Стіхослѡ́вія четвє́ртая,

жела́тельнагѡ къ бг҃у восклица́нія.

Любо́вію твое́ю бжⷭтвенною да оѹ҆я́звенно бу́детъ се́рдце моѐ, ѡ бж҃е мо́й! да взыщу̀ де́нь и҆ но́щь тебѐ гдⷭа моего̀, да все́ю душе́ю мое́ю къ тебѣ̀ присоедине́нъ бу́ду, да жего́ма и҆ пали́ма бу́детъ душа̀ моя̀ бжⷭтвеннымъ твои́мъ жела́ніемъ, да при́снѡ сіѐ и҆́мамъ душѝ мое́й во оѹ҆тѣше́ніе, да при́снѡ сіѐ и҆́мамъ себѣ̀ въ ти́хое приста́нище и҆ непрело́жный поко́й. Всѐ жела́ніе и҆ раче́ніе моѐ въ тебѣ̀ є҆ди́номъ да бу́детъ, гдⷭи: да ве́сь въ бж҃е́ственную любо́вь твою̀ оѹ҆глубле́нъ бу́ду, и҆ соедине́нъ бы́вши, никогда́же ѡⷮ тебѐ гдⷭа моегѡ̀ ѡⷮлуча́юся.

Па́ки къ бг҃у немо́лчнѡ восклица́й:

[в҃] Да ничто́же мя̀ ѡⷮто́ргнетъ, да ничто́же мя̀ ѡⷮлучи́тъ ѡⷮ бж҃е́ственныя твоея̀ любвѐ, ѡ бж҃е мо́й! да ничто́же возбрани́тъ, да ничто́же пресѣче́тъ, ни ѻ҆́гнь, ни ме́чь, ни гла́дъ, ни горе́ніе, ни глубина̀, ни высота̀, ни настоя̑щая, ни бу̑дущая, то́чію є҆ди́но сіѐ да пребу́детъ въ душѝ мое́й вы́ну (Ри́м. заⷱ ч҃ѳ): ничто́же и҆́но да возжела́ю въ вѣ́цѣ се́мъ, гдⷭи, но де́нь и҆ но́щь да взыщу̀ тебѐ гдⷭа моего̀: и҆ да ѡ҆брѣ́тъ, вѣ́чное сокро́вище и҆ бога́тство пріиму̀, и҆ всѣ́хъ бла̑гъ сподо́блюся.

Па́ки къ бг҃у те́плѣ вопі́й:

[г҃] Всѐ оѹ҆пова́ніе моѐ, всю̀ наде́жду мою̀ въ тебѣ̀ да полага́ю: всѐ сокро́вище моѐ, всѐ бога́тство въ тебѣ̀ да и҆́мамъ: вся̀ сла́ва и҆ наслажде́ніе моѐ въ тебѣ̀ є҆ди́номъ да бу́детъ, гдⷭи. Си́мъ є҆ди́нѣмъ не прельщу́ся, нижѐ вотщѐ теку̀: но сіѐ є҆ди́но да пребу́детъ со мно́ю во вѣ́ки вѣкѡ́въ: да пріиму̀ благу́ю ча́сть, ꙗ҆́же не ѡⷮи́мется ѡⷮ менѐ во вѣ́ки вѣкѡ́въ: де́нь и҆ но́щь безпреста́ни да вопію̀ къ тебѐ, ѡ бж҃е мо́й! да съ прⷪро́комъ всегда̀ глаго́лю: ѡⷮ но́щи оѹ҆́тренюетъ ду́хъ мо́й къ тебѣ̀, бж҃е, занѐ свѣ́тъ повелѣ̑нія твоя̀ на землѝ (И҆са́іи глⷡа к҃ѕ): де́нь и҆ но́щь да взыщу̀ тебѐ гдⷭа моего̀, ꙗ҆́кѡ да ѡ҆бря́щу тебѐ и҆сто́чника жи́зни, и҆ оѹ҆толю̀ жа́жду душѝ моея̀.

Па́ки къ бг҃у любе́знѣ глаго́ли:

[д҃] Съ прⷪро́комъ къ тебѣ̀ всегда̀ да глаго́лю, ѡ бж҃е мо́й! не да́мъ сна̀ ѻ҆чи́ма мои́ма, ни вѣ́ждома мои́ма дрема́нія, до́ндеже ѡ҆бря́щу мѣ́сто тебѣ̀ гдⷭви моему̀, селе́ніе бг҃у і҆а́кѡвлю: не да́мъ ѡ҆почива́нія, не да́мъ поко́я, до́ндеже ѡ҆бря́щу тебѐ и҆ско́маго, и҆ получу̀ жела́емаго (ѱало́мъ рл҃а). Вся́ка бо сла́ва и҆ бога́тство мі́ра сегѡ̀ суета̀ є҆́сть, вся́кое земно́е наслажде́ніе и҆ по́хоть плотска́я пре́лесть є҆́сть: сіѐ то́чію є҆ди́но непреле́стно є҆́сть, є҆́же тебѐ є҆ди́наго гдⷭа моего̀ возлюби́ти всѣ́мъ се́рдцемъ мои́мъ и҆ все́ю душе́ю мое́ю: ничто́же предпочита́ти па́че твоея̀ любвѐ: сіе́ бо то́чію є҆ди́но и҆́мать мѝ пребы́ти въ вѣ́чное оѹ҆тѣше́ніе и҆ ра́дость.

Па́ки оѹ҆се́рднѣ ко гдⷭу взыва́й:

[є҃] Что̀ оѹ҆́бѡ и҆́но се́рдце моѐ возлю́битъ въ вѣ́цѣ се́мъ; что̀ и҆́но возжела́етъ, кромѣ̀ тебѐ гдⷭа моегѡ̀, ѡⷮ всея̀ оѹ҆́мныя тва́ри превожделѣ́ннагѡ и҆ воспѣва́емагѡ; Питіѐ вре́менно и҆ тлѣ́нно є҆́сть, бога́тство и҆ и҆мѣ́ніе и҆счеза́емо и҆ погиба́емо, сла́ва и҆ че́сть прело́жна и҆ премѣ́нна є҆́сть. Ничто́же постоя́нно и҆ непревра́тно, то́чію ты̀ є҆ди́нъ са́мъ є҆сѝ вѣ́ченъ и҆ непремѣ́ненъ. Сегѡ̀ ра́ди тебѐ то́чію є҆ди́наго наипа́че да возжела́етъ и҆ всѣ́мъ срⷣцемъ да возлю́битъ моя̀ душа̀: всю́ду бо пу́стъ и҆ на́гъ ѡ҆бря́щуся, а҆́ще къ тебѣ̀ все́мъ се́рдцемъ мои́мъ не прилѣплю́ся: всю́ду болѣ́зненъ, ско́рбенъ и҆ печа́ленъ бу́ду. Прито́ргни ты̀ са́мъ, гдⷭи, ꙗ҆́коже вѣ́си, и҆ оѹ҆язвѝ се́рдце моѐ бж҃е́ственнымъ тѝ жела́ніемъ, присоединѝ ду́шу мою̀, и҆ вся̑ помышлє́нія моя̀ къ бж҃е́ственной твое́й любвѝ, созда́телю мо́й гдⷭи.

Па́ки те́плѣ ко гдⷭу рцы̀:

[ѕ҃] Гдѣ̀ оѹ҆́бѡ душа̀ моя̀ по́йдетъ; гдѣ̀ ѡ҆брати́тся; гдѣ̀ ѡ҆бря́щетъ ти́хое приста́нище; гдѣ̀ на́йдетъ непрело́жный поко́й, а҆́ще не въ тебѣ̀ є҆ди́номъ гдⷭѣ бз҃ѣ мое́мъ; Что̀ и҆́но возлюблю̀; что̀ и҆́но возжела́ю; и҆лѝ къ чесому̀ и҆но́му прилѣплю́ся, а҆́ще не къ тебѣ̀ є҆ди́ному гдⷭу моему̀; ты́ бо є҆сѝ бг҃ъ мо́й, гдⷭь и҆ созда́тель. Ты́ є҆сѝ моя̀ сла́ва, держа́ва и҆ великолѣ́піе, да не скита́ется сѣ́мѡ и҆ ѻ҆ва́мѡ моя̀ душа̀, да не любодѣ́йствуетъ въ ве́щехъ су́етныхъ моѐ се́рдце, да не связу́ется и҆ плѣни́тся вещмѝ мимотеку́щими, да не порабоща́ется и҆ плѣни́тся вещмѝ су́етными и҆ превра́тными, но да тебѐ то́чію є҆ди́нагѡ ти́хагѡ приста́нища все́ю крѣ́постію свое́ю придержи́тся, и҆ никогда́же ѡⷮлуча́ется!

Па́ки прилѣ́жнѡ гдⷭа молѝ:

[з҃] И҆спо́лни бж҃е́ственныя твоея̀ любвѐ ду́шу мою̀, ѡ бж҃е мо́й! и҆зле́й на мя̀ прест҃у́ю твою̀ ми́лость, ѡ҆росѝ во́ду прест҃а́гѡ твоегѡ̀ дх҃а: да́ждь мѝ во́ду прест҃ы́я твоея̀ благода́ти, да́ждь мѝ во́ду сію̀ гдⷭи, да ктому̀ не возжа́жду, ни прихожду̀ къ тлѣ́нныя сея̀ сла́дости кла́дезю, къ студенцу̀ кля́твенному і҆а́кѡвлю: вся́къ бо пія́й ѡⷮ воды̀ сея̀, земны́хъ сласте́й, возжа́ждется па́ки, а҆ и҆́же піе́тъ ѡⷮ воды̀ твоея̀ благода́ти, ю҆́же ты̀ са́мъ дае́ши, не возжа́ждется во вѣ́ки, но бу́детъ въ не́мъ и҆сто́чникъ воды̀ теку́щія въ живо́тъ вѣ́чный (І҆ѡа́нна заⷱ в҃і), ꙗ҆́же є҆́сть дх҃ъ ст҃ы́й: да бж҃е́ственныя твоея̀ блгⷣтныя воды̀ прича́стникъ бы́въ, соверше́ннѣ насы́щуся, внегда̀ ꙗ҆ви́тмися сла́ва твоя̀ (ѱало́мъ ѕ҃і).

Па́ки къ бг҃у те́плѣ вопі́й:

[и҃] Возвратѝ, гдⷭи, плѣне́ніе на́ше, ꙗ҆́кѡ пото́ки ю҆́гомъ (ѱало́мъ рк҃є): растопѝ ле́дъ зме́рзшія душѝ моея̀: повѣ́й ю҆́гомъ своегѡ̀ преще́драгѡ человѣколю́бія, да и҆стеку́тъ во́ды и҆ рѣ́ки твоея̀ благода́ти ѡⷮ ѻ҆кая́ннагѡ мѝ се́рдца. Пронзѝ и҆ оѹ҆язвѝ ду́шу мою̀ бжⷭтвеннымъ твои́мъ жела́ніемъ, да про́чее въ се́рдцѣ мое́мъ ѡ҆ ве́щехъ су́етныхъ не любодѣ́йствую. Насы́ти ду́шу мою̀ бж҃е́ственныя твоея̀ ма́нны, да ктому̀ не возвращу́ся ко є҆гѵ̑петскимъ мі́ра сегѡ̀ тлѣ̑ннымъ сласте́мъ, нижѐ да жела́ю многомяте́жныхъ котлѡ́въ и҆ чеснока̀ є҆гѵ́петскагѡ, оѹ҆́мъ помрача́ющагѡ: но да сія̀ ма́нна благода́ти прест҃а́гѡ твоегѡ̀ дх҃а бу́детъ мѝ во вся́ко благоугожде́ніе, и҆ вѣ́чное весе́ліе и҆ ра́дость душѝ мое́й. Гдѣ́ бо и҆́намѡ и҆́мамъ и҆ска́ти ра́дости; Ты̀ є҆сѝ моя̀ и҆́стинная ра́дость. Гдѣ̀ и҆́мамъ и҆́намѡ и҆ска́ти живота̀; Ты̀ є҆сѝ мо́й живо́тъ. Гдѣ̀ и҆́намѡ дале́че и҆́мамъ и҆ска́ти бога́тства; Ты̀ є҆сѝ моѐ бога́тство и҆ вѣ́чное сокро́вище.

Па́ки немо́лчнѡ ко гдⷭу восклица́й:

[ѳ҃] Да́ждь мѝ, созда́телю мо́й, позна́ти и҆́стиннѡ тебѐ є҆ди́наго и҆́стиннаго гдⷭа бг҃а моего̀, и҆ є҆го́же въ мі́ръ на́съ ра́ди посла́лъ є҆сѝ сп҃си́теля мі́ру, гдⷭа на́шего і҆и҃са хрⷭта̀, и҆ прича́стникомъ бы́ти благода́ти прест҃а́гѡ твоегѡ̀ дх҃а, да си́це зна́ю своѐ сво́йство къ тебѣ̀, ꙗ҆́коже зна́ти до́лженъ є҆́смь: да си́це тебѣ̀ присоединю́ся, ꙗ҆́коже ве́сь ѡⷮ тебѐ є҆́смь: моя́ бо пло́ть, не моя̀, но твоя̀, гдⷭи: моя̀ душа̀, не моя̀, но твоя̀, сп҃си́телю мо́й: моя̑ вся̑ чу̑вства, зрѣ́ніе, слы́шаніе, вкуше́ніе, ѡ҆боня́ніе, не моя̑, но твоя̑ вся̑ су́ть гдⷭи мо́й. Ве́сь а҆́зъ є҆́смь, ве́сь живо́тъ мо́й, не мо́й, но тво́й гдⷭи, моя̑ вся̑, не моя̑, но твоя̑ вся̑ су́ть, благода́телю мо́й: ту́не всѐ ѡⷮ тебѐ и҆́мамъ, ту́не всѐ ѡⷮ тебѐ прія́хъ.

Па́ки оѹ҆се́рднѣ ко гдⷭу взыва́й:

[і҃] Прибѣ́жище, стѣна̀ и҆ заступле́ніе моѐ, ты̀ є҆ди́нъ са́мъ да бу́деши, гдⷭи: приста́нище же и҆ оѹ҆тѣше́ніе моѐ твоя̀ бжⷭтвенная любо́вь. Ты́ бо є҆ди́нъ мѝ є҆сѝ гдⷭь, ты́ же и҆ си́ла, ты́ ми є҆сѝ бг҃ъ, ты́ ми ра́дованіе, ты́ є҆си моя̀ сла́ва и҆ велелѣ́піе, ты́ є҆си моя̀ похвала̀ и҆ оѹ҆пова́ніе. Ве́сь є҆сѝ жела́ніе, ве́сь є҆сѝ сла́дость, ѡ бж҃е мо́й! пребыва́еши бо ве́сь во вѣ́ки вѣ́чныя никогда́же и҆змѣня́яся. Ты̀ є҆ди́нъ оѹ҆тѣше́ніе моѐ, и҆ вѣ́чное наслажде́ніе да бу́деши гдⷭи: ра́дость же и҆ весе́ліе, прест҃а́я твоя̀ бжⷭтвенная любо́вь: сегѡ̀ ничто́же лу́чше и҆ честнѣ́йше ни на землѝ, ни на нб҃сѝ да и҆́мамъ, сіе́ ми па́че всѣ́хъ сокро́вищъ да бу́детъ честнѣ́йшее, па́че многоцѣ́нныхъ а҆дама́нтѡвъ дража́йше, па́че сегѡ̀ ничто́же вя́щше да вожделѣ́ю, па́че сегѡ̀ ничто́же вя́щше да взыщу̀: но си́мъ є҆ди́нѣмъ дово́ленъ бу́ду въ вѣ́цѣ се́мъ, па́че же въ гряду́щемъ.