Ча́сть а҃

Глава̀ втора́я на́десять

Ѡ҆ є҆́же не прилага́ти се́рдца своегѡ̀ къ настоя́щымъ ве́щемъ, и҆ не и҆ска́ти въ земны́хъ сласте́хъ поко́я и҆ оѹ҆тѣше́нія, то́чію во є҆ди́номъ гдⷭѣ бз҃ѣ взы́скивати вы́ну.

Бу́ди оѹ҆́бѡ, человѣ́че, земна́гѡ пристра́стія свобо́дь, да не безслове́снѡ порабо́тившися сласте́мъ, вѣ́чными оѹ҆́зами плаче́внѣ свя́занъ бу́деши. Не прилага́й се́рдца своегѡ̀ къ настоя́щымъ ве́щемъ, да не ꙗ҆́кѡ въ со́нномъ мечта́ніи прельсти́шися. Не въ сласте́хъ земны́хъ и҆щѝ поко́я, ни въ по́хотехъ плотски́хъ оѹ҆тѣше́нія, но въ гдⷭѣ вся̑ сотво́ршемъ. Бу́ди и҆мѣ́яй что̀ на землѝ, ꙗ҆́кѡ не и҆мѣ́яй: пріе́мляй что̀, ꙗ҆́кѡ не пріе́мляй: ꙗ҆ды́й что̀, ꙗ҆́кѡ не ꙗ҆ды́й: пія́й что̀, ꙗ҆́кѡ не пія́й: бу́ди ѡⷮ всѣ́хъ земны́хъ свобо́дь, ꙗ҆́кѡ да всѣ́мъ се́рдцемъ свои́мъ гдⷭу є҆ди́ному прилѣпи́шися: земна̑я бо вся̑ на ма́лое вре́мя су́ть, бж҃ія же бл҃года́ть вѣ́чна. Не да́руетъ бо сла́сть земна́я поко́я, нижѐ по́хоть плотска́я и҆звѣ́стное душѝ прино́ситъ оѹ҆тѣше́ніе, но непреста́нный и҆ всегда́шній твори́тъ мяте́жъ, и҆ смуще́ніе: а҆́ще и҆ ты́сящу ты́сящей лѣ́тъ въ плотски́хъ сласте́хъ пожи́лъ бы є҆сѝ, ми́ра и҆ поко́я никогда́же ѡ҆бря́щеши.

[в҃] Ка́кѡ возмо́жетъ тва́рь, и҆ по́хоть плотска́я дарова́ти соверше́нный поко́й, и҆ и҆звѣ́стное душѝ оѹ҆тѣше́ніе, а҆́ще не са́мъ творе́цъ тва́ри оѹ҆поко́итъ, и҆ оѹ҆тѣше́ніемъ свои́мъ оѹ҆тѣ́шитъ и҆ оѹ҆поко́итъ ду́шу, и҆ да́руетъ є҆́й вѣ́чное и҆ присносу́щное наслажде́ніе; Ꙗ҆́коже не процвѣта́етъ, ни возраста́етъ розга̀, то́чію ѡⷮ ко́рене, си́це ни душа̀ соверше́нное и҆мѣ́ти мо́жетъ оѹ҆тѣше́ніе, то́чію ѡⷮ бл҃года́ти гдⷭни, и҆ прест҃а́гѡ оѹ҆тѣ́шительнагѡ дх҃а є҆гѡ̀, ѡⷮню́дуже бытіѐ своѐ и҆́мать.

[г҃] Мно́гажды душа̀ во вре́мя ско́рби и҆ печа́ли хотя̀ оѹ҆тѣ́шитися, притека́етъ и҆ прилѣпля́ется къ земно́й сла́сти, и҆ща̀ поко́я и҆ оѹ҆тѣше́нія: тогда̀ та́мѡ вма́лѣ безслове́снѡ оѹ҆сла́ждишися, сугу́бѣйшее посе́мъ пріе́млетъ томле́ніе и҆ ско́рбь: не мо́жетъ бо тва́рь соверше́нное дарова́ти душѝ оѹ҆тѣше́ніе, то́чію ло́жное и҆ преле́стное, маловре́менное, смѣ́шенное съ ско́рбію и҆ печа́лію. И҆жди́вый кто̀ мнѡ́га лѣ̑та въ плотски́хъ сласте́хъ, и҆ прише́дъ къ концу̀ мни́тся є҆му̀, ꙗ҆́кѡ никогда́же то̀ бы́сть: мни́тся, ꙗ҆́кѡ въ со́нномъ мечта́ніи вся̑ сія̑ бы́ша.

[д҃] Вѣ́къ се́й не и҆́мать въ себѣ̀ ни є҆ди́нагѡ поко́я и҆ тишины̀: сама́ бо ѕло́ба, и҆ стра̑сти человѣ́чєскія никогда́же ми́ра и҆ поко́я душѝ да́ти мо́гутъ, но всегда́шній прино́сятъ мяте́жъ и҆ смуще́ніе: є҆ди́но ѕло̀ пре́йде, друго́е на́йде: є҆ди́но зни́че, друго́е ꙗ҆ви́ся, ꙗ҆́коже во ѡ҆бурева́ніи морско́мъ, и҆ въ возду́шномъ премѣне́ніи, и҆ не то́чію си́це и҆нѣ́ми внѣ́шними разли́чными томле́нми, ꙗ҆́коже наипа́че са́мыми вну́тренними свои́ми страстьмѝ, всегда̀ му́чится и҆ ра́туется непреста́ннѡ душа̀. Всегда̑шнія бѣды̑, всегда̑шнія борбы̑, ꙗ҆́коже ѡⷮвнѣ̀, си́це и҆ вну́трь, сла́сть плотска́я, и҆ красота̀ вре́менная, и҆ вся́кое вре́менное наслажде́ніе мни́тся нѣ́что бы́ти ве́ліе невне́млющымъ: є҆гда́ же кто̀ разсмо́тритъ до́брѣ, ѡ҆бря́щетъ ю҆̀ ѕѣлѡ̀ го́рестну и҆ многомяте́жну душѝ. Сегѡ̀ ра́ди лу̑чшая ѡ҆ на́съ предзрѣ́вшу гдⷭу, не ту́не презира́ти, ꙗ҆́кѡ не и҆звѣ́стнѡ сія̑, повелѣва́етъ на́мъ, ꙗ҆́кѡ да безпрепина́тельнѡ тщи́мся ѡ҆ наслажде́ніи ѻ҆́нагѡ вѣ́чнагѡ, ми́рнагѡ, присносу́щнагѡ наслажде́нія и҆ поко́я.

[є҃] Любо́вь и҆ по́хоть плотска́я, никогда́же оѹ҆толи́ма, нижѐ оѹ҆покоя́ема є҆́сть. Соберѝ ѡⷮ всѣ́хъ стра́нъ красоты̑, ѡⷮ всегѡ̀ мі́ра по́хѡти, бу́детъ ли оѹ҆поко́ена душа̀; Никогда́же: и҆́бо сія̀ сію̀ и҆́мать лѣ́поту, и҆на́я же и҆́ну. А҆́ще же со всѣ́ми си́ми въ се́рдцѣ твое́мъ любодѣ́йствовати восхо́щеши, ка́кѡ и҆мѣ́ти бу́деши въ се́рдцѣ твое́мъ тишину̀ и҆ поко́й; Ника́коже. Дне́сь бо сіѐ вожделѣ̀, и҆ посе́мъ и҆́но: дне́сь си́мъ ра́туема є҆́сть, и҆́нымъ же и҆ногда̀: и҆ та́кѡ рабо́таетъ непреста́ннѡ душа̀, и҆ никогда́же оѹ҆покоева́ема є҆́сть: возлюби́вый же и҆́стиннѡ бг҃а, и҆ прилѣпи́выйся всѣ́мъ се́рдцемъ гдⷭви, въ ми́рѣ и҆ поко́и всегда̀ є҆́сть.

[ѕ҃] Кто̀ ѡⷮ вѣ́ка въ мі́рѣ плотски́хъ сласте́й поко́й ѡ҆брѣ́те; кто̀ ѡⷮ вѣ́ка въ не́мъ соверше́нное оѹ҆тѣше́ніе получѝ; Никто́же. Не вси́ ли въ ско́рби и҆ печа́ли и҆знури́ша жи́знь; не вси́ ли въ мяте́жи и҆ смуще́ніи сконча́ша житіѐ; послѣди́ же серпо́мъ сме́ртнымъ безвѣ́стнѡ пожа́ти бы́ша. Нѣ́сть поко́я, ни соверше́ннагѡ въ сласте́хъ плотски́хъ оѹ҆тѣше́нія, но всегда́шняя ра́ть, и҆ борьба̀ душѣ̀: є҆ли́кѡ па́ки наипа́че что̀ возлю́биши, толи́кѡ посе́мъ ѡ҆печа́лишися: є҆ли́кѡ наипа́че къ сла́сти плотско́й приложи́ши своѐ се́рдце толи́кѡ посе́мъ ско́рби и҆ томле́нія пріи́меши.

[з҃] Хотя̀ на́съ бг҃ъ ꙗ҆́кѡ ма́лыхъ нѣ́кихъ ѻ҆троча́тъ, ѡⷮ нижа́йшихъ на вы̑шшая возвестѝ, до вре́мене сіѐ плотско́е оѹ҆строе́ніе, ꙗ҆́кѡ млеко̀ нѣ́кое пред̾ ѻ҆чи́ма на́шима предложѝ: ꙗ҆́кѡ да ѡⷮ си́хъ восхо́димъ на лу̑чшая и҆ высоча̑йшая разумѣ̑нія и҆ позна̑нія. Нетщали́вый же и҆ лѣни́въ, не тща́ся восходи́ти на лу̑чшая и҆ сладча̑йшая бж҃е́ствєнная жела̑нія и҆ разумѣ̑нія, на се́й плотско́й млека̀ сла́сти, ꙗ҆́кѡ младоу́менъ дѣ́тищь, безслове́снѡ престае́тъ.

[и҃] Вся́кое плотско́е наслажде́ніе, душе́вная є҆́сть тя́жесть: дх҃о́вное же ѡ҆ гдⷭѣ бж҃е́ственное наслажде́ніе, ми́ръ душѝ, простра́нство со́вѣсти, свобо́да ду́ха, ра́дость, безпеча́ліе, и҆ ко всѣ̑мъ любо́вь нелицемѣ́рна: наслажде́ніе же вре́менное и҆ по́хоть плотска́я, нѣ́сть ничто́же и҆́но, то́чію тя́жесть и҆ смуще́ніе. Како́въ бо є҆́сть поко́й ѡⷮ ѡ҆б̾яде́нія и҆ пія́нства; како́въ поко́й ѡⷮ по́хоти плотскі́я, и҆ блу́днагѡ раче́нія; оѹ҆глубѝ то́чію въ сія̀ оѹ҆́мъ, свяжѝ себѐ плотско́ю любо́вію, что̀ пріи́меши; что̀ спасе́нное приѡбря́щеши; Ничто́же, то́чію мра́къ, тму̀, безслове́сный сою́зъ, недоумѣ́ніе, ско́рбь и҆ печа́ль, и҆ безвѣ́стіе спасе́нія.

[ѳ҃] Ѡ ко́ль мяте́жно и҆ многопеча́льнѡ житіѐ су́етнагѡ мі́ра сегѡ̀! нѣ́сть ни є҆ди́нагѡ въ не́мъ поко́я и҆ оѹ҆тѣше́нія, то́чію тя́жесть и҆ ѕѣ́льное душѝ томле́ніе. Кі́йждо бо де́нь влече́тъ съ собо́ю молву̀ и҆ мяте́жъ, и҆ безвѣ̑стныя бѣды̑: ѡⷮ нача́ла рожде́нія человѣ́ческагѡ да́же до сме́рти нѣ́сть ми́ра, но всегда́шній мяте́жъ и҆ смуще́ніе. Роди́тся оѹ҆́бѡ человѣ́къ съ болѣ́знію и҆ во́племъ въ мі́ръ, расте́тъ и҆ жи́тельствуетъ въ ско́рбехъ и҆ печа́лехъ, сконча́ніе є҆гѡ̀ многорыда́тельно, и҆ довольноплаче́вно: оѹ҆ме́ршу же бы́ти че́рвію снѣде́ніе, души́ же су́дъ, и҆ по суду̀ паде́ніе жре́бія неизвѣ́стное. Сегѡ̀ ра́ди не прилага́й се́рдца своегѡ̀ настоя́щему вѣ́ку, не любодѣ́йствуй въ плотски́хъ сласте́хъ, да не на́гъ и҆ пу́стъ всѣ́хъ бла̑гъ ѡ҆бря́щешися, но гдⷭа при́снѡ взыску́й, да вѣ́чныхъ бла̑гъ сподо́бишися: бога́тіи бо въ плотски́хъ сласте́хъ ѡ҆бнища́ша и҆ взалка́ша, взыска́ющіи же гдⷭа не лиша́тся вся́кагѡ бла́га (ѱало́мъ л҃г).

[і҃] Тѣ́мже де́нь и҆ но́щь взыску́й гдⷭа, де́нь и҆ но́щь взыску́й бл҃года́теля, да ѡ҆бря́щеши є҆го̀, и҆ да полу́чиши: и҆щѝ є҆го̀ во все́мъ мі́рѣ, во всѣ́хъ конца́хъ землѝ: и҆щѝ є҆го̀ въ сла́вѣ, въ бога́тствѣ, въ красотѣ̀ плотско́й, въ сласте́хъ земны́хъ: и҆щѝ є҆го̀ во все́й тва́ри, но нигдѣ́же є҆го̀ ѡ҆бря́щеши. Ѻ҆́нъ бо тебѐ всего̀ содержи́тъ, ты́ же є҆гѡ̀ не познава́еши: ве́сь въ тебѣ̀ є҆́сть, ты́ же є҆гѡ̀ не вѣ́си: вну́трь* тебѐ црⷭтво нбⷭное (Лукѝ п҃ѕ), ты́ же є҆го̀ и҆на́мѡ и҆́щеши: вну́трь*[1] тебѐ присносу́щное наслажде́ніе, ты́ же ѡ҆ не́мъ не разумѣ́еши. Но оѹ҆́бѡ и҆щѝ въ себѣ̀ де́нь и҆ но́щь гдⷭа, да ѡ҆бря́щеши: и҆ ѡ҆брѣ́тши є҆го̀, поко́й вѣ́чный получи́ши, и҆ съ ра́достію возопіе́ши: пріиди́те и҆ оѹ҆ви́дите, ꙗ҆́кѡ ѡ҆брѣто́хъ жела́емаго, и҆ соедини́хся присносу́щному: є҆му́же вся́ка сла́ва, че́сть и҆ держа́ва, со безнача́льнымъ є҆гѡ̀ ѻ҆ц҃е́мъ, со прест҃ы́мъ, и҆ бл҃ги́мъ, и҆ животворя́щимъ є҆гѡ̀ дх҃омъ, всегда̀, нн҃ѣ и҆ прⷭнѡ, и҆ во вѣ́ки вѣкѡ́въ, а҆ми́нь.