Стихи́:

Григо́рия и па́ки чудотво́рца,

Бо́гу предста́в, мно́жае ны́не чудеса́ творя́,

В седмьна́десятый вели́кий у́мре чудотво́рец Григо́рие

Сий бе́яше при Авлиа́не цари́, е́ллинский сын быв. Сам же быв христиани́н и та́инству ве́ры науче́н быв от Пресвяты́я Влады́чицы на́шея Богоро́дицы и богосло́вом Иоа́нном, прия́т же и чудотворе́ния дарова́ния: и нарече́ся чудотво́рец, творя́й чудеса́ мно́га, от ни́хже суть сия́:

В Александри́ю бо прише́д, оболга́н бысть блудни́цею: и святы́й же напусти́ на ню бе́са и па́ки исцели́ ю́. Та́же, во Амаси́ю прише́д и, доброде́тели его́ ра́ди, поста́влен бысть епи́скоп от Феди́ма Амаси́йскаго. И повеле́ ка́меню вели́ку дви́гнутися и поити́. Крести́ же и просмона́рия (храмохрани́теля) и́дольскаго. И бра́тома двема́ крамо́лящемася е́зера ра́ди и иссуши́ его́: и жезл соста́ви реку́, и́же и в дуб вели́к быв: и и́на чудеса́ сотвори́в.

Внегда́ хотя́ше ко Го́споду отъити́, благодари́в Го́спода, я́ко во гра́де его́ толи́ки неве́рныя, ели́ки обре́те, христиа́ны сотвори́в: и житие́ оста́вив.

Стихи́:

Не опису́ет Ла́зарь Тебе́ ны́не, Сло́ве:

Но Тебе́, Жи́ва ви́дя, уже́ шаро́в не тре́бует.

Сий из де́тства и́ноческое восприя́т житие́ и живописа́тельное худо́жество извы́к, и к же́стокому житию́ и воздержа́нию и ми́лостыни прилежа́: тем и святи́тельский сан восприе́млет. И отнуд на всякия ереси упра́влься: и толи́кия ско́рби не то́чию от евтихиа́н и несториа́н му́дрствующих [еди́нако с Диоско́ром], но и от безбо́жных иконобо́рец пострада́, ели́ким несть то́щно изрещи́. Но и к ста́рому Ри́му по́слан быв, апо́стольским и оте́ческим посо́бствуя уче́нием, и великоле́пно, [почтен быв,] возврати́вся. И на среди́ пути́ быв, не́коей ве́щи на телеси́ его́ роди́вшися, сконча́ся о Христе́. Честно́е же те́ло его́ принесено́ бысть во оби́тель Евандри́йскую: и та́мо положе́н бысть.

За Ефио́пскою страно́ю глаго́лемою Инди́йскою, есть страна́ Сенари́дская, в нейже пусты́ня вели́ка. И ту живя́ху отцы́ святи́и пусты́нницы, в ни́хже бысть мона́х не́кий прему́др, боже́ственным житие́м и сло́вом укра́шен, и свяще́нством соверше́н, и́менем Варлаа́м. Сей ве́чная возлюби́в, па́че вре́менных: па́че же рещи́, а́нгельским житие́м живы́й, бде́нием, и моли́твами, смире́нием, и посто́м те́ло свое́ удручи́в. Пото́м же от всех мона́хов удали́вся, по то́йже сенари́дстей пусты́ни хожде́ние сотвори́в, и в препу́стую да́льнюю пусты́ню шед, и та́мо живы́й. И бысть ему́ открове́ние, о сы́не царе́ве Иоаса́фе. И совле́к ри́зы черне́ческия, и облече́ся в мирски́я, и в ладию́ сед прии́де в ца́рство Инди́йское. И вни́де в Дама́с град, в пала́ту к царе́ву сы́ну Иоаса́фу, я́ко добр купе́ц. И показа́ ему́ многоце́нный би́сер, Го́спода Иису́са Христа́ Сы́на Бо́жия сказа́ ему́. И мно́го научи́в его́ от святы́х книг. И крести́ его́ во и́мя Отца́, и Сы́на, и Свята́го Ду́ха. И сотвори́ его́ до́брое овча́ боже́ственнаго ста́да Христо́ва. И утверди́ и́ в ве́ре Христо́ве, оста́вив ему́ ма́лую манти́йцу. И и́де па́ки в сенари́дскую пусты́ню вну́треннюю, и бо́льшим подвиза́нием подвиза́ся к Бо́гу: от фи́ник то́кмо, и от воды́ те́ло свое́ кормя́. И та́ко пребы́сть лета мно́га, чи́сто и непоро́чно а́нгельское житие́ пожи́в: стар сый ко Го́споду отъи́де.