ха кро́тка и҆ ти́ха и҆ безмо́лвна: и҆ зрѧ̀ себѐ ѿ ста́рца ѻ҆́нагѡ ꙗ҆́кѡ почита́ема и҆ ѹ҆покоѧ́ема, разсмотрѣва́етъ до́брѣ, є҆́же мнѡ́зѣмъ бѣ̑дственно є҆́сть: и҆ ѹ҆молѧ́етъ ста́рца ѻ҆́наго, ѿпꙋсти́ти є҆го̀: и҆мѣ̑ѧше бо и҆ и҆но́го ѹ҆ченика̀, и҆ не ѕѣлѡ̀ бѣ̀ быва́емое печа́лно. И҆схо́дитъ ѹ҆̀бо ѿ негѡ̀, и҆ ѹ҆строѧ́етъ себѐ посла́нїемъ настоѧ́телѧ (своегѡ̀) въ нѣ̑коемъ ѿ сꙋ́щихъ въ по́нтѣ ѻ҆бщежи́тїй: и҆ въ пе́рвꙋю но́щь въ ню́же вни́де во ѻ҆бщежи́тїе, зри́тъ во снѣ̑хъ себѐ ѿ нѣ̑кихъ словоистѧзꙋ́ема, и҆ по концѣ̀ стра́шнѣйшагѡ ѻ҆́нагѡ словоистѧза́нїѧ, ѡ҆стаю́щасѧ со ѡ҆ста́ткомъ и҆ до́лжна сꙋ́ща зла́та лі́тръ сто̀. Возбнꙋ́въ ѹ҆̀бо и҆стѧ́зоваше ви́дѣнное, и҆ речѐ: смире́нне а҆нтїо́хе вои́стиннꙋ мно́гѡ ѡ҆стае́мсѧ со ѡ҆ста́ткомъ до́лга на́шегѡ. Ꙗ҆коже ѹ҆̀бо пребы́хъ, гл҃етъ, во ѻ҆бщежи́тїи ѻ҆́номъ лѣ̑тъ трѝ въ несꙋмнѣ̑нномъ послꙋша́нїи, ѿ всѣ̑хъ ꙗ҆́кѡ стра́ненъ ѡ҆хꙋжда́емь и҆ ѡ҆скорблѧ́емь: не бѣ̑ бо та́мѡ и҆но́гѡ мона́ха стра́нна: ви́ждꙋ па́ки во снѣ̑хъ нѣ̑коего да́вша мѝ ѹ҆каза́нїе десѧтѝ лі́тръ до́лга моегѡ̀: ѹ҆бꙋ́ждсѧ ѹ҆̀бо, позна́хъ видѣ̑нїе то̀: и҆ гл҃ахъ: є҆ще́ ли де́сѧть, и҆ когда̀ ѹ҆̀бо вы́платити и҆́мамъ; Тогда̀ гл҃ахъ къ себѣ̀: смире́нне а҆нтїо́хе, мно́гша трꙋда̀ и҆ безче́стїѧ потре́бно є҆́сть, ѿто́лѣ ѹ҆̀бо нача́хъ и҆зстꙋпле́ннымъ притворѧ́тисѧ ѻ҆ба́че ѿню́дъ не пра́зднꙋѧ ѿ слꙋ́жбы. Тѣ̑мже ви́дѧще мѧ̀ въ таковѣ̑мъ чи́нѣ и҆ ѹ҆се́рдїи неми́лостивїи ті́и ѻ҆тцы̀, всѧ̑ ѻ҆би́тели тоѧ̀ тѧ̑жкаѧ дѣла̀ мнѣ̀ повелѣва́хꙋ. Пребы́хъ ѹ҆̀бо въ таковѣ̑мъ пребыва́нїи трина́десѧть лѣ̑тъ, ви́дѣхъ ѻ҆́нѣхъ пре́жде ꙗ҆́влшихсѧ мнѣ̀ прише́дшихъ па́ки: и҆ соверше́нно безпопече́нїе до́лга ѻ҆́нагѡ мнѣ̀ написа́вшихъ. Є҆гда̀ ѹ҆̀бо ті́и ѻ҆би́тели тоѧ̀, ѡ҆скорблѧ́хꙋ мѧ̀ въ нѣ̑чесомъ, то̀ до́лгъ ѻ҆́нъ мо́й воспомина́ѧ, до́блественнѣ терпѧ́хъ. Сїѧ̑ ми всепремꙋ́дрый ѻ҆́нъ і҆ѡа́ннъ, ѻ҆́ч҃е і҆ѡа́нне, ꙗ҆́кѡ ѿ лица̀ а҆́кибы и҆но́гѡ повѣ̑да: тѣ̑мже и҆ а҆нтїо́ха себѐ преименова̀: се́й же бѣ̀ вои́стиннꙋ ѻ҆́нъ и҆́же рꙋкописа́нїе ѻ҆́но терпѣ̑нїемъ раздра́вый до́блественнѣ.
рв҃і. Ꙗ҆ко́въ же бы́сть и҆ разсꙋди́теленъ прпⷣбный се́й ѿ кра́йнѧгѡ своегѡ̀ послꙋша́нїѧ, ѹ҆слы́шимъ. Сѣдѧ́щꙋ є҆мꙋ̀ во ѻ҆би́тели ст҃а́гѡ са́ввы, прїидо́ша (къ немꙋ̀) трѝ ю҆́ни мона́си ѹ҆ченицы̀ є҆мꙋ̀ бы́ти хотѧ́ще: и҆́хже прїе́мъ а҆́бїе ѹ҆гостѝ съ ра́достїю, ѿ трꙋдѡ́въ пꙋтеше́ствїѧ ѹ҆поко́ити хотѧ̀. По тре́тїемъ ѹ҆̀бо днѝ, гл҃етъ и҆́мъ ста́рецъ: є҆стество́мъ, бра́тїе, человѣ̑къ блꙋ́дникъ є҆́смь, и҆ не могꙋ̀ прїѧ́ти нѣ̑кихъ и҆з̾ ва́съ. Ѻ҆ни́ же не соблазни́шасѧ, вѣ̑дѧхꙋ бо дѣ̑ланїе ста́рца ѻ҆́нагѡ. Ꙗ҆кѡ ѹ҆̀бо мно́гѡ моли́вше є҆го̀, повинꙋ́ти ѿню́дъ не возмого́ша, тогда̀ поверга́ютъ себѐ на но́зѣ є҆гѡ̀: молѧ́ще понѐ пра́вило прїѧ́ти ѿ негѡ̀, ка́кѡ же и҆ гдѣ̀ сѣ̑сти до́лжни сꙋ́ть. Повинꙋ́всѧ ѹ҆̀бо ста́рецъ, и҆ ѹ҆вѣ̑дѣвъ ꙗ҆́кѡ со смире́нїемъ и҆ послꙋша́нїемъ прїе́млютъ, гл҃етъ є҆ди́номꙋ: хо́щетъ тѧ̀ гдⷭ҇ь, ча́до, въ безмо́лвномъ мѣ̑стѣ со ѻ҆ц҃е́мъ въ повинове́нїи сѣ̑сти. Гл҃етъ и҆ второ́мꙋ: ше́дъ, прода́ждь вѡ́ли твоѧ̑, и҆ да́ждь бг҃ꙋ: и҆ возмѝ крⷭ҇тъ тво́й, и҆ терпѝ во дрꙋжи́нѣ и҆ ѻ҆бщежи́тїи бра́тїй: и҆ вои́стиннꙋ и҆мѣ̑ти бꙋ́деши сокро́вище на нб҃сѣ̑хъ. Та́же и҆ тре́тїемꙋ гл҃етъ: воспрїимѝ съ дыха́нїемъ твои́мъ нераздѣ̑лнѣ сло́во ѻ҆́но гл҃ющее: претерпѣ̑вый до конца̀, то́й спасе́тсѧ (матѳ. к҃д, г҃і): и҆дѝ, и҆ а҆́ще мо́щно є҆́сть, то̀ да не ѡ҆ста́виши въ человѣ̑честѣмъ є҆стествѣ̀ запрети́телнша и҆лѝ же́сточша па́че твоегѡ̀ ѡ҆ гдⷭ҇ѣ ѡ҆бꙋчи́телѧ. и҆ претерпѣ̑въ на всѧ́къ де́нь пі́й ꙗ҆́кѡ ме́дъ (и҆) млеко̀, порꙋга́нїе и҆ насмѣѧ́нїе. Бра́тъ же ѻ҆́нъ гл҃етъ къ вели́комꙋ семꙋ̀ і҆ѡа́ннꙋ: и҆ а҆́ще въ нерадѣ̑нїи ѻ҆́ч҃е таковы́й пребыва́етъ, то̀ что̀; Ста́рецъ же: а҆́ще и҆ блꙋдѧ́ща того̀ ѹ҆́зриши, да не ѿстꙋпи́ши: но глаго́ли въ себѣ̀, дрꙋ́же на что̀ прише́лъ є҆сѝ; Тогда̀ ѹ҆́зриши ѿ тебѐ потреблѧ́емо возноше́нїе, и҆ ѹ҆вѧда́емо раждеже́нїе.
рг҃і. Подвиза́емсѧ все́ю си́лою всѝ гдⷭ҇а ѹ҆боѧ́тисѧ хотѧ́щїи, да не во ѡ҆бꙋчи́лищи се́мъ добродѣ̑тели, та́мѡ лꙋка́вство себѣ̀ па́че и҆ ѕло́бꙋ, лю́тость же и҆ кова́рство и҆ проны́рливство и҆ гнѣ̑въ пристѧ́жемъ: слꙋча́етсѧ бо, и҆ нѣ̑сть чꙋ́до: занѐ доне́лѣже ѹ҆́бѡ просте́цъ є҆́сть, и҆лѝ кора́бленикъ, и҆лѝ земледѣ̑лецъ человѣ̑къ, то̀ не толи́кѡ на него̀ вразѝ цр҃е́ви воѡрꙋжа́ютсѧ: повнегда́ же того̀ печа́ть взе́мша, и҆ щи́тъ, и҆ ме́чь и҆ ѻ҆рꙋ́жїе, и҆ лꙋ́къ, и҆ въ во́ина ѡ҆дѣѧ́нїе ѡ҆дѣ̑ѧна ѹ҆́зрѧтъ: тогда̀ и҆ ті́и зꙋба́ми на́нь скреже́щꙋтъ, и҆ ѿню́дъ ѹ҆би́ти того̀ покꙋша́ютсѧ: тѣ̑мже да не ѹ҆́снемъ.
рд҃і. Ви́дѣхъ неѕлѡ́бивы и҆ добро́тнѣйшы младе́нцы во ѹ҆чи̑лища премꙋ́дрости ра́ди и҆ наказа́нїѧ и҆ по́л̾зы прише́дшѧ: и҆ ничесомꙋ́ же та́мѡ, ра́звѣ то́чїю лю́тости и҆ ѕло́бѣ нака̑заны бы́вшѧ ѿ про́чїихъ спребыва́нїѧ: и҆мѣ̑ѧй ѹ҆́мъ, разꙋмѣ̑ти и҆́мать.
рє҃і. Невозмо́жно є҆́сть хꙋдо́жествꙋ ѹ҆ча́щымсѧ вседꙋ́шнѣ, на всѧ́къ де́нь не ѹ҆спѣва́ти въ не́мъ: но ѻ҆́ви ѹ҆́бѡ, пред̾ꙋспѣѧ́нїе то̀ познава́ютъ: ѻ҆́ви же, смотри́телнѣ не вѣ̑дѧтъ. И҆зрѧ́днѣйшъ торжни́къ на всѧ́къ ве́черъ дне́вное приѡбрѣ̑тенїе, и҆лѝ тщетꙋ̀ ѿню́дъ счита́етъ: не мо́жетъ же ꙗ҆́вѣ ѹ҆вѣ̑дѣти, а҆́ще на всѧ́къ ча́съ на дщи́цѣ не назна́менꙋетъ, ꙗ҆̀же бо на всѧ́къ ча́съ словоистѧза̑нїѧ, повседне́вное ꙗ҆влѧ́ютъ.
рѕ҃і. Є҆гда̀ поноша́емь и҆лѝ ѡ҆сꙋжда́емь безꙋ́мный печа́лꙋетъ, и҆лѝ вско́рѣ запреща́ющемꙋ покло́нъ дадѐ: не смире́нїѧ ра́ди, но поноше́нїѧ ѻ҆́на возбрани́ти хотѧ̀: бїе́мь, молчѝ: и҆ прїе́мли дꙋшє́вны жє́ги, па́че же чистоты̀ свѣти̑ла. Преста́вшꙋ врачꙋ̀ семꙋ̀, тогда̀ пред̾ ни́мъ ка́йсѧ: въ ꙗ҆́рости бо не́гли, нижѐ покаѧ́нїе прїе́млетъ.
рз҃і. Проти́вꙋ всѣ́мъ ѹ҆́бѡ, па́че же проти́вꙋ двои́мъ си̑мъ страсте́мъ и҆́же во дрꙋжи́нахъ, на всѧ́къ ча́съ подвиза́имсѧ: проти́вꙋ чревонеи́стовствꙋ, и҆ скорогнѣ̑вїю: вещества́ми бо свои́ми междꙋ̀ мно́жествомъ и҆зоби́лꙋютъ.
ри҃і. Сꙋ́щымъ въ повинове́нїи дїа́волъ невозмо́жныхъ добродѣ̑телей жела́нїе влага́етъ: подо́бнѣ и҆ сꙋ́щымъ въ безмо́лвїи, неподѡ́бнаѧ совѣ̑тꙋетъ: разве́рзи пѡ́слꙋшникъ неискꙋ́сныхъ ѹ҆́мъ, и҆ ѡ҆брѧ́щеши та́мѡ прелще́нъ ра́зꙋмъ, жела́нїе безмо́лвїѧ, поста̀ кра́йнѣйшагѡ, мл҃и́твы непари́телны, безтщесла́вїѧ кра́йнѧ, па́мѧти незабы́тны и҆схо́да, всегда́шнѧ ѹ҆миле́нїѧ, безгнѣ̑вїѧ всесоверше́нна, молча́нїѧ глꙋбо́ка, чистоты̀ превосходѧ́щїѧ: и҆́хже по смотре́нїю въ нача́лѣхъ не и҆мꙋ́ще, всꙋ́е прескочи́ша прелсти́вшесѧ: пре́жде бо вре́мене взыска́ти тѣ́мъ сїѧ̑ вра́гъ сотвори́лъ є҆́сть, да не потерпѣ̑вше во вре́мѧ сїѧ̑ полꙋча́тъ. Бл҃жи́тъ въ безмо́лвницѣхъ преле́стникъ се́й по́слꙋшникѡвъ страннолю́бїе, слꙋже́нїе, братолю́бїе и҆ спребыва́нїе, недꙋ́гꙋющымъ послꙋгова́нїе, да и҆ ѻ҆́нѣхъ нетерпѣли́выхъ ꙗ҆́коже и҆ пе́рвыхъ содѣ̑лаетъ лсте́цъ се́й.
рѳ҃і. занѐ ма́лѣхъ ѹ҆́бѡ є҆́сть вои́стиннꙋ сїѐ є҆́же сло́вомъ безмо́лвїе проходи́ти, и҆ ѻ҆́нѣхъ є҆ди́нѣхъ бжⷭ҇твенное ѹ҆тѣше́нїе къ поѡщре́нїю трꙋдѡ́въ, и҆ во бра́нехъ по́мощь стѧжа́вшихъ.
р҃к. По сво́йствамъ страсте́й на́шихъ, и҆ повинове́нїѧ разсꙋжда́имъ, и҆ и҆збери́мъ подоба́телнѣ. Да бꙋ́детъ тебѣ̀ на блꙋ́дность невозде́ржнꙋ сꙋ́щꙋ и҆ прекланѧ́ющꙋсѧ ѡ҆бꙋчи́тель, подви́жникъ, и҆ неꙋтѣши́теленъ ѡ҆ пи́щи: а҆ не па́че чꙋдотво́рецъ и҆ гото́въ всѧ́комꙋ на ѹ҆гоще́нїе и҆ трапе́зꙋ. Да бꙋ́детъ тебѣ̀ высоковы́йнꙋ сꙋ́щꙋ, лю́тъ и҆ непопꙋсти́теленъ, а҆ не кро́токъ и҆ человѣколюби́въ. Не и҆́щимъ пред̾ꙋвѣ̑дѣтєль, нижѐ прозорли́выхъ: но пре́жде всѣ̑хъ ѿню́дъ смиренномꙋ́дрыхъ, и҆ сꙋ́щемꙋ въ на́съ недꙋ́гꙋ прили́чныхъ ѿ нра́ва и҆ сѣда́лища. Да бꙋ́детъ тебѣ̀ по а҆ввакѵ́рꙋ предпомѧнꙋ́томꙋ првⷣникꙋ, и҆ се́й до́бръ къ послꙋша́нїю ѻ҆́бразъ: є҆́же при́снѡ помышлѧ́ти ꙗ҆́кѡ и҆скꙋша́етъ тѧ̀ предстоѧ́тель, и҆ никогда́же погрѣши́ши. Є҆гда̀, запреща́ющꙋ непреста́ннѡ, мно́гшꙋ ю҆́же къ немꙋ̀ вѣ̑рꙋ и҆ любо́вь прїе́млеши, то̀ вѣ̑ждь, (ꙗ҆́кѡ) дх҃ъ ст҃ъ неви́димѡ въ дꙋ́шꙋ твою̀ всели́лсѧ є҆́сть, и҆ си́ла вы́шнѧгѡ ѡ҆сѣни́ла тѧ̀ є҆́сть.
рк҃а. Ѻ҆ба́че не хвали́сѧ, нижѐ ра́дꙋйсѧ, до́блественнѣ терпѧ̀ доса̑ды и҆ безчє́стїѧ: но па́че пла́чи, ꙗ҆́кѡ ѿню́дъ досто́йно нѣ̑что доса́ды содѣ̑ѧлъ є҆сѝ, и҆ смꙋти́лъ є҆сѝ дꙋ́шꙋ на тѧ̀: мѡѷсе́а бо и҆́мамъ соглаго́лника: ѹ҆́не є҆́сть ко бг҃ꙋ, а҆ не ко ѻ҆тцꙋ̀ на́шемꙋ согрѣши́ти: занѐ бг҃ꙋ ѹ҆́бѡ прогнѣ̑вавшꙋсѧ, наста́вникъ на́шъ примири́ти є҆го̀ къ на́мъ мо́жетъ: семꙋ́ же ѿ на́съ смꙋще́нꙋ бы́вшꙋ, нѣ̑коего ѹ҆милостивлѧ́ющаго про́чее ѡ҆ на́съ не и҆́мамы: мнѣ̑ же мни́тсѧ къ є҆ди́номꙋ разꙋмѣ̑нїю востека́ти ѻ҆боѧ̀ сїѧ̑.
рк҃в. Размотри́мъ и҆ разсꙋжда́имъ и҆ трезви́мсѧ, когда̀ ѹ҆́бѡ ѡ҆бвинѧ́еми ѿ па́стырѧ бл҃года́рственнѣ терпѣ̑ти и҆ безмо́лвнѣ до́лжни є҆смы̀: когда́ же къ немꙋ̀ и҆звѣще́нїе сотвори́ти. Мнѣ̀ мни́тсѧ, ѡ҆ всѣ̑хъ ѹ҆́бѡ безче́стїѧ на́мъ винѡ́внымъ быва́ющихъ, молча́ти: приѡбрѣ̑тенїѧ бо вре́мѧ є҆́сть: ѡ҆ востека́ющихъ же къ лицꙋ̀ и҆но́гѡ, ѿвѣ̑тствовати, сою́за ра́ди любвѐ, и҆ нерѣши́магѡ ми́ра.
рк҃г. Є҆ли́цы ѿ послꙋша́нїѧ ѿскочи́ша, ті́и тебѣ̀ возвѣстѧ́тъ по́льзꙋ є҆гѡ̀: тогда́ бо ѹ҆вѣ̑дѣша на ко́емъ нб҃сѝ стоѧ́хꙋ.
рк҃д. И҆́же ко безстра́стїю и҆ бг҃ꙋ текі́й, на всѧ́къ де́нь, во́ньже не быва́етъ ѹ҆корѧ́емь, мно́гꙋ тщетꙋ̀ непщꙋ́етъ бы́ти. Ꙗ҆коже древеса̀ ѿ вѣ̑трѡвъ зы́блєма, глꙋбѡка̀ коре́нїѧ низпꙋща́ютъ: та́кѡ и҆ въ послꙋша́нїи пребыва́ющїи, крѣ́пки и҆ непоколєби́мы дꙋ́шы и҆́мꙋтъ.
рк҃є. И҆́же въ безмо́лвїи сѣдѧ̀ позна̀ не́мощь свою̀, и҆ преше́дъ продадѐ себѐ послꙋша́нїю: то̀ се́й слѣ̑пъ сы́й, без̾ трꙋда̀ ко хрⷭ҇тꙋ̀ прозрѣ̀.
рк҃ѕ. Ста́ните, ста́ните, и҆ па́ки рекꙋ̀ ста́ните: текꙋ́ще, бра́тїе подви̑жницы, слы́шаще ѡ҆ ва́съ премꙋ́драго ѻ҆́наго вопїю́ща: ꙗ҆́кѡ зла́то гдⷭ҇ь въ горни́лѣ, па́че же во ѻ҆бщежи́тїи и҆скꙋсѝ и҆́хъ, и҆ ꙗ҆́кѡ всесожже́нїе же́ртвенное прїѧ́тъ ѧ҆̀ (пре. со. г҃, ѕ҃) въ нѣ́дра своѧ̑. Є҆мꙋ́же сла́ва и҆ держа́ва вѣ̑чнаѧ со ѻ҆ц҃е́мъ безнача́лнымъ, и҆ дх҃омъ ст҃ы́мъ и҆ покланѧ́емымъ. а҆ми́нь.
Равночи́сленъ є҆ѵⷢ҇лі́стѡмъ є҆́сть степе́нь. Подви́жниче сто́й, теча̀ без̾ стра́ха. Предтечѐ нѣ̑когда петра̀ і҆ѡа́ннъ: пред̾ꙋчини́сѧ же ны́нѣ послꙋша́нїе покаѧ́нїѧ. занѐ, предвари́вый ѹ҆́бѡ, послꙋша́нїѧ: дрꙋгі́й же ѡ҆ покаѧ́нїи ѻ҆́бразъ ѹ҆ста́вилъ є҆́сть.
На шестом часе:
На девятом часе: