По шестой песни:
И поется кондак и икос (или мученичен, аще несть).Стихи́:
От земли́ же восхи́щен
И а́ще и возду́х сти́гнути:
Ра́достию Михе́я к Тебе́ дре́вом взы́де.
Сей бя́ше еди́н от шести́ на́десятих проро́к, пле́мени Ефре́мова. Облича́я бя́ше царя́ Аха́ва, за мно́гая и разли́чная беззако́ния, поне́же ненави́дяше его́ отхожда́ше проро́к, и хожда́ше сквозе́ го́ры мно́жайшая ле́та, да не нача́сте царю́ явля́яся, и того́ облича́я, на гнев того́ вооружи́т. По сконча́нии же Аха́вове, таковы́ми подо́бными беззако́нии обличи́ сы́на его́ ю́на су́ща. И не стерпе́в обличе́ния убие́н бысть, низ стены́ низве́ржен. И от сро́дник свои́х погребе́н бысть че́стне.
В то́йже день пренесе́ние честны́х моще́й, преподо́бнаго и богоно́снаго отца́ на́шего Феодо́сия игу́мена Пече́рскаго и́же в Ки́еве
При вели́ком кня́зе Все́володе Ки́евском, сы́не вели́каго кня́зя Яросла́ва Влади́мировича. Во осмонадеся́тое ле́то по преставле́нии свята́го отца́ на́шего Феодо́сия, в ле́то шестоты́сящное пять сот де́вятдесять девя́тое. Сотвори́ша сове́т мно́жество и́ночествующих, со игу́меном Иоа́нном, и ре́ша: «Ле́по есть нам бра́тие вы́ну пред очи́ма на́шима честную ра́ку свята́го отца́ на́шего Феодо́сия име́ти. И досто́йно поклоне́ние всегда́ тому́ приноси́ти, я́ко пои́стинне отцу́ и учи́телю, несть бо добро́ пребыва́ти сему́ кроме́ монастыря́ и це́ркви своея́. Поне́же той ю́ основа́, и чернори́зцы совокупи́». И устро́иша ме́сто на положе́ние моще́м свята́го, и гроб ка́менн поста́виша. И пре́жде трие́х дней Успе́ния Пречистыя Богородицы, посла́ игу́мен три богобоя́знивы мона́хи, да прокопа́ют над мощьми́. И труди́вшеся изменя́ющеся до полу́нощи, я́ко и мне́ти им и́нде копа́ти, и едва́ получи́ша. Егда́ же прокопа́ брат еди́н, тогда́ други́й спреди́ пеще́ры прише́д, рече́: «Уже́ кле́плют на у́треню». Сей же отвеща́: «Аз же прокопа́х». И в той час клепа́ния, яви́шася три столпи́, я́ко заре́ о́гненней: и стоя́вше над пеще́рою преидо́ша на верх це́ркви Пречи́стыя, иде́же положе́н бысть преподо́бный. И се ви́деша вси мона́си, иду́щии ко у́трени, та́кожде и мно́зи благочести́вии во гра́де, и́мже возвеще́нно бысть. И́же ви́девше зарю́ я́ко ду́жную над монастыре́м, ре́ша: «Се уже́ прино́сят мо́щи честны́я свята́го Феодо́сия». У́тру же бы́вшу мно́жество наро́да прии́де из Ки́ева со свеща́ми и фимиа́мом. И на други́й день совокупи́шася преподо́бнии епи́скопи: Перея́славский Ефре́м, Стефа́н Володи́мирский, Иоа́нн Черни́говский, Анто́ний Поро́сский, и игу́мени всех монастыре́й, со мно́жеством чернори́зец, и благове́рных христиа́н, и возложи́ша мо́щи свята́го на одр. Мо́щи же бя́ху святоле́пни, соста́ви це́ли вси, тле́нию неприча́стни. А власи́ главни́и присо́хли ко главе́: лице́ же све́тлостно, о́чи сомжа́не и устне́ доброглаго́ливии соедине́не. И взе́мше че́стно положи́ша в це́ркви Пресвяты́я Богоро́дицы, в притво́ре на десно́й стране́, в 14 день а́вгуста, в четверто́к, в пе́рвый час дне. И та́ко пра́здноваша све́тло в той день, е́же и до ны́не твори́мо есть во свято́й оби́тели той, сла́вяще Христа́ Бо́га, и святы́х Его́ па́мять почита́юще.
В то́йже день па́мять свята́го священному́ченика Марке́лла епи́скопа Апами́йскаго
Стихи́:
Тре́бами у́мными Бо́га насле́дивый,
И те́ло свое́ же́ртву насле́дил еси́, о́тче.
Сей бя́ше при Феодо́сии царе́, от Ки́прскаго нарица́емь о́строва, во́ньже и в Ми́рстей о́бласти быв и до́блестию его́ вруче́н. Вся́ка ужасну́в, благоче́стие па́че бога́тства стяжа́в. На архиере́йский чин вшед, и Апами́и Си́рстей епи́скоп быв, и́же и та́мо пра́ведно и преподо́бно пожи́в. Бысть же те́плый ревни́тель на Христо́ву веру. Це́ркви возставля́я во сла́ву Бо́гу, а и́дольския це́ркви ру́ша, я́ко ни еди́ныя оставлят́и отъити́, но та́мо сгоре́ти, я́коже глаго́лется: Прие́м святы́й во́ду и благослови́в, и на извая́нная покропи́в телеса́ Ди́ева, и́же и запали́тием изгоре́ти сотвори́в. Ят же бысть о сем от идолослужи́тель, и во огнь вве́ржен, и вене́ц муче́ния восприя́т. Соверша́ется же собо́р его́ в проро́чествии свята́го Иоанна Крести́теля в Фораки́и.
В то́йже день по́весть на предпра́зднество преставле́ния Пресвяты́я Богоро́дицы
Да есте́ ве́дуще бра́тие, я́ко днесь предпра́зднество есть Успе́ния Пресвяты́я Богоро́дицы, по пло́ти Ма́тере Го́спода на́шего Иису́са Христа́, да собере́мся вси в це́рковь на моли́тву. Днесь бо Ма́ти Христа́ Бо́га на́шего, оста́вив многопреле́стный свет сей и в ве́чныя оби́тели на небе́сная жили́ща хо́щет преити́. Сего́ ра́ди ра́дуются а́нгели на небесе́х, и челове́цы веселя́тся на земли́, зане́же херуви́м отступа́ет с пла́менным ору́жием от врат ра́йских. Ма́ти бо Госпо́дня вше́дши всех прие́млет, чту́щих Пресвято́е Ея́ Успе́ние.
Да никто́же вас возлю́бленнии облени́тся приити́ на похвалу́ Богоро́дицы. Да не зло́бы ра́ди и ле́ности лишите́ся тоя́ поро́ды; но препоя́савше кре́пко чре́сла своя́ воздержа́нием, и вся злы́я стра́сти отве́ржем от себе́: я́рость, клевету́, блуд, татьбу́, объяде́ние и пия́нство, и про́чая вся, я́же здра́вому смы́слу сопротивля́ющаяся. Восприи́мем же вме́сто сих: кро́тость и братолю́бие, чистоту́ и целому́дрие, ми́лостыню и страннолю́бие, смире́ние и любо́вь друг ко дру́гу иму́ще. Та бо есть сконча́ние зако́ну и проро́ком, и сих ра́ди сы́нове Бо́жии нарече́мся, и насле́дницы Ца́рствия Его́. И вся я́же воспро́сим, прии́мем от Него́, в сий век и в бу́дущий, я́ко за́поведем Его́ сохра́нницы. Ему́же сла́ва, ны́не и при́сно и во ве́ки веко́в. Ами́нь.