с. сѯ҃д

ПРА̑ВИЛА СВЯТА́ГѠ СОБО́РА, бы́вшагѡ во хра́мѣ премꙋ́дрости сло́ва бж҃ія.

ПРА́ВИЛО а҃.

Святы́й и҆ вселе́нскій собо́ръ ѡ҆предѣли́лъ: а҆́ще кото́рые и҆з̾ і҆талі́йскихъ кли́рікѡвъ, и҆лѝ міря́нъ, и҆лѝ и҆з̾ є҆пі́скопѡвъ, ѡ҆бита́ющіе въ а҆́сіи, и҆лѝ въ є҆ѵрѡ́пѣ, и҆лѝ въ лівѵ́и, подве́рглися и҆лѝ ѹ҆́замъ ̾ѿлꙋче́нія ̾ѿ та́инствъ, и҆лѝ и҆зверже́нію и҆з̾ своегѡ̀ чи́на, и҆лѝ а҆на́ѳемѣ ̾ѿ святѣ́йшагѡ па́пы і҆ѡа́нна: тѣ̀ да бꙋ́дꙋтъ и҆ ̾ѿ святѣ́йшагѡ фѡ́тіа, патріа́рха кѡнстантінопо́льскагѡ подве́ржены томꙋ́ же сте́пени цр҃ко́внагѡ наказа́нія, то́ є҆сть, да бꙋ́дꙋтъ и҆лѝ и҆зве́ржены, и҆лѝ пре́даны а҆на́ѳемѣ, и҆лѝ ̾ѿлꙋче́ны. И҆ кото́рыхъ кли́рікѡвъ, и҆лѝ міря́нъ, и҆лѝ а҆рхіере́йскагѡ и҆лѝ і҆ере́йскагѡ чи́на, фѡ́тій святѣ́йшій патріа́рхъ на́шъ, въ како́мъ бы то̀ ни бы́ло предѣ́лѣ, подве́ргнетъ ̾ѿлꙋче́нію, и҆лѝ и҆зверже́нію, и҆лѝ прокля́тію, тѣ́хъ и҆ святѣ́йшій па́па і҆ѡа́ннъ, и҆ съ ни́мъ свята́я бж҃ія ри́мская цр҃ковь да призна́етъ под̾ тѣ́мъ же ѡ҆сꙋжде́ніемъ є҆пітіміѝ находя́щимися. Прито́мъ въ преимꙋ́ществахъ, принадлежа́щихъ святѣ́йшемꙋ престо́лꙋ ри́мскія цр҃кви и҆ є҆я̀ предсѣда́телю, соверше́ннѡ да не бꙋ́детъ никако́гѡ нововведе́нія, ни ны́нѣ, ни впре́дь.

с. сѯ҃є

ПРА́ВИЛО в҃.

Хотя̀ доны́нѣ нѣ́которые а҆рхіере́и, низше́дшіе въ мона́шескій ѻ҆́бразъ, ѹ҆си́ливались пребыва́ти въ высо́комъ слꙋже́ніи а҆рхіере́йства, и҆ такѡвы́я дѣ̑йствія ѡ҆ставля́емы бы́ли без̾ внима́нія: но се́й святы́й и҆ вселе́нскій собо́ръ, ѡ҆грани́чивая тако́е недосмотрѣ́ніе, и҆ возвраща́я сіѐ внѣ̀ поря́дка допꙋ́щенное дѣ́йствіе къ цр҃кѡ́внымъ ѹ҆ста́вамъ, ѡ҆предѣли́лъ: а҆́ще кото́рый є҆пі́скопъ, и҆лѝ кто̀ и҆́ный а҆рхіере́йскагѡ са́на, восхо́щетъ сни́ти въ мона́шеское житіѐ, и҆ ста́ти на мѣ́сто покая́нія: таковы́й впре́дь ѹ҆жѐ да не взыскꙋ́етъ ѹ҆потребле́нія а҆рхіере́йскагѡ досто́инства. И҆́бо ѻ҆бѣ́ты мона́шествꙋющихъ соде́ржатъ въ себѣ̀ до́лгъ повинове́нія и҆ ѹ҆чени́чества, а҆ не ѹ҆чи́тельства, и҆лѝ нача́льствованія: ѻ҆нѝ ѡ҆бѣща́ются не и҆ны́хъ пастѝ, но пасо́мыми бы́ти. Тогѡ̀ ра́ди, ка́къ вы́ше рече́но, постановля́емъ: да никто̀ и҆з̾ находя́щихся въ сосло́віи а҆рхіере́євъ и҆ па́стырей не низво́дитъ са́мъ себѐ на мѣ́сто пасо́мыхъ и҆ ка́ющихся. А҆́ще же кто̀ де́рзнетъ сотвори́ти сіѐ, по́слѣ провозглаше́нія и҆ приведе́нія въ и҆звѣ́стность произноси́магѡ ны́нѣ ѡ҆предѣле́нія: таковы́й, са́мъ себя̀ ѹ҆страни́въ ̾ѿ а҆рхіере́йскагѡ мѣ́ста, да не возвраща́ется къ пре́жнемꙋ досто́инствꙋ, кото́рое са́мымъ дѣ́ломъ ̾ѿложи́лъ.

ПРА́ВИЛО г҃.

А҆́ще кто̀ и҆з̾ міря́нъ, возпреѡблада́въ и҆ пренебре́гши повелѣ̑нія бж҃ія и҆ ца́рскія, и҆ порꙋга́вшись достѡ́йнымъ благоговѣ́нія цр҃кѡ́внымъ ѹ҆ста́вамъ и҆ зако́намъ, де́рзнетъ би́ти, и҆лѝ заключа́ти въ темни́цꙋ є҆пі́скопа, и҆лѝ без̾ вины̀, и҆лѝ под̾ вы́мышленными предло́гами вины̀: таковы́й да бꙋ́детъ а҆на́ѳема.