Ѡ҆ и҆́стинномъ дрꙋ́жествѣ.

Дрꙋ́гови вѣ́рномꙋ нѣ́сть и҆змѣ́ны, и҆ нѣ́сть мѣ́рила добро́тѣ ́є҆гѡ̀, гл҃етъ писа́ніе. дрꙋ́гъ бо вѣ́ренъ, ѹ҆тѣ́ха ́є҆́сть житію̀, и҆ нижѐ то́кмѡ дрꙋ́гъ са́мый, но и҆ ѻ҆де́жды, и҆ писа́нія, и҆ мѣста̀, и҆ времена̀ люби́ма сꙋ́ть: мно́гажды бо без̾ дрꙋгѡ́въ ѻ҆де́жды, и҆лѝ писа́нія пріе́млюще, и҆лѝ стоя́ще на пра́здныхъ, мѣ́стѣхъ ѻ҆́ныхъ, прослези́хомся днѝ воспомянꙋ́вше. Но ниже́ бо сло́вомъ возмо́жнѡ предста́вити сла́дость толи́кꙋ, ́є҆ли́кꙋ приноси́тъ любе́зное дрꙋгѡ́въ сожи́тіе. Занѐ, что́ ли бо воспомя́немъ ѿ сладча́йшихъ, вся̑ быва́ютъ до сы́тости: а҆ дрꙋ́гъ никогда́ же, л. р́є҃і ѡ҆б. доне́лѣже бꙋ́детъ дрꙋ́гъ, но па́че ́є҆щѐ расте́тъ вожделѣ́ніе и҆ сы́тости никогда́ же пріе́млетъ сла́дость такова́я: дрꙋ́га ра́ди мно́зи, ѻ҆ч҃ество, бра́тію, и҆ роди́телей ѡ҆ставля́ютъ. И҆ живота̀ настоя́щагѡ, дрꙋ́гъ ́є҆́сть сладча́йшій. мно́зи бо по дрꙋ́жнемъ сконча́ніи моля́хꙋся не жи́ти про́чее. Лꙋ́чше хотя́хꙋ, да пога́снетъ сл҃нце, не́жели да лиша́тся дрꙋгѡ́въ. лꙋч́ше во тмѣ̀ пребыва́ти не́жели без дрꙋгѡⷡ҇ бы́ти на ꙗ҆́сности. И҆ что̀ глаго́лю[?] ѡ҆ настоя́щей свѣ́тлости: мно́зи съ Па́ѵломъ а҆пⷭ҇ломъ нижѐ ѡ҆ свѣ́тѣ вѣ́чномъ радя́ще, впа́сти въ гее́ннꙋ жела́ютъ. Сицево́е дрꙋ́жество ́є҆́сть и҆́стинное, сицево́мꙋ дрꙋ́жествꙋ нѣ́сть и҆змѣ́ны, нижѐ ́є҆́сть мѣ́ра добро́тѣ л. рѕ҃і ́є҆гѡ̀. До́брѣ ѹ҆̀бо ́є҆го̀ таковы́мъ начертава́ютъ подо́біемъ. А҆ ꙗ҆́кѡ никогда́ же ѿпа́даетъ, ни по слꙋ́чаю и҆ вре́мени и҆змѣня́ется, но при́снѡ въ бл҃гополꙋ́чіи и҆ ѕлоключе́ніи то́жде ́є҆́сть: рече́ній ЛѢ́ТА и҆ ЗИМЫ̀ назна́менаша. Да бꙋ́дꙋтъ же взае́мнымъ та́инъ влага́лищемъ. ни потае́нно что̀ и҆мѣ́етъ ѿ дрꙋ́га своегѡ̀, къ томꙋ̀ не бли́зъ то́кмѡ сꙋ́ще, но и҆ в̾ далеча́йшихъ разстоя́ще страна́хъ таковы́ же бꙋ́дꙋтъ: ДАЛЕ́ЧЕ и҆ БЛИ́ЗЪ, и҆́мать написа́ніе ѿве́рзстое срⷣце, и҆ поне́же дрꙋгѡ́мъ во вѣ́ки до́лжни ́є҆смы̀ помоществова́ти, ра́внѣ же и҆ по сме́рти люби́ти: и҆мена̀ сія̀: СМЕ́РТЬ и҆ ЖИВО́ТЪ л. рѕ҃і ѡ҆б. зна́менателствꙋютъ. Таково́е дрꙋ́жество да ѹ҆́до́бь возмо́жет стяжа́ти: ѿ и҆звѣ́стныхъ ѡ҆ се́мъ писа́телей нꙋ́жднѣйшыя собра́въ глави́зны, полага́ю здѣ̀. И҆з̾ тѣ́хъ. Пе́рвое сія̀ ́є҆́сть: ВѢ́РНОСТЬ. Дрꙋ́гъ бо и҆звѣ́стенъ въ ве́щи познава́ется неизвѣ́стной вѣ́рностію. и҆ сіѐ ́є҆́сть первѣ́йшее ѹ҆твержде́ніе дрꙋ́жбы, ничто́же бо постоя́ннѡ ́є҆́сть, ́є҆́же невѣ́рно ́є҆́сть. Сегѡ̀ ра́ди неѕло́биваго не кова́рнаго, но согла́снаго, и҆ такова́го, и҆́же въ тѣ́хже ве́щехъ и҆ дѣя́ніихъ ѹ҆праждня́ется, дрꙋ́га и҆збира́ти совѣ́тꙋютъ премⷣрѣйшіи: не мо́жетъ бо вѣ́ренъ бы́ти ра́знственный и҆ превра́тный, нижѐ то́й, и҆́же в̾ и҆но́мъ, а҆ ́є҆щѐ проти́вномъ л. рз҃і и҆́мать ѹ҆праждне́ніе своѐ, нижѐ зави́дящіи, и҆́же ́є҆́сть вселе́ннѣй, вра́гъ пребꙋ́детъ в̾ дрꙋ́жествѣ вѣ́ренъ, ни хи́щникъ, ни ѡ҆би́дящій: вся̑ бо сія̀ вѣ́рность разрꙋша́ютъ. Ничто́же да бꙋ́детъ междꙋ̀ дрꙋ́жестными лицемѣ́рно, ни притво́рно, но вся̑ про́ста и҆ не ѹ҆мы́шл́єнна да бꙋ́дꙋтъ, ́є҆́же бы невре́днѣ возмощѝ соблюстѝ междꙋ̀ собо́ю вѣ́рность. Къ томꙋ̀: и҆́стина да бꙋ́детъ во все́мъ, и҆ нижѐ да ѹ҆страша́ется дрꙋ́гъ вѣ́ренъ гнѣ́ва за и҆́стинꙋ: а҆ наипа́че во и҆справле́ніихъ. нижѐ и҆справля́емый да презира́етъ совѣ́тъ, и҆ горди́тся в̾ себѣ̀ и҆ гнѣ́вается ѹ҆вѣщева́емый, и҆ и҆справля́емый ѿ дрꙋ́га.

Да бꙋ́дꙋтъ же ѹ҆вѣща́тели кро́тцы, л. рз҃і ѡ҆б. сострада́телни, а҆ не понося́щіи и҆ торжествꙋ́ющіи. Наказꙋ́еміи же да гнѣ́ваются па́че на нерадѣ́ніе и҆ поползнове́ніе своѐ, не на тѣ́хъ, и҆̀же ѿ ро́ва и҆зво́дятъ поги́белнагѡ, ѹ҆же́ бо та́мѡ нѣ́сть дрꙋ́жба, но ле́сть. ѹ҆жѐ превраще́нъ ́є҆́сть чи́нъ дрꙋ́жбы, и҆дѣ́же и҆́стина возненави́дѣна ́є҆́сть, и҆дѣ́же ѿ и҆́стины затыка́ют ѹ҆́ши, и҆дѣ́же похлѣ́бство возлю́блено ́є҆́сть тѣ́мъ, ꙗ҆́коже ѹ҆́бѡ, ѹ҆вѣщева́ти и҆ ѹ҆вѣщева́тися дрꙋ́жества и҆́стиннагѡ сво́йство ́є҆́сть: ́є҆ди́номꙋ бо непоно́снѣ дѣ́яти, дрꙋго́мꙋ же непоно́снѣ пріима́ти вся̑ до́лжно ́є҆́сть. си́це ни ́є҆ди́но то́ль лю́то ́є҆́сть растлѣ́ніе и҆ поги́белъ дрꙋ́жества, ꙗ҆́коже ласка́телство, л. ри҃і похлѣ́бство и҆ льще́ніе. вся́ бо сія̀ и҆стребля́ютъ и҆́стинꙋ, вся̑ заглажда́ютъ дрꙋ́жества характи́ръ и҆звѣ́стнѣйшій, ѹ҆жѐ нѣ́сть вѣ́ренъ дрꙋ́гъ, и҆́же не пріе́млетъ, и҆ и҆́же не дерза́ет и҆́стинꙋ сказа́ти, но вра́гъ ́є҆́сть. лсте́цъ ́є҆́сть, и҆ гꙋби́тель.

Втора́я глави́зна: ВЗАЕ́МНОЕ БЛАГОВОЛЕ́НІЕ: и҆ сіѐ ́є҆́сть а҆́ки воскорми́тель дрꙋ́жества, нѣ́сть бо свирѣ́пꙋ и҆ жесто́кꙋ возмо́жно въ до́лгой пребы́ти любвѝ. ти́хость же, сла́дость въ бесѣ́дѣ, бл҃гочи́ніе, нра́вѡвъ ѹ҆глажда́ютъ жестотꙋ̀, смиря́ютъ свирѣ́пство, и҆ благоволе́ніе родя́тъ. ѹ҆́бѡ вся́кая грꙋ́бость дале́че да бꙋ́детъ ѿ дрꙋ́жества. л. ри҃і ѡ҆б.

Тре́тія глави́зна: СТЫДѢ́НІЕ, и҆зря́днѣйшꙋю бо красотꙋ̀ дрꙋ́жества ѿе́млетъ, и҆́же ѿе́млетъ стыдѣ́ніе, тѣ́мъ да никто́же безчи́нствꙋетъ ѹ҆пова́я на дрꙋ́ги.

Нижѐ проси́ти веще́й нече́стныхъ, нижѐ проси́мымъ что̀ безстꙋ́дное твори́ти лѣ́ть ́є҆́сть, ни ́є҆ди́нъ бо ́є҆́сть и҆звѣ́тъ грѣха̀, а҆́ще дрꙋ́га ра́ди согрѣша́етъ кто̀. и҆ поне́же нѣ́сть дрꙋ́жество возслѣ́дователь безчи́нію, но добродѣ́телей пло́дъ, тогѡ̀ ра́ди доне́лѣже добродѣ́тели состоя́тся неповрежде́нни, дото́лѣ и҆ дрꙋ́жество и҆́стинное пребыва́ти бꙋ́детъ.

Четве́ртая глави́зна: ДОЛГОТА̀ ВРЕ́МЕНЕ ВЪ ДРꙊ́ЖБѢ, л. рѳ҃і віно́ бо но́во дрꙋ́гъ но́въ, а҆́ще ѡ҆бетша́етъ,[1] съ весе́ліемъ піе́ши ́є҆го̀, тѣ́мъ а҆́ще и҆ в̾ ѕлоключе́ніи бꙋ́детъ кто̀ ѿ содрꙋ́жныхъ (то́кмѡ да не ѕлоключе́ніе ѻ҆́но и҆ на́мъ бѣды̀ вино́вно бꙋ́детъ) не лиши́мъ ́є҆го̀. А҆́ще и҆ че́сть вы́шшая пости́гнетъ, дрꙋ́гъ то́йже да бꙋ́детъ во вѣ́ки, (а҆́ще то́кмѡ ѿ негѡ̀ проти́вности не бꙋ́детъ каково́й, мно́гажды бо вражда̀ и҆ за́висть таковы́хъ разрꙋша́етъ любвѐ сою́зъ) ꙗ҆́коже бо всѝ ѹ҆бл҃жа́ютъ, и҆ лю́бятъ всѝ зря́ще на вы́шшій досто́инства степе́нь возше́дшихъ не и҆змѣня́ющихся. си́це ѿ всѣ́хъ сла́вимый ́є҆́сть, и҆́же вездѣ̀ тѣ́хже дрꙋгѡ́въ и҆мѣ́етъ, кромѣ̀ бѣды̀ поживе́тъ безпеча́ленъ л. рѳ҃і ѡ҆б. храня́й дрꙋ́га ста́раго, а҆ не ꙗ҆́коже Таркві́ній, тогда̀ позна́етъ неща́стіе своѐ, когда̀ ѹ҆жѐ ни врагѡ́мъ ѿмщева́ти, ни дрꙋгѡ́мъ воздая́ти ѹ҆до́бь возмо́жетъ, и҆ та́кѡ въ порꙋга́ніе бꙋ́детъ всѣ́мъ: ѿ но́выхъ бо дрꙋгѡ́въ съ фортꙋ́ною поверга́ется, ста́рых же са́мъ презрѣ̀. ѻ҆ба́че зри́мъ ча́сто ве́щь мно́гихъ досто́йнꙋю сле́зъ, ꙗ҆́кѡ не то́кмѡ сама̀ фортꙋ́на слѣпа̀ ́є҆́сть, но и҆ и҆́хже каса́ется, ѡ҆слѣпля́етъ. и҆ ѹ҆жѐ не то́кмѡ дрꙋгѡ́въ, ни нижѐ самы́хъ себѐ познава́ютъ и҆звѣ́стнѡ: тогѡ̀ ра́ди и҆́стинное дрꙋ́жество в̾ тѣ́хъ, и҆̀же на че́стѣхъ и҆ сано́вствахъ ѡ҆брѣта́ются, ́є҆два̀ съ трꙋдо́мъ взыска́ти ѹ҆до́бно ́є҆́сть, тѣ́мъ л. р҃к и҆ вско́рѣ кра́йнюю познава́ютъ (ꙗ҆́коже рѣ́хомъ) бѣдꙋ̀ свою̀, но не во вре́мя.

Пя́тая глави́зна: Всѣ́ми ѻ҆́бразы блюстѝ подоба́етъ: да не ка́кѡ ѹ҆твержденная дрꙋ́жба превратится на враждꙋ̀. не то́кмѡ бо сіѐ многобѣ́дно ́є҆́сть, но и҆ па́гꙋбно весма̀. И҆ что̀[2] па́гꙋбнѣйшее возмо́жет ѡ҆брѣсти́ся, ꙗ҆́коже вра́гъ дома́шній. Тогѡ̀ ра́ди до́лгое вре́мя и҆збира́ти дрꙋ́га подоба́етъ, а҆ не а҆́біе. ́є҆ще́ же и҆ не кого́ ли бо, наипа́че недосто́йнаго, и҆лѝ нера́внаго. И҆ сіе́ же да не бꙋ́детъ забве́но: ꙗ҆́кѡ ́є҆го́же бл҃гополꙋ́чіе дрꙋ́га содѣ́ловаетъ, ѕлоключе́ніе въ врага̀ претвори́тъ.

Шеста́я глави́зна: Да не бꙋ́детъ комꙋ̀ дрꙋ́жество ра́ди нѣ́коегѡ л. р҃к ѡ҆б. прибы́тка и҆ коры́сти: сꙋ́ть бо нѣ́цыи, и҆̀же не глаго́лю а҆́ки рабѡ́въ, но а҆́ки живо́тныхъ ѹ҆потребля́ютъ дрꙋгѡ́въ к̾ дѣ́лꙋ и҆ коры́сти свое́й, и҆ ѹ҆жѐ та́мѡ не любо́вная, но бѣ́дная дрꙋ́жба. Гдѣ̀ во тщѐ слꙋ́жба.

Подоба́етъ вся́комꙋ ѿ себѐ наꙋчи́тися при́тчи: занѐ вся́къ себѐ лю́битъ, не коры́сти и҆ прибы́тка ча́явъ, но ра́ди себѐ, лю́битъ себѐ. си́це, а҆́ще кто̀ и҆ ѡ҆ дрꙋ́гѣ не разсꙋжда́етъ, и҆́стинная та́мѡ дрꙋ́жба никогда́ же бꙋ́детъ. дрꙋ́гъ бо ничто́же и҆но́е ́є҆́сть, то́кмѡ а҆́зъ дрꙋгі́й, что́же а҆́зъ са́мъ ѿ себѐ, (поне́же люблю̀ себѐ) ча́ю прія́ти, та́кѡ ѹ҆́бѡ ра́ди дрꙋ́га люби́ти дрꙋ́га. л. рк҃а

Седма́я глави́зна: Ꙗ҆́коже лꙋ́чшій и҆ соверше́ннѣйшій да не презира́етъ ме́ншагѡ и҆ хꙋ́ждшагѡ дрꙋ́га: поне́же дрꙋ́гъ ́є҆́сть, та́кѡ ме́ншій и҆ хꙋ́ждшіи да не зави́дитъ соверше́нѣйшемꙋ и҆ лꙋ́чшемꙋ, ́є҆гда̀ каково́е благополꙋ́чіе постиза́етъ ѻ҆́нъ. к̾ томꙋ̀: не и҆стязова́ти такова́гѡ совершенства ѹ҆ дрꙋ́га, какова́ же са́мъ не и҆мѣ́етъ кто̀: мно́зи бо такова́го безстꙋ́днѣ хо́щꙋтъ дрꙋ́га, каковѝ са́ми нижѐ сꙋ́ть, нижѐ мо́гꙋтъ бы́ти когда̀.

Бꙋ́ди ѹ҆́бѡ пре́жде са́мъ бла́гъ и҆ добродѣ́теленъ, и҆ тогда̀ подо́бный взы́щется къ тебѣ̀, и҆ не ѡ҆ста́витъ тя до вѣ́ка. ничто́же бо любе́знѣе добродѣ́тели, ничто́же си́лнѣе л. рк҃а ѡ҆б. привлачи́тъ сме́ртныхъ въ любо́вь, ꙗ҆́коже добродѣ́тель сея̀ ра́ди ́є҆ди́ныя мно́гихъ лю́бимъ, и҆̀хже ни ви́дѣхомъ когда̀, добродѣ́тель бо (ꙗ҆́коже ѻ҆́бще глаго́лютъ) и҆ во вразѣ̀ похва́лна ́є҆́сть и҆ любе́зна. Сіѐ ́є҆́сть и҆́стинное, сіѐ всесоверше́нное, па́че же сщ҃е́нное дрꙋ́жество ́є҆́сть, сіѐ не и҆стязꙋ́етъ коры́сти, но и҆ ꙗ҆̀же и҆мѣ́етъ, да́рствꙋетъ вся̑. сіѐ вѣ́рно ́є҆́сть вездѣ̀ и҆ нелицемѣ́рно, сіѐ не ѡ҆би́дитъ: нижѐ ѡ҆би́дится, вся̑ бо любо́внѣ пріе́млетъ. нѣ́сть в̾ не́мъ жестоты̀, нѣ́сть сверѣ́пства, нѣ́сть въ не́мъ льстѝ и҆ непра́вды, всегда́ бо ра́дꙋется ѡ҆ и҆́стинѣ. Таково́е дрꙋ́жество стяжа́вшіи, сꙋ́ть и҆ не присꙋ́дствꙋющіи, а҆́ки л. рк҃в в̾ ́є҆ди́ном тѣлесѝ заключе́нныи. нищетно живꙋ́щіи, сꙋ́ть а҆́ки и҆зоби́лꙋющіи. немоществꙋ́ющіи здра́вы сꙋ́ть и҆, ́є҆́же вѣ́рꙋ превосхо́дитъ, живꙋ́тъ по сме́рти. не бо̀ на фортꙋ́нѣ и҆ слꙋча́йныхъ, но на добродѣ́телехъ дрꙋ́жества своегѡ̀ ѡ҆снова́ніе и҆мѣ́ют. Вся́къ ѹ҆́бѡ и҆скꙋша́я, да и҆скꙋша́етъ: кого̀, и҆ какова̀, когда̀, и҆ чесѡ̀ ра́ди и҆збира́етъ дрꙋ́га себѣ̀. И҆ до́брѣ помянꙋ́хомъ ѡ҆ и҆скꙋ́сѣ дрꙋ́жества, не то́кмѡ бо многополе́зно, но и҆ нꙋ́ждно ́є҆́сть, дрꙋ́га и҆звѣ́стна, въ ве́щи позна́ти неизвѣ́стной.

Человѣ́къ нѣ́кій бога́тъ и҆ сла́венъ дово́лное число̀ мни́мыхъ дрꙋгѡ́въ и҆мꙋ́щъ, и҆ никогда́ же ѿрица́ющихся л. рк҃в ѡ҆б. пирова́ній, тѣ́мже хотя́й и҆скꙋси́ти, а҆́ще и҆ въ трꙋдѣ́хъ пребꙋ́дꙋтъ съ ни́мъ: ́є҆ди́ною всѣ́хъ кꙋ́пнѡ созва́въ, и҆звѣствꙋ́етъ ѡ҆ вразѣ́хъ свои́хъ востаю́щихъ на него̀, та́же да воспріи́мꙋтъ и҆ ѻ҆нѝ въ по́мощь ѻ҆рꙋ́жіе, мо́литъ. но и҆ ѻ҆нѝ всѝ, кромѣ̀ ́є҆ди́наго, взаи́мнѣ мо́лятся, да и҆́мать и҆̀хъ ѿрече́нныхъ. что́же сотворѝ мꙋ́жъ ѻ҆́нъ; всѣ́хъ и҆згна̀ во́нъ, и҆ ́є҆ди́наго то́кмѡ, и҆́же съ ним кꙋ́пнѡ хотя́ше ѹ҆мре́ти, в̾ дрꙋ́жество прія́тъ, ничто́же сꙋмня́ся ѡ҆ не́мъ. Па́ки и҆́ніи два̀, не и҆скꙋси́вше взае́мныя вѣ́рности своея̀, сквозѣ̀ пꙋсты́ню и҆мѣ́яхꙋ пꙋ́ть сво́й. и҆̀хже пред̾ꙋстрѣ́те медвѣ́дь ѿ лꙋ́га. ́є҆го́же ѹ҆зрѣ́въ ́є҆ди́нъ, л. рк҃г бѣжа̀ на дре́во, а҆ дрꙋгі́й па́дъ на зе́млю тая̀ въ себѣ̀ дыха́ніе, пребы́сть а҆́ки ме́ртвъ. прише́дъ ѹ҆́бѡ ѕвѣ́рь ѡ҆боня́ше ѿ ѹ҆́стъ и҆ ѹ҆ше́съ дыха́ніе въ не́мъ, и҆ мнѣ́въ того̀ ме́ртва, па́ки ѿи́де въ лꙋ́гъ. тогда̀ вопросѝ ѻ҆́въ съ дре́ва: что̀ ѕвѣ́рь пошепта̀ ́є҆мꙋ̀ въ ѹ҆́хо; ѿвѣща̀ лежа́й, сіѐ: да не па́ки съ таковы́ми пꙋ́ть и҆мѣ́ю. Двои́хъ ѿ при́тчей наꙋчи́хомся. да пре́жде нꙋ́жды и҆скꙋша́емъ дрꙋ́га, и҆ да́же до сме́рти сохрани́мъ вѣ́рность къ ни́мъ. Но Ѽле бѣ́дства на́шегѡ! мы̀, ́є҆́же бы дꙋ́шы на́шя положи́ти за дрꙋ́ги, и҆́хъ дꙋ́шъ и҆́щемъ, ѹ҆бива́емъ тѣ́хъ пре́жде сме́рти, предаю́де та́йная и҆́хъ л. рк҃г ѡ҆б. на ꙗ҆́вность. почто́же та́ко; поне́же нѣ́сть стра́ха гдⷭ҇ня въ на́съ, нѣ́сть добродѣ́телей соверше́нства, Сія̑ (то́же бо непреста́нно гл҃ю) взы́щемъ. и҆ вся̑ ва́мъ бꙋ́дꙋтъ во бл҃го́е, вся̑ бꙋ́дꙋтъ на по́лзꙋ. бꙋ́детъ и҆ и҆́стинная дрꙋ́жба.