Ѡ҆ киче́ніи

Дѣ́тское ѡ҆брѣта́ется и҆гра́лищное ѻ҆рꙋ́діе нѣ́кое, высостꙋ́пцы, и҆лѝ ѿ дыба́нія ды́би[1] и҆менꙋ́емое. Кото́рагѡ и҆гры̀ составля́юще ма́лыя дѣ́ти ѹ҆потребля́ютъ си́це: ́є҆́же вы́шшымъ и҆̀мъ зрѣ́тися, подставля́ютъ, высостꙋ́пцы ѻ҆́ныя нога́мъ, и҆ та́кѡ и҆гра́юще хо́дят на ни́хъ возвы́шенни.

Таково́мꙋ нѣ́ціи дѣ́тскомꙋ подо́бящеся ѹ҆мꙋ̀, ве́щію бо нижѐ то́й и҆мꙋ́ще, прⷭ҇нѡ тща́тся во́зрастꙋ своемꙋ̀ ла́коть прида́ти, и҆ ѹ҆жѐ не высостꙋ́пцами, но а҆́ки бы нѣ́коею возвы́шенни си́лою, всѣ́хъ преⷣ собо́ю сꙋ́дятъ в̾ нижа́йшихъ, мня́ще себѐ бы́ти и҆споли́нѡⷡ҇. Что́же слꙋча́ется л. ч҃з дѣ́темъ ѻ҆́нымъ, ꙗ҆́кѡ мно́жицею до́лꙋ ѡ҆проверга́ются с̾ ды́бовъ. Сія̀, и҆ гѡ́ршая стра́ждꙋтъ гордели́віи, и҆зстꙋпле́ніемъ бо ѹ҆ма̀ содержи́ми, ́є҆гда̀ ни себѐ познава́ютъ, нижѐ сꙋ́щая пред̾ нога́ма зря́тъ, па́даютъ, и҆дѣ́же не ча́ютъ.

То́еюжде го́рдости стра́стію ѡ҆блада́емагѡ, кра́снѣ Ѵтиноѕеѡ́нъ начерта̀ златоꙋ́стый ѹ҆чи́тель, ́є҆го́же, занѐ мно́гѡ поле́зенъ ́є҆́сть, здѣ̀ наро́чнѣ присовокꙋпля́ю. Что̀ (речѐ) простира́еши вы́ю; что́же[2] вѣ́жди возно́сиши; что̀ пе́рси надыма́еши; вла́са не мо́жеши сотвори́ти бѣ́ла, и҆лѝ че́рна, и҆ ꙗ҆́кѡ всѣ́хъ держа̀, та́кѡ воздꙋхоше́ствꙋеши. Ни лѝ хотѣ́лъ бы ́є҆сѝ ты̀, л. ч҃з ѡ҆б. да крилѣ̀ и҆зрастꙋ́тъ тебѣ̀: да не стꙋпа́еши по землѝ; ни лѝ и҆ чꙋ́до бы́ти жела́еши; и҆ ѹ҆жѐ ни лѝ чꙋ́до себѐ сотвори́лъ ́є҆сѝ; Чл҃къ ѹ҆́бѡ сы́й, лѣта́ти и҆́щеши, па́че же и҆ лѣта́я ѿ внꙋ́трь, и҆ надыма́яся ѿвсю́дꙋ. Что́ тя нарекꙋ̀; и҆ низложꙋ̀ твоѐ киче́ніе. а҆́ще тя̀ рекꙋ̀ пе́пелъ, и҆ пра́хъ, и҆ ды́мъ, и҆ пе́рсть, рѣ́хъ ѹ҆́бѡ хꙋ́дость: но ́є҆щѐ и҆спы́тнѡ ѻ҆́браза не постигох, ́є҆го́же хотѣх, и҆́бо и҆ ѡ҆пꙋ́хлость, и҆ напыще́ніе, и҆ возгорѣ́ніе, и҆ всю̀ тщетꙋ̀ твою̀ предста́вити жела́лъ бы́хъ. Кото́рый ѹ҆́бѡ ѡ҆бря́щемъ си́мъ ключи́мый ѻ҆́бразъ; мнѣ̀ мня́тся и҆згре́бію запале́нномꙋ, бли́зъ ѹ҆подо́битися сі́и: и҆́бо ѻ҆́но мни́тся л. ч҃и по пожа́рѣ надыма́тися и҆ превы́шше стоя́ти. Ма́лое же рꙋкѝ ѡ҆сяза́ніе не стерпѣ́вши низпа́даетъ всѐ, и҆ пе́пела вся́кагѡ хꙋдѣ́йшее быва́етъ. Такѡвы́я сꙋ́ть и҆ си́хъ дꙋ́шы: и҆́бо дме́ніе и҆́хъ тщи́мъ и҆ прилꙋ́чшимся прираже́ніе низлага́емо быва́етъ, гордели́вомꙋ бо нꙋ́жда ́є҆́сть весма̀ и҆ не́мощнꙋ бы́ти: нѣ́сть бо высота̀ здра́ва сицевы́хъ, но ꙗ҆́коже ворво́ли ѹ҆до́бнѣ разсѣда́ются, та́кѡ и҆ сі́и погиба́ютъ ѹ҆до́бнѣ. И҆зря́днѡ и҆ ꙗ҆́снѡ, тѣ́хже ско́рꙋю поги́бель начерта̀ Дв҃дъ цр҃ь, ви́дѣхъ, речѐ:[3] нечести́ваго превознося́щася и҆ вы́сящася ꙗ҆́кѡ ќє́дры лѷва́нскія, и҆ ми́мѡ и҆до́хъ, и҆ сѐ не бѣ̀, взыска́хъ, и҆ не ѡ҆брѣ́теся мѣ́сто ́є҆гѡ̀. л. ч҃и ѡ҆б. Ѹ҆́бѡ а҆́ще то́ль ́є҆́сть многобѣ́дно киче́ніе, а҆́ще сія̑ ѡ҆жида́ютъ поврежде́нныхъ и҆́мъ, взы́щемъ бл҃гоꙋго́дное врачевство̀ на толи́кій вре́дъ. взы́щемъ ко всемꙋ̀ поле́зное смире́ніе.