Пꙋ́ть дво́йственный[1].

Є҆ди́нъ вхо́дъ всѣ́мъ ́є҆́сть[2] въ жи́знь настоя́щꙋю, подо́бенъ же и҆ и҆схо́дъ. ниже́ бо цр҃ь и҆но́е и҆мѣ̀ рожде́нія нача́ло, гл҃етъ дх҃ъ прест҃ы́й. а҆́ще же та́кѡ ́є҆́сть, (ꙗ҆́кѡже и҆ вои́стиннꙋ та́кѡ ́є҆́сть) что̀ ѹ҆́бѡ глаго́лется пꙋ́ть дво́йственный; сіѐ: жесто́кая и҆ прохла́дная, приско́рбная и҆ простра́нная жи́знь на́ша, ꙗ҆́коже и҆ гдⷭ҇ь раздѣля́етъ ́є҆го̀. Простра́нная (гл҃я) врата̀ и҆ широ́къ пꙋ́ть,[3] вводя́й въ па́гꙋбꙋ, и҆ мно́зи сꙋ́ть входя́щіи и҆́мъ. ѹ҆́зкая врата̀ и҆ тѣ́сенъ пꙋ́ть вводя́й къ живо́тъ, и҆ ма́лѡ и҆́хъ, и҆̀же ѡ҆брѣта́ютъ ́є҆го̀. Ѹ҆̀бо, а҆́ще раздѣле́ни пꙋтѝ сицево̀ ́є҆́сть: и҆ не пꙋтѝ ѹ҆жѐ то́кмѡ л. ́є҃ ѡ҆б. сама́гѡ, но и҆ вра́тъ въ живо́тъ вѣ́чный вводя́щихъ: а҆́ще тѣснота̀ и҆ простра́нство, ѹ҆́зкость и҆ широта̀, ра́знствіе и҆́хъ, да и҆скꙋша́емъ себѐ, на каково́мъ пꙋтѝ ́є҆смы̀: и҆ каковы́ми вхо́димъ враты̀: нѣ́сть бо неради́вѣ живꙋ́щымъ возмо́жно ѡ҆брѣстѝ бл҃же́нный пꙋ́ть, ꙗ҆́коже и҆ гдⷭ҇ь сказа̀ на́мъ. ма́ло (ре́къ) и҆̀хъ, и҆̀же ѡ҆брѣта́ютъ ́є҆го̀. тѣ́мже и҆ ко взыска́нію подая̀ спо́собъ, гл҃етъ:[4] Сто́йте на пꙋте́хъ, и҆ ви́дите, и҆ вопроси́те ѿ сте́зь дре́внихъ, и҆́хже бꙋ́детъ пꙋ́ть бл҃гъ, ходи́те по не́мъ, и҆ ѡ҆бря́щете прохлажде́ніе[5] дꙋша́мъ ва́шымъ. Ѽ а҆́ще бы мы̀ понѐ сицево́е ѡ҆ пꙋте́хъ тѣ́хъ, ꙗ҆́коже дре́вніи л. ѕ҃ любомꙋ́дрцы разсꙋжде́ніе и҆мѣ́ли! Гл҃го́лютъ бо: ꙗ҆́кѡ широта̀ ́є҆ди́нагѡ пꙋтѝ цвѣта́ми ѹ҆сла́нна, и҆ разли́чными ѡ҆би́лꙋетъ ѻ҆во́щіями по страна́мъ. ́є҆мꙋ́же присѣдя́тъ вся̀ мни̑мая бл҃га̑я, че́сть, гл҃ю, бога́тство, тишина̀, сла́сти, и҆ прохла́ди ра́зныя, та́можде и҆ непра́вда, жесто́кость, невѣ́ріе, го́рдость, лжа̀, несогла́сіе, ле́сть, клев́єты̀, безсовѣ́тіе, и҆ про́чія ѕлѡ́бы. восходя́щій же пꙋте́мъ си́мъ, дости́гъ верха̀ сама́гѡ, и҆́же ́є҆́сть ве́сь те́рнія и҆ ка́менія и҆спо́лненный и҆ тѣ́сенъ ѕѣлѡ̀. и҆ ѹ҆жѐ тѣсноты̀ ра́ди немогꙋ́щъ возврати́тися, нꙋ́ждꙋ и҆́мать стремъгла́въ летѣ́ти ѿтꙋ́дꙋ во ѻ҆́гнь. сіѐ л. ѕ҃ ѡ҆б. мню̀ и҆́стое и҆ при́точникъ гл҃етъ: [6] ́є҆́сть пꙋ́ть, и҆́же чл҃кѡмъ мни́тся пра́въ бы́ти, послѣ́дняя же ́є҆гѡ̀ пріи́дꙋтъ во дно̀ а҆́дово. И҆́нъ же пꙋ́ть ве́сь же́стокъ, ве́сь ка́меньми и҆ те́рніемъ по́сланный. Та́мѡ положѝ Бг҃ъ пра́вдꙋ, цѣломⷣріе, терпѣ́ніе, вѣ́рность, чⷭ҇тотꙋ̀, воздержа́ніе, и҆́стинꙋ, бл҃госовѣ́тіе, согла́сіе, премⷣрость, и҆ про́чія добродѣ́тели. Съ ни́миже и҆ ѹ҆бо́жество, безче́стіе, трꙋ́дъ болѣ́зни, и҆ го́рести вся̀, сі́и сꙋ́ть присѣдѣ́тели пꙋтѝ бл҃же́ннагѡ. До́лженъ ѹ҆́бѡ съ тѣ́ми дрꙋ́жбꙋ и҆ пріи́скренность и҆мѣ́ти, хотя́й пꙋтѝ сегѡ̀ многожела́нный, свѣ́тлый и҆ прекра́сный дости́гнꙋти ве́рхъ, и҆́же ́є҆́сть нача́ло л. з҃ вѣ́чнагѡ бл҃же́нства. Мꙋдрова́ніе сіѐ (ꙗ҆́коже рѣ́хомъ) дре́внихъ любомꙋ́дрц́євъ, и҆ приꙋподобле́ніе то́кмѡ. ве́щи ли хо́щемъ; потщи́мся съ добродѣ́тельми преходи́ти жи́знь на́шꙋ, доне́лѣже не пріи́детъ къ на́мъ гла́съ гл҃ющій: коне́цъ прише́лъ ́є҆́сть, прише́лъ коне́цъ тебѣ̀. Воста́ни, сѐ пришло̀[7] ́є҆́сть плете́ніе на тя̀ живꙋ́щаго на землѝ, прише́лъ ́є҆́сть го́дъ, прише́лъ ́є҆́сть де́нь, ни со пли́щемъ, ни со болѣ́знію, ны́нѣ въ бли́зъ разлію̀ гнѣ́въ мо́й на тя̀, и҆ сконча́ю ꙗ҆́рость мою̀ на тебѣ̀, и҆ ѡ҆сꙋждꙋ̀ тебѐ по пꙋте́мъ твои́мъ.

л. з҃ ѡ҆б.