Ча́сть а҃

Глава̀ шеста́я

Ѡ҆ є҆́же предпочита́ти по́стъ, и҆ и҆мѣ́ти во все́мъ воздержа́ніе.

По́стъ и҆ воздержа́ніе предпочте́нъ тѝ бу́ди, а҆́ще хо́щеши и҆мѣ́ти пра́въ ра́зумъ, и҆ оѹ҆до́бь побѣди́ти вся̑ стра̑сти. Плотски́ми сладостра́стми не порабоща́йся, да не себѣ̀ восплаще́ніе[1] си́ми пріи́меши: да не во тмѣ̀ безслове́сія и҆ мяте́жа и҆знури́ши жи́знь свою̀.

[в҃] Ѡ҆б̾яде́нія и҆ пія́нства ѕѣлѡ̀ блюди́ся: то́ бо є҆́сть нача́ло и҆ ко́рень вся́кому грѣху̀, блуду́ же и҆ нечистотѣ̀ хода́тай, и҆ вѣ́чному томле́нію пред̾уготовле́ніе: невоздержа́ніе бо прино́ситъ вся̑ ѕла̑я, и҆́мже пра́дѣдъ на́шъ а҆да́мъ плаче́внѣ ѡⷮпадѐ рая̀, и҆ подпадѐ сме́рти. Ѡⷮ ѡ҆б̾яде́нія и҆ пія́нства тягота̀ душѝ, помраче́ніе ра́зума, воста́ніе плотскі́я по́хоти, борба̀ всегда́шняя, бѣ́су оѹ҆до́бный при́ступъ, бжⷭтвенныя же любвѐ ѡⷮчужде́ніе.

[г҃] Ѡⷮ ѡ҆б̾яде́нія и҆ пія́нства не то́чію душѣ̀ вре́дъ, но и҆ тѣ́лу нездра́віе: воздержа́ніе же и҆ трезвѣ́ніе не то́чію душѣ̀ по́льза, но и҆ тѣ́лу здра́віе, и҆ ле́гкость жи́зни. Ѡ҆б̾яде́ніе и҆ пія́нство не то́чію вѣ́чныя жи́зни, но и҆ вре́менныя лиша́етъ, и҆ погубля́етъ вку́пѣ ду́шу и҆ тѣ́ло, и҆ весьма̀ непотре́бна бг҃у и҆ человѣ́кѡмъ бы́ти твори́тъ. Сла́сть вре́менная хода́тайствуетъ человѣ́ку го́ресть вѣ́чную, а҆́ще кто̀ къ не́й безслове́снѡ прилѣпля́ется: живо́тъ воздержа́теленъ и҆ тре́звенный, здѣ̀ є҆щѐ ра́й є҆́сть, растлѣ́нный же и҆ грѣхо́вный, здѣ̀ є҆щѐ а҆́дъ, и҆ ѕѣ́льное душѝ томле́ніе.

[д҃] Бу́ди побѣжда́яй, а҆ не побѣжда́емь, ѡ҆блада́яй сластьмѝ, а҆ не ѻ҆нѝ тобо́ю, а҆́ще хо́щеши въ вѣ́чномъ вѣ́цѣ бы́ти свобо́дь: побѣжда́ющему, речѐ гдⷭь, да́мъ ꙗ҆́сти ѡⷮ дре́ва живо́тнагѡ, су́щагѡ посредѣ̀ рая̀ (А҆пока́л. глⷡа в҃). И҆ па́ки: дѣ́лайте не бра́шно ги́блющее, но пребыва́ющее въ животѣ̀ вѣ́чномъ. пло́ть бо не по́льзуетъ ничто́же (І҆ѡа́н. заⷱ в҃). Сегѡ̀ ра́ди не ѕѣлѡ̀ въ се́мъ оѹ҆тѣше́ніе своѐ полага́й, є҆́же ѕѣлѡ̀ на ма́лое вре́мя дано́ ти є҆́сть, но въ бз҃ѣ и҆́стинное взыску́й, є҆́же съ тобо́ю пребу́детъ во вѣ́ки.

[є҃] Безмѣ́рія и҆ оѹ҆мале́нія во все́мъ блюди́ся: мѣ́ру пра́ву и҆ разу́мну во все́мъ хранѝ. воздержа́ніе всегда̀ и҆мѣ́й во все́мъ, а҆́ще хо́щеши оѹ҆до́бь ѡ҆брѣстѝ душе́вный поко́й: сопроти́внѡ же, никогда́же ми́ра и҆ поко́я ѡ҆бря́щеши. А҆́ще и҆ пребезмѣ́рнѡ бы́ло бы сла́дко бра́шно, и҆спо́лненно же ꙗ҆́да смертоно́сна, вѣ́ждь, ꙗ҆́кѡ не ꙗ҆́лъ бы є҆сѝ є҆гѡ̀, а҆́ще сме́рти не жела́лъ бы є҆сѝ вкуси́ти: нижѐ прикосну́тися хотѣ́лъ бы є҆сѝ сицевы̑мъ.

[ѕ҃] Презира́й чре́вное насыще́ніе, да не оѹ҆́зами стра́стными ꙗ҆́тъ и҆ свя́занъ бу́деши: претерпѣва́й а҆́лчбу и҆ жа́жду плотскі́я сла́сти, да тя́жести душе́вныя свободи́шися, и҆ насы́тишися бжⷭтвенныя пи́щи. Не претерпѣва́яй бо кто̀ ма́лыя а҆́лчбы, пострада́ти и҆́мать вя́щшая стра̑стная бѣ́дствѡванія: и҆змѣ́ри сла́сть тлѣ́нную со тщето́ю, оѹ҆го́діе пло́ти съ тя́жестію, оѹ҆тѣше́ніе вре́менное съ душе́вною го́рестію, вѣ́ждь, ꙗ҆́кѡ вя́щше си́ми прельща́тися не восхо́щеши: сла́сть бо тлѣ́нная, нѣ́сть сла́сть, но го́ресть душѝ: оѹ҆го́діе пло́ти, нѣ́сть оѹ҆го́діе, но раздраже́ніе и҆ тягота̀: оѹ҆тѣше́ніе вре́менное, нѣ́сть оѹ҆тѣше́ніе, но ско́рбь и҆ печа́ль, нижѐ црⷭтво нбⷭное, но тогѡ̀ ѡⷮтщетѣ́ніе. Нѣ́сть бо, речѐ црⷭтвіе нбⷭное пи́ща и҆ питіѐ, но пра́вда и҆ ми́ръ и҆ ра́дость ѡ҆ дс҃ѣ ст҃ѣ, глаго́летъ а҆пⷭлъ (Ри́м. заⷱ рд҃і).

[з҃] Не прилага́й се́рдца своегѡ̀ къ земны́мъ сласте́мъ, вре́мєнна бо и҆ тлѣ̑нна су́ть. Не въ питіѝ и҆ бра́шнахъ земны́хъ оѹ҆тѣше́ніе своѐ полага́й, но нбⷭныхъ лу́чшихъ въ бз҃ѣ взыску́й. Ѻ҆ба́че а҆́ще бы и҆ всѣ́хъ бра́шенъ и҆ пи́тій и҆з̾ѻби́льнѡ дне́сь наслади́лся є҆сѝ, и҆ пи́лъ бы є҆сѝ, є҆дина́кѡ не подоба́етъ тѝ къ си́мъ прилага́ти се́рдца, не бо̀ съ тобо́ю та́мѡ во вѣ́ки пребу́дутъ: земна̑я бо вся̀ вре́мєнна су́ть, нбⷭная же то́чію є҆ди̑на вѣ̑чна и҆ непрелѡ́жна.

[и҃] Потецы̀ оѹ҆мо́мъ свои́мъ ѡⷮ ю҆́на во́зраста, и҆ воспомянѝ тобо́ю оѹ҆жѐ ѡⷮдре́вле и҆з̾ядє́нная и҆ и҆спіє́нная, возмни́ттися, ꙗ҆́кѡ ни є҆ди́ною ꙗ҆́лъ є҆сѝ и҆ дово́льнѡ пія́лъ є҆сѝ: но и҆зжди́шася, ꙗ҆́кѡ никогда́же бы́ша, и҆ ни є҆ди́но є҆́сть дне́сь ѻ҆́ныхъ па́мятствованіе и҆ по́льза. Ꙗ҆́коже бо тогда̀, си́це и҆ дне́сь, а҆́ще и҆ всѣ́хъ бра́шенъ и҆ пи́тій наслади́шися, ничто́же вя́щше пріи́меши, то́чію вре́дъ, и҆ за ко́имждо кра́томъ и҆сполне́нія сласте́й, тя́жесть душѣ̀, и҆ страсте́мъ поновле́ніе. сегѡ̀ ра́ди не здѣ̀ си́ми восплаще́ніе[2] себѣ̀ и҆мѣ́ти хощѝ, но въ нбⷭныхъ всѐ оѹ҆пова́ніе своѐ полага́й.

[ѳ҃] Преѡбижа́й вре́мєнныя сла̑сти тлѣ̑нныя, да не вѣ́чнагѡ наслажде́нія ѡⷮтщети́шися, и҆ жи́знь вѣ́чную погуби́ши. нѣ́сть бо и҆́но ничто́же плотскі́я сла́сти оѹ҆гожде́ніе, то́чію душе́вная тягота̀, и҆ ѕѣ́льное со́вѣсти томле́ніе: нѣ́сть толи́кѡ оѹ҆тѣше́нія, є҆ли́кѡ ско́рби: нѣ́сть толи́кѡ сла́дости, є҆ли́кѡ по се́мъ тя́жести: су́етное сіѐ оѹ҆тѣше́ніе, є҆му́же а҆́біе послѣ́дуетъ го́ресть и҆ оѹ҆печалѣ́ніе.

[і҃] Є҆ли́цы безслове́снѡ порабо́тишася ѡ҆б̾яде́ніемъ и҆ пія́нствомъ, ничто́же пресла́вно и҆ па́мяти досто́йно въ мі́рѣ содѣ́яша: но съ настоя́щею жи́знію, вѣ́чныя ѕлѣ̀ ѡⷮтщети́шася, и҆ па́мять свою̀ ѡⷮ среды̀ бл҃ги́хъ и҆стреби́ша: тѣ́мже а҆́ще ꙗ҆́си, не съ пристра́стіемъ ꙗ҆́ждь, а҆́ще піе́ши, не съ прилѣжа́ніемъ се́рдца пі́й: не здѣ́ бо тѝ є҆́сть соверше́ніе: пре́йдетъ бо сіѐ всѐ, и҆ вско́рѣ и҆змѣни́тся.