А҆лфави́тъ же се́й дх҃о́вный си́це здѣ̀ положи́хомъ

[А] А҆́зъ, а҆да́мля є҆стества̀ сы́й, тебѣ̀, ѻ҆боегѡ̀ по́ла, є҆стества̀ а҆да́мля, совѣ́тую: смире́нъ бу́ди. А҆да́мля є҆стества̀ сы́й ми́ренъ бу́ди, па́мятствуя пра́веднагѡ ѡ҆сужде́нія сло́во рече́нное: ꙗ҆́кѡ земля̀ є҆сѝ, и҆ въ зе́млю па́ки по́йдеши. (Быт. глⷡа г҃)

[Б] Бг҃а познава́й, бл҃годѣя̑нія є҆гѡ̀ разумѣ́й, въ за́повѣдехъ є҆гѡ̀ ходѝ, да наслѣ́дникъ бу́деши вѣ́чныхъ бла̑гъ.

[В] Вѣ́руй въ бг҃а, вѣ́руй бг҃у: воздержа́ніе всегда̀ во все́мъ и҆мѣ́й: при́снѡ па́мятствуй сме́рть, и҆ всѣ́хъ веще́й и҆змѣне́ніе и҆ ни є҆ди́нымъ чи́мъ ꙗ҆́тъ бу́деши въ мі́рѣ.

[Г] Грѣха̀, ѡⷮ ма́ла да́же и҆ до вели́ка блюди́ся: грѣ́хъ тво́й пред̾ ѻ҆чи́ма всегда̀ и҆мѣ́й, ꙗ҆́кѡ да оѹ҆се́рднѣ на вся́къ де́нь прилѣжи́ши покая́нію.

[Д] Де́нь ѡⷮ днѐ къ горѣ̀ добродѣ́телей восходѝ, оѹ҆се́рдіе ко оѹ҆се́рдію непреста́ннѡ на вся́къ де́нь прилага́й, да оѹ҆пра́виши тебѐ во вся̑ стези̑ пра̑вы.

[Є] Є҆́сть бо бл҃ги̑мъ наде́жда, и҆ вся́кому труду̀ и҆ по́двигу вѣ́чный поко́й, и҆ весе́ліе, въ гряду́щемъ вѣ́цѣ возме́здіе.

[Ж] Жи́знь вѣ́чную, и҆ гряду̑щая бл҃га̑я при́снѡ да помина́еши, ꙗ҆́кѡ да къ си̑мъ всегда̀ взима́еттися се́рдце.

[Ѕ] Ѕѣлѡ̀ тщали́въ и҆ оѹ҆се́рденъ въ твое́мъ зва́ніи и҆ сво́йствѣ бу́ди, ꙗ҆́кѡ да не всу́е и҆знуря́еши твою̀ жи́знь.

[З] Зря̀ тва́рь чуди́ся, и҆ творцу̀ тва́ри славосло́віе приносѝ, не къ тва́ри прилага́й твоя̑ чу̑вства, но къ бг҃у творцу̀ всѣ́хъ се́рдце и҆ ду́шу возводѝ.

[И] И҆́же ѡ҆ бл҃го́мъ и҆́мать оѹ҆се́рдіе, да́стся є҆му̀: а҆ и҆́же не и҆́мать, и҆ є҆́же мни́тся и҆мѣ́яй, во́змется ѡⷮ негѡ̀.

[І] И҆́стину любѝ, вся́кія лжѝ блюди́ся, да оѹ҆бѣжи́ши прⷪро́ческагѡ рече́нія: погуби́ши вся́каго глаго́лющаго лжу̀. (ѱало́мъ є҃)

[К] Къ бг҃у всегда̀ оѹ҆́мъ тво́й, и҆ ду́шу непреста́ннѡ возводѝ, и҆ никогда́же є҆го̀ ѡⷮ се́рдца и҆ па́мяти твое́й и҆спуска́й, ꙗ҆́кѡ да всегда̀ съ ни́мъ соедине́нъ бу́деши.

[Л] Люби́ти бг҃а ѡⷮ всегѡ̀ се́рдца твоегѡ̀, и҆ ѡⷮ всея̀ крѣ́пости твоея̀ потщи́ся: ꙗ҆́кѡ да и҆звѣ́стенъ спасе́нія твоегѡ̀ бу́деши, и҆ вся́кагѡ пристра́стія земна́гѡ свободи́шися.

[М] Мл҃твѣ непреста́ннѡ прилѣжѝ: то́ бо є҆́сть некра́домое сокро́вище, є҆́юже оѹ҆до́бь ꙗ҆́кѡ лѣ́ствицею, къ бг҃у взы́деши.

[Н] Не прилага́й се́рдца твоегѡ̀ къ земны̑мъ, да не ꙗ҆́кѡ со́ль ѡ҆буя́еши, и҆ ве́сь непотре́бенъ ꙗ҆ви́шися: но къ бг҃у є҆ди́ному се́рдце и҆ ду́шу твою̀ пригвожде́нну и҆мѣ́й, ꙗ҆́кѡ да неподви́жимь въ любвѝ є҆гѡ̀ пребу́деши.

[Ѻ] Ѻ҆́нъ бо є҆́сть є҆ди́нъ гдⷭь, и҆сто́чникъ всѣ́хъ бла̑гъ, и҆ вѣ́чныя жи́зни пода́тель.

[П] Па́мятствуй ѡ҆ гдⷭѣ вы́ну, въ се́рдцѣ и҆ во оѹ҆стѣ́хъ твои́хъ да пребыва́етъ и҆́мя є҆гѡ̀ всегда̀. Покая́нію при́снѡ прилѣжѝ, и҆ на вся́къ де́нь те́плѣ слеза́ми ѡ҆мыва́й ду́шу твою̀, да оѹ҆бѣли́шися па́че снѣ́га, и҆ не посра́мленъ лице́мъ пред̾ гдⷭемъ ꙗ҆ви́шися.

[Р] Ру́цѣ твоѝ къ бг҃у наича́стѣе въ мл҃твѣ воздѣва́й оѹ҆се́рднѣ, ѡⷮту́ду по́мощи всегда̀ взыску́я, да побѣди́ши мы́сленнаго а҆мали́ка, си́рѣчь, діа́вола.

[С] Сме́рть па́мятствуя, ску́пости и҆ стѣсне́нія блюди́ся, да не невѣ́ріемъ и҆ ску́постію ꙗ҆́тъ бы́вши во вре́мя и҆схо́да, милосе́рдія бж҃ія двє́ри себѣ̀ затвори́ши.

[Т] Ти́хъ, безтщесла́венъ, и҆ кро́токъ ко всѣ̑мъ быва́й, ꙗ҆́кѡ да и҆́стиненъ хрⷭто́въ подража́тель и҆ оѹ҆чени́къ без̾ поро́ка ꙗ҆ви́шися.

[Оѹ] Оѹ҆ны́нія и҆ лѣ́ности ѕѣлѡ̀ храни́ся, а҆́ще хо́щеши вско́рѣ сниска́ти вѣ́чное сокро́вище.

[у] Оѹ҆се́рденъ и҆ те́плъ къ бг҃у при́снѡ бу́ди, да прича́стникъ бу́деши вѣ́чныя жи́зни.

[Ф] Фараѡ́на мы́сленнаго въ водѣ̀ сле́зной потопи́ти тщи́ся, да не всегда̀ ра́туя го́нитъ тя̀.

[Х] Хрⷭта̀ є҆ди́наго взыску́й, да съ ни́мъ пребу́деши во вѣ́ки: взыску́ющіи бо є҆го̀ ѡ҆бря́щутъ ве́лію ми́лость, и҆ не лиша́тся вся́кагѡ бла́га.

[Ѡⷮ] Ѻ҆ц҃а̀ и҆ ма́терь, дру́ги и҆ сро́дники, и҆ бг҃а бы́ти себѣ̀ зна́й: ѻ҆́нъ бо є҆́сть жи́зни нача́ло, и҆ коне́цъ всѣ̑мъ безконе́чный.

[Ц] Цѣ́ль твоя̀ и҆ приста́нище гдⷭь є҆ди́нъ да бу́детъ, наде́жда же и҆ оѹ҆пова́ніе, прест҃а́я є҆гѡ̀ любо́вь.

[Ч] Чистоту̀ и҆ цѣлому́дріе, и҆́стиннѡ возлюбѝ, да прилѣпи́шися чи́стѣ чи́стому: и҆ ча́съ ѡⷮ часа̀ покая́нія не ѡⷮлага́й, да не погуби́ши вре́мя и҆справле́нія всу́е во вре́мя часа̀.

[Ш] Шестокри́ліи добродѣ́тєли, водруже́ни въ душѝ твое́й всегда̀ да бу́дутъ: си́рѣчь, оѹ҆се́рдіе, друголю́біе, терпѣ́ніе, ѻ҆́бразъ бл҃гъ, разсужде́ніе и҆ любо́вь, и҆́миже оѹ҆до́бь на нб҃о возвы́сишися.

[Щ] Ще́дръ и҆ ми́лостивъ ко всѣ̑мъ бу́ди, да ми́лостива и҆ бл҃гоутро́бна гдⷭа, въ де́нь стра́шнагѡ суда̀ душѣ̀ твое́й ѡ҆бря́шеши. Є҆ди́но сѐ въ па́мяти свое́й и҆мѣ́й вы́ну, да бг҃у є҆ди́ному всегда̀ оѹ҆гожда́еши, и҆ къ нему̀ любо́вію при́снѡ да восхо́диши.

[Ю] Ю҆́ностное по́хотное плотско́е безу́міе ѡⷮ себѐ ѡⷮмета́й: прему́дрости же дх҃о́вныя ѡ҆ бз҃ѣ всегда̀ поуча́йся всеусе́рднѣ.

[Ꙗ] Ꙗ҆́рости, гнѣ́ва и҆ ѕлосло́вія ѕѣлѡ̀ блюди́ся, да не помрачи́ттися серде́чное ѻ҆́ко.

[Ѡ] Ѡ҆б̾яде́нія и҆ пія́нства ѕѣлѡ̀ блюди́ся, да не во вся̑ ѕла̑я всегда̀ впа́даеши.

[Ѻ] Ѻ҆ч҃ескагѡ дх҃о́внагѡ наказа́нія не преѡбижа́й, да не въ стезя́хъ твои́хъ преткне́шися.

[ѱ] ѱалмы̀ и҆ пѣ́сньми бг҃а безпреста́ннѡ славосло́ви, да при́снѡ сіѐ и҆́маши себѣ̀ во оѹ҆тѣше́ніе.

[Ѳ] Фарісе́йскагѡ тщесла́внагѡ лицемѣ́рія ѕѣлѡ̀ блюди́ся, да не восплаще́ніе[1] твои́хъ бла̑гъ себѣ̀ тщесла́віемъ здѣ̀ воспріи́меши.