Ѡ҆ Сѷре́нахъ мі́ра сегѡ̀.

Древеса̀ ма́сличная та́кѡ сꙋ́ть чистоты̀ люби́тели, ꙗ҆́кѡ всегда̀ со блꙋдни́цами ди́внꙋю нѣ́кꙋю враждꙋ̀ и҆мѣ́ютъ. и҆ а҆́ще ко́е ѿ древе́съ ма́сличныхъ блꙋдни́цы рꙋка́ма бꙋ́детъ насажде́но, сіѐ и҆лѝ безпло́дно пребꙋ́детъ, и҆лѝ вско́рѣ и҆зсо́хнетъ. тогѡ̀ ра́ди Є҆́ллини, Палла́дѣ, (ю҆́же боги́ню премꙋ́дрости и҆менова́хꙋ,) ма́сличное дре́во ѡ҆святи́ша: нарица́юще ́є҆̀ Палладі́йское дре́во. Почто́же та́кѡ; Занѐ премⷣрость чⷭ҇тыя лю́битъ, нижѐ ѡ҆бита́етъ (ꙗ҆́кѡ же гл҃етъ л. р҃м бжⷭ҇твенное писа́ніе) в̾ тѣлесѝ пови́нномъ грѣхꙋ̀. Ѹ҆́бѡ тща́щійся[1] ѡ҆брѣстѝ премⷣрость, и҆ причте́нъ бы́ти ѻ҆́ной, па́че же и҆ ѡ҆сщ҃е́нъ в̾ приноше́ніе че́стнѡ, бꙋ́ди ма́слинна. ́є҆ще́ же мы́сленныя дѣви́цы, чистоты̀ глаго́лю, насажде́нъ рꙋка́ма. бꙋ́ди тебѣ̀ неприкоснове́нна рꙋка̀ блꙋдни́цы, да не ка́кѡ и҆зсо́хнеши, и҆лѝ пребꙋ́деши непло́денъ, про́стѡ ре́кше, бѣ́гай поги́белнаго гла́са Сѷре́нъ вѣ́ка сегѡ̀.

Ка́кѡ же, ко́имъ ѻ҆́бразомъ, и҆ ко́ими словесы̀ наполня́юще пѣ́сни своя̀. прелща́ютъ неꙋтвержде́нныхъ срⷣца̀, ка́кѡ гл҃ю влекꙋ́тъ и҆́хъ въ поги́бель преꙋдиви́телнѣ, сказа̀ всѣ́мъ на по́льзꙋ, начерта̀ дꙋ́хомъ дви́жимый Соломѡ́нъ премⷣрый. л. р҃м ѡ҆б.[2] гл҃я си́це: Жена̀ сря́щетъ ́є҆гѡ̀ зра́къ и҆мꙋ́щая прелюбодѣ́йчищъ, по то́мъ пріе́мши ло́бжетъ ́є҆го̀, безстꙋ́дным же лицѐ проречет ко ѻ҆́номꙋ: же́ртва ми́рна ми ́є҆́сть, дне́сь воздаю̀ мл҃твы моя̀. Сегѡ̀ ра́ди и҆зыдо́хъ во стрѣ́теніе тебѣ̀, лю́бящи лицѐ твоѐ ѡ҆брѣто́хъ тя̀. Претка́ніемъ ́є҆́смь покры́ла ѻ҆́дръ мо́й, ковра́ми же сꙋгꙋ́быми потсла́хъ, ꙗ҆̀же ѿ ́є҆гѵ́пта желтяницею (сми́рною а҆ло́есомъ и҆ циннамо́номъ) посы́пала ́є҆́смь ло́жницꙋ мою̀. Пріидѝ да наслади́вся любвѐ по́хоти, нѣ́сть бо мꙋ́жа моегѡ̀ въ домꙋ̀, и҆зы́де на пꙋ́ть дале́че, дово́лнѡ сребра̀ взя̀ с̾ собо́ю, и҆ за мно́ги днѝ возврати́тся в̾ до́мъ сво́й. И҆ та́кѡ прелстѝ ю҆́ношꙋ мно́гою бесѣ́дою, л. рм҃а тене́тами ́є҆я̀ ѹ҆стнꙋ̀, в̾ блꙋ́дъ введѐ ́є҆го̀: ѻ҆́нъ же а҆́біе послѣ́дꙋя ́є҆́й, ꙗ҆́коже во́лъ на заколе́ніе веде́ся, и҆ ꙗ҆́кѡ пе́съ на ѹ҆́зы, и҆лѝ ꙗ҆́кѡ Є҆ле́нь врежден стрѣло́ю. и҆ поспѣ́шаетжеся ꙗ҆́кѡ пти́ца в̾ сѣ́ть, не вѣ́дый ꙗ҆́кѡ ѡ҆ дш҃ѝ тече́тъ, нн҃ѣ же сы́не послꙋ́шай менѐ, и҆ внима́й глаго́лы ѹ҆́стъ мои́хъ, да не ѹ҆клони́тся в̾ пꙋтѝ ́є҆я̀ срⷣце твоѐ, и҆ да не прельсти́шися во ѡ҆мѣ́нах ́є҆я̀. Мно́гихъ бо ѹ҆язви́вши низведѐ, и҆ безчи́сленны сꙋ́ть, и҆̀хже ѹ҆би́ла ́є҆́сть. пꙋтіѐ а҆́довы до́мъ ́є҆я̀, низводя́щія въ сокро́вища см́є́ртная. до здѣ̀ Соломѡ́нъ.

Бѣ́гаимъ ѹ҆̀бо прекоснове́нія па́че же и҆ собесѣ́дованія преле́стницъ таковы́хъ, бѣ́гаимъ а҆́ки пче́лы ѿ ды́ма, л. рм҃а ѡ҆б. да не поги́бнемъ прилѣпля́ющеся сла́дости ѻ҆́ной, да и҆зба́вимся бѣды̀ толи́кія, да бꙋ́демъ плодоно́сни, а҆ не не пло́дни, па́че же и҆зсо́хшія ма́слины, да ѹ҆до́бни бꙋ́демъ ко прія́тію да́ра дх҃а прест҃а́гѡ премꙋ́дрости: то́йже бо ́є҆́сть и҆́стинныя премꙋ́дрости пода́тель, и҆́же и҆ а҆пⷭ҇лская и҆ногда̀ срⷣца зи́ждꙋщыя чⷭ҇та раздадѐ ро́ди я҆зы́кѡвъ, [3] ѿкры̀ сказа́нія я҆зы́кѡвъ, и҆ безвѣ̑стная, и҆ та̑йная премꙋ́дрости своея̀ и҆̀мъ ꙗ҆ви́лъ ́є҆́сть.

л. рм҃в