ДОГМА́ТЪ шестѝ сѡ́тъ три́десяти ст҃ы́хъ ѻ҆тє́цъ четве́ртагѡ вселе́нскагѡ собо́ра, халкидо́нскагѡ.

Ѡ҆ двꙋ́хъ є҆стества́хъ во є҆ди́номъ лицѣ̀ гд҃ⷭ҇а на́шегѡ і҆и҃са хр҃ⷭ҇та̀.

Послѣ́дꙋюще бж҃е́ствєннымъ ѻ҆тцє́мъ, всѣ̀ є҆диногла́снѡ поꙋча́емъ и҆сповѣ́дывати є҆ди́наго и҆ того́жде сн҃а, гд҃ⷭ҇а на́шего і҆и҃са хр҃ⷭ҇та̀, соверше́нна въ бж҃ествѣ̀ и҆ соверше́нна въ чл҃вѣ́чествѣ: и҆́стиннѡ бг҃а и҆ и҆́стиннѡ чл҃вѣ́ка, того́жде и҆з̾ дꙋшѝ и҆ тѣ́ла: є҆диносꙋ́щна ѻ҆ц҃ꙋ̀ по бж҃ествꙋ̀, и҆ є҆диносꙋ́щна того́жде на́мъ по чл҃вѣ́чествꙋ: по всемꙋ̀ на́мъ подо́бна, кромѣ̀ грѣха̀: рожде́нна пре́жде вѣ̑къ ̾ѿ ѻ҆ц҃а̀ по бж҃ествꙋ̀, въ послѣ́дніе же днѝ того́жде, ра́ди на́съ и҆ ра́ди на́шегѡ спасе́нія, ̾ѿ мр҃і́и дв҃ы бг҃оро́дицы, по чл҃вѣ́чествꙋ: є҆ди́наго и҆ того́жде хр҃ⷭ҇та̀, сн҃а, гд҃ⷭ҇а, є҆диноро́днаго, во двꙋ́хъ є҆стества́хъ несли́тнѡ, неизмѣ́ннѡ, нераздѣ́льнѡ, неразлꙋ́чнѡ познава́емаго, [ника́коже разли́чію двꙋ́хъ є҆сте́ствъ потребля́емꙋ соедине́ніемъ, па́че же сохраня́емꙋ сво́йствꙋ коегѡ́ждо є҆стества̀, во є҆ди́но лицѐ и҆ во є҆ди́нꙋ ѵ҆поста́сь совокꙋпля́емагѡ:] не на два̀ лица̀ разсѣка́емаго и҆лѝ раздѣля́емаго, но є҆ди́наго и҆ того́жде сн҃а, и҆ є҆диноро́днаго бг҃а сло́ва, гд҃ⷭ҇а і҆и҃са хр҃ⷭ҇та̀, ꙗ҆́коже дре́вле прⷪ҇ро́цы ѡ҆ не́мъ, и҆ ꙗ҆́коже са́мъ гд҃ⷭ҇ь і҆и҃съ хр҃ⷭ҇то́съ наꙋчѝ на́съ, и҆ ꙗ҆́коже предадѐ на́мъ сѷмво́лъ ѻ҆тє́цъ на́шихъ.

с. ѕ҃