с. рѻ҃г

ПРА̑ВИЛА СВЯТА́ГѠ ПОМѢ́СТНАГѠ СОБО́РА САРДІКІ́ЙСКАГѠ.

ПРА́ВИЛО а҃.

Ѻ҆сі́й є҆пі́скопъ гра́да кордꙋ́вы ре́къ: подоба́етъ и҆з̾ са́мыхъ ѡ҆снова́ній и҆скорени́ти не сто́лькѡ хꙋдо́е ѡ҆быкнове́ніе ско́лькѡ вре́днѣйшее разстро́йство дѣ́лъ церко́вныхъ. Никомꙋ̀ и҆з̾ є҆пі́скопѡвъ да не бꙋ́детъ позво́лено и҆з̾ ма́лагѡ гра́да преходи́ти въ и҆ны́й гра́дъ. И҆́бо въ се́мъ дѣ́лѣ ꙗ҆́вна причи́на, для ко́ей ѻ҆но̀ предпріе́млется: потомꙋ̀ что̀ никогда̀ не мо́жно бы́ло ѡ҆брѣстѝ ни є҆ди́наго є҆пі́скопа, кото́рый бы и҆з̾ вели́кагѡ гра́да во гра́дъ ме́ньшіи переведе́нъ бы́ти тща́лся. Ѿсе́лѣ ꙗ҆́вствꙋетъ, что̀ таковы́е пла́менною стра́стію многостяжа́нія возжига́ются, и҆ го́рдости бо́лѣе рабо́таютъ, да полꙋ́чатъ бо́льшꙋю, по ви́димомꙋ, вла́сть. И҆та́къ, бꙋ́детъ ли ѹ҆го́дно всѣ̑мъ, да сꙋро́вѣе наказꙋ́ется толи́кое развраще́ніе; мню́ же, ꙗ҆́кѡ таковы̑мъ не до́лжно и҆мѣ́ти ѻ҆бще́нія нижѐ наравнѣ̀ съ міря́нами. Всѣ̀ є҆пі́скопы реклѝ: ѹ҆го́дно всѣ̑мъ.

ПРА́ВИЛО в҃.

А҆́ще же ѡ҆бря́щется кто̀ толи́кѡ безꙋ́менъ и҆лѝ дерзнове́нъ, ꙗ҆́кѡ возмни́тъ нѣ́кое и҆звине́ніе приноси́ти въ таково́мъ дѣ́лѣ, ѹ҆тверс. рѻ҃джда́я, что̀ ̾ѿ наро́да при́слано къ немꙋ̀ посла́ніе: ꙗ҆́вно є҆́сть, ꙗ҆́кѡ моглѝ не мно́гіе нѣ́кіе, прельще́нные воздая́ніемъ и҆ цѣно́ю, ско́пище соста́вити въ це́ркви, а҆́кибы жела́я и҆мѣ́ти є҆го̀ є҆пі́скопомъ. Посемꙋ̀ полага́ю, сіѝ ѹ҆хищрє́нія и҆ кѡ́зни всеконе́чнѡ нака́зывати, да никто̀ и҆з̾ таковы́хъ, нижѐ при кончи́нѣ свое́й, не бꙋ́детъ ѹ҆досто́иваемъ ѻ҆бще́нія, да́же наравнѣ̀ съ міря́нами. Ѹ҆го́дно ли мнѣ́ніе сіѐ; ̾ѿвѣща́йте. И҆ ̾ѿвѣща́ли: и҆зрече́нное пріе́млемъ.

ПРА́ВИЛО г҃.

Нꙋ́жно и҆ сіѐ присовокꙋпи́ти, да никто̀ и҆з̾ є҆пі́скопѡвъ не прихо́дитъ и҆з̾ своея̀ ѻ҆́бласти во и҆нꙋ́ю ѻ҆́бласть, въ кото́рой є҆́сть своѝ є҆пі́скопы, ра́звѣ то́кмѡ бꙋ́детъ по́званъ ̾ѿ бра́тій находя́щихся въ ѻ҆́ной, да не возмни́мся затворя́ти двє́ри любвѝ. Подоба́етъ же и҆ сіѐ предꙋсмотрѣ́ти: а҆́ще въ ко́ей ѻ҆́бласти, кто́ либо и҆з̾ є҆пі́скопѡвъ и҆мѣ́етъ дѣ́ло съ бра́томъ свои́мъ и҆ соепі́скопомъ: ни кото́рый и҆з̾ ни́хъ да не призыва́етъ въ посре́дники є҆пі́скопѡвъ и҆з̾ и҆ны́я ѻ҆́бласти. А҆́ще же кто̀ и҆з̾ є҆пі́скопѡвъ, въ нѣ́коемъ дѣ́лѣ, ѡ҆ка́жется ѡ҆сꙋжда́емымъ, но возмни́тъ себѐ не непра́вое и҆мѣ́ти дѣ́ло, а҆ пра́ведное, да и҆ па́ки возѡбнови́тся сꙋ́дъ: то, а҆́ще ѹ҆го́дно ва́мъ, любо́вію почти́мъ па́мять петра̀ а҆п҃ⷭ҇ла, и҆ да напи́шется ̾ѿ си́хъ сꙋди́вшихъ къ і҆ꙋ́лію є҆пі́скопꙋ ри́мскомꙋ, да возѡбнови́тся, а҆́ще потре́бно, сꙋ́дъ чрез̾ ближа́йшихъ къ то́й ѻ҆́бласти є҆пі́скопѡвъ, и҆ да назна́читъ ѻ҆́нъ разсмотри́телей дѣ́ла. А҆́ще же ѡ҆бвиня́емый не возмо́жетъ предста́вити дѣ́ла своегѡ̀ тре́бꙋющымъ втори́чнагѡ сꙋжде́нія: то є҆ди́ножды присꙋжде́нное да не нарꙋша́ется, но, что̀ сдѣ́лано, то̀ да бꙋ́детъ тве́рдо.

{комм.}Шесты́мъ пра́виломъ пе́рвагѡ вселе́нскагѡ собо́ра, по дре́внемꙋ с. рѻ҃є ѻ҆бы́чаю, предоста́влены въ подчине́ніе ри́мскомꙋ є҆пі́скопꙋ мнѡ́гія є҆па́рхіи на за́падѣ, подо́бнѡ ка́къ а҆леѯандрі́йскомꙋ и҆ а҆нтіохі́йскомꙋ мнѡ́гія є҆па́рхіи на ю҆́гѣ и҆ восто́кѣ. Согла́снѡ съ си́мъ раздѣ́леніемъ, ѻ҆сі́й є҆пі́скопъ і҆спа́нскагѡ го́рода кордꙋ́вы, принадлежа̀ къ ѻ҆́бласти ри́мскагѡ є҆пі́скопа, предлага́етъ ̾ѿноси́ть на є҆гѡ̀ разсмотре́ніе сомни́тельные слꙋ́чаи за́падныхъ є҆па́рхій: и҆ въ се́мъ смы́слѣ при́нялъ є҆гѡ̀ предложе́ніе помѣ́стный сардікі́йскій собо́ръ, не ̾ѿстꙋпа́я ̾ѿ ѕ҃ пра́вила пе́рвагѡ вселе́нскагѡ собо́ра.

ПРА́ВИЛО д҃.

А҆́ще кото́рый є҆пі́скопъ, сꙋдо́мъ є҆пі́скопѡвъ въ сосѣ́дствѣ находя́щихся, и҆зве́рженъ бꙋ́детъ ̾ѿ са́на, и҆ рече́тъ, что̀ ѻ҆́нъ па́ки возлага́етъ на себя̀ до́лгъ ѡ҆правда́нія: то не пре́жде поставля́ти дрꙋга́го на є҆гѡ̀ мѣ́сто, ра́звѣ когда̀ є҆пі́скопъ ри́мскій, дозна́въ дѣ́ло, произнесе́тъ своѐ ѡ҆предѣле́ніе по ѻ҆́номꙋ.

ПРА́ВИЛО є҃.

А҆́ще бꙋ́детъ на кото́раго є҆пі́скопа доно́съ, и҆ є҆пі́скопы ѻ҆кре́стные собра́вшись низло́жатъ є҆го̀ съ є҆гѡ̀ сте́пени, а҆ ѻ҆́нъ, перенося̀ дѣ́ло, прибѣ́гнетъ къ блаже́ннѣйшемꙋ є҆пі́скопꙋ ри́мскія це́ркви, се́й же восхо́щетъ вня́ти є҆мꙋ̀, и҆ призна́етъ пра́веднымъ возѡбнови́ти и҆зслѣ́дованіе дѣ́ла ѡ҆ не́мъ: то до́лжно и҆ сіѐ положи́ти, да благоволи́тъ написа́ти къ сопредѣ́льнымъ то́й ѻ҆́бласти є҆пі́скопамъ, дабы̀ ѻ҆нѝ тща́тельнѡ и҆ съ подро́бностію вни́кнꙋли во всѣ̀ ѡ҆бстоя́тєльства, и҆, по ѹ҆бѣжде́ніи въ и҆́стинѣ, произнеслѝ сꙋ́дъ ѡ҆ дѣ́лѣ. А҆́ще же кто̀ востре́бꙋетъ, что́бы дѣ́ло є҆гѡ̀ па́ки вы́слꙋшано бы́ло, и҆, по проше́нію є҆гѡ̀, заблагоразсꙋждено̀ бꙋ́детъ ри́мскимъ є҆пі́скопомъ ̾ѿ себѐ посла́ти пресвѵ́терѡвъ: да бꙋ́детъ во вла́сти сегѡ̀ є҆пі́скопа, поколи́кꙋ за лꙋ́чшее и҆ до́лжное призна́етъ и҆ ѡ҆предѣли́тъ, для сꙋжде́нія вмѣ́стѣ съ є҆пі́скопами, посла́ти застꙋпа́ющихъ мѣ́сто посла́вшагѡ. с. рѻ҃ѕ И҆ли́ же а҆́ще доста́точнымъ призна́етъ бы́вшее разсмотре́ніе и҆ рѣше́ніе дѣ́ла ѡ҆ се́мъ є҆пі́скопѣ: да ѹ҆чини́тъ, что̀ благоразꙋ́мнѣйшемꙋ є҆гѡ̀ разсꙋжде́нію за бла́го возмни́тся. Ѿвѣща́ли є҆пі́скопы: и҆зрече́нное пріе́млемъ.

ПРА́ВИЛО ѕ҃.

А҆́ще въ є҆ди́ной ѻ҆́бласти, и҆мѣ́ющей мно́гихъ є҆пі́скопѡвъ, слꙋчи́тся є҆ди́номꙋ є҆пі́скопꙋ заме́длити, и҆ ѻ҆́нъ, по нѣ́коемꙋ небреже́нію, не восхо́щетъ бы́ти въ собра́ніи и҆ согласи́тися на постановле́ніе є҆пі́скопѡвъ, собра́вшееся же мно́жество люде́й бꙋ́детъ проси́ти, да поста́вится тре́бꙋемый и҆́ми є҆пі́скопъ: подоба́етъ во пе́рвыхъ, чрез̾ посла́ніе є҆ѯа́рха ѻ҆́бласти [разꙋмѣ́ю є҆пі́скопа митропо́ліи], воспомянꙋ́ти ѻ҆́номꙋ заме́длившемꙋ є҆пі́скопꙋ, ꙗ҆́кѡ про́сятъ лю́діе да́ти и҆̀мъ па́стыря. За бла́го признаю̀ ѡ҆жида́ти, да прибꙋ́детъ и҆ ѻ҆́нъ. А҆́ще же, и҆ чрез̾ посла́ніе бы́въ про́шенъ, не пріи́детъ, и҆ нижѐ ̾ѿпи́шетъ, то подоба́етъ ѹ҆довлетвори́ти жела́нію наро́да. Но и҆ ̾ѿ бли́жнія ѻ҆́бласти до́лжно призва́ти є҆пі́скопѡвъ къ поставле́нію є҆пі́скопа митропо́ліи. Напро́тивъ тогѡ̀ ̾ѿню́дь да не бꙋ́детъ позво́лено поставля́ти є҆пі́скопа въ како́е либо село̀ и҆лѝ въ ма́лый го́родъ, для ко́егѡ довлѣ́етъ и҆ є҆ди́ный пресвѵ́теръ. И҆́бо не нꙋ́жно поставля́ти та́мѡ є҆пі́скопѡвъ, да не ѹ҆ничижа́ется и҆́мя є҆пі́скопа и҆ вла́сть. Но є҆пі́скопы ѻ҆́бласти должны̀, ка́къ и҆зрече́но мно́ю вы́ше, є҆пі́скопѡвъ поставля́ти въ тѣ̀ гра́ды, въ кото́рыхъ и҆ пре́жде бы́ли є҆пі́скопы. А҆́ще же ѡ҆бря́щется нѣ́кій гра́дъ, мно́гимъ число́мъ люде́й толи́кѡ возра́стшій, что̀ при́знанъ бꙋ́детъ досто́йнымъ и҆мѣ́ти є҆пі́скопа: да пріи́метъ. Согла́сны ли на сіѐ всѣ̀; ̾ѿвѣща́ли всѣ̀: согла́сны.

с. рѻ҃з

ПРА́ВИЛО з҃.

Ѻ҆сі́й є҆пі́скопъ ре́къ: безвре́мєнныя, весьма̀ ча̑стыя и҆ несправедли́выя прошє́нія на́ши сдѣ́лали то̀, что̀ мы̀ не и҆мѣ́емъ толи́кія благода́ти и҆ дерзнове́нія, каковы́я и҆мѣ́ти долженствꙋ́емъ. И҆́бо мно́гіе и҆з̾ є҆пі́скопѡвъ не престаю́тъ приходи́ти въ во́инскій ста́нъ, а҆ наипа́че а҆фрика́нскіе, кото́рые, ка́къ мы̀ ѹ҆вѣ́дали ̾ѿ возлю́бленнагѡ бра́та на́шегѡ и҆ соепі́скопа гра́та, поле́зныхъ совѣ́тѡвъ не пріе́млютъ, но презира́ютъ та́къ, что̀ є҆ди́нъ человѣ́къ прино́ситъ въ во́инскій ста́нъ прошє́нія мно́жайшыя и҆ разли̑чныя, не могꙋ́щыя бы́ти на по́льзꙋ це́рквамъ, посо́бствꙋетъ и҆ покрови́тельствꙋетъ, не бѣ̑днымъ и҆ простолюди́намъ, и҆лѝ вдови́цамъ, ка́къ бы́ло бы до́лжно и҆ прили́чно, но мірски́хъ досто́инствъ и҆ должносте́й и҆́щетъ для нѣ́которыхъ. Таково́е невѣ́жество причиня́етъ на́мъ ѹ҆ще́рбъ, не без̾ собла́зна нѣ́коегѡ и҆ зазо́ра. Прили́чнѣйшимъ же почита́ю, что́бы є҆пі́скопъ по́мощь свою̀ подава́лъ томꙋ̀, кто̀ ̾ѿ когѡ́ либо ѹ҆тѣсня́ется, и҆лѝ є҆́стьли кото́рая вдова̀ ѻ҆би́дꙋ претерпѣва́етъ, и҆лѝ си́рый кто́ либо лиша́ется принадлежа́щагѡ є҆мꙋ̀, є҆́стьли прито́мъ и҆ по си́мъ предме́тамъ проше́ніе бꙋ́детъ справедли́вое. А҆́ще ѹ҆̀бо, возлю́бленные бра́тія, ѹ҆го́дно сіѐ всѣ̑мъ: то ѹ҆тверди́те, ꙗ҆́кѡ ни є҆ди́нъ є҆пі́скопъ не до́лженъ приходи́ти въ во́инскій ста́нъ, кромѣ̀ тѣ́хъ, кото́рыхъ благочести́вѣйшій ца́рь на́шъ призове́тъ свои́мъ писа́ніемъ. Но поели́кꙋ многокра́тнѡ слꙋча́ется, что̀ нѣ́которые, за престꙋпле́нія своѝ, на заточе́ніе и҆лѝ на ѻ҆́стровъ ѡ҆сꙋжде́нные, и҆лѝ и҆но́мꙋ како́мꙋ либо ѡ҆сꙋжде́нію подве́рженные, прибѣга́ютъ къ це́ркви, тре́бꙋя милосе́рдія: таковы̑мъ не надлежи́тъ ̾ѿка́зывати въ по́мощи, но неме́дленнѡ с. рѻ҃и и҆ без̾ сомнѣ́нія проси́ти для ни́хъ снисхожде́нія. А҆́ще и҆ сіѐ ѹ҆го́дно, препода́йте на сіѐ согла́сіе всѣ̀. Ѿвѣ́тствовали всѣ̀: да бꙋ́детъ постано́влено и҆ сіѐ.

ПРА́ВИЛО и҃.

Поели́кꙋ бы́ло разсꙋжда́емо, дабы̀ кто̀ и҆з̾ є҆пі́скопѡвъ не подпа́лъ ѡ҆сꙋжде́нію, приходя̀ въ во́инскій ста́нъ: сегѡ̀ ра́ди, а҆́ще кото́рые и҆з̾ ни́хъ и҆мѣ́ютъ такі́я прошє́нія, ѡ҆ каковы́хъ мы̀ вы́ше ѹ҆помянꙋ́ли, да препосыла́ютъ и҆̀хъ чрез̾ своего̀ діа́кона. И҆́бо слꙋже́бное лицѐ не подлежи́тъ ѹ҆коре́нію и҆ скорѣ́е мо́жетъ донестѝ то̀, что̀ є҆мꙋ̀ порꙋчено̀ бꙋ́детъ. Ѿвѣ́тствовали всѣ̀: и҆ сіѐ да бꙋ́детъ постано́влено.

ПРА́ВИЛО ѳ҃.

А҆́ще кото́рыя ѻ҆́бласти є҆пі́скопы, бра́тꙋ и҆ соепі́скопꙋ своемꙋ̀, доста́вятъ прошє́нія: то пребыва́ющій въ бо́льшемъ гра́дѣ, то́ є҆сть въ митропо́ліи, да препрово́дитъ и҆ діа́кона и҆́хъ и҆ прошє́нія, да́въ є҆мꙋ̀ и҆ представи́тєльныя пи́сьма, то́ є҆сть писа́въ послѣ́довательнѡ къ бра́тіямъ и҆ соепі́скопамъ на́шымъ, пребыва́ющымъ въ то̀ вре́мя въ тѣ́хъ мѣста́хъ и҆лѝ гра́дахъ, въ кото́рыхъ благочести́вѣйшій ца́рь ли́чнѡ распоряжа́етъ ѻ҆бще́ственными дѣла́ми. А҆́ще же кто̀ и҆з̾ є҆пі́скопѡвъ и҆мѣ́етъ дрꙋгѡ́въ во дворѣ̀ царе́вѣ, и҆ восхо́щетъ ѡ҆ че́мъ либо подоба́ющемъ проси́ти: то да не возбрани́тся є҆мꙋ̀, чрез̾ своего̀ діа́кона и҆ проси́ти и҆ заповѣ́дати и҆̀мъ, да подадꙋ́тъ є҆мꙋ̀ въ є҆гѡ̀ проше́ніи благꙋ́ю по́мощь. Приходя́щіе же въ ри́мъ, ка́къ вы́ше рече́но мно́ю, прошє́нія, котѡ́рыя и҆мѣ́ютъ принестѝ ца́рю, должны̀ представля́ти возлю́бленномꙋ бра́тꙋ на́шемꙋ и҆ соепі́скопꙋ і҆ꙋ́лію, да пе́рвѣе разсмо́тритъ, не сꙋ́ть ли нѣ́кія и҆з̾ ни́хъ безсты́дны, и҆ пото́мъ по́слетъ ѻ҆́ныя въ во́инскій ста́нъ, прис. рѻ҃ѳсовокꙋпля́я и҆ своѐ предста́тельство и҆ попече́ніе. Всѣ̀ є҆пі́скопы ̾ѿвѣ́тствовали, ꙗ҆́кѡ ѹ҆го́дно и҆̀мъ сіѐ, и҆ прили́чнѣйшій є҆́сть совѣ́тъ се́й.

ПРА́ВИЛО і҃.

Подоба́етъ со вся́кою то́чностію и҆ тща́ніемъ наблюда́ти, да бога́тый кто́ либо, и҆лѝ ѹ҆че́ный, ̾ѿ свѣ́тскагѡ слꙋже́нія, ѹ҆досто́иваемый є҆пі́скопомъ бы́ти, не пре́жде поставля́ется, ра́звѣ когда̀ соверши́тъ слꙋжє́нія чтеца̀ и҆ діа́кона, и҆ пресвѵ́тера, дабы̀ проходя̀ чрез̾ ка́ждꙋю сте́пень, а҆́ще досто́йнымъ призна́нъ бꙋ́детъ, мо́гъ взы́ти на высотꙋ̀ є҆пі́скопства. Ѻ҆чеви́дно же, что̀ для ка́ждой сте́пени чи́на до́лжно бы́ть предоста́влено не сли́шкомъ ма́лое вре́мя, въ продолже́ніе кото́рагѡ моглѝ бы ѹ҆смо́трены бы́ти є҆гѡ̀ вѣ́ра, благонра́віе, постоя́нство и҆ кро́тость, и҆ ѻ҆́нъ, бы́въ при́знанъ досто́йнымъ бж҃е́ственнагѡ свяще́нства, полꙋчи́лъ бы велича́йшꙋю че́сть. И҆́бо не прили́чно, дерзнове́нно и҆ легкомы́сленно пристꙋпа́ти къ томꙋ̀, что́бы поспѣ́шнѡ поставля́ти и҆лѝ є҆пі́скопа, и҆лѝ пресвѵ́тера, и҆лѝ діа́кона: и҆ ни зна́ніе, ни поведе́ніе не дае́тъ на сіѐ пра́ва. Поне́же такова́го по справедли́вости почлѝ бы весьма̀ но́вымъ[1], и҆ не ѹ҆твержде́ннымъ, наипа́че, когда̀ и҆ блаже́ннѣйшій а҆п҃ⷭ҇лъ, кото́рый ѹ҆чи́телемъ ꙗ҆зы́кѡвъ бы́лъ, ꙗ҆вля́ется возбраня́ющимъ ско́рыя поставлє́нія въ церкѡ́вныя сте́пени: поели́кꙋ дозна́ніе въ должа́йшее вре́мя достовѣ́рнѣе показа́ти мо́жетъ и҆ поведе́ніе и҆ нра́въ ка́ждагѡ. Реклѝ всѣ̀, ꙗ҆́кѡ и҆̀мъ сіѐ ѹ҆го́дно, и҆ сегѡ̀ нарꙋша́ти ̾ѿню́дь не до́лжно.

ПРА́ВИЛО а҃і.

Є҆пі́скопъ, когда̀ ̾ѿ є҆ди́нагѡ гра́да прехо́дитъ въ дрꙋгі́й гра́дъ, и҆лѝ ̾ѿ є҆ди́ныя ѻ҆́бласти въ дрꙋгꙋ́ю с. р҃п ѻ҆́бласть, ра́ди тщесла́вія подвиза́яся ѡ҆ со́бственной похвалѣ̀ и҆лѝ ѡ҆ соверше́ніи бг҃ослꙋже́нія съ вя́щшею ва́жностію, и҆ хо́щетъ пребы́ти та́мѡ до́лгое вре́мя, тогда̀ ка́къ є҆пі́скопъ тогѡ̀ гра́да не и҆скꙋ́сенъ въ ѹ҆че́ніи: да не пренебрега́етъ є҆гѡ̀ и҆ да не проповѣ́дꙋетъ ча́стѡ, тща́ся постыди́ти и҆ ѹ҆ничижи́ти лицѐ мѣ́стнагѡ є҆пі́скопа. И҆́бо се́й предло́гъ ѻ҆быкнове́ннѡ произво́дитъ смятє́нія, и҆ таково́ю хи́тростію є҆пі́скопъ стара́ется чꙋ́ждый престо́лъ себѣ̀ преѡбрꙋчи́ти и҆ восхи́тити, не коле́блясь ѡ҆ста́вити порꙋче́ннꙋю себѣ̀ це́рковь и҆ прейтѝ во и҆нꙋ́ю. И҆та́къ до́лжно на сіѐ ѡ҆предѣли́ти и҆звѣ́стное вре́мя: поели́кꙋ и҆ не принима́ти є҆пі́скопа показа́лось бы дѣ́ломъ не человѣколю́бнымъ и҆ жесто́кимъ. При се́мъ воспомяни́те, что̀ въ предше́ствовавшее вре́мя ѻ҆тцы̀ на́ши ѡ҆предѣли́ли: а҆́ще кто̀ міряни́нъ, пребыва́я во гра́дѣ, въ трѝ воскре́сные днѝ, въ продолже́ніе тре́хъ седми́цъ, не пріи́детъ въ собра́ніе, да бꙋ́детъ ѹ҆дале́нъ ̾ѿ ѻ҆бще́нія церко́внагѡ. И҆та́къ а҆́ще сіѐ постано́влено ѡ҆ міря́нахъ, то не до́лжно, не прили́чно, и҆ не поле́зно є҆пі́скопꙋ, не и҆мѣ́ющемꙋ никако́й ва́жной нꙋ́жды и҆лѝ дѣ́ла трꙋ́днагѡ, ѡ҆ставля́ти це́рковь свою̀ на вре́мя бо́лѣе продолжи́тельное, и҆ ѡ҆горча́ти ввѣ́ренный є҆мꙋ̀ наро́дъ. Всѣ̀ є҆пі́скопы реклѝ: и҆ сіѐ мнѣ́ніе весьма̀ прили́чно.

ПРА́ВИЛО в҃і.

Нѣ́которые и҆з̾ бра́тій и҆ соепі́скопѡвъ во гра́дахъ, въ кото́рые ѻ҆нѝ поставля́ются во є҆пі́скопы, и҆мѣ́ютъ, пови́димомꙋ, ѻ҆́чень ма́лꙋю со́бственность и҆̀мъ принадлежа́щꙋю, а҆ въ дрꙋги́хъ мѣста́хъ стяжа̑нія вели̑кія, и҆з̾ кото́рыхъ мо́гꙋтъ вспомоществова́ти бѣ̑днымъ. Полага́ю, что̀, є҆́стьли ѻ҆нѝ восхотя́тъ пріитѝ въ своѝ владѣ̑нія, и҆ произвестѝ собра́ніе плос. рп҃адѡ́въ, то надлежи́тъ позво́лити и҆̀мъ сіѐ съ тѣ́мъ, что́бы ѻ҆нѝ трѝ воскре́сные днѝ, то́ є҆сть трѝ седми́цы пребыва́ли въ свои́хъ владѣ́ніяхъ, но что́бы въ ближа́йшей це́ркви, въ кото́рой соверша́етъ слꙋ́жбꙋ пресвѵ́теръ, присꙋ́тствовали и҆ слꙋжи́ли, да не ꙗ҆вя́тся ѡ҆стаю́щимися без̾ церко́внагѡ бг҃ослꙋже́нія, и҆ что́бы не ча́стѡ приходи́ли во гра́дъ, въ кото́ромъ є҆́сть є҆пі́скопъ. И҆́бо таковы́мъ ѻ҆́бразомъ и҆ со́бствєнныя и҆́хъ дѣла̀ не поте́рпятъ никако́гѡ вреда̀ ̾ѿ и҆́хъ ̾ѿсꙋ́тствія, и҆ ѻ҆чеви́днѡ и҆збѣ́гнꙋтъ ѻ҆нѝ ѡ҆бвине́нія въ го́рдости и҆ тщесла́віи. Всѣ̀ є҆пі́скопы реклѝ: ѹ҆го́дно и҆ сіѐ постановле́ніе.

ПРА́ВИЛО г҃і.

Ѻ҆сі́й є҆пі́скопъ ре́къ: а҆́ще кто̀, діа́конъ, и҆лѝ пресвѵ́теръ, и҆лѝ кто́ либо и҆з̾ приче́тникѡвъ бꙋ́детъ лише́нъ ѻ҆бще́нія церко́внагѡ, и҆ прибѣ́гнетъ къ и҆но́мꙋ є҆пі́скопꙋ зна́ющемꙋ є҆го̀, зна́ющемꙋ и҆ то̀, что̀ ѻ҆́нъ свои́мъ є҆пі́скопомъ ѹ҆дале́нъ ̾ѿ ѻ҆бще́нія: не подоба́етъ, съ ѻ҆би́дою для є҆пі́скопа и҆ бра́та своегѡ̀, подава́ти є҆мꙋ̀ ѻ҆бще́ніе. А҆́ще же де́рзнетъ сіѐ сотвори́ти: да зна́етъ, что̀ подверга́етъ себѐ ̾ѿвѣ́тꙋ пред̾ є҆пі́скопами, когда̀ ѻ҆нѝ соберꙋ́тся.

ПРА́ВИЛО д҃і.

А҆́ще ѡ҆бря́щется нѣ́кій є҆пі́скопъ, скло́нный ко гнѣ́вꙋ [что̀ въ таково́мъ мꙋ́жѣ не должно̀ и҆мѣ́ти мѣ́ста], и҆ внеза́пнѡ бы́въ раздраже́нъ на пресвѵ́тера, и҆лѝ діа́кона, восхо́щетъ и҆зри́нꙋти нѣ́коего и҆з̾ цр҃кви: подоба́етъ предохране́ніе ѹ҆потреби́ти, да не то́тчасъ таковы́й бꙋ́детъ ѡ҆сꙋжда́емъ и҆ лиша́емъ ѻ҆бще́нія. Всѣ̀ є҆пі́скопы реклѝ: и҆зверга́емый да и҆мѣ́етъ пра́во прибѣ́гнꙋти къ є҆пі́скопꙋ митропо́ліи тоя́ же ѻ҆́бласти. А҆́ще же є҆пі́скопа митропо́ліи нѣ́тъ на мѣ́стѣ, с. рп҃в прибѣ́гнꙋти къ сосѣ́дственномꙋ є҆пі́скопꙋ и҆ проси́ти, да со тща́ніемъ и҆зслѣ́дꙋется дѣ́ло. И҆́бо не до́лжно загражда́ти слꙋ́ха ̾ѿ прося́щихъ. А҆ є҆пі́скопъ ѻ҆́ный, пра́веднѡ и҆лѝ непра́веднѡ и҆зве́ргшій такова́го, благодꙋ́шнѡ сноси́ти до́лженъ, да бꙋ́детъ и҆зслѣ́дованіе дѣ́ла, и҆ пригово́ръ є҆гѡ̀ и҆лѝ подтвержде́нъ бꙋ́детъ, и҆лѝ полꙋ́читъ и҆справле́ніе. По пре́жде не́жели тща́тельнѡ и҆ вѣ́рнѡ и҆зслѣ́дованы всѣ̀ ѡ҆бстоя́тєльства, ̾ѿлꙋче́нный ̾ѿ ѻ҆бще́нія до разсмотрѣ́нія дѣ́ла, не до́лженъ присвоя́ти себѣ̀ ѡ҆бще́нія. А҆́ще же соше́дшеся нѣ́которые и҆з̾ кли́ра ѹ҆ви́дятъ въ не́мъ пренебреже́ніе вла́сти и҆ надме́нность: то [поели́кꙋ не прили́чно попꙋска́ти ѻ҆би́дꙋ и҆лѝ непра́ведное порица́ніе] долженствꙋ́ютъ нѣ́сколькѡ сꙋро́выми и҆ тя́жкими слова́ми ѡ҆браща́ти є҆го̀ къ поря́дкꙋ, да соблюда́ется поко́рность и҆ повинове́ніе повелѣва́ющемꙋ до́лжное. И҆́бо ка́къ є҆пі́скопъ ѡ҆бя́занъ ꙗ҆вля́ти подчинє́ннымъ и҆́скреннюю любо́вь и҆ расположе́ніе: таковы́мъ же ѻ҆́бразомъ, и҆ слꙋжа́щіе ѡ҆бя́заны непритво́рнѡ и҆сполня́ти до́лгъ слꙋже́нія є҆пі́скопамъ.

ПРА́ВИЛО є҃і.

А҆́ще кото́рый є҆пі́скопъ, и҆з̾ и҆на́гѡ предѣ́ла чꙋжда́го слꙋжи́теля це́ркви восхо́щетъ поста́вити на какꙋ́ю либо сте́пень, без̾ соизволе́нія є҆гѡ̀ є҆пі́скопа: то таково́е поставле́ніе да почита́ется недѣйстви́тельнымъ и҆ нетве́рдымъ. А҆́ще же нѣ́которые сіѐ позво́лятъ себѣ̀: то ̾ѿ бра́тій и҆ соепі́скопѡвъ должны̀ бы́ти ѹ҆вѣщава́емы, и҆ и҆справля́емы. Реклѝ всѣ̀: и҆ сіѐ ѡ҆предѣле́ніе да бꙋ́детъ непоколеби́мо.

ПРА́ВИЛО ѕ҃і.

А҆е́тій є҆пі́скопъ ре́къ: не без̾извѣ́стно ва́мъ, какова̀ с. рп҃г и҆ ско́ль вели́ка ѳессалонікі́йская митропо́лія. Ча́стѡ прихо́дятъ въ ѻ҆́нꙋю и҆з̾ и҆ны́хъ є҆па́рхіи пресвѵ́теры и҆ діа́коны, и҆ недово́льствꙋясь кратковре́меннымъ пребыва́ніемъ ѡ҆стаю́тся, и҆ всегда́шнее жи́тельство та́мѡ и҆мѣ́ютъ, и҆лѝ є҆два̀ по́слѣ весьма̀ до́лгагѡ вре́мени принꙋждены̀ быва́ютъ возбрати́тися къ свои́мъ це́рквамъ. И҆ та́къ и҆ ѡ҆ си́хъ ѡ҆предѣле́нію бы́ти до́лжно. Ѻ҆сі́й є҆пі́скопъ сказа́лъ: тѣ̀ ѡ҆предѣлє́нія, какі́я постано́влены ̾ѿноси́тельнѡ є҆пі́скопѡвъ, да сохраня́ются и҆ ̾ѿноси́тельнѡ си́хъ ли́цъ.

ПРА́ВИЛО з҃і.

А҆́ще кото́рый є҆пі́скопъ, претерпѣ́въ наси́ліе, непра́веднѡ и҆зве́рженъ бꙋ́детъ, и҆лѝ за своѝ позна̑нія, и҆лѝ за и҆сповѣ́даніе каѳолі́ческія це́ркви, и҆лѝ за то̀, что̀ защища́лъ и҆́стинꙋ, и҆, и҆збѣга́я ѻ҆па́сности, бꙋ́дꙋчи неви́ненъ и҆ ѡ҆бвине́нію подве́рженъ, пріи́детъ во и҆ны́й гра́дъ: то заблагоразсꙋждено̀, да не возбраня́ется є҆мꙋ̀ пребыва́ти та́мѡ, доко́лѣ не возврати́тся, и҆лѝ возмо́жетъ ѡ҆брѣстѝ и҆збавле́ніе ̾ѿ нанесе́нныя є҆мꙋ̀ ѻ҆би́ды. И҆́бо же́стоко и҆ весьма̀ тя́жко бы́ло бы не пріима́ти на́мъ претерпѣ́вшагѡ непра́ведное и҆згна́ніе: напро́тивъ тогѡ̀ съ ѻ҆со́беннымъ благорасположе́ніемъ и҆ дрꙋжелю́біемъ до́лжно пріима́ти такова́го.

ПРА́ВИЛО и҃і.

Гаѵде́нтій є҆пі́скопъ ре́къ: зна́еши, бра́те а҆е́тіе, что̀ при поставле́ніи твое́мъ во є҆пі́скопа процвѣта́лъ ми́ръ. Дабы̀ не ѡ҆ста́лось нѣ́кіихъ слѣдѡ́въ разномы́слія ѡ҆ слꙋжи́теляхъ цр҃кви, бла́го бы́ти мни́тся, и҆ поста́вленныхъ мꙋсе́емъ и҆ є҆ѵтѷхіа́номъ, поели́кꙋ въ ѻ҆́ныхъ никакі́я вины̀ не ѡ҆брѣта́лось, всѣ́хъ пріима́ти.

Ѻ҆сі́й є҆пі́скопъ ре́къ: моея̀ мѣ́рности мнѣ́ніе таково̀: с. рп҃д поели́кꙋ долженствꙋ́емъ бы́ти миролюби́вы и҆ терпѣли́вы, и҆ дово́льное ко всѣ́мъ и҆мѣ́ти милосе́рдіе: то произведе́нныхъ ѻ҆дна́жды въ при́чтъ церко́вный нѣ́которыми бра́тіями на́шими, тогда̀ то́кмѡ не пріима́ти, когда̀ не восхотя́тъ возврати́тися къ це́рквамъ, къ кото́рымъ наречены̀ бы́ли. Є҆ѵтѷхіа́нъ же да не присвоя́етъ себѣ̀ нижѐ и҆́мени є҆пі́скопа: нижѐ мꙋсе́й да не почита́ется є҆пі́скопомъ. А҆́ще же ѻ҆бще́нія въ чи́нѣ міря́нъ проси́ти бꙋ́дꙋтъ: въ се́мъ не до́лжно и҆̀мъ ̾ѿка́зывати. Реклѝ всѣ̀: согла́сны.

ПРА́ВИЛО ѳ҃і.

Гаѵде́нтій є҆пі́скопъ ре́къ: сі́и спаси́тельныя и҆ благоразсꙋ́дныя постановлє́нія, и҆ на́шемꙋ свяще́нническомꙋ досто́инствꙋ прили̑чныя, и҆ ѹ҆гѡ́дныя бг҃ꙋ и҆ человѣ́камъ, не возмо́гꙋтъ ѹ҆держа́ти си́лы и҆ крѣ́пости своея̀, а҆́ще произнесє́нныя рѣшє́нія не бꙋ́дꙋтъ сопровождены̀ стра́хомъ. И҆́бо мы̀ и҆ са́ми зна́емъ, что̀ нерѣ́дкѡ по причи́нѣ безсты́дства немно́гихъ, бж҃е́ственное и҆ досточти́мое и҆́мя свяще́нства подверга́лось пренебреже́нію. И҆ та́къ, а҆́ще кто̀, въ проти́вность при́знанномꙋ всѣ́ми, де́рзнетъ что́ либо и҆но́е твори́ти, стара́ясь ѹ҆гожда́ти го́рдости и҆ тщесла́вію па́че, не́жели бг҃ꙋ: то́тъ да зна́етъ ѹ҆жѐ, что̀ ѻ҆́нъ поставля́етъ себя̀ пови́ннымъ сꙋде́бномꙋ ̾ѿвѣ́тꙋ, и҆ теря́етъ че́сть и҆ досто́инство є҆пі́скопа. Всѣ̀ ̾ѿвѣща́ли: сіѐ мнѣ́ніе прили́чно, и҆ на́мъ ѹ҆го́дно.

ПРА́ВИЛО к҃.

Сіе́ же наипа́че до́знано и҆ и҆спо́лнено бꙋ́детъ таковы́мъ ѻ҆́бразомъ: є҆́стьли ка́ждый и҆з̾ на́съ, поста́вленныхъ є҆пі́скопами на припꙋ́тіяхъ, и҆лѝ на пꙋтя́хъ во́дныхъ, ѹ҆ви́дѣвъ є҆пі́скопа, вопроша́ти бꙋ́детъ ѡ҆ причи́нѣ мимоше́ствія, и҆ с. рп҃є кꙋда̀ направля́етъ ѻ҆́нъ пꙋ́ть. И҆ а҆́ще ѹ҆вѣ́даетъ, что̀ ѻ҆́нъ ше́ствꙋетъ въ во́инскій ста́нъ: то да вопро́ситъ по разря́дамъ вы́ше постано́влєннымъ[2]. И҆ а҆́ще и҆́детъ бꙋ́дꙋчи зва́нъ: то и҆дꙋ́щемꙋ є҆мꙋ̀ никако́гѡ препя́тствія да не бꙋ́детъ. А҆́ще же, по тщесла́вію, ка́къ пре́жде рече́но любвѝ ва́шей, и҆лѝ по про́сьбамъ нѣ́которыхъ, поспѣша́етъ въ во́инскій ста́нъ: то ни на гра́матахъ є҆гѡ̀ да подпи́шетъ, нижѐ да соѡбща́ется съ таковы́мъ. Всѣ̀ ̾ѿвѣ́тствовали: да бꙋ́детъ ѡ҆предѣлено̀ и҆ сіѐ.