с. с҃н

ПРА̑ВИЛА СВЯТА́ГѠ СОБО́РА КѠНСТАНТІНОПО́ЛЬСКАГѠ,

во хра́мѣ святы́хъ а҆по́стѡлъ бы́вшагѡ, глаго́лемагѡ двꙋкра́тнагѡ.

{комм.}По и҆з̾ясне́нію зѡна́ра и҆ валсамѡ́на собо́ръ се́й и҆менꙋ́ется двꙋкра́тнымъ потомꙋ̀, что̀ двꙋкра́тнѡ собира́лся для ѻ҆дни́хъ и҆ тѣ́хъ же предме́тѡвъ. Дѣ̑йствія и҆ рѣшє́нія пе́рвагѡ собра́нія не моглѝ бы́ть напи́саны и҆ подпи́саны ѻ҆тца́ми собо́ра, потомꙋ̀ что̀ семꙋ̀ воспрепя́тствовали неправомы́слящіе, произведя̀ возмꙋще́ніе. Посемꙋ̀, по возстановле́ніи споко́йствія, де́ржано бы́ло второ́е собра́ніе, въ кото́ромъ, по возѡбновле́ніи пре́жнихъ разсꙋжде́ній, соста́влены и҆ ѹ҆тверждены̀ настоя́щыя пра̑вила.

ПРА́ВИЛО а҃.

Созида́ніе монастыре́й, дѣ́ло толи́кѡ ва́жное и҆ достохва́льное, дре́вле блаже́нными и҆ преподо́бными ѻ҆тца́ми на́шими бл҃горазсꙋ́днѡ и҆зѡбрѣ́тенное, ѹ҆сма́тривается ны́нѣ хꙋ́дѡ производи́мымъ. И҆́бо нѣ́которые, да́въ свои́мъ и҆мѣ́ніямъ и҆ ѹ҆са́дьбамъ и҆́мя монастыря̀, и҆ ѡ҆бѣщава́яся посвяти́ти ѻ҆́ныя бг҃ꙋ, пи́шꙋтъ себя̀ владѣ́льцами поже́ртвованнагѡ. Ѻ҆нѝ ѹ҆хищре́ннѡ ѹ҆мы́слили посвяти́ти бг҃ꙋ є҆ди́ное наименова́ніе: и҆́бо не стыдя́тся ѹ҆своя́ти себѣ̀ тꙋ́ же вла́сть и҆ по́слѣ поже́ртвованія, какꙋ́ю не возбраня́лось и҆̀мъ и҆мѣ́ти пре́жде. И҆ тако́е корче́мство примѣша́лося къ семꙋ̀ дѣ́лꙋ, что̀ къ ѹ҆дивле́нію и҆ ѡ҆горче́нію с. сн҃а ви́дящихъ, мно́гое и҆з̾ посвяще́ннагѡ бг҃ꙋ ꙗ҆́внѡ продае́тся сами́ми посвяти́вшими. И҆ не то́кмѡ нѣ́тъ въ ни́хъ раска́янія ѡ҆ то́мъ, ꙗ҆́кѡ попꙋска́ютъ себѣ̀ вла́ствованіе над̾ тѣ́мъ, что̀ є҆ди́ножды ѹ҆жѐ посвяти́ли бг҃ꙋ, но и҆ дрꙋги̑мъ безстра́шнѡ передаю́тъ ѻ҆́ное. Тогѡ̀ ра́ди святы́й собо́ръ ѡ҆предѣли́лъ: да не бꙋ́детъ позво́лено никомꙋ̀ созида́ти монасты́рь без̾ вѣ́дѣнія и҆ соизволе́нія є҆пі́скопа: но съ є҆гѡ̀ вѣ́дѣніемъ и҆ разрѣше́ніемъ, и҆ съ соверше́ніемъ подоба́ющей моли́твы, ꙗ҆́коже дре́вле бг҃оꙋго́днѡ законополо́жено, монасты́рь да созида́ется: все́ же къ немꙋ̀ принадлежа́щее, кꙋ́пнѡ съ ни́мъ сами́мъ да вно́сится въ кни́гꙋ, кото́рая и҆ да храни́тся въ є҆пі́скопскомъ а҆рхи́вѣ. И҆ поже́ртвователь без̾ во́ли є҆пі́скопа ̾ѿню́дь да не и҆мѣ́етъ дерзнове́нія, самаго̀ себя̀, и҆лѝ вмѣ́стѡ себя̀ дрꙋга́го поста́вити и҆гꙋ́меномъ. И҆́бо а҆́ще не мо́жетъ кто́ либо бы́ти ѻ҆блада́телемъ тогѡ̀, что̀ подари́лъ человѣ́кꙋ: то ка́кѡ мо́жетъ бы́ти попꙋ́щено комꙋ̀ восхища́ти ѡ҆блада́ніе тѣ́мъ, что̀ ѻ҆́нъ посвяща́етъ и҆ прино́ситъ бг҃ꙋ;

ПРА́ВИЛО в҃.

Нѣ́которые воспріе́млютъ на себя̀ ѻ҆́бразъ то́кмѡ житія̀ мона́шескагѡ, не ра́ди тогѡ̀, да въ чистотѣ̀ послꙋ́жатъ бг҃ꙋ, но ра́ди тогѡ̀, да ̾ѿ чти́магѡ ѡ҆дѣя́нія воспріи́мꙋтъ сла́вꙋ бл҃гоче́стія, и҆ тѣ́мъ ѡ҆бря́щꙋтъ безпрепя́тственное наслажде́ніе свои́ми ѹ҆дово́льствіями. Ѿри́нꙋвъ ѻ҆днѝ своѝ власы̀, ѻ҆нѝ ѡ҆стаю́тся въ свои́хъ дома́хъ, не и҆сполня́я никако́гѡ мона́шескагѡ послѣ́дованія, и҆лѝ ѹ҆ста́ва. Тогѡ̀ ра́ди святы́й собо́ръ ѡ҆предѣли́лъ: ̾ѿню́дь никогѡ̀ не сподобля́ти мона́шескагѡ ѻ҆́браза, без̾ присꙋ́тствованія при се́мъ лица̀, долженствꙋ́ющагѡ прія́ти є҆го̀ къ себѣ̀ въ послꙋша́ніе, и҆ и҆мѣ́ти над̾ ни́мъ нача́льство и҆ воспрія́ти попес. сн҃вче́ніе ѡ҆ дꙋше́вномъ є҆гѡ̀ спасе́ніи. Се́й да бꙋ́детъ мꙋ́жъ бг҃олюби́вый, нача́льникъ ѻ҆би́тели, и҆ спосо́бный спастѝ дꙋ́шꙋ новоприводи́мꙋю ко хр҃ⷭ҇тꙋ̀. А҆́ще же кто̀ ѡ҆бря́щется пострига́ющій кого́ либо не въ присꙋ́тствіи и҆гꙋ́мена, долженствꙋ́ющагѡ прія́ти є҆го̀ въ послꙋша́ніе: таковы́й да подве́ргнется и҆зверже́нію и҆з̾ своегѡ̀ чи́на, ꙗ҆́кѡ не повинꙋ́ющійся пра́виламъ, и҆ разрꙋша́ющій мона́шеское благочи́ніе: а҆ непра́вильнѡ и҆ безчи́ннѡ постри́женный да преда́стся на послꙋша́ніе въ монасты́рь, въ како́й заблагоразсꙋ́дитъ мѣ́стный є҆пі́скопъ. И҆́бо неразсꙋди́тєльныя и҆ погрѣши́тєльныя пострижє́нія и҆ мона́шескій ѻ҆́бразъ подве́ргли неꙋваже́нію, и҆ по́дали слꙋ́чай къ хꙋле́нію и҆́мени хр҃ⷭ҇то́ва.

ПРА́ВИЛО г҃.

Разсꙋждено̀ и҆спра́вити и҆ сіѐ неблагоꙋстро́йство, допꙋ́щенное, и҆ что̀ є҆щѐ хꙋ́же, по несмотрѣ́нію и҆ небреже́нію распространя́ющееся. А҆́ще кото́рый настоя́тель монастыря̀, подчине́нныхъ себѣ̀ мона́хѡвъ ̾ѿбѣга́ющихъ, не взы́щетъ съ вели́кимъ тща́ніемъ, и҆лѝ наше́дши не воспріи́метъ, и҆ не потрꙋди́тся прили́чнымъ и҆ недꙋ́гꙋ со̾ѿвѣ́тствꙋющимъ врачевство́мъ возстанови́ти и҆ ѹ҆крѣпи́ти па́дшаго: такова́го святы́й собо́ръ ѡ҆предѣли́лъ подверга́ти ̾ѿлꙋче́нію ѡ҆ та́инствъ. И҆́бо а҆́ще и҆мѣ́ющій въ смотрѣ́ніи безсловє́сныя живѡ́тныя, вознеради́въ ѡ҆ ста́дѣ, не ѡ҆ставля́ется без̾ наказа́нія: то прія́вшій па́стырское нача́льство над̾ па́ствою хр҃ⷭ҇то́вою, и҆ свои́мъ нерадѣ́ніемъ и҆ лѣ́ностію расточа́ющій спасе́ніе и҆́хъ, ка́кѡ не подве́ргнется наказа́нію за свою̀ де́рзость; Призыва́емый же возврати́тися мона́хъ, а҆́ще не повине́тся, да бꙋ́детъ ̾ѿлꙋче́нъ є҆пі́скопомъ.

ПРА́ВИЛО д҃.

Многоѻбра́знѡ ѹ҆си́ливался лꙋка́вый привестѝ въ с. сн҃г поноше́ніе досточти́мый мона́шескій ѻ҆́бразъ, и҆ наше́лъ для сегѡ̀ вели́кое посо́біе во вре́мени пре́жде бы́вшей є҆́реси. И҆́бо є҆́ресію ѹ҆гнѣта́емые мона́шествꙋющіе, ѡ҆ставля́я своѝ ѻ҆би́тєли, переселя́лися въ дрꙋгі́я, а҆ нѣ́которые и҆ въ жили̑ща мірски́хъ люде́й. Но что̀ дѣ́лали ѻ҆нѝ тогда̀ ра́ди благоче́стія, и҆ что̀ по семꙋ̀ дѣ́лало и҆̀хъ досто́йными ѹ҆блаже́нія: то̀ ѡ҆браща́яся въ безразсꙋ́дный ѻ҆бы́чай, ꙗ҆вля́етъ и҆̀хъ досто́йными посмѣя́нія. И҆́бо є҆щѐ и҆ ны́нѣ, когда̀ благоче́стіе повсю́дꙋ ѹ҆жѐ распространи́лось, и҆ цр҃ковь и҆зба́вилась ̾ѿ собла́знѡвъ, ̾ѿхо́дятъ нѣ́которые и҆з̾ свои́хъ монастыре́й, и҆, ка́къ нѣ́кій неꙋдержи́мый пото́къ, тꙋда̀ и҆ сюда̀ ѹ҆клоня́яся и҆ перелива́яся, и҆сполня́ютъ ѻ҆би́тєли мно́гимъ неблагоѻбра́зіемъ, вно́сятъ съ собо́ю вели́кій безпоря́докъ, и҆ благолѣ́піе послꙋша́нія разстро́иваютъ и҆ разрꙋша́ютъ. Пресѣка́я и҆́хъ непостоя́нное и҆ непокори́вое стремле́ніе, святы́й собо́ръ ѡ҆предѣли́лъ: а҆́ще кото́рый мона́хъ, ̾ѿбѣжа́въ и҆з̾ своея̀ ѻ҆би́тели, преско́читъ въ дрꙋгі́й монасты́рь, и҆лѝ всели́тся въ мірско́е жили́ще: таковы́й, ра́внѡ и҆ прія́вшій є҆го̀, да бꙋ́детъ ̾ѿлꙋче́нъ ̾ѿ ѻ҆бще́нія цр҃ко́внагѡ, доко́лѣ бѣжа́вшій не возврати́тся въ ѻ҆би́тель, и҆з̾ кото́рой престꙋ́пнѡ ѹ҆дали́лся. Впро́чемъ, а҆́ще є҆пі́скопъ нѣ́кіихъ и҆з̾ мона́хѡвъ, свидѣ́тельствꙋемыхъ во благоче́стіи и҆ че́стности житія̀, восхо́щетъ превестѝ въ дрꙋгі́й монасты́рь, ра́ди благоꙋстро́йства ѻ҆би́тели, и҆ли́ же заблагоразсꙋ́дитъ посла́ти и҆ въ мірскі́й до́мъ, ра́ди спасе́нія живꙋ́щихъ въ не́мъ, и҆лѝ благоизво́литъ поста́вити въ и҆но́мъ како́мъ мѣ́стѣ: чрез̾ сіѐ не дѣ́лаются вино́вными, ни сіѝ мона́шествꙋющіе, ни пріе́млющіе и҆̀хъ.

ПРА́ВИЛО є҃.

Ѡ҆брѣта́емъ, ꙗ҆́кѡ ̾ѿречє́нія ̾ѿ мі́ра, без̾ разсꙋжде́нія с. сн҃д и҆ и҆спыта́нія, мно́гѡ вредя́тъ мона́шескомꙋ благочи́нію. И҆́бо нѣ́которые ѡ҆проме́тчивѡ поверга́ютъ себя̀ въ мона́шеское житіѐ, и҆ пренебре́гши стро́гость и҆ трꙋды̀ подви́жничества, сно́ва бѣ́дственнѡ ѡ҆браща́ются къ плотоꙋго́дной и҆ сластолюби́вой жи́зни. Тогѡ̀ ра́ди святы́й собо́ръ ѡ҆предѣли́лъ: никогѡ̀ не сподобля́ти мона́шескагѡ ѻ҆́браза, пре́жде не́жели трехлѣ́тнее вре́мя, предоста́вленное и҆̀мъ для и҆спыта́нія, ꙗ҆ви́тъ и҆̀хъ спосо́бными и҆ досто́йными такова́гѡ житія̀, и҆ сіѐ повелѣ́лъ собо́ръ всемѣ́рнѡ храни́ти, ра́звѣ когда̀ приключи́вшаяся нѣ́кая тя́жкая болѣ́знь, понꙋ́дитъ сократи́ти вре́мя и҆спыта́нія, и҆лѝ ра́звѣ кто̀ бꙋ́детъ мꙋ́жъ благоговѣ́йный, и҆ въ мірско́мъ ѡ҆дѣя́ніи провожда́ющій жи́знь мона́шескꙋю. И҆́бо для такова́гѡ мꙋ́жа къ соверше́нномꙋ и҆спыта́нію довлѣ́етъ и҆ шестимѣ́сячный сро́къ. А҆́ще же кто̀ постꙋ́питъ вопрекѝ семꙋ̀: то и҆гꙋ́менꙋ, по лише́ніи и҆гꙋ́менства, состоя́ніе подчине́нности да послꙋ́житъ наказа́ніемъ за ̾ѿстꙋпле́ніе ̾ѿ поря́дка: постꙋпи́вшій же въ мона́шество да преда́стся въ дрꙋгі́й монасты́рь, въ кото́ромъ стро́гѡ соблюда́ется ѹ҆ста́въ мона́шескій.

ПРА́ВИЛО ѕ҃.

Мона́хи не должны̀ и҆мѣ́ти ничегѡ̀ со́бственнагѡ, но всѐ и҆̀мъ принадлежа́щее да ѹ҆твержда́ется за монастыре́мъ. И҆́бо блаже́нный лꙋка̀ ѡ҆ вѣ́рꙋющихъ во хр҃ⷭ҇та̀, и҆ представля́ющихъ собо́ю ѻ҆́бразъ мона́шескагѡ ѻ҆бщежи́тія, глаго́летъ, ꙗ҆́кѡ ни є҆ди́нъ что̀ ̾ѿ и҆мѣ́ній свои́хъ глаго́лаше своѐ бы́ти, но бя́хꙋ и҆̀мъ вся̑ ѻ҆́бща[1]. Посемꙋ̀ жела́ющымъ мона́шествовати предоставля́ется свобо́да завѣщава́ти ѡ҆ и҆мѣ́ніи свое́мъ пре́жде, и҆ передава́ти ѻ҆́ное, каки́мъ с. сн҃є восхотя́тъ ли́цамъ, котѡ́рымъ, то́ є҆сть, зако́нъ не возбраня́етъ. И҆́бо по встꙋпле́ніи въ мона́шество, монасты́рь и҆мѣ́етъ вла́сть над̾ всѣ́мъ и҆́хъ и҆мꙋ́ществомъ, и҆ и҆̀мъ не предоста́влено распоряжа́ти ничѣ́мъ со́бственнымъ, ни завѣщава́ти. А҆́ще же кто̀ ѡ҆бря́щется ѹ҆своя́ющій себѣ̀ нѣ́кое стяжа́ніе, не предоста́вивъ ѻ҆́нагѡ монастырю̀, и҆ порабоще́нный стра́сти любостяжа́нія: ѹ҆ такова́гѡ и҆гꙋ́менъ, и҆лѝ є҆пі́скопъ да во́зметъ ѻ҆́ное стяжа́ніе, и҆, въ присꙋ́тствіи мно́гихъ прода́въ, да разда́стъ ни́щымъ и҆ нꙋжда́ющымся. А҆ того̀, кто̀ положи́лъ въ се́рдцѣ свое́мъ, подо́бнѡ дре́внемꙋ ѻ҆́номꙋ а҆на́ніи, ѹ҆таи́ти сіѐ стяжа́ніе, святы́й собо́ръ ѡ҆прелѣли́лъ вразꙋми́ти прили́чною є҆пітіміе́ю. Ꙗ҆́вно же є҆́сть, ꙗ҆́кѡ постано́влєнныя святы́мъ собо́ромъ пра́вила ѡ҆ мона́хахъ, пра́веднымъ призна́лъ ѻ҆́нъ соблюда́ти и҆ ѡ҆ же́нахъ мона́шествꙋющихъ.

ПРА́ВИЛО з҃.

Ви́димъ, мнѡ́гія є҆пі́скѡпіи въ ѹ҆па́дкѣ, и҆ въ ѻ҆па́сности соверше́ннагѡ запꙋстѣ́нія ̾ѿ тогѡ̀, что̀ предстоя́тели ѻ҆́ныхъ тре́бꙋемое ѻ҆́ными попече́ніе и҆ тща́ніе ѡ҆браща́ютъ на созида́ніе но́выхъ монастыре́й, и҆ и҆стоща́я є҆пі́скѡпіи, и҆ ѹ҆хищря́я присвое́ніе дохо́дѡвъ, стара́ются ѡ҆ прираще́ніи монастыре́й. Тогѡ̀ ра́ди святы́й собо́ръ ѡ҆предѣли́лъ: да не бꙋ́детъ позво́лено никомꙋ̀ и҆з̾ є҆пі́скопѡвъ созида́ти ѻ҆со́беннагѡ для себя̀ монастыря̀, къ разоре́нію своея̀ є҆пі́скопіи. А҆́ще же кто̀ ѡ҆бря́щется дерза́ющій на сіѐ: таковы́й да подве́ргнется прили́чной є҆пітіміѝ, а҆ є҆гѡ̀ но́вое построе́ніе, ꙗ҆́кѡ не полꙋчи́вшее да́же пра́вильнагѡ нача́ла къ томꙋ̀, что́бы монастыре́мъ бы́ти, да причи́слится къ є҆пі́скопіи, ка́къ є҆я̀ со́бственность. И҆́бо ничто̀ вкра́вшееся, вопрекѝ зако́нꙋ и҆ поря́дкꙋ, не мо́с. сн҃ѕжетъ восхища́ти себѣ̀ преимꙋ́щества дѣ́лъ, произведе́нныхъ согла́снѡ съ пра́вилами.

ПРА́ВИЛО и҃.

Бж҃е́ственное и҆ свяще́нное пра́вило святы́хъ а҆п҃ⷭ҇тѡлъ признае́тъ скопя́щихъ сами́хъ себя̀ за самоꙋбі́йцъ, и҆ а҆́ще сꙋ́ть свяще́нники, и҆зверга́етъ, а҆́ще ли же не сꙋ́ть, загражда́етъ и҆̀мъ восхожде́ніе въ свяще́нство[2]. Ѿсю́дꙋ ꙗ҆́внымъ стано́вится, ꙗ҆́кѡ, а҆́ще скопя́щій са́мъ себя̀ є҆́сть самоꙋбі́йца, то скопя́щій дрꙋга́го, без̾ сомнѣ́нія, є҆́сть ѹ҆бі́йца. Мо́жно же пра́веднѡ рещѝ, ꙗ҆́кѡ таковы́й ѡ҆скорбля́етъ и҆ са́мое созда́ніе. Тогѡ̀ ра́ди святы́й собо́ръ ѡ҆предѣли́лъ: а҆́ще кото́рый є҆пі́скопъ, и҆лѝ пресвѵ́теръ, и҆лѝ діа́конъ, ѡ҆бличе́нъ бꙋ́детъ, ꙗ҆́кѡ ѡ҆скопи́лъ кого́ либо своерꙋ́чнѡ ли, и҆лѝ чрез̾ повелѣ́ніе: таковы́й да подве́ргнется и҆зверже́нію и҆з̾ своегѡ̀ чи́на: а҆́ще же міряни́нъ, да ̾ѿлꙋчи́тся ̾ѿ ѻ҆бще́нія церко́внагѡ, ра́звѣ приключи́вшаяся болѣ́знь принꙋ́дитъ къ ѡ҆скопле́нію боля́щагѡ. И҆́бо ка́къ пе́рвое пра́вило ніке́йскагѡ собо́ра. подверга́ющихся ̾ѿсѣче́нію чле́нѡвъ по болѣ́зни, не наказꙋ́етъ ра́ди и҆́хъ болѣ́зни: та́кѡ и҆ мы̀ ни свяще́нникѡвъ, повелѣва́ющихъ боля́щымъ ѡ҆скопля́тися, не ѡ҆сꙋжда́емъ, ни міря́нъ, своерꙋ́чнѡ производя́щихъ скопле́ніе, неѡбвиня́емъ: поели́кꙋ признае́мъ сіѐ врачева́ніемъ ̾ѿ болѣ́зни, а҆ не ѕлоꙋхишре́ніемъ проти́вꙋ тва́ри, и҆лѝ предосꙋжде́ніемъ тво́рческомꙋ дѣ́йствію.

ПРА́ВИЛО ѳ҃.

А҆п҃ⷭ҇тольское и҆ бж҃е́ственное пра́вило подверга́етъ и҆зверже́нію свяще́нникѡвъ, дерза́ющихъ би́ти вѣ́рныхъ согрѣши́вшихъ, и҆лѝ невѣ́рныхъ нане́сшихъ ѻ҆би́дꙋ[3]. Ѹ҆хищря́ющіеся ѹ҆годи́ти с. сн҃з своемꙋ̀ гнѣ́вꙋ, и҆ превраща́ющіе а҆п҃ⷭ҇тѡльскія ѹ҆становлє́нія, разꙋмѣ́ютъ сіѐ то́кмѡ ѡ҆ бію́щихъ своерꙋ́чнѡ, хотя̀ ѻ҆́ное пра́вило ничегѡ̀ тако́гѡ не назна́менꙋетъ, и҆ пра́вый смы́слъ та́кѡ разꙋмѣ́ти не попꙋска́етъ. И҆́бо по и҆́стинѣ бы́ло бы неразсꙋди́тельно и҆ весьма̀ погрѣши́тельно, а҆́ще бы нане́сшій своерꙋ́чнымъ біе́ніемъ трѝ и҆лѝ четы́ре ѹ҆да́ра, подверга́емъ бы́лъ и҆зверже́нію, а҆ междꙋ̀ тѣ́мъ, по да́нной свобо́дѣ би́ти посре́дствомъ повелѣ́нія, просте́ршій и҆стяза́ніе до жесто́кости и҆ до сме́рти ѡ҆става́лся бы ненака́заннымъ. И҆та́къ поели́кꙋ ѻ҆́нымъ пра́виломъ ѡ҆предѣля́ется наказа́ніе за біе́ніе воѻбщѐ: то и҆ мы̀ согла́снѡ ѡ҆предѣля́емъ. Подоба́етъ бо свяще́нникꙋ бж҃ію вразꙋмля́ти неблагонра́внаго наставле́ніями и҆ ѹ҆вѣща́ніями, и҆ногда́ же и҆ цр҃ко́вными є҆пітімія́ми, а҆ не ѹ҆стремля́тися на тѣла̀ человѣ́ческія съ бича́ми и҆ ѹ҆да́рами. А҆́ще же нѣ́кіе бꙋ́дꙋтъ соверше́ннѡ непокори́вы, и҆ вразꙋмле́нію чрез̾ є҆пітіміѝ не послꙋ́шны: таковы́хъ никто̀ не возбраня́етъ вразꙋмля́ти преда́ніемъ сꙋдꙋ̀ мѣ́стныхъ гражда́нскихъ нача́льникѡвъ. Поне́же пя́тымъ пра́виломъ а҆нтіохі́йскагѡ собо́ра постано́влено, производя́щихъ въ цр҃кви возмꙋще́ніе и҆ крамѡ́лы ѡ҆браща́ти къ поря́дкꙋ внѣ́шнею вла́стію.

ПРА́ВИЛО і҃.

Ꙗ҆́внѡ преда́вшіеся страстя́мъ свои́мъ не то́кмѡ не ѹ҆жаса́ются наказа́нія, ѡ҆предѣля́емагѡ свяще́нными пра́вилами, но дерзнꙋ́ли да́же рꙋга́тися над̾ ѻ҆́ными. И҆́бо ѻ҆нѝ превраща́ютъ ѻ҆́ныя, и҆, ра́ди стра́стныя во́ли своея̀, и҆скажа́ютъ смы́слъ и҆́хъ, дабы̀, по и҆збы́ткꙋ стра́стнагѡ ѻ҆больще́нія, ка́къ рече́но григо́ріемъ бг҃осло́вомъ, ѕло̀ каза́лось ѹ҆ ни́хъ не то́лькѡ не ѡ҆сꙋди́тельнымъ, но да́же бж҃е́ственнымъ[4]. А҆п҃ⷭ҇тольское пра́с. сн҃ивило глаго́летъ: сосꙋ́дъ златы́й и҆лѝ сре́бряный ѡ҆свяще́нный, и҆лѝ завѣ́сꙋ, никто̀ ѹ҆жѐ да не во́зметъ на своѐ ѹ҆потребле́ніе: беззако́нно бо є҆́сть. А҆́ще же кто̀ въ се́мъ ѹ҆смо́тренъ бꙋ́детъ: таковы́й да нака́жется ̾ѿлꙋче́ніемъ[5]. Сіѐ пра́вило, и҆злага́я къ своемꙋ̀ ѡ҆правда́нію въ беззако́ніяхъ, ѻ҆нѝ глаго́лютъ, ꙗ҆́кѡ не до́лжно сꙋди́ти досто́йными и҆зверже́нія тѣ́хъ, ко́и досточти́мое ѡ҆блаче́ніе святы́я трапе́зы претворя́ютъ въ со́бственный хітѡ́нъ, и҆лѝ въ нѣ́кꙋю и҆нꙋ́ю ѻ҆де́ждꙋ, ни да́же тѣ́хъ, ко́и святꙋ́ю ча́шꙋ, ѡ нече́стія! и҆лѝ свяще́ный ді́скосъ, и҆лѝ подо́бное семꙋ̀, и҆ждива́ютъ на свою̀ потре́бꙋ, и҆лѝ ѡ҆скверня́ютъ. И҆́бо, глаго́лютъ ѻ҆нѝ, пра́вило справедли́вымъ признае́тъ впа́дающихъ въ сіѐ престꙋпле́ніе подверга́ти ̾ѿлꙋче́нію, а҆ не и҆зверже́нію. Но кто̀ мо́жетъ снестѝ сто́ль вели́кое кощꙋ́нство и҆ нече́стіе; И҆́бо пра́вило подверга́етъ ̾ѿлꙋче́нію взима́ющихъ ѡ҆свяще́нное то́кмѡ для ѹ҆потребле́нія, а҆ не соверше́ннѡ похища́ющихъ: а҆ ѻ҆нѝ и҆ расхища́ющихъ свята̑я святы́хъ, и҆ святота́тствꙋющихъ ѡ҆свобожда́ютъ ̾ѿ и҆зверже́нія, та́кже ѡ҆скверня́ющихъ досточти́мые ді́скосы и҆лѝ святы́я ча̑ши, ѹ҆потребле́ніемъ для ѻ҆быкнове́нныхъ бра́шенъ по своемꙋ̀ разсꙋжде́нію, признаю́тъ не подлежа́щими и҆зверже́нію, тогда̀ ка́къ сіѐ є҆́сть ꙗ҆́вное ѡ҆скверне́ніе, и҆ ѻ҆чеви́дно, что̀ сіѐ дѣ́лающіе подлежа́тъ не то́кмѡ и҆зверже́нію, но и҆ винѣ̀ кра́йнягѡ нече́стія. Тогѡ̀ ра́ди святы́й собо́ръ ѡ҆предѣли́лъ: тѣ̀, ко́и святꙋ́ю ча́шꙋ, и҆лѝ ді́скосъ, и҆лѝ лжи́цꙋ, и҆лѝ досточти́мое ѡ҆блаче́ніе трапе́зы, и҆лѝ глаго́лемый воздꙋ́хъ, и҆лѝ како́й бы то̀ ни бы́ло и҆з̾ находя́щихся въ ѻ҆лтарѣ̀ свяще́нныхъ и҆ святы́хъ сосꙋ́дѡвъ и҆лѝ ѻ҆де́ждъ, восхи́тятъ для со́бственной с. сн҃ѳ коры́сти, и҆лѝ ѡ҆братя́тъ въ ѹ҆потребле́ніе не свяще́нное, да подве́ргнꙋтся соверше́нномꙋ и҆зверже́нію и҆з̾ своегѡ̀ чи́на. И҆́бо є҆ди́но и҆з̾ си́хъ є҆́сть ѡ҆скверне́ніе святы́ни, а҆ дрꙋго́е святота́тство. А҆ взима́ющихъ для себя̀ и҆лѝ для дрꙋги́хъ, на не свяще́нное ѹ҆потребле́ніе, сосꙋ́ды и҆лѝ ѻ҆дє́жды, внѣ̀ ѻ҆лтаря̀ ѹ҆потребля́ємыя, и҆ пра́вило ̾ѿлꙋча́етъ, и҆ мы̀ кꙋ́пнѡ ̾ѿлꙋча́емъ: соверше́ннѡ же похища́ющихъ ѻ҆́ныя подверга́емъ ѡ҆сꙋжде́нію святота́тцєвъ.

ПРА́ВИЛО а҃і.

Пресвѵ́терѡвъ, и҆лѝ діа́конѡвъ, пріе́млющихъ на себя̀ мірскі́я нача́льствєнныя до́лжнѡсти и҆лѝ попечє́нія, и҆лѝ въ дома́хъ мірски́хъ нача́льственныхъ ли́цъ зва́ніе ѹ҆прави́телей, бж҃е́ствєнныя и҆ свящє́нныя пра́вила подверга́ютъ и҆зверже́нію. То́ же и҆ мы̀ подтвержда́я и҆ ѡ҆ про́чихъ, принадлежа́щихъ къ кли́рꙋ, ѡ҆предѣля́емъ: а҆́ще кто̀ и҆з̾ ни́хъ встꙋ́питъ въ мірскі́я нача́льствєнныя до́лжнѡсти, и҆лѝ въ дома́хъ нача́льственныхъ ли́цъ, и҆лѝ въ гра́дскихъ предмѣ́стіяхъ пріи́метъ на себя̀ зва́ніе ѹ҆прави́теля: таковы́й да и҆зжене́тся и҆з̾ своегѡ̀ кли́ра. И҆́бо, по рече́нномꙋ ̾ѿ самагѡ̀ хр҃ⷭ҇та̀ и҆́стиннагѡ бг҃а на́шегѡ, и҆ нело́жномꙋ сло́вꙋ, никто́же мо́жетъ двѣма̀ господи́нома рабо́тати[6].

ПРА́ВИЛО в҃і.

Святы́й и҆ вселе́нскій шесты́й собо́ръ подверга́етъ и҆зверже́нію тѣ́хъ и҆з̾ кли́ра, кото́рые, без̾ соизволе́нія є҆пі́скопа, літꙋргиса́ютъ, и҆лѝ креща́ютъ въ моли́твенныхъ хра́минахъ, внꙋтрѝ до́ма находя́щихся[7]: согла́снѡ съ си́мъ и҆ мы̀ ѡ҆предѣля́емъ. И҆́бо тогда̀, ка́къ свята́я цр҃ковь пра́вѡ пра́витъ сло́во и҆́стины, и҆ ѻ҆́ное преподае́тъ и҆ защища́етъ, и҆ соблюда́етъ че́стность житія̀, и҆ поꙋча́етъ ѻ҆́ной, не прили́чно с. с҃ѯ и҆ престꙋ́пно бы́ло бы̀ попꙋсти́ти живꙋ́щымъвъ безнача́ліи и҆ ненака́занности поныря́ти въ до́мы, и҆ разрꙋша́ти благочи́ніе цр҃кви, и҆ и҆сполня́ти ѻ҆́нꙋю мно́гимъ смꙋще́ніемъ и҆ собла́знами. Тогѡ̀ ра́ди настоя́щій свяще́нный и҆ бг҃осодѣ́йствꙋемый собо́ръ, согла́снѡ съ святы́мъ вселе́нскимъ шесты́мъ собо́ромъ, ѡ҆предѣли́лъ: да бꙋ́дꙋтъ назнача́емы літꙋргиса́ющіе въ моли́твенныхъ хра́минахъ, въ до́мѣ находя́щихся, ꙗ҆́вно же є҆́сть, ꙗ҆́кѡ назначе́ніе сіѐ дае́тся и҆̀мъ ̾ѿ є҆пі́скопа тогѡ̀ мѣ́ста. А҆́ще же кто̀ кро́мѣ си́хъ, без̾ соизволе́нія є҆пі́скопа, вторга́ясь въ до́мы де́рзнетъ коснꙋ́тися соверше́нія літꙋргі́и: таковы́й да и҆зве́ржется, а҆ бы́вшіе съ ни́мъ въ ѻ҆бще́ніи да подве́ргнꙋтся ̾ѿлꙋче́нію.

ПРА́ВИЛО г҃і.

Вселꙋка́вый посѣ́явъ въ цр҃кви хр҃ⷭ҇то́вой сѣмена̀ є҆реті́ческихъ пле́велъ, и҆ ви́дя, ꙗ҆́кѡ ѻ҆́нѣ мече́мъ дх҃а посѣка́ются и҆з̾ ко́рени, встꙋпи́въ на дрꙋго́й пꙋ́ть ко́зней, покꙋша́ется безꙋ́міемъ раско́льникѡвъ разсѣка́ти тѣ́ло хр҃ⷭ҇то́во: но и҆ се́й є҆гѡ̀ навѣ́тъ соверше́ннѡ воспяща́я, святы́й собо́ръ ѡ҆предѣли́лъ ны́нѣ: а҆́ще кото́рый пресвѵ́теръ и҆лѝ діа́конъ, по нѣ́которымъ ѡ҆бвине́ніямъ, зазрѣ́въ своего̀ є҆пі́скопа, пре́жде собо́рнагѡ и҆зслѣ́дованія и҆ разсмотрѣ́нія, и҆ соверше́ннагѡ ѡ҆сꙋжде́нія є҆гѡ̀, де́рзнетъ ̾ѿстꙋпи́ти ̾ѿ ѻ҆бще́нія съ ни́мъ, и҆ не бꙋ́детъ возноси́ти и҆́мя є҆гѡ̀ въ свяще́нныхъ моли́твахъ на літꙋргі́яхъ, по цр҃ко́вномꙋ преда́нію: таковы́й да подве́ргнется и҆зверже́нію, и҆ да лиши́тся вся́кія свяще́нническія че́сти. И҆́бо поста́вленный въ чи́нѣ пресвѵ́тера, и҆ восхища́ющій себѣ̀ сꙋ́дъ, митрополі́тамъ предоста́вленный, и҆, пре́жде сꙋда̀, са́мъ собо́ю ѡ҆сꙋжда́ти своего̀ ѻ҆тца̀ и҆ є҆пі́скопа ѹ҆си́ливающійся, не досто́инъ с. сѯ҃а ни че́сти, нижѐ наименова́нія пресвѵ́тера. Послѣ́дꙋющіе же таково́мꙋ, а҆́ще сꙋ́ть нѣ́кіе ̾ѿ свяще́нныхъ, та́кожде да лишены̀ бꙋ́дꙋтъ своея̀ че́сти: а҆́ще же мона́хи и҆лѝ міря́не, да ̾ѿлꙋча́тся во́все ̾ѿ цр҃кви, доко́лѣ не ̾ѿве́ргнꙋтъ соѡбще́нія съ раско́льниками, и҆ не ѡ҆братя́тся къ своемꙋ̀ є҆пі́скопꙋ.

ПРА́ВИЛО д҃і.

А҆́ще кото́рый є҆пі́скопъ, поставля́я предло́гомъ винꙋ̀ своегѡ̀ митрополі́та, пре́жде собо́рнагѡ разсмотрѣ́нія, ̾ѿстꙋ́питъ ̾ѿ ѻ҆бще́нія съ ни́мъ, и҆ не бꙋ́детъ возноси́ти и҆́мя є҆гѡ̀, по ѻ҆бы́чаю, въ бж҃е́ственномъ тайнодѣ́йствіи: ѡ҆ таково́мъ святы́й собо́ръ ѡ҆предѣли́лъ: да бꙋ́детъ низложе́нъ, а҆́ще то́кмѡ ѡ҆бличе́нъ бꙋ́детъ, ꙗ҆́кѡ ̾ѿстꙋпи́лъ ̾ѿ своегѡ̀ митрополі́та, и҆ сотвори́лъ раско́лъ. И҆́бо ка́ждый до́лженъ вѣ́дати свою̀ мѣ́рꙋ: и҆ нижѐ пресвѵ́теръ да пренебрега́етъ своегѡ̀ є҆пі́скопа, нижѐ є҆пі́скопъ своегѡ̀ митрополі́та.

ПРА́ВИЛО є҃і.

Что̀ ѡ҆предѣлено̀ ѡ҆ пресвѵ́терахъ и҆ є҆пі́скопахъ и҆ митрополі́тахъ, то̀ са́мое, и҆ наипа́че, прили́чествꙋетъ патріа́рхамъ. Посемꙋ̀, а҆́ще кото́рый пресвѵ́теръ, и҆лѝ є҆пі́скопъ, и҆лѝ митрополі́тъ, де́рзнетъ ̾ѿстꙋпи́ти ̾ѿ ѻ҆бще́нія съ свои́мъ патріа́рхомъ, и҆ не бꙋ́детъ возноси́ти и҆́мя є҆гѡ̀, по ѡ҆предѣле́нномꙋ и҆ ѹ҆стано́вленномꙋ чи́нꙋ, въ бж҃е́ственномъ тайнодѣ́йствіи, но пре́жде собо́рнагѡ ѡ҆глаше́нія и҆ соверше́ннагѡ ѡ҆сꙋжде́нія є҆гѡ̀, ѹ҆чини́тъ раско́лъ: таково́мꙋ святы́й собо́ръ ѡ҆предѣли́лъ бы́ти соверше́ннѡ чꙋ́ждꙋ вся́кагѡ свяще́нства, а҆́ще то́кмѡ ѡ҆бличе́нъ бꙋ́детъ въ се́мъ беззако́ніи. Впро́чемъ сіѐ ѡ҆предѣлено̀ и҆ ѹ҆тверждено̀ ѡ҆ тѣ́хъ, ко́и, под̾ предло́гомъ нѣ́которыхъ ѡ҆бвине́ній, ̾ѿстꙋпа́ютъ ̾ѿ свои́хъ предстоя́телей, и҆ твос. сѯ҃вря́тъ раско́лы, и҆ расторга́ютъ є҆ди́нство цр҃кви. И҆́бо ̾ѿдѣля́ющіеся ̾ѿ ѻ҆бще́нія съ предстоя́телемъ, ра́ди нѣ́кія є҆́реси, ѡ҆сꙋжде́нныя святы́ми собо́рами и҆лѝ ѻ҆тца́ми, когда̀, то́ є҆сть, ѻ҆́нъ проповѣ́дꙋетъ є҆́ресь всенаро́днѡ, и҆ ѹ҆́читъ ѻ҆́ной ̾ѿкры́тѡ въ цр҃кви, таковы́е а҆́ще и҆ ѡ҆градя́тъ себя̀ ̾ѿ ѻ҆бще́нія съ глаго́лемымъ є҆пі́скопомъ, пре́жде собо́рнагѡ разсмотрѣ́нія, не то́кмѡ не подлежа́тъ поло́женной пра́вилами є҆пітіміѝ, но и҆ досто́йны че́сти, подоба́ющей правосла̑внымъ. И҆́бо ѻ҆нѝ ѡ҆сꙋди́ли не є҆пі́скопѡвъ, а҆ лжеєпі́скопѡвъ и҆ лжеꙋчи́телей, и҆ не раско́ломъ пресѣклѝ є҆ди́нство цр҃кви, но потщи́лись ѡ҆храни́ти цр҃ковь ̾ѿ раско́лѡвъ и҆ раздѣле́ній.

ПРА́ВИЛО ѕ҃і.

По причи́нѣ слꙋча́ющихся въ цр҃кви бж҃іей ра́спрей и҆ смяте́ній, неѡбходи́мо и҆ сіѐ ѡ҆предѣли́ти: ̾ѿню́дь да не поставля́ется є҆пі́скопъ въ то́й цр҃кви, кото́рой предстоя́тель жи́въ є҆щѐ, и҆ пребыва́етъ въ свое́мъ досто́инствѣ, ра́звѣ а҆́ще са́мъ доброво́льнѡ ̾ѿрече́тся ̾ѿ є҆пі́скопства. И҆́бо надлежи́тъ пре́жде привестѝ къ концꙋ̀ зако́нное и҆зслѣ́дованіе вины̀, за кото́рꙋю ѻ҆́нъ и҆мѣ́етъ ѹ҆дале́нъ бы́ти ̾ѿ є҆пі́скопства, и҆ тогда̀ ѹ҆жѐ, по є҆гѡ̀ низложе́ніи, возвестѝ на є҆пі́скопство дрꙋга́го, вмѣ́стѡ є҆гѡ̀. А҆́ще же кто̀ и҆з̾ є҆пі́скопѡвъ, пребыва́я въ свое́мъ досто́инствѣ, и҆ не хо́щетъ ̾ѿрещи́ся, и҆ не жела́етъ пастѝ наро́дъ сво́й, но, ѹ҆даля́ся и҆з̾ своея̀ є҆пі́скопіи, бо́лѣе шестѝ мѣ́сяцєвъ ѡ҆стае́тся въ дрꙋго́мъ мѣ́стѣ, не бы́въ ѹ҆де́рживаемъ ни ца́рскимъ повелѣ́ніемъ, ни и҆сполне́ніемъ порꙋче́ній своегѡ̀ патріа́рха, нижѐ бы́въ ѡ҆держи́мъ тя́жкою болѣ́знію, дѣ́лающею є҆го̀ соверше́ннѡ недвижи́мымъ: таковы́й ни є҆ди́ною и҆з̾ рече́нныхъ причи́нъ не воспяща́емый, но ѹ҆с. сѯ҃гдали́вшійся ̾ѿ своея̀ є҆пі́скопіи, и҆ въ и҆но́мъ мѣ́стѣ до́лѣе шестимѣ́сячнагѡ вре́мени пребыва́ющій, да бꙋ́детъ соверше́ннѡ чꙋ́ждъ є҆пі́скопскія че́сти и҆ досто́инства. И҆́бо нерадя́щемꙋ ѡ҆ врꙋче́нной є҆мꙋ̀ па́ствѣ, и҆ въ и҆но́мъ мѣ́стѣ бо́лѣе шестѝ мѣ́сяцєвъ закоснѣва́ющемꙋ, святы́й собо́ръ ѡ҆предѣли́лъ соверше́ннѡ бы́ти чꙋ́ждꙋ и҆ а҆рхіере́йства, въ кото́рое поста́вленъ, дабы̀ пастѝ, и҆ на є҆гѡ̀ є҆пі́скопію возводи́ти дрꙋга́го, вмѣ́стѡ є҆гѡ̀.

ПРА́ВИЛО з҃і.

Прилага́я попече́ніе ѡ҆ соблюде́ніи во все́мъ цр҃ко́внагѡ благочи́нія, мы̀ призна́ли неѡбходи́мымъ и҆ сіѐ ѡ҆предѣли́ти: что́бы впре́дь никто̀ и҆з̾ міря́нъ, и҆лѝ мона́хѡвъ не бы́лъ внеза́пнѡ возводи́мъ на высотꙋ̀ є҆пі́скопства, но что́бы ка́ждый, по и҆спыта́ніи пре́жде въ цр҃ко́вныхъ сте́пеняхъ, воспріима́лъ рꙋкоположе́ніе во є҆пі́скопа. И҆́бо хотя̀ доны́нѣ нѣ́которые и҆з̾ мона́шествꙋющихъ, и҆лѝ мірски́хъ, по тре́бованію нꙋ́жды, и҆ бы́ли вско́рѣ ѹ҆досто́иваемы є҆пі́скопскія че́сти, и҆ превзошлѝ дрꙋги́хъ добродѣ́телію, и҆ возвы́сили порꙋчє́нныя и҆̀мъ цр҃кви: ѻ҆дна́кѡ рѣ́дкѡ быва́ющагѡ не поставля́я въ зако́нъ цр҃кви, ѡ҆предѣля́емъ, ̾ѿны́нѣ семꙋ̀ ѹ҆жѐ не бы́ти: но пра́вильнѡ рꙋкополага́емый да про́йдетъ чрез̾ всѣ̀ сте́пєни свяще́нства, и҆сполня́я въ ка́ждомъ поло́женное зако́номъ вре́мя.