Ѡ҆ хище́ніи

Призира́яй съ высоты̀ своея̀ на ни́ща и҆ ѹ҆бо́га Гдⷭ҇ь, и҆ ви́дящъ, ка́кѡ лю́ди ́є҆гѡ̀ снѣда́ютъ вмѣ́стѡ хлѣ́ба. Ви́дя разграбле́ніе домѡ́въ ѹ҆бо́гихъ, сматря́я и҆згна́ніе сирѡ́тъ ѿ жили́щъ и҆́хъ, а҆́ки мно́гими ѡ҆б̾ятъ болѣ́знми, засвидѣ́телствова гл҃я: [1] ѡ҆брѣ́тени сꙋ́ть в̾ лю́дехъ мои́хъ нечести́віи лови́тели, ꙗ҆́кѡ пти́чный лове́цъ, сѣ́ти ставля́юще, и҆ поно́жы на зацѣпле́ніе мꙋж́є́мъ. ꙗ҆́кѡ по́мча полна̀ пти́цъ, та́кѡ домы и҆́хъ по́лны ле́сти. Сегѡ̀ ра́ди возвели́чени сꙋ́ть и҆ ѡ҆богаще́ни, ѹ҆ты́лы сꙋ́ть и҆ ѹ҆толстѣ́ли, и҆ престꙋпи́ша словеса̀ моя̀ ѕѣлѡ̀. прю̀ вдови́цы не сꙋди́ша, прю̀ си́ра не ѹ҆пра́виша. и҆ сꙋда̀ ѹ҆бо́гимъ л. рн҃д не сꙋди́ша. Та́же а҆́ки гро́мъ стра́шно возгремѣ̀, гл҃я: ́є҆гда̀ си́хъ ра́ди не посѣщꙋ̀, и҆лѝ на лю́дехъ таковых не мсти́тся дꙋша̀ моя̀, ѹ҆́жасъ и҆ чꙋдеса̀ сотворе́ни сꙋ́ть на землѝ. Но что̀ къ на́мъ; рече́те непови́нніи рꙋка́ми, и҆ чи́стіи срⷣцемъ, неѕло́бивіи ѻ҆́троцы. Сіѐ къ ва́мъ ́є҆́сть, да вѣ́сте ꙗ҆́рость Гдⷭ҇ню, пра́вдꙋ ́є҆гѡ̀: ѻ҆́нъ ко ́є҆́сть ѿмща́я беззакѡ́нія и҆ непра́вды и҆ грѣхѝ. ѻ҆ц҃ъ на ча́дѣхъ, и҆ на сынѣ́хъ сынѡ́въ, до тре́тіягѡ и҆ четве́ртагѡ ро́да. Да внима́ютъ сі́и, а҆́ще кі́и сꙋ́ть пита́ющіися хище́ніемъ ѻ҆т́є́цъ свои́хъ, како́въ ме́чъ виси́тъ над̾ главо́ю и҆́хъ. Ѻ҆ц҃ы̀ ꙗ҆до́ша ки́сло. а҆ зꙋбѡ́мъ ча́дъ и҆́хъ ѡ҆ско́мины л. рн҃д ѡ҆б. бы́ша. [2] ́є҆́й та́кѡ ́є҆́сть (а҆́ще поми́ловати, а҆́ще ѹ҆ще́дрити когѡ̀ не восхо́щетъ) и҆́стиненъ бо, и҆ пра́веденъ: и҆ не ꙗ҆́кѡ чл҃къ преставля́етъ Бг҃ъ. нижѐ ꙗ҆́кѡ сы́нъ чл҃ческій и҆змѣня́етъ. ́є҆гда̀ глаго́лаше, не сотвори́тъ ли; Но поне́же[3] ще́дръ и҆ млⷭ҇тивъ Гдⷭ҇ь, долготерпѣли́въ, и҆ многомлⷭ҇тивъ, не доконца̀ прогнѣ́вается: па́че же и҆ ѹ҆твержда́етъ млⷭ҇ть свою̀ на боя́щихся ́є҆гѡ̀. Си́це ѹ҆ І҆езекі́иля ѡ҆предѣли́лъ ́є҆́сть:[4] дш҃а̀ ꙗ҆́же согрѣши́тъ, та̀ и҆ ѹ҆́мрет. и҆зоба́вшагѡ па́родки зꙋ́бы ѡ҆ско́миннѣ бꙋ́дꙋтъ. Чл҃вѣ́къ же и҆́же ́є҆́сть правди́въ, и҆́же сотвори́тъ сꙋ́дъ и҆ пра́вдꙋ, и҆ чл҃кꙋ не наси́литъ, заи́мъ да́стъ, и҆ восхище́нія не восхи́титъ, хлѣ́бъ сво́й а҆́лчнꙋ да́стъ, л. рн҃́є и҆ нага́го ѡ҆блече́тъ въ ри́зꙋ, сребра̀ своегѡ̀ в̾ ли́хвꙋ не вда́стъ, и҆ прибытка не во́зметъ, ѿ непра́вды ѿврати́тъ рꙋ́кꙋ свою̀, и҆ сꙋ́дъ сотвори́тъ междꙋ̀ мꙋ́жем и҆ подрꙋ́гомъ ́є҆гѡ̀, в̾ за́повѣдех мои́хъ хо́дитъ, и҆ ѡ҆правда̑нія моя̀ снабди́лъ ́є҆́сть. жи́знь жи́ти и҆́мать: ꙗ҆́кѡ правди́въ се́й ́є҆́сть. И҆ а҆́ще роди́тъ сы́на разсыпа́теля, пролива́ющаго кро́вь, и҆ творя́ща грѣхѝ. и҆́же в̾ пꙋ́ть ѿца̀ своегѡ̀[5] правди́вагѡ не хо́дитъ, и҆ ѹ҆бо́гаго и҆ ни́щаго ѡ҆би́дитъ и҆ восхище́ніе восхи́тилъ ́є҆́сть, се́й сме́ртію ѹ҆́мретъ, и҆ кро́вь ́є҆гѡ̀ на не́мъ бꙋ́детъ, ꙗ҆́коже бо сы́нъ не во́зметъ непра́вды ѿца̀ своегѡ̀, та́кѡ ѻ҆те́цъ не во́зметъ непра́вды сы́на своегѡ̀. [6] л. рн҃́є ѡ҆б.

Ѹ҆̀бо хотя́щіи и҆збѣ́гнꙋти то́ль грознагѡ посѣще́нія Гдⷭ҇ня, и҆ ѡ҆брѣстѝ млⷭ҇ть ѹ҆ негѡ̀, всѣ́ми ѻ҆́бразы хище́нія и҆ вся́кагѡ прибы́тка неправе́днагѡ бѣ́гати до́лженствꙋютъ.