Ѡ҆ тща́ніи своегѡ̀ спасе́нія

Є҆́же и҆ ка́кѡ ѡ҆ свое́мъ на́мъ подоба́етъ спасе́ніи пещи́ся, слы́шимъ ѹ҆вѣщава́ющій Петро́въ гла́съ:[1] смири́теся ѹ҆́бѡ поⷣ крѣ́пкꙋю рꙋ́кꙋ Бж҃ію, да вы̀ вознесет во вре́мя, всю̀ печа́ль ва́шꙋ возве́ргше на́нь, ꙗ҆́кѡ то́й пече́тся ѡ҆ ва́съ. Поⷣ крѣ́пкꙋю, гл҃етъ рꙋ́кꙋ Бж҃ію смири́теся, сі́есть, л. с҃з да не ꙗ҆̀же на́мъ, но ꙗ҆̀же сꙋ́ть ́є҆мꙋ̀ ѹ҆гѡ́дна, то́е сотворим. занѐ ско́ръ[2] грядет гнѣ́въ на сы́ны противле́нія, и҆ не ктомꙋ ѹ҆жѐ то́й попече́тся ѡ҆ наⷭ҇, а҆́ще мы̀ не смири́мся поⷣ рꙋ́кꙋ Гдⷭ҇ню. Да и҆скꙋша́емъ ѹ҆́бѡ непрестанно себѐ, ни лѝ ́є҆смы̀ сы́нове противле́нія; ни лѝ ́є҆смы̀ сы́нове гнѣ́ва; а҆́ще ́є҆смы̀ ча́да свѣ́та ничто́же бо и҆́ное и҆ ѡ҆ сосꙋ́дѣхъ, (ѿ ни́хже ѻ҆́въ ́є҆́сть в̾ че́сть, ѻ҆́въ же в̾ не че́сть) показꙋ́етъ гл҃анная при́тча. Хотя̀ (речѐ а҆пⷭ҇лъ)[3] Бг҃ъ показа́ти гнѣ́въ сво́й и҆ ꙗ҆ви́ти си́лꙋ свою̀, пренесѐ во мно́зѣ долготерпѣ́ніи сосꙋ́ды гнѣ́ва соверше́нны в̾ поги́бель. И҆ да ска́жетъ бога́тство сла́вы своея̀ на сосꙋ́дѣх ми́лости, ꙗ҆̀же преⷣꙋгото́ва въ сла́вꙋ. И҆́хже и҆ призва̀ на́съ, не то́чію л. с҃з ѡ҆б. ѿ і҆ꙋде́й, но и҆ ѿ ꙗ҆зы́къ. Тѣ́мже (да па́ки то́же возлюблю̀) все́ю крѣпостію, и҆ всѣ́мъ ѹ҆мо́мъ тре́звеннымъ себѐ и҆стя́зовати подоба́етъ. а҆́ще чи́стыхъ а҆рѡма́тъ, и҆лѝ вся́кихъ ме́рзостей и҆спо́лнени ́є҆смы̀. А҆́ще Дх҃ꙋ прест҃о́мꙋ до́мъ, и҆лѝ бѣ́сꙋ скве́рномꙋ жили́ще сотвори́хомся а҆́ще в̾ че́сть, и҆лѝ в̾ нече́сть приꙋгото́ваны сосꙋ́ды. Да смо́тритъ вся́къ себѐ, на кото́рꙋю странꙋ̀ прекланя́емый ́є҆́сть. добродѣ́тел́ємъ ли па́че, и҆лѝ ѕло́бѣ; Бг҃ꙋ ли, и҆лѝ сатанѣ̀ повинꙋ́ется; Ѹ҆́зкими ли враты̀ въ жи́знь, и҆лѝ простра́нными ше́ствꙋемъ в̾ поги́бель; [4] Со́вѣсть вся́комꙋ ѡ҆ си́хъ сꙋдія̀, и҆ свидѣ́тель непрекло́нный, сам вся́къ на себѐ со́вѣсть свою̀ непрекло́ннаго л. с҃и сꙋдію̀, и҆ мсти́теля жесточа́йшаго беззако́ній и҆́мать. гл҃етъ А҆мвро́сій. Бл҃же́нства же на́шегѡ, а҆́ще до́брѣ на́мъ бꙋ́дет напослѣ́докъ, зна́м́єнія сꙋ́ть сія̀: а҆́ще кто̀ ра́зꙋмомъ неповрежде́нъ ́є҆́сть, а҆́ще в̾ соедине́ніи правосла́вныя вѣ́ры пребыва́етъ, а҆́ще во́лю не ѕлохꙋдо́жнꙋ, Бж҃ію повелѣ́нію несопротивля́ющꙋюся, па́мять небл҃года́рствія недꙋ́гомъ несодержи́мꙋю и҆мѣ́етъ: да вѣ́сть таковы́й, ꙗ҆́кѡ бл҃го́е прія́телище Бг҃ꙋ себѐ приꙋгото́валъ ́є҆́сть, сосꙋ́дъ ́є҆́сть сицевы́й в̾ че́сть ѡ҆сщ҃е́нъ, и҆ бл҃гопотре́бенъ Гдⷭ҇ви, ко вся́кой бл҃госты́ни. Почіет на не́мъ Дх҃ъ Гдⷭ҇нь, и҆ кро́вомъ кри́лъ своих ѡ҆сѣнит ́є҆го̀: да не постыди́тся во вре́мя лю́то, но бꙋ́детъ приноше́ніе л. с҃и ѡ҆б. че́стно цр҃е́ви. Напослѣ́докъ да вѣ́мы и҆ сіѐ: ꙗ҆́кѡ до́лжни ́є҆смы̀ со стра́хомъ житіѐ на́ше текꙋ́ще и҆скꙋша́ти[5] себѐ, что̀ ́є҆́сть бл҃гоꙋго́дно Бг҃ови, и҆ не пріѡбща́тися дѣлѡ́м неплѡ́днымъ тмы̀, да не ка́кѡ ѿжене́мъ ѿ себѐ Бж҃ій да́ръ, и҆́мамы же[6] сокро́вище сіѐ в̾ скꙋде́лныхъ сосꙋ́дѣх да пече́мся ѹ҆́бѡ ѡ҆ се́мъ, ́є҆́же бы не ѡ҆скверни́ти, колмѝ па́че не разрꙋши́ти та́кѡ ѹ҆стро́енный сосꙋ́дъ сво́й вѣ́дати (речѐ а҆пⷭ҇лъ) коемꙋ́ждо ѿ ва́съ сво́й сосꙋ́дъ, стяжа́ти во ст҃ы́ни и҆ чⷭ҇ти, а҆ не въ стра́сти по́хотной, ꙗ҆́коже и҆ ꙗ҆зы́цы невѣ́дꙋщіи Бг҃а. И҆ ́є҆́же не престꙋпа́ти, ни лихои́мствовати в̾ ве́щи бра́та своегѡ̀, занѐ мсти́тель ́є҆́сть Гдⷭ҇ь ѡ҆ всѣх сих.

л. с҃ѳ