ПРА̑ВИЛА СВЯТА́ГѠ ВСЕЛЕ́НСКАГѠ СЕДМА́ГѠ СОБО́РА, НІКЕ́ЙСКАГѠ.

ПРА́ВИЛО а҃.

Прія́вшымъ свяще́нническое досто́инство, свидѣ́тельствами и҆ рꙋково́дствомъ слꙋ́жатъ наче́ртанныя пра̑вила и҆ постановлє́нія, котѡ́рыя ѻ҆хо́тнѡ пріе́мля, воспѣва́емъ съ бг҃оглаго́ливымъ даві́домъ, ко гд҃ⷭ҇ꙋ бг҃ꙋ глаго́люще: на пꙋтѝ свидѣ́ній твои́хъ наслади́хся, ꙗ҆́кѡ ѡ҆ вся́комъ бога́тствѣ[1]. Та́кожде: заповѣ́далъ є҆сѝ пра́вдꙋ, свидѣ̑нія твоя̀ во вѣ́къ: вразꙋми́ мя, и҆ жи́въ бꙋ́дꙋ[2]. И҆ а҆́ще проро́ческій гла́съ повелѣва́етъ на́мъ во вѣ́къ храни́ти свидѣ̑нія бж҃ія, и҆ жи́ти въ ни́хъ: то ꙗ҆́вно є҆́сть, ꙗ҆́кѡ пребыва́ютъ ѻ҆́ныя несокрꙋши́мы и҆ непоколе́блемы. И҆́бо и҆ бг҃ови́децъ мѡѷсе́й та́кѡ глаго́летъ: къ си́мъ не подоба́етъ приложи́ти, и҆ ̾ѿ си́хъ не подоба́етъ ̾ѿя́ти[3]. И҆ бж҃е́ственный а҆по́столъ пе́тръ, хваля́ся и҆́ми, вопіе́тъ: въ ня́же жела́ютъ а҆́гг҃ли прини́кнꙋти[4]. Та́кожде и҆ па́ѵелъ вѣща́етъ: а҆́ще мы̀, и҆лѝ а҆́гг҃лъ съ нес. р҃кбесѐ благовѣсти́тъ ва́мъ па́че, є҆́же благовѣсти́хомъ ва́мъ, а҆на́ѳема да бꙋ́детъ[5]. Поне́же сіѐ вѣ́рно, и҆ засвидѣ́тельствовано на́мъ: то, ра́дꙋяся ѡ҆ се́мъ, подо́бнѡ ка́къ ѡ҆брѣ́лъ бы кто̀ коры́сть мно́гꙋ, бж҃е́ственныя пра̑вила со ѹ҆слажде́ніемъ пріе́млемъ, и҆ всецѣ́лое и҆ непоколе́блемое соде́ржимъ постановле́ніе си́хъ пра̑вилъ, и҆зложе́нныхъ ̾ѿ всехва́льныхъ а҆по́стѡлъ, святы́хъ трꙋ́бъ дх҃а, и҆ ̾ѿ шестѝ святы́хъ вселе́нскихъ собо́рѡвъ, и҆ помѣ́стнѡ собира́вшихся для и҆зда́нія таковы́хъ за́повѣдей, и҆ ̾ѿ святы́хъ ѻ҆тє́цъ на́шихъ. И҆́бо всѣ̀ ѻ҆нѝ, ̾ѿ є҆ди́нагѡ и҆ тогѡ́ же дх҃а бы́въ просвѣщены̀, поле́зное ѹ҆зако́нили. И҆ кого̀ ѻ҆нѝ предаю́тъ а҆на́ѳемѣ, тѣ́хъ и҆ мы̀ а҆наѳема́тствꙋемъ: а҆ кого̀ и҆зверже́нію, тѣ́хъ и҆ мы̀ и҆зверга́емъ, и҆ кого̀ ̾ѿлꙋче́нію, тѣ́хъ и҆ мы̀ ̾ѿлꙋча́емъ: кого́ же подверга́ютъ є҆пітіміѝ, тѣ́хъ и҆ мы̀ та́кожде подверга́емъ. И҆́бо восше́дшій до тре́тіягѡ не́ба, и҆ слы́шавшій неизрече́нные глаго́лы, бж҃е́ственный а҆по́столъ па́ѵелъ ꙗ҆́снѡ вопіе́тъ: не сребролю́бцы нра́вомъ, дово́льни сꙋ́щими[6].

ПРА́ВИЛО в҃.

Поели́кꙋ мы̀ въ ѱалмопѣ́ніи ѡ҆бѣща́емъ бг҃ꙋ: во ѡ҆правда́ніихъ твои́хъ поꙋчꙋ́ся, не забꙋ́дꙋ слове́съ твои́хъ[7]: то и҆ всѣ́мъ хрістіа́намъ сіѐ сохраня́ти є҆́сть спаси́тельно, наипа́че же пріе́млющымъ свяще́нническое досто́инство. Сегѡ̀ ра́ди ѡ҆предѣля́емъ: вся́комꙋ и҆мѣ́ющемꙋ возведе́нꙋ бы́ти на є҆пі́скопскій сте́пень, непремѣ́ннѡ зна́ти ѱалти́рь, да та́кѡ и҆ ве́сь сво́й кли́ръ вразꙋмля́етъ поꙋча́тися и҆з̾ ѻ҆́ныя. Та́кожде тща́тельнѡ и҆спы́товати є҆го̀ митрополі́тꙋ, и҆мѣ́етъ ли ѹ҆се́рдіе съ размышле́ніемъ, а҆ не мимохо́домъ, чита́ти с. рк҃а свящє́нныя пра̑вила, и҆ свято́е є҆ѵа́нгеліе, и҆ кни́гꙋ бж҃е́ственнагѡ а҆по́стола, и҆ всѐ бж҃е́ственное писа́ніе, и҆ постꙋпа́ти по за́повѣдямъ бж҃іимъ, и҆ ѹ҆чи́ти порꙋче́нный є҆мꙋ̀ наро́дъ. И҆́бо сꙋ́щность і҆ера́рхіи на́шея составля́ютъ бг҃опре́данныя словеса̀, то́ є҆сть, и҆́стинное вѣ́дѣніе бж҃е́ственныхъ писа́ній, ꙗ҆́коже и҆зре́къ вели́кій діонѵ́сій. А҆́ще же коле́блется, и҆ не ѹ҆се́рдствꙋетъ та́кѡ твори́ти и҆ ѹ҆чи́ти: да не рꙋкополага́ется. И҆́бо проро́чественнѡ ре́къ бг҃ъ: ты̀ ѹ҆мѣ́ніе ̾ѿве́рглъ є҆сѝ, ̾ѿве́ргꙋ и҆ а҆́зъ тебѐ, да не жре́чествꙋеши мнѣ̀[8].

ПРА́ВИЛО г҃.

Вся́кое и҆збра́ніе во є҆пі́скопа, и҆лѝ пресвѵ́тера, и҆лѝ діа́кона, дѣ́лаемое мірски́ми нача́льниками, да бꙋ́детъ не дѣйстви́тельно по пра́вилꙋ[9], кото́рое глаго́летъ: а҆́ще кото́рый є҆пі́скопъ, мірски́хъ нача́льникѡвъ ѹ҆потреби́въ, чрез̾ ни́хъ полꙋ́читъ є҆пі́скопскꙋю въ це́ркви вла́сть, да бꙋ́детъ и҆зве́рженъ, и҆ ̾ѿлꙋче́нъ, и҆ всѣ̀ соѡбща́ющіеся съ ни́мъ. И҆́бо и҆мѣ́ющій произвести́ся во є҆пі́скопа, до́лженъ и҆збира́емъ бы́ти ̾ѿ є҆пі́скопѡвъ, ꙗ҆́коже святы́хъ ѻ҆тє́цъ въ ніке́и ѡ҆предѣлено̀ въ пра́вилѣ[10], кото́рое глаго́летъ: є҆пі́скопа поставля́ти наибо́лѣе прили́чно всѣ́мъ тоя̀ ѻ҆́бласти є҆пі́скопамъ: а҆́ще же сіѐ не ѹ҆до́бно, и҆лѝ по належа́щей нꙋ́ждѣ, и҆лѝ по да́льности пꙋтѝ: то по кра́йней мѣ́рѣ трѝ вкꙋ́пѣ да соберꙋ́тся, а҆ ̾ѿсꙋ́тствꙋющіе да пріи́мꙋтъ ѹ҆ча́стіе въ и҆збра́ніи, и҆ и҆з̾я́вятъ согла́сіе посре́дствомъ гра́матъ, и҆ тогда̀ твори́ти поставле́ніе. Ѹ҆твержда́ти же таковы́я дѣ́йствія въ ка́ждой ѻ҆́бласти подоба́етъ є҆я̀ митрополі́тꙋ.

ПРА́ВИЛО д҃.

Проповѣ́дникъ и҆́стины, бж҃е́ственный а҆по́столъ вес. рк҃вли́кій па́ѵелъ, ꙗ҆́кѡ нѣ́кое пра́вило полага́я є҆фе́сскимъ пресвѵ́терамъ, па́че же и҆ всемꙋ̀ свяще́нническомꙋ сосло́вію, со дерзнове́ніемъ ре́къ та́кѡ: сребра̀, и҆лѝ зла́та, и҆лѝ ри́зъ ни є҆ди́нагѡ возжела́хъ: вся̑ сказа́хъ ва́мъ, ꙗ҆́кѡ та́кѡ трꙋжда́ющымся подоба́етъ застꙋпа́ти немощны̑я, и҆ помышля́ти, ꙗ҆́кѡ блаже́ннѣе є҆́сть па́че дая́ти, не́жели пріима́ти[11]. Сегѡ̀ ра́ди и҆ мы̀, ̾ѿ негѡ̀ наꙋча́ся, ѡ҆предѣля́емъ: да ̾ѿню́дь не ѹ҆мышля́етъ є҆пі́скопъ, и҆з̾ ни́зкія коры́сти, ѹ҆потребля́я въ предло́гъ мни́мые грѣхѝ, тре́бовати зла́та, и҆лѝ сребра̀, и҆лѝ и҆на́гѡ чегѡ̀ ̾ѿ подчине́нныхъ є҆мꙋ̀ є҆пі́скопѡвъ, и҆лѝ кли́рікѡвъ, и҆лѝ мона́хѡвъ. И҆́бо а҆по́столъ говори́тъ: непра́ведницы ца́рствія бж҃ія не наслѣ́дятъ[12]. И҆ є҆щѐ: недо́лжна сꙋ́ть ча̑да роди́телямъ сниска́ти и҆мѣ́нія, но роди́тели ча́дамъ[13]. Сегѡ̀ ра́ди, а҆́ще ѹ҆смо́трено бꙋ́детъ, что̀ кто́ либо ра́ди и҆стяза́нія зла́та, и҆лѝ и҆на́гѡ чегѡ̀, и҆лѝ по нѣ́коей свое́й стра́сти, возбраня́етъ слꙋже́ніе, и҆ ̾ѿлꙋча́етъ кого́ либо и҆з̾ свои́хъ кли́рікѡвъ, и҆лѝ заключа́етъ честны́й хра́мъ, да не бꙋ́детъ въ не́мъ бж҃іей слꙋ́жбы: таковы́й, и҆ на безчꙋ́вственные предме́ты ѹ҆стремля́я своѐ неи́стовство, по и҆́стинѣ є҆́сть безчꙋ́вственъ: и҆ до́лженъ подве́рженъ бы́ти томꙋ̀, чемꙋ̀ подверга́лъ дрꙋга́го, и҆ ѡ҆брати́тся болѣ́знь є҆гѡ̀ на главꙋ̀ є҆гѡ̀[14], ꙗ҆́кѡ престꙋ́пника за́повѣди бж҃іей и҆ а҆по́стольскихъ постановле́ній. И҆́бо заповѣ́даетъ и҆ пе́тръ верхо́вный а҆по́столъ: паси́те є҆́же въ ва́съ ста́до бж҃іе, посѣща́юще не нꙋ́ждею, но во́лею, и҆ по бз҃ѣ: нижѐ непра́ведными прибы́тки, но ѹ҆се́рднѡ: ни ꙗ҆́кѡ ѡ҆блада́юще при́чтꙋ, но ѻ҆́брази быва́йте ста́дꙋ: и҆ ꙗ҆́вльшꙋся пастыренача́льс. рк҃гникꙋ, пріи́мете неꙋвяда́емый сла́вы вѣне́цъ[15].

ПРА́ВИЛО є҃.

Грѣ́хъ къ сме́рти є҆́сть, когда̀ нѣ́кіе, согрѣша́я, въ неисправле́ніи пребыва́ютъ. го́рше же сегѡ̀ то̀, когда̀ жестоковы́йнѡ возстаю́тъ на благоче́стіе и҆ и҆́стинꙋ, предпочита́я мамо́нꙋ послꙋша́нію пред̾ бг҃омъ, и҆ не держа́ся є҆гѡ̀ ѹ҆ста́вѡвъ и҆ пра̑вилъ. Въ таковы́хъ нѣ́тъ гд҃ⷭ҇а бг҃а, а҆́ще не смиря́тся, и҆ не и҆стрезвя́тся ̾ѿ своегѡ̀ грѣхопаде́нія. Подоба́етъ и҆́мъ па́че пристꙋпа́ти къ бг҃ꙋ, и҆ съ сокрꙋше́ннымъ се́рдцемъ проси́ти ѡ҆ставле́нія грѣха̀ сегѡ̀ и҆ проще́нія, а҆ не тщесла́витися дая́ніемъ непра́веднымъ. И҆́бо бли́зъ гд҃ⷭ҇ь сокрꙋшє́ннымъ се́рдцемъ[16]. Сегѡ̀ ра́ди а҆́ще кото́рые хва́лятся, ꙗ҆́кѡ дая́ніемъ зла́та поста́влены въ чи́нъ церко́вный, и҆ на сіѐ ѕло́е ѻ҆быкнове́ніе, ̾ѿчꙋжда́ющее ̾ѿ бг҃а и҆ ̾ѿ вся́кагѡ свяще́нства, полага́ютъ наде́ждꙋ, и҆ ̾ѿ тогѡ̀ безсты́днымъ лице́мъ, и҆ ̾ѿве́рстыми ѹ҆ста́ми, ѹ҆кори́тельными слова́ми безче́стятъ и҆́збранныхъ ̾ѿ свята́гѡ дх҃а за добродѣ́тельнꙋю жи́знь, и҆ без̾ дая́нія зла́та поста́вленныхъ: то постꙋпа́ющихъ таки́мъ ѻ҆́бразомъ во пе́рвыхъ низводи́ти на послѣ́днюю сте́пень и҆́хъ чи́на: а҆́ще же въ то́мъ закоснѣва́ти бꙋ́дꙋтъ, є҆пітіміе́ю и҆справля́ти. А҆́ще же кто̀ ѡ҆ка́жется сотвори́вшимъ сіѐ при рꙋкоположе́ніи: то да бꙋ́детъ постꙋ́плено по а҆по́стольскомꙋ пра́вилꙋ, кото́рое глаго́летъ[17]: а҆́ще кто̀ є҆пі́скопъ, и҆лѝ пресвѵ́теръ, и҆лѝ діа́конъ, де́ньгами полꙋ́читъ сіѐ досто́инство: да бꙋ́детъ и҆зве́рженъ и҆ ѻ҆́нъ, и҆ поста́вившій є҆го̀, и҆ да ̾ѿсѣче́тся совсѣ́мъ ̾ѿ ѻ҆бще́нія, ꙗ҆́кѡ сі́мѡнъ во́лхвъ мно́ю петро́мъ. Та́кожде и҆ по второ́мꙋ пра́с. рк҃двилꙋ, преподо́бныхъ ѻ҆тє́цъ на́шихъ въ халкидо́нѣ, кото́рое глаго́летъ: а҆́ще кото́рый є҆пі́скопъ за дє́ньги ѹ҆чини́тъ рꙋкоположе́ніе, и҆ непродае́мꙋю благода́ть, ѡ҆брати́тъ въ кꙋ́плю, и҆ за дє́ньги поста́витъ є҆пі́скопа, и҆лѝ хѡрепі́скопа, и҆лѝ пресвѵ́тера, и҆лѝ діа́кона, и҆лѝ кого́ либо и҆з̾ чи́слящихся въ при́чтѣ: и҆лѝ произведе́тъ за дє́ньги во і҆коно́ма и҆лѝ є҆кді́ка, и҆лѝ парамона́ріа, и҆лѝ воѻбщѐ въ какꙋ́ю либо церко́внꙋю до́лжность, ра́ди гнꙋ́снагѡ прибы́тка своегѡ̀: дерзнꙋ́вшій на сіѐ, бы́въ ѡ҆бличе́нъ, да подлежи́тъ лише́нію со́бственнагѡ сте́пени: а҆ поставля́емый ̾ѿню́дь да не по́льзꙋется кꙋ́пленнымъ поставле́ніемъ, и҆лѝ произво́дствомъ, но да бꙋ́детъ чꙋ́ждъ досто́инства, и҆лѝ до́лжности, котѡ́рыя полꙋчи́лъ за дє́ньги. А҆́ще же кто̀ ѡ҆ка́жется и҆ посре́дствовавшимъ во мздопрія́тіи толи́кѡ гнꙋ́сномъ и҆ беззако́нномъ: и҆ се́й, а҆́ще є҆́сть кли́рікъ, да бꙋ́детъ низве́рженъ со своегѡ̀ сте́пени: а҆́ще же міряни́нъ, и҆лѝ мона́хъ, да бꙋ́детъ ̾ѿлꙋче́нъ ̾ѿ ѻ҆бще́нія церко́внагѡ.

ПРА́ВИЛО ѕ҃.

Поели́кꙋ є҆́сть пра́вило, кото́рое глаго́летъ: два́жды въ годꙋ̀ въ ка́ждой ѻ҆́бласти подоба́етъ бы́ти каноні́ческимъ и҆зслѣ́дованіямъ, посре́дствомъ собра́нія є҆пі́скопѡвъ: а҆ преподо́бные ѻ҆тцы̀ шеста́гѡ собо́ра, во внима́ніе къ затрꙋдне́ніямъ собира́ющихся, и҆ къ недоста́ткамъ потре́бнагѡ для пꙋтеше́ствія, ѡ҆предѣли́ли, без̾ вся́кагѡ ѹ҆клоне́нія и҆ и҆звине́нія, є҆ди́ножды въ лѣ́то бы́ти собо́рꙋ, и҆ погрѣши́тельное и҆справля́ти: то и҆ мы̀ сіѐ пра́вило возѡбновля́емъ, и҆ а҆́ще ѡ҆бря́щется нѣ́кій нача́льникъ возбраня́ющій сіѐ, да бꙋ́детъ ѻ҆́нъ ̾ѿлꙋче́нъ. А҆́ще же кто̀ и҆з̾ митрополі́тѡвъ пренебреже́тъ и҆спо́лнити сіѐ, не по нꙋ́ждѣ и҆ наси́лію, и҆ не по како́й либо ѹ҆важи́тельной с. рк҃є причи́нѣ: таковы́й да подлежи́тъ є҆пітіміѝ, по пра́виламъ. Когда́ же бꙋ́детъ собо́ръ ѡ҆ предме́тахъ каноні́ческихъ и҆ є҆ѵа́нгельскихъ: тогда̀ собра́вшіеся є҆пі́скопы должны̀ прилѣжа́ти и҆ пещи́ся ѡ҆ сохране́ніи бж҃е́ственныхъ и҆ животворя́щихъ за́повѣдей бж҃іихъ. И҆́бо, внегда̀ сохрани́ти я҆̀, воздая́ніе мно́го[18]: и҆́бо за́повѣдь є҆́сть свѣти́льникъ, зако́нъ свѣ́тъ, а҆ ѡ҆бличе́ніе и҆ наказа́ніе пꙋ́ть жи́зни[19], и҆: за́повѣдь гд҃ⷭ҇ня свѣтла̀, просвѣща́ющая ѻ҆́чи[20]. Да не бꙋ́детъ же позволи́тельно митрополі́тꙋ и҆з̾ тогѡ̀, что̀ прино́ситъ съ собо́ю є҆пі́скопъ, тре́бовати и҆лѝ скота̀, и҆лѝ и҆ны́я ве́щи. А҆́ще же ѡ҆бличе́нъ бꙋ́детъ въ таково́мъ постꙋ́пкѣ: то возда́стъ четвери́цею.

ПРА́ВИЛО з҃.

Бж҃е́ственный а҆по́столъ па́ѵелъ и҆зре́къ: нѣ́кіихъ человѣ̑къ грѣсѝ пред̾явле́ни сꙋ́ть, нѣ́кимъ же и҆ послѣ́дствꙋютъ[21]. И҆́бо грѣха́мъ предваря́ющымъ и҆ дрꙋгі́е грѣхѝ послѣ́дꙋютъ. За нечести́вою є҆́ресію клеветникѡ́въ на хрістіа́нство, послѣ́довали и҆ и҆ны́я нечє́стія. И҆́бо ка́къ зра́къ честны́хъ і҆кѡ́нъ ̾ѿя́ли ѹ҆ це́ркви, та́къ ѡ҆ста́вили и҆ дрꙋгі́е нѣ́кіе ѻ҆бы́чаи, ко́и подоба́етъ возѡбнови́ти, и҆ та́кѡ содержа́ти, по пи́санномꙋ и҆ не пи́санномꙋ законоположе́нію. Сегѡ̀ ра́ди, а҆́ще кото́рые честны́е хра́мы ѡ҆священы̀ без̾ святы́хъ моще́й мꙋ́ченическихъ, ѡ҆предѣля́емъ: да бꙋ́детъ совершено̀ въ ни́хъ положе́ніе моще́й съ ѻ҆бы́чною моли́твою. А҆́ще же ̾ѿны́нѣ ѡ҆бря́щется нѣ́кій є҆пі́скопъ, ѡ҆свяща́ющій хра́мъ без̾ святы́хъ моще́й: да бꙋ́детъ и҆зве́рженъ, ꙗ҆́кѡ престꙋпи́вшій церкѡ́вныя преда̑нія.

ПРА́ВИЛО и҃.

Поели́кꙋ нѣ́которые и҆з̾ є҆вре́йскагѡ вѣроисповѣ́дас. рк҃ѕнія, блꙋжда́я, возмни́ли рꙋга́тися хр҃ⷭ҇тꙋ̀ бг҃ꙋ на́шемꙋ, притво́рнѡ дѣ́лаяся хрістіа́нами, вта́йнѣ же ̾ѿверга́яся є҆гѡ̀, и҆ скры́тнѡ сꙋббѡ́тствꙋя, и҆ про́чее і҆ꙋде́йское и҆сполня́я: то ѡ҆предѣля́емъ, си́хъ ни во ѡ҆бще́ніе, ни къ моли́твѣ, ни въ це́рковь не пріима́ти: но ꙗ҆́внѡ бы́ти и҆̀мъ, по и҆́хъ вѣроисповѣ́данію, є҆вре́ями: и҆ дѣте́й и҆́хъ не крести́ти, и҆ раба̀ и҆̀мъ не покꙋпа́ти, и҆лѝ не пріѡбрѣта́ти. А҆́ще же кто̀ и҆з̾ ни́хъ съ и҆́скреннею вѣ́рою ѡ҆брати́тся, и҆ и҆сповѣ́дꙋетъ ѻ҆́нꙋю ̾ѿ всегѡ̀ се́рдца, торже́ственнѡ ̾ѿверга́я є҆вре́йскіе и҆́хъ ѻ҆бы́чаи и҆ дѣла̀, дабы̀ чрез̾ то̀ и҆ дрꙋги́хъ ѡ҆бличи́ти и҆ и҆спра́вити: сего̀ принима́ти и҆ креща́ти дѣте́й є҆гѡ̀, и҆ ѹ҆твержда́ти и҆̀хъ въ ̾ѿверже́ніи є҆вре́йскихъ ѹ҆мышле́ній. А҆́ще же не таковы̀ бꙋ́дꙋтъ: ̾ѿню́дь не пріима́ти и҆́хъ.

ПРА́ВИЛО ѳ҃.

Всѣ̀ дѣ́тскія ба̑сни, и҆ неи́стѡвыя глꙋмлє́нія, и҆ лжи̑выя писа̑нія, сочиня́ємыя проти́въ честны́хъ і҆кѡ́нъ, до́лжно ̾ѿдава́ти въ є҆піско́пію кѡнстантінопо́льскꙋю, дабы̀ положены̀ бы́ли съ про́чими є҆реті́ческими кни́гами. А҆́ще же ѡ҆бря́щется кто̀ таковы̑я сокрыва́ющій: то є҆пі́скопъ, и҆лѝ пресвѵ́теръ, и҆лѝ діа́конъ, да бꙋ́детъ и҆зве́рженъ и҆з̾ своегѡ̀ чи́на, а҆ міряни́нъ, и҆лѝ мона́хъ, да бꙋ́детъ ̾ѿлꙋче́нъ ̾ѿ ѡ҆бще́нія церко́внагѡ.

ПРА́ВИЛО і҃.

Поели́кꙋ нѣ́которые и҆з̾ кли́ра, ѹ҆клоня́яся ̾ѿ си́лы сꙋществꙋ́ющагѡ въ пра́вилахъ постановле́нія, ѡ҆ста́вивъ сво́й прихо́дъ, ̾ѿбѣга́ютъ во и҆ны́е прихо́ды, наипа́че же въ се́мъ бг҃оспаса́емомъ и҆ ца́рствꙋющемъ гра́дѣ, и҆ ѹ҆ мірски́хъ нача́льникѡвъ водворя́ются, ̾ѿправля́я бг҃ослꙋже́ніе въ и҆́хъ моли́твенницахъ: то си́хъ, без̾ во́ли своегѡ̀ и҆ кѡнстантінопо́льскагѡ є҆пі́скопа, не позволя́ется пріима́ти, въ с. рк҃з како́мъ бы то̀ ни бы́ло до́мѣ, и҆лѝ це́ркви. А҆́ще же кто̀ сіѐ сотвори́тъ, и҆ въ то́мъ ѹ҆по́ренъ бꙋ́детъ: да бꙋ́детъ и҆зве́рженъ А҆ тѣ̑мъ, кото́рые съ согла́сія вышерече́нныхъ священнонача́льникѡвъ сіѐ творя́тъ, не надлежи́тъ пріима́ти на себя̀ мірски́хъ и҆ жите́йскихъ попече́ній, ꙗ҆́коже бж҃е́ственными пра́вилами возбранено̀ сіѐ твори́ти. А҆́ще же кто̀ ѡ҆бря́щется, занима́ющій мірскꙋ́ю до́лжность ѹ҆ глаго́лемыхъ вельмо́жъ: и҆лѝ да ѡ҆ста́витъ ѻ҆́нꙋю, и҆лѝ да бꙋ́детъ и҆зве́рженъ. Лꙋ́чше же да и҆́детъ ѹ҆чи́ти ѻ҆трокѡ́въ и҆ домоча́дцєвъ, чита́я и҆̀мъ бж҃е́ственное писа́ніе: и҆́бо для сегѡ̀ и҆ свяще́нство полꙋчи́лъ.

ПРА́ВИЛО а҃і.

Бꙋ́дꙋчи ѡ҆бя́заны храни́ти всѣ̀ бж҃е́ствєнныя пра̑вила, мы̀ должны̀ та́кожде ѡ҆храня́ти всеконе́чнѡ неизмѣ́ннымъ и҆ то̀, кото́рое повелѣва́етъ бы́ти і҆коно́мꙋ въ ка́ждой це́ркви. И҆ а҆́ще ка́ждый митрополі́тъ, во свое́й це́ркви поставля́етъ і҆коно́ма, бла́го є҆́сть: а҆́ще же не поста́витъ, предоставля́ется кѡнстантінопо́льскомꙋ є҆пі́скопꙋ, со́бственною вла́стію ѡ҆предѣли́ти і҆коно́ма въ то́й це́ркви. То́ же предоставля́ется и҆ митрополі́тамъ, а҆́ще подчине́нные и҆̀мъ є҆пі́скопы не восхотя́тъ і҆коно́мѡвъ поста́вити въ це́рквахъ свои́хъ. То́ же са́мое наблюда́ти и҆ по монастыря́мъ.

ПРА́ВИЛО в҃і.

А҆́ще кто̀, є҆пі́скопъ, и҆лѝ и҆гꙋ́менъ, ѡ҆ка́жется что́ либо и҆з̾ ѹ҆го́дій, принадлежа́щихъ є҆піско́піи, и҆лѝ монастырю̀, прода́вшимъ въ рꙋ́ки власте́й, и҆лѝ ̾ѿда́вшимъ и҆но́мꙋ лицꙋ̀: не тве́рдо да бꙋ́детъ ѻ҆́ное ̾ѿдая́ніе, по пра́вилꙋ ст҃ы́хъ а҆по́стѡлъ, глаго́лющемꙋ: є҆пі́скопъ да и҆мѣ́етъ попече́ніе ѡ҆ всѣ́хъ церко́вныхъ веща́хъ, и҆ ѻ҆́ными да распоряжа́етъ, ꙗ҆́кѡ бг҃ꙋ назира́ющꙋ: но не позволи́тельно є҆мꙋ̀ присвоя́ти что́ либо и҆з̾ ѻ҆́ныхъ, и҆лѝ с. рк҃и сро́дникамъ свои́мъ дари́ти принадлежа́щее бг҃ꙋ: а҆́ще же сꙋ́ть неимꙋ́щіе, да подае́тъ и҆̀мъ ꙗ҆́кѡ неимꙋ́щымъ, но, под̾ си́мъ предло́гомъ, да не продае́тъ принадлежа́щагѡ цр҃кви[22]. А҆́ще поставля́ютъ въ предло́гъ, что̀ земля̀ причиня́етъ ѹ҆бы́токъ, и҆ никако́й по́льзы не доставля́етъ: то и҆ въ се́мъ слꙋ́чаѣ не ̾ѿдава́ти по́ля мѣ́стнымъ нача́льникамъ, но кли́рікамъ и҆лѝ земледѣ́льцамъ. А҆́ще же ѹ҆потребя́тъ лꙋка́вый ѡ҆боро́тъ, и҆ властели́нъ перекꙋ́питъ зе́млю ѹ҆ кли́ріка, и҆лѝ земледѣ́льца: то и҆ въ се́мъ слꙋ́чаѣ прода́жа да бꙋ́детъ недѣйстви́тельна, и҆ про́данное да бꙋ́детъ возвращено̀ є҆піско́піи, и҆лѝ монастырю̀: а҆ є҆пі́скопъ, и҆лѝ и҆гꙋ́менъ, та́кѡ постꙋпа́ющій, да бꙋ́детъ и҆згна́нъ: є҆пі́скопъ и҆з̾ є҆піско́піи, и҆гꙋ́менъ же и҆з̾ монастыря̀, ꙗ҆́кѡ ѕлѣ̀ расточа́ющіе то̀, чегѡ̀ не собра́ли.

ПРА́ВИЛО г҃і.

При слꙋчи́вшемся, по грѣха́мъ на́шымъ, бѣ́дствіи въ цр҃квахъ, нѣ́которые святы́е хра́мы є҆піско́піи и҆ монастырѝ нѣ́кіими людьмѝ расхи́щены, и҆ содѣ́лалися ѻ҆быкнове́нными жили́щами. А҆́ще завладѣ́вшіе ѻ҆́ными восхотя́тъ ̾ѿда́ти и҆̀хъ, да бꙋ́дꙋтъ возстано́влены по пре́жнемꙋ, то добро̀ и҆ бла́го є҆́сть: а҆́ще же не та́кѡ: то, сꙋ́щихъ ̾ѿ свяще́нническагѡ чи́на, повелѣва́емъ и҆зверга́ти, а҆ мона́хѡвъ, и҆лѝ міря́нъ ̾ѿлꙋча́ти, ꙗ҆́кѡ ѡ҆сꙋжде́нныхъ ̾ѿ ѻ҆ц҃а̀, и҆ сн҃а, и҆ свята́гѡ дх҃а, и҆ да вчиня́тся, и҆дѣ́же че́рвь не ѹ҆мира́етъ, и҆ ѻ҆́гнь не ѹ҆гаса́етъ[23]. Поне́же ѻ҆нѝ гла́сꙋ гд҃ⷭ҇ню проти́вятся, глаго́лющемꙋ: нетвори́те до́мꙋ ѻ҆ц҃а̀ моегѡ̀ до́момъ кꙋ́пли[24].

ПРА́ВИЛО д҃і.

Всѣ̑мъ ꙗ҆́вно є҆́сть, ꙗ҆́кѡ поря́докъ не разлꙋче́нъ ̾ѿ свяще́нства, и҆ съ то́чностію с. рк҃ѳ храни́ти ̾ѿнося́щыяся къ свяще́нствꙋ произвѡ́дства, є҆́сть дѣ́ло бг҃ꙋ ѹ҆го́дное. И҆ поне́же ви́димъ, ꙗ҆́кѡ нѣ́кіе, без̾ рꙋковозложе́нія, въ дѣ́тствѣ приня́въ приче́тническое постриже́ніе, но є҆щѐ не полꙋчи́въ є҆пі́скопскагѡ рꙋкоположе́нія, въ церко́вномъ собра́ніи на а҆мвѡ́нѣ чита́ютъ, и҆ сіѐ дѣ́лаютъ несогла́снѡ съ пра́вилами: то повелѣва́емъ ̾ѿны́нѣ семꙋ̀ не бы́ти. Сіе́ же са́мое соблюда́ти и҆ въ разсꙋжде́ніи мона́хѡвъ. Рꙋкоположе́ніе же чтеца̀ твори́ти позволя́ется ка́ждомꙋ и҆гꙋ́менꙋ въ свое́мъ, и҆ то́кмѡ въ свое́мъ монастырѣ̀, а҆́ще са́мъ и҆гꙋ́менъ полꙋчи́лъ рꙋкоположе́ніе ̾ѿ є҆пі́скопа въ нача́льство и҆гꙋ́менское, без̾ сомнѣ́нія ѹ҆жѐ бꙋ́дꙋчи пресвѵ́теромъ. Подо́бнѡ и҆ хорепі́скопы, по дре́внемꙋ ѻ҆бы́чаю, съ позволе́нія є҆пі́скопа, должны̀ производи́ти чтецѡ́въ.

ПРА́ВИЛО є҃і.

Ѿны́нѣ кли́рікъ да не ѡ҆предѣля́ется къ двꙋ́мъ це́рквамъ: и҆́бо сіѐ сво́йственно торго́влѣ и҆ ни́зкомꙋ своекоры́стію, и҆ чꙋ́ждо церко́внагѡ ѻ҆бы́чая. И҆́бо мы̀ слы́шали ̾ѿ самагѡ̀ гла́са гд҃ⷭ҇ня, ꙗ҆́кѡ не мо́жетъ кто́ либо двѣма̀ господи́нома рабо́тати: ли́бо є҆ди́наго возненави́дитъ, а҆ дрꙋга́го возлю́битъ, и҆лѝ є҆ди́наго держи́тся, ѡ҆ дрꙋго́мъ же вознеради́тъ[25]. Тогѡ̀ ра́ди вся́къ, по а҆по́стольскомꙋ сло́вꙋ, въ не́мже при́званъ є҆́сть, въ то́мъ до́лженъ пребыва́ти[26], и҆ ѡ҆брѣта́тися при є҆ди́ной це́ркви. И҆́бо что̀ для ни́зкія коры́сти въ церко́вныхъ дѣла́хъ быва́етъ, то̀ стано́вится чꙋ́ждымъ бг҃а. Для потре́бностей же сея̀ жи́зни, є҆́сть разли́чныя заня̑тія: и҆ си́ми, а҆́ще кто̀ пожела́етъ, да пріѡбрѣта́етъ потре́бное для тѣ́ла. И҆́бо а҆по́столъ ре́къ: тре́бованію моемꙋ̀, и҆ сꙋ́щымъ съ мно́ю, послꙋжи́стѣ рꙋ́цѣ моѝ сіѝ[27]. И҆ сіѐ наблюда́ти с. р҃л въ се́мъ бг҃оспаса́емомъ гра́дѣ: а҆ въ про́чихъ мѣста́хъ, по недоста́ткꙋ въ лю́дяхъ, допꙋсти́ти и҆з̾я́тіе.

ПРА́ВИЛО ѕ҃і.

Вся́кая ро́скошь и҆ ѹ҆краше́ніе тѣ́ла чꙋ́жды свяще́нническагѡ чи́на и҆ состоя́нія. Сегѡ̀ ра́ди є҆пі́скопы, и҆лѝ кли́ріки, ѹ҆краша́ющіе себя̀ свѣ́тлыми и҆ пы́шными ѻ҆де́ждами, да и҆справля́ются. А҆́ще же въ то́мъ пребꙋ́дꙋтъ, подверга́ти и҆̀хъ є҆пітіміѝ: та́кожде и҆ ѹ҆потребля́ющихъ благовѡ́нныя ма́сти. Поели́кꙋ же ко́рень го́рести, вы́спрь прозяба́яй[28], є҆́ресь хрістіанохꙋ́льникѡвъ, содѣ́лалась нечи́стымъ пятно́мъ для каѳолі́ческія це́ркви, и҆ прія́вшіе ѻ҆́нꙋю не то́кмѡ і҆кѡ́нными и҆зѡбраже́ніями возгнꙋша́лися, но и҆ вся́кое благоговѣ́ніе ̾ѿве́ргли, ненави́дя люде́й че́стнѡ и҆ благоговѣ́йнѡ живꙋ́щихъ, и҆ и҆спо́лнилось въ ни́хъ напи́санное: ме́рзость грѣ́шникѡмъ благоче́стіе[29]: то а҆́ще ѡ҆бря́щꙋтся нѣ́кіе, посмѣва́ющіеся нося́щымъ просто́е и҆ скро́мное ѡ҆дѣя́ніе, є҆пітіміе́ю да и҆справля́ются. Поне́же, ̾ѿ дре́внихъ време́нъ, вся́кій свяще́нный мꙋ́жъ дово́льствовался нероско́шнымъ и҆ скро́мнымъ ѡ҆дѣя́ніемъ: и҆́бо всѐ, что̀ не для потре́бности, но для ѹ҆бра́нства пріе́млется подлежи́тъ ѡ҆бвине́нію въ сꙋ́етности, ꙗ҆́коже глаго́летъ васі́лій вели́кій. Но и҆ разноцвѣ́тныя и҆з̾ ше́лковыхъ тка́ней ѻ҆дє́жды не бы́ли носи́мы, и҆ на края̀ ѻ҆де́ждъ не налага́лися воскри̑лія и҆на́гѡ цвѣ́та: и҆́бо слы́шали ̾ѿ бг҃огла́снагѡ я҆зы́ка, ꙗ҆́кѡ въ мя́гкія ѻ҆дє́жды ѡ҆дѣва́ющіеся въ домѣ́хъ ца́рскихъ сꙋ́ть[30].

ПРА́ВИЛО з҃і.

Нѣ́которые и҆з̾ мона́хѡвъ, жела́я нача́льствовати, а҆ послꙋша́нія с. рл҃а ̾ѿмета́яся, ѡ҆ста́вивъ своѝ монастырѝ, предпріе́млютъ созида́ти моли́твенные до́мы, не и҆мѣ́я потре́бнагѡ къ соверше́нію ѻ҆́ныхъ. А҆́ще ѹ҆̀бо кто̀ дерзне́тъ сіѐ твори́ти, да бꙋ́детъ є҆мꙋ̀ возбранено̀ ̾ѿ мѣ́стнагѡ є҆пі́скопа. А҆́ще же и҆мѣ́етъ потре́бное къ доверше́нію: то преднамѣ́ренное и҆́мъ да приведе́тся къ концꙋ̀. Сіе́ же са́мое соблюда́ти и҆ для міря́нъ и҆ для кли́рікѡвъ.

ПРА́ВИЛО и҃і.

Безпреткнове́ни быва́йте и҆ внѣ̑шнимъ, глаго́летъ бж҃е́ственный а҆по́столъ[31]. Но пребыва́ніе же́нъ въ є҆піско́піяхъ и҆лѝ въ монастыря́хъ, є҆́сть вина̀ вся́кагѡ собла́зна. Сегѡ̀ ра́ди, а҆́ще ѹ҆смо́трено бꙋ́детъ, что̀ кто́ либо и҆мѣ́етъ рабꙋ̀, и҆лѝ свобо́днꙋю въ є҆піско́піи, и҆лѝ въ монастырѣ̀, порꙋча́я є҆́й како́е либо слꙋже́ніе, да подлежи́тъ таковы́й є҆пітіміѝ: закоснѣва́ющій же въ то́мъ, да бꙋ́детъ и҆зве́рженъ. А҆́ще и҆ слꙋчи́тся жена́мъ бы́ти въ за́городныхъ дома́хъ, и҆ восхо́щетъ є҆пі́скопъ, и҆лѝ и҆гꙋ́менъ пꙋ́ть твори́ти та́мѡ: то въ присꙋ́тствіи є҆пі́скопа и҆лѝ и҆гꙋ́мена, ̾ѿню́дь никако́гѡ слꙋже́нія да не и҆справля́етъ въ то вре́мя жена̀: но да пребꙋ́детъ ѻ҆со́бѡ на и҆но́мъ мѣ́стѣ, доко́лѣ послѣ́дꙋетъ ̾ѿше́ствіе є҆пі́скопа, и҆лѝ и҆гꙋ́мена, да не бꙋ́детъ нарека́нія.

ПРА́ВИЛО ѳ҃і.

Ме́рзость сребролю́бія толи́кѡ возѡблада́ла води́телями церкве́й, ꙗ҆́кѡ нѣ́кіе и҆з̾ глаго́лемыхъ благоговѣ́йныхъ мꙋже́й и҆ же́нъ, забы́въ гд҃ⷭ҇ни за́повѣди, заблꙋди́лися, и҆ въ свяще́нный чи́нъ, и҆ въ мона́шеское житіѐ встꙋпа́ющихъ пріе́млютъ за зла́то. И҆ быва́етъ, ꙗ҆́коже глаго́летъ вели́кій васі́лій, непотре́бно всѐ, чегѡ̀ нача́ло нечи́сто: поне́же бг҃ꙋ и҆ мамѡ́нѣ слꙋжи́ти не подоба́етъ. Сегѡ̀ с. рл҃в ра́ди, а҆́ще ѹ҆смо́тренъ бꙋ́детъ кто́ либо сіѐ творя́щій: то є҆пі́скопъ, и҆лѝ и҆гꙋ́менъ, и҆лѝ кто́ либо и҆з̾ свяще́нническагѡ чи́на, и҆лѝ да преста́нетъ, и҆лѝ да бꙋ́детъ и҆зве́рженъ, по второ́мꙋ пра́вилꙋ халкидо́нскагѡ свята́гѡ собо́ра: а҆ и҆гꙋ́меніа да и҆зго́нится и҆з̾ монастыря̀, и҆ да преда́стся во и҆ны́й монасты́рь въ послꙋша́ніе: ра́внѡ ка́къ и҆ и҆гꙋ́менъ, не и҆мѣ́ющій пресвѵ́терскагѡ рꙋкоположе́нія. А҆ ѡ҆ то́мъ, что̀ даю́тъ роди́тели дѣ́тямъ, по подо́бію вѣ́на, и҆ ѡ҆ веща́хъ приноси́мыхъ и҆з̾ со́бственности, съ ѡ҆б̾явле́ніемъ ̾ѿ принося́щагѡ, ꙗ҆́кѡ посвяща́ются бг҃ꙋ, мы̀ ѡ҆предѣли́ли, да пребꙋ́дꙋтъ по ѡ҆бѣща́нію и҆́хъ, пребꙋ́детъ ли прине́сшій въ монастырѣ̀, и҆лѝ и҆зы́детъ, а҆́ще не бꙋ́детъ семꙋ̀ вины̀ въ настоя́телѣ.

ПРА́ВИЛО к҃.

Ѡ҆предѣля́емъ не бы́ти ̾ѿны́нѣ монастыря́мъ двойны́мъ, потомꙋ̀ что̀ сіѐ быва́етъ собла́зномъ и҆ преткнове́ніемъ для мно́гихъ. А҆́ще же восхотя́тъ нѣ́кіе со сро́дниками ̾ѿрещи́ся ̾ѿ мі́ра, и҆ мона́шескомꙋ житію̀ послѣ́довати, то мꙋжа́мъ ̾ѿходи́ти въ мꙋ́жескій монасты́рь, а҆ жена́мъ входи́ти въ же́нскій монасты́рь: и҆́бо си́мъ благоꙋгожда́ется бг҃ъ. А҆ ѡ҆брѣта́ющіеся доны́нѣ двойны́е монастырѝ, да бꙋ́дꙋтъ ѹ҆правля́емы по пра́вилꙋ свята́гѡ ѻ҆тца̀ на́шегѡ васі́ліа, и҆ по за́повѣди є҆гѡ̀, законополага́ющей та́кѡ: да не живꙋ́тъ во є҆ди́номъ монастырѣ̀ мона́хи и҆ мона́хини: потомꙋ̀ что̀ соводворе́ніе дае́тъ посре́дство къ прелюбодѣя́нію. Да не и҆мѣ́етъ дерзнове́нія мона́хъ съ мона́хинею, и҆лѝ мона́хиня съ мона́хомъ бесѣ́довати наединѣ̀. Да не спи́тъ мона́хъ въ же́нскомъ монастырѣ̀, и҆ да не ꙗ҆́стъ мона́хиня вмѣ́стѣ съ мона́хомъ наединѣ̀. И҆ когда̀ вє́щи потрє́бныя для жи́зни, со стороны̀ мꙋ́жеской прино́сятся къ с. рл҃г мона́хинямъ: за врата́ми ѻ҆́ныя да пріе́млетъ же́нскагѡ монастыря̀ и҆гꙋ́меніа съ нѣ́коею ста́рою мона́хинею. А҆́ще же слꙋчи́тся, что̀ мона́хъ пожела́етъ ви́дѣти нѣ́кꙋю ро́дственницꙋ: то въ присꙋ́тствіи и҆гꙋ́меніи съ не́ю да бесѣ́дꙋетъ, не мно́гими и҆ кра́ткими слова́ми, и҆ вско́рѣ ̾ѿ нея̀ да ̾ѿхо́дитъ.

ПРА́ВИЛО к҃а.

Не долженствꙋ́етъ мона́хъ, и҆лѝ мона́хиня ѡ҆ставля́ти сво́й монасты́рь, и҆ ̾ѿходи́ти во и҆ны́й. А҆́ще же слꙋчи́тся сіѐ, то страннопріи́мство ꙗ҆ви́ти є҆мꙋ̀ неѡбходи́мо, а҆ пріима́ти є҆го̀ без̾ во́ли и҆гꙋ́мена є҆гѡ̀ не подоба́етъ.

ПРА́ВИЛО к҃в.

Всѐ приноси́ти бг҃ꙋ, и҆ не порабоща́тися свои́ми жела́ніями, є҆́сть вели́кое дѣ́ло. И҆́бо а҆́ще ꙗ҆́сте, а҆́ще ли піе́те, глаго́летъ бж҃е́ственный а҆по́столъ, вся̑ въ сла́вꙋ бж҃ію твори́те[32]. И҆ хр҃ⷭ҇то́съ бг҃ъ на́шъ, въ свое́мъ є҆ѵа́нгеліи, повелѣ́лъ ̾ѿсѣка́ти нача̑ла грѣхѡ́въ. И҆́бо не то́кмѡ прелюбодѣя́ніе наказꙋ́ется ̾ѿ негѡ̀, но и҆ движе́ніе мы́сли къ покꙋше́нію на прелюбодѣя́ніе ѡ҆сꙋждено̀, по глаго́лꙋ є҆гѡ̀: воззрѣ́вый на женꙋ̀, ко є҆́же возделѣ́ти є҆я̀, ѹ҆жѐ любодѣ́йствова съ не́ю въ се́рдцѣ свое́мъ[33]. Ѿсю́дꙋ ѹ҆́бѡ наꙋча́ся, мы̀ должны̀ ѡ҆чища́ти по́мыслы. И҆́бо, а҆́ще и҆ вся̑ лѣ́ть сꙋ́ть, но не вся̑ на по́льзꙋ[34], ка́къ ѹ҆́читъ а҆по́стольское сло́во. Вся́комꙋ человѣ́кꙋ неѡбходи́мо ꙗ҆́сти, дабы̀ жи́ти, и҆ живꙋ́щымъ въ бра́кѣ и҆ съ дѣтьмѝ, въ мірско́мъ состоя́ніи, не предосꙋди́тельно ꙗ҆́сти мꙋжа́мъ и҆ же́намъ вмѣ́стѣ: то́кмѡ даю́щемꙋ пи́щꙋ да прино́сятъ благодаре́ніе: но ꙗ҆́сти не съ каки́ми либо позо́рищными вы́мыслами, и҆лѝ съ сатани́нскими пѣ́снями, и҆ съ пѣвни́цами и҆ блꙋдни́ческими гласова́ніями, на ко́и па́даетъ прос. рл҃дро́ческое ѹ҆коре́ніе, глаго́лющее та́кѡ: го́ре съ гꙋ́сльми и҆ пѣвни́цами віно̀ пію́щымъ, на дѣла́ же гд҃ⷭ҇ня не взира́ющымъ, и҆ ѡ҆ дѣла́хъ рꙋ́къ є҆гѡ̀ не помышля́ющымъ[35]. И҆ а҆́ще бꙋ́дꙋтъ гдѣ̀ таковы́е въ хрістіа́нахъ, да и҆справля́ются: а҆́ще же не и҆спра́вятся, да бꙋ́детъ въ ̾ѿноше́ніи къ ни́мъ соблюда́емо каноні́чески постано́вленное бы́вшими пре́жде на́съ. А҆ кото́рыхъ жи́знь є҆́сть ти́хая и҆ є҆диноѻбра́зная, ꙗ҆́кѡ да́вшихъ ѻ҆бѣ́тъ гд҃ⷭ҇ꙋ бг҃ꙋ взя́ти на себя̀ и҆́го мона́шества: тѣ̀ да ся́дꙋтъ наединѣ̀ и҆ ѹ҆мо́лкнꙋтъ[36]. Но и҆ свяще́нническое житіѐ и҆збра́вшымъ, не совсѣ́мъ позволи́тельно ꙗ҆́сти наединѣ̀ съ же́нами, а҆ ра́звѣ кꙋ́пнѡ съ нѣ́которыми бг҃обоя́зненными и҆ благоговѣ́йными мꙋжа́ми и҆ же́нами, дабы̀ и҆ сіѐ ѻ҆бще́ніе трапе́зы вело̀ къ назида́нію дꙋхо́вномꙋ. То́ же соблюда́ти до́лжно и҆ въ разсꙋжде́ніи сро́дникѡвъ. А҆́ще же слꙋчи́тся мона́хꙋ, и҆лѝ мꙋ́жꙋ свяще́ннагѡ чи́на въ пꙋтеше́ствіи не и҆мѣ́ти потре́бнагѡ, и҆ по нꙋ́ждѣ восхо́щетъ ѻ҆́нъ препочи́ти въ гости́нницѣ, и҆лѝ въ чье́мъ либо до́мѣ: разрѣша́ется таково́мꙋ сіѐ твори́ти, поели́кꙋ нꙋ́жда тре́бꙋетъ.

с. рл҃є