Ѡ҆ чте́ніи кни́гъ.

Птенцы̀ во́дныи а҆́ще и҆ малѣ́йшіи бꙋ́дꙋтъ, бы́стрыя во́дъ стрꙋѝ прехо́дятъ безбѣ́днѡ, и҆ на са́мыхъ глꙋбоча́йшихъ мѣ́стѣхъ, вся́кагѡ погрꙋже́нія свобо́дни сꙋ́ть. Вра́нъ же и҆ ́є҆мꙋ̀ подо́бніи, а҆́ще и҆ столѣ́тны бꙋ́дꙋтъ, всегда̀ погрꙋжа́ются, л. ѯ҃д ѡ҆б. и҆ никогда́ же въ вода́хъ без̾ бѣды̀ пребꙋ́дꙋтъ.

Присѣдя́щіи кни́гъ чте́нію, всегда̀ безбѣ́дное, ти́хое, и҆ немяте́жное, посредѣ̀ во́лнъ, посредѣ̀ ви́хрѡвъ мі́ра сегѡ̀, безбѣ́днѣ, а҆́ки не в̾ мі́рѣ сы́й, житіѐ веде́тъ. А҆ ѹ҆страня́ющіися пособи́телей таковы́хъ, (кни́гъ гл҃ю) а҆́ще и҆ ѕѣлѡ̀ мно́гѡ лѣ́тъ поживꙋ́тъ: всегда̀ бѣ́дствовати, всегда̀ погрꙋжа́тися бꙋ́дꙋтъ, и҆ всѐ и҆́хъ житіѐ, ничто́же и҆но́е, то́чію непреста́нное бꙋ́дет погрꙋже́ніе. Мно́гаго, до́брѣ хотя́щым жи́ти и҆скꙋ́сства тре́бѣ ́є҆́сть, и҆ нижѐ ѻ҆́но весма̀ прихо́дит съ лѣ́ты, но и҆́щꙋщіи ѡ҆брѣта́ютъ ́є҆го̀, и҆ нижѐ ста́ръ, нижѐ ю҆́нъ въ се́мъ ра́знство и҆мѣ́ютъ, л. ѯ҃́є вѣ́сть бо писа́ніе и҆ ю҆́ныхъ и҆скꙋ́сство стяжа́вшихъ, па́че ста́рыхъ предпочита́ти, ꙗ҆́коже и҆ и҆́ндѣ сѣди́ною нарица́етъ мꙋ́дрость. А҆́ще сія̀ и҆ в̾ ю҆нѣ́йшемъ чл҃цѣ бꙋ́детъ. Сѣди́нꙋ[1] ѹ҆́бѡ и҆́мꙋтъ премⷣрость ѡ҆брѣ́тшіи. И҆ рцы́ ми, что̀ возмо́жетъ чл҃кꙋ толи́кое принестѝ и҆скꙋ́сства соверше́нство, ꙗ҆́коже чте́ніе кни́гъ! Та́мѡ бо зри́мъ, а҆́ки въ зерца́лѣ ѹ҆хищре́ніе кова́рныхъ, та́мѡ лсти́телей, та́мѡ ласка́телей: та́мѡ проны́рливых сѣ́ти разрѣша́емъ ѹ҆до́бнѣ, та́мѡ превраща́ющихъ до́мы и҆ црⷭ҇тва, без̾ трꙋда̀ низлага́емъ, и҆ а҆́ки перна́ты прехо́димъ рвы̀ лꙋка́выхъ без̾ вре́днѣ. Да кра́тцѣ речем: коли́кагѡ и҆́ным столѣ́тный и҆ тысящалѣ́тный (а҆́ще бы л. ѯ҃́є ѡ҆б. си́це до́лгое житіѐ и҆мѣ́ти) живот не снискꙋ́етъ и҆скꙋ́сства, сіѐ в̾ кра́тком вре́мени ѡ҆бря́щꙋтъ прочи́тывающіи кни́ги. А҆́ще бо и҆ мно́гагѡ (гл҃етъ Соломѡ́нъ) и҆скꙋ́сства жела́етъ кто̀, да вѣ́сть пре́ждняя, и҆ бы́ти хотя́щая разсмо́тритъ. вѣ́сть ѡ҆браще́ніе слове́съ, и҆ разрѣше́ніе гада́ній. Сія́ же вся̑ ѿ чте́нія кни́гъ бꙋ́дꙋтъ на́мъ. Но слы́шимъ ́є҆щѐ: каковꙋ́ю прино́сит коры́сть взыска́ніе и҆скꙋ́сства, чесѡ́ же лиша́етъ нерадя́щихъ ѡ҆ нем. И҆скꙋ́сніи а҆́ще и҆ не́мощни бꙋ́дꙋтъ, мно́жае ѡ҆ба́че мо́гꙋтъ па́че воѡрꙋже́нныхъ мꙋже́й, и҆ не моѐ сло́во сіѐ, [2] но вне́млемъ что̀ Є҆клісіа́стъ гл҃етъ Бл҃га мрⷣость па́че си́лы: и҆ па́ки: л. ѯ҃ѕ бл҃га мрⷣость па́че сосꙋ́дъ ра́тныхъ, ́є҆́же и҆ прикла́домъ ѹ҆тверди́ти не ѡ҆бинꙋ́лся ́є҆́сть: Пріи́де, речѐ, на ня̀ (сі́есть на гра́дъ) цр҃ь вели́къ, и҆ ѡ҆́крестъ ѡ҆бля́же, и҆ содѣва́етъ ѡ҆ не́мъ ѡ҆гра́ды своя̀, и҆ ѡ҆брѣ́те же въ не́мъ мꙋ́жа ни́ща и҆ мꙋ́дра, и҆ се́й спасѐ гра́дъ мꙋ́дростію свое́ю. Та́кѡ смятѐ сло́во премꙋ́дро сегѡ̀ цр҃я̀ си́лна, ꙗ҆́кѡ ѡ҆ста́ви воева́ти на гра́дъ. А҆́ще же кто̀ и҆ цр҃ь бꙋ́детъ, но не и҆скꙋ́сенъ, погꙋби́тъ лю́ди своя̀.[3] И҆ не то́кмѡ лю́ди, но и҆ црⷭ҇тво и҆ въ негѡ̀ мѣ́сто воцр҃я́ется ни́щій, бл҃гъ (речѐ писа́ніе) ра́бъ ни́щъ и҆́нъ и҆ мꙋ́дръ, па́че цр҃я̀ ста́ра безꙋ́мна,[4] и҆́же не разꙋмѣ̀ внима́ти ́є҆щѐ: ꙗ҆́кѡ и҆з̾ до́мꙋ ю҆́жникъ и҆зы́дет црⷭ҇твовати л. ѯ҃ѕ ѡ҆б. а҆ въ црⷭ҇твіи ́є҆гѡ̀ роди́тся ни́щъ. Но не всѣ́мъ глаго́леши црⷭ҇твовати возмо́жнѡ, ѹ҆́бѡ нижѐ всѣ́мъ и҆ска́ти премⷣрости, послѣ́дователнѣ, нижѐ всѣ́мъ нꙋ́жда ́є҆́сть кни́ги честѝ. Ѿвѣщева́ю, а҆́ще кто̀ нижѐ честѝ, нижѐ ѿкꙋ́дꙋ по́льзы и҆́щетъ, и҆ то́й до́лженъ ́є҆́сть понѐ за стра́хъ прилѣжа́ти чте́нію, ꙗ҆́кѡ сія̀ Гдⷭ҇ь [5] повелѣ́лъ ́є҆́сть: помяни́те, ре́къ днѝ вѣ́чныя, и҆ разꙋмѣ́йте лѣ́та ро́да родѡ́въ, помяни́те не про́стѡ но и҆ разꙋмѣ́йте лѣ́та ро́да родѡ́въ, ́є҆гда̀ раздѣля́ше вы́шній ꙗ҆зы́ки, ́є҆гда̀ разсѣ́я сы́ны А҆да́мовы, и҆ прѡ́тчая: и҆ прѡ́тчая:

Таково́е и҆сполня́юще Бж҃іе повелѣ́ніе, и҆ вели́кихъ свобо́дни ꙗ҆ви́мся л. ѯ҃з ка́зній, и҆ в̾ лꙋ́чшее дости́гнемъ гдⷭ҇не [6] позна́ніе. А҆́ще бо по А҆пⷭ҇тловꙋ ѹ҆че́нію. Хрⷭ҇то́съ ́є҆́сть Бж҃ія си́ла, Бж҃ія премⷣрость, ѹ҆́бѡ не вѣ́дый писа́нія, не вѣ́сть Бж҃ія си́лы и҆ ́є҆гѡ̀ премⷣрости. Є҆́же ́є҆́сть Гдⷭ҇ь на́шъ І҆и҃съ Хрⷭ҇то́съ что̀ и҆ са́мъ в̾ Є҆ѵгліи сказа̀ на́мъ: И҆спыта́йте ре́къ, писа́нія, ꙗ҆́кѡ вы̀ мнитѐ въ ни́хъ[7] и҆мѣ́ти живо́тъ вѣ́чный, и҆ та̀ сꙋ́ть свидѣ́тельтвꙋющая ѡ҆ мнѣ̀. Та́же? ѡ҆кая́нства и҆ поги́бели на́шея жалѣ́я, воззва̀ гл҃я: разꙋмѣ́хъ ва́съ, ꙗ҆́кѡ любвѐ Бж҃ія не и҆́мате [8] в̾ себѣ̀. Сія́ же и҆ въ на́съ са́мыхъ разсꙋди́ти возмо́жемъ: а҆́ще лю́бимъ кого̀ не и҆ писа́нія ли тогѡ̀ любопы́тнѣ прочи́тываемъ, и҆ со вся́кою л. ѯ҃з ѡ҆б. бо́рзостію и҆сполня́ем повелѣ́нная, но поне́же любвѐ Гдⷭ҇ня и҆зся́кла в̾ на́съ, тѣ́мъ въ толи́кое дости́гше ѡ҆каянство: нижѐ и҆́щемъ писа́нія ́є҆гѡ̀, и҆дѣ́же позна́ти бы на́мъ подоба́ло [9] бл҃же́нство на́ше: ꙗ҆́кѡ ѹ҆го́дная Бг҃ови на́мъ свѣ́дома сꙋ́ть.

Вѣ́дя ѹ҆́бѡ вѣ́даимъ, что̀ ѿ Гдⷭ҇а за толи́кое нерадѣ́ніе на́ше, гряде́тъ [10] на на́съ: Ѻ҆́гнь (речѐ) возгори́тся ѿ ꙗ҆́рости моея̀, разжже́тся до а҆́да преиспо́днягѡ. Снѣ́сть зе́млю, и҆ жи́та ́є҆я̀, и҆ попали́тъ ѻ҆снова́нія гѡра́мъ, соберꙋ̀ на ни́хъ ѕла̑я, и҆ стрѣ́лы моя̀ сконча́ю въ ни́хъ, та́яти и҆́мꙋтъ гла́домъ, и҆ снѣдя́тъ и҆́хъ пти́цы ѹ҆грызе́ніемъ го́ркимъ. Зꙋ́бы ѕвѣре́й послю̀ на ны̀, л. ѯ҃и с̾ ꙗ҆́ростію пресмыка́ющихся по землѝ. Ѿвнѣ̀ ѡ҆безча́дитъ и҆̀хъ ме́чь, и҆ и҆звнꙋ́трь и҆́хъ стра́хъ, ꙗ҆́кѡ ро́дъ се́й погꙋби́вый совѣ́тъ, и҆ нѣ́сть въ ни́хъ хꙋдо́жества. Не смы́слиша разꙋмѣ́ти, ꙗ҆́коже вся̑ сія̀ пріи́дꙋтъ во грядꙋ́щее вре́мя.

И҆ вои́стиннꙋ безъѿвѣ́тни ́є҆смы̀ ны́нѣ, не помышля́юще разꙋмѣ́ти что̀ бꙋ́детъ посе́мъ: а҆́ще бо бы́хомъ члѝ писа́нія бж҃е́ств́єнная, вѣ́дали бѣ́хомъ си́лꙋ и҆ вели́чество дѣ́лъ Гдⷭ҇нихъ, ѿню́дꙋже распространи́лся бы стра́хъ Гдⷭ҇нь въ дꙋшѝ на́шей, и҆ска́ли бы совѣ́та, и҆ и҆мѣ́ли попече́ніе, ка́кѡ ѹ҆годи́ти Гдⷭ҇ви.

И҆мѣ́ютъ нѣ́цыи и҆звѣ́тъ сицевы́й: а҆́ще гл҃ютъ и҆ чте́мъ, ѡ҆ба́че л. ѯ҃и ѡ҆б. не разꙋмѣва́емъ. Какова́ же ѿсю́дꙋ по́льза бꙋ́детъ; ѿвѣщава́ю, ꙗ҆́кѡ разꙋмѣ́ти бꙋ́демъ, а҆́ще восхо́щемъ. И҆ вне́млемъ Златоꙋ́стовымъ словес́є́мъ, что̀ ѻ҆́нъ ко гл҃ющымъ, ꙗ҆́кѡ не разꙋмѣ́ютъ Па́ѵловыхъ посла́ній, ѿвѣщава́етъ гл҃я: Сіѐ (речѐ) не ѿ ненаꙋче́нія, [11] но ѿ нехотѣ́нія ча́стѡ бесѣ́довати бл҃же́нномꙋ семꙋ̀ (си́рѣчь Па́ѵлꙋ а҆пⷭ҇лꙋ) ниже́ бо мы̀, ́є҆ли̑ка вѣ́мы, а҆́ще ка́я вѣ́мы за бы́стрость и҆ ѡ҆стротꙋ̀ ра́зꙋма свѣ́мы, но поне́же ча́сто держи́мся мꙋ́жа сегѡ̀, и҆ велмѝ прилѣжи́мъ ѡ҆ не́мъ. (та́же речѐ) тѣ́мже и҆ вы̀, а҆́ще хо́щете со ѹ҆се́рдіемъ внима́ти чте́нію, ничто́же и҆́нагѡ тре́бовати и҆́мате: не ло́жно бо л. ѯ҃ѳ ́є҆́сть Хрⷭ҇то́во сло́во ре́кшее: и҆щи́те[12] и҆ ѡ҆бря́щете, толцы́те, и҆ ѿве́рзется ва́мъ, (и҆ па́ки та́мже) ѿсю́дꙋ прозябо́ша безчи́сл́єнная ѕла̑я. ѿ неразꙋмѣ́нія писа́ній, ѿсю́дꙋ мно́гая ́є҆ресе́й прозябѐ па́гꙋба. Ѿсю́дꙋ неради́вая житія̀, ѿсю́дꙋ безконе́чніи трꙋ́дѡве. Ꙗ҆́коже бо свѣ́та лише́нный, не про́стѡ[13] ше́ствꙋетъ, та́кѡ не взира́ющіи к̾ лꙋчѝ бж҃е́ственныхъ писа́ній, мно́гѡ понꙋжда́ются и҆ ча́стѡ согрѣша́ти, а҆́ки во тмѣ̀ вселютѣ́йшей ше́ствꙋюще. До здѣ̀ Златоꙋ́стъ, ѿ негѡ́же наꙋчи́хомся: да не ́є҆ди́ною, но и҆ мно́гажды честѝ подоба́ет, до́ндеже ѿкры́ется на́мъ ра́зꙋмъ писа́ній. Вѣ́мы и҆ сія̀ какѡва̀ ѕла̑я сря́щꙋтъ л. ѯ҃ѳ ѡ҆б. на́съ ѿ неразꙋмѣ́нія писа́ній, мы́ же спи́мъ ничто́же такова́гѡ в̾ себѣ̀ помышля́юще.

Ѡ҆брѣта́ются нѣ́гдѣ ревни́тели бл҃гоговѣ́нія, но не по ра́зꙋмꙋ, предпочита́юще житія̀ и҆ по́вѣсти мꙋже́й ст҃ых, па́че бжⷭ҇твеннагѡ писа́нія, и҆ а҆́ще не па́че ѡ҆боегѡ̀, то̀ понѐ па́че ве́тхагѡ завѣ́та, не помина́юще си́хъ, ꙗ҆́кѡ во ѡ҆бои́хъ ́є҆ди́нъ и҆ то́йжде къ на́мъ ́є҆́сть бесѣ́дꙋющій [14] Гдⷭ҇ь. и҆, не хотя́ще внима́ти: ꙗ҆́кѡ, во ѡ҆бое́мъ завѣ́тѣ писа́нія, и҆ наказꙋ́ющіи пра́ва, и҆ ѡ҆бѣщава́ющи и҆́стинна, и҆ претя́щи стра́шна сꙋ́ть. Да не вознепщꙋ́етъ кто̀ здѣ̀ на житія̀ и҆ по́вѣсти ст҃ы́хъ хꙋлѣ̀ налага́тися, но да сіѐ бꙋ́детъ л. ѻ҃ и҆звѣ́стно, ꙗ҆́кѡ па́че вся́кагѡ[15] свѣ́дѣнія, и҆ па́че вся́кагѡ ѹ҆че́нія, бж҃е́ственное писа́ніе, несравне́ннѣ бо́льши ́є҆́сть.

До́брѣ творя́тъ чтꙋ́щіи по́вѣсти ст҃ы́хъ ѻ҆ц҃ъ. бл҃гоче́стнѣ ѹ҆праждня́ются и҆спытꙋ́ющіи житія̀ мꙋже́й ди́вныхъ, просла́вленныхъ вели́чіем Бж҃іимъ. и҆ ѡ҆боегѡ̀ по́ла ст҃ых, въ ни́хъ же ѹ҆дивѝ гдⷭ҇ь хотѣ́нія своя̀. но сія̀ вся̀ доброхо́тства сꙋ́ть. а҆ ́є҆́же честѝ Бж҃е́ств́єнная писа́нія: бг҃ъ повелѣ́лъ ́є҆́сть. да не ѿстꙋ́пятъ гл҃я кни́ги зако́на сегѡ̀[16] ѿ ѹ҆́стъ твои́хъ. но да поꙋча́ешися в̾ ни́хъ де́нь и҆ но́щь. а҆ неради́выхъ, же́стокѡ, ꙗ҆́коже предрѣ́хом, ѡ҆бѣща́ет казни́ти, и҆ мꙋ́чити без посла́бнѡ. л. ѻ҃ ѡ҆б.[17] То́жде и҆ Па́ѵелъ Тімоѳе́ю А҆пⷭ҇лꙋ повелѣва́етъ: Внемлѝ, ре́къ, чте́нію, и҆ себѣ̀, (а҆́ще ѹ҆жѐ и҆ [18] вре́мя ѿше́ствія ́є҆гѡ̀ настоя́ше.) кни́ги принестѝ повелѣва́етъ. почто́ же; а҆́ще не чте́нія ра́ди. Про́чее, с̾ каково́ю на́съ ре́вностію: да бꙋ́демъ въ чте́ніи прилѣ́жни сщ҃е́нныхъ писа́ній. ѹ҆вѣщава́етъ І҆ѡа́ннъ Златоꙋ́стый, внемли́мъ: Послꙋ́шайте, молю̀ всѝ жите́йстіи лю́діе, и҆стяжи́те кни́ги, (сирѣ́чь Бі́блію, Бі́бліа бо лати́нски, а҆ [19] Гре́чески ВІ҂ВЛІА, в̾ славе́нскомъ ꙗ҆зы́цѣ кни́ги, ве́тхагѡ и҆ но́вагѡ завѣ́та и҆менꙋ́ются, ꙗ҆́коже и҆ и҆з̾ слове́съ сегѡ̀ ѹ҆ч҃тля возмо́жнѡ разꙋмѣ́ти, ́є҆гда̀ гл҃етъ: стяжи́те л. ѻ҃а кни́ги цѣльбы̀ дш҃е́вныя.) а҆́ще ничто̀ и҆но́е хо́щете, то̀ понѐ Но́вый завѣ́тъ, (си́рѣчь вторꙋ́ю ча́сть Бі́бліи.) стяжи́те А҆пⷭ҇лская дѣя́нія, Бл҃говѣствова́нія ѹ҆чи́телей всегда́шнихъ. Ѻ҆ба́че нижѐ та́кѡ возбꙋжда́емся ко взыска́нію писа́ній бж҃е́ственныхъ, и҆ нижѐ ве́тхагѡ нижѐ но́вагѡ тща́ніе и҆́мамы взыска́ти Завѣ́та. Бо́льшее нѣ́что ѕло̀ въ на́съ ́є҆́сть. не то́кмѡ си́лы писа́ній вѣ́дати, но нижѐ какѡвы́я та́мѡ кни́ги ѡ҆брѣта́ются, зна́ти понꙋжда́емся. Болѣ́зноваше І҆ѡа́ннъ Златоꙋ́стый, ꙗ҆́кѡ не всѝ вѣ́дятъ, ꙗ҆́коже вѣ́дати досто́итъ Па́ѵлова посла́нія. Та́кѡ, речѐ, нѣ́цыи л. ѻ҃а ѡ҆б. тогѡ̀ не вѣ́дятъ, ꙗ҆́кѡ нижѐ число̀ посла́ній вѣ́дятъ и҆звѣ́стно. То́жде и҆ бо́лшее ѡ҆ на́съ засвидѣ́тельствовалъ бы ѹ҆чи́тель се́й. Ѹ҆́бѡ да понѐ чи́нъ ю҆́нымъ кни́гъ бжⷭ҇твеннагѡ писа́нія бꙋ́детъ и҆звѣ́стенъ, наро́чнѣ полага́ется здѣ̀.

л. ѻ҃в