Ѡ҆ сребролю́біи.

И҆знꙋре́ніе безсо́вѣстное, и҆ безчи́нное пожела́ніе и҆мѣ̑ній, (́є҆́же ѻ҆бы́чнѣ сребролю́біемъ нарица́ти и҆зꙋчи́хомся,) ди́вное нѣ́кое, л. рм҃з и҆ а҆́ки бы взаи́мное сопослѣ́дствованіе и҆́мать. по сребролю́біи бо и҆знꙋре́ніе, по и҆знꙋре́ніи сребролю́біе нахо́дитъ. ѻ҆боя́ же сꙋ́ть кра́йнія бѣды̀, и҆ бѣ́дъ велича́йшихъ сѣ́мя. И҆знꙋри́тель бо и҆мѣ̑ній, сребролю́бецъ же себѐ сама́гѡ, и҆ дꙋшѝ своея̀ лише́нъ быва́етъ. предае́тъ бо ю҆̀ діа́волꙋ. Ничто́же бо ́є҆́сть та́кѡ и҆звѣ́стнѣе предая́нія дꙋ́шъ въ рабо́тꙋ бѣсѡ́мъ, ꙗ҆́коже стра́сть сребролю́бная. ѿкꙋ́дꙋ Па́ѵелъ а҆пⷭ҇лъ сребролю́біе і҆дѡлослꙋже́ніемъ, сребролю́бца же і҆дѡлослꙋжи́телем нарица́ет.[1] Ѽ да бы̀ сія̀ помышля́ли собира́ющіи и҆мѣ̑нія, како́въ ѻ҆́гнь собира́ютъ на главꙋ̀ свою̀, ниже́ бо лицѐ Хрⷭ҇то́во ѹ҆́зрятъ сицеві́и! а҆́ще[2] бо кто̀ ́є҆ди́но и҆мѣ́яй ѕло̀, л. рм҃з ѿпа́даетъ ѻ҆́ныя сла́вы, а҆ ко́рень съ собо́ю нося́й, гдѣ̀ ста́нетъ; И҆́мꙋтъ же нѣ́цыи таковы́я поги́бели своея̀ и҆звѣ́тъ сицевы́й: ча́да и҆́мамы, и҆лѝ и҆мѣ́ти бꙋ́демъ, и҆ тогѡ̀ ра́ди собира́ти и҆мѣ̑нія нꙋ́ждꙋ и҆́мамы: но что̀ ́є҆́сть такова́гѡ безꙋ́мія ѡ҆кая́ннѣе; что̀ такова́гѡ прелще́нія бѣ́днѣе; [3] ́є҆́же да ча́да здѣ̀ прохла́днѡ и҆ безбѣ́днѡ поживꙋ́тъ ѻ҆те́цъ себѐ вѣ́чной мꙋ́цѣ, вѣ́чной тмѣ̀, вѣ́чномꙋ ѻ҆гню̀ предае́тъ: да ча́да псѡ́мъ и҆ пти́цамъ и҆ пра́зднымъ чл҃кѡмъ возмо́гꙋтъ бл҃гоꙋгожда́ти, ѻ҆ц҃ъ че́рвію и҆ скре́жетꙋ зꙋ́бномꙋ самоизво́лнѣ предае́тъ себѐ. да ча́да въ пра́здности и҆ простра́нствѣ возмо́гꙋтъ мꙋсікі́и, и҆ вся́кія со бл҃гоꙋго́діем ѹ҆потребля́ти л. рм҃и сла́сти. ѻ҆ц҃ъ здѣ̀ в̾ трꙋдѣ́хъ и҆ бѣдах живе́тъ а҆́ки стра́ненъ, а҆ та́мѡ свѣ́та вѣ́чнагѡ и҆ безконе́чныя жи́зни чꙋ́жда твори́тъ себѐ самоизво́лнѣ. пре́йдемъ ѹ҆жѐ здѣ̀ молча́ніемъ хи́щникѡвъ, граби́телей, и҆ без̾ поми́лованія вдѡⷡ҇ и҆ сиро́тъ разоря́ющихъ. вѣ́дятъ бо и҆ са́ми, что̀ ѡ҆жида́етъ и҆́хъ. а҆́ще Закхе́инꙋ не поревнꙋ́ютъ и҆справле́нію: и҆збавля́яй бо и҆́хъ Гдⷭ҇ь[4] крѣ́покъ ́є҆́сть, и҆ разсꙋ́дитъ (сирѡ́тъ и҆ вдо́въ,) сꙋ́дъ и҆́хъ. но ѡ҆ се́мъ предложи́ти нѣ́что, не не поле́зно ́є҆́сть, па́че же и҆ нꙋ́жно: ꙗ҆́кѡ собира́ющіи непра́веднѡ собра́ніе, ничим же по́лзꙋютъ ча́да своя̀, па́че же [5] и҆ погꙋбля́ютъ, и҆ всѣ́мъ бѣда́мъ во ѿвѣ́тъ ѡ҆ставля́ютъ си́хъ, и҆́хже л. рм҃и ѡ҆б. ка́кѡ ли бо ѡ҆би́дѣша. Го́ре гра́бящым [6] (речѐ прⷪ҇ро́къ) грабле́ніе ѕло́е до́мꙋ своемꙋ̀. ѹ҆мы́слилъ ́є҆сѝ стыдѣ́ніе до́мꙋ своемꙋ̀, сконча̀ лю́ди мно́ги, занѐ ка́мень ѿ стѣны̀ возопіе́тъ, и҆ сто́гъ ѿ дре́ва возгл҃етъ: Се́ же. (та́же и҆ Гдⷭ҇ь на ни́хъ:) сегѡ̀ ра́ди да́мъ ж́єны̀ [7] и҆́хъ стра́ннымъ, поля̀ и҆́хъ преслѣ́довател́ємъ и҆́хъ. А҆ кромѣ̀ свидѣ́телствъ то́ль и҆́стинных, ѹ҆жѐ и҆ са́мым и҆звѣсти́хомся видѣ́ніемъ: Ѽ ко́ль мно́зи пред̾ ѻ҆чи́ма на́шима погиба́ютъ с̾ шꙋ́момъ напра́снѡ. и҆̀же чꙋжда̑я и҆мѣ̑нія внесо́ша въ до́мъ сво́й: ꙗ҆́кѡ ѹ҆жѐ ꙗ҆́вѣ на них и҆сполня́тися гл҃анію прⷪ҇ро́чю: бꙋ́дет (речѐ) [8] ꙗ҆́кѡ пе́рсть под̾ ко́лы бога́тство л. рм҃ѳ нечести́вы, и҆ а҆́ки пра́хъ лѣтя́й. Сіе́ же напослѣ́докъ да вѣ́мы, ꙗ҆́кѡ нѣ́сть бога́тство ѡ҆ се́бѣ ѕло̀, но ѕло̀ бꙋ́детъ тогда̀, ́є҆гда̀ и҆лѝ и҆зли́шше, и҆лѝ непра́веднѣ, и҆лѝ и҆ пра́веднѣ, ѻ҆ба́че на коне́цъ ѕлы́й собира́емое бꙋ́дет, и҆лѝ ѕлѣ̀ расточи́тся. А҆враа́мъ бя́ше бога́тъ, и҆ не про́стѡ бога́тъ, но бога́тъ ѕѣлѡ̀, ꙗ҆́коже ѡ҆ не́мъ гл҃етъ писа́ніе. А҆враа́мъ же[9] бя́ше бога́тъ ѕѣлѡ̀, ското́мъ, зла́томъ, и҆ сребро́мъ, ́є҆ще́ же и҆[10] домоча́д́єⷰ своих и҆счита́ше три́ста и҆ ѻ҆смна́десять, но и҆мѣ́яше та̀, а҆́ки ничто́же и҆мꙋ́щій. ти́хъ сы́й и҆ бл҃гопокори́вый, ве́сь ѡ҆гражде́нъ стра́хомъ Гдⷭ҇нимъ. и҆ сѐ пе́рвѣе и҆спо́лнися на не́мъ, ́є҆́же по́слѣжде л. рм҃ѳ ѡ҆б. воспѣ̀ Дв҃дъ цр҃ь: боя́щіижеся Гдⷭ҇а не лиша́тся вся́кагѡ бл҃га. и҆ ́є҆́же во Є҆ѵгліи, и҆щи́те пре́жде црⷭ҇твія. бж҃ія, и҆ пра́вды ́є҆гѡ̀. и҆ сія̀ вся̑ приложа́тся ва́мъ. И҆звѣсти́хомся ѡ҆ дово́лствіи А҆враа́мли, и҆зѡби́ліе зла́та и҆ сребра̀, вели́чество дома́шнихъ, и҆ ста́дъ мно́жество вѣ́мы, вѣ́мы не хꙋ́лнѣ въ бж҃е́ственномъ писа́ніи воспомина́́ємыя сія̀ вся̑. ́є҆ще́ же многомно́жае А҆враа́мъ возлю́бленъ бы́сть ѿ Гдⷭ҇а па́че си́хъ, и҆́же самоизво́лнѣ нищетꙋ̀ пріе́млют. да вѣ́мы же и҆ сіѐ: ка́кѡ ѻ҆́нъ бога̑тства сниска̀, какѡвы́я, и҆ кѡли́кія с̾ бога́тством добродѣ́тели пріѡбрѣ́те. ка́кѡ бога̑тства ѹ҆потреби́лъ ́є҆́сть; но Ѽ ко́ль ма́лѡ си́хъ, и҆̀же бы л. р҃н подо́билися А҆враа́мꙋ во нра́вѣхъ! сниска̀ А҆враа́мъ бога̑тства не ле́стными спосо́бствіами, не ли́хвами, не хище́ніемъ, не скверноприбы́точествомъ, и҆лѝ каково́ю ли бо ѕлоко́зненною хи́тростію: но пра́веднымъ[11] промышле́ніемъ, похва́лнымъ и҆ со ѹ҆мѣ́реннымъ ѡ҆ща́дствомъ. та́же подая́ніемъ и҆ дара́ми цр҃е́й. а҆ наипа́че ѡ҆богати́ся А҆враа́мъ бл҃гослове́ніемъ, ́є҆́же Бг҃ъ подадѐ ́є҆мꙋ̀ гл҃я: блгⷭ҇влю́ тя, и҆ возвели́чꙋ тя, и҆ бꙋ́деши блгⷭ҇ве́нъ. Блгⷭ҇ве́ніе бо въ бж҃е́ственномъ писа́ніи и҆зѡби́ліе зна́менꙋетъ, ꙗ҆́коже и҆ Па́ѵелъ бл҃гослове́ніе вмѣ́стѡ и҆зѡби́лія, к̾ Корі́нѳянѡмъ пи́шꙋщъ, полага́етъ[12] гл҃я: сѣ́яй скꙋ́днѡ, скꙋ́днѡ л. р҃н ѡ҆б. и҆ по́жнетъ, а҆ сѣ́яй ѡ҆ бл҃гослове́ніи, (сі́есть и҆зѡби́лнѡ,) ѡ҆ бл҃гослове́ніи и҆ по́жнетъ. Подо́бнѣ и҆ Соломѡ́нъ[13] гл҃етъ: бл҃гослове́ніе Гдⷭ҇не на главѣ̀ првⷣнагѡ, сіѐ ѡ҆богаща́етъ, и҆ не и҆́мать прибли́житися ́є҆мꙋ̀ печа́ль въ срⷣцѣ. и҆ въ толи́цѣх дово́лствіяхъ чꙋ́дна бы́сть мꙋ́жа сегѡ̀ вѣ́ра, ди́вное послꙋша́ніе, че́стное бл҃гоговѣ́ніе, ́є҆́же къ Бг҃ꙋ, и҆збра́нное чл҃колю́біе с̾ ти́хостію. в̾ бл҃гополꙋ́чіи кро́тость и҆зя́щная, а҆ в̾ ѕлоключе́ніи не побѣди́мое терпѣ́ніе. Є҆ще́ же и҆ толи́кое къ Бг҃ꙋ повинове́ніе, ꙗ҆́кѡ нижѐ сы́на своего̀ закла́ти не щадя́ше: а҆ ко бли́жнемꙋ преꙋдиви́телна любо́вь ́є҆гѡ̀, что̀ ꙗ҆́вѣ показꙋ́етъ то́ль ще́дрое и҆ то́ль дово́лное стра̑ннымъ л. рн҃а ѹ҆бѡ́гим ѹ҆гоще́ніе ́є҆гѡ̀ с̾ млⷭ҇тынями, да сокраще́ннѣ рече́мъ: Бога́тствъ ѻ҆́нъ а҆́ки слꙋжи́телей и҆ споспѣ́шникѡвъ к̾ добродѣ́тел́ємъ, ѹ҆до́бных, ко бл҃готворе́нію ѻ҆рꙋ́дій, ко слꙋже́нію по́льзѣ бли́жнягѡ, а҆́ки помо́щникѡⷡ҇ бл҃гоче́стнѡ ѹ҆потребля́ти вѣ́дяше. вездѣ́ же посре́дствоваше простота̀ серде́чная, съ не ѕло́біемъ ди́внѣ ѹ҆мѣ́реннымъ.

Таковы́ ли сꙋ́ть и҆ ѕлѣ̀ богатя́щихся нра́вы; ́є҆́й вся̑ проти́вна сꙋ́ть: не бо̀ ѻ҆нѝ сꙋ́ть влады́ки бога́тствамъ, но бога́тства и҆́ми владѣ́ютъ. Кра́ткѡ, но краснѡ̀ бога́тыхъ нра́вы сказа̀ А҆рісто́тель філосо́фъ (гл҃я) бога̑тства и҆мꙋ́щым, каковы̀ послѣ́дствꙋютъ нра́вы;[14] ви́дѣти всѣ́мъ ́є҆́сть л. рн҃а ѡ҆б. ѕѣлѡ̀ ѹ҆до́бнѡ: сꙋ́ть бо непокори́ви, возносли́ви, ѹ҆кори́тели, тщесла́вни: занѐ дово́лствіемъ и҆мѣ̑ній ѡ҆болще́ни сꙋ́ще, мня́тся всѣ́ми ѹ҆жѐ и҆зѡби́ловати бл҃ги́ми. ́є҆ди́ное же то́кмѡ па́че всегѡ̀ предпочита́юще бога́тство, и҆ а҆́кибы зла́томъ вся̀ кꙋпи́ти могꙋ́ще, в̾ мы́шцꙋ ра́зꙋмъ, премꙋ́дрость, и҆ прѡ́чая соверше́нства назна́менавше, презорли́ви сꙋ́ть, напыще́ни, непристꙋ́пни, не бл҃гоꙋвѣ́тливи, же́стоки, де́рзски, поно́сливи. слѣ́пи ра́зꙋмомъ, во́лею блꙋдя́щіи, въ по́хотехъ неѡбꙋзда́ни: и҆ прѡ́чая. Да помышля́ютъ ѹ҆̀бо младі́и, богати́тися хотя́щіи, (ю҆́ность бо вся̀ и҆скꙋси́ти понꙋжда́ется) ко́ль ѕѣлѡ̀ трꙋ́днѡ бога́тымъ, не гл҃ю подо́битися л. рн҃в А҆враа́мꙋ человѣ́кꙋ во всѣ́хъ добродѣ́телехъ соверше́ннꙋ, но понѐ дѡ́брым бы́ти: ѿ грѣха́ же и҆ поро́ка ѹ҆страни́тися. И҆́бо, поне́же сребрꙋ̀ [15] повинꙋ́ются вся́ч́єская. а҆ бога́тство ве́щь ́є҆́сть велмѝ прекло́нна ко вся́комꙋ безчи́нію: тогѡ̀ ра́ди бога́таго, а҆́ще добродѣ́теленъ, и҆ непоро́чен бꙋ́детъ, а҆́ки чꙋ́до нѣ́кое, а҆́ки неѡбы́клꙋю но́вость проповѣ́дꙋетъ І҆исꙋ́съ Сіра́ховъ, гл҃я: Бл҃же́нъ бога́тъ, и҆́же[16] ѡ҆брѣ́теся без̾ поро́ка, и҆ и҆́же во слѣ́дъ зла́та не и҆́де, кто̀ ́є҆́сть, и҆ да ѹ҆бл҃жи́мъ ́є҆го̀; сотвори́ бо ди́вна в̾ лю́дехъ свои́хъ. кто̀ и҆скꙋше́нъ и҆́мъ бы́сть, и҆ соверши́ся. и҆ да бꙋ́дет на похвале́ніе. и҆ кто̀ мо́глъ престꙋ́пник бы́ти, и҆ не престꙋпѝ. и҆ ѕло̀ сотвори́ти, л. рн҃в ѡ҆б. и҆ не сотворѝ. да ѹ҆твердя́тся [17] бл҃га̑я ́є҆гѡ̀. Что же и҆ Па́ѵелъ ѡ҆ се́мъ, внемлѝ. Хотя́щіи (речѐ) богати́тися, впа́даютъ в̾ напа́сти, и҆ сѣ́ти, и҆ в̾ по́хѿи мнѡ́гія, несмы́сл́єнныя, и҆ врежда́ющія, ꙗ҆̀же погрꙋжа́ютъ чл҃ки во всегꙋби́телство и҆ поги́бель, ко́рень бо всѣ́мъ ѕлым сребролю́біе ́є҆́сть. Є҆го́же нѣ́цыи жела́юще, заблꙋди́ша ѿ вѣ́ры, и҆ себѐ пригвозди́ша болѣ́зн́єм мнѡ́гим, вся́къ бо сребролю́бецъ вселе́ннѣй вра́гъ сꙋ́щь, нижѐ себѣ̀ ми́лъ ́є҆́сть, ́є҆́же всѣ́хъ болѣ́зней тяжча́е ́є҆́сть промышля́ющь же непреста́ннѡ ѡ҆ бога̑тствахъ, ѡ҆ дома́шнихъ и҆ бли́жнихъ не промышля́етъ, ́є҆́же то́же ́є҆́сть, что̀ и҆ вѣ́ры ѿверже́ніе. л. рн҃г А҆́ще ли кто̀ (гл҃етъ а҆пⷭ҇лъ) ѡ҆ свои́хъ, па́че же ѡ҆ при́сных не промышля́етъ, вѣ́ры ѿве́рглся ́є҆́сть, и҆ невѣ́рнагѡ го́рши ́є҆́сть. ка́кѡ же вѣ́ры ѿве́ржеся; Бг҃а (речѐ) и҆сповѣ́дꙋютъ[18] вѣ́дѣти, а҆ дѣ́лы не ѿме́щꙋтся ́є҆гѡ̀. Ѹ҆̀бо таковы́я хотя́ще, па́че же и҆ тща́щеся бѣды̀ ѹ҆гонзнꙋ́ти, повине́мся наказа́нію прⷪ҇ро́чю, глаго́ланномꙋ си́це: не ѹ҆пова́йте на непра́вдꙋ,[19] и҆ на восхище́ніе не жела́йте. бога́тство а҆́ще тече́тъ, не прилага́йте срⷣца.

И҆спо́лнимъ тща́телнѣ а҆пⷭ҇лскій завѣт: да бꙋ́дꙋтъ кꙋпꙋ́ющіи: ꙗ҆́кѡ не содержа́ще, и҆ тре́бꙋющіи мі́ра сегѡ̀, ꙗ҆́кѡ не тре́бꙋющіи: прехо́дитъ бо ѻ҆́бразъ ми́ра сегѡ̀. л. рн҃г ѡ҆б.